အခန်း ၁၃၃

အခန်း (၁၃၃) ဈေးဆစ်ခြင်း

"နိုး နိုး နိုး မစ္စတာဆွန် ဒီဈေးနှုန်းက ဒီနှစ် ရေနံဈေးကွက် အတက်အကျအပေါ် မူတည်ပြီး ကျွန်တော်တို့ သတ်မှတ်ထားတာပါ"

စတီဗင်က ခေါင်းခါရင်း ပြောလိုက်သည်။

"ပြီးတော့ ဒေါ်လာ ၅၅၀ သန်းဆိုတဲ့ တူးဖော်ခွင့်ကြေးက လုံးဝ မများပါဘူး ဒီရေနံမြေမှာ ရေနံစည် သန်း ၁၀၀ တောင် ရှိတာပါ ခင်ဗျားသာ ဒီရေနံမြေကို တူးဖော်နိုင်မယ်ဆိုရင် လုံးဝ အရှုံးမပေါ်နိုင်ဘူးလို့ ကျွန်တော် ယုံကြည်ပါတယ်"

ဒီကိစ္စအတွက်တော့ သူတို့ လုံးဝ အလျှော့ပေးမည် မဟုတ်ပေ။ ငွေကို ဘယ်သူက မလိုချင်ဘဲ နေမည်နည်း။

ထို့အပြင် ဒီရေနံစည် သန်း ၁၀၀ ထဲကနေ သူတို့ အစိုးရက အကျိုးအမြတ် ၅၀ ရာခိုင်နှုန်းကို ရရှိဦးမည် ဖြစ်သည်။

ဆိုလိုသည်မှာ ရေနံများ တူးဖော်ပြီးပါက သူတို့က ရေနံစည် သန်း ၅၀ ရရှိမည်ဖြစ်ပြီး ဆွန်ဖုန်းကလည်း ရေနံစည် သန်း ၅၀ ရရှိမည်ဖြစ်သည်။

လက်ရှိ ရေနံတစ်စည်လျှင် အမေရိကန်ဒေါ်လာ ၈၀ အမြင့်ဆုံးဈေးနှုန်းဖြင့် တွက်မည်ဆိုပါက ရေနံစည် သန်း ၅၀ ၏ တန်ဖိုးမှာ အမေရိကန်ဒေါ်လာ ၄ ဘီလီယံ ဖြစ်သည်။

ဆွန်ဖုန်း အနေဖြင့် တူးဖော်ခွင့်ကြေး ဒေါ်လာ ၅၅၀ သန်း၊ တူးဖော်ရေး ကုန်ကျစရိတ်များ၊ အလုပ်သမားခများနှင့် အခွန်အခများကို နုတ်လိုက်လျှင်တောင် အမြတ်များစွာ ကျန်ရှိနေမည် ဖြစ်သည်။

ရေနံအရိုင်းကို တိုက်ရိုက် ရောင်းချလျှင် နိုင်ငံတကာ ပေါက်ဈေးထက် အနည်းငယ် လျော့နည်းနိုင်သော်လည်း တစ်စည်လျှင် ဒေါ်လာ ၇၀ အထက်တော့ သေချာပေါက် ရရှိနိုင်ပေသည်။

တူးဖော်ခွင့်ကြေး ဒေါ်လာ ၅၅၀ သန်း ဆိုသည်မှာ နောက်ပိုင်း ရေနံတူးဖော်ရာတွင် ကုန်ကျမည့် ရင်းနှီးမြှုပ်နှံမှုနှင့် ယှဉ်လိုက်ပါက ဘာမှ မဟုတ်ကြောင်း သူတို့ စိတ်ထဲတွင် ကောင်းကောင်း သိထားကြသည်။

အဘယ်ကြောင့်ဆိုသော် ရေနံတူးဖော်ရန်အတွက် ကြီးမားသော ရင်းနှီးမြှုပ်နှံမှု ငွေကြေးများ လိုအပ်သောကြောင့် ဖြစ်သည်။

