အခန်း ၅၁၅

အခန်း (၅၁၅) - ဒုတိယမြောက် ဆုလာဘ်နှင့် တစ်ကမ္ဘာလုံး မနာလိုဖြစ်ခြင်း

၎င်းတို့အုပ်စုတစ်ခုလုံးသည် အရှေ့တောင်ဘက် အရပ်မျက်နှာဆီသို့ တူတူလှမ်း၍ ကြည့်ရှုလိုက်မိကြပြီး ကောင်းကင်ယံထက်သို့ ထိုးတက်သွားသော ထိုအလင်းတန်းကြီးကို အသေအချာ စိုက်ကြည့်နေမိကြပေသည်။

ဤကောင်းကင်ထိုး အလင်းတန်းကြီးသည် ဝမ်ကွေ့ရှင်းတို့ဖက်က ဆီးနှင်းတောင် တယ်လီပို့စနစ်ကြီး အသက်ဝင်လာခြင်းကြောင့် ပေါ်ထွက်လာရခြင်းဖြစ်သည်မှာ မြေကြီးလက်ခတ်မလွဲ သေချာလှပေသည်။

လက်ရှိအချိန်၌ ကမ္ဘာလုံးဆိုင်ရာ အမှတ်စာရင်းဘုတ်ပေါ်တွင်မူ နယ်မြေ ၁၈၈ ကလွဲ၍ အခြားသော မည်သည့်နယ်မြေတစ်ခုမှ ဆီးနှင်းတောင်တက်ခြင်း အမှတ်စာရင်းပေါ်၌ လူသုံးဦးအထိ တပြိုင်နက်တည်း နေရာယူထားနိုင်ခြင်းမျိုး လုံးဝ မရှိကြသေးပါချေ။

ထို့ကြောင့် ၎င်းတို့အနေဖြင့် ဤဆီးနှင်းတောင် တယ်လီပို့စနစ်ကြီးအား ကိုယ်တိုင် အသက်သွင်းနိုင်စွမ်းမရှိကြသည်မှာ သဘာဝကျလှပေသည်။

ထိုဖက်က အလင်းတန်းကြီးမှာမူ ကောင်းကင်ယံထက်သို့ ထိုးတက်သွားခဲ့ခြင်းမျှသာ ရှိသေးပြီး တယ်လီပို့စနစ်ကြီးတစ်ခုလုံးကို အပြည့်အဝ အသက်သွင်းပြီးစီးခြင်းမျိုး မဟုတ်သေးပါသော်လည်း ၎င်းတို့ဖက်၌မူ ကျောက်ဆစ်ရုပ်တုကြီးများ၏ ပိတ်ဆို့နှောင့်ယှက်မှုမျိုး ရှိမနေခဲ့ကြပါပေ။

ထို့ကြောင့် ၎င်းတယ်လီပို့စနစ်ကြီးအား အောင်မြင်စွာ အသက်သွင်းရမည့် ကိစ္စရပ်မှာ ဤဖက်နယ်မြေနှင့် နှိုင်းယှဉ်ကြည့်မည်ဆိုပါက များစွာ ပို၍ ရိုးရှင်းလွယ်ကူလှပေသည်။

မျှော်လင့်ထားသည့်အတိုင်းပင် တစ်မိနစ် လုံးဝ မပြည့်သေးသော အချိန်တိုလေးအတွင်းမှာတင် ထိုဆန်းကြယ်လှသော စနစ်၏ အသံကြီးသည် လူတိုင်း၏ နားစည်အတွင်းဆီသို့ နောက်ထပ်တစ်ကြိမ် ထပ်၍ ပြင်းထန်စွာ မြည်ဟီးထွက်ပေါ်လာခဲ့ပြန်ချေပြီ။

[တောအုပ်နယ်မြေ ၁၈၈ အား ဆီးနှင်းတောင် တယ်လီပို့စနစ်ကြီးကို ဒုတိယမြောက်အကြိမ်အဖြစ် အောင်မြင်စွာ အသက်သွင်းနိုင်ခဲ့သည့်အတွက် ဂုဏ်ယူပါသည်]

