အခန်း ၁၈၅

အခန်း ၁၈၅ ဝန်ထမ်း ခေါ်ယူခြင်း

ဗန်ကူးဗားတွင် ဟယ်မင်ယီ နှင့်အတူ သုံးရက်ခန့် နေပြီးနောက် ဆွန်ဖုန်းသည် နယူးဖောင်လန် သို့ သွားမည့် လေယာဉ်ပေါ်သို့ တက်ခဲ့လေသည်။ စူးမေး က ဖုန်းရွေ့ သမုဒ္ဒရာ စူးစမ်းလေ့လာရေး ကုမ္ပဏီ မှတ်ပုံတင်ရေး ကိစ္စများ ပြီးစီးသွားပြီ ဖြစ်ကြောင်း အကြောင်းကြားထားသည်။

ထိုနေ့ မွန်းလွဲပိုင်းတွင် ဆွန်ဖုန်းသည် နယူးစ် မြို့လေးရှိ စိန့်ဖုန်းရေနံမြေ ကုမ္ပဏီ ရုံးချုပ်သို့ ရောက်ရှိလာခဲ့လေသည်။

ဆွန်ဖုန်း ကုမ္ပဏီသို့ ရောက်သောအခါ စူးမေးက ထိုနေရာတွင် အချိန်အတန်ကြာ စောင့်ဆိုင်းနေပြီ ဖြစ်သည်။

"သူဌေး... ဖုန်းရွေ့ သမုဒ္ဒရာ စူးစမ်းလေ့လာရေး ကုမ္ပဏီ ကို မှတ်ပုံတင်ပြီးသွားပြီ... နောက်ထပ် ဘာလုပ်ရမလဲ"

စူးမေးက မေးလိုက်လေသည်။

"အင်း... ငါ အရင်ဆုံး စက်ပစ္စည်းတွေ ဝယ်ပြီး ဝန်ထမ်းတွေ ခေါ်လိုက်ဦးမယ်... စိန့်ဖုန်းရေနံမြေ ဘက်ကိုတော့ မင်းပဲ ဆက်ပြီး သေချာ ကြည့်ရှုပေးထားပါ"

"စိတ်ချပါ"

စူးမေးက သဘောတူလိုက်လေသည်။ စိန့်ဖုန်းရေနံမြေ ဘက်ရှိ ကိစ္စများကို သူမ တစ်ယောက်တည်း အတော်လေး နိုင်နိုင်နင်းနင်း ကိုင်တွယ်နိုင်နေပြီ ဖြစ်သည်။ မိမိ၏ သူဌေးက ပင်လယ်ရေအောက် သင်္ဘောပျက် ဆယ်ယူရေး ဘက်သို့ အာရုံစိုက်ချင်နေပြီ ဖြစ်ရာ အခြား ကိစ္စများဖြင့် အနှောင့်အယှက် မပေးလိုတော့ပေ။

ဤရက်ပိုင်းများ အတွင်း စူးမေးသည်လည်း ပင်လယ်ရေအောက် သင်္ဘောပျက် ဆယ်ယူရေး ဆိုင်ရာ ဗဟုသုတများကို လေ့လာထားပြီး ဤလုပ်ငန်းမှာ အလွန် အချိန်ကုန်သော အလုပ်ဖြစ်ကြောင်း သိထားသည်။

"ဒီရက်ပိုင်း ဒီအဲလ် ရေနံကုမ္ပဏီ ဘက်က ဘာလှုပ်ရှားမှုမှ မရှိဘူးမလား"

ဆွန်ဖုန်းက ကုမ္ပဏီ မှတ်ပုံတင်ရေး စာရွက်စာတမ်းများကို ဖတ်ရှုနေရင်း ခေါင်းမော့ကာ မေးလိုက်လေသည်။

"ဘာလှုပ်ရှားမှုမှ မရှိဘူး ထင်တာပဲ"

"ဟွန့်... သူတို့ ထပ်ပြီး ရိုင်းစိုင်းရဲသေးရင် အကြီးအကျယ် ဒုက္ခရောက်အောင် လုပ်ပစ်မယ်"