ထို့အပြင် ရေနံတူးဖော်ရာတွင် အန္တရာယ်များလည်း ရှိနေသည်။ ကနေဒါ အစိုးရတွင် ထိုမျှများပြားသော ငွေကြေး မရှိသဖြင့် နိုင်ငံခြား ရေနံကုမ္ပဏီများကိုသာ ဖိတ်ခေါ်နေရခြင်း ဖြစ်သည်။

လက်ရှိတွင် ရေနံတစ်စည် တူးဖော်ရန် ကုန်ကျစရိတ်မှာ ပို၍ပို၍ မြင့်တက်လာကြောင်း သိထားရမည်။

ဗြိတိန်တွင် ရေနံတစ်စည် တူးဖော်ရန် ကုန်ကျစရိတ်မှာ ဒေါ်လာ ၆၂.၅ ဖြစ်ပြီး လက်ရှိ အရောင်းအဝယ် ဖြစ်နေသော ဈေးနှုန်းမှာ ၇၀ မှ ၈၀ အတွင်းသာ ရှိသည်။

ဘရာဇီးတွင် ရေနံတစ်စည် တူးဖော်ရန် ကုန်ကျစရိတ်မှာ ၅၉ ဒေါ်လာနီးပါး ရှိပြီး ကနေဒါတွင် ၅၁ ဒေါ်လာခန့် ရှိကာ အမေရိကန်တွင်မူ ၄၆ ဒေါ်လာ ရှိသည်။

အကယ်၍ အရှေ့အလယ်ပိုင်း ဒေသရှိ ရေနံမြေကြီးများ ဆိုလျှင်မူ တူးဖော်စရိတ် အလွန် သက်သာလှသည်။

ထိုဒေသရှိ ရေနံတွင်းများမှ ရေနံများမှာ ပန်းထွက်နေပြီး သာမန် ရေနံမြေများနှင့် ယှဉ်၍ မရနိုင်ပေ။

သို့သော် ယခုနှစ်ပိုင်းများအတွင်း တူးဖော်ရေး ကုန်ကျစရိတ်များမှာ ဆက်တိုက် မြင့်တက်လာနေသည်။

နောင်နှစ်အနည်းငယ် အကြာတွင် တူးဖော်စရိတ်က ရောင်းဈေးထက်ပင် ပိုများလာနိုင်ပေသည်။

ရေနံတစ်စည်၏ တူးဖော်စရိတ်မှာ ဒေသအလိုက်၊ တူးဖော်ရသည့် အခက်အခဲနှင့် လုပ်အားခများအပေါ် မူတည်၍ ပြောင်းလဲနေလေ့ ရှိသည်။ ထို့ကြောင့် အထက်ပါ နိုင်ငံများ၏ ကုန်ကျစရိတ်များ ကွာခြားနေရခြင်း ဖြစ်သည်။

တူးဖော်ရ လွယ်ကူသော သာမန် ရေနံတွင်း တစ်တွင်းအတွက်ပင် ကုန်ကျစရိတ်မှာ ဒေါ်လာ ၄ သိန်းကျော် ရှိကြောင်း ဆွန်ဖုန်း သိထားသည်။

တူးဖော်ရ ခက်ခဲသော ရေနံမြေများဆိုလျှင် ကုန်ကျစရိတ်မှာ ပို၍ပင် များပြားမည် ဖြစ်သည်။

ကံမကောင်း၍ ရေနံ မထွက်လာပါက ရင်းနှီးငွေများ အားလုံး ရေစုန်မျောသွားမည် ဖြစ်ပြီး ကံကောင်း၍ ရေနံထွက်လာလျှင်တောင် ခက်ခက်ခဲခဲ လုပ်ကိုင်ရမည် ဖြစ်သည်။

