အခန်း ၁၁၆

အခန်း (၁၁၆) တစ်နှစ်တာ အကြီးဆုံး လျှို့ဝှက်ဆန်းကြယ် ဖြစ်ရပ်သုံးခု

သို့သော် ဆွန်ဖုန်းသာ အမေရိကန် စုံစမ်းစစ်ဆေးရေးဗျူရိုက အာရှတိုက်၏ သံသတ္တု၊ ရေနံနှင့် ရွှေ အရောင်းအဝယ် စာရင်းများကို စစ်ဆေးနေကြောင်း သိလိုက်ရပါက အထင်သေးစွာဖြင့် ရယ်မောလိုက်မည်မှာ သေချာလှပေသည်။

ပထမအချက်အနေဖြင့် ရွှေကို စစ်ဆေးမည်ဆိုပါက ဆွန်ဖုန်း ယခင်တစ်ခေါက်က ခိုးယူထားသော ရွှေတန်ချိန် ၃၀ ကျော်မှာ ယခုအချိန်အထိ ရောင်းချရခြင်း မရှိသေးသဖြင့် အမေရိကန် စုံစမ်းစစ်ဆေးရေးဗျူရို အနေဖြင့် လုံးဝ စုံစမ်း၍ ရနိုင်မည် မဟုတ်ချေ။

ဒုတိယအချက်အနေဖြင့် သံသတ္တု ပြဿနာတွင် ဆွန်ဖုန်း၌ မာအာ သံသတ္တုတွင်းကို အကာအကွယ်အဖြစ် အသုံးပြုထားသဖြင့် တစ်ဖက်လူက သူ ခိုးယူထားသော သံသတ္တု တန်ချိန် သန်းပေါင်းများစွာ ရောင်းချမှု၏ သဲလွန်စကို လုံးဝ ရှာတွေ့နိုင်မည် မဟုတ်ချေ။

ထို့အပြင် ဆွန်ဖုန်းက စုန့်ကျဲထံသို့ ရောင်းချခဲ့သော သံသတ္တု တန်ချိန် ၅ သန်းဆိုသည်မှာလည်း တရုတ်နိုင်ငံတွင် တစ်နှစ်လျှင် သံသတ္တု တန်ချိန် ဘီလီယံနှင့်ချီ၍ အရောင်းအဝယ် လုပ်နေကြရာ ထိုအထဲမှ စုံစမ်းဖော်ထုတ်ရန်မှာ ကောင်းကင်သို့ တက်ရသကဲ့သို့ ခက်ခဲလှပေသည်။

စုန့်ကျဲအနေဖြင့်လည်း ထိုအရောင်းအဝယ်ကို အလွန် လျှို့ဝှက်စွာ လုပ်ဆောင်မည်မှာ သေချာသဖြင့် တစ်ဖက်လူက ရှာတွေ့နိုင်မည် မဟုတ်ကြောင်း ဆွန်ဖုန်း ယုံကြည်ထားလေသည်။

အကယ်၍ ရှာတွေ့ခဲ့လျှင်တောင်မှ ထိုတန်ချိန် ၅ သန်းလေးကို ပျောက်ဆုံးသွားသော သံသတ္တု တန်ချိန် သန်း ၄၀ နှင့် ဆက်စပ်ရန်မှာ အလွန် ခက်ခဲလှပေသည်။

ဆွန်ဖုန်းသည် သူ၏ အကြီးမားဆုံး အားနည်းချက် ဖြစ်လာနိုင်သည့် ဤကိစ္စအတွက် ငွေစာရင်း အတုများ ပြုလုပ်ကာ ဖုံးကွယ်ထားခဲ့ပြီး ထိုသံသတ္တု တန်ချိန် ၅ သန်းကို အခြားသူများထံမှ ဝယ်ယူထားကြောင်း ပြသထားလေသည်။

