အခန်း ၁၆၀
Vol. 16 Ch. 160
160
~
အခန်း ၁၆၀ : ဘာလို့ ကျွန်မကို အဲ့လို ကြည့်နေတာလဲ ...
~
မိနစ်နှစ်ဆယ်ခန့်အကြာတွင် ယန်ကျီဝမ်နှင့် ယွီလီ တို့ ယွီမိသားစု နေထိုင်ရာ ခြံဝင်းသို့ ရောက်လာခဲ့ကြသည် ။
ဤခြံဝင်းကြီးထဲတွင် ခြံဝင်းနှစ်ခုသာရှိပြီး ယွီမိသားစုက နောက်ဘက်ခြံဝင်းတွင် နေထိုင်ကြ၏ ။ ခြံဝင်းတစ်ခုလုံး လူသူကင်းမဲ့နေကာ ခွေးတစ်ကောင် ကြောင်တမြီးမျှပင် မမြင်ရချေ ။
စားနပ်ရိက္ခာ ရှားပါးလာသဖြင့် လူတိုင်းက အပြင်ထွက်သို့ မထွက်ကြတော့ပေ ။ အလုပ်သွားသူ အချို့ဆိုလျှင် မနက်စာပင် မစားကြဘဲ စက်ရုံရောက်မှသာ နေ့လည်စာ စားရန် စောင့်ဆိုင်းကြလေသည် ။
" အမေ.. သမီးတို့ ပြန်လာပြီ.. "
ယွီမိသားစု အိမ်ထဲသို့ ဝင်သွားချိန်တွင် အမေယွီ တစ်ယောက်တည်းသာ ရှိနေသည် ။ အဖေယွီက အလုပ်သွားနေပြီး ယွီဟိုက်တန်နှင့် ယွီလျန်တို့ကလည်း ကျောင်းသွားကြလေပြီ ။
အုတ်ကုတင်ပေါ်တွင် လှဲလျောင်းနေသော အမေယွီက သူတို့ ဝင်လာသည်ကို မြင်လိုက်ရသဖြင့် အံ့အားသင့်သွားပြီး...
" ဘာလို့ အစောကြီး ပြန်လာကြတာလဲ.. "
ယနေ့သည် သတို့သမီး အိမ်ပြန်လည်ရမည့်နေ့ ဖြစ်သဖြင့် ယန်ကျီဝမ်တို့ ဇနီးမောင်နှံ ပြန်လာမည်ကို သူမ သိထားပြီးသားပင် ။
ယွီလီက...
" အိမ်ကို ပြင်လို့ ပြီးသွားပြီလေ.. အဲ့ဒါကြောင့် သမီးတို့ စောစော ပြန်လာခဲ့တာ.. ခဏနေကျရင် ပရိဘောဂတွေ သွားဝယ်ကြမလို့.. "
အမေယွီက ယန်ကျီဝမ်အား ရေတစ်ခွက် ငှဲ့ပေးလိုက်ရင်း ရှင်းပြလိုက်သည် ။
" ကျီဝမ်.. လာ လာ ထိုင်ပါဦး.. သမီးအဖေက အလုပ်သွားတယ်.. ဒီနေ့ သမီးတို့ လာလည်မှာမို့ အိမ်မှာ စောင့်နေဖို့ အစက သူ့ကို ပြောထားသေးတယ်.. ဒါပေမဲ့ အဲ့ဒီ အဘိုးကြီးက အလုပ်ပဲ သွားချင်နေတာလေ.. "
ယန်ကျီဝမ်က ရယ်လိုက်ပြီး...
