အခန်း ၁၂၅

အခန်း (၁၂၅) သာယာငြိမ့်ညောင်းတဲ့ ဒရယ်ပြောက်လေးတွေရဲ့ အသံ... သဘာဝတရားရဲ့ အံ့မခန်း မြင်ကွင်းတစ်ရပ်

သစ်တောထဲတွင်တော့ အတော်လေး စည်ကားနေဆဲပင် ဖြစ်သည်။

ယနေ့ ရွှီယန်၏ အကျိုးအမြတ်မှာ သာမန်သာဖြစ်ပြီး မှိုအချို့ကိုသာ ကောက်ယူနိုင်ခဲ့သော်လည်း ငွေတော့ သိပ်မရနိုင်ပေ။

သူကလည်း ဘာမှ ထူးခြားသည်ဟု မထင်မှတ်ထားဘဲ တောင်ထွက်ပစ္စည်း ရှာဖွေရန် သီးသန့် ရည်ရွယ်ချက် မရှိဘဲ ဤသို့ တောင်ပေါ်တွင် ဟိုဟိုဒီဒီ လမ်းလျှောက်နေရသည်ကမှ ပို၍ သက်သောင့်သက်သာ ရှိသည်ဟုပင် ခံစားနေရ၏။ ယေဘုယျအားဖြင့်လည်း အတော်လေး ပေါ့ပါးလှပေသည်။

လိုက်ဖ်ထဲတွင်တော့ အတော်လေး စည်ကားနေသည်။ ယခင်ကထက်စာလျှင် လူကြိုက်များမှု အနည်းငယ် ကျဆင်းသွားသော်လည်း ကြည့်ရှုသူ အရေအတွက်ကတော့ ပုံမှန်အားဖြင့် လေးသောင်း ငါးသောင်းခန့် ရှိနေဆဲပင် ဖြစ်၏။

"ဒီလိုက်ဖ်လွှင့်သူက ချန်ပိုင်တောင်တန်းမှာ တကယ်ကို အကြီးအကဲလို နေတာတဲ့လား... တိရစ္ဆာန်တွေ အကုန်လုံးက သူနဲ့ ခင်တယ်ဆို"

လူတစ်ယောက်က ဝင်လာသည်နှင့် ချက်ချင်းပင် မေးမြန်းလိုက်သည်။

"ဟုတ်တယ်... အခြေခံအားဖြင့်တော့ အဲဒီလိုပဲ... သူက တကယ့်ကို တောတောင်ရဲ့ သားတော်လေးပဲ... တိရစ္ဆာန်တွေရဲ့ မိတ်ဆွေလေ"

"ဒီနှစ်တွေထဲမှာ ငါ ဘယ်သူ့ကိုမှ အထင်မကြီးခဲ့ဘူး... ဒါပေမဲ့ လောင်ရွှီကိုတော့ အထင်မကြီးလို့ မရတော့ဘူး"

"တောရိုင်းကျားကိုတောင် ပွတ်သပ်ရဲတာ... အကြီးအကဲလို မနေဘဲ ရမလား"

"အရင်ကတော့ သူက တောတောင်ရှာဖွေတဲ့ လိုက်ဖ်လွှင့်သူ အသေးလေး တစ်ယောက်လို့ပဲ ငါ ထင်ခဲ့တာ... ဒါပေမဲ့ သူက ကျားသစ်ပေါက်လေးကို ပွေ့ချီပြီး မိခင်ကျားသစ်မကြီးနဲ့ အတူတူ လိုက်ဖ်မြင်ကွင်းထဲ ပေါ်လာတဲ့ အချိန်ကစပြီး သူက သာမန်လူ မဟုတ်ဘူးဆိုတာ ငါ သိလိုက်ပြီ"

ပရိသတ်ဟောင်း အတော်များများက အသစ် ဝင်လာသူများကို ရှင်းပြပေးနေကြသည်။ ဤကဲ့သို့သော ပြောဆိုမှုများက လိုက်ဖ်ထဲတွင် အကြိမ်မည်မျှပင် ရှိနေပြီမှန်း မသိနိုင်တော့ချေ။

ရွှီယန်ကလည်း အခါတိုင်း ရှင်းပြလေ့ရှိ၏။

"ကျွန်တော်က တောင်ပေါ်မှာ နေထိုင်ပြီး တိရစ္ဆာန်တွေနဲ့ အထိအတွေ့ များလို့ တိရစ္ဆာန်တွေရဲ့ အလေ့အထတွေကို သိနေတာပါ"

