အခန်း ၁၅၄

အခန်း (၁၅၄) မျက်နှာကို ဖြတ်ရိုက်ခြင်း

ထိုနေ့ညတွင် ဆွန်ဖုန်းသည် ယနေ့ အောင်မြင်မှုကို ဂုဏ်ပြုသည့်အနေဖြင့် လုပ်ငန်းခွင်ရှိ အလုပ်သမားများအားလုံးကို အစားအသောက်နှင့် အရက်များ တိုက်ကျွေးကာ စားသောက်ပွဲ လုပ်ပေးခဲ့သည်။

ဝန်ထမ်းတစ်ရာကျော်လုံး အလွန်ပျော်ရွှင်နေကြသည်။

"သူဌေး... ကျွန်တော် ဒီအလုပ်လုပ်လာတာ နှစ်ပေါင်း နှစ်ဆယ်ကျော်ပြီ... ဒီနေ့လိုမျိုး အဆင်ပြေချောမွေ့တာမျိုး တစ်ခါမှ မကြုံဖူးဘူး... တကယ်ကို မယုံနိုင်စရာပဲ..."

ချားလ်စ်က အရက်အနည်းငယ် သောက်ပြီးနောက် ဆွန်ဖုန်း၏ အနီးသို့ လာ၍ ပြောလိုက်လေသည်။

"ဟားဟား... မယုံနိုင်စရာ မဟုတ်ပါဘူး ချားလ်စ်ရာ... ငါတို့ ကံကောင်းသွားလို့ပါ..."

ဆွန်ဖုန်းက အေးအေးဆေးဆေး ပြုံးကာ ဖြေလိုက်သည်။

"ဟုတ်တယ်... ဟုတ်တယ်... ကျွန်တော်တို့ တကယ် ကံကောင်းတာ... ရေနံတွင်းတူးတဲ့ နေရာက တူးရတာ အရမ်း လွယ်ကူနေတယ်လေ... ဒီလိုကံမျိုးက ကြုံတောင့်ကြုံခဲပဲ..."

ချားလ်စ်က ခေါင်းတဆတ်ဆတ် ညိတ်ကာ ထောက်ခံလိုက်သည်။

သူက ဤတစ်ကြိမ်တွင် တူးရလွယ်ကူသော ကျောက်လွှာနေရာကို ကံကောင်းထောက်မစွာ ရွေးချယ်မိသွားခြင်း ဖြစ်သည်ဟု အခိုင်အမာ ယုံကြည်နေသည်။

အကယ်၍ အခြားနေရာများတွင် ကျောက်လွှာနှင့် တွေ့ပါက တူးဖော်ရန် သေချာပေါက် ခက်ခဲမည် ဖြစ်သည်။

ချားလ်စ်ကို အဝေးသို့ လွှတ်လိုက်ပြီးနောက် ဆွန်ဖုန်းသည် ဝူမုန်ရှင်းနှင့် စူးမေးတို့ နှစ်ယောက်ကို ခေါ်ကာ အိမ်ပြန်လာခဲ့လေသည်။

"ဖုန်းကိုကို... ဒီနေ့ ကျွန်မတို့ အလုပ်တွေ ဒီလောက် အဆင်ပြေနေမယ်လို့ မထင်ထားဘူး... ဒီအတိုင်းသာ ဆက်သွားမယ်ဆိုရင် ကျွန်မတို့ရဲ့ ရင်းနှီးမြှုပ်နှံမှုက သေချာပေါက် အရှုံးပေါ်မှာ မဟုတ်ဘူးနော်..."

ကားပေါ်တွင် ဝူမုန်ရှင်းက မျှော်လင့်ချက် ကြီးစွာဖြင့် ပြောလိုက်လေသည်။

"မုန်ရှင်းရယ်... နင်က အရမ်း လွယ်လွယ်တွေးနေတာပဲ... ဒီနေ့ တူးတဲ့နေရာက လွယ်ကူပေမယ့် တခြားနေရာတွေမှာလည်း အဲဒီလို လွယ်မယ်လို့ မဆိုလိုဘူးလေ... ဒီလွင်ပြင်ငယ်လေး တစ်ခုလုံးက တူးရလွယ်ရင်တောင် တခြားနေရာတွေကတော့ သေချာပေါက် တူးရခက်မှာပဲ... ဘာလို့လဲဆိုတော့ ဒီရေနံမြေက ကျောက်လွှာအောက် ရေနံမြေလေ... သာမန် ရေနံမြေမှ မဟုတ်တာ... ကျွန်မတို့အတွက် ဖိအားတွေ အများကြီး ရှိသေးတယ်..."