[တယ်လီပို့စနစ် အသက်သွင်းသူ: နယ်မြေ ၁၈၈ မှ ဝမ်ကွေ့ရှင်း ဖြစ်ပါသည်။]

[ဆီးနှင်းတောင် တယ်လီပို့စနစ်ကြီးအား ဒုတိယမြောက်အကြိမ်အဖြစ် အောင်မြင်စွာ အသက်သွင်းနိုင်ခဲ့သည့်အတွက် ရရှိမည့် ဆုလာဘ်အနေဖြင့်မူ ဆောင်းရာသီ မကုန်ဆုံးခင်အချိန်အတွင်း၌ နယ်မြေ ၁၈၈ က ရှင်ကျန်သူများသည် ဘေးကင်းလုံခြုံရေးနယ်ပယ် ၏ အပြင်ဘက်သို့ စိတ်ကြိုက် ခြေဆန့်လှုပ်ရှားနိုင်ကြမည်ဖြစ်ပြီး ပတ်ဝန်းကျင် အပူချိန်မှာလည်း ၅ ဒီရီစင်တီဂရိတ်အထိ ထပ်မံမြင့်တက်လာမည့်အပြင် အပြင်ဘက်၌ ဆီးနှင်းများ ထပ်မံကျရောက်ခြင်းမျိုး လုံးဝ ရှိတော့မည် မဟုတ်ပါ]

[ဆုလာဘ်အချို့မှာမူ ပထမအကြိမ်နှင့် ထပ်တူကျနေခြင်းကြောင့်ဖြစ်သောကြောင့် ၎င်းအတွက် အစားထိုး အာမခံချက် ဆုလာဘ်အနေဖြင့်မူ ပတ်ဝန်းကျင် အပူချိန်ကို ၁၀ ဒီဂရီစင်တီဂရိတ်အထိ ထပ်မံ၍ အဆင့်မြှင့်တင် ပေးလိုက်ပါသည်]

[ဆီးနှင်းတောင် တယ်လီပို့စနစ်ကြီး အခုသုံးဆယ် အသက်ဝင်ရမည့် နောက်ဆုံးပန်းတိုင်ကြီးဆီသို့ ရောက်ရှိရန်အတွက် ယခုအခါ တယ်လီပို့စနစ် နှစ်ဆယ့်ရှစ်ခု တိတိ ထပ်မံလိုအပ်နေသေးသည် ဖြစ်သည်]

[နောက်ထပ်တစ်ကြိမ် ထပ်၍ အသေအချာ သတိပေးလိုက်သည်၊ ဆောင်းရာသီကို အချိန်အကြာကြီး လုံးဝ ဆွဲဆန့်မထားကြပါနှင့် သို့မဟုတ်ပါက အလွန် ကြောက်မက်ဖွယ်ကောင်းလှတဲ့ ကိစ္စကြီးတစ်ခု သေချာပေါက် ပေါ်ထွက်လာနိုင်ပါသည်]

ဆန်းကြယ်လှသော ထိုအသံကြီးသည် ဤကမ္ဘာပေါ်၌ ရှိနေကြသော ရှင်ကျန်သူအားလုံး၏ နားစည်အတွင်းဆီသို့ အဆက်မပြတ် ပဲ့တင်ထပ်သွားခဲ့ပေသည်။

ဘုရားရေ...

