အခန်း ၁၅၇

အခန်း (၁၅၇) လုပ်ငန်း တိုးချဲ့ခြင်း

"ဘာ... ရေနံတွင်း သုံးတွင်းစလုံး ရေနံထွက်လာတယ်... တစ်နှစ်စာ ထုတ်လုပ်မှုက ရေနံစည် ၁.၃ သန်းတောင် ရှိတယ်... မဖြစ်နိုင်ဘူး... မဖြစ်နိုင်ဘူး..."

ဒေးဗစ်သည် ကွန်ပျူတာပေါ်ရှိ သတင်းကို ကြည့်ကာ မယုံကြည်နိုင်သည့် အမူအရာဖြင့် ရေရွတ်လိုက်လေသည်။

"ကျောက်လွှာအောက် ရေနံမြေက ရေနံတွေကို ဘယ်အချိန်ကစပြီး ဒီလောက် တူးရလွယ်သွားတာလဲ..."

ဒေးဗစ်သည် အံ့ဩမှုများကြားမှ တဖြည်းဖြည်း တည်ငြိမ်လာပြီးနောက် စိတ်ထဲမှ စဉ်းစားလိုက်လေသည်။

လွန်ခဲ့သော ရက်အနည်းငယ်က ဖုန်းရွေ့ သတ္တုတွင်း ကုမ္ပဏီ ပထမဆုံး ရေနံတွင်း တူးဖော်နိုင်ခဲ့သည့် သတင်းကို တွေ့စဉ်က တစ်ဖက်လူ ကံကောင်းသွားသည်ဟု သူ ထင်ခဲ့သည်။

ယခု လဝက်မျှသာ ကြာသေးသော်လည်း တစ်ဖက်လူက ရေနံတွင်း နှစ်တွင်း ထပ်မံ တူးဖော်နိုင်ခဲ့ရုံသာမက ရေနံတွင်း တစ်တွင်းလျှင် တစ်ရက် ရေနံ တန်ချိန် ၂၀၀ ခန့် ပျမ်းမျှ ထုတ်လုပ်နိုင်သည်မှာ တကယ်ကို မြင့်မားလွန်းလှပေသည်။

ရေနံကြွယ်ဝသော ရေနံမြေများနှင့် နှိုင်းယှဉ်လျှင် ဘာမှမဟုတ်သော်လည်း ကနေဒါရှိ ရေနံမြေ အများစုမှာ ရေနံစေးများ ဖြစ်ပြီး ရေနံ ထုတ်လုပ်မှုမှာ သိပ်မများလှပေ။

အရှေ့အလယ်ပိုင်း ဒေသကဲ့သို့ ရေနံတွင်း တစ်တွင်းလျှင် တစ်ရက် ရေနံ တန်ချိန် သောင်းနှင့်ချီ ထုတ်လုပ်နိုင်ခြင်းမျိုး မရှိပေ။

သို့သော် တစ်ရက် ရေနံ တန်ချိန် ၂၀၀ ဆိုသည်မှာ အလွန် မျှော်လင့်ချက် ရှိသော ပမာဏ ဖြစ်ပေသည်။

"ကြည့်ရတာ စိန့်ဖုန်းရေနံမြေကို အချိန်ရရင် သွားလေ့လာကြည့်မှ ဖြစ်မယ်..."

ဒေးဗစ်က ခဏ စဉ်းစားပြီးနောက် သူ၏ စိတ်ထဲမှ ဆုံးဖြတ်လိုက်လေသည်။

သူ သွားရောက် လေ့လာခြင်းက သူ၏ မျက်နှာကို သူကိုယ်တိုင် ဖြတ်ရိုက်သလို ဖြစ်နေမည်မှာ သေချာပေသည်။

အဘယ်ကြောင့်ဆိုသော် ယခင်က သူသည် ဆွန်ဖုန်း ဒေဝါလီခံရမည်ဟု လှောင်ပြောင်ခဲ့သေးသော်လည်း ယခုအခါ တစ်ဖက်လူက အောင်မြင်နေသောကြောင့်ပင်။