" ရပါတယ် အမေ.. ကျွန်တော်တို့ အားလုံးက မိသားစုတွေပဲလေ.. "
အဖေယွီ၏ လုပ်ရပ်ကို သူ နားလည်သည် ။ ဤသည်က စားဝတ်နေရေးအတွက်သာ ဖြစ်ပေသည် ။ ယခုခေတ်ကာလတွင် ဘဝက အလွန် ခက်ခဲလှ၏ ။ အလုပ်မရှိလျှင် ပိုက်ဆံမရှိနိုင်သလို ပိုက်ဆံမရှိလျှင်လည်း စားစရာ ရနိုင်မည် မဟုတ်ချေ ။
အဖေယွီက ယွီမိသားစု၏ တစ်ဦးတည်းသော ဝင်ငွေရှာသူ ဖြစ်ပြီး မိသားစုကြီး တစ်ခုလုံးကို ထောက်ပံ့နေရသဖြင့် သူ့အပေါ်တွင် ဖိအားများစွာ ရှိနေမည်မှာ အသေအချာပင် ။ ကံကောင်းစွာဖြင့်ပင် ယခုအခါ သမီးအကြီးဆုံး အိမ်ထောင်ကျသွားပြီ ဖြစ်၍ ဖိအားအချို့ လျော့ကျသွားသည် ။
ယန်ကျီဝမ်၏ နားလည်ပေးနိုင်စွမ်းကို မြင်ရသောအခါ အမေယွီက စိတ်သက်သာရာ ရသွားသည် ။
ထို့နောက် သူမက စားပွဲပေါ်ရှိ ရိက္ခာအိတ်ကို မြင်သွားပြီး...
" ဘာလို့ ရိက္ခာတွေ သယ်လာရပြန်တာလဲ.. အိမ်မှာ စားဖို့ လောက်ပါသေးတယ်.. အခု လူတိုင်း ရုန်းကန်နေကြရတာလေ.. သားတို့ မိသားစုကလည်း လူများတယ်.. နောက်နောင် ဘာမှ ထပ်မယူလာနဲ့တော့.. "
အိတ်ထဲရှိ ရိက္ခာများမှာ ဆယ်ကျင်းခန့် ရှိမည်ဟု ခန့်မှန်းရသည် ။ နှစ်ယွမ်နီးပါး တန်ကြေးရှိ၏ ။
ယွီလီက ရှင်းပြလိုက်သည် ။
" အမေ.. ရပါတယ်.. ဟိုဘက်အိမ်မှာ အများကြီး ကျန်ပါသေးတယ်.. "
သူမ ပြောသည်မှာ အမှန်ပင် ။ ရန်ရွေ့ဟွားက သူမကို အိမ်ရှိ ရိက္ခာများ ပြသခဲ့ရာ မျက်မြင်ဖြင့်ပင် ကျင်းရာနှင့်ချီ၍ ရှိနေသည် ။
ရန်ရွေ့ဟွား၏ အပြောအရ ယန်ဖူကွေ့နှင့် ယန်ကျီဝမ်တို့က အခြားသော ရိက္ခာများကိုလည်း တိတ်တဆိတ် ဖွက်ထားကြသေး၏ ။ ထို့ကြောင့် စားစရာ မလောက်ငှမည်ကို မစိုးရိမ်ရန် သူမအား ပြောထားခဲ့သည် ။
အမေယွီက ယွီလီ၏ နဖူးကို အသာပုတ်လိုက်ပြီး ဆက်ပြောချင်နေသေးသော်လည်း စကားကို ထိန်းထားလိုက်ကာ...
" သမီးကတော့လေ.. "
ယန်ကျီဝမ်က ပြုံးလိုက်ပြီး...