စူးမေးက ဝင်ပြောလိုက်လေသည်။

စူးမေး ပြောသည်မှာ မှန်ပေသည်။ ရေနံတွင်း တစ်တွင်း နှစ်တွင်းကို တူးရလွယ်ကူသော်လည်း ရေနံမြေ တစ်ခုလုံးရှိ ရေနံတွင်း အားလုံးကို တူးရလွယ်ကူမည်ဟု မဆိုလိုပေ။

ရေနံမြေ တစ်ခုကို တူးဖော်ရန် ရေနံတွင်း ထောင်ပေါင်းများစွာ၊ သောင်းပေါင်းများစွာ သို့မဟုတ် ထိုထက်ပိုသော ရေနံတွင်းများစွာ လိုအပ်ကြောင်း သိထားရမည်။

ရေနံမြေ တစ်ခုလုံးကို တူးဖော်ရာတွင် ရေနံတွင်း အနည်းငယ် တူးရုံဖြင့် ရေနံအားလုံးကို စုပ်ထုတ်နိုင်မည် မဟုတ်ပေ။

ရေနံမြေ တစ်ခု၏ ရေနံအလွှာသည် နေရာတစ်ခုတည်းတွင် စုစည်းနေခြင်း မဟုတ်ပေ။

အချို့နေရာများတွင် နည်းပါးပြီး အချို့နေရာများတွင် များပြားသည်။

ရေနံမြေကြီး အချို့ဆိုလျှင် ဘူမိ ဖွဲ့စည်းပုံ မတူညီမှုကြောင့် မြေအောက် ရေနံအလွှာများမှာ ဆက်စပ်နေခြင်း မရှိပေ။

ရေနံမြေကြီး အချို့၏ ရေနံအလွှာများသည် စတုရန်းကီလိုမီတာ ရာပေါင်းများစွာ အထိ ကျိုးတိုကျဲတဲ ပြန့်ကျဲနေတတ်သည်။

ထို့ကြောင့် ရေနံတူးဖော်သည့်အခါ ရေနံအများဆုံး စုဝေးရာ ဒေသများတွင် ရေနံတွင်းများ တူးဖော်ရခြင်း ဖြစ်သည်။

ရေနံအလွှာများသည် မြေအောက်မြစ်များကဲ့သို့ တစ်ဆက်တည်း ဖြစ်နေခြင်း မဟုတ်ပေ။

"ဒီလိုလား... ဒါဆိုရင် ကျွန်မတို့မှာ အန္တရာယ် အများကြီး ရှိနေတာပေါ့..."

ဝူမုန်ရှင်းက စိုးရိမ်တကြီးဖြင့် ပြောလိုက်လေသည်။

"ဟုတ်တယ် ညီမလေး... ကျောက်လွှာအောက် ရေနံမြေကို တူးဖော်ရတာ အန္တရာယ် အများဆုံး လုပ်ငန်းတွေထဲက တစ်ခုပဲ... ပင်လယ်ရေအောက် ရေနံမြေ တူးဖော်တာကလည်း အဲဒီလိုပဲ အန္တရာယ် အရမ်း များတယ်..."

စူးမေးက ဖြည်းညှင်းစွာ ရှင်းပြလိုက်လေသည်။

"ဘာမှမဖြစ်ပါဘူး... ဘာမှ ကြောက်စရာ မလိုပါဘူး... မင်းတို့သူဌေး ငါကတောင် မကြောက်တာ... မင်းတို့က ဘာလို့ ဒီလောက် လောနေရတာလဲ... တကယ်ပါပဲ... ဧကရာဇ်က မလောပေမယ့် မိန်းမစိုးတွေက လောနေသလိုပဲ... အို... မဟုတ်သေးဘူး... ဧကရာဇ်က မလောပေမယ့် မိဖုရားတွေက လောနေတယ်လို့ ပြောရမှာပေါ့..."

