ဟန်ဆောင်နေတဲ့ ကောင်မလေးတွေက လူကောင်းတွေနဲ့ မတူဘူးပဲ…

မျက်စိတစ်မှိတ်အတွင်းမှာပင် ရှီဝမ်၏ စိတ်ထဲတွင် အတွေးများစွာ ခုတ်မောင်း လည်ပတ်သွားတော့၏။

‘သူ ငါ့ကို စမ်းသပ်နေတာလား...’

‘အကယ်၍ ဒီအခြေအနေကို ရှောင်လွှဲလို့ မရနိုင်ရင်တော့ ငါတို့ သေချာပေါက် ဒုက္ခရောက်ပြီပဲ...’

သူမသည် နည်းလမ်းပေါင်းစုံကို အသုံးပြုခဲ့ပြီး ဖြစ်သည်။ သနားစရာကောင်းအောင် ဟန်ဆောင်ခြင်း၊ သစ္စာရှိကြောင်း ပြသခြင်း၊ အားနည်းဟန်ဆောင်ခြင်း၊ ဆွဲဆောင်ဖြားယောင်းခြင်း စသည်ဖြင့် အစုံအလင် သုံးခဲ့သော်လည်း... နောက်ဆုံးတွင် လီယွမ်က သူမကို အနည်းငယ်မျှပင် မထိတွေ့ခဲ့ချေ။

‘ကြည့်ရတာ... စိတ်ဝိညာဉ် နည်းစနစ်တွေ သုံးပြီး ကံစမ်းကြည့်ဖို့ကလွဲလို့ တခြား ရွေးချယ်စရာ မရှိတော့ဘူးထင်တယ်...’

အချိန်သဲ လင်းရွှီ၏ ဝိညာဉ်သခင် တစ်ဦးအနေဖြင့် သူမတွင် ထူးခြားသော စွမ်းရည်များ ရှိသည်။ သူမ၏ သွေးမျိုးဆက် စွမ်းအားများကို အသက်သွင်းလိုက်သည်နှင့် တစ်ပြိုင်နက်... လူအများအပေါ် မသိမသာ ဩဇာလွှမ်းမိုးနိုင်စွမ်း ရှိလေ၏။ ၎င်းသည် လူအများ၏ အာရုံခံစားမှုများကို ရှုပ်ထွေးသွားစေနိုင်ပြီး အချိန်နှင့် ပတ်သက်သည့် သူတို့၏ နားလည်မှုကို ဝေဝါးသွားစေနိုင်သည်။

ထို့အပြင် ဂါထာမန္တန် အောက်တွင် ရှိနေသူများအတွက် သူမ၏ ဆွဲဆောင်မှုမှာ အဆမတန် မြင့်တက်လာမည် ဖြစ်ပြီး... သူတို့၏ မသိစိတ်ကိုပါ လွှမ်းမိုး ထိန်းချုပ်နိုင်စွမ်း ရှိလာမည် ဖြစ်၏။ ထိုသို့ သိမ်မွေ့လှသော စိတ်ဝိညာဉ် နည်းစနစ်များမှာ ထူးခြားသော တုန်ခါမှုများ လုံးဝ မရှိသလောက်ပင် ဖြစ်ရာ... အာရုံခံ သိရှိရန် အလွန် ခက်ခဲလှသည်။

တစ်စုံတစ်ယောက်သာ ၎င်း၏ ကျော့ကွင်းအတွင်းသို့ ကျရောက်သွားပါက ပို၍ပို၍ နစ်မြုပ်သွားမည် ဖြစ်ပြီး... လုံးဝ ရုန်းထွက်နိုင်တော့မည် မဟုတ်ချေ။ အစပိုင်းတွင်မူ လီယွမ်မှာ အလွန်တရာ နက်နဲလွန်းလှသဖြင့် ရှီဝမ် တစ်ယောက် ဤနည်းစနစ်ကို အသုံးပြုရန် တွန့်ဆုတ်နေခဲ့ခြင်း ဖြစ်၏။