ဆွန်ဖုန်းက စာရွက်စာတမ်းများကို ချထားကာ အေးစက်စက် ပြောလိုက်လေသည်။ သူက ပင်လယ်ရေအောက်မှ ရေနံများကို ခိုးယူနိုင်သလို ကုန်းတွင်းပိုင်းမှ ရေနံများကိုလည်း ခိုးယူနိုင်သည် မဟုတ်ပါလား။ အနည်းငယ် ပိုရှုပ်ထွေးသွားရုံသာ ရှိသည်။

လက်ရှိတွင် ဆွန်ဖုန်းမှာ နောက်ခံ အင်အား မရှိသလို အဆက်အသွယ်လည်း မရှိသေးပေ။ အဆက်အသွယ် ဆိုသည်မှာ ဝတ္ထုများထဲတွင် ပါသလို အလွယ်တကူ တည်ဆောက်၍ ရသည် မဟုတ်ကြောင်း သူ သိသည်။

အဆက်အသွယ် တည်ဆောက်ရန် ဆိုသည်မှာ ငွေကြေးနှင့် အကျိုးအမြတ်များ ပေးကမ်းခြင်းမျှသာ ဖြစ်သော်လည်း မိမိ အခက်အခဲ ကြုံတွေ့ရချိန်တွင် ထိုသူများက ကူညီမည်လား၊ သို့မဟုတ် နောက်ကျောကို ဓားနှင့် ထိုးမည်လား ဆိုသည်ကို မသိနိုင်ပေ။

ထိုကဲ့သို့သော အဆက်အသွယ်မျိုးမှာ အလကားပင် ဖြစ်သည်။ အစားအသောက် ရှိမှ ခင်မင်သော သူငယ်ချင်းများ ကဲ့သို့ပင် ဖြစ်သည်။

လက်ရှိတွင် ဆွန်ဖုန်း၌ စစ်မှန်သော အဆက်အသွယ် ဆို၍ တစ်ယောက်တည်းသာ ရှိသည်။ စုန့်ကျဲ ပင် ဖြစ်သည်။ သူက ဆွန်ဖုန်းကို ဒေါ်လာ သန်း ၁၀၀ ချေးရန် လုံးဝ ဝန်မလေးခဲ့ပေ။ ဤကဲ့သို့ ယုံကြည်မှုနှင့် သဘောထားကြီးမှုကို လူမည်မျှ လုပ်နိုင်မည်နည်း။

ဆွန်ဖုန်း အနေဖြင့် ကျောက်လွှာ ရေနံမြေတွင် ရင်းနှီးမြှုပ်နှံခြင်းက အရှုံးပေါ်ရန် ရာခိုင်နှုန်း များကြောင်း သိလျက်နှင့်ပင် သူက ကူညီပေးခဲ့သည်။ ဤသည်မှသာ စစ်မှန်သော အဆက်အသွယ်၊ စစ်မှန်သော မိတ်ဆွေ ဖြစ်ပေသည်။

အဆက်အသွယ်နှင့် အင်အား ဆိုသည်မှာ ဖြည်းဖြည်းချင်း တည်ဆောက်ယူရမည် ဖြစ်ပြီး တစ်ကြိမ်တည်းနှင့် ရရှိနိုင်မည် မဟုတ်ပေ။

ယခု နောက်ကွယ်မှ အင်အားကို ပြောရမည် ဆိုလျှင် မည်သူကမှ ဆွန်ဖုန်းနှင့် ယှဉ်နိုင်မည် မဟုတ်ပေ။ ဆွန်ဖုန်းက သူတို့ကို အသေအလဲ ကစားနိုင်ပြီး မည်သူက လုပ်မှန်းပင် သိမည် မဟုတ်ပေ။ ပါလာဝမ်ကျွန်း ရေနံခိုးမှု ကဲ့သို့ပင် ဖြစ်သည်။

လက်ရှိ ဆွန်ဖုန်း၏ စိတ်နေသဘောထား အရ ဒီအဲလ် ရေနံကုမ္ပဏီက ထပ်မံ၍ ပြဿနာ ရှာလာပါက သူတို့၏ ရေနံတွင်း အားလုံးကို အကုန် ခိုးယူပစ်မည် ဖြစ်သည်။ ကုန်းတွင်းပိုင်း ရေနံတွင်း ဆိုလျှင်လည်း ဘာဖြစ်သနည်း။ ခိုးရသည်မှာ အနည်းငယ် ပိုရှုပ်ထွေးပြီး ကြွက်တွင်းလေး တစ်ခု တူးကာ ရေငုပ်ဝတ်စုံကို မြေအောက် ရေနံလွှာ အထိ သွားစေပြီး ရေနံစုပ်စက်များ ထုတ်ကာ အဝစုပ်ယူလိုက်ရုံသာ ဖြစ်သည်။