ဆွန်ဖုန်းက ရယ်မောကာ နောက်ပြောင်လိုက်လေသည်။

"ဖယ်စမ်းပါ... ရှင်ကမှ မိဖုရား..."

မိန်းကလေး နှစ်ယောက်စလုံးက ဆွန်ဖုန်းကို မျက်စောင်းထိုးကာ ပြန်ပြောလိုက်ကြလေသည်။

"ဟားဟား... ဒါနဲ့... ဒီည မင်းတို့ နှစ်ယောက်ထဲက ဘယ်သူ ကိုယ်နဲ့ အတူအိပ်မှာလဲ... ဒါမှမဟုတ် နှစ်ယောက်စလုံးလား..."

ဆွန်ဖုန်းက မျက်စိမှိတ်ပြကာ မဖွယ်မရာ အပြုံးဖြင့် မေးလိုက်လေသည်။

"ဟွန့်... မုန်ရှင်း... တို့တွေ သူ့ကို ဂရုမစိုက်နဲ့..."

စူးမေးက ဆွန်ဖုန်းကို မျက်စောင်းထိုးကာ ဝူမုန်ရှင်းအား ပြောလိုက်လေသည်။

"..."

နောက်တစ်ပတ်လုံး ဆွန်ဖုန်းသည် နေ့စဉ် နံနက်စောစော လုပ်ငန်းခွင်သို့ လာရောက်ကာ အလုပ်များကို ကြီးကြပ်ခဲ့သည်။

ဤတစ်ပတ်လုံး ရေနံတွင်း တူးဖော်ရေး လုပ်ငန်းမှာ အလွန် ချောမွေ့ခဲ့သည်။

အလုပ်သမားများကလည်း တက်ကြွစွာ အလုပ်လုပ်နေကြသည်။

နောက်ဆုံးတော့ ယနေ့တွင် စိန့်ဖုန်းရေနံမြေ၏ ပထမဆုံး ရေနံတွင်းကို အောင်မြင်စွာ တူးဖော်နိုင်ခဲ့ပြီ ဖြစ်သည်။

သေချာသည်မှာ ရေနံ မစုပ်ထုတ်ရသေးပေ။ ရေနံတွင်း အသစ်တစ်ခုကို အခုမှ ဖောက်ထွင်းနိုင်ခဲ့ခြင်း ဖြစ်သဖြင့် အဆင့်ဆင့် လုပ်ဆောင်သွားရမည် ဖြစ်ပြီး လော၍ မရပေ။

သို့သော် စိန့်ဖုန်းရေနံမြေက ပထမဆုံး ရေနံတွင်း တူးဖော်နိုင်ခဲ့ပြီ ဟူသော သတင်းမှာ လျင်မြန်စွာ ပျံ့နှံ့သွားပြီး သတင်းစာမျက်နှာများပေါ်သို့ပင် ရောက်ရှိသွားခဲ့သည်။

စိန့်ဖုန်းရေနံမြေကဲ့သို့ ရေနံစည် သန်း ၁၀၀ သာ သိုလှောင်ထားသော ရေနံမြေငယ်လေး တစ်ခုက ပထမဆုံး ရေနံတွင်း တူးဖော်နိုင်ခြင်းမှာ ထူးခြားသော သတင်းကြီး တစ်ခုတော့ မဟုတ်ပေ။

သို့သော် အကြောင်းရင်း နှစ်ခုရှိသည်။

ပထမ အကြောင်းရင်းမှာ စိန့်ဖုန်းရေနံမြေကို ဝယ်ယူပြီးနောက် တစ်လကျော်ခန့် ပြင်ဆင်မှုဖြင့် ပထမဆုံး ရေနံတွင်းကို တူးဖော်နိုင်ခဲ့ခြင်း ဖြစ်သည်။ ဤအမြန်နှုန်းမှာ လူအများအား အံ့ဩသွားစေခဲ့သည်။

ဒုတိယ အကြောင်းရင်းမှာ နယူးဖောင်လန် အစိုးရက ဤသတင်းကို သိသောအခါ ဆွန်ဖုန်းအတွက် တမင်သက်သက် ကူညီ၍ ဝါဒဖြန့်ပေးခဲ့ခြင်း ဖြစ်သည်။