" အမေ..အမေတို့ နှစ်ယောက် စကားပြောကြပါဦး.. ကျွန်တော် အပြင်ထွက်ပြီး ဆေးလိပ်လေး ဘာလေး သောက်လိုက်ဦးမယ်.. "
ထိုသို့ပြောကာ ယန်ကျီဝမ် အပြင်သို့ ထွက်သွားလေသည် ။
ထိုအခါမှသာ အမေယွီက တိုးတိုးလေး ဆူလိုက်သည် ။
" သမီး.. နင့ လက်ထပ်တာ နှစ်ရက်ပဲ ရှိသေးတယ် ရိက္ခာတွေ အိမ်သယ်လာနေပြီ.. ဘယ်လိုလုပ် ဒီလောက်တောင် နမော်နမဲ့ နိုင်ရတာလဲ.. နင့် ယောက္ခမတွေ စိတ်ခုသွားရင် ဘယ်လိုလုပ်မလဲ.. "
မိသားစုတိုင်း ရုန်းကန်နေရချိန်တွင် သူတို့မိသားစုကတော့ တစ်နည်းတစ်ဖုံ အဆင်ပြေနေဆဲ ဖြစ်သည် ။ သမီးဖြစ်သူက လက်ထပ်ပြီးသည်နှင့် ပစ္စည်းများကို အိမ်သို့ သယ်လာလျှင် မသိသောသူများက သူတို့ မိသားစုအား အချောင်နှိုက်တတ်သည်ဟု ထင်မြင်သွားနိုင်သည် ။
သူမ၏ ယောက္ခမများကသာ မကျေမနပ် ဖြစ်လာလျှင် သမီးဖြစ်သူ၏ ရှေ့ဆက်ရမည့်ဘဝက အေးချမ်းပါတော့မည်လော။
ယွီလီက မိခင်ဖြစ်သူ၏ စိုးရိမ်မှုကို နားလည်စွာဖြင့် ပြုံး၍ ရှင်းပြလိုက်သည် ။
" အမေရယ်.. အမေပြောတာတွေကို သမီး နားလည်ပါတယ်.. ဒီရိက္ခာတွေကို သယ်လာဖို့ သမီးရဲ့ ယောက္ခမကိုယ်တိုင်က ပြောလိုက်တာ.. အစကတော့ သမီးလည်း မယူချင်ပါဘူး.. ဒါပေမဲ့ အတင်း ထည့်ပေးလိုက်လို့ ယူလာခဲ့ရတာ.. "
အမေယွီက သမီးဖြစ်သူအတွက် စဉ်းစားပေးနေခြင်းပင် ။
" အဲ့ဒါဆိုရင်တောင် လက်ခံလို့ မဖြစ်သေးဘူးလေ.. မိသားစုတိုင်း ရုန်းကန်နေရတာပဲ.. ဘာကိစ္စ ယောက္ခမတွေဆီက အကူအညီကို ယူနေရမှာလဲ.. "
ယွီလီ ဆက်ပြောမည်ကို မြင်လိုက်ရသဖြင့် အမေယွီက တားလိုက်ပြီး...
" ကောင်းပါပြီလေ.. နင့်ယောက္ခမတွေက သဘောကောင်းတယ်ဆိုတာ ငါ သိပါတယ်.. ဒါပေမဲ့ နင့်အဖေအကြောင်းလည်း နင် သိသားပဲ.. သူက သိက္ခာကို အရမ်းဂရုစိုက်တာ.. နင် ရိက္ခာတွေ သယ်လာတာကို သူသာ သိသွားရင် နင့်ကို သေချာပေါက် ဆူလိမ့်မယ်.. "
" ဟုတ်ကဲ့ပါ အမေ.. "
ယွီလီက နှုတ်မှသာ သဘောတူလိုက်သော်လည်း သူမ စိတ်ထဲတွင်တော့...
' မိသားစု အခက်အခဲ ရှိလာရင်တော့ ကျီဝမ်နဲ့ တိုင်ပင်ရမှာပဲ.. '
ထို့နောက် အမေယွီက တံခါးဝသို့ လှမ်းကြည့်လိုက်ပြီး တိုးတိုးလေး မေးလိုက်သည် ။
" လီလီ.. နင်နဲ့ ယန်ကျီဝမ်တို့ အဲ့ဒါ ဖြစ်ပြီးပြီလား.. "
ယွီလီ အံ့အားသင့်သွားပြီး...
