အခန်း ၂၃၉

အခန်း ၂၃၉ - ကပ်ဘေး

ကောင်းကင်ဘုံနန်းတော်သည် အငြိုးအတေးကြီးသော လျှို့ဝှက်အသင်းအဖွဲ့ဖြစ်သည်။ သူတို့၏ အဖွဲ့ဝင်များကို သတ်ဖြတ်ခြင်းအတွက် ချီရွှမ်းစုကို အလွယ်တကူ လွှတ်ပေးလိမ့်မည် မဟုတ်ပေ။

ကောင်းကင်ဘုံနန်းတော်သည် ကျိုးဝါတောင်ကုန်းနှင့် ဆားကန်က ဖေးလုံတည်းခိုခန်းမှာ သူတို့၏ အဖွဲ့ဝင်များကို ဆုံးရှုံးခဲ့ရသော်လည်း ဤသေဆုံးမှုများသည် အင်ပါယာနန်းတော် နောက်ခံပေးထားသည့် ဖီးနစ်စိမ်းတပ်ဖွဲ့ကြောင့် ဖြစ်သည်ဟု သူတို့ မှတ်ယူထားကြ၏။ လိုအပ်သည့်အခါ ဝတ်ရုံနက်များက ဖီးနစ်စိမ်းတပ်ဖွဲ့ကို လာရောက်ကူညီပေလိမ့်မည်။ ထို့ကြောင့် ဖီးနစ်စိမ်းတပ်ဖွဲ့က ကြောင်ဖြစ်ပြီး ကောင်းကင်ဘုံနန်းတော်က ကြွက်ဖြစ်ခဲ့၏။

သို့သော် သာမန်လူများအတွက်တော့ ကောင်းကင်ဘုံနန်းတော်က မကိုင်လှုပ်နိုင်သည့် အင်အားစုကြီး ဖြစ်နေဆဲပင်။ သူတို့၏ အဖွဲ့ဝင်များ သတ်ဖြတ်ခံရသည်ဆိုလျှင် ကောင်းကင်ဘုံနန်းတော်က အသာတကြည် လွှတ်ပေးလိမ့်မည် မဟုတ်ပေ။

ကောင်းကင်ဘုံနန်းတော်သည် ဖီးနစ်စိမ်းတပ်ဖွဲ့နှင့် ရင်ဆိုင်ရာမှာ ပြင်းထန်ကြမ်းတမ်းသော စိတ်သဘောထားရှိ၍ သူတို့နှင့် အသေအကြေတိုက်ခိုက်မည်ဟု ကျိန်ဆိုထားသော်လည်း တကယ်တမ်းမှာတော့ သူတို့၏ သေဆုံးသွားသော အဖွဲ့ဝင်များအတွက် အင်ပါယာနန်းတော်ကို ကောင်းကောင်းလက်စားချေလိမ့်မည် မဟုတ်ပေ။ သို့သော် သူတို့သည် သာမန်လူများကိုတော့ သေချာပေါက် တိုက်ခိုက်ရဲလေသည်။

ချီရွှမ်းစုကလည်း ဤအချက်ကို နားလည်သဘောပေါက်ထား၏။ ထို့ကြောင့်ပင် သူက ကျားဇီကို သတ်ဖြတ်ဖို့ နတ်နဂါးပစ္စတိုကို အသုံးပြုခဲ့ခြင်းဖြစ်၏။ သူသုံးသော ကျည်ဆန်ကို တာအိုဂိုဏ်းတော်၏ ထျန်ကျိခန်းမကနေ ထုတ်ပေးထားပြီး ယင်းမှာ တာအိုဂိုဏ်းတော်၏ တစ်မူထူးခြား အမှတ်တံဆိပ် ပါရှိလေသည်။ ထို့ကြောင့် ကျားဇီ၏ သေဆုံးမှုသည် တာအိုဂိုဏ်းတော်ကြောင့်ဖြစ်သည်ဟု ကောင်းကင်ဘုံနန်းတော်က တွေးထင်ကြပေလိမ့်မည်။