တယ်လီပို့စနစ်ကြီးကို ဒုတိယအကြိမ်အဖြစ် အောင်မြင်စွာ အသက်သွင်းလိုက်နိုင်ရုံမျှဖြင့်တင် ဤဆန်းကြယ်လှသောအသံကြီးသည် တစ်ကမ္ဘာလုံး အတိုင်းအတာအရ နောက်ထပ်တစ်ကြိမ် ထပ်၍ ထုတ်ပြန်ကြေညာပေးခဲ့ပြန်ချေပြီတကား။

ဒါတင်မကသေးဘဲ ယခုတစ်ကြိမ် ရရှိလိုက်သော ဆုလာဘ်များမှာမူ ၎င်းတို့အားလုံးကို အလွန် အံ့အားသင့်သွားစေခဲ့ရပေသည်။

ထိုခဏ၌ တောအုပ်အတွင်း၌ တကယ့်ကို နူးညံ့လှသော လေပြေညင်းလေးတစ်ခု ဖြေးဖြေးချင်း တိုက်ခတ်လာခဲ့ပြီး ၎င်းနှင့်အတူ သက်တောင့်သက်သာရှိလှသော နွေးထွေးမှု အရသာကြီးတစ်ခုကိုပါ တစ်ပါတည်း သယ်ဆောင်လာခဲ့ခြင်း ဖြစ်ပေသည်။

ပတ်ဝန်းကျင်က အပူချိန်မှာလည်း ပြင်းထန်လှသော အရှိန်ဖြင့် သိသိသာသာ အဆက်မပြတ် မြင့်တက်လာခဲ့ချေပြီ။

ယခုတစ်ကြိမ်တွင်မူ ပတ်ဝန်းကျင် အပူချိန်သည် တစ်ခဏအတွင်းမှာတင် ၁၅ ဒီဂရီစင်တီဂရိတ်အထိ တိုက်ရိုက် တိုးမြင့်သွားခဲ့ခြင်း ဖြစ်ပေသည်။

ပထမအကြိမ်တုန်းက ရရှိထားခဲ့သော ၁၀ ဒီဂရီစင်တီဂရိတ်နှင့်ပါ စနစ်တကျ ပေါင်းစပ်လိုက်မည်ဆိုပါက နယ်မြေ ၁၈၈ ၏ ပတ်ဝန်းကျင် အပူချိန်တစ်ခုလုံးသည် စုစုပေါင်း ၂၅ ဒီဂရီစင်တီဂရိတ်အထိ ကြီးမားစွာ မြင့်တက်သွားခဲ့ပြီ ဖြစ်ရမည်။

သာမန်အားဖြင့် တောအုပ်အတွင်းက ပြင်းထန်လှသော ဆောင်းရာသီ အပူချိန်မှာ အနှုတ် ၂၅ ဒီဂရီစင်တီဂရိတ်မှ အနှုတ် ၁၅ ဒီဂရီစင်တီဂရိတ်ဝန်းကျင် အနေအထားအတွင်း၌သာ အမြဲတမ်း တည်ရှိနေလေ့ရှိခြင်းဖြစ်ပြီး ညဖက်အချိန်များတွင် အပူချိန်မှာ ပို၍ နိမ့်ကျသွားလေ့ရှိကာ နေ့လယ်ပိုင်း အချိန်များတွင်မူ အနည်းငယ် ပြန်လည်မြင့်တက်လာလေ့ ရှိပေသည်။

သို့သော်လည်း ယခုအခါတွင်မူ ညဖက်အချိန်ဖြစ်စေ နေ့လယ်ပိုင်းအချိန်ဖြစ်စေ မည်သည့်အချိန်မျိုး၌မဆို ပတ်ဝန်းကျင် အပူချိန်တစ်ခုလုံးသည် သုညဒီဂရီအထက်ဆီသို့ အပြည့်အဝ မြင့်တက်သွားခဲ့ပြီ ဖြစ်ပေသည်။

နေ့လယ်ပိုင်း အချိန်များတွင်မူ အပူချိန်သည် ၁၀ ဒီဂရီစင်တီဂရိတ်အထက်ဆီသို့ပင် အလွယ်တကူ ရောက်ရှိသွားနိုင်ချေပြီ။