" ဘာလဲ အဲ့တာက.. "
ထို့နောက် မိခင်ဖြစ်သူ ဘာကိုဆိုလိုမှန်း ချက်ချင်း နားလည်သွားကာ သူမ၏ လှပသော မျက်နှာလေးက ရှက်သွေးဖြာသွားသည် ။
မိခင်ဖြစ်သူက တိုက်တွန်းနေသည်ကို မြင်ရသောအခါ ယွီလီက အထင်လွဲသွားမည်ကို စိုးရိမ်သဖြင့် ခေါင်းခါပြီး ရှင်းပြလိုက်သည် ။
" တစ်ခုခု ပြောလေ.. "
" အမေကလည်း.. မဟုတ်ရပါဘူး.. ယန်ကျီဝမ်က အိမ်သစ်ပြောင်းတဲ့အထိ စောင့်မယ်လို့ ပြောထားလို့ပါ.. "
အမေယွီက စိတ်ပျက်လက်ပျက်ဖြင့်...
" နင်ကတော့ တကယ့်ကို ဘာမှ နားမလည်တဲ့ ကောင်မလေးပဲ.. တကယ်ကို ပေါ့ပေါ့ဆဆ နေတတ်လွန်းတယ်.. ယန်ကျီဝမ်က အရည်အချင်းရှိပြီး ရုပ်ရည်ကလည်း ရှိတဲ့ လူငယ်လေးလေ.. အပြင်မှာ သူ့ကို မျက်စိကျနေတဲ့ မိန်းကလေးတွေ ဘယ်လောက်တောင် ရှိနေမလဲဆိုတာ ဘယ်သူ သိနိုင်မှာလဲ.. "
အမေယွီက ...
" အမေပြောတာ နားထောင်.. နင် သူ့ကို လက်ထပ်ထားပြီးသား ဆိုတော့ ကလေးမြန်မြန် ယူလိုက်တော့.. သားလေး တစ်ယောက်လောက် မြန်မြန် မွေးပေးလိုက်.. ယောကျာ်းလေးမွေးပေးနိုင်မှ နင့်နေရာက ခိုင်မာမှာ.. ကြားလား.. "
ယွီလီက ရှက်ရွံ့စွာဖြင့် ခေါင်းညိတ်ပြလိုက်သည် ။
သို့သော်လည်း သူမ အနည်းငယ်တော့ စိတ်ရှုပ်သွားမိသည် ။ ဤကိစ္စက သူမ အပေါ်တွင်သာ မူတည်နေသည် မဟုတ်ဘဲ သူမ၏ ခင်ပွန်းဖြစ်သူ အပေါ်တွင်လည်း မူတည်နေသည် မဟုတ်ပါလော ။ သူမကဲ့သို့ အပြစ်ကင်းစင်သော မိန်းကလေးတစ်ယောက်အနေဖြင့် ဤကိစ္စမျိုးကို မည်သို့ အစပြုရဲပါမည်နည်း ။
ယွီမိသားစုအိမ်တွင် ခဏတာ နေထိုင်ပြီးနောက် ယန်ကျီဝမ်နှင့် ယွီလီတို့ ပြန်လာခဲ့ကြသည် ။
ထို့နောက် သူတို့က ပရိဘောဂများ ဝယ်ယူရန် ကုန်တိုက်သို့ သွားရောက်ခဲ့ကြ၏ ။ သူတို့က ကုတင်တစ်လုံး၊ ဗီဒိုတစ်လုံးနှင့် စားပွဲတစ်လုံး ဝယ်ယူခဲ့ကြသည် ။
ယန်ကျီဝမ်က နောက်ထပ် ပစ္စည်းအချို့ကို ထပ်ဝယ်ချင်သေးသော်လည်း ယွီလီက ပိုက်ဆံ ကုန်မည်စိုးသဖြင့် တားဆီးလိုက်လေသည် ။ ဤပစ္စည်း သုံးမျိုးနှင့်ပင် လုံလောက်နေလေပြီ ။
ယန်ကျီဝမ်က ထိုပစ္စည်းများကို သယ်ဆောင်ရန် လက်တွန်းလှည်းသမား တစ်ယောက်ကို ငှားရမ်းလိုက်သည် ။
ခြံဝင်းထဲသို့ ပြန်ရောက်လာသောအခါ ယန်ကျီဝမ်နှင့် လှည်းဆရာ ဆရာလဲ့တို့က ပရိဘောဂများကို ဘေးဘက်ရှိ အိမ်အသစ်ထဲသို့ အတူတူ သယ်လိုက်ကြသည် ။
ငွေရှင်းပေးကာ လှည်းဆရာအား ပြန်လွှတ်လိုက်ပြီးနောက် ယန်ကျီဝမ်က အခန်းထဲသို့ လိုက်ကြည့်လိုက်ရင်း ကျေနပ်အားရစွာ ခေါင်းညိတ်လိုက်သည် ။
" အခုမှပဲ အိမ်တစ်လုံးနဲ့ တူသွားတော့တယ်.. "
ယွီလီကလည်း ပျော်ရွှင်စွာဖြင့် ခေါင်းညိတ်လိုက်ပြီး...
