အခန်း ၁၇၃

အခန်း ၁၇၃ ရေနစ်မြုပ်သွားသော ဖျက်သင်္ဘောကြီး

"ဘာ... ပြင်လို့မရတော့ဘူး... သင်္ဘောက စောင်းပြီး နစ်နေပြီ ဟုတ်လား..."

ဘေးတွင်ရှိသော ဒုတိယ အရာရှိ၏ မျက်နှာမှာ ချက်ချင်း ပြောင်းလဲသွားပြီး အံ့ဩတကြီး မေးလိုက်လေသည်။ အခြေအနေက ဤမျှ ဆိုးရွားလိမ့်မည်ဟု သူ မထင်ထားခဲ့ပေ။

"ဟုတ်ကဲ့ပါ အရာရှိ..."

ဆက်သွယ်ရေး တပ်သားက စိတ်ပျက်လက်ပျက်ဖြင့် ပြန်ဖြေလိုက်လေသည်။

"အခြေအနေက ဘယ်လောက် ဆိုးလဲ... အကြီးအကျယ် ထိခိုက်တာလား..."

ဒုတိယ အရာရှိက ဤကိစ္စမှာ နောက်ပြောင်နေခြင်း မဟုတ်ကြောင်း သိသည်။ အကယ်၍ ပြင်ဆင်၍ မရတော့ဘဲ ပင်လယ်ရေများ အဆက်မပြတ် ဝင်ရောက်လာပါက သင်္ဘောနစ်မြုပ်သွားမည့် အန္တရာယ် ရှိပေသည်။

"အရမ်း ဆိုးရွားပါတယ်... လောလောဆယ် နောက်ခန်း နံပါတ် ၄ နဲ့ နံပါတ် ၅ ထဲကို ရေတွေ အကုန်ဝင်နေပါပြီ... ဒီဇယ် အင်ဂျင်ခန်းထဲလည်း ရေဝင်နေပါပြီ... အဲဒီ တွင်းကြီး နှစ်တွင်းရဲ့ အချင်းက သုံးမီတာလောက် ရှိမယ်... ပြီးတော့ သင်္ဘော အလယ်ပိုင်း အထိ ဖောက်ထွင်းသွားတာပါ... အခုချက်ချင်း သင်္ဘောကို စွန့်ခွာဖို့ အကြံပြုပါတယ်... မဟုတ်ရင်..."

ဆက်သွယ်ရေး တပ်သား၏ ထိတ်လန့်နေသော မျက်နှာမှာ ခေါင်းငုံ့သွားပြီး နောက်ဆက်တွဲ စကားကို ဆက်မပြောရဲတော့ပေ။

ဤသတင်းကို ကြားသောအခါ ဒုတိယ အရာရှိနှင့် ကယ်ရီတို့မှာ လျှပ်စီးပစ်ခံရသလို အလွန်အမင်း တုန်လှုပ်သွားကြလေသည်။

"ဘာ... အချင်း သုံးမီတာ ရှိတဲ့ တွင်းကြီးတွေ... အဲဒါတောင် နှစ်တွင်းတောင်..."

ကယ်ရီက ကြမ်းပြင်ပေါ်သို့ ဖင်ထိုင်ရက် လဲကျသွားပြီး မျက်နှာ တစ်ခုလုံး ဖြူဖျော့သွားလေသည်။

"သေပါပြီ... ဒုက္ခပါပဲ..."

ကယ်ရီက အရူးတစ်ယောက်လို ပါးစပ်မှ တတွတ်တွတ် ရေရွတ်နေလေသည်။

ဘေးမှ ဒုတိယ အရာရှိသည် မျက်မှောင်ကြုတ်ကာ ကြည့်နေလေသည်။ သင်္ဘော ကပ္ပတိန် တစ်ယောက် အနေဖြင့် ဤကဲ့သို့ အခြေအနေမျိုး ကြုံတွေ့ရချိန်တွင် တည်တည်ငြိမ်ငြိမ်ဖြင့် သင်္ဘောသားများကို အခက်အခဲမှ လွတ်မြောက်အောင် အမိန့်ပေး ဦးဆောင်ရမည် ဖြစ်သော်လည်း ကယ်ရီမှာမူ အလွန် သတ္တိကြောင်လွန်းပြီး စိတ်လှုပ်ရှားမှု လွန်ကဲကာ ပထမဆုံး စိတ်လွတ်သွားသူ ဖြစ်နေလေသည်။

ဘေးမှ ဆက်သွယ်ရေး တပ်သားကလည်း ကပ္ပတိန်၏ ပုံစံကို ကြည့်ကာ အံ့ဩသွားပြီး စိတ်ထဲတွင်...