ဤမျှအထိ မြင့်မားလှသော အပူချိန်နှင့်အတူ နေ့ဖက်အချိန်တွင် တောက်ပလှသော နေရောင်ခြည်များသာ ထပ်မံ၍ ကျရောက်လာခဲ့မည်ဆိုပါက တောအုပ်အတွင်းက ထူထဲလှသော ဆီးနှင်းထုကြီးများမှာလည်း ဖြေးဖြေးချင်း စတင်၍ အရည်ပျော်ကာ ပျောက်သွားကြတော့မည် ဖြစ်ပေသည်။

ဤအချက်ကတော့ အခြေခံအားဖြင့် နယ်မြေ ၁၈၈ ၏ ပြင်းထန်လှသော ဆောင်းရာသီ ကြီးသည် အခြားသော နယ်မြေများထက်စာလျှင် ကြိုတင်၍ အပြီးတိုင် ချုပ်ငြိမ်းသွားခဲ့ရပြီဖြစ်ကြောင်း သေချာလှပေသည်။

ကမ္ဘာလုံးဆိုင်ရာ ချန်နယ်အတွင်း၌မူ နောက်ထပ်တစ်ကြိမ် ထပ်မံ၍ ရူးသွပ်မတတ် ဆူညံပွက်လောရိုက်သွားကြရပြန်ချေပြီ။

"တောက်... တကယ်ပဲ တော်လောက်ပြီဗျာ၊ အခုလည်း နယ်မြေ ၁၈၈ ကပဲ ဟုတ်လား။ ဆက်တိုက်ကြီး နှစ်ကြိမ်တောင် ပေါ်လာတာဆိုတော့ ဒါက တကယ့်ကို ယုတ္တိမရှိလှဘူး"

"နယ်မြေ ၁၈၈ ကတော့ တကယ့်ကို အစွမ်းထက်လွန်းလှတယ်ဗျာ။ ဝမ်ကွေ့ရှင်းကလည်း တကယ့်ကို အံ့မခန်းပါပဲ"

"ငါတို့ နယ်မြေက ဆရာကြီးတွေကော ဘာတွေ လျှောက်လုပ်နေကြတာလဲမသိဘူး၊ သူတို့တွေ ဒီထက်ပိုပြီးတော့ အားစိုက်လို့ မရနိုင်ကြတော့ဘူးလား"

ဤသည်မှာ နယ်မြေ ၁ အတွင်းက ရှင်ကျန်သူတစ်ဦး၏ အော်ဟစ်သံ ဖြစ်ပေသည်။

"ဒီလိုမျိုး တွက်ချက်ကြည့်မယ်ဆိုရင်တော့၊ နယ်မြေ ၁၈၈ ရဲ့ ပတ်ဝန်းကျင် အပူချိန်က စုစုပေါင်း ၂၅ ဒီဂရီစင်တီဂရိတ်အထိ တိုးသွားခဲ့တာ မဟုတ်လား... တကယ့်ကို မယုံနိုင်လောက်အောင်ပါပဲဗျာ၊ သူတို့ဆီမှာ ပြင်းထန်လှတဲ့ ဆောင်းရာသီကြီးက အစောကြီးကတည်းက ပြီးဆုံးသွားပြီ ဖြစ်ရမယ်"

"ဟားဟားဟား... ငါတို့လည်း အိမ်နီးနားချင်း နယ်မြေရဲ့ အရှိန်အဝါကြောင့် အကျိုးကျေးဇူးတွေ အတူတူ ခံစားခွင့် ရရှိသွားခဲ့ပြီဟေ့၊ နယ်မြေ ၁၈၇ က လူတွေလည်း ရူးသွပ်မတတ် အကျိုးအမြတ်တွေ ရနေခဲ့ကြပြီ"

"နယ်မြေ ၁၈၇ ထဲမှာလည်း တောင်ပေါ်ကို အောင်မြင်အောင် တက်လှမ်းနေတဲ့ ဆရာကြီးတစ်ယောက် ရှိနေတာ မဟုတ်ဘူးလား။ ဖြစ်နိုင်တာကတော့ နင်တို့တွေလည်း ဆီးနှင်းတောင် တယ်လီပို့စနစ်ကြီးကို ကိုယ်တိုင် အသက်သွင်းနိုင်မယ့် အခွင့်အရေးကောင်းမျိုး ရှိလာနိုင်တာပဲ၊ တကယ်ကို အားကျမိတယ်..."