"ဘာအထူးစွမ်းရည်မှ မရှိပါဘူး"

ဤတစ်ကြိမ်တွင်လည်း ရွှီယန်က ကွန်မန့်များထဲမှ ဆွေးနွေးမှုများကို မြင်တွေ့လိုက်ရသဖြင့် ပြုံးရင်း ပြောလိုက်သည်။

"ကျွန်တော်က သာမန်လူ တစ်ယောက်ပါ... တောတောင်ရဲ့ သားတော် စွမ်းရည်တွေ ဘာတွေ ဘယ်ရှိပါ့မလဲ"

"တောတောင်ရဲ့ သားတော်တွေဆိုရင် ဘေးနားမှာ တောရိုင်း တိရစ္ဆာန်တွေ အများကြီး ဝိုင်းရံနေတာလေ"

"ကျွန်တော့် ဘေးနားကို ကြည့်လိုက်ပါဦး... ဘယ်တိရစ္ဆာန်မှ မရှိပါဘူး"

သို့သော် တိုက်တိုက်ဆိုင်ဆိုင်ပင် ထိုအချိန်၌ အရှေ့ဘက်မှ သမင်ပြောက် အချို့ ရုတ်တရက် ပြေးထွက်လာကြသည်။

ဤသမင်ပြောက်များက အရင်က ဒဏ်ရာရခဲ့သော သမင်ပြောက်လေးနှင့် သူမ၏ မိသားစုဝင် သူငယ်ချင်းများပင် ဖြစ်၏။

ယခုအခါ သစ်တောထဲတွင် တိုက်တိုက်ဆိုင်ဆိုင် ပြန်လည်ဆုံတွေ့ရသဖြင့် သမင်ပြောက်လေးက ပျော်ရွှင်စွာဖြင့် ရွှီယန် ရှိရာဘက်သို့ ချက်ချင်း ပြေးလာတော့သည်။

အခြား သမင်ပြောက်များကလည်း အတူတကွ လိုက်ပါလာကြ၏။ သူတို့က ရွှီယန်၏ အနားသို့ ရောက်လာပြီး ရွှီယန်ကို ချက်ချင်း ဝိုင်းရံလိုက်ကြတော့သည်။

လိုက်ဖ်ထဲရှိ ပရိသတ်များမှာ 'ထင်တဲ့အတိုင်းပဲ' ဆိုသည့် အမူအရာမျိုး ဖြစ်သွားကြသည်။

"လိုက်ဖ်လွှင့်သူကြီး... ဆက်ရှင်းပြပါဦး... ခုနက ဘာပြောလိုက်တာလဲ"

"ကိုယ့်ကိုယ်ကိုယ် တောတောင်ရဲ့ သားတော် မဟုတ်ဘူးလို့ ပြောနေသေးတယ်ပေါ့"

"လခွမ်း... ပါးစပ်က ပြောလိုက်တာနဲ့ တကယ် ဖြစ်လာတာပဲလား"

"ဝန်ခံလိုက်ပါတော့... မင်းက တောတောင်ရဲ့ သားတော်ဆိုတာ"

ရွှီယန် အနည်းငယ် ရယ်ရခက် ငိုရခက် ဖြစ်သွားရ၏။

ဒီသမင်ပြောက်တွေက ဘယ်လိုလုပ် ဒီလောက်တောင် အချိန်ကိုက် ရောက်လာရတာလဲ။

သို့သော် ၎င်းတို့ကို မတွေ့ရသည်မှာ အတော်ကြာပြီဖြစ်သဖြင့် ရွှီယန်က ဤအကောင်များကို အသာအယာ ပွတ်သပ်ပေးလိုက်သည်။ အထိအတွေ့ကတော့ ကောင်းမွန်နေဆဲပင်။

သမင်ပြောက်များက ရွှီယန်ကို ကြည့်နေကြပြီး ရွှီယန်၏ အစာကျွေးမည့် အချိန်ကို စောင့်ဆိုင်းနေပုံရသည်။