" ဟုတ်ပါ့.. ခု မှပဲ ကြည့်လို့ ကောင်းသွားတော့တယ်.. "
ယနေ့မှစ၍ ဤနေရာက သူမ၏ အိမ်လေး ဖြစ်လာတော့မည် ။
ထိုအချိန်တွင် ရန်ရွေ့ဟွား ဝင်လာပြီး...
" ဘယ်လိုလုပ် ဒီလောက်မြန်မြန် ပြန်ရောက်လာကြတာလဲ.. "
အသစ်စက်စက် ပရိဘောဂများကို မြင်လိုက်ရသောအခါ ပိုက်ဆံ နှမြောသဖြင့် ရန်ရွေ့ဟွား၏ ရင်ထဲတွင် နာကျင်သွားသည် ။ သူမက ညည်းတွားချင်စိတ် ပေါ်လာသော်လည်း ချွေးမဖြစ်သူက ယခုမှ အိမ်ထောင်ကျကာစ ဖြစ်သဖြင့် စိတ်ကို ပြန်ထိန်းထားလိုက်ရ၏ ။
ယွီလီက...
" အဖေက အလုပ်သွားတယ်လေ.. အဲ့ဒါကြောင့် ခဏထိုင်ပြီးတာနဲ့ ပရိဘောဂတွေ သွားဝယ်ပြီး ပြန်လာခဲ့ကြတာ.. "
ရန်ရွေ့ဟွားက ခေါင်းညိတ်လိုက်ပြီး ချီးကျူးလိုက်သည် ။
" ဆရာ လဲ့ရဲ့ လက်ရာက တကယ်ကို ကောင်းတာပဲ.. အထူးသဖြင့် အိမ်သာက အရမ်းမိုက်တယ်.. ဒီမနက် အမေ လာကြည့်သေးတယ်.. အမှန်အတိုင်း ပြောရရင် သုံးရတာ တကယ်ကို အဆင်ပြေတယ်.. သုံးပြီးရင် ရေဆေးချလိုက်ရုံပဲ.. အပြင်က အများသုံး အိမ်သာကို သွားနေစရာတောင် မလိုတော့ဘူး.. "
ယန်ကျီဝမ်က ခေါင်းခါပြီး ရယ်လိုက်သည် ။ ထိုအရာက အဆင်မပြေဘဲ နေပါမည်လော ။
ဤပစ္စည်းများ ဝယ်ယူရန်နှင့် အိမ်သာ ဆောက်လုပ်ခြင်း အပါအဝင် စုစုပေါင်း ယွမ်နှစ်ဆယ်ခန့် ကုန်ကျခဲ့သည် ။ သို့သော်လည်း ဤအိမ်သာလေးက ဆောက်ရကျိုး နပ်ပေသည် ။ အနည်းဆုံးတော့ ညသန်းခေါင်အချိန် အပေါ့အပါး သွားလိုသည့်အခါ အပြင်သို့ ပြေးထွက်နေစရာ မလိုတော့ပေ ။
ထို့နောက်တွင်တော့ ရန်ရွေ့ဟွားနှင့် ယွီလီတို့က အိမ်ကို အတူတကွ သန့်ရှင်းရေး လုပ်ကြသည် ။ ယန်ကျီဝမ်ကလည်း စောင်များနှင့် အခြား လိုအပ်သော ပစ္စည်းများကို ယူပေးကာ ကူညီလုပ်ကိုင်ပေးလေသည် ။
အားလုံး ဝိုင်းဝန်း လုပ်ကိုင်ပြီးနောက်တွင်တော့ အိမ်အသစ်လေးမှာ အတော်လေး ကြည့်ကောင်းသွားခဲ့ပြီ ဖြစ်သည် ။
အနည်းဆုံးတော့ ယခင်အခန်းကျဉ်းလေးထဲတွင် ဆက်၍ အံကြိတ်ထားစရာ မလိုတော့ချေ ။
ညအချိန်သို့ ရောက်သောအခါ...