"ငါတို့ နယ်မြေထဲက ထိပ်တန်းဆရာကြီး အားလုံးကတော့ လွန်ခဲ့တဲ့အချိန်ကတည်းက လုဖေးအာကို နည်းလမ်းအမျိုးမျိုးနဲ့ လှမ်းပြီး ဆက်သွယ်ဖို့ ကြိုးစားနေခဲ့တာ နယ်မြေချန်နယ်တစ်ခုလုံးမှာလည်း သတင်းစကားတွေနဲ့ပဲ အပြည့်အဝ ဖုံးလွှမ်းနေခဲ့တာ ဖြစ်ပေမဲ့ သူမဖက်ကတော့ လက်ရှိအချိန်အထိ ပြန်လည်တုံ့ပြန်မှုမျိုး လုံးဝ ရှိမလာသေးပါဘူး။ ငါတို့ စိတ်ထဲမှာတော့ သူမတစ်ယောက် ဆီးနှင်းတောင်ပေါ်မှာ တစ်ခုခု ကြုံတွေ့နေရတာ ဖြစ်နိုင်တယ်လို့ တွက်ချက်ထားကြတယ်"

"ဒါနဲ့... ငါ တကယ့်ကို စူးစမ်းလိုစိတ် ဖြစ်မိတာကတော့ ဆီးနှင်းတောင် တယ်လီပို့စနစ်ကြီးကို ဘယ်လိုမျိုး နည်းလမ်းကို အသုံးပြုပြီးတော့ အသက်သွင်းရတာလဲဟင်။ လက်ရှိအချိန်အထိ ဘယ်ဆရာကြီးတစ်ယောက်မှ ငါတို့ကို အဲ့အကြောင်းအရာတွေကို ပြောပြတာမျိုး မရှိကြသေးလို့ပါ..."

"မင်းကို ဖွင့်ပြောပြလိုက်ရင်ကော ဘာထူးခြားသွားမှာမလို့လဲ၊ ဒီကိစ္စက သေချာပေါက် တောင်ပေါ်ကို အောင်မြင်စွာ တက်နိုင်ခဲ့ကြတဲ့ ဆရာကြီးတွေနဲ့ပဲ တိုက်ရိုက် သက်ဆိုင်နေမှာ သေချာတာကို။ ဘာလဲ... မင်းကိုယ်တိုင်လည်း တောင်ပေါ်ကို သွားပြီးတော့ တက်ချင်လို့လား"

"ပထမဆုံး အသက်ဝင်မယ့် တယ်လီပို့စနစ် ထိပ်ဆုံးဆယ်ခုမှာပဲ ကြီးမားလှတဲ့ ဆုလာဘ်တွေ ရှိနေမှာ ဖြစ်ပေမယ့် အခု နယ်မြေ ၁၈၈ ကတင်ပဲ နှစ်ခုလုံးကို အပြတ်အသတ် သိမ်းပိုက်သွားခဲ့ပြီ မဟုတ်လား...။ဆရာကြီးတို့ရေ ဖြစ်နိုင်ရင် နောက်ပိုင်းမှာ ထပ်ပြီးတော့ အသက်မသွင်းကြပါနဲ့ဦးဗျာ၊ ငါတို့အတွက်လည်း ဆုလာဘ်အချို့ ချန်ထားပေးကြပါဦး..."