အဘယ်ကြောင့်ဆိုသော် ဆွန်ဖုန်း၏ ရေနံမြေမှာ နယူးဖောင်လန် အနောက်ပိုင်းရှိ ကျောက်လွှာအောက် ရေနံမြေ ဖြစ်ပြီး ဖုန်းရွေ့ သတ္တုတွင်း ကုမ္ပဏီမှာလည်း အနောက်ပိုင်းဒေသရှိ ကျောက်လွှာအောက် ရေနံမြေကို ရင်းနှီးမြှုပ်နှံသော ပထမဆုံး ရှေ့ဆောင် ရေနံကုမ္ပဏီ ဖြစ်သောကြောင့်ပင်။

ယခုကဲ့သို့ သတင်းကောင်းကို ကြားရသောအခါ အစိုးရအနေဖြင့် ဝါဒဖြန့်ပေးမည်မှာ သေချာပေသည်။

တကယ်တော့ နယူးဖောင်လန် အစိုးရ၏ ရည်ရွယ်ချက်မှာ အလွန် ရိုးရှင်းလှသည်။ ဤသတင်းကို အခြားသော ရေနံကုမ္ပဏီများ သိရှိစေရန် ဝါဒဖြန့်ချင်ခြင်း ဖြစ်သည်။

'မကြာသေးမီကမှ ရေနံမြေ တူးဖော်ခွင့်ကို ဝယ်ယူခဲ့တဲ့ ရေနံကုမ္ပဏီငယ်လေး တစ်ခုတောင် ကျောက်လွှာအောက် ရေနံမြေမှာ ပထမဆုံး ရေနံတွင်းကို အမြန်ဆုံး တူးဖော်နိုင်ခဲ့ပြီ' ဟု ဆိုလိုခြင်း ဖြစ်သည်။

ဆိုလိုသည်မှာ နယူးဖောင်လန် အနောက်ပိုင်းဒေသရှိ ကျောက်လွှာအောက် ရေနံမြေများကို တူးဖော်၍ ရကြောင်း၊ ရင်းနှီးမြှုပ်နှံ၍ ရကြောင်း သက်သေပြလိုက်ခြင်းပင် ဖြစ်သည်။

ရေနံကုမ္ပဏီငယ်လေး တစ်ခုပင် ရေနံတွင်း တူးဖော်နိုင်ပါက ထိုရေနံကုမ္ပဏီကြီးများ အနေဖြင့် စိတ်မဝင်စားဘဲ နေမည်လော။

နယူးဖောင်လန် အနောက်ပိုင်း ကမ်းရိုးတန်း ဒေသရှိ ကျောက်လွှာအောက်တွင် ရေနံစည် ၃၅ ဘီလီယံ သိုလှောင်ထားကြောင်း သိထားရမည်။

ဒါက အလွန် ကြီးမားတဲ့ ကိတ်မုန့်ကြီး တစ်ခုပဲ...

ရင်းနှီးမြှုပ်နှံနိုင်မယ် ဆိုရင် သေချာပေါက် အကျိုးအမြတ် အများကြီး ရမှာပဲ...

နယူးဖောင်လန် အစိုးရ၏ တမင်သက်သက် ဝါဒဖြန့်မှုကြောင့် ဤသတင်းငယ်လေးသည် မြို့အသီးသီးရှိ သတင်းစာများနှင့် သတင်းခေါင်းစဉ်များပေါ်သို့ လျင်မြန်စွာ ရောက်ရှိသွားခဲ့သည်။