ထို့ကြောင့် ဆွန်ဖုန်း၌ လက်ရှိတွင် မည်သည့် ကြီးမားသော အားနည်းချက်မျှ မရှိတော့ချေ။

တကယ်တမ်းလည်း တစ်ပတ်အကြာတွင် အန်တိုနီနှင့် ဂျန်နီတို့သည် တန်ဖိုးရှိသော မည်သည့် သဲလွန်စမျှ မရရှိခဲ့ချေ။

ရရှိလာသော သဲလွန်စများဆိုသည်မှာလည်း အခွန်ရှောင်ခြင်း၊ မှောင်ခိုကူးခြင်း စသည့် ရှုပ်ထွေးသော ကိစ္စများသာ ဖြစ်ပြီး တောင်တရုတ်ပင်လယ်မှ လျှို့ဝှက်ဆန်းကြယ် ဖြစ်ရပ် ၃ ခုနှင့် လုံးဝ ဆက်စပ်မှု မရှိချေ။

"ခေါင်းဆောင် လောလောဆယ် ကျွန်မတို့ဆီမှာ သဲလွန်စ တစ်ခုလေးတောင် ရှာမတွေ့သေးဘူး"

ဂျန်နီသည် ပါလာဝမ်ကျွန်းရှိ စုံစမ်းစစ်ဆေးရေးဗျူရို၏ ယာယီရုံးခန်းသို့ ရောက်လာပြီး အန်တိုနီကို ပြောလိုက်လေသည်။

"လက်ရှိ အခြေအနေအရဆိုရင် ငါ စဉ်းစားကြည့်တာ ဂြိုဟ်သားတွေကလွဲရင် ဘယ်နိုင်ငံကမှ ဒီလို ယုံနိုင်စရာမရှိတဲ့ ကိစ္စမျိုးကို ဒီလောက် အချိန်တိုအတွင်းမှာ လုပ်နိုင်မှာ မဟုတ်ဘူး"

အန်တိုနီက နေထိုင်မကောင်းသကဲ့သို့ နဖူးကို ဖိနယ်ကာ ပြောလိုက်လေသည်။ ဤရက်ပိုင်းအတွင်း ထိုကိစ္စ ၃ ခုကို စုံစမ်းစစ်ဆေးရသဖြင့် သူ၏ ဆံပင်များပင် ဖြူတော့မတတ် ဖြစ်နေလေပြီ။

အဘယ်ကြောင့်ဆိုသော် ဤကိစ္စ ၃ ခုတွင် ပါဝင်နေသော အကျိုးအမြတ်များမှာ သူတို့နိုင်ငံမှ အရင်းရှင်များနှင့် ဧရာမ ကုမ္ပဏီကြီးများနှင့် တိုက်ရိုက် သက်ဆိုင်နေသောကြောင့် ဖြစ်လေသည်။

တောင်တရုတ်ပင်လယ်ရှိ သိုလှောင်ပမာဏ တန်ချိန် သန်း ၈၀ ရှိသော ထိုသံသတ္တုတွင်းကို ပြည်တွင်းရှိ ဧရာမ ကုမ္ပဏီကြီး တစ်ခုက ရင်းနှီးမြှုပ်နှံထားခြင်း ဖြစ်ပြီး ထိုရွှေတွင်းကိုလည်း နာမည်ကြီး ကုမ္ပဏီကြီး တစ်ခု၏ လက်အောက်ရှိ ကျော်ကြားသော သတ္တုတူးဖော်ရေး ကုမ္ပဏီက ရင်းနှီးမြှုပ်နှံထားခြင်း ဖြစ်လေသည်။

ပါလာဝမ်ကျွန်းရှိ ထိုအလတ်စား ရေနံမြေကိုပင် ပြည်တွင်း အရင်းရှင် တစ်ဦးက ရင်းနှီးမြှုပ်နှံထားခြင်း ဖြစ်လေသည်။ ထို့ကြောင့် အထက်လူကြီးများက အန်တိုနီကို အလွန် ဖိအားပေးနေကြခြင်း ဖြစ်လေသည်။

သို့သော် အန်တိုနီအနေဖြင့် မျက်ကန်း တစ်ယောက်ကဲ့သို့ ဘာမှမမြင်ရဘဲ မည်သည့်နေရာမှ စတင် စုံစမ်းရမည်ကို လုံးဝ မသိအောင် ဖြစ်နေလေသည်။