တိုက်တိုက်ဆိုင်ဆိုင် ရွှီယန်၏ အိတ်ကပ်ထဲတွင်လည်း ဘီစကွတ် အနည်းငယ် ပါလာခဲ့၏။

သူက ဘီစကွတ်များကို ထုတ်ယူလိုက်သည်နှင့် သမင်ပြောက် ခေါင်းအတော်များများက ချက်ချင်း တိုးဝင်လာပြီး ပါးစပ်ဟကာ ဘီစကွတ်များကို အကုန်အစင် စားသောက်ကြတော့သည်။

"ကုန်ပြီ... ကုန်ပြီ"

ရွှီယန်က ဘီစကွတ်များ ကျွေးပြီးနောက် လက်ဝှေ့ယမ်းကာ ပြောလိုက်သည်။

သမင်ပြောက်အုပ်က နေရာတွင် ခဏမျှ ရပ်ကြည့်နေပြီးနောက် စားစရာ မရှိတော့မှန်း သိလိုက်သောအခါ အသီးသီး ထွက်ပြေးသွားကြတော့၏။

ရွှီယန်ကတော့ လယ်ယာခြံဝင်း ရှိရာဘက်သို့ ဆက်လက် ထွက်ခွာလာခဲ့သည်။

"ခုနက သမင်ပြောက်တွေကို ထည့်မ​တွက်နဲ့လေ... သူတို့က အရင်က ကျွန်တော် ကယ်တင်ပေးခဲ့ဖူးလို့ မှတ်မိနေကြတာ"

"ပုံမှန်ဆိုရင် ကျွန်တော်က တောင်ပေါ်ကို တစ်ယောက်တည်း တက်တာများပါတယ်... တောရိုင်း တိရစ္ဆာန်တွေကို ဘယ်လိုလုပ် ခေါ်လို့ရမှာလဲ"

"တကယ်သာ အဲဒီလို စွမ်းရည်မျိုး ရှိရင် သိပ်ကောင်းမှာပဲ"

ရွှီယန်က ပြုံးရင်း ပြောလိုက်သည်။

သူက သစ်တောထဲတွင် ဆက်လက် လမ်းလျှောက်နေလိုက်၏။

ထိုအချိန်မှာပင် မနီးမဝေးမှ သာယာငြိမ့်ညောင်းသော ဒရယ်ပြောက်လေးများ၏ အသံများ ထွက်ပေါ်လာပြီး ကြားရသည်မှာ အလွန် ကြည်လင်ပြတ်သားကာ စိတ်နှလုံးကို လှုပ်ခတ်စေသည်။ စိတ်ထဲတွင် တိုက်ရိုက် ပဲ့တင်ထပ်နေသကဲ့သို့ပင်။

ဒရယ်ပြောက်များက အသံပြုလေ့ သိပ်မရှိကြပေ။ မည်သို့ပင်ဖြစ်စေ ရန်သူများကို ဆွဲဆောင်နိုင်သောကြောင့် ဖြစ်၏။ သို့သော် သူတို့ ပျော်ရွှင်နေသည့် အချိန်မျိုးတွင်တော့ သာယာငြိမ့်ညောင်းသော အသံများကို ပြုလုပ်တတ်ကြပြီး အသံက အဝေးကြီးအထိ ရောက်ရှိနိုင်သည်။

"အားလုံးပဲ နားထောင်ကြည့်... ခုနက သမင်ပြောက်လေးတွေ အော်နေတာ... ဒါက တော်တော်လေး ရှားပါးတယ်နော်"

"ပုံမှန်ဆိုရင် သမင်ပြောက်တွေက အသံမထွက်တတ်ကြဘူး"

"ဒီအသံလေးက နားထောင်လို့ အရမ်းကောင်းတယ်"

"သာယာငြိမ့်ညောင်းတဲ့ ဒရယ်ပြောက်လေးတွေရဲ့ အသံ... တောထဲက လွတ်လပ်ပျော်ရွှင်မှုပေါ့"

"ရှေးခေတ်က စာပေပညာရှင်တွေက သမင်ပြောက်လေးတွေရဲ့ သွက်လက်တဲ့ အသွင်အပြင်ကို အရမ်း သဘောကျကြတာလေ"

ရွှီယန်က အားလုံးကို ရှင်းပြလိုက်သည်။

"ဒါက သမင်ပြောက်လေးတွေရဲ့ အသံလား... တကယ် နားထောင်လို့ ကောင်းတာပဲ"

"ဒရယ်ပြောက်လေးတွေရဲ့ အသံကို ပထမဆုံးအကြိမ် ကြားဖူးတာပဲ"