နယူးဖောင်လန် ညနေခင်း သတင်း-

"သတင်းရရှိချက်များအရ နယူးဖောင်လန် အနောက်ပိုင်း ကမ်းရိုးတန်း ဒေသရှိ စိန့်ဖုန်းရေနံမြေသည် တစ်လကျော် အချိန်ယူကာ ပထမဆုံး ရေနံတွင်းကို အောင်မြင်စွာ တူးဖော်နိုင်ခဲ့ပြီ ဖြစ်ကြောင်း သိရသည်။ သတင်းထောက်၏ အင်တာဗျူးအရ စိန့်ဖုန်းရေနံမြေ၏ တူးဖော်ရေး လုပ်ငန်းများမှာ အရှိန်အဟုန်ဖြင့် လုပ်ဆောင်နေကြောင်း သိရသည်။ ဤပထမဆုံး ရေနံတွင်း တူးဖော်နိုင်ခြင်းက နယူးဖောင်လန် အနောက်ပိုင်း ကမ်းရိုးတန်း ဒေသရှိ ကျောက်လွှာအောက်တွင် ကိန်းအောင်းနေသော ရေနံစည် ၃၅ ဘီလီယံကို မကြာမီ အနာဂတ်တွင် တဖြည်းဖြည်းချင်း တူးဖော်လာနိုင်တော့မည် ဖြစ်ကြောင်း သက်သေပြနေသည်။"

စိန့်ဂျွန်းစ် မနက်ခင်း သတင်း-

"ဖုန်းရွေ့ သတ္တုတွင်း ကုမ္ပဏီ ဟူသော နာမည်မကြီးလှသည့် ရေနံကုမ္ပဏီငယ်လေး တစ်ခုသည် နယူးဖောင်လန် အနောက်ပိုင်း ဒေသရှိ တူးဖော်ရန် အလွန် ခက်ခဲသည်ဟု နာမည်ကြီးသော ကျောက်လွှာအောက် ရေနံမြေကို ရဲရဲဝံ့ဝံ့ ရင်းနှီးမြှုပ်နှံခဲ့ပြီး ယခုအခါ အံ့ဩဖွယ်ရာ ကောင်းလောက်အောင် ပထမဆုံး ရေနံတွင်းကို တူးဖော်နိုင်ခဲ့ပြီ ဖြစ်သည်။ ကြည့်ရသည်မှာ သူတို့သည် ရဲဝံ့ရုံသာမက မိမိကိုယ်ကို အကြွင်းမဲ့ ယုံကြည်မှုလည်း ရှိနေပုံရသည်။ ကောင်းကင်ဘုံသည် ကြိုးစားသူကို မျက်နှာသာ ပေးလေ့ရှိပြီး စွန့်စားရဲသူများအတွက် အကျိုးအမြတ် ရှိစမြဲ ဖြစ်သည်။"

နယူးဖောင်လန် မျက်မှောက်ခေတ် သတင်း-

"ဖုန်းရွေ့ သတ္တုတွင်း ကုမ္ပဏီက အနောက်ပိုင်း ကမ်းရိုးတန်း ဒေသတွင် ရင်းနှီးမြှုပ်နှံထားသော ရေနံမြေမှ ပထမဆုံး ရေနံတွင်း တူးဖော်နိုင်ခဲ့ခြင်းက ထိုကျောက်လွှာအောက် ရေနံမြေများသည် ရင်းနှီးမြှုပ်နှံရန် တန်ဖိုးရှိကြောင်း သက်သေပြလိုက်ခြင်း ဖြစ်သည်။ အနာဂတ်တွင် ရေနံကုမ္ပဏီ အများအပြား ဝင်ရောက် ရင်းနှီးမြှုပ်နှံလာကြမည်ဟု ယုံကြည်ရပြီး နယူးဖောင်လန် အနောက်ပိုင်း ကျောက်လွှာအောက် ရေနံမြေ ရင်းနှီးမြှုပ်နှံမှု၏ နွေဦးရာသီ ရောက်ရှိလာပြီ ဖြစ်သည်။"

ထင်ထားသည့်အတိုင်းပင် ဤသတင်းသည် ရေနံကုမ္ပဏီ အချို့၏ အာရုံစိုက်မှုကို လျင်မြန်စွာ ရရှိသွားခဲ့သည်။

သူတို့၏ စိတ်ဝင်စားမှုကို အပြည့်အဝ မရရှိသေးသော်လည်း နယူးဖောင်လန် အနောက်ပိုင်း ကျောက်လွှာအောက် ဒေသသည် သူတို့၏ အဓိက အာရုံစိုက်ရာ နေရာ ဖြစ်လာခဲ့ပြီ ဖြစ်သည်။