"သူတို့ အခု ကျွန်မတို့ကို ပြဿနာ ရှာဖို့ စိတ်ကူးရှိမှာ မဟုတ်ပါဘူး... လွန်ခဲ့တဲ့ ရက်ပိုင်းက ပါလာဝမ်ကျွန်းက သူတို့ရဲ့ ရေနံတန်ချိန် သန်း ၃၀၀ ရှိတဲ့ ရေနံမြေကြီးမှာ ပြဿနာ တက်သွားတယ်လို့ ကြားတယ်... လျှို့ဝှက် ဂိုဏ်း တစ်ခုက သုံးကြိမ် ဆက်တိုက် ခိုးသွားတာတဲ့... ဂြိုဟ်သားတွေ လုပ်တာလို့တောင် ပြောနေကြတယ်... အခုတော့ သူတို့ တော်တော်လေး ခေါင်းကိုက်နေလောက်ပြီ"

စူးမေးက ပါးစပ်ကို အုပ်ကာ ရယ်မော၍ ပြောလိုက်လေသည်။ ဤသတင်းကို ကြားရချိန်တွင် ဘုရားသခင်က မျက်စိရှိပြီး လူယုတ်မာတွေ ဒုက္ခရောက်ပြီဟု သူမ တွေးခဲ့မိသည်။ တကယ်တော့ ဤအရာများ အားလုံးကို သူမ ရှေ့ရှိ အမျိုးသားက လုပ်ဆောင်ခဲ့ခြင်း ဖြစ်ကြောင်း သူမ မသိပေ။ အကယ်၍ သိသွားပါက သူမ မည်သို့သော အမူအရာ ဖြစ်သွားမည်နည်း... အလွန် ဝမ်းသာသွားမည်လား၊ သို့မဟုတ် လန့်ဖျပ်သွားမည်လား မသိနိုင်ပေ။

စူးမေးနှင့် ခဏခန့် စကားပြောပြီးနောက် ဆွန်ဖုန်းသည် သင်္ဘောပျက် ဆယ်ယူရေး အတွက် လိုအပ်သော စက်ပစ္စည်းများကို စတင် ဝယ်ယူလေသည်။

အဆင့်မြင့် စက်ပစ္စည်းများကို ဆွန်ဖုန်း ဝယ်ယူမည် မဟုတ်ပေ။ သူက ရွှေများကို သယ်ယူရန် ဆယ်ယူရေး စနစ် ပါဝင်သော ကုန်တင်သင်္ဘောကြီး တစ်စင်း၊ ရွှေငွေ ကျောက်မျက်ရတနာများ ဆယ်ယူရန် စက်ပစ္စည်းများနှင့် ရေငုပ် စက်ပစ္စည်း တချို့ကိုသာ ဝယ်ယူရန် လိုအပ်သည်။

တကယ်တမ်း ပင်လယ်ရေအောက် သင်္ဘောပျက် ဆယ်ယူရေး အတွက် ရင်းနှီးမြှုပ်နှံမှုမှာ အလွန် ကြီးမားလှသည်။ အနည်းဆုံး ဒေါ်လာ သန်းချီ သို့မဟုတ် ထိုထက်မက ကုန်ကျနိုင်သည်။ သို့သော် ဆွန်ဖုန်းတွင် ရေငုပ်ဝတ်စုံ ရှိနေသဖြင့် သင်္ဘောပျက်၏ တိကျသော တည်နေရာကို ရှာဖွေရန် လိုအပ်သော လူအင်အား၊ ငွေအင်အား အားလုံးကို သက်သာစေသည်။ ထိုအဆင့်မှာ အလွန် ငွေကုန်ကြေးကျ များသော အဆင့် ဖြစ်သည်။

အကယ်၍ သင်္ဘောပျက်က ရေနက်ပိုင်းတွင် ရှိနေပါက သို့မဟုတ် ရွှံ့နွံများ ထုထည် ကုဗမီတာ ထောင်ချီ၊ သောင်းချီ ဖုံးလွှမ်းနေပါက ဆယ်ယူရေး အတွက် အလွန် ကြီးမားသော ငွေကြေးများ လိုအပ်မည် ဖြစ်သည်။