"ဟုတ်ပဗျာ၊ နယ်မြေတစ်ခုတည်းကတင် ဒီလောက်အထိ ကြီးမားလှတဲ့ ဆုလာဘ်တွေကို နှစ်ကြိမ်ဆက်တိုက်ကြီး သိမ်းပိုက်သွားတယ်ဆိုတာက တကယ် လွန်လွန်းလှတယ် မဟုတ်လား။ စုစုပေါင်း ဆုလာဘ် က ဆယ်ခုပဲ ရှိတာ ငါတို့မှာတော့ အခြား နယ်မြေပေါင်း ရာဂဏန်းကျော်ခန့်အထိ ကျန်ရှိနေသေးတာကိုဗျာ"

"မင်းတို့တွေ အဲ့လိုမျိုးတော့ သွားပြီး ပြောလို့ မရဘူးလေ၊ ဟုတ်တယ်မလား။ ဆန်းကြယ်တဲ့ အသံကြီးရဲ့ ပြောပြချက်အရဆိုရင် ငါတို့အားလုံး ဒီပြင်းထန်လှတဲ့ ဆောင်းရာသီကြီးကို အမြန်ဆုံး ပြီးဆုံးသွားစေဖို့အတွက် တယ်လီပို့စနစ် အခုသုံးဆယ်ကို အမြန်ဆုံး အသက်သွင်းနိုင်အောင် ကြိုးပမ်းကြရမှာ မဟုတ်လား။ မဟုတ်ရင်တော့ တကယ့်ကို ကြောက်မက်ဖွယ်ကောင်းလှတဲ့ ဘေးအန္တရာယ်ကြီးတစ်ခု ပေါ်ထွက်လာလိမ့်မယ်လို့ ဆိုထားတာလေ၊ ဟုတ်တယ်မလား။ သူတို့တွေ ဒီလောက်အထိ လျင်မြန်စွာ အသက်သွင်းပေးနိုင်တာက ငါတို့အားလုံးအတွက်ပါ အကျိုးကျေးဇူး ရှိစေတာပဲကို"

"ဟုတ်တယ်... ဟုတ်တယ်၊ အရှိန်တင်ပြီး တယ်လီပို့စနစ် အခုသုံးဆယ်လုံးကို အမြန်ဆုံး အသက်သွင်းလိုက်ကြစို့၊ ကြောက်ဖို့ကောင်းလှတဲ့ ဆောင်းရာသီဆိုးကြီးကို အမြန်ဆုံး ပြီးဆုံးသွားစေချင်လှပြီ။ ငါ့ရဲ့ သစ်ပင်အိမ်အပြင်ဘက်က ဆီးနှင်းထုကြီးတွေ စုပုံနေတဲ့ အမြင့်က အခုဆိုရင် ပြတင်းပေါက် အမြင့်လောက်အထိ ရောက်နေခဲ့ပြီ။ တစ်ခါတလေကျရင် ဆီးနှင်းထုကြီးတွေရဲ့ အောက်ခြေထဲကနေပြီးတော့ ထူးဆန်းတဲ့ သတ္တဝါဆိုးကြီးတစ်ခုခု ထွက်လာမလားဆိုတာကိုပါ စိုးရိမ်မိနေတယ်ဗျာ"

အခြားသော နယ်မြေများ၏ အခြေအနေမှာမူ နယ်မြေ ၁၈၈ နှင့် လုံးဝ တူညီခြင်းမျိုး မရှိကြပါပေ။

၎င်းတို့၏ နေရာများတွင်မူ ယနေ့ည၌လည်း ပြင်းထန်လှသော ဆီးနှင်းကြီးများမှာ ဆက်လက်၍ သည်းထန်စွာ ကျရောက်နေဆဲ ဖြစ်ပြီး မြေပြင်ပေါ်က ဆီးနှင်းထုကြီးများ၏ အမြင့်မှာလည်း သိသိသာသာကို ပို၍ တိုးမြင့်လာနေခဲ့ရှာခြင်း ဖြစ်ပေသည်။