ကူသခင် တစ်ဦး၏ စိတ်ဝိညာဉ် နယ်ပယ်မှာ ယေဘုယျအားဖြင့် သိုင်းပညာရှင်များနှင့် ဝိညာဉ်သခင်များထက် သာလွန်သည် မဟုတ်ပါလော။ ထို့ကြောင့် သူမမှာ မည်သို့ ဖြစ်လာမည်ကို လုံးဝ မသိရှိခဲ့ချေ။ သို့သော် ယခုအခိုက်အတန့်တွင်မူ သူမ၌ အခြား ရွေးချယ်စရာ မရှိတော့ပေ။

အကယ်၍ ဆက်လက် စုံစမ်းစစ်ဆေး ခံရမည် ဆိုပါက သူတို့ သေချာပေါက် ဖော်ထုတ်ခံရမည် ဖြစ်ပြီး... ရက်စက် ကြမ်းတမ်းသော စစ်ဆေး မေးမြန်းမှုများနှင့်ပင် ရင်ဆိုင်ရနိုင်ခြေ ရှိ၏။ ထို့ကြောင့်ပင် သူမသည် မိမိ၏ သစ္စာရှိမှုကို ပြသရန် အလွန်တရာ အလျင်စလို ဖြစ်နေခဲ့ရခြင်း ပါ။

စိတ်ခံစားမှုဆိုင်ရာ လှည့်စားမှုများကို အားကိုးခြင်းဖြင့်သာ လီယွမ်၏ ချက်ချင်းလက်ငင်း အတင်းအကျပ် စစ်ဆေးမှုများကို သူမ တားဆီးနိုင်မည် ဖြစ်၏။

ထိုအချက်ကို တွေးမိလိုက်သောအခါ ရှီဝမ်သည် ဆက်လက်၍ မတွန့်ဆုတ်နေတော့ချေ။ သူမသည် ချက်ချင်းပင် သူမ၏ စိတ်ဝိညာဉ် မှော်ပညာများကို ထုတ်ဖော်လိုက်ပြီး... 'အချိန်သဲ လင်းရွှီ' က သူမ၏ သွေးမျိုးဆက်အတွင်းသို့ ပေးသနားထားသော ဝိညာဉ်စွမ်းအားများကို အသက်သွင်းလိုက်လေတော့သည်။

ဤနည်းစနစ်တွင် ကြီးမားသော အားနည်းချက် တစ်ခု ရှိသည်။ ၎င်းမှာ စတင် အသုံးပြုချိန်မှစ၍ အာနိသင် ပြသသည့် အချိန်အထိ အချိန်များစွာ လိုအပ်ပြီး... ထိုအချိန်ကာလ အတွင်း၌ သူမသည် လီယွမ်နှင့် အလွန်အမင်း ဝေးကွာနေ၍ မရနိုင်ခြင်းပင်။

‘သူ့အနားမှာ နေနိုင်မယ့် နည်းလမ်းတစ်ခုတော့ ရှာရမယ်...’

လီယွမ်အပေါ် ဩဇာလွှမ်းမိုးနိုင်ရန် အတွက်ဆိုလျှင် အနည်းဆုံး ဆယ်ရက်ခန့်တော့ မပြတ်တမ်း သူ့အနားတွင် ရှိနေရမည် ဖြစ်ကြောင်း ရှီဝမ် တွက်ဆလိုက်လေ၏။

ဒါက လွယ်ကူသော ကိစ္စရပ်တစ်ခု မဟုတ်ချေ။ ဝမ်ကျောက်ကျောက် ပြောပြချက်များ အရ လီယွမ်သည် စားသောက်ချိန်မှလွဲ၍ ကျန်အချိန်များ အားလုံးတွင် ကျင့်ကြံနေလေ့ရှိသည် ဟူ၍ ပင်။ မည်သူမျှ ရှာမတွေ့နိုင်သော လူသူကင်းမဲ့သည့် နေရာများသို့ သွားရောက်ကာ အပတ်တကုတ် ကျင့်ကြံနေလေ့ ရှိကြောင်း သူမ သိထားပြီး ဖြစ်သည်။

“သခင်လေး လီ... ကျွန်မကို စဉ်းစားဖို့ အချိန်နည်းနည်းလောက် ပေးနိုင်မလား ရှင့်...”