'ခေါင်းဆောင်ကတောင် ဒီလို ဖြစ်နေမှတော့ ဘာဆက်လုပ်လို့ ရတော့မှာလဲ...' ဟု တွေးလိုက်မိလေသည်။

ဘေးမှ ဒုတိယ အရာရှိသည် ယခုအချိန်တွင် သူ၏ အထက်လူကြီးကို ခြေထောက်ဖြင့် ကန်ချင်စိတ် ပေါက်လာလေသည်။

'ဘာကောင်လဲ မသိဘူး... သေးထွက်မကျရုံ တမယ်ပဲ... တကယ် နာမည်လာယူတဲ့ ကောင်ဆိုတာ သေချာတယ်... အရင်တုန်းကတော့ အရမ်း တော်သလိုလိုနဲ့၊ အခု တကယ် ပြဿနာ ကြုံလာတော့ ချက်ချင်း အရူးလို ဖြစ်သွားတာပဲ...'

"အခြား စစ်သင်္ဘော နှစ်စင်းကို ချက်ချင်း လာကူညီဖို့ အကြောင်းကြားလိုက်... ပြီးတော့ ရေနံတူးစင်ပေါ်က အန်တိုနီတို့ကိုလည်း လွှတ်နိုင်သမျှ လူအကုန်လွှတ်ပြီး လာကူညီဖို့ ပြောလိုက်..."

ဒုတိယ အရာရှိက လေးနက်သော လေသံဖြင့် အမိန့်ပေးလိုက်လေသည်။

"ဪ... ပြီးတော့ သင်္ဘောသားတွေ အားလုံးကို အလုပ်တွေ ရပ်ပြီး ကုန်းပတ်ပေါ် အကုန် တက်လာခဲ့ဖို့ ပြောလိုက်..."

"ဟုတ်ကဲ့... အဲဒီ... ရန်သူက အခုထိ အရိပ်အယောင် မတွေ့ရသေးဘူး... ဒုတိယ အကြိမ် ထပ်တိုက်ခိုက်လာရင် ဘယ်လိုလုပ်မလဲ..."

ဆက်သွယ်ရေး တပ်သားက အတင်း အားတင်းကာ မေးလိုက်လေသည်။

"အဲဒါတွေ ဂရုစိုက်မနေနဲ့တော့... အခု ဖျက်သင်္ဘောမှာ တိုက်ခိုက်နိုင်စွမ်း ရှိသေးလို့လား... တစ်ဖက်လူက ဒုတိယ အကြိမ် ထပ်တိုက်လာရင်လည်း ကံဆိုးတယ်လို့ပဲ သတ်မှတ်လိုက်တော့..."

ဒုတိယ အရာရှိက လက်ကာပြကာ ပြောလိုက်လေသည်။

"ဟုတ်ကဲ့ပါ..."

ဆက်သွယ်ရေး တပ်သား ထွက်သွားပြီးနောက် ဒုတိယ အရာရှိသည် သတ္တိကြောင်နေသော ကယ်ရီကို အမိန့်ပေးခန်းထဲမှ ဆွဲထုတ်ကာ ကုန်းပတ်ပေါ်သို့ ခေါ်ဆောင်သွားလေသည်။

မကြာမီ စစ်သင်္ဘော အောက်ထပ်မှ သင်္ဘောသားများသည် အချိန်နှင့် အမျှ လုကာ ကုန်းပတ်ပေါ်သို့ ပြေးတက်လာကြလေသည်။ အသက်ကယ် အင်္ကျီများကို ဝေငှပေးပြီး အသက်ကယ် လှေများကိုလည်း ချထားပေးလေသည်။ လူတိုင်းက အသက်ကယ် လှေပေါ်သို့ အလုအယက် တက်ကြလေသည်။

......

ရေနံတူးစင်ပေါ်တွင်...