"ဒီဆုလာဘ်တွေကို ထိပ်ဆုံးဆယ်ခုလုံး ပြီးသွားပြီး လူတိုင်းလည်း ဆုလာဘ်တွေ အသီးသီး ရသွားပြီးတဲ့ အချိန်ကျမှပဲ ဆက်လက်ပြီး လုပ်ဆောင်ကြရင် မကောင်းဘူးလား။ ငါတို့အတွက်လည်း ဆုလာဘ်အချို့ ချန်ထားပေးကြပါဦး"

"မင်းက မင်းကိုယ်မင်း ဘာကောင်ထင်နေလို့လဲ၊ သူတို့တွေက ဘာဖြစ်လို့ မင်းအတွက် ဆုလာဘ်တွေကို သီးသန့်ချန်ထားပေးရမှာလဲ"

"ဟား... ဘာပဲဖြစ်ဖြစ်၊ ငါတို့ နယ်မြေရဲ့ အခြေအနေကတော့ တကယ်ကို စုတ်ပြတ်သတ်နေတာ ဖြစ်လို့၊ ဒီတယ်လီပို့စနစ်ကြီး အောင်မြင်အောင် အသက်သွင်းနိုင်ဖို့ဆိုတာ ဘယ်လိုနည်းနဲ့မှ မဖြစ်နိုင်တဲ့အရာ ဖြစ်ပေမဲ့၊ ငါကတော့ နယ်မြေ ၁၈၈ က ဆရာကြီးတွေကိုပဲ စိတ်ထဲကနေ ရာနှုန်းပြည့် အပြည့်အဝ ထောက်ခံအားပေးနေမှာ သေချာတယ်။ ဆရာကြီးတို့ရေ... ဆက်ပြီးတော့သာ အစွမ်းကုန် အသက်သွင်းပေးကြပါဦးဗျာ၊ ဒီဆောင်းရာသီကြီး ပြီးသွားခဲ့ပြီဆိုတာနဲ့ ငါတို့အားလုံးလည်း အုပ်စုလိုက်ကြီး မင်းတို့ နယ်မြေအတွင်းထဲကိုပဲ လာရောက်ပူးပေါင်းပြီး ခိုလှုံကြတော့မှာပါ"

"ငါ တကယ်ပဲ အံ့ဩမိတယ်၊ နယ်မြေ ၁၈၈ ကတော့ အခြား နယ်မြေအားလုံးကို အဝေးကြီးမှာ ချန်ထားရစ်ခဲ့နိုင်တာ မဟုတ်လား၊ စိတ်ထဲမှာတော့ တကယ် အားကျပြီးမနာလိုဖြစ်မိတယ်။ငါက ဘာဖြစ်လို့ နယ်မြေ ၁၈၈ က လူတစ်ယောက် ဖြစ်မလာခဲ့ရတာလဲ မသိဘူး"

ကမ္ဘာလုံးဆိုင်ရာ ချန်နယ်တစ်ခုလုံးမှာမူ အဆက်မပြတ် ဆူညံပွက်လောရိုက်လျက် ရှိနေခဲ့သည်မှာ မှန်သော်လည်း ရှင်ကျန်သူ အများစုမှာမူ နယ်မြေ ၁၈၈ အပေါ် အကောင်းမြင်စိတ်များဖြင့် ချီးမွမ်းထောပနာပြုနေကြခြင်း ဖြစ်ပေသည်။

အကြောင်းမှာ အခြားသော နယ်မြေ အများစုထံ၌မူ ဤတယ်လီပို့စနစ်ကြီးအား ကိုယ်တိုင် အောင်မြင်စွာ အသက်သွင်းနိုင်မည့် အင်အားနှင့် အရည်အချင်းမျိုး လုံးဝ ရှိမနေကြသဖြင့် လူတိုင်း၏ စိတ်ထဲက တစ်ခုတည်းသော မျှော်လင့်ချက်မှာ ဤဦးဆောင်နေသော ထိပ်တန်းနယ်မြေကြီးများကသာ တယ်လီပို့စနစ်များကို အမြန်ဆုံး အသက်သွင်းပေးလျက် ဤပြင်းထန်လှသော ဆောင်းရာသီဆိုးကြီးကို အမြန်ဆုံး ပြီးဆုံးသွားစေရန်အတွက်သာ ဖြစ်ပေသည်။