ရှီဝမ် က ထပ်မံ၍ စကားဆိုလိုက်၏။ ဤအခိုက်အတန့်တွင် သူမသည် လျှို့ဝှက်နည်းစနစ်ကို သူမကိုယ်တိုင်ပင် မသိလိုက်ဘဲ အသက်သွင်းပြီး ဖြစ်၏။ လီယွမ် တစ်ယောက် ကူးစက်ခံရပြီးနောက် သူ၏ မသိစိတ်က သူမကို ဘယ်တော့မှ မေ့ဖျောက်၍ မရနိုင်သော လမ်းကြောင်းဘက်သို့ အလိုအလျောက် ရောက်ရှိသွားလိမ့်မည်။

ဥပမာအားဖြင့် လီယွမ်၏ ရင်ထဲတွင် လူငယ်ဘဝက ချစ်ခဲ့ရသော်လည်း မရရှိခဲ့သည့် ဖြူစင်လှသော အချစ်ဦး တစ်ယောက် ရှိနေခဲ့မည် ဆိုပါက... လျှို့ဝှက်နည်းစနစ်၏ လွှမ်းမိုးမှုအောက်တွင် လီယွမ်သည် သူမကို ထိုအချစ်ဦးအဖြစ် ထင်ယောင်ထင်မှား ဖြစ်သွားမည် ဖြစ်၏။ အချိန်သဲ လျှို့ဝှက်နည်းစနစ်၏ အကြောက်မက်ဖွယ် အကောင်းဆုံးသော အချက်မှာ... မှုန်ဝါးနေသော အတိတ် မှတ်ဉာဏ်များကို သိမ်မွေ့စွာ ပြောင်းလဲပစ်နိုင်စွမ်း ရှိခြင်းပင် ဖြစ်တော့သည်။

“ရတာပေါ့...” လီယွမ်က ပြုံးရွှင်စွာဖြင့် ပြန်လည် ပြောဆိုလိုက်၏။

“ဒါက ကိစ္စကြီး တစ်ခုပဲလေ... သေချာ စဉ်းစားသင့်တာပေါ့...”

“အင်း...” ရှီဝမ်က မျက်လွှာချလိုက်ပြီး ရှက်သွေးဖြာနေသော မျက်နှာဖြင့် “သခင်လေး လီ... ကျွန်မ ပေးထားတဲ့ အချိန်သဲမှုန် ကို သုံးပြီးပြီလား ရှင့်...” ဟု မေးမြန်းလိုက်၏။

“မသုံးရသေးဘူး...” လီယွမ်က ခေါင်းခါယမ်းလိုက်သည်။

“အဲဒီအရာက အရမ်း ထူးဆန်းလွန်းလို့... ဘယ်လို သုံးရမလဲ ဆိုတာကိုတောင် ငါ သေချာ မသိသေးဘူးလေ...”

“ကူလမ်းစဉ် မှာ ပြောစမှတ်ပြုကြတဲ့ စကားတစ်ခွန်းကို ကျွန်မ မှတ်မိနေတယ်... ‘ကူ ဆိုတာ ကောင်းကင်နဲ့ မြေကြီးရဲ့ အနှစ်သာရပါ... အစွမ်းထက်တဲ့ ကူသခင် တစ်ယောက်ဟာ အင်းဆက်တွေ၊ သားရဲတွေနဲ့ ပစ္စည်းတွေကို သန့်စင်နိုင်ရုံသာမကဘဲ လူ၊ ကောင်းကင်နဲ့ နိယာမတွေကိုပါ သန့်စင်နိုင်စွမ်း ရှိတယ်’ တဲ့လေ...”

“အချိန်သဲမှုန် ဟာလည်း ကူလမ်းစဉ် ထဲကို ပေါင်းစပ်ဝင်ရောက်နိုင်စွမ်း ရှိရမှာပါ...”