သို့သော် အခြေအနေကို သေချာ သိရှိနိုင်ရန် သူ သွားရောက် လေ့လာရမည် ဖြစ်သည်။

စိန့်ဖုန်းရေနံမြေက ကျောက်လွှာအောက်တွင် ရေနံကို မည်သို့ တူးဖော်ခဲ့သနည်း ဆိုသည်ကို သေချာ သိရှိနိုင်ရန် သူ၏ မျက်နှာကိုပင် ဂရုမစိုက်နိုင်တော့ပေ။

အကယ်၍ အကျိုးအမြတ် တစ်ခုခု ရရှိမည်ဆိုပါက ဝမ်လွန် ရေနံကုမ္ပဏီ အနေဖြင့် နယူးဖောင်လန် အနောက်ပိုင်း ကမ်းရိုးတန်းရှိ ထိုကျောက်လွှာအောက် ရေနံမြေများကို ရင်းနှီးမြှုပ်နှံသင့် မသင့် စဉ်းစားနိုင်မည် ဖြစ်သည်။

တစ်ချိန်တည်းမှာပင် ဆွန်ဖုန်း၏ စိန့်ဖုန်းရေနံမြေမှ ရေနံတွင်း သုံးတွင်း အောင်မြင်စွာ တူးဖော်နိုင်ခဲ့ပြီး တစ်နှစ်လျှင် ရေနံစည် ၁.၃ သန်း ထုတ်လုပ်နိုင်သည် ဟူသော သတင်းက ရေနံလောက၏ အာရုံစိုက်မှုကို နောက်ဆုံးတော့ အပြည့်အဝ ရရှိသွားခဲ့ပြီ ဖြစ်သည်။

ယခင်က ရေနံတွင်း တစ်တွင်းတည်း တူးဖော်နိုင်စဉ်က သိပ်ပြီး အာရုံစိုက်စရာ မကောင်းလှပေ။

ယခုအခါ ရေနံတွင်း သုံးတွင်းတည်းဖြင့် တစ်နှစ်လျှင် ရေနံစည် ၁.၃ သန်း ထုတ်လုပ်နိုင်ခြင်းက အရေးပါလာပြီ ဖြစ်သည်။

ဒါက ကျောက်လွှာအောက် ရေနံမြေ ဖြစ်ကြောင်း မမေ့သင့်ပေ။ ဤသတင်းက ထိုရေနံသူဌေးကြီးများကို အာရုံစိုက်လာစေရန် လုံလောက်ပေသည်။

ယခုအချိန်တွင် လူအများအပြားက နယူးဖောင်လန် အနောက်ပိုင်း ကမ်းရိုးတန်းရှိ ကျောက်လွှာအောက် ရေနံမြေများမှာ ထင်ထားသလောက် တူးဖော်ရန် မခက်ခဲခြင်းများလား ဟု စတင် ခွဲခြမ်းစိတ်ဖြာလာကြသည်။

ထိုသို့မဟုတ်ပါက ဖုန်းရွေ့ သတ္တုတွင်း ကုမ္ပဏီကဲ့သို့ ကုမ္ပဏီငယ်လေး တစ်ခုက ယခုလို ပျော်ပျော်ပါးပါး တူးဖော်နေနိုင်မည်လား။

ထိုနေရာတွင် ရေနံစည် ၃၅ ဘီလီယံ သိုလှောင်ထားကြောင်း သူတို့ သိထားသဖြင့် ဆွန်ဖုန်း ဤမျှ အဆင်ပြေပြေ တူးဖော်နေသည်ကို မြင်သောအခါ သူတို့လည်း စိတ်ဝင်စားလာကြသည်။

နယူးဖောင်လန် မနက်ခင်း သတင်း-

"စိန့်ဖုန်းရေနံမြေရှိ ရေနံတွင်း သုံးတွင်း၏ တစ်နှစ်စာ ထုတ်လုပ်မှုမှာ ရေနံစည် ၁.၃ သန်းအထိ ရှိလာခဲ့ခြင်းက နယူးဖောင်လန် အနောက်ပိုင်း ကျောက်လွှာအောက် ရေနံမြေသည် ပထမဆုံး တော်လှန်ရေး အဆင့် တူးဖော်မှုသို့ ရောက်ရှိလာပြီ ဖြစ်ကြောင်း ပြသနေသည်။ ဖုန်းရွေ့ သတ္တုတွင်း ကုမ္ပဏီသည် အနောက်ပိုင်း ကမ်းရိုးတန်းရှိ ကျောက်လွှာအောက် ရေနံမြေကို ရင်းနှီးမြှုပ်နှံသော ပထမဆုံး ရေနံကုမ္ပဏီ ဖြစ်ပြီး... ကျောက်လွှာအောက် ရေနံမြေ ဖွံ့ဖြိုးတိုးတက်ရေး၏ ရှေ့ဆောင်လမ်းပြလည်း ဖြစ်သည်..."

