အခန်း ၁၁၄

အခန်း (၁၁၄) စုံစမ်းစစ်ဆေးရေးဗျူရိုကို အကြောင်းကြားခြင်း

အထက်လူကြီး၏ သံသယကို ရင်ဆိုင်ရချိန်တွင် မိုက်ကယ်က ခါးသက်သက် ပြုံးလိုက်လေသည်။ သူ၏စကားကို ကြားပါက မည်သူမဆို သူ လျှောက်ပြောနေသည်ဟု ထင်ကြမည်မှာ အမှန်ပင်ဖြစ်သည်။ ဤကိစ္စက တကယ်ကို လျှောက်ပြောနေသကဲ့သို့ ဖြစ်နေသည် မဟုတ်ပါလား။

သို့သော် ဤကိစ္စမှာ သူ၏အပေါ်တွင် အမှန်တကယ် ကျရောက်လာခဲ့ရာ သူသည် စစ်သားနှင့် တွေ့သော ပညာရှိတစ်ယောက်ကဲ့သို့ အထက်လူကြီးကို မည်သို့ ရှင်းပြရမည်ကို မသိအောင် ဖြစ်နေလေသည်။

"မန်နေဂျာ ကျွန်တော် ပြောတာ တကယ်ပါ ရေငုပ်သင်္ဘောတွေမှာ ဗီဒီယို မှတ်တမ်းတွေ ရှိပါတယ် ခင်ဗျား မယုံရင် အခုချက်ချင်း ကျွန်တော် ပို့ပေးလိုက်ပါမယ်"

မိုက်ကယ်က ခါးသက်သက် ပြုံးကာ ပြောလိုက်လေသည်။ ရှာဖွေရေး ရေငုပ်သင်္ဘောများတွင် အခြေအနေများကို မှတ်တမ်းတင်ရန် ကင်မရာများ တပ်ဆင်ထားလေ့ရှိသဖြင့် ဤတစ်ကြိမ်တွင် ရေငုပ်သင်္ဘော သုံးစင်းစလုံးသည် ထိုထူးဆန်းသော တိုက်မိမှု ဖြစ်ရပ်ကို မှတ်တမ်းတင်ထားနိုင်ခဲ့လေသည်။

"မိုက်ကယ် မင်းပြောတာ အမှန်ဖြစ်ပါစေလို့ ငါ မျှော်လင့်ပါတယ် မဟုတ်ရင်တော့ ဟွန်း"

အန်ဒါဆန်သည် မိုက်ကယ်တွင် သက်သေအထောက်အထား ရှိသည်ကို ကြားသောအခါ သူ၏ မျက်နှာမှာ အနည်းငယ် ပြေလျော့သွားလေသည်။

"မင်း အဲဒီ ဗီဒီယိုတွေကို ပို့လိုက်စမ်း"

အန်ဒါဆန်က အေးစက်စွာ ပြောလိုက်လေသည်။

"ကောင်းပါပြီ ခဏလေး စောင့်ပါ"

မိုက်ကယ်က ပြောလိုက်လေသည်။

မကြာမီ မိုက်ကယ်သည် ထိုရေငုပ်သင်္ဘော သုံးစင်းမှ မှတ်တမ်းတင်ထားသော ဗီဒီယို သုံးခုကို အန်ဒါဆန်ထံသို့ ပေးပို့လိုက်လေသည်။

ဆယ်မိနစ်ကျော် အကြာတွင် အန်ဒါဆန်သည် ထိုဗီဒီယို သုံးခုကို အားလုံး ကြည့်ရှုပြီးသွားလေသည်။

ကြည့်ရှုပြီးနောက် သူ၏ မျက်နှာပေါ်တွင် ဒေါသအရိပ်အယောင်များ ပျောက်ကွယ်သွားပြီး အံ့ဩထိတ်လန့်မှုနှင့် လေးနက်တည်ကြည်မှုတို့ အစားထိုး ဝင်ရောက်လာလေသည်။

ဤတစ်ကြိမ်တွင် မိုက်ကယ်သည် လျှောက်ပြောနေခြင်း မဟုတ်ဘဲ သူပြောသည့်အတိုင်း ထူးဆန်းသော ဖြစ်ရပ်များ အမှန်တကယ် ဖြစ်ပျက်နေကြောင်း သေချာသွားသောကြောင့် ဖြစ်လေသည်။

အန်ဒါဆန်သည် တည်ငြိမ်သွားပြီးနောက် ချက်ချင်းပင် ဆုံးဖြတ်ချက် တစ်ခုကို ချလိုက်လေသည်။