ထို့အပြင် တူးဖော်မှု လုပ်ငန်းစဉ် တစ်လျှောက်တွင် ရေနံပမာဏ ကျဆင်းလာခြင်း၊ ပြုပြင်ထိန်းသိမ်းစရိတ်များ မြင့်တက်လာခြင်းတို့ကြောင့် ကြီးမားသော အရှုံးပေါ်နိုင်သည့် အန္တရာယ်များလည်း ရှိနေသည်။

ထို့ကြောင့် ရေနံလုပ်ငန်းကို လုပ်ကိုင်နိုင်သူတိုင်းမှာ ဘီလီယံနာ သူဌေးကြီးများသာ ဖြစ်ကြသည်။ ငွေမရှိလျှင် ဘယ်သူမှ မလုပ်နိုင်ပေ။

ခြေတစ်လှမ်း မှားသွားပါက သို့မဟုတ် ကံမကောင်းပါက ဒေဝါလီခံရမည့် အခြေအနေနှင့် ရင်ဆိုင်ရမည် ဖြစ်သည်။

တကယ်တော့ ဆွန်ဖုန်း၏ ဒေါ်လာ ၁.၂ ဘီလီယံဖြင့် ဤရေနံမြေကို တူးဖော်ရန် မဖြစ်နိုင်ပေ။

ရေနံစည် သန်း ၁၀၀ သာ ရှိသော ရေနံမြေ ဖြစ်သော်လည်း သူ၏ ငွေဖြင့် ရေနံကုမ္ပဏီကြီးများမှ ရေနံတွင်း အနည်းငယ်ကိုသာ ကန်ထရိုက် ယူနိုင်စွမ်း ရှိသည်။

သို့သော် ဆွန်ဖုန်းတွင် ထူးခြားသည့်စနစ်ကြီး ရှိနေသည်။ ဤအချက်ကြောင့်ပင် သူက ရေနံလုပ်ငန်းသို့ ဝင်ရောက်ကာ ဤရေနံမြေကို ရင်းနှီးမြှုပ်နှံရန် ရဲဝံ့နေခြင်း ဖြစ်သည်။

စတီဗင်တို့ စိတ်ထဲတွင် ဘာတွေ တွေးနေကြသည်ကို ဆွန်ဖုန်း သိသည်။

'သူတို့က ၅၀ ရာခိုင်နှုန်း ယူမယ်ဆိုပေမယ့် ငါလည်း ၅၀ ရာခိုင်နှုန်း ရမယ်ဆိုတော့ ရေနံစည် သန်း ၅၀ ကို ရမှာပဲ ကုန်ကျစရိတ်တွေကို နုတ်လိုက်ရင်တောင် အမြတ်ကျန်ဦးမှာဆိုတော့ တူးဖော်ခွင့်ကြေးကို လျှော့ချပေးဖို့ မဖြစ်နိုင်ဘူးလို့ သူတို့ တွေးနေကြတာ'

"လက်ရှိ ကနေဒါရဲ့ ရေနံစိမ်း အရောင်းအဝယ် ဈေးနှုန်း ဒေါ်လာ ၇၀ နဲ့ တွက်ရင် ကျွန်တော် အရှုံးမပေါ်နိုင်ဘူးဆိုတာ သေချာပါတယ်"

"ဒါပေမယ့် ခင်ဗျားတို့ မေ့နေတဲ့ အချက်တစ်ခု ရှိတယ် ကျွန်တော် ရင်းနှီးမြှုပ်နှံမယ့် ရေနံမြေက သာမန် ရေနံမြေ မဟုတ်ဘူး ကျောက်လွှာတွေအောက်က ရေနံမြေပါ ဒီလို ရေနံမြေမျိုးကို တူးဖော်ရတာ ဘယ်လောက် ခက်ခဲပြီး ကုန်ကျစရိတ် ဘယ်လောက် များတယ်ဆိုတာ ခင်ဗျားတို့ စိတ်ထဲမှာ အသိဆုံး ဖြစ်မှာပါ"