“သခင်လေး က အချိန်သဲမှုန် အကြောင်းကို နားမလည်လို့ တွေဝေနေတာ ဆိုရင်... ကျွန်မ ကူညီပေးနိုင်ပါတယ်... သခင်လေး ရဲ့ စွမ်းအားတွေ တိုးတက်လာဖို့ ကူညီပေးနိုင်သရွေ့... ကျွန်မက မင်းသမီးလေး ကို ကူညီပေးနေတာနဲ့ အတူတူပါပဲ...”

ရှီဝမ် က နူးညံ့သိမ်မွေ့စွာ ပြုံးပြလိုက်လေ၏။

လီယွမ် တစ်ယောက် အံ့အားသင့်သွားသည်။

“သခင်မလေး ရှီ က ကူလမ်းစဉ် အကြောင်းကို သုတေသန လုပ်ထားမယ်လို့ မထင်ထားခဲ့ဘူး...”

ထိုအချိန်လေး အတွင်းမှာပင် မမြင်ရသော တစ်စုံတစ်ရာက သူ၏ နှလုံးသား ကြိုးလေးများကို အလွန်တရာ သိမ်မွေ့စွာ... မသိမသာ လာရောက် တီးခတ်နေသကဲ့သို့ သူ ခံစားလိုက်ရ၏။ အကယ်၍ သူ၏ စိတ်ဝိညာဉ်စွမ်းအင်သာ ချောက်နက် နယ်ပယ် သို့ ရောက်ရှိမနေပါက ဤအရာကို သေချာပေါက် သတိပြုနိုင်စွမ်း မရှိပါချေ။

သူ၏ နှလုံးသား ကြိုးများကို တိတ်တဆိတ် လာရောက် တီးခတ်နေသူမှာ ရှီဝမ် ဖြစ်ကြောင်း ရှင်းလင်းနေသည်။

သူမ ဘာလုပ်ချင်နေတာလဲ။

လီယွမ် က အတွေးထဲတွင် ကြိတ်၍ စဉ်းစားနေမိ၏။

သူသည် ရှီဝမ်ကို အစကတည်းက သေချာ ဖောက်ထွင်း သိမြင်ထားပြီးသားပင်။

သူမ၏ ခွန်အားမှာ ကြီးမားလှသည် မဟုတ်ဘဲ လင်းရွှီ၏ သွေးမျိုးဆက်ကို အားကိုးကာ အဋ္ဌမအဆင့်သို့ ခက်ခက်ခဲခဲ ဝင်ရောက်ထားသူမျှသာ ဖြစ်၏။

ကန္တာရနှင့် ဝေးကွာသော တာ့ယန် ဒေသသို့ ရောက်ရှိလာချိန်တွင်မူ သူမ၏ စွမ်းအားများမှာ များစွာ လျော့ကျသွားမည်မှာ သေချာသည်။ သူ့ကို လုပ်ကြံရန် ကြိုးစားလောက်သည်အထိ သူမတို့ မမိုက်မဲနိုင်ချေ။

“မင်းသမီးလေး က အရင်တုန်းက ကူသခင် အနွယ်ဝင် တစ်ယောက် ဖြစ်ခဲ့ဖူးတော့... ကျွန်မ စပ်စုချင်စိတ်နဲ့ လေ့လာကြည့်မိတာပါ... အခု ကူနန်းတော် ကို ရောက်လာတဲ့ အခွင့်အရေး ရတုန်းလေး ညီမလေး ရှောင်ကျောက် ဆီကနေ ကူလမ်းစဉ် စာအုပ်တချို့ တောင်းပြီး အားတဲ့အချိန်တွေမှာ ဖတ်ဖြစ်နေလို့ပါ...”

ရှီဝမ် က အသာအယာ ပြုံးပြလိုက်၏။

“ဒီလိုကိုး...”