ခုနက စစ်သင်္ဘောကြီးကို အထင်ကြီးနေသော အန်တိုနီတို့သည် မလှမ်းမကမ်းရှိ ဖျက်သင်္ဘောကြီး၏ အရှိန် ရုတ်တရက် ကျဆင်းသွားပြီး နောက်ပိုင်းတွင်လည်း မီးလောင်ကာ မီးခိုးများ အူထွက်လာသည်ကို ရုတ်တရက် မြင်လိုက်ရလေသည်။

"ဒါ... ဒါ ဘယ်လိုဖြစ်တာလဲ... အရှိန် ဘာလို့ ကျသွားတာလဲ..."

"ဘုရားရေ... ဖျက်သင်္ဘောကြီး ရန်သူ့ တိုက်ခိုက်တာ ခံလိုက်ရပြီ... ဒုက္ခပါပဲ..."

စက္ကန့်အနည်းငယ် အကြာတွင် ဖျက်သင်္ဘော၏ ဖင်ကို မည်သည့် အချိန်က ထို လျှို့ဝှက်ဆန်းကြယ် ဂြိုဟ်သား က ခြေမွပစ်လိုက်မှန်း မသိကြောင်း သူတို့ သေချာ မြင်တွေ့လိုက်ရသည်။ မီးခိုးများ အူထွက်နေပြီး သင်္ဘောက နောက်ဘက်သို့ စောင်းကာ နစ်မြုပ်တော့မည့် လက္ခဏာများ ပြသနေလေသည်။

"မဖြစ်နိုင်တာ... အဲဒီ လျှို့ဝှက်ဆန်းကြယ် ဂြိုဟ်သား ရဲ့ အရိပ်အယောင်ကိုတောင် ငါ မတွေ့လိုက်ရဘူး... တစ်ဖက်လူက ဖျက်သင်္ဘောကို ဘယ်လို တိုက်ခိုက်လိုက်တာလဲ ဆိုတာကိုလည်း မမြင်လိုက်ရဘူး... ဖျက်သင်္ဘောက ဘယ်လိုလုပ်ပြီး ရုတ်တရက် အတိုက်ခံရတာလဲ... ချက်ချင်း တိုက်ခိုက်နိုင်စွမ်းရော၊ မောင်းနှင်နိုင်စွမ်းပါ ပျောက်သွားတယ်... ပင်လယ်ရေအောက်မှာ နစ်တော့မယ့် ပုံပဲ..."

ရေနံတူးစင်ပေါ်ရှိ လူအားလုံးမှာ ပါးစပ်အဟောင်းသားဖြင့် အလွန်အမင်း အံ့ဩ တုန်လှုပ်သွားကြလေသည်။

လွန်ခဲ့သော စက္ကန့်ပိုင်းကမှ ဖျက်သင်္ဘောကြီးက ရေနက်ပိုင်း သုံး ဗုံးများ ပစ်ချကာ ပင်လယ်ပြင်တွင် ကြီးကျယ်ခမ်းနားစွာ ရှိနေသည်ကို သူတို့ မြင်တွေ့ခဲ့ရသည်။ သိပ်မကြာမီမှာပင် သေတော့မည့် ပုံစံ ဖြစ်သွားလေသည်။ ဤသို့ ရုတ်တရက် ပြောင်းလဲသွားမှုက သူတို့၏ ဦးနှောက်ကို လက်ခံနိုင်စွမ်း မရှိစေဘဲ ရပ်တန့်သွားစေလေသည်။

"ခဏလေး အတွင်းမှာ အရှုံးအနိုင် ပေါ်သွားတယ်... ငါတို့က ရန်သူ ဘယ်နေရာမှာ ရှိမှန်းတောင် မသိရဘူး... ရန်သူက တော်တော်လေး အစွမ်းထက်တာပဲ..."

"ရန်သူက တကယ်ပဲ ဂြိုဟ်သားများလား..."

လူတိုင်း၏ မေးစေ့များ ပြုတ်ကျလုမတတ် ဖြစ်သွားကြပြီး အကြောက်တရားက သူတို့၏ စိတ်နှလုံးထဲတွင် ရုတ်တရက် ဖြစ်ပေါ်လာလေသည်။

နောက်တစ်စက္ကန့်တွင် တစ်ဖက်လူက ဤရေနံတူးစင်ကိုပါ ဗုံးကြဲပစ်လိုက်မည် ဆိုပါက သူတို့ ငိုစရာ နေရာတောင် ရှိမည် မဟုတ်တော့ပေ။

"အဖွဲ့... အဖွဲ့ခေါင်းဆောင်..."