ရေနံစင်မြင့်ပေါ်တွင် အလုပ်လုပ်နေသော ဝန်ထမ်းများ အားလုံးကို ထိုပင်လယ်ပြင်မှ ချက်ချင်း ဆုတ်ခွာကာ ပါလာဝမ်ကျွန်းပေါ်တွင် အရင်ဆုံး အခြေချ နေထိုင်စေရန် အမိန့်ပေးလိုက်ပြီး မိုက်ကယ်ကို သတင်းစောင့်ရန် ပြောလိုက်လေသည်။

တစ်ချိန်တည်းမှာပင် အန်ဒါဆန်သည် ထိုဗီဒီယို သုံးခုကို ယူကာ ဒါရိုက်တာဘုတ်အဖွဲ့ဝင်များကို သွားရောက် တွေ့ဆုံလေတော့သည်။ ဤကိစ္စမှာ အလွန် အရေးကြီးနေသည် မဟုတ်ပါလား။

ဒီးလ် ကုမ္ပဏီ၏ အစည်းအဝေးခန်းမ အတွင်းတွင် မန်နေဂျာ အချို့၊ ဥက္ကဋ္ဌနှင့် ဒါရိုက်တာဘုတ်အဖွဲ့ ဥက္ကဋ္ဌတို့သည် အန်ဒါဆန် ပြသသော ဗီဒီယို သုံးခုကို ကြည့်ရှုပြီးနောက် သူတို့ အားလုံး၏ မျက်နှာပေါ်တွင် အံ့ဩထိတ်လန့်မှုများ ဖြစ်ပေါ်လာကြလေသည်။

ဤဗီဒီယိုများက သူတို့ကို အကြီးအကျယ် တုန်လှုပ်သွားစေခဲ့လေသည်။

"အိုးမိုင်ဂေါ့ဒ် ဒီတိုက်မိမှု ဖြစ်ရပ်က ထိုပင်လယ်ပြင်မှာ ငါတို့ နားမလည်နိုင်တဲ့ အရာတစ်ခုခု ရှိနေလို့များလား"

မန်နေဂျာ တစ်ယောက်က မျက်လုံးပြူးကာ မယုံနိုင်စွာဖြင့် ပြောလိုက်လေသည်။

"ရှေ့မှာ ဘာပစ္စည်းမှ မရှိသလို ပတ်ဝန်းကျင်မှာလည်း ငါးအုပ်တွေ ဘာတွေ မရှိဘဲနဲ့ ဘာလို့ ရုတ်တရက် အမည်မသိ အရာဝတ္ထုနဲ့ တိုက်မိသွားတာလဲ"

"ငါ ထင်တာတော့ သူတို့က ငါတို့ မမြင်ရတဲ့ အရာတစ်ခု ဒါမှမဟုတ် ပွင့်လင်းမြင်သာတဲ့ အရာတစ်ခုခုနဲ့ တိုက်မိသွားတာ ဖြစ်ရမယ်"

ဥက္ကဋ္ဌ တစ်ယောက်က သုံးသပ်လိုက်လေသည်။

"ဒါနဲ့ နေပါဦး လွန်ခဲ့တဲ့ ရက်ပိုင်းက တောင်တရုတ်ပင်လယ်ဘက်မှာ ထူးဆန်းတဲ့ ကိစ္စနှစ်ခု ဖြစ်ခဲ့တယ်လို့ ငါ ကြားခဲ့တယ် ပထမတစ်ခုက ရွှေတွင်းကြီး တစ်ခု တစ်ညတည်းနဲ့ ပျောက်သွားတာပဲ စုံစမ်းကြည့်တော့ တခြားလူတွေ တူးသွားတာလို့ သိရတယ် ဒါပေမယ့် တစ်ညတည်းနဲ့ ရေအောက် ရွှေတွင်း တစ်ခုကို လူမသိသူမသိ ဘယ်လို တူးဖော်သွားလဲ ဆိုတာကတော့ အခုထိ ပဟေဋ္ဌိ ဖြစ်နေတုန်းပဲ ဒုတိယကိစ္စကတော့ တောင်တရုတ်ပင်လယ် ကမ်းလွန်က သံသတ္တုတွင်း တစ်ခု အကြောင်းမဲ့ သံသတ္တု တန်ချိန် သန်းပေါင်းများစွာ အခိုးခံလိုက်ရတာပဲ အဲ့ဒါလည်း ရွှေတွင်း ကိစ္စနဲ့ အတူတူပဲ ဒီကိစ္စ နှစ်ခုကို အခုထိ ဆက်လက် စုံစမ်းနေတုန်းပဲ ဒါပေမယ့် နားမလည်နိုင်တာက ဘယ်သူ ဒါမှမဟုတ် ဘယ်အဖွဲ့အစည်းက တခြားလူတွေ မျက်စိအောက်မှာ ဒီလောက်ကြီးမားတဲ့ ကိစ္စတွေကို လုပ်နိုင်သလဲဆိုတာ အခုထိ စဉ်းစားလို့ မရသေးဘူး"