"ဟုတ်တယ်"

ဂျန်နီက သက်ပြင်းချလိုက်လေသည်။ ဤသည်မှာ သူမ ဘဝတစ်လျှောက်လုံးတွင် ပထမဆုံးအကြိမ် ကြုံတွေ့ရသော အလွန် ထူးဆန်းသည့် ဖြစ်ရပ်ကြီးပင် ဖြစ်သည်။ ယခင်က UFO သတင်းများ ကြားဖူးသကဲ့သို့ လျှို့ဝှက်ဆန်းကြယ်ပြီး အတည်ပြု၍ မရနိုင်သော ကိစ္စမျိုးပင် ဖြစ်လေသည်။

"ဆက်စစ်ကြတာပေါ့ တောင်တရုတ်ပင်လယ်မှာ တူးဖော်နေတဲ့ ရေနံတွင်းတွေ သံသတ္တုတွင်းတွေ အများစုကို ငါတို့ ဆက်သွယ်ထားသင့်တယ် ဟုတ်တယ် သတ္တုတွင်းနဲ့ ပတ်သက်သမျှ အားလုံးကို ဆက်သွယ်ပြီး သူတို့ကို သတိထားဖို့ ပြောထားရမယ် ပြီးတော့ တစ်ခုခု ထူးခြားတာနဲ့ ငါတို့ကို အမြန်ဆုံး အကြောင်းကြားဖို့ ပြောထားရမယ်"

အန်တိုနီသည် အခြား နည်းလမ်း မရှိတော့သဖြင့် ဤနည်းလမ်းကိုသာ အသုံးပြုရတော့လေသည်။

"ဟုတ်ကဲ့ပါ ဒါပေမယ့် တချို့လူတွေက ကျွန်မတို့ကို ဂရုမစိုက်မှာကိုပဲ စိုးရိမ်တယ်"

ဂျန်နီက စိုးရိမ်စွာဖြင့် ပြောလိုက်လေသည်။

"မဖြစ်နိုင်ပါဘူး အခု တောင်တရုတ်ပင်လယ်မှာ ဒီလိုကိစ္စမျိုး ၃ ခု ဆက်တိုက် ဖြစ်ထားတာဆိုတော့ အဲ့ဒီ အရင်းရှင်တွေလည်း သေချာပေါက် သတိထားမိကြမှာပဲ ငါတို့ သွားပြောလိုက်ရင် သူတို့ သေချာပေါက် အလေးထားကြမှာပါ"

အန်တိုနီက ယုံကြည်မှု အပြည့်ဖြင့် ပြောလိုက်လေသည်။

"ကောင်းပါပြီ ကျွန်မ အခုချက်ချင်း သွားစီစဉ်လိုက်ပါမယ်"

အန်တိုနီသည် ဤရေအောက် သူခိုးကို ရှာဖွေရန် နည်းလမ်းပေါင်းစုံကို အသုံးပြုနေချိန်တွင် အစစ်အမှန် တရားခံ ဖြစ်သူ ဆွန်ဖုန်းမှာမူ ဟိုင်ယန်မြို့တွင် လျန်ယင်းနှင့်အတူ သံမဏိစက်ရုံသစ် ကိစ္စများဖြင့် အလုပ်များနေလေသည်။

အမေရိကန် စုံစမ်းစစ်ဆေးရေးဗျူရိုက တောင်တရုတ်ပင်လယ်ရှိ ကိစ္စ ၃ ခုကို စုံစမ်းနေကြောင်း သူ လုံးဝ မသိခဲ့ချေ။

သို့သော် ဆွန်ဖုန်း မသိသော်လည်း တောင်တရုတ်ပင်လယ်တွင် သူ ဖန်တီးခဲ့သော ကြီးမားသည့် ကိစ္စ ၃ ခုကို တစ်စုံတစ်ယောက်က သေချာပေါက် စုံစမ်းမည်ဆိုတာကိုမူ သူ ခန့်မှန်းမိလေသည်။