ဆက်သွယ်ရေး တပ်သား တစ်ဦးက ချွေးသံတရွဲရွဲဖြင့် ပြေးလာလေသည်။

"ဘာကိစ္စလဲ..."

အန်တိုနီက မေးလိုက်လေသည်။

"ဗိုလ်ချုပ် ကယ်ရီ က ကျွန်တော်တို့ကို ရနိုင်သမျှ လူတွေ အကုန်စုပြီး ရှေ့က စစ်သင်္ဘောပေါ်က သင်္ဘောသားတွေကို သွားကယ်ဖို့ ပြောပါတယ်..."

ဆက်သွယ်ရေး တပ်သားက အလောတကြီး ပြောလိုက်လေသည်။

"ဘာ... ဖျက်သင်္ဘောက နစ်တော့မှာလား... မဖြစ်နိုင်ဘူး... ရေဝင်တဲ့ နေရာကို ပြင်လို့ မရဘူးလား..."

ဘေးမှ အိုနေးလ်က အံ့ဩတကြီး မေးလိုက်လေသည်။

"မရဘူး... ဗိုလ်ချုပ်တို့က သင်္ဘောကို စွန့်တော့မှာတဲ့..."

အားလုံးက ထိုစကားကို ကြားသောအခါ လေအေးများ ရှူသွင်းလိုက်မိကြသည်။

ဒီလိုဆိုရင် ဒီဖျက်သင်္ဘောကြီးက ပင်လယ်ရေအောက်ကို နစ်မြုပ်သွားတော့မှာပေါ့။ ဒုက္ခပါပဲ... ဒေါ်လာ ဘယ်လောက်တောင် ရေထဲ မျောပါသွားပြီလဲ မသိဘူး။

"ကောင်းပြီ... ငါတို့ ကယ်ဆယ်ရေး အလုပ်တွေကို ချက်ချင်း စတင်ကြမယ်..."

အန်တိုနီနှင့် အိုနေးလ် တို့သည် အလုပ်ကို ချက်ချင်း စတင်ကြပြီး လူတိုင်းက လေးလံသော စိတ်နှလုံးဖြင့် လှုပ်ရှားလာကြလေသည်။

ဆယ်မိနစ်ကျော် အကြာတွင် အခြား စစ်သင်္ဘော နှစ်စင်းလည်း ရောက်လာကြလေသည်။

သို့သော် သူတို့ ရောက်လာသောအခါ သူတို့ရှေ့ရှိ ဖျက်သင်္ဘော၏ နောက်ဘက် တစ်ဝက်မှာ ပင်လယ်ရေထဲသို့ အကြီးအကျယ် နစ်မြုပ်နေပြီ ဖြစ်ပြီး သင်္ဘော နောက်ပိုင်း၏ တစ်ဝက်ခန့်မှာ ရေအောက်သို့ ရောက်နေပြီ ဖြစ်ကြောင်း တွေ့လိုက်ရသည်။ ဤဖျက်သင်္ဘောကြီး ကယ်တင်၍ မရတော့ကြောင်း သူတို့ သိလိုက်ကြလေသည်။

"ကယ်ဆယ်ရေး ချက်ချင်း စတင်..."

"ဪ... ရန်သူ ထပ်လာတိုက်မှာကို ကာကွယ်ဖို့ အဆင့်မြင့် သတိပေးချက် ဖွင့်ထား..."

ယခုအချိန်တွင် ထိုဖျက်သင်္ဘော၏ ကုန်းပတ်ပေါ်တွင် သင်္ဘောသားများ အပြည့် ရှိနေသည်။ အသက်ကယ် အင်္ကျီနှင့် အသက်ကယ် လှေ အရေအတွက် မလုံလောက်သဖြင့် လူတစ်ဝက်ခန့်မှာ အခြား စစ်သင်္ဘော နှစ်စင်းမှ ညီအစ်ကိုများ မြန်မြန် လာကယ်ရန်သာ ဆုတောင်းနေရလေသည်။ ထို့သို့မဟုတ်ပါက သူတို့မှာ ပင်လယ်ရေအောက်တွင် အမှန်တကယ် သေဆုံးရတော့မည် ဖြစ်သည်။

"ကယ်ကြပါဦး... ကယ်ကြပါဦး... ရေတွေ တက်လာပြီ..."