ဆွန်ဖုန်းက ခဏရပ်လိုက်ပြီး ဆက်ပြောလိုက်သည်။

"လက်ရှိ အခြေအနေတွေအရဆိုရင် ကျွန်တော် သေချာပေါက် ရှုံးမှာပဲ ဒေဝါလီခံရတဲ့အထိ ရှုံးသွားနိုင်တယ် မြောက်အမေရိကက ကျောက်လွှာအောက် ရေနံမြေတွေရဲ့ တူးဖော်စရိတ်က တစ်စည်ကို ၆၅ ဒေါ်လာအထိ ရှိတယ်လို့ ကျွန်တော် သိထားတယ် သာမန် ရေနံမြေတွေလို ၅၁ ဒေါ်လာ မဟုတ်ဘူး"

"နယူးဖောင်လန်က ကျောက်လွှာ အထူက မြောက်အမေရိကဘက်ထက် အများကြီး ပိုထူပြီး တူးဖော်ရတာလည်း ပိုခက်တယ်ဆိုတော့ ကုန်ကျစရိတ်ကလည်း အများကြီး ပိုများမှာပဲ"

မျက်နှာချင်းဆိုင်မှ စတီဗင်တို့ သုံးယောက် စကားမပြောနိုင် ဖြစ်သွားသည်ကို မြင်သောအခါ ဆွန်ဖုန်းက အနည်းငယ် ပြုံးလိုက်ပြီး ဆက်ပြောလေသည်။

"ဒါကြောင့် တူးဖော်ခွင့်ကြေးနဲ့ အကျိုးအမြတ် ခွဲဝေမှုအပိုင်းကို ကျွန်တော်တို့ သင့်သလို ပြန်ညှိနှိုင်းသင့်တယ်လို့ ထင်ပါတယ်"

စတီဗင်တို့ သုံးယောက်၏ မျက်နှာများမှာ အနည်းငယ် ပျက်ယွင်းသွားကြသည်။ ဆွန်ဖုန်း ပြောသည်မှာ မှန်ကန်ကြောင်း သူတို့ သိကြသည်။

နယူးဖောင်လန် အနောက်ပိုင်း ကျောက်လွှာအောက်ရှိ ရေနံမြေမှာ တူးဖော်ရန် ခက်ခဲပြီး ကုန်ကျစရိတ် ကြီးမားလှသည်။ ဤအချက်ကြောင့်ပင် ပြီးခဲ့သည့် နှစ်များအတွင်း မည်သူကမှ လာရောက် မမေးမြန်းခဲ့ကြခြင်း ဖြစ်သည်။

ဆွန်ဖုန်းကို လှည့်စားရန် လွယ်ကူမည်ဟု သူတို့ ထင်ခဲ့သော်လည်း ဆွန်ဖုန်းက အခွင့်အရေး မပေးသည့်အပြင် သူတို့ကိုပင် ပြန်လည် အကျပ်ရိုက်စေခဲ့သည်။

"တကယ်လို့ ခင်ဗျားတို့ဘက်က အလျှော့မပေးဘူးဆိုရင် ကျွန်တော်တို့ ကုမ္ပဏီအနေနဲ့ ဒီလို တူးဖော်ရခက်တဲ့ အနောက်ပိုင်း ရေနံမြေကို တူးဖော်ဖို့ ခက်ခဲပါလိမ့်မယ် ဘာလို့လဲဆိုတော့ တူးဖော်လိုက်တာနဲ့ သေချာပေါက် အရှုံးပေါ်မှာမို့လို့ပါ"

"တကယ်လို့ ခင်ဗျားတို့ဘက်က အလျှော့ပေးမယ်ဆိုရင်တော့ ကျွန်တော်တို့ ဖုန်းရွေ့ သတ္တုတွင်း ကုမ္ပဏီက စွန့်စားပြီး နယူးဖောင်လန် အနောက်ပိုင်းကို ပထမဆုံး လာရောက် တူးဖော်သူအဖြစ် လုပ်ဆောင်ဖို့ ဆန္ဒရှိပါတယ်"