"သဘာဝတရားကြီးရဲ့ ခံစားချက်က တကယ် ကောင်းတာပဲ"

လိုက်ဖ်ထဲရှိ ပရိသတ်များက အသီးသီး ချီးကျူးပြောဆိုနေကြသည်။

အစစ်အမှန် သဘာဝတရားကြီးက လူများကို အမြဲတမ်း လန်းဆန်းတက်ကြွသော ခံစားချက်မျိုး ပေးစွမ်းနိုင်၏။

စိမ်းလန်းစိုပြည်နေသော သစ်တောများ... တစ်ခါတစ်ရံ ထွက်ပေါ်လာတတ်သော ငှက်ကလေးများ၏ တေးသံများ... ထို့အပြင် ဤသာယာငြိမ့်ညောင်းသော ဒရယ်ပြောက်လေးများ၏ အသံများပင်။

လိုက်ဖ်ကို ကြည့်ရှုရသည်မှာ အလွန် ကောင်းမွန်လှပေသည်။

ရွှီယန်က ဤကဲ့သို့သော သဘာဝတရားကြီးထဲတွင် လမ်းလျှောက်ရင်း သန့်ရှင်းလတ်ဆတ်သော အောက်ဆီဂျင်ကို ရှူရှိုက်ရသည်မှာ ပို၍ပင် စိတ်နှလုံး ကြည်လင်လန်းဆန်းစေသည်ဟု ခံစားရ၏။

ခြင်နှင့် ပိုးမွှားများကို ရှောင်ရှားနိုင်မည်ဆိုပါက တောင်ပေါ်ရှိ ခံစားချက်က အတော်လေး ကောင်းမွန်လှပေသည်။

သူက ကျောပိုးအိတ်ကို လွယ်ကာ အပြင်ဘက်သို့ တောက်လျှောက် ထွက်လာခဲ့သည်။

ယနေ့ အထုပ်အပိုးများ သိပ်မပါသဖြင့် လမ်းလျှောက်ရသည်မှာ အလွန် ပေါ့ပါးလှ၏။ လမ်းတစ်လျှောက်တွင် ရှုခင်းများချည်းသာ ဖြစ်သည်။

သာမန်ဖြစ်သော်လည်း လှပမှုတော့ မလျော့နည်းပေ။

နောက်ထပ် ခဏမျှ လျှောက်သွားပြီးနောက် ရွှီယန်က မနီးမဝေးရှိ သစ်ပင်များပေါ်မှ ငှက်ကလေး ရာချီခန့် တစ်ပြိုင်နက်တည်း ပျံသန်းလာကြပြီး လေထဲတွင် ဝဲပျံကာ စူးရှသော အသံများ ဆက်တိုက် ပြုလုပ်နေကြသည်ကို သတိထားမိလိုက်သည်။ မြင်ကွင်းက အလွန် ထူးဆန်းလှ၏။

ဒရုန်းက အဝေးမှ မြင်ကွင်းကို ချက်ချင်းပင် ဖမ်းယူလိုက်သည်။ အင်တာနက်သုံးစွဲသူများလည်း ဤမြင်ကွင်းကို ချက်ချင်း စိတ်ဝင်စားသွားကြတော့၏။

"ဟိုမှာ ကြည့်လိုက်... ဘာဖြစ်နေတာလဲ"

"ငှက်တွေ အများကြီး အော်နေကြတယ်... ဘာဖြစ်လို့လဲ"

ရွှီယန်က အဝေးမှ ဝဲပျံနေသော ငှက်ကလေးများကို လှမ်းကြည့်လိုက်သည်။

ဤငှက်များမှာ ငှက်ငယ်လေးများ ဖြစ်ပြီး စာကလေး မျိုးစိတ်များ ဖြစ်ပုံရသည်။

ဘာဖြစ်နေသလဲ ဆိုသည်ကို သူ သဘာဝကျကျပင် နားလည်ထားသဖြင့် ရှင်းပြလိုက်၏။

"အဲဒီနားမှာ အဆိပ်ပြင်းတဲ့ မြွေတစ်ကောင် ရောက်နေလို့ ဖြစ်ရမယ်"

"ငှက်တွေက အုပ်စုလိုက် နေထိုင်တတ်ကြတယ်... အကောင်ရာချီ ရှိတယ်... သူတို့က အရမ်း သတိကြီးကြတယ်"