သတင်းစာများက ဆက်လက်၍ အကြီးအကျယ် ရေးသားနေကြသည်။

သေချာသည်မှာ နယူးဖောင်လန် ပြည်တွင်းတွင်သာ ဖြစ်သည်။ ဤမျှ ကြီးမားသော တုန်လှုပ်မှု မရှိသည့် ကိစ္စရပ်မှာ နိုင်ငံတကာ သတင်းစာမျက်နှာများပေါ်သို့ ရောက်ရှိနိုင်မည် မဟုတ်ပေ။

......

"ဟဲလို အစ်ကိုလီလား... ကျွန်တော် ဆွန်ဖုန်းပါ..."

စိန့်ဖုန်းရေနံမြေ အခြေစိုက် စခန်းတွင် ဆွန်ဖုန်းက လီကျစ်ထံသို့ ဖုန်းဆက်လိုက်လေသည်။

"ဪ... ဆွန်ဖုန်းကိုး... ညီလေးက ဒီရက်ပိုင်းအတွင်း တော်တော်လေး စွမ်းနေတာပဲ... ကျောက်လွှာအောက် ရေနံမြေကို ရေနံတွင်း သုံးတွင်းတောင် တူးနိုင်သွားပြီး တစ်နှစ်စာ ထုတ်လုပ်မှုက ရေနံစည် ၁.၃ သန်းတောင် ရှိတယ်ဆိုတော့... တကယ်ကို အံ့ဩစရာပဲကွာ..."

လီကျစ်က ပြောလိုက်လေသည်။

ဆွန်ဖုန်း၏ ဤကိစ္စမှာ လီကျစ်ကို တကယ်ကို အံ့ဩသွားစေခဲ့သည်။

သူသည် ရေနံလုပ်ငန်းတွင် အနှစ်နှစ်ဆယ်နီးပါး အတွေ့အကြုံ ရှိသူဖြစ်ပြီး ကျောက်လွှာအောက် ရေနံမြေ ဆိုသည်မှာ လက်ရှိ ရေနံလောကတွင် တားမြစ်ထားသော အရာတစ်ခု ဖြစ်ကြောင်း သိထားသည်။

အဘယ်ကြောင့်ဆိုသော် လက်ရှိအချိန်အထိ တူးဖော်နိုင်သော ရင့်ကျက်သည့် နည်းပညာ မရှိသေးသောကြောင့်ပင်။

"ဒါကြောင့် ဆွန်ဖုန်းက ဒီရေနံမြေကို လေလံဆွဲတုန်းက အမြဲတမ်း တည်ငြိမ်နေခဲ့တာကိုး... သူက အစကတည်းက သူ့ကိုယ်သူ အပြည့်အဝ ယုံကြည်မှု ရှိနေခဲ့တာလား... ဒီကျောက်လွှာအောက် ရေနံမြေကို သူ အောင်နိုင်မယ်လို့ ယုံကြည်နေခဲ့တာလား..."

လီကျစ်က စိတ်ထဲမှ တွေးလိုက်လေသည်။

"ဟဲဟဲ... ကံကောင်းတာပါ အစ်ကိုလီရာ... ကံကောင်းတာပါ..."

ဆွန်ဖုန်းက ဟဲဟဲရယ်ကာ ပြောလိုက်လေသည်။ ဤစကားကို သူ လူတိုင်းအား ပြောလေ့ရှိသည်။

"အစ်ကိုလီ... ကျွန်တော် အခု ရေနံတွေ တူးထုတ်နိုင်ပြီ... အရင်က အစ်ကို ပြောထားတယ်နော် ကျွန်တော့် ရေနံတွေကို ဝယ်မယ်လို့... အဲဒီစကားက အတည်ပဲလား..."