ဆွန်ဖုန်းက အေးစက်နေသော လက်ဖက်ရည်ကို တစ်ငုံသောက်ကာ အေးဆေးစွာ ပြောလိုက်သည်။

ထိုအချိန်တွင် ဆွန်ဖုန်း၏ ရင်ထဲ၌ အနည်းငယ် စိုးရိမ်နေမိသည်။ တစ်ဖက်လူက အလျှော့ပေးမည် မပေးမည်ကို သူ မသေချာပေ။

အကယ်၍ တစ်ဖက်လူက အလျှော့မပေးပါက ဤဆွေးနွေးပွဲမှာ ပျက်စီးသွားမည်ဖြစ်ပြီး နောက်ပိုင်း တင်ဒါပွဲများကိုလည်း သူ ဝင်ပြိုင်စရာ အကြောင်းမရှိတော့ပေ။

ဆွန်ဖုန်း၏ အဓိက ရည်ရွယ်ချက်မှာ တူးဖော်ခွင့်ကြေးကို လျှော့ချရန် မဟုတ်ဘဲ အကျိုးအမြတ် ခွဲဝေမှုအပိုင်းကို လျှော့ချပေးရန် ဖိအားပေးလိုခြင်း ဖြစ်သည်။

တစ်ဖက်လူက ၅၀ ရာခိုင်နှုန်း ခွဲဝေယူမည်ကို သူ လုံးဝ ခွင့်မပြုနိုင်ပေ။

အကြောင်းမှာ သူသည် ရေအောက်မှ ခိုးယူလာသော ရေနံများကို ဤရေနံမြေ အမည်ခံ၍ ရောင်းချမည် ဖြစ်သောကြောင့်ပင်။

အကယ်၍ တစ်ဖက်လူကသာ ၅၀ ရာခိုင်နှုန်း ခွဲဝေယူမည်ဆိုပါက သူက သူများအတွက် အလကား အလုပ်လုပ်ပေးသလို ဖြစ်သွားမည် မဟုတ်ပါလား။

စတီဗင်တို့ သုံးယောက်က ဆွန်ဖုန်း၏ အမှန်တကယ် ရည်ရွယ်ချက်ကို မသိကြပေ။ သို့သော် သူတို့ဘက်မှ အလျှော့မပေးပါက ဤဆွေးနွေးပွဲမှာ အဆုံးသတ်သွားမည်ကိုမူ သိကြသည်။

တစ်ဖက်လူတွင် ငွေရှိပြီးဖြစ်ရာ အခြား ရေနံမြေများတွင် ရင်းနှီးမြှုပ်နှံနိုင်သည်။ ဤသို့ တူးဖော်ရခက်ခဲသော အနောက်ပိုင်း ရေနံမြေတွင် ရင်းနှီးမြှုပ်နှံရန် အကြောင်းမရှိပေ။

ထိုအချိန်တွင် အစည်းအဝေးခန်း တစ်ခုလုံး တိတ်ဆိတ်ငြိမ်သက်သွားသည်။

ဆွန်ဖုန်း ရေသောက်နေသည့် အသံကိုသာ ကြားနေရသည်။

စူးမေးသည် ဆွန်ဖုန်းကို တစ်ချက် ကြည့်လိုက်သည်။

ဆွန်ဖုန်းက တဖြည်းဖြည်း ရင့်ကျက်လာနေပြီဟု သူမ မထင်ထားခဲ့ပေ။

ယခင်က ဤသို့ ဈေးဆစ်ခြင်း၊ ဆွေးနွေးခြင်းများကို သူမကသာ အမြဲတမ်း လုပ်ဆောင်ခဲ့ရသည်။

ယနေ့တွင် ဆွန်ဖုန်းက အကျပ်အတည်းများရှေ့၌ တည်ငြိမ်စွာဖြင့် ပြောဆိုနေသည်ကို မြင်သောအခါ သူ အများကြီး တိုးတက်လာပြီဖြစ်ကြောင်း သတိထားမိလိုက်သည်။