"အန္တရာယ်ကို တွေ့တာနဲ့ ပျံတက်သွားပြီး အော်သံတွေ လုပ်တတ်ကြတယ်... တစ်ဖက်က အဖော်တွေကို သတိပေးတာ ဖြစ်ပြီး နောက်တစ်ဖက်ကတော့ ကျူးကျော်သူကို မောင်းထုတ်တာပေါ့"

"ဒီလိုလုပ်တာ တော်တော်လေး ထိရောက်တယ်... အဆိပ်ပြင်းတဲ့ မြွေတွေက ယေဘုယျအားဖြင့် လန့်သွားပြီး ကပျာကယာ ထွက်ပြေးသွားတတ်ကြတယ်"

"ကျွန်တော် အဲဒီနေရာနဲ့ နည်းနည်း ဝေးဝေး နေတာ ပိုကောင်းမယ်... အဆိပ်ပြင်းတဲ့ မြွေက ဘယ်မြက်တောထဲမှာ ပုန်းနေမလဲ မသိနိုင်ဘူးလေ"

ရွှီယန်၏ စကားကို ကြားသောအခါမှသာ အားလုံးလည်း ဘာဖြစ်သွားသလဲ ဆိုသည်ကို နားလည်သွားကြတော့သည်။

သဘာဝတရားကြီးရှိ အရာအားလုံးက အံ့ဩစရာ ကောင်းလှပေသည်။

လူအများစုက ဗီဒီယိုများထဲတွင်သာ တိရစ္ဆာန်များ၏ ပုံစံကို မြင်ဖူးကြပြီး အစစ်အမှန် သဘာဝတရားကြီးက မည်သို့ ရှိသလဲဆိုသည်ကို မသိကြချေ။

မျိုးစိတ်တိုင်းတွင် ၎င်းတို့ ရှင်သန်နိုင်ရန်အတွက် အလေ့အထများနှင့် နည်းလမ်းများ ရှိကြသည်။ ငှက်ငယ်လေးများပင်လျှင် ထိုနည်းတူပင် ဖြစ်၏။

ရွှီယန်က ငှက်ငယ်လေးများ ဝဲပျံနေသည့် မြင်ကွင်းကို ကြည့်လိုက်ရာ ၎င်းတို့က ခဏမျှ အော်ဟစ်ပြီးနောက် ရပ်တန့်သွားကာ သစ်ကိုင်းများပေါ်သို့ ပြန်လည် ဆင်းသက်သွားပြီး ကောင်းကင်ယံမှ ချက်ချင်းပင် ပျောက်ကွယ်သွားကြသည်ကို တွေ့လိုက်ရသည်။

ကြည့်ရသည်မှာ ကျူးကျော်လာသော အဆိပ်ပြင်းသည့် မြွေကို မောင်းထုတ်နိုင်ခဲ့ပြီ ဖြစ်ပုံရ၏။

ရွှီယန်ကလည်း ထပ်မံ၍ အချိန်မဆွဲတော့ဘဲ အိမ်ပြန်မည့် ခြေလှမ်းများကို ခပ်သွက်သွက် လျှောက်လိုက်သည်။

နောက်ထပ် ခဏမျှ လျှောက်သွားပြီးနောက် သူက လိုက်ဖ်ကို ပိတ်လိုက်၏။

တောင်ပေါ်ရှိ လိုက်ဖ်များမှာ အမြဲတမ်း တောင်ပေါ်တွင်သာ စတင်လေ့ရှိပြီး လိုက်ဖ်ပိတ်ချိန်တွင်လည်း တောင်ပေါ်တွင်ပင် ရှိနေတတ်သည်။

အင်တာနက်သုံးစွဲသူများက သူ ဘယ်နေရာတွင် ရှိနေသလဲ ဆိုသည်ကို လုံးဝ မသိကြဘဲ တောနက်ကြီးထဲတွင် လှည့်လည်သွားလာနေသည်ကိုသာ သိကြပေသည်။

ရွှီယန်က လယ်ယာခြံဝင်းဆီသို့ တောက်လျှောက် ပြန်လာခဲ့သည်။

ကောင်းမွန်စွာ ကြီးထွားနေသော တိရစ္ဆာန်စား မြက်များကို ကြည့်ရင်း သူ၏ စိတ်အခြေအနေက အလွန် ကောင်းမွန်နေ၏။