ဆွန်ဖုန်းက ယခုတစ်ကြိမ် ဖုန်းဆက်ရခြင်း၏ အဓိက အကြောင်းရင်းမှာ လီကျစ်နှင့် စကားစမြည် ပြောရင်း ဤကိစ္စကို မေးမြန်းလိုသောကြောင့်ပင်။

ဆွန်ဖုန်းသည် ယခုအချိန်တွင် သူ၏ သိုလှောင်ရုံ အတွင်းရှိ တောင်တရုတ်ပင်လယ်မှ ခိုးယူလာသော ရေနံ တန်ချိန် သန်း ၅၀ ကို အလွန် ရောင်းထုတ်ချင်နေပြီ ဖြစ်သည်။

ထိုရေနံများကို ရောင်းထုတ်လိုက်နိုင်ပါက သူ့အတွက် နှစ်သစ်ကူး အသုံးစရိတ်နှင့် ကလေးအတွက် နို့မှုန့်ဖိုး ရရှိလာမည် ဖြစ်သည်။

များများစားစား ရောင်းစရာ မလိုဘဲ တန်ချိန် နှစ်သန်း သုံးသန်းခန့် ရောင်းရလျှင်ပင် ငွေအများကြီး ရရှိနိုင်မည် ဖြစ်သည်။

"အာ... ဟားဟား... အတည်ပေါ့... သေချာပေါက် အတည်ပဲ... ဒါပေမယ့် ညီလေးရဲ့ လက်ရှိ ရေနံတွင်း သုံးတွင်းက တစ်ရက်ကို ရေနံ တန်ချိန် ၆၀၀ လောက်ပဲ ထွက်တာဆိုတော့... ရေနံ ပမာဏက နည်းနေသေးတယ်..."

လီကျစ်က ဆက်ပြောသည်။ "ဒီလိုလုပ်ပါလား... ညီလေးဆီမှာ ရေနံတွေ နည်းနည်း များလာတဲ့ အချိန်ကျမှ အစ်ကို လာဝယ်မယ်လေ... ဘယ်လိုလဲ..."

လီကျစ်က ဆွန်ဖုန်း ဤကိစ္စအတွက် ဖုန်းဆက်မည်ဟု မထင်ထားခဲ့ပေ။

"ရပါတယ်..."

ဆွန်ဖုန်းက ခေါင်းညိတ်လိုက်သည်။

သူ အလွန် ရောင်းထုတ်ချင်နေသော်လည်း လက်ရှိ သူ၏ ရေနံမြေမှ ထွက်ရှိသော ရေနံ ပမာဏမှာ အလွန် နည်းပါးနေသေးသဖြင့် တောင်တရုတ်ပင်လယ်မှ ခိုးယူလာသော ရေနံများကို ထုတ်ရောင်းရန် စောလွန်းနေသေးသည်။

စိန့်ဖုန်းရေနံမြေ၏ ရေနံတွင်းများ များလာပြီး ထုတ်လုပ်မှု ပမာဏ တိုးလာချိန်မှသာ သူ ရောင်းထုတ်နိုင်မည် ဖြစ်သည်။

ထိုအချိန်ကျလျှင် ဆွန်ဖုန်းသည် ရေနံမြေ၏ ထုတ်လုပ်မှု ပမာဏကို ချဲ့ကားပြောဆိုပြီး သူ၏ ရေနံများကို တိတ်တဆိတ် ရောနှော ရောင်းချနိုင်မည် ဖြစ်သည်။

"အစ်ကိုလီ... ကျွန်တော် အစ်ကိုတို့ ကုမ္ပဏီကနေ Z မော်ဒယ် ရေနံစုပ်စက် ဆယ်လုံးနဲ့ KL မော်ဒယ် ရေနံတူးစက် ငါးစုံ ထပ်ဝယ်ချင်တယ်... အသစ်တွေ ရှိလား..."

ဆွန်ဖုန်းက မေးလိုက်လေသည်။

"ဪ... ညီလေးက ရေနံတွင်းတွေ ထပ်တူးပြီး လုပ်ငန်း ချဲ့ချင်တာလား..."