သို့သော် သူ မစိုးရိမ်ချေ။ အဘယ်ကြောင့်ဆိုသော် ကမ္ဘာပေါ်တွင် ဤမျှ သိပ္ပံရုပ်ရှင်ဆန်သော ကိစ္စမျိုး ဖြစ်ပွားလိမ့်မည်ဟု မည်သူမျှ တွေးမိမည် မဟုတ်သောကြောင့် ဖြစ်လေသည်။ သူသည် ပြိုင်ဘက်ကင်း စနစ်ကြီးကိုပင် ရရှိထားသည် မဟုတ်ပါလား။

...

ပါလာဝမ်ကျွန်းတွင် ရေနံအခိုးခံရသည့် ကိစ္စ ဖြစ်ပွားပြီး တစ်ပတ်အကြာတွင်မှ ယခု သတင်းစာများ၌ ပါလာလေသည်။ အဘယ်ကြောင့်ဆိုသော် ယခင်က စုံစမ်းစစ်ဆေးရေးဗျူရိုက သတင်းများကို ပိတ်ပင်ထားခဲ့သောကြောင့် ဖြစ်လေသည်။

ဖိလစ်ပိုင် နံနက်ခင်းသတင်း - တောင်တရုတ်ပင်လယ် ကမ်းလွန်ရှိ သံသတ္တု တန်ချိန် သန်း ၄၀ အခိုးခံရခြင်းနှင့် တောင်တရုတ်ပင်လယ်ရှိ ရွှေတွင်းကြီး တစ်ညတည်းဖြင့် ပျောက်ဆုံးသွားခြင်း စသည့် လျှို့ဝှက်ဆန်းကြယ် ဖြစ်ရပ်များ အပြီးတွင် လွန်ခဲ့သော တစ်ပတ်က ဒီးလ် ရေနံကုမ္ပဏီနှင့် ဖိလစ်ပိုင်တို့ ရင်းနှီးမြှုပ်နှံထားသော ပါလာဝမ်ကျွန်း ကမ်းလွန် ရေနံမြေတွင် လျှို့ဝှက်ဆန်းကြယ် ဖြစ်ရပ် တစ်ခု ထပ်မံ ဖြစ်ပွားခဲ့ပြန်သည်။ အမည်မသိ အဖွဲ့အစည်း တစ်ခုက တစ်လအတွင်း ပင်လယ်ကြမ်းပြင်မှ ရေနံစိမ်း တန်ချိန် သန်းပေါင်းများစွာကို မည်သူမျှ မသိအောင် ခိုးယူသွားခဲ့သည်။ သူတို့သည် မည်သို့သော အဖွဲ့အစည်း ဖြစ်သနည်း။ သူတို့၏ နည်းပညာမှာ အဘယ်ကြောင့် ဤမျှ အဆင့်မြင့်နေရသနည်း။ သူတို့သည် လူသားများလား ဂြိုဟ်သားများလား ဒါမှမဟုတ် မြေအောက် သတ္တဝါကြီးတွေလား ဒါမှမဟုတ် ရေနက်ပိုင်းက ဘီလူးကြီးတွေလား...

ဗြိတိန်သတင်းစာ - သံသတ္တု အခိုးခံရတယ် ရွှေတွင်း အခိုးခံရတယ် ရေနံ အခိုးခံရတယ် အားလုံးက တောင်တရုတ်ပင်လယ်မှာ ဖြစ်တာချည်းပဲ တောင်တရုတ်ပင်လယ်မှာ အမည်မသိ သက်ရှိတွေများ ပေါ်လာပြီလား ဒါမှမဟုတ် တောင်တရုတ်ပင်လယ်က ဂြိုဟ်သားတွေရဲ့ စခန်းများလား သူတို့က ရေနံ သံသတ္တုနဲ့ ရွှေတွင်းတွေကို ခိုးပြီး ဘာရည်ရွယ်ချက် ရှိနေတာလဲ သူတို့က လူသားတွေလား ဒါမှမဟုတ် တခြား အရာတွေလား...