သူက သင်္ဘောသား ဓားနှစ်လက်ကို သိမ်းဆည်းပြီး နေရာကနေ အလျင်အမြန် ထွက်ခွာသွား၏။

တကယ်တော့ သူက ကောင်းကင်ဘုံနန်းတော်ကို ရန်မစချင်ခဲ့ပေ။ သို့သော် ထိုလူများက သူ့ကို အရင်စတင်သတ်ဖြတ်လာခြင်းကြောင့် သူ့ကိုယ်သူ ခုခံကာကွယ်ရသည်။ သူ၏ ကျင့်ကြံမှုအဆင့်က အနည်းငယ် နိမ့်ကျနေခဲ့မည်ဆိုလျှင် သေရမည့်သူက သူဖြစ်နေပေလိမ့်မည်။ ထို့ကြောင့် ဤကောင်းကင်ဘုံနန်းတော် အဖွဲ့ဝင်များအပေါ် သူ့မှာ ငဲ့ကွက်ခြင်း သို့မဟုတ် စာနာသနားခြင်း လုံးဝ မရှိပေ။

ချီရွှမ်းစုသည် ထိုညမှာပင် တည်းခိုခန်းကို ပြန်ရောက်လာ၏။ ခဏမျှ တွေဝေပြီးနောက် နှမြောတွန့်တိုစွာနှင့် ငွေစက္ကူအတန်ကြီးတစ်ရွက်ကို ထုတ်ယူကာ ဆိုင်ရှင်နှင့် သူ့ဇနီးကို သွားပေးလိုက်၏။ ကပ်ဘေးတစ်ခု ကျရောက်လာတော့မည် ဖြစ်သောကြောင့် ဤနေရာကနေ တတ်နိုင်သမျှမြန်မြန် ထွက်ခွာဖို့လည်း သူတို့ကို သတိပေးလိုက်၏။

အကြောင်းပြချက်က ရိုးရှင်းသည်။ ကျန်ရစ်ခဲ့သော ဆားဖြူများက ထိုနေရာမှာ ဆားမှောင်ခိုသမားများ ရှိခဲ့ကြောင်း ညွှန်ပြနေ၏။ ဤဆားမှောင်ခိုသမားများက ချီရွှမ်းစု၏ မျက်နှာကို တွေ့မြင်ထားဖူးရာ သူ့ကိုခြေရာကောက်ရင်း တည်းခိုခန်းသို့ ရောက်ရှိလာပေလိမ့်မည်။ လျှို့ဝှက်အသင်းအဖွဲ့များ၏ လုပ်ထုံးလုပ်နည်းများကို ချီရွှမ်းစုက သိရှိထားပြီး ဤနေရာမှာ ဆက်နေမည်ဆိုလျှင် ဆိုင်ရှင်နှင့် သူ့ဇနီးက အဆုံးသတ်ကောင်းနိုင်မည် မဟုတ်သည်ကို ချီရွှမ်းစုက ကြိုတင်ခန့်မှန်းမိ၏။ ထို့ကြောင့် ချီရွှမ်းစုက သူတို့ကို ဤနေရာကနေ တတ်နိုင်သမျှမြန်မြန် ထွက်ခွာခိုင်းပြီး လျော်ကြေးအနေဖြင့် ထိုက်ဖျင်ဒင်္ဂါးတစ်ရာ ပေးလိုက်ခြင်းဖြစ်သည်။

ပြောရမည်ဆိုလျှင် တည်းခိုခန်းက မြို့ထဲတွင် ဆောက်လုပ်ထားခြင်း မဟုတ်ရာ အဆောက်အအုံများက တန်ဖိုးများစွာ မရှိပေ။ ဤလုပ်ငန်းကို သူတို့က ထုခွဲရောင်းချမည်ဆိုလျှင်ပင် အလွန်ဆုံး ထိုက်ဖျင်ဒင်္ဂါး တစ်ရာခန့်သာ ရရှိပေလိမ့်မည်။