ထိုအဆင့် နှစ်ခုတည်းနှင့်ပင် ငွေ အမြောက်အမြား ကုန်ကျနိုင်သည်။ သို့သော် ဆွန်ဖုန်း အတွက်မူ ထိုအဆင့် နှစ်ခုလုံးကို တိုက်ရိုက် ကျော်ဖြတ်နိုင်သည်။ သူက သင်္ဘောပျက်ကို ရေတိမ်ပိုင်းသို့ ရွှေ့ပြောင်းကာ လူအများအပြားကို ခေါ်ယူပြီး ရေတိမ်ပိုင်းမှ ရွှေငွေ ကျောက်မျက်ရတနာများကို ဆယ်ယူခိုင်းလိုက်ရုံသာ ဖြစ်ရာ ငွေအများကြီး ကုန်ကျမည် မဟုတ်ပေ။

ဆွန်ဖုန်း တွေးကြည့်လေ သင်္ဘောပျက် ဆယ်ယူရေးမှာ အလွန် အမြတ်အစွန်း ကြီးမားပြီး အချိန်တို အတွင်း အကျိုးအမြတ် ရနိုင်ကြောင်း သိလာလေသည်။ ဆယ်ယူပြီးသည်နှင့် ချက်ချင်း ရောင်းချနိုင်သည်။ တကယ်တော့ ဆွန်ဖုန်း အတွက်သာ အချိန်တိုခြင်း ဖြစ်ပြီး အခြား သူများ အတွက်မူ အလွန် ကြာမြင့်ပေလိမ့်မည်။ ဆယ်စုနှစ်ချီ ရှာဖွေနေသော်လည်း သင်္ဘောပျက်ကို မတွေ့နိုင်သူများလည်း ရှိသည်။

ဆွန်ဖုန်း အတွက် သင်္ဘောပျက် ဆယ်ယူခြင်းက ရေနံ တူးဖော်ခြင်းနှင့် မတူပေ။ ရေနံ တူးဖော်ခြင်းမှာ အလွန် နှေးကွေးပြီး အလွန် မြန်မြန် တူးဖော်ပြန်ပါကလည်း အခြားသူများ၏ သတိထားမိမှုကို ခံရမည် စိုးရိမ်ရသဖြင့် အလွန် စိတ်ပျက်စရာ ကောင်းသည်။

သို့သော် သင်္ဘောပျက် ဆယ်ယူခြင်းက မတူပေ။ 'ကံတရား' ဟူသော အရာ ရှိသည် မဟုတ်ပါလား။ ကံကောင်းပါက သုံးရက် အတွင်း သင်္ဘောပျက်ကို ရှာတွေ့နိုင်ပြီး၊ ကံမကောင်းပါက အနှစ် သုံးဆယ် ကြာသည် အထိ ရှာမတွေ့နိုင်ပေ။

ဒုတိယနေ့တွင် ဆွန်ဖုန်းသည် ရေငုပ် စက်ပစ္စည်းများကို စတင် ဝယ်ယူလေသည်။ ရေငုပ် စက်ပစ္စည်းများ ဝယ်ယူပြီးမှ ဝန်ထမ်း ခေါ်ယူမည် ဖြစ်ပြီး ထို့နောက် အားလုံး အတူတူ ပေါ်တူဂီသို့ သွားကြမည် ဖြစ်သည်။ ထိုနေရာတွင် ဆယ်ယူရေး သင်္ဘော တစ်စင်း ဝယ်ယူကာ အတ္တလန္တိတ် သမုဒ္ဒရာ ဗီဂို ပင်လယ်အော်သို့ တိုက်ရိုက် ထွက်ခွာမည် ဖြစ်သည်။

ဘာကြောင့် ကနေဒါမှ မထွက်ခွာသနည်း ဆိုလျှင် သင်္ဘောပျက်က အတ္တလန္တိတ် သမုဒ္ဒရာ ဗီဂို ပင်လယ်အော်တွင် ရှိနေသဖြင့် ဤနေရာမှ သွားရမည် ဆိုပါက အလွန် ဝေးကွာလွန်းပြီး အချိန်နှင့် ငွေကြေးများ အလဟဿ ကုန်ဆုံးမည် ဖြစ်သောကြောင့်ပင်။