ဒါရိုက်တာဘုတ်အဖွဲ့ ဥက္ကဋ္ဌက တီးတိုးရေရွတ်လိုက်လေသည်။

"ဥက္ကဋ္ဌကြီး ပြောတာ မှန်တယ် အဲ့ဒီကိစ္စကို ကျွန်တော်လည်း သတိထားမိတယ် တခြားလူတွေ မျက်စိအောက်မှာ ဒီလောက် ကြီးကျယ်ခမ်းနားတဲ့ ကိစ္စကို ဘယ်လို လုပ်သွားလဲဆိုတာ ထားလိုက်ပါဦး တစ်ညတည်းနဲ့ ရွှေတွင်း တစ်ခုလုံး ကုန်အောင် ဘယ်လို တူးသွားလဲဆိုတာ သူ ဘယ်လို လုပ်ခဲ့တာလဲ အဲ့ဒီ ရွှေတွင်းက ပင်လယ်ထဲမှာ ရှိတာလေ ပြီးတော့ မြေအောက် မီတာ တစ်ရာကျော် အနက်မှာ ရှိတာ"

"ဟုတ်တယ် အခုတလော တောင်တရုတ်ပင်လယ်ဘက်မှာ ထူးဆန်းတဲ့ ကိစ္စတွေ တော်တော် များတယ် ဥပမာ အခု ငါတို့ ကြုံတွေ့နေရတဲ့ ကိစ္စမျိုးပေါ့ လုံးဝ ရှင်းပြလို့ မရဘူး ငါ ထင်တာတော့ ဂြိုဟ်သားတွေကလွဲရင် လူသားတွေမှာ ဒီလောက် အဆင့်မြင့်တဲ့ နည်းပညာ ဘယ်တုန်းက ရှိသွားလို့လဲ"

လူတစ်စုက အသံဗလံများ ဆူညံစွာဖြင့် ဆွေးနွေးနေကြလေသည်။

"ဥက္ကဋ္ဌကြီး အခု ကျွန်တော်တို့ ကြုံတွေ့နေရတဲ့ ထူးဆန်းတဲ့ ကိစ္စက တောင်တရုတ်ပင်လယ်က အဲ့ဒီ လျှို့ဝှက်ဆန်းကြယ်တဲ့ ကိစ္စ နှစ်ခုနဲ့ ဆက်စပ်မှု ရှိနေနိုင်တယ်လို့ ဆိုလိုတာလား"

အန်ဒါဆန်က သတိထား၍ မေးလိုက်လေသည်။

"ငါလည်း သေချာ မပြောရဲဘူး ဒါပေမယ့် ဒီလောက် ထူးဆန်းတဲ့ ကိစ္စမျိုး မင်းတို့ထဲက ဘယ်သူ ကြုံဖူးလဲ ကြားတောင် မကြားဖူးဘူး မဟုတ်လား"

ဒီးလ် ကုမ္ပဏီ ဥက္ကဋ္ဌ ဂျိမ်းစ်က ပြောလိုက်လေသည်။

"ဒါဆိုရင် ကျွန်တော်တို့ ဘာဆက်လုပ်ကြမလဲ ကျွန်တော်တို့ လူလွှတ်ပြီး စုံစမ်းခိုင်းမလား ဒါမှမဟုတ်"

အန်ဒါဆန်က မေးလိုက်လေသည်။

"ဒီလို ကိစ္စမျိုး ကြုံလာမှတော့ ငါတို့ အမြန်ဆုံး ဖြေရှင်းရမယ် ရေနံတူးဖော်ရေး အစီအစဉ်ကို နောက်ကျခံလို့ မဖြစ်ဘူး"