သူတို့ကို အသပြာထုတ်ပေးလာခြင်းကြောင့် မဟုတ်လျှင် ချီရွှမ်းစုက သူတို့ကို လိမ်ညာလှည့်စားနေခြင်းဖြစ်မည်ဟု ဆိုင်ရှင်နှင့် သူ့ဇနီးက သံသယဝင်ပေလိမ့်မည်။ ထိုက်ဖျင်ဒင်္ဂါးတစ်ရာနှင့်အတူ ဆိုင်ရှင်နှင့် သူ့ဇနီးက ဆက်လက်၍ သံသယမဝင်တော့ပေ။

ခဏမျှ ဆွေးနွေးပြီးနောက် ထိုဇနီးမောင်နှံက သူတို့ ပိုင်ဆိုင်သမျှကို ထုပ်ပိုး၍ ညတွင်းချင်း ထွက်ခွာသွားကြ၏။

ဤကဲ့သို့သော သတိပေးချက်များကို ယုံကြည်လက်ခံလိုက်သည်က အမြဲတမ်း ပိုကောင်းလေသည်။ အဆောက်အအုံက ဤနေရာမှာ ရှိနေဦးမည်ဖြစ်ရာ အချိန်တစ်ခုကြာလျှင် သူတို့က ပြန်လာကြည့်နိုင်၏။ ဘာမှမပြောင်းလဲလျှင် ဤဇနီးမောင်နှံက ထိုက်ဖျင်ဒင်္ဂါး တစ်ရာကို အလကားလိုလို ရရှိလိုက်ခြင်း ဖြစ်ပေမည်။

ချီရွှမ်းစုက သူ့လမ်းသူ ခရီးဆက်လိုက်၏။ သို့သော် ထိုက်ဖျင်ဒင်္ဂါးတစ်ရာ ဆုံးရှုံးလိုက်ရသည့်အတွက် သူက ဝမ်းနည်းနေပြီး နောက်နောင် ဤကဲ့သို့ ပရဟိတ မလုပ်ဖို့ သူ့ကိုယ်သူ သတိပေးလိုက်၏။

မည်သို့ပင်ဆိုစေ ထိုက်ဖျင်ဒင်္ဂါးတစ်ရာက နည်းပါးသော ပမာဏ မဟုတ်ပေ။ ထိုငွေစက္ကူကို ဒင်္ဂါးများနှင့် လဲလှယ်မည်ဆိုလျှင် ပိဿာဆယ်ချီ ရှိပေလိမ့်မည်။

ချီရွှမ်းစုကို အံ့အားသင့်သွားစေသည်မှာ အရင်တုန်းကဆိုလျှင် ကောင်းကင်ဘုံနန်းတော်သည် လင်းနန်နှင့် ကျန်းနန်ဒေသများမှာသာ လှုပ်ရှားကြလေသည်။ ယခု သူတို့က ပိုင်နက်နယ်မြေများကို ချဲ့ထွင်နေပုံရပြီး အနောက်မြောက်ဘက်နှင့် အခြားသော နေရာဒေသများအထိ ဖြန့်ကြက်လာကြသည်။ ကံကောင်းသည်မှာ လျန်ကျိုးက ကောင်းကင်ဘုံနန်းတော်၏ ပင်မယဇ်ပလ္လင်နှင့် ဝေးကွာလေသည်။ လျန်ကျိုးမှာ ရှိသော နယ်ခံယဇ်ပလ္လင်က ကျွမ်းကျင်တိုက်ခိုက်ရေးသမား အနည်းငယ်မျှနှင့် အတော်လေး အားနည်းလေသည်။

သို့သော် သူတို့က သူ့နောက်သို့ လိုက်လာမည်ကို ချီရွှမ်းစုက စိုးရိမ်နေဆဲဖြစ်၏။ ကောင်းကင်ဘုံနန်းတော်က အနောက်မြောက်ဘက်မှာ သူတို့၏ ပိုင်နက်နယ်မြေကို ချဲ့ထွင်ချင်သည်ဆိုလျှင် ဤနေရာဒေသမှာ ဦးဆောင်ဖို့အတွက် ဒေသဆိုင်ရာ ခေါင်းဆောင်တစ်ဦးကို လိုပေလိမ့်မည်။ အသင့်လျော်ဆုံးလူမှာ ကျိုးဝါတောင်ကုန်းတွင် လင်းယုန်နှင့်ခွေး သတ်ဖြတ်ခြင်းအစည်းအဝေးကို ပြုလုပ်ခဲ့သော ဖုန့်ပိုဖြစ်သည်။