လီယွမ်က ထိုသိမ်မွေ့သော ဖြားယောင်းမှုအပေါ် သူ၏ ခုခံမှုများကို တိတ်တဆိတ် ရုပ်သိမ်းလိုက်တော့၏။

အကယ်၍ သူ၏ စိတ်ဝိညာဉ်စွမ်းအင်သာ ဖောက်ထွက်မနေခဲ့လျှင်ပင် ရှီဝမ်၏ နည်းလမ်းများက သူ့အပေါ် အမှန်တကယ် သက်ရောက်မှု ရှိနိုင်မည် မဟုတ်ချေ။

‘ဒါပေမဲ့ ပြဿနာ မရှိပါဘူး... မိုက်မဲတဲ့ ဓားနတ်သမီးလေး က အရေးယူပေးမှာပါလေ…’

ခုခံမှုများကို ရုပ်သိမ်းလိုက်ပြီးနောက် ဤဖြားယောင်းမှု၏ အာနိသင်ကို လီယွမ် အကြမ်းဖျင်း နားလည်သွားတော့၏။ ရှီဝမ်ကို သူ ပြန်လည် ကြည့်ရှုလိုက်သည့် အခါတွင်... မျက်လုံးတွင် ‘အရောင်စစ်’ တစ်ခု တပ်ဆင်ထားသကဲ့သို့ ဖြစ်နေသည်။

သူ၏ အတွေးများမှာ လှပသော အနာဂတ် တစ်ခုဆီသို့ ထိန်းချုပ်၍ မရနိုင်လောက်အောင် လွင့်မျောသွားတော့၏။

“စိတ်ဝင်စားစရာပဲ...”

လီယွမ် အနေဖြင့် ကန္တာရ ဝိညာဉ်သခင် တစ်ဦး၏ နည်းလမ်းများကို ပထမဆုံးအကြိမ် တွေ့ကြုံခံစားရခြင်းပင်။

၎င်းတို့သည် သိုင်းပညာရှင်များနှင့် ကူသခင်များ၏ နည်းလမ်းများနှင့် ကွဲပြားသော်လည်း... လမ်းကြောင်း သုံးခုစလုံးက နောက်ဆုံးတွင် ပန်းတိုင်တစ်ခုတည်းဆီသို့သာ ဦးတည်နေကြသည် မဟုတ်ပါလော။

ထိုပန်းတိုင်မှာ ကောင်းကင်နှင့် မြေကြီး၏ စည်းမျဉ်းများကို အခြေခံသည့် ယုံကြည်မှုများပင် ဖြစ်၏။

ဤအချက်နှင့် ရှီဝမ် အနေဖြင့် ချီနျန်ချူ ထံသို့ စာရေးရန် တွန့်ဆုတ်နေခြင်း စသည့် အခြားသော စမ်းသပ်မှုများ အရဆိုပါက... ဤမိန်းမမှာ လူကောင်း မဟုတ်ကြောင်း သူ အကြွင်းမဲ့ သေချာသွားခဲ့လေပြီ။

သည်အချက်က လီယွမ်ကို လွန်စွာ ဝမ်းသာသွားစေတော့၏။

ဤသို့ဆိုလျှင် စီနီယာအစ်မ ၏ ခံစားချက်များကို သူ ထည့်တွက်နေရန် မလိုအပ်တော့ဘဲ... ထူးဆန်းသော ပိုးကောင် အမျိုးမျိုးကို အသုံးပြုကာ အစွမ်းကုန် တုံ့ပြန်နိုင်ပြီ ဖြစ်သည်။

“အမှန်တိုင်း ပြောရရင် သခင်မလေး ရှီ ပေးထားတဲ့ အချိန်သဲမှုန် က... ကျွန်တော် တကယ် လိုအပ်နေတဲ့ အရာပဲ... ကျွန်တော့်အတွက် အများကြီး အသုံးဝင်ပြီး အဲဒါကိုသာ အောင်အောင်မြင်မြင် သန့်စင်နိုင်မယ် ဆိုရင်... ကျွန်တော့်ရဲ့ စွမ်းအားတွေ သေချာပေါက် မြင့်တက်လာမှာပါ...”