ဂျိမ်းစ်က တည်ငြိမ်စွာ ပြောလိုက်လေသည်။

"ဒီလို ထူးဆန်းတဲ့ ကိစ္စနဲ့ ကြုံလာမှတော့ ငါတို့ အမေရိကန် စုံစမ်းစစ်ဆေးရေးဗျူရို ကို ဆက်သွယ်တာ အကောင်းဆုံးပဲ သူတို့က ဒီလို အခြေအနေမျိုးကို တော်တော် စိတ်ဝင်စားလောက်တယ် ပြီးတော့ သူတို့ ဝင်ပါလာပြီဆိုရင် ငါတို့ လူလွှတ်ပြီး ငွေကုန်ကြေးကျ ခံစရာတောင် မလိုတော့ဘူး"

ဂျိမ်းစ်က ပြုံး၍ ပြောလိုက်လေသည်။

"ဟုတ်တယ် အမေရိကန် စုံစမ်းစစ်ဆေးရေးဗျူရိုက ဒီကိစ္စကို သေချာပေါက် စိတ်ဝင်စားမှာပဲ" ဂျိမ်းစ်က ဆက်ပြောလေသည်။

"ဒါပေမယ့် မင်း လူလွှတ်ပြီး ငါတို့ရဲ့ ရေနံမြေမှာ ဆုံးရှုံးမှုတွေ ရှိမရှိ အရင် သွားစစ်ဆေးခိုင်းလိုက် ငါ စိုးရိမ်တာက"

ဂျိမ်းစ်က နောက်ဆက်တွဲ စကားကို ဆက်မပြောသော်လည်း သူ၏ လေသံတွင် စိုးရိမ်မှုများ ပါဝင်နေကြောင်း သိသာလှလေသည်။ ဤလျှို့ဝှက်ဆန်းကြယ်သော ဖြစ်ရပ်မှာ သူ၏ ရေနံမြေ ပင်လယ်ပြင်တွင် ဖြစ်ပွားခဲ့ခြင်းဖြစ်ပြီး အလွန်လည်း နီးကပ်လွန်းနေသည် မဟုတ်ပါလား။

"ကောင်းပါပြီ"

...

နေရာ - အမေရိကန်ပြည်ထောင်စု၊ အမေရိကန် စုံစမ်းစစ်ဆေးရေးဗျူရို

"အန်တိုနီ ဒီးလ် ရေနံကုမ္ပဏီက ကျွန်တော်တို့ကို သတင်းတစ်ခု ပေးလာတယ် သူတို့ဆီက ဗီဒီယို သုံးခု ပို့လာပြီး ပါလာဝမ်ကျွန်းက ရေနံမြေ ပင်လယ်ပြင်မှာ လျှို့ဝှက်ဆန်းကြယ်တဲ့ ဖြစ်ရပ်တစ်ခု ဖြစ်ပွားခဲ့တယ်လို့ ပြောတယ်"

ဂျန်နီက မှတ်တမ်းများကို ကိုင်ကာ စုံစမ်းစစ်ဆေးရေး အဖွဲ့ခေါင်းဆောင် အန်တိုနီ၏ ရှေ့သို့ ရောက်လာပြီး ပြောလိုက်လေသည်။

အန်တိုနီက မှတ်တမ်းများကို ယူကာ ဖတ်ရှုလိုက်လေသည်။

မှတ်တမ်းများတွင် မိုက်ကယ်တို့၏ ရေနံစင်မြင့်ပေါ်၌ တစ်လအတွင်း အသေးစား တုန်ခါမှု ၅ ကြိမ် ဖြစ်ပေါ်ခဲ့ကြောင်း ရေးသားထားလေသည်။ အစပိုင်းတွင် ငလျင် သို့မဟုတ် အုတ်မြစ် ကျွံကျခြင်းကြောင့်ဟု ထင်ခဲ့သော်လည်း စစ်ဆေးကြည့်ရာ မဟုတ်ကြောင်း သိရှိခဲ့ရသည်။

ဆက်လက်၍ ရေငုပ်သင်္ဘော သုံးစင်း ကြုံတွေ့ခဲ့ရသော တိုက်မိမှု ဖြစ်ရပ်ကို ရေးသားထားလေသည်။

ထို့နောက် အန်တိုနီသည် ထိုဗီဒီယို သုံးခုကို ကြည့်ရှုပြီးနောက် သူ၏ မျက်နှာပေါ်တွင် လေးနက်တည်ကြည်မှုများ ဖြစ်ပေါ်လာလေသည်။ သူသည်လည်း ဤဗီဒီယို သုံးခုကြောင့် အလွန် အံ့ဩသွားခဲ့လေသည်။ ရှေ့တွင် မည်သည့် အတားအဆီးမျှ မရှိဘဲနှင့် အကြောင်းမဲ့သက်သက် ဝင်တိုက်မိခြင်းမှာ သူ့အတွက် နားလည်ရ ခက်ခဲစေခဲ့လေသည်။