ကောင်းကင်ဘုံနန်းတော်သည် အစက ဤအခွင့်အရေးကို အသုံးချ၍ လူအင်အားတချို့ စုဆောင်းပြီး ထိုနေရာမှာ အခြေချသည့် အခြားသော လျှို့ဝှက်အသင်းအဖွဲ့များနှင့် မိတ်ဆွေဖွဲ့ဖို့ ကြံဆထား၏။ သို့သော်လည်း ဖီးနစ်စိမ်းတပ်ဖွဲ့နှင့် ဝတ်ရုံနက်များက သူတို့ကို တရကြမ်း တိုက်ခိုက်လာလိမ့်မည်ဟု ထင်မှတ်မထားခဲ့ကြပေ။

လင်းယုန်နှင့်ခွေး သတ်ဖြတ်ခြင်းအစည်းအဝေးသည် ဖီးနစ်မျက်လုံးဗုံးဖြင့် ဖြိုခွင်းခံခဲ့ရပြီး ဖုန့်ပိုခေါ်ဆောင်လာသည့် လူများကလည်း သေကြေပျက်စီးထိခိုက်မှုများနှင့် ကြုံတွေ့ခဲ့ရ၏။ သူ၏ သစ္စာခံ လက်အောက်ငယ်သားနှစ်ဦး၊ တင်းရှောင်နှင့် ကျားရှန်သည် လာရာလမ်းမှာ ဖီးနစ်စိမ်းတပ်ဖွဲ့၏ ကြားဖြတ်တိုက်ခိုက်ခြင်း ခံရပြီး သေဆုံးခဲ့ကြသည်။

လူသူအင်အား ဖြည့်တင်းဖို့အတွက် ကောင်းကင်ဘုံနန်းတော်သည် နယ်ခံဆားမှောင်ခိုကူးသူများ၊ ဓားပြများနှင့် လူဆိုးလူမိုက်များကို ပစ်မှတ်ထား၍ ဤလူများကို သူတို့ထံ အတင်းအကျပ် ဝင်ရောက်ခိုင်းမည်ဖြစ်သည်။

ရလဒ်ကတော့ သတင်းဆိုးသာ ထွက်ပေါ်လာ၏။ သူတို့သည် အဖွဲ့ဝင်အသစ်များ မရရှိသည့်အပြင် နယ်ခံယဇ်ပလ္လင်ခေါင်းဆောင် ကျားဇီက သတ်ဖြတ်ခံလိုက်ရ၏။ ဤသတင်းကို ကြားပြီး ဖုန့်ပိုက ဒေါသချောင်းချောင်းထွက်နေ၏။ ဤတစ်ခေါက် ပင်မယဇ်ပလ္လင်သို့ သူပြန်သွားသည့်အခါ သူက အပြစ်ပေးခံရပေတော့မည်။

ထိုသို့ဖြင့် ဖုန့်ပိုသည် အလောင်းများကို ကိုယ်တိုင်လာရောက်စစ်ဆေးပြီး သတ်ဖြတ်သူကို ဖော်ထုတ်ဖို့ ရှင်သန်ကျန်ရစ်သူများကို မေးခွန်းထုတ်လိုက်၏။ ထို့နောက် ဆားမှောင်ခိုကူးသူများကနေ ချီရွှမ်းစု တည်းခိုခဲ့သည့် တည်းခိုခန်းအထိ ခြေရာကောက်မိသော်လည်း တည်းခိုခန်းကို စွန့်ပစ်သွားကြပြီဖြစ်၏။ ကောင်းကင်ဘုံနန်းတော်က သူတို့၏ အမျက်ဒေါသကို ဖွင့်ထုတ်သည့်အနေဖြင့် တည်းခိုခန်းကို မီးရှို့လိုက်ကြ၏။