"မေမေ... သား အိမ်ပြန်ချင်တယ်..."

"သောက်ကျိုးနည်း... သောက်ကျိုးနည်း... ငါ ဘယ်တော့မှ စစ်သား မလုပ်တော့ဘူး... အိမ်ပြန်ပြီး လယ်ပဲ စိုက်တော့မယ်..."

နစ်မြုပ်တော့မည့် ဖျက်သင်္ဘော၏ ကုန်းပတ်ပေါ်တွင် သင်္ဘောသား တစ်စုမှာ သေတော့မည့် အမူအရာများဖြင့် အော်ဟစ် ညည်းတွားနေကြလေသည်။ ဖြည်းဖြည်းချင်း တက်လာသော ပင်လယ်ရေများက သူတို့၏ နူးညံ့သော စိတ်နှလုံးကို တိုက်စားနေလေသည်။

သင်္ဘော နစ်မြုပ်မှုကြောင့် ပတ်ဝန်းကျင်ရှိ ပင်လယ်ရေများမှာ လှိုင်းထန်နေပြီး ကြည့်ရသည်မှာ အလွန် ကြောက်မက်ဖွယ် ကောင်းလှပေသည်။

ထို့နောက် နှစ်နာရီကြာ ကယ်ဆယ်ရေး လုပ်ငန်းများ လုပ်ဆောင်ပြီးနောက် အချိန်မီ ကယ်ဆယ်နိုင်ခဲ့သဖြင့် သေဆုံးသူ မရှိသလောက်ပင် ဖြစ်သည်။ သို့သော် ဒဏ်ရာရသူ အများအပြား ရှိပြီး သတိလစ်သွားသူများလည်း ရှိသည်။ သေးထွက်ကျသွားသူများလည်း ရှိပြီး ထိုသူမှာ ဗိုလ်ချုပ် ကယ်ရီ ပင် ဖြစ်သည်။

ဤသတင်းဆိုး အမေရိကန်သို့ ရောက်သွားသောအခါ တစ်နိုင်ငံလုံး အံ့ဩ တုန်လှုပ်သွားကြလေသည်။

သူတို့၏ ပထမ တုံ့ပြန်မှုမှာ မယုံကြည်ခြင်း ဖြစ်ပြီး၊ ဒုတိယ တုံ့ပြန်မှုမှာ မယုံကြည်ခြင်း၊ တတိယ တုံ့ပြန်မှုမှာလည်း မယုံကြည်ခြင်းပင် ဖြစ်သည်။

စစ်သင်္ဘော သုံးစင်း စေလွှတ်၍ ရက်ပေါင်းများစွာ ကင်းလှည့်ခဲ့သော်လည်း ရရှိလာသော ရလဒ်မှာ ဖျက်သင်္ဘော တစ်စင်း ရန်သူ၏ တိုက်ခိုက်မှုကြောင့် နစ်မြုပ်သွားခဲ့ရခြင်း ဖြစ်သည်။

သို့သော် ယခုအချိန်အထိ ရန်သူ၏ ရုပ်ရည်ကို မသိရသေးသလို ရန်သူက မည်သည့် လက်နက် အသုံးပြုခဲ့ကြောင်း၊ ဖျက်သင်္ဘောကို မည်သည့် လက်နက်ဖြင့် နစ်မြုပ်စေခဲ့ကြောင်းကိုလည်း မသိရှိကြသေးပေ။

ဤသတင်းကို ရရှိပြီးနောက် အထက်လူကြီးများက အလွန်အမင်း ဒေါသထွက်သွားပြီး အန်တိုနီ၊ အိုနေးလ် နှင့် ထိုသောက်ကျိုးနည်း ကယ်ရီ တို့ကို အပြင်းအထန် ဆဲဆိုကြလေသည်။

အထူးသဖြင့် ကယ်ရီ ပင် ဖြစ်သည်။ ဖျက်သင်္ဘော တစ်စင်းလုံးကို ဖျက်ဆီးပစ်ခဲ့သဖြင့် တကယ်ကို အပြစ်ကြီးလှပေသည်။