အထူးသဖြင့် ဆွန်ဖုန်း၏ စိန့်ဖုန်းရေနံမြေမှာ ရေနံကုမ္ပဏီကြီးများ၏ အာရုံစိုက်ခြင်းကို အများဆုံး ခံနေရပြီး ဆွန်ဖုန်း၏ ရေနံမြေ တူးဖော်ရေး အခြေအနေကို အနီးကပ် စောင့်ကြည့်နေကြသည်။

ဤအခြေအနေမှာ ဆွန်ဖုန်းကို အနည်းငယ် အံ့ဩသွားစေခဲ့သော်လည်း အခြားသူများ၏ အာရုံစိုက်မှုကို သူ ဂရုမစိုက်ပေ။ ဘာပဲဖြစ်ဖြစ် လက်ရှိ သူ၏ အလုပ်များက စစ်ဆေးခံရမည့် အန္တရာယ် မရှိသောကြောင့်ပင်။

ဆွန်ဖုန်းသည် သူ၏ စိန့်ဖုန်းရေနံမြေ အကြောင်း ရေးသားထားသော သတင်းများကို ဖတ်ရှုရင်း နှုတ်ခမ်းထောင့်တွင် အပြုံးတစ်ခု ပေါ်လာကာ ဤသတင်းစာတိုက်များက တကယ်ကို ဖောင်းပွအောင် ရေးတတ်ကြောင်း စိတ်ထဲမှ တွေးလိုက်လေသည်။

ကြည့်ရသည်မှာ နယူးဖောင်လန် အစိုးရက အတော်လေး ကြိုးစား အားထုတ်ထားပုံရသည်။

"တကယ်လို့ လူမိုက် တစ်ယောက်ယောက်ကများ နယူးဖောင်လန် အနောက်ပိုင်း ကမ်းရိုးတန်းက ကျောက်လွှာအောက် ရေနံမြေကို သွားရင်းနှီးမြှုပ်နှံမယ်ဆိုရင်... သေချာပေါက် ရှုံးမှာပဲ..."

ဆွန်ဖုန်းက စိတ်ထဲမှ တွေးလိုက်လေသည်။

သူ ကျောက်လွှာအောက် ရေနံမြေကို ရဲရဲဝံ့ဝံ့ တူးဖော်ရဲခြင်းမှာ ရေအောက်တူးဖော်ရေး စနစ်ကြီး ရှိနေသောကြောင့် ဖြစ်ပြီး သူ့တွင် အကြွင်းမဲ့ ယုံကြည်မှု ရှိသောကြောင့်ပင်။

အခြား ရေနံကုမ္ပဏီများ ဆိုလျှင်မူ ဤကဲ့သို့ ကံကောင်းမည် မဟုတ်ပေ။ ယနေ့ခေတ်တွင် ကျောက်လွှာအောက် ရေနံမြေ တူးဖော်ရေးမှာ လက်တွေ့ မကျသေးပေ။ နည်းပညာပိုင်းအရ မရင့်ကျက်သေးသလို ကုန်ကျစရိတ်လည်း အလွန် ကြီးမားလှပေသည်။

"တီ... တီ... တီ..."

ထိုအချိန်တွင် ဆွန်ဖုန်း၏ ဖုန်းမြည်လာလေသည်။

ကြည့်လိုက်သောအခါ လီကျစ်ထံမှ ဖြစ်နေသည်။

"ဟဲလို အစ်ကိုလီ... ဘာကိစ္စများ ရှိလို့လဲ..."

ဆွန်ဖုန်းက ဖုန်းလက်ခံခလုတ်ကို နှိပ်ကာ မေးလိုက်လေသည်။

"ဟားဟားဟား... ညီလေး... ဂုဏ်ပြုပါတယ်ကွာ... မင်းရဲ့ စိန့်ဖုန်းရေနံမြေက ပထမဆုံး ရေနံတွင်း တူးနိုင်သွားပြီဆိုတဲ့ သတင်းကို အစ်ကို ဖတ်လိုက်ရတယ်... တကယ် မြန်တာပဲ..."

ဖုန်းထဲမှ လီကျစ်၏ ရယ်မောသံကို ကြားလိုက်ရလေသည်။

"အတူတူပါပဲ အစ်ကိုရာ... အစ်ကိုလည်း အရှေ့ပိုင်းက ရေနံစည် သန်း ၅၀၀ ရေနံမြေကို မကြာခင် တူးတော့မယ် မဟုတ်လား..."