တစ်ပတ် ဆက်တိုက် ဆွန်ဖုန်းသည် နေရာအနှံ့မှ စုံစမ်းကာ အကြီးအကျယ် ဝယ်ယူရေးများ ပြုလုပ်ခဲ့ပြီး ထိုစက်ပစ္စည်းများကို လေယာဉ်ဖြင့် တိုက်ရိုက် သယ်ဆောင်သွားမည် ဖြစ်သည်။

ရေငုပ် စက်ပစ္စည်း အားလုံး နီးပါး ဝယ်ယူပြီးစီးသောအခါ ဆွန်ဖုန်းသည် ယနေ့ နယူးဖောင်လန်ရှိ စိန့်ဂျွန်စ် မြို့သို့ ရောက်ရှိလာခဲ့ပြီး အတော်လေး ကောင်းမွန်သော အလုပ်အကိုင် ရှာဖွေရေး ကုမ္ပဏီ (Headhunter Company) တစ်ခုကို ရှာတွေ့ခဲ့လေသည်။

မှန်ပါသည်။ သူသည် ပင်လယ်ရေအောက် သင်္ဘောပျက် ဆယ်ယူရေး အတွေ့အကြုံ ရှိသူများကို ရှာဖွေပေးရန် ထိုကုမ္ပဏီကို အကူအညီ တောင်းမည် ဖြစ်သည်။ ရေငုပ် ကျွမ်းကျင်သူ တချို့လည်း လိုအပ်သည်။ မိမိ ကိုယ်တိုင် အလုပ်အကိုင် ရှာဖွေရေး ဈေးကွက်သို့ သွားရောက် ရှာဖွေမည် ဆိုပါက အလွန် ခက်ခဲမည် ဖြစ်သည်။ ဤအလုပ်မျိုးက သာမန် အလုပ်မျိုး မဟုတ်သဖြင့် အလုပ်အကိုင် ရှာဖွေရေး ကုမ္ပဏီကိုသာ အားကိုးရမည် ဖြစ်သည်။

"လူကြီးမင်း မင်္ဂလာပါ... ကြိုဆိုပါတယ်"

ဆွန်ဖုန်း ဝင်သွားသည်နှင့် ငယ်ရွယ်သော မိန်းကလေး တစ်ဦးက ပြုံးရွှင်စွာ ဆီးကြို နှုတ်ဆက်ပြီး အထဲသို့ ဖိတ်ခေါ်လေသည်။

"လူကြီးမင်း ထိုင်ပါ... လက်ဖက်ရည် သောက်မလား၊ ကော်ဖီ သောက်မလား၊ ဒါမှမဟုတ် ရိုးရိုး ရေပဲ သောက်မလား"

မိန်းကလေးမှာ အလွန် ဖော်ရွေပြီး ဆွန်ဖုန်း ထိုင်လိုက်သည်နှင့် ချက်ချင်း မေးလိုက်လေသည်။

"လက်ဖက်ရည်ပဲ ပေးပါ"

"ဟုတ်ကဲ့... ခဏစောင့်ပါ"

မကြာမီ လက်ဖက်ရည် ရောက်လာလေသည်။ ထိုမိန်းကလေးက ဆွန်ဖုန်း၏ မျက်နှာချင်းဆိုင်တွင် ထိုင်ကာ ချိုသာစွာ ပြုံး၍ ပြောလိုက်လေသည်။

"ကိုယ့်ကိုယ်ကို မိတ်ဆက်ပါရစေ... ကျွန်မ နာမည်က ဝင်းဒီး ပါ... K အလုပ်အကိုင် ရှာဖွေရေး ကုမ္ပဏီက အတိုင်ပင်ခံ ပါ... လူကြီးမင်းကို ဘယ်လို ခေါ်ရမလဲ"

ဆွန်ဖုန်းက လက်ဖက်ရည် တစ်ငုံ သောက်လိုက်ပြီး

"ဆွန်" ဟု ဖြေလိုက်လေသည်။

"မစ္စတာဆွန်... ကျွန်မ ဘာများ ကူညီပေးရမလဲ"

ဝင်းဒီး က ဆွန်ဖုန်း၏ မျက်လုံးများကို ကြည့်ကာ မေးလိုက်လေသည်။ စကားပြောရာတွင် မျက်လုံးကို ကြည့်ခြင်းက လေးစားမှုကို ပြသခြင်း ဖြစ်ပြီး ဤသည်မှာ အခြေခံ အကျဆုံး လုပ်ငန်းခွင် စည်းမျဉ်း တစ်ခု ဖြစ်သည်။