"တောင်တရုတ်ပင်လယ်မှာ ဒီလို လျှို့ဝှက်ဆန်းကြယ်တဲ့ ကိစ္စတွေ ဆက်တိုက် ဖြစ်ပေါ်နေတာ တကယ်ကို ထူးဆန်းတာပဲ"

အန်တိုနီက စိတ်ရှုပ်ထွေးစွာဖြင့် ပြောလိုက်လေသည်။

"ခေါင်းဆောင် ဒီတစ်ခေါက် ဖြစ်ရပ်က အရင်တစ်ခေါက်က ရွှေတွင်း ပျောက်ဆုံးတာနဲ့ သံသတ္တုတွင်း အခိုးခံရတဲ့ ကိစ္စတွေနဲ့ ဆက်စပ်မှု ရှိနိုင်မလား"

ဂျန်နီက မေးလိုက်လေသည်။

"ဆက်စပ်မှု ရှိနိုင်တယ်လို့ ငါ ခံစားရတယ် မှတ်တမ်းတွေထဲက တုန်ခါမှုတွေက ရေနံခိုးတူးလို့ ဖြစ်တာလည်း ဖြစ်နိုင်တာပဲ"

အန်တိုနီသည် ယခင်က ရွှေတွင်းနှင့် သံသတ္တုတွင်း ကိစ္စများကို အချိန်ကြာမြင့်စွာ လေ့လာခဲ့ဖူးသဖြင့် ထိုရေနံမြေတွင် ပြဿနာ တစ်ခုခု ရှိနေပြီဟု သူ ခံစားမိလိုက်လေသည်။

"သွား ငါတို့ အခုချက်ချင်း လူစုပြီး တောင်တရုတ်ပင်လယ်က ပါလာဝမ်ကျွန်း ပင်လယ်ပြင်ကို သွားကြမယ်"

"ဟုတ်ကဲ့ပါ"

...

ဆွန်ဖုန်းသည် ဟိုင်ယန်မြို့သို့ ပြန်ရောက်ပြီးနောက် တစ်ရက် အနားယူကာ ရေနံလုပ်ငန်းသို့ ဝင်ရောက်ရန် အစီအစဉ်ကြီးကို စတင် ရေးဆွဲနေလေသည်။

သို့သော် သူ၏ လုပ်ရပ်များမှာ ကြီးမားသော အာရုံစိုက်မှုများကို ဖြစ်ပေါ်စေခဲ့ပြီ ဖြစ်ကြောင်းကိုမူ သူ မသိခဲ့ချေ။

သို့သော် ဆွန်ဖုန်း သိလျှင်လည်း ဂရုစိုက်မည် မဟုတ်ချေ။ တစ်ဖက်လူများက မည်သို့ပင် စုံစမ်းစစ်ဆေးစေကာမူ မည်သည့် သဲလွန်စမျှ ရရှိမည် မဟုတ်ချေ။ အလွန်ဆုံး သိရှိနိုင်မည်မှာ ရေနံမြေမှ ရေနံစိမ်း တန်ချိန် သန်းပေါင်းများစွာ အမည်မသိ အရာတစ်ခုခု၏ ခိုးယူခြင်းကို ထပ်မံ ခံလိုက်ရကြောင်းသာ ဖြစ်လေသည်။

သူတို့သည် ဦးနှောက်ခြောက်ခံ၊ အချိန်ကုန်ခံ၊ လူအင်အား ငွေအင်အား ကုန်ခံပြီးနောက် ကမ္ဘာကြီးကို တုန်လှုပ်စေမည့် သတင်းတစ်ပုဒ်ကိုသာ ရရှိမည် ဖြစ်ပြီး အခြား ဘာမျှ ရရှိမည် မဟုတ်ချေ။

ပြိုင်ဘက်ကင်း စနစ်ကို ပိုင်ဆိုင်ထားသော ဆွန်ဖုန်းကို သူတို့ လုံးဝ ရှာဖွေတွေ့ရှိနိုင်မည် မဟုတ်ချေ။ အဘယ်ကြောင့်ဆိုသော် ဆွန်ဖုန်း၏ ရေငုပ်စစ်ဝတ်စုံမှာ အလွန် အစွမ်းထက်လွန်းသောကြောင့် ဖြစ်လေသည်။