စိုက်ပျိုးရေးတက္ကသိုလ်မှ သုတေသနပြုလုပ်ထားသော မြက်စေ့များက အတော်လေး ကောင်းမွန်ပြီး မြက်အမျိုးအစား အချို့ကို ရောနှော စိုက်ပျိုးထားသဖြင့် အာဟာရဓာတ်လည်း မျှတပေသည်။

အပြည့်အဝ ရင့်မှည့်သွားသောအခါ စိုက်ပျိုးရေးတက္ကသိုလ်က အစိတ်အပိုင်း အနည်းငယ်ကို နမူနာယူကာ ဓာတ်ခွဲခန်းထဲတွင် မြက်များကို ကြိတ်ချေပြီး အာဟာရဓာတ် ပါဝင်မှု အချိုးအစားကို လေ့လာကာ ဤမြက်မျိုးစိတ်၏ အာဟာရတန်ဖိုးကို အကဲဖြတ်မည် ဖြစ်၏။

ထိုမှတစ်ဆင့် မျိုးစိတ်သစ်များ ထုတ်လုပ်ရန် ဖြည့်စွက် ပြုပြင်သွားမည် ဖြစ်သည်။

မျိုးစိတ်သစ် မြက်စေ့များ ရှိလာပါက ရွှီယန်ကလည်း ဈေးပေါပေါဖြင့် ဝယ်ယူ၍ စိုက်ပျိုးနိုင်ပေသည်။ ဘာပဲဖြစ်ဖြစ် ဈေးကွက်ထဲရှိ မြက်စေ့များထက် သေချာပေါက် ပိုကောင်းမည်သာ ဖြစ်၏။

မွန်းလွဲပိုင်းသို့ ရောက်ရှိလာပြီး ရာသီဥတု အနည်းငယ် အေးမြလာသောအခါ ရွှီယန်က ရေလောင်းစနစ်ကို ဖွင့်လိုက်ပြီး ရေပန်းခေါင်းများမှ ရေများ ပန်းထွက်ကာ အလိုအလျောက် ရေလောင်းစေလိုက်သည်။

ရေပန်းခေါင်းများက မြက်ခင်းထဲမှ ထွက်ပေါ်လာပြီး လည်ပတ်ကာ ရေများ ပန်းထုတ်၍ မြက်ခင်းများထဲသို့ လောင်းချနေသည်ကို မြင်တွေ့ရ၏။

ထိုအချိန်မှာပင် ရှောင်ဟေးက ရုတ်တရက် ပြေးလာပြီး ရေပန်းခေါင်းတစ်ခုမှ ပန်းထွက်လာသော ရေတိုင်ကို တရစပ် ကိုက်ခဲနေတော့သည်။ ကြည့်ရသည်မှာ ရေတိုင်ကို ကိုက်ဖြတ်ချင်နေပုံရ၏။

အကောင်လေးက ရေကစားရသည်ကို နှစ်သက်ပြီး ဤမြင်ကွင်းကို ကြည့်ရသည်မှာ အတော်လေး ရယ်စရာ ကောင်းပေသည်။

မာလီနွိုက်ခွေးကတော့ ဘေးတွင် ဆောင့်ကြောင့်ထိုင်ကာ ရှောင်ဟေးကို အရူးတစ်ကောင်လို ကြည့်နေပြီး ဘာလုပ်နေသလဲ ဆိုသည်ကို နားမလည်နိုင်အောင် ဖြစ်နေ၏။ အတော်လေး စိတ်မမှန်သည့် ပုံပေါက်နေသည်။

ခွေးများတွင် အမျိုးအစား နှစ်မျိုး ရှိပြီး တစ်မျိုးက ရေကစားရသည်ကို နှစ်သက်ကြကာ နောက်တစ်မျိုးကတော့ ရေကို အသေအလဲ ကြောက်ရွံ့ကြပေသည်။

ဤခွေးနှစ်ကောင်ကတော့ ထိုအချက် နှစ်ချက်လုံးနှင့် တိုက်ဆိုင်နေ၏။

ရွှီယန်က မြက်ခင်းထဲတွင် ပျော်ရွှင်စွာ ဆော့ကစားနေသော ရှောင်ဟေးကို ကြည့်ကာ ပြုံးလိုက်ပြီး ဘာမှ ဝင်မစွက်ဖက်တော့ပေ။