ဤစကားများမှာ လီယွမ်၏ နှလုံးသား အနက်ရှိုင်းဆုံး နေရာမှ ထွက်ပေါ်လာသော ရိုးသားသည့် စကားများပင် ဖြစ်၏။ အစကတော့ သူ ယဉ်ကျေးစွာ ငြင်းဆန်ရန် ရည်ရွယ်ထားသော်လည်း ယခုအခါ ရှီဝမ်က အရင် စတင် လှုပ်ရှားလာပြီ ဖြစ်ရာ... သူ အနေဖြင့် ယဉ်ကျေးဟန်ဆောင်နေရန် မလိုအပ်တော့ချေ။

ထိုပစ္စည်းကို သူ တကယ် လိုချင်နေကြောင်းကို သူ ဝန်ခံလိုက်ခြင်းပင်။

ထိုစကားအား ကြားသောအခါ တောက်ပသော မျက်ဝန်းများနှင့် ဖြူဖွေးသော သွားတန်းလေးများ ပိုင်ဆိုင်ထားသည့် ရှီဝမ် က တောက်ပစွာ ပြုံးလိုက်လေသည်။

“ဒါဆိုရင် အရမ်း ကောင်းတာပေါ့... သခင်လေး ကို ကူညီပေးနိုင်သရွေ့... ဘယ်လို အခက်အခဲမျိုးကိုမဆို ကျွန်မတို့ ကျော်လွှားနိုင်မှာပါ...”

ထို့နောက် သူမ တိတ်တဆိတ် သက်ပြင်းတစ်ချက် ချလိုက်မိ၏။

ချီနျန်ချူ၏ သတင်း အချက်အလက်များမှာ အမှန်တကယ်ပင် တိကျလှသည်။

လီယွမ်သည် တကယ့်ကို ကူသန့်စင်ခြင်း၌ အရူးအမူး ဖြစ်နေသူ တစ်ဦး ဖြစ်ပြီး... ကူသန့်စင်ခြင်း အကြောင်းကို ပြောလိုက်သည်နှင့် သူသည် အခြားလူ တစ်ယောက်အဖြစ် ပြောင်းလဲသွားလိုပင် ။

ရှီဝမ်၏ ရင်ထဲတွင် ထူးဆန်းသော ပြိုင်ဆိုင်လိုစိတ် တစ်ခု ထပ်မံ ပေါ်ပေါက်လာပြန်၏။

‘ငါဟာ နှစ်ပေါင်း (၅၀၀) အတွင်း မဟာ ကန္တာရရဲ့ အလှဆုံး မိန်းမပျို တစ်ဦး ဖြစ်ပါရက်နဲ့... နံစော်နေသော ပိုးကောင် အနည်းငယ်လောက်ကိုတောင် မယှဉ်နိုင်ဘူးပေါ့လေ…’

‘အလကားပေးတာကိုတောင်မှ လက်မခံတဲ့ အဖြစ်က... ပိုပြီးတော့ ရင်နာစရာ ကောင်းတယ် မဟုတ်လား…’

ကံကောင်းထောက်မစွာဖြင့် နောက်ဆုံးတော့ အခွင့်အရေး တစ်ခုကို သူမ ရှာတွေ့သွားခဲ့လေပြီ။ လီယွမ်နှင့် အတူ ဆယ်ရက်ခန့် အချိန်ဖြုန်းနိုင်သည်နှင့် တစ်ပြိုင်နက်... မှော်ပညာ၏ အာနိသင်က သက်ရောက်လာမည် ဖြစ်ပြီး သူ သူမအပေါ် သေချာပေါက် ကျရှုံးသွားလိမ့်မည်။

‘တာဝန် ပြီးဆုံးသွားပြီပေါ့... ကန္တာရကြီး အတွက်…’

ရှီဝမ် က တိတ်တဆိတ် ဆုတောင်းလိုက်သည်။

“ကံကောင်းတာက လီယွမ် က ရုပ်ရည်လည်း ချောမောပြီး ယောက်ျားကောင်း တစ်ယောက်လို့ ပြောလို့ရတဲ့သူ ဖြစ်နေတာပဲ... ဒါကြောင့် သူနဲ့ ပတ်သက်ရမှာကို သိပ်ပြီး လက်ခံရခက်နေစရာ မရှိပါဘူးလေ...”