ဆွန်ဖုန်းက ပြုံး၍ ဖြေလိုက်သည်။

လီကျစ် ဖုန်းဆက်၍ ဂုဏ်ပြုခြင်းမှာ အယောင်ပြခြင်းသာ ဖြစ်ပြီး တကယ်တမ်းမှာ သူက ဤမျှ မြန်ဆန်စွာ ပထမဆုံး ရေနံတွင်းကို မည်သို့ တူးဖော်နိုင်ခဲ့သနည်း ဆိုသည်ကို စုံစမ်းလိုခြင်း ဖြစ်ကြောင်း သူ သိသည်။ ဤနေရာမှာ ကျောက်လွှာအောက် ရေနံမြေ ဖြစ်ကြောင်း မမေ့သင့်ပေ။

"ဟဲဟဲ... ဒါနဲ့ ညီလေးရဲ့ ကျောက်လွှာအောက် ရေနံမြေမှာ ဘယ်လိုလုပ် ဒီလောက်မြန်မြန် ပထမဆုံး ရေနံတွင်းကို တူးနိုင်ခဲ့တာလဲ... လျှို့ဝှက်ချက်လေးများ ရှိရင် အစ်ကို့ကို ပြောပြပါဦး..."

ထင်ထားသည့်အတိုင်းပင် လီကျစ်က နောက်တစ်ခွန်းတွင် ထိုစကားကို မေးလာလေသည်။

ဆွန်ဖုန်းက အမှန်အတိုင်း ပြောပြမည် မဟုတ်ပေ။

ထို့ကြောင့် သူက ရမ်းသမ်း၍ ပြောလိုက်လေသည်။

"အာ... ဒီတစ်ခါ ကံကောင်းသွားလို့ပါ... ရေနံတွင်း တူးတဲ့ နေရာက ကျောက်လွှာ အရမ်း နည်းပြီး သာမန် ကျောက်တွေပဲ ဖြစ်နေလို့ မြန်မြန် တူးနိုင်သွားတာ... နောက်ပိုင်း တူးမယ့် ရေနံတွင်းတွေလည်း ဒီလို ချောမွေ့ပါ့မလား ဆိုတာတော့ ကျွန်တော်လည်း မသိသေးဘူး..."

ဆွန်ဖုန်းက မျက်နှာငယ်လေးဖြင့် လီကျစ်အား ပြောပြလိုက်လေသည်။

လီကျစ်သည်လည်း တစ်ဝက်ယုံ တစ်ဝက်မယုံ ဖြစ်နေပြီး သေချာ မဆုံးဖြတ်နိုင်ပေ။

ကံကောင်းသည်ဟု ဆိုလျှင်လည်း ဖြစ်နိုင်ခြေ ရှိသည်။ အဘယ်ကြောင့်ဆိုသော် ဆွန်ဖုန်း၏ ရေနံကုမ္ပဏီ အသစ်လေးတွင် တူးဖော်ရေး နည်းပညာ အတွေ့အကြုံ မရှိကြောင်း သူ သိထားသောကြောင့်ပင်။

ကံကောင်းခြင်း မဟုတ်ဟု ဆိုလျှင်လည်း တစ်ခုခု မှားယွင်းနေသလို ခံစားရသဖြင့် လီကျစ် အနေဖြင့် တစ်ဝက်ယုံ တစ်ဝက်မယုံ ဖြစ်နေရခြင်း ဖြစ်သည်။

"ဪ... ဒီလိုကိုး... ဒါဆိုရင်တော့ ညီလေး ကံတော်တော် ကောင်းတာပဲ... ကျောက်လွှာအောက် ရေနံမြေဆိုတာ တူးဖော်ရ အရမ်း ခက်ခဲတာလေ..."

လီကျစ်က အားကျစွာဖြင့် ချီးကျူးလိုက်လေသည်။

လီကျစ်သည် ဘာမှ ဆက်မေး၍ မရတော့သဖြင့် ဆွန်ဖုန်းနှင့် စကားအနည်းငယ် ပြောပြီးနောက် ဖုန်းချသွားလေသည်။

"ဟဲဟဲ... နောက်ပိုင်း ကိစ္စတွေက သူတို့ရဲ့ မျက်နှာကို ဖြတ်ရိုက်သလို ဖြစ်သွားလိမ့်မယ်... အရင်က ငါ့ကို အထင်သေးခဲ့တဲ့ လူတွေ အားလုံး မေးစေ့တွေ ပြုတ်ကျကုန်အောင် လုပ်ပြမယ်..."