ဒါတင်မကသေးဘဲ လက်ရှိအချိန်၌မူ နယ်မြေ ၁၈၈ တစ်ခုတည်းကသာ ဤတယ်လီပို့စနစ်ကြီးကို အမှန်တကယ် အသက်သွင်းနိုင်စွမ်းရှိသော အရည်အချင်းမျိုးကို ထင်ရှားစွာ ချပြနိုင်ခဲ့ခြင်းဖြစ်ပြီး နှစ်ကြိမ်တောင် အောင်မြင်အောင် လုပ်ဆောင်ပြနိုင်ခဲ့ခြင်း ဖြစ်ပေသည်။

အကယ်၍ ၎င်းတို့အနေဖြင့် နယ်မြေ ၁၈၈ အပေါ် ထောက်ခံအားပေးခြင်းမျိုး မပြုလုပ်ကြဘူးဆိုလျှင်မူ၊ အခြား မည်သည့်နယ်မြေကို ထောက်ခံအားပေးနိုင်ကြတော့မည် နည်း။

မြေပြင်ပေါ်၌မူ လူအများအပြားမှာ အခြေအနေများကို ပို၍ ဆူညံသွားစေရန်အတွက် ရည်ရွယ်ချက်ရှိရှိဖြင့် လှုံ့ဆော်မှုများ ပြုလုပ်နေကြပြီး နယ်မြေ ၁၊ နယ်မြေ ၂၃ နှင့် အခြားသော အစွမ်းထက်လှသည့် ထိပ်တန်းနယ်မြေကြီးများအနေဖြင့်လည်း အရှိန်မြှင့်တင်လျက် တယ်လီပို့စနစ်များကို အမြန်ဆုံး အသက်သွင်းနိုင်အောင် ကြိုးပမ်းကြပါဦးဟူ၍လည်းကောင်း သို့မဟုတ်ပါက ၎င်းတို့သည် နယ်မြေ ၁၈၈ ၏ အနောက်၌ ဝေးကွာလှသော အရပ်၌ ကျန်ရစ်ခဲ့ရမည်ဖြစ်ပြီး ၎င်းတို့၏ ခြေထောက်အောက်ခြေ၌ပင် လုံးဝ အပြီးတိုင် နင်းခြေခြင်း ခံလိုက်ရတော့မည်ဖြစ်ကြောင်း စသည်ဖြင့် အဆက်မပြတ် ရေးသားဖော်ပြနေခဲ့ကြပေသည်။

သို့သော်လည်း ဤလူများ လုံးဝ ကြိုတင်မသိနိုင်ကြသော အချက်မှာမူ နယ်မြေ ၁၈၈ အနေဖြင့် ဆီးနှင်းတောင် တယ်လီပို့စနစ် နှစ်ခုကို အောင်မြင်စွာ အသက်သွင်းနိုင်ခဲ့သည်မှာ အမှန်ပင် ဖြစ်သော်လည်း လက်ရှိအချိန်၌ ၎င်းတို့၏ နှုတ်ဖျားအတွင်း၌ တကယ့်ကို အောင်နိုင်သူကြီးများအဖြစ် ရေပန်းစားနေခဲ့ကြသော ထိုအစွမ်းထက်လှသည့် ဆရာကြီးများမှာမူ အခြားသော ဦးနှောက်ခြောက်စရာကောင်းလှသည့် ပြင်းထန်လှသော ပြဿနာအသစ်ကြီးတစ်ခုနှင့် တိုက်ရိုက် ရင်ဆိုင်ကြုံတွေ့နေရဆဲ ဖြစ်ကြောင်းကိုပင်။

အခန်း ( ၅၁၅ ပြီး။