အမေရိကန်သတင်းစာ - ကျွန်ုပ်တို့ သတင်းစာ အနေဖြင့် ကြီးမြတ်သော အမေရိကန်ပြည်ထောင်စုမှလွဲ၍ မည်သူက ဤမျှ အဆင့်မြင့်သော နည်းပညာဖြင့် ဤကဲ့သို့ အံ့သြဖွယ်ကောင်းသော ကိစ္စများကို လုပ်ဆောင်နိုင်မည်ကို စဉ်းစား၍ မရနိုင်ပါ။ လက်ရှိ လူသားများ၏ နည်းပညာအရ တစ်လအတွင်း ရေနံစိမ်း တန်ချိန် သန်းပေါင်းများစွာကို ပင်လယ်ကြမ်းပြင် အောက်၌ မည်သူမျှ မသိအောင် တူးဖော်ရန်မှာ လုံးဝ မဖြစ်နိုင်ပါ။ တကယ်ကြီး ဂြိုဟ်သားတွေ ဝင်ရောက် ကျူးကျော်လာတာများလား သူတို့က ပင်လယ်အောက်က သယံဇာတတွေကို တူးဖော်ပြီး လုံလောက်တဲ့ အခြေခံ အဆောက်အအုံတွေ တည်ဆောက်ပြီးမှ ကမ္ဘာမြေကို ကျူးကျော်ဖို့များလား...

တရုတ်သတင်းစာ - တောင်တရုတ်ပင်လယ်တွင် လအနည်းငယ် အတွင်း ဖြစ်ပွားခဲ့သော လျှို့ဝှက်ဆန်းကြယ် ဖြစ်ရပ် ၃ ခုကို တစ်နှစ်တာ အကြီးဆုံး လျှို့ဝှက်ဆန်းကြယ် ဖြစ်ရပ် ၃ ခု အဖြစ် သတ်မှတ်လိုက်ပြီ ဖြစ်ပြီး ပြိုင်ဘက် မရှိပါ။ ဤသည်မှာ ကြောက်ရွံ့ထိတ်လန့်မှုများ၏ အစပြုခြင်း ဖြစ်နိုင်သည်...

ဤသတင်းများမှာ နေရာအနှံ့ ပျံ့နှံ့သွားပြီး တစ်ကြိမ်ထက် တစ်ကြိမ် ပိုမို ပြင်းထန်ကာ ပိုမို ပေါက်ကွဲထွက်လာလေသည်။

သတင်းအချက်အလက် ပေါက်ကွဲနေသော ဤခေတ်ကြီးတွင် ကမ္ဘာတစ်ဝန်းရှိ လူအများအပြားက ဤကိစ္စကို စိတ်ဝင်စားနေကြလေသည်။

ထိုအထဲတွင် ကြောက်ရွံ့ထိတ်လန့်နေသူများ ပါသကဲ့သို့ ယုတ္တိမတန် လျှောက်ပြောနေသူများ၊ အနောက်မှ လိုက်ပါ ပြောဆိုနေသူများ စသဖြင့် အားလုံး ပါဝင်လေသည်။

သို့သော် လူအများစုကတော့ ဤကိစ္စများမှာ အလွန် သိပ္ပံရုပ်ရှင် ဆန်လွန်းသဖြင့် အာရုံစိုက်မှု ရရှိရန် ဖန်တီးထားခြင်းသာ ဖြစ်သည်ဟု ထင်မြင်ကြလေသည်။ ဥပမာ ယခင်နှစ်များက UFO သတင်းများကဲ့သို့ ဂြိုဟ်သားများ ကမ္ဘာကို ကျူးကျော်မည်ဟု ပြောဆိုကြသော်လည်း ယခုအချိန်အထိ မည်သည့် ဂြိုဟ်သားမျှ ကမ္ဘာကို ကျူးကျော်လာခြင်း မရှိသေးချေ။

ကောင်းပါပြီ အမျိုးမျိုးသော မှတ်ချက်များ ရှိနေကြသော်လည်း ဤနေရာတွင် ကျွန်ုပ်တို့ ဆက်မပြောတော့ပါ။

...