သူက မွေးမြူရေးဇုန်သို့ သွားရောက် ကြည့်ရှုလိုက်ပြန်ရာ ကြက် ၊ ဘဲ... ငန်းများ အားလုံး ကောင်းမွန်စွာ ကြီးထွားနေကြသည်ကို တွေ့လိုက်ရ၏။

ဆောင်းရာသီ ရောက်သောအခါ မိမိဘာသာ မိမိ လုံလောက်စွာ စားသုံးနိုင်မည်မှာ သေချာလှပေသည်။

သူ မွေးထားသော ဤကြက် ၊ ဘဲ... ငန်းများက ငွေ အများကြီး ရနိုင်မည် မဟုတ်ပေ။ ဤဒေသရှိ မွေးမြူရေးခြံ အတော်များများက အကောင်ရေ ထောင်ချီ သောင်းချီ မွေးမြူထားကြပြီး ထိုသို့မှသာ ငွေရနိုင်မည် ဖြစ်၏။

ဤကြက်... ဘဲ... ငန်းများကိုတော့ ကိုယ်တိုင် မွေးပြီး ကိုယ်တိုင် စားရန်အတွက်သာ ဖြစ်သည်။ ဤသည်ကလည်း စိတ်ချရပေသည်။

နောက်ထပ် ရက်အနည်းငယ် ကြာသောအခါ ရွှီယန် စိုက်ပျိုးထားသော တိရစ္ဆာန်စား မြက်များမှာ ခါးအမြင့်ခန့်အထိ ကြီးထွားလာပြီး အချို့ဆိုလျှင် လူတစ်ယောက်၏ ပခုံးအမြင့်ခန့်အထိပင် ရောက်ရှိနေပြီ ဖြစ်၏။

သူ စိုက်ပျိုးထားသော မြက်စေ့များက မျှတမှုရှိပြီး ရိုင်းဂရပ်စ်... အယ်လ်ဖာဖာ နှင့် ချီကိုရီ တို့ ပါဝင်ကာ အာဟာရဓာတ် မျိုးစုံ ပါဝင်ပေသည်။ နွားများ သိုးများကို ကျွေးရန် ဖြစ်စေ... ကြက်များ ဘဲများကို ကျွေးရန် ဖြစ်စေ သင့်တော်လှပေသည်။

ရွှီယန်က မြက်များကို ရောင်းချရန် ရည်ရွယ်လိုက်သည်။ မရောင်းခင်တွင် သူက စိုက်ပျိုးရေးတက္ကသိုလ်မှ လမ်းညွှန်ဆရာကို ဆက်သွယ်လိုက်သည်။

ထိုသူမှာ လျိုပေါ်လျန် ဟုခေါ်သော ဘွဲ့လွန်လမ်းညွှန်ဆရာ တစ်ယောက်ဖြစ်ပြီး မြက်ပင် သုတေသနဌာန၏ သုတေသီ တစ်ဦးလည်း ဖြစ်ကာ အဓိက သုတေသနပြုသည့် နယ်ပယ်မှာ တိရစ္ဆာန်စား မြက်များပင် ဖြစ်သည်။

ရွှီယန်က လျိုပေါ်လျန်ကို သူ၏ ပထမဆုံး အသုတ် မြက်များမှာ အလွန် ကောင်းမွန်စွာ ကြီးထွားနေပြီဖြစ်ပြီး တစ်လခွဲခန့် ကြီးထွားချိန် ရောက်ရှိနေပြီဖြစ်ရာ တစ်ခေါက် ရိတ်သိမ်း၍ ရောင်းချရန် ရည်ရွယ်ထားကြောင်း ပြောပြလိုက်သည်။

ရွှီယန်၏ မြက်များ ကောင်းမွန်စွာ ကြီးထွားနေပြီဟု ကြားသောအခါ လျိုပေါ်လျန်က ချက်ချင်းပင် လာရောက် ကြည့်ရှုမည်ဟု ပြောလာ၏။

ပြောရမည်ဆိုလျှင် သူလည်း မလာရောက်သည်မှာ တစ်လခန့် ရှိနေပြီ ဖြစ်သည်။ သုတေသနဌာန၏ အလုပ်များက အတော်လေး များပြားလှသည် မဟုတ်ပါလား။ ရွှီယန်ကလည်း သဘောတူလိုက်သည်။