ဇနီးမောင်နှံ နှစ်ယောက်သည် ယန်အိမ်တွင် ညစာစားပြီးနောက် အိမ်အသစ်လေးဆီသို့ ပြန်လာခဲ့ကြသည် ။
အိမ်သာထဲမှ ရေသံများကို နားထောင်ရင်း ယန်ကျီဝမ် အနည်းငယ် ဂနာမငြိမ် ဖြစ်လာ၏ ။ နှစ်ညတိုင်တိုင် အောင့်အည်း သည်းခံခဲ့ရပြီးနောက် ယခုညတွင်တော့ သူ လိုချင်သည့်အရာကို နောက်ဆုံး၌ ရရှိပေတော့မည် ။
မကြာမီပင် ယွီလီက အင်္ကျီပါးပါးလေးကို ဝတ်ကာ ရေချိုးခန်းထဲမှ ထွက်လာခဲ့သည် ။ မှိန်ပျပျ မီးရောင်အောက်တွင် သူမ၏ လည်တိုင်လေး၌ ရေစက်ကလေးများ ခိုတွဲနေဆဲပင် ။
ယန်ကျီဝမ်သည် ထိုမြင်ကွင်းကြောင့် ခဏတာ မိန်းမောသွားပြီး အသက်ရှူသံများပင် အနည်းငယ် မြန်ဆန်လာသည် ။ သူ၏ အာခေါင်က အနည်းငယ် ခြောက်လာ၏ ။
ယွီလီက ယန်ကျီဝမ်၏ အကြည့်များကို သတိထားမိလိုက်သဖြင့် သူမ၏ လှပသော မျက်နှာလေးက ရှက်သွေးဖြာသွားကာ...
" ဘာလို့ ကျွန်မကို အဲ့လို ကြည့်နေရတာလဲ.. "
ယန်ကျီဝမ်က လက်ယပ်ခေါ်လိုက်ပြီး သူ၏ အသံမှာ ပေါက်ကွဲလိုမှုကို မနည်းထိန်းချုပ်ထားရသည့် အသံဖြစ်နေသည် ။
" ဒီကို လာခဲ့.. "
ယွီလီမှာ ရှက်ရွံ့စွာဖြင့် အနားသို့ လျှောက်လာသည် ။
" အို.. "
မျက်စိတစ်မှိတ်အတွင်းမှာပင် ယွီလီက ယန်ကျီဝမ်၏ ပေါင်ပေါ်သို့ ရောက်သွား၏ ။
" ဘာမှ မလုပ်ပါဘူး.. မင်းကို စားချင်ရုံလေးပါ.. "
ယန်ကျီဝမ်က ရယ်လိုက်ပြီး ယွီလီအား အိပ်ရာပေါ်သို့ လှဲချလိုက်ကာ စောင်ဖြင့် ဖုံးအုပ်လိုက်ပါတော့သည် ။