ဟိုင်ယန်မြို့၊ ဗီလာကြီးထဲတွင်။

ဆွန်ဖုန်းသည် စာကြည့်ခန်းထဲတွင် အင်တာနက် သုံးနေရင်း အွန်လိုင်းပေါ်ရှိ ထိုသတင်းများကို ကြည့်ကာ ရယ်ရခက် ငိုရခက် ဖြစ်နေလေသည်။ သူ လုပ်ခဲ့သော ကိစ္စ ၃ ခုက သတင်းများတွင် ဤမျှ ကြီးမားသော ပေါက်ကွဲမှုကို ဖြစ်ပေါ်စေလိမ့်မည်ဟု သူ လုံးဝ ထင်မှတ်မထားခဲ့ချေ။

"ကြည့်ရတာ ငါက အင်အားကြီး အဖွဲ့အစည်းတချို့ရဲ့ အာရုံစိုက်မှုကို အောင်မြင်စွာ ဆွဲဆောင်နိုင်သွားပြီပဲ နောက်ကို ပစ္စည်းသွားခိုးရင် နည်းနည်း ပိုသတိထားမှ ရတော့မယ်"

ဆွန်ဖုန်းက ပြုံးစိစိဖြင့် ပြောလိုက်လေသည်။

သူသည် ရေငုပ်စစ်ဝတ်စုံကို ဝတ်ဆင်ကာ ပင်လယ်ကြမ်းပြင်၌ သတ္တုတွင်း ခိုးတူးနေစဉ် တစ်စုံတစ်ယောက်က ဓာတ်ပုံရိုက်မိသွားမည့် နေ့ကို အလွန် မျှော်လင့်နေမိလေသည်။

ထိုသို့ဆိုလျှင် ကမ္ဘာတစ်ဝန်းရှိ သတင်းများ အားလုံးတွင် 'ပင်လယ်ကြမ်းပြင်တွင် ဂြိုဟ်သား စက်ရုပ်ကြီး တွေ့ရှိ' ဟု ဖော်ပြကြမည် ဖြစ်လေသည်။ (အဘယ်ကြောင့်ဆိုသော် ရေငုပ်စစ်ဝတ်စုံမှာ အပြင်ပန်းကြည့်လျှင် စက်ရုပ်ကြီးနှင့် တူသောကြောင့် ဖြစ်သည်)

'ရေအောက် သယံဇာတများကို တူးဖော်နေ တောင်တရုတ်ပင်လယ် လျှို့ဝှက်ဆန်းကြယ် ဖြစ်ရပ် ၃ ခုရဲ့ တရားခံက သူပဲ ဖြစ်ရမယ် သူက ဂြိုဟ်သားလား ဒါမှမဟုတ် လူသားလား'

ဤနေရာအထိ တွေးမိသောအခါ ဆွန်ဖုန်းသည် အလွန် စိတ်ဝင်စားစရာ ကောင်းသည်ဟု ခံစားရလေသည်။

သူသည် ရေငုပ်စစ်ဝတ်စုံကို ဝတ်ဆင်ထားသဖြင့် အခြားသူများက တွေ့ရှိသွားလျှင်ပင် လူသားများ လုပ်ဆောင်သည်ဟု ထင်ကြမည် မဟုတ်ဘဲ ဂြိုဟ်သားများ လုပ်သည်ဟုသာ ထင်ကြမည် ဖြစ်လေသည်။

မည်သည့် စက်ရုပ်က ပျံသန်းနိုင်သနည်း။ မည်သည့် စက်ရုပ်က ပင်လယ်ကြမ်းပြင်တွင် အရှိန်အဟုန်ဖြင့် သွားလာနိုင်သနည်း။ မည်သည့် စက်ရုပ်က ဧရာမ ငါးမန်းကြီးများကို တစ်ချက်တည်းဖြင့် သတ်ဖြတ်နိုင်သနည်း။

"ဝါးဟားဟား"