"အင်း... ဒီလိုပါ... ကျွန်တော်က ပင်လယ်ရေအောက် သင်္ဘောပျက် ဆယ်ယူရေး အတွေ့အကြုံ ရှိတဲ့ ရေကြောင်း ဝန်ထမ်း တချို့ ခေါ်ချင်လို့ပါ... ဪ... ရေငုပ်သမား တချို့နဲ့ ရေကြောင်း ဆိုင်ရာ ကျွမ်းကျင်သူ တချို့လည်း လိုတယ်"

ဆွန်ဖုန်းက ခဏ စဉ်းစားပြီးနောက် ပြောလိုက်လေသည်။

"မစ္စတာဆွန် က ပင်လယ်ရေအောက် သင်္ဘောပျက် ဆယ်ယူရေး ကုမ္ပဏီ ဖွင့်ထားတာလား"

ဝင်းဒီး က မေးခွန်းနှင့် မသက်ဆိုင်ဘဲ မေးလိုက်လေသည်။

"ဟုတ်ပါတယ်"

ဆွန်ဖုန်းက ခေါင်းညိတ်လိုက်လေသည်။

"ဪ... ဒီလိုဆိုရင်တော့ ဒီလို လူမျိုးတွေကို ကျွန်မတို့ ကုမ္ပဏီက အမြန်ဆုံး ရှာပေးနိုင်ပါတယ်... လူ ဘယ်နှစ်ယောက်လောက် လိုချင်လဲ၊ အလုပ်အတွေ့အကြုံ ဘယ်လောက် ရှိရမလဲ၊ အသက် အရွယ် ကန့်သတ်ချက်ရော ရှိလား ဆိုတာ ပြောပြပေးပါ"

မကြာမီ ဝင်းဒီး က ဆွန်ဖုန်းကို အသေးစိတ် လိုအပ်ချက်များ မေးမြန်းလေသည်။

ဆယ်မိနစ်ခန့် အကြာတွင် ဝင်းဒီး က ဆွန်ဖုန်း၏ လိုအပ်ချက်များ အားလုံးကို မှတ်သားပြီးနောက် ပြုံး၍ ပြောလိုက်လေသည်။

"မစ္စတာဆွန်... ရှင့် လိုအပ်ချက်တွေက နည်းနည်းတော့ ရှာရခက်တဲ့ အမျိုးအစားထဲမှာ ပါတယ်... ဒါပေမယ့် စိတ်မပူပါနဲ့... ကျွန်မတို့ K ကုမ္ပဏီက တစ်ပတ် အတွင်း သေချာပေါက် ရှာပေးပါ့မယ်... ရှင့်ကို အပြည့်အဝ ကျေနပ်စေရပါမယ်"

"ကောင်းပြီ... ခင်ဗျားတို့ရဲ့ နာမည်ကောင်းကို ကျွန်တော် ယုံကြည်ပါတယ်"

ဆွန်ဖုန်းက ပြောလိုက်လေသည်။

"ကျေးဇူးတင်ပါတယ်... အင်း... ဒီဘက်ကို လာပြီး စရန်ငွေ အရင် ပေးလို့ ရမလား"

ဝင်းဒီး က မေးလိုက်လေသည်။

"ရပါတယ်"

စရန်ငွေ ပေးပြီးနောက် ဆွန်ဖုန်းသည် ဤကုမ္ပဏီမှ ထွက်လာခဲ့လေသည်။ ယခု သတင်း စောင့်ရန်သာ ကျန်တော့သည်။ ဝန်ထမ်း အလုံအလောက် ရသည်နှင့် ဆွန်ဖုန်း ချက်ချင်း ထွက်ခွာရန် စီစဉ်ထားလေသည်။

တစ်ပတ် အချိန်က မြန်ဆန်စွာ ကုန်ဆုံးသွားလေသည်။

K ကုမ္ပဏီ၏ အလုပ်လုပ်နှုန်းမှာ အတော်လေး မြန်ဆန်ပြီး ဆွန်ဖုန်း အတွက် လူတစ်စုကို အမြန် ရှာပေးနိုင်ခဲ့လေသည်။