ရှင်သန်ကျန်ရစ်သူများ၏ ပြောပြချက်အရ ဖုန့်ပိုသည် အခြေအနေကို အကြမ်းဖျင်း ချိတ်ဆက်မိနိုင်၏။ ကျားဇီက တိုက်ပွဲထဲသို့ မဝင်ရောက်ခင် ‘ဝတ်ရုံနက်’ ဟူ၍ အော်ဟစ်ခဲ့လေသည်။

ကျန်ရစ်ခဲ့သော ကျည်ခွံများကလည်း တာအိုဂိုဏ်းတော်၏ ထန်ကျိခန်းမမှ ဖြစ်သည်။ တာအိုဂိုဏ်းတော်နှင့် အင်ပါယာနန်းတော်က ခဲယမ်းလက်နက်များ မကြာခဏ ဖလှယ်ကြသည်မှာ လျှို့ဝှက်ချက်မဟုတ်ပေ။ အခြေအနေက မည်သို့ပင်ဆိုစေ သတ်ဖြတ်သူသည် သာမန်လူတစ်ယောက် မဟုတ်ဘဲ တာအိုဂိုဏ်းတော်မှ သို့မဟုတ် အင်ပါယာနန်းတော်မှ ဖြစ်ကြောင်း ညွှန်ပြနေ၏။

ထိုသို့ဖြင့် လက်စားချေရကောင်းမလား စဉ်းစားရင်း ဖုန့်ပိုက အကျပ်ရိုက်သွား၏။

တစ်ဖက်မှာ တာအိုဂိုဏ်းတော်သည် လျှို့ဝှက်အသင်းအဖွဲ့များကို ယခုအချိန်မှာ ပြင်းပြင်းထန်ထန် ဖြိုခွင်းနေ၏။ ထို့ကြောင့် သူတို့ကို မဆင်မခြင်ရန်သွားစသည်က ဉာဏ်ရှိရာမကျပေ။ ဖီးနစ်စိမ်းတပ်ဖွဲ့ကတော့ သူတို့မှာ ဝတ်ရုံနက်များ၏ အကူအညီရှိနေပြီး သူတို့ကိုလည်း လျှော့မတွက်သင့်ပေ။

တစ်ဖက်မှာတော့ ဖုန့်ပိုသည် အဖွဲ့ဝင်များ၏ သေဆုံးမှုနှင့်ပတ်သက်၍ တစ်ခုခုလုပ်ပေးဖို့ လိုနေသည်။ မဟုတ်ပါက ကောင်းကင်ဘုံနန်းတော်အတွင်း စိတ်ဓာတ်ပိုင်းဆိုင်ရာ ကျဆင်းပြီး နယ်မြေချဲ့ထွင်မည့် သူတို့၏ မျှော်လင့်ချက်က ပျောက်ကွယ်သွားပေလိမ့်မည်။

နောက်ဆုံးမှာတော့ ကောင်းလှသည် မဟုတ်သော်လည်း ရွေးချယ်စရာ နှစ်ခုထဲမှ တစ်ခုကို မဖြစ်မနေ သူရွေးချယ်ရတော့မည်။ ထိုသို့ဖြင့် ခဏမျှ စဉ်းစားတွေးတောပြီးနောက် သူ၏ လက်အောက်ငယ်သား တစ်အုပ်စုကို စေလွှတ်မည့်အစား ထိုလူ့နောက်ကို သူကိုယ်တိုင်အမဲလိုက်ဖို့ ဆုံးဖြတ်လိုက်၏။

တာအိုဂိုဏ်းတော်နှင့် အင်ပါယာနန်းတော်က သူတို့၏ လုံခြုံရေးကို တိုးမြှင့်ထားရာ လက်အောက်ငယ်သား တစ်အုပ်စုက မလိုလားအပ်သော စိတ်အာရုံကို အလွယ်တကူ ရရှိပေလိမ့်မည်။ ထပ်တလဲလဲ ရှုံးနိမ့်ပြီးနောက် သူတို့၏ စိတ်ဓာတ်ပိုင်းဆိုင်ရာက ကျဆင်းနေပြီး သူတို့၏ လက်အောက်ငယ်သားများက အနားယူ၍ ပြန်လည်အားဖြည့်ဖို့ လိုအပ်နေ၏။ ထို့ကြောင့် ဖုန့်ပိုအနေဖြင့် ပိပိရိရိလည်း ဖြစ်စေရန် တစ်ယောက်တည်း လှုပ်ရှားသည်က ပိုကောင်းပေလိမ့်မည်။