ဆွန်ဖုန်းက မျက်စိမှိတ်ကာ မာယာပါသော အပြုံးဖြင့် ပြောလိုက်လေသည်။

......

ယနေ့ နံနက်ပိုင်းတွင် ဒေးဗစ်သည် အလုပ်သို့ စောစောစီးစီး ရောက်ရှိလာခဲ့လေသည်။

လွန်ခဲ့သော တစ်လကျော်ခန့်က ဝမ်လွန် ရေနံကုမ္ပဏီသည် နယူးဖောင်လန် အရှေ့ပိုင်းရှိ ရေနံမြေ တစ်ခုကို ဝယ်ယူနိုင်ခဲ့ပြီး လက်ရှိတွင် တူးဖော်ရေးအတွက် ကြိုတင် ပြင်ဆင်မှုများ လုပ်ဆောင်နေသည်။

ထို့ကြောင့် ရုံးချုပ်က စိန့်ဂျွန်းစ် မြို့တွင် ဌာနခွဲတစ်ခု တရားဝင် ဖွင့်လှစ်လိုက်ပြီး လက်ရှိတွင် ဒေးဗစ်က ယာယီ တာဝန်ယူ စီမံနေရသည်။

ဒေးဗစ်သည် အရင်တိုင်းပင် မနက်ခင်း လက်ဖက်ရည် သောက်ရင်း အင်တာနက်ပေါ်မှ ယနေ့ သတင်းများကို ဖတ်ရှုနေလေသည်။

မကြာမီ သတင်းတစ်ပုဒ်က သူ၏ အာရုံကို ဆွဲဆောင်သွားခဲ့သည်။

"ဖုန်းရွေ့ သတ္တုတွင်း ကုမ္ပဏီသည် တစ်လကျော်ခန့် ပြင်ဆင်ပြီးနောက် ယမန်နေ့က စိန့်ဖုန်းရေနံမြေတွင် ပထမဆုံး ရေနံတွင်းကို အောင်မြင်စွာ တူးဖော်နိုင်ခဲ့ပြီ ဖြစ်သည်..."

ထိုသတင်းကို ဖတ်ပြီးနောက် ဒေးဗစ်၏ ပါးစပ်မှာ ဘဲဥတစ်လုံး ဝင်ဆံ့လောက်အောင် ဟသွားလေသည်။

သူသည် မနက်ခင်း လက်ဖက်ရည်ခွက်ကို အမြန်ချထားလိုက်ပြီး မောက်စ်ကို ဆွဲချကာ အောက်ဘက်ရှိ အသေးစိတ် သတင်းများကို ကြည့်ရှုလိုက်လေသည်။

ဒေးဗစ်သည် သူ့ကိုယ်သူ မျက်နှာဖြတ်ရိုက် ခံလိုက်ရသလို ခံစားလိုက်ရသည်။ လုံးဝကို မျက်နှာဖြတ်ရိုက် ခံလိုက်ရခြင်း ဖြစ်သည်။

ယခင်က သူသည် ထိုကုမ္ပဏီတွင် နည်းပညာ မရှိသဖြင့် ကျောက်လွှာကို ဖောက်ထွင်းနိုင်မည် မဟုတ်ဟု လှောင်ပြောင်ခဲ့သေးသည်။

သို့သော် ယခုအခါ တစ်ဖက်လူက ရေနံမြေ တူးဖော်ခွင့် ဝယ်ယူပြီးသည်မှာ မည်မျှ ကြာပြီနည်း။ သူတို့နှင့် အချိန်တူတူပင် ဖြစ်သည်။

သို့သော် တစ်ဖက်လူက ယခုအခါ ပထမဆုံး ရေနံတွင်းကို လျင်မြန်စွာ တူးဖော်နိုင်ခဲ့ပြီ ဖြစ်ရာ သူ့အနေဖြင့် မအံ့ဩဘဲ နေနိုင်မည်လော။