ထိုသို့ သူမ တွေးတောလိုက်မိ၏။

ရုပ်ဆိုးလွန်းသူ တစ်ဦး၏ ဖျက်ဆီးခံရမည် ဆိုပါက... သူမ အနေဖြင့် သေရသည်ကမှ ပိုကောင်းဦးမည် မဟုတ်ပါလော။

ထို့နောက် သူတို့ နှစ်ဦး စတင် စကားလက်ဆုံ ကျကြတော့၏။

အချိန်သဲမှုန် ၏ တည်ဆောက်ပုံ၊ မူလအစ နှင့် သမိုင်းကြောင်းတို့မှ အစပြု၍... ကန္တာရအတွင်း ၎င်းကို အသုံးပြုပုံ၊ ကူနည်းစနစ်များ နှင့် မည်သို့ ပေါင်းစပ်နိုင်ပုံ၊ သန့်စင်သည့် နည်းလမ်းများ စသည်တို့ကို ဆွေးနွေးကြလေသည်။

သူတို့ နှစ်ဦး၏ စကားဝိုင်းမှာ တဖြည်းဖြည်း သက်ဝင်လှုပ်ရှားလာပြီး သူတို့၏ အကြောင်းအရာထဲတွင် ပို၍ပို၍ နစ်မြုပ်သွားကြတော့၏။ လီယွမ် သည် မမောမပန်းနိုင်ဘဲ ဆက်လက် ပြောဆိုနေကာ ထိုအကြောင်းအရာကို ပိုမို နက်ရှိုင်းစွာ ထိုးထွင်း သိမြင်အောင် ကြိုးစားနေသဖြင့်... တစ်ဖက်လူမှာ သူမအပေါ် စတင် ကျရှုံးနေပြီ ဖြစ်ကြောင်း ရှီဝမ် ပို၍ သေချာသွားတော့သည်။

ယင်းကို မြင်သောအခါ ရှီဝမ် သည် သူမ၏ နောက်ဆုံး လျှို့ဝှက်လက်နက်ကို ထုတ်ဖော်လိုက်လေတော့၏။

“သခင်လေး... သခင်လေး သိပြီးသား ဖြစ်မှာပါ... လင်းရွှီ ရဲ့ သွေးမျိုးဆက် ဟာ ကန္တာရ ဝိညာဉ်သခင် တစ်ယောက်ရဲ့ အခြေခံ အုတ်မြစ်ပါပဲ... အချိန်သဲမှုန် ကို ကူ ထဲကို ပေါင်းစပ်ဖို့ အတွက်ဆိုရင်... အဲဒါကို ကြားခံအဖြစ် အသုံးပြုဖို့ လိုအပ်ပါလိမ့်မယ်...”

ထိုသို့ ပြောပြီးနောက် သူမသည် သူမ၏ ပိုးသားဂါဝန်လေးကို ဆွဲဖြဲလိုက်ရာ... နှင်းကဲ့သို့ ဖြူဖွေးနေသော အသားအရေ အများအပြား ပေါ်လွင်လာတော့၏။ သူမက မျက်လုံးများကို ရှက်ရွံ့စွာ မှိတ်လိုက်ပြီး အလွန် နူးညံ့ချိုသာသော အသံလေးဖြင့် စကားဆိုလိုက်၏။

“သခင်လေး အတွက်ဆိုရင်... ကျွန်မရဲ့ နှလုံးသွေးကို ပေးဆပ်ဖို့ အသင့်ပါပဲ... သခင်လေး... ယူလို့ ရပါတယ်... ကျေးဇူးပြုပြီး... ညင်ညင်သာသာလေးတော့ လုပ်ပေးပါနော်…”