လီကျစ်က ဆွန်ဖုန်း၏ စကားကို ကြားသောအခါ မေးလိုက်လေသည်။

"ဟုတ်ပါတယ်... လက်ရှိ ရေနံတွင်း သုံးတွင်းက အခြေအနေ တည်ငြိမ်နေပြီဆိုတော့ ကျွန်တော် တူးဖော်ရေး လုပ်ငန်းကို ဆက်ချဲ့ချင်လို့ပါ..."

ဆွန်ဖုန်းက သူ၏ နောက်ဆက်တွဲ အစီအစဉ်ကို မဖုံးကွယ်ဘဲ ရိုးသားစွာ ပြောပြလိုက်လေသည်။

"အင်း... အန္တရာယ်ကတော့ ကြီးနေတုန်းပဲ... ဒါပေမယ့် ညီလေးက ဒီရေနံမြေကို ဝယ်ထားပြီးမှတော့ ဘယ်လောက် အန္တရာယ် ကြီးကြီး ဆက်လုပ်ရမှာပဲလေ... စက်တွေကတော့ ရှိတယ်... ညီလေး ဘယ်တော့လောက် လိုချင်တာလဲ..."

လီကျစ်က သက်ပြင်းချကာ မေးလိုက်လေသည်။

"ဟဲဟဲ... အမြန်ဆုံး ရရင် အကောင်းဆုံးပဲ..."

ဆွန်ဖုန်းက ပြုံး၍ ပြောလိုက်လေသည်။

"ကောင်းပြီ... အစ်ကို ပြန်ရောက်ရင် အသစ်တွေ ရှိမရှိ မေးကြည့်ပေးမယ်..."

လီကျစ်က ပြန်ဖြေလိုက်သည်။

"ကောင်းပါပြီ..."

သူတို့နှစ်ဦး စကားအနည်းငယ် ထပ်ပြောပြီးနောက် ဖုန်းချလိုက်လေသည်။

"ဖုန်းကိုကို... အပြင်မှာ သတင်းထောက်တွေက ရှင့်ကို အင်တာဗျူးချင်လို့တဲ့... လက်ခံတွေ့မလား..."

ဆွန်ဖုန်း ဖုန်းချလိုက်သည်နှင့် ဝူမုန်ရှင်းက ဝင်လာကာ မေးလိုက်လေသည်။

"သတင်းထောက်တွေ... အားမနေဘူးဗျာ..."

ဆွန်ဖုန်းက မျက်မှောင်ကြုတ်ကာ တိုက်ရိုက် ငြင်းဆိုလိုက်လေသည်။

သူ အလွန် အလုပ်များနေသည်။ နောက်ဆက်တွဲ အနေဖြင့် စိန့်ဖုန်းရေနံမြေ၏ လုပ်ငန်းကို တိုးချဲ့ရန် စီစဉ်ရမည် ဖြစ်သည်။

လက်ရှိ ရေနံတွင်း သုံးတွင်းတည်းဖြင့် ရေနံ ထုတ်လုပ်နေခြင်းက သူ့ကို မလုံလောက်စေပေ။

နှစ်သစ်ကူး မတိုင်မီ ရေနံတွင်း ၁၃ တွင်းနှင့်အထက် တူးဖော်ပြီး ရေနံစိမ်း တစ်သုတ် ရောင်းချနိုင်ရမည်ဟု သူ ရည်မှန်းထားသည်။

လွန်ခဲ့သော လအနည်းငယ် အတွင်း ဆွန်ဖုန်းသည် ရင်းနှီးမြှုပ်နှံမှုများကိုသာ လုပ်ဆောင်နေခဲ့ပြီး ယနေ့အထိ တစ်ပြားတစ်ချပ်မျှ အမြတ်အစွန်း မရရှိသေးပေ။

အရာအားလုံးမှာ အကုန်အကျများသာ ဖြစ်သည်။ ရေနံများ ထွက်ရှိလာပြီ ဖြစ်သော်လည်း ရောင်း၍ မရသေးသည် မဟုတ်ပါလော။

"ကောင်းပါပြီ... ဒါဆို ကျွန်မ သူတို့ကို ပြန်လွှတ်လိုက်မယ်နော်..."

ဝူမုန်ရှင်းက ခေါင်းညိတ်ကာ ပြောလိုက်လေသည်။

"အင်း... သွားလိုက်တော့..."

ဆွန်ဖုန်းက လက်ယပ်ခေါ်လိုက်လေသည်။