ဖုန့်ပိုမှာ သတ်ဖြတ်သူကို ရှာဖွေဖို့ နည်းလမ်းတစ်ခုလည်း ရှိနေ၏။ သူက ကျားဇီ၏ အလောင်းကနေ သွေးစတချို့ကို ရှာတွေ့သွား၏။ ကျားဇီက ယွီရှုအဆင့် ကိုယ်ခံပညာသိုင်းသမားတစ်ဦး ဖြစ်သောကြောင့် ချီရွှမ်းစုကလည်း လုံးဝ မထိမခိုက် မရှိနိုင်ခဲ့ပေ။ ချီရွှမ်းစုသည် အသေးအဖွဲ့ဒဏ်ရာတချို့ ရရှိခဲ့သော်လည်း အလျင်အမြန် ပြန်လည်ကုသနိုင်ခဲ့၏။ ဤသွေးစများသည် သတ်ဖြတ်သူကို ခြေရာကောက်ဖို့ ဖုန့်ပို အသုံးပြုမည့် အဓိက ပစ္စည်းဖြစ်၏။

လိမ္မာပါးနပ်သော တိုက်ခိုက်မှုများနှင့် တစ်ဖက်သူကို ချိုးနှိမ်နိုင်သည့် တာအိုနည်းလမ်းများစွာ ရှိလေသည်။ သူတို့က တစ်ဖက်သူ၏ လက်သည်း၊ ဆံပင် သို့မဟုတ် အခြားသော ကိုယ်အင်္ဂါ အစိတ်အပိုင်း တစ်ခုခုကို ရရှိသည်နှင့် ၎င်းကို ကြားခံအဖြစ်သုံးပြီး ကောက်ရိုးရုပ်တစ်ရုပ်ကို ပြုလုပ်နိုင်၏။ ဤကောက်ရိုးရုပ်ကို ရိုက်နှက်ခြင်းက တစ်ဖက်လူကို နာကျင်ခံစားရစေလေသည်။ ထိုသို့ဖြင့် တစ်ဖက်လူ၏ ဝိညာဉ်ကိုလည်း နှုတ်ယူနိုင်သည်။

ဖုန့်ပို အသုံးပြုသည့် အစီအရင်က ထိုကဲ့သို့ ဆင်တူသော်လည်း သွေးကို ကြားခံအဖြစ်သုံးပြီး ချီရွှမ်းစု၏ တည်နေရာကို ထောက်လှမ်းမည့် ခြေရာကောက်အစီအရင်တစ်ခု ဖြစ်သည်။

ဖုန့်ပိုက မျက်လုံးနှစ်ဖက်ကို မှိတ်လိုက်၏။ ရုတ်တရက် ဝေဝါးဝါး ပုံရိပ်တစ်ခုက ဖုန့်ပို၏ မျက်လုံးရှေ့မှာ ပေါ်ထွက်လာ၏။ ယင်းသည် ခြုံထည်ကို ဝတ်ဆင်၍ တရားဝင်လမ်းမကျယ်မှာ မြင်းစီးနေသည့် လူတစ်ယောက်ဖြစ်ပြီး သူ့နောက်မှာ ဖုန်လုံးများက ထောင်းထောင်းထနေ၏။ လမ်းဘေးက ကြီးမားသော ကျောက်တိုင်တစ်တိုင် အနားကနေ ဖြတ်သွားသည့်အခါ ယင်းပေါ်တွင် လျန်ကျိုးဟူသော စာကို တွေ့မြင်လိုက်ရ၏။

တစ်ချိန်တည်းမှာ ဖုန့်ပိုသည် သန်မာသော ဆွဲငင်အားတစ်ခုကို ခံစားလိုက်ရ၏။ ထိုသို့ဖြင့် ဖုန့်ပိုသည် သူ့ပစ်မှတ် ချီရွှမ်းစုကို ခြေရာကောက်နိုင်သွားသည်။