နောက်တစ်နေ့ နံနက် ၁၀ နာရီခွဲခန့်တွင် လျိုပေါ်လျန်က စိုက်ပျိုးရေးတက္ကသိုလ်မှ ကျောင်းသား အချို့ကို ခေါ်ဆောင်ကာ စမ်းသပ်စိုက်ခင်း ဘက်မှနေ၍ ရွှီယန်၏ လယ်ယာခြံဝင်းသို့ မြက်များ၏ အခြေအနေကို လာရောက် စစ်ဆေးကြသည်။

ထိုမှတစ်ဆင့် သုတေသန ပြုလုပ်ရန်အတွက် မြက်တစ်အိတ်ကိုလည်း ယူဆောင်သွားမည် ဖြစ်၏။

ဤကဲ့သို့သော သုတေသန ပြုလုပ်ခြင်းက ရွှီယန်အတွက်လည်း ကောင်းမွန်ပေသည်။ အချို့သော မြက်စိုက်ပျိုးသူများဆိုလျှင် မြက်များ၏ အာဟာရဓာတ် ပါဝင်မှုကို ခွဲခြမ်းစိတ်ဖြာရန်အတွက် အဖွဲ့အစည်းများကို ငွေပေး၍ ငှားရမ်းရလေ့ ရှိကြသည်။ ယခုအခါ စိုက်ပျိုးရေးတက္ကသိုလ်က သူ့အတွက် တိုက်ရိုက် ခွဲခြမ်းစိတ်ဖြာပေးမည်ဖြစ်ရာ သူ၏ မြက်များ၏ အရည်အသွေးကို သူလည်း သိရှိနိုင်မည် ဖြစ်၏။

"သူများ စိုက်ထားတဲ့ မြက်တွေကို ကြည့်ပါဦး... တကယ် ကောင်းတာပဲ"

လျိုပေါ်လျန်က လယ်ယာခြံဝင်း အပြင်ဘက်သို့ ရောက်လာပြီး စိမ်းလန်းစိုပြည်နေသော ၈ ဧက ကျယ်ဝန်းသည့် မြက်ခင်းကြီးကို မြင်သောအခါ အံ့အားသင့်စွာဖြင့် ပြောလိုက်သည်။

ဤကဲ့သို့ ကြီးထွားမှုက အတော်လေး ကောင်းမွန်ပြီး ရှုထောင့်ပေါင်းစုံမှ ကြည့်မည်ဆိုလျှင် အလွန် ပြီးပြည့်စုံလှပေသည်။

ဤသည်မှာ မြက်များ၏ ကြီးထွားမှုက ရောဂါဘယ ကင်းရှင်းပြီး အာဟာရဓာတ် အားလုံးလည်း ပြည့်စုံကြောင်း ပြသနေခြင်း ဖြစ်၏။

ရွှီယန် စိုက်ပျိုးထားသည်က တကယ်ကို ကောင်းမွန်လှပေသည်။

လျိုပေါ်လျန်က လယ်ယာခြံဝင်းထဲသို့ ဝင်လာသည်။ အနောက်မှ လိုက်ပါလာသော စိုက်ပျိုးရေးတက္ကသိုလ် ကျောင်းသားများမှာ ဝူခိုင်... လျိုဝူ တို့ ဖြစ်ကြပြီး စာမေးပွဲ နီးလာပြီဖြစ်ရာ သူတို့၏ ခရက်ဒစ်များ ဆုံးရှုံးသွားမည်ကို စိုးရိမ်သဖြင့် စမ်းသပ်စိုက်ခင်း ဘက်တွင် နေ့တိုင်း အချိန်ဖြုန်းနေကြခြင်း ဖြစ်၏။

ယနေ့ လမ်းညွှန်ဆရာ လာသည်ကို မြင်သောအခါ အားလုံးက ချက်ချင်းပင် နောက်မှ လိုက်ပါလာကြတော့သည်။

မည်သို့ပင်ဖြစ်စေ လျိုပေါ်လျန်က သူတို့၏ ရွေးချယ်ခံ ဘာသာရပ်များအတွက် အမှတ်ပေးရမည် ဖြစ်ရာ သေချာပေါက် ဆက်ဆံရေး ကောင်းမွန်အောင် လုပ်ထားရမည် မဟုတ်ပါလား။