ဆွန်ဖုန်း အနေဖြင့် ထိုလူများ အားလုံးကို ယူမည် မဟုတ်သည်မှာ သေချာပေသည်။ လူတွေ့ စစ်ဆေးမှုများ ပြုလုပ်ရမည် ဖြစ်ပြီး သူတို့၏ ကျွမ်းကျင်မှုများကို စမ်းသပ်ရမည် ဖြစ်သည်။

ဤတစ်ကြိမ်တွင် ပင်လယ်ရေအောက် သင်္ဘောပျက် ဆယ်ယူရေး အတွေ့အကြုံ ရှိသူ အယောက် ၆၀၊ ရေငုပ် ကျွမ်းကျင်သူ အယောက် ၃၀ နှင့် ရေကြောင်း ဆိုင်ရာ ကျွမ်းကျင်သူ ၄ - ၅ ယောက်ခန့် ပါဝင်သည်။

ထိုနေ့ မွန်းတည့်ချိန်တွင် ဆွန်ဖုန်းသည် K ကုမ္ပဏီသို့ ထပ်မံ ရောက်ရှိလာခဲ့လေသည်။

"မစ္စတာဆွန်... ဒီလူတွေက ရှင့်ရဲ့ လိုအပ်ချက်တွေ အတိုင်း ရှာပေးထားတာပါ... ရှင် ကိုယ်တိုင် လူတွေ့ စစ်ဆေးပြီး ရွေးချယ်နိုင်ပါတယ်"

ဝင်းဒီး က တန်းစီနေသော လူသန်ကြီးများကို လက်ညှိုးထိုးပြကာ ပြောလိုက်လေသည်။

"ကောင်းပြီ"

ဆွန်ဖုန်းက ထိုလူများ၏ ရှေ့သို့ သွားကာ ကျယ်လောင်စွာ ပြောလိုက်လေသည်။

"ကျွန်တော်က ပင်လယ်ရေအောက် သင်္ဘောပျက် ဆယ်ယူရေး ကုမ္ပဏီ တစ်ခု တည်ထောင်ထားတယ်... လောလောဆယ် လူအင်အား အရေးတကြီး လိုအပ်နေတယ်... ခင်ဗျားတို့ရဲ့ ကျွမ်းကျင်မှုတွေ တကယ် ကောင်းတယ် ဆိုရင် အားလုံးကို အလုပ်ခန့်မယ်... တကယ်လို့ ကျွမ်းကျင်မှု မရှိဘူး ဆိုရင်တော့ အားနာပါတယ်"

ဆွန်ဖုန်း ပြောပြီးသည်နှင့် လူတွေ့ စစ်ဆေးမှုများ စတင်လေသည်။

လူတွေ့ စစ်ဆေးမှု ဆိုသည်မှာ သူတို့၏ အလုပ်အတွေ့အကြုံများနှင့် ဆယ်ယူရေး အတွေ့အကြုံများကို မေးမြန်းခြင်းသာ ဖြစ်သည်။ ရေငုပ်သမားများ အတွက်မူ ပို၍ပင် လွယ်ကူသည်။ လူတွေ့ စစ်ဆေးနေရန် မလိုဘဲ သူတို့၏ လက်မှတ်များကိုသာ ပြခိုင်းလိုက်ရုံ ဖြစ်သည်။ လက်မှတ် ရှိသူ အားလုံးကို အလုပ်ခန့်လိုက်လေသည်။

နောက်ဆုံးတွင် ဆွန်ဖုန်းသည် ဆယ်ယူရေး အတွေ့အကြုံ ရှိသူ အယောက် ၅၀ နှင့် ရေငုပ်သမား ၃၀ လုံးကို အလုပ်ခန့်လိုက်လေသည်။ ရေကြောင်း ဆိုင်ရာ ကျွမ်းကျင်သူ ၄ - ၅ ယောက်ကိုလည်း အားလုံး ခန့်လိုက်လေသည်။ ထို့နောက် ဆွန်ဖုန်းက သူတို့နှင့် လစာ ကိစ္စ ဆွေးနွေးကာ စာချုပ် ချုပ်ဆိုလိုက်လေသည်။

စာချုပ် ချုပ်ပြီးနောက် ဆွန်ဖုန်းက သူတို့၏ ဆက်သွယ်ရန် လိပ်စာများကို ယူထားခဲ့ပြီး သူ၏ အကြောင်းကြားစာကို စောင့်ရန် ပြောလိုက်လေသည်။