အခန်း ၅၁၆

အခန်း (၅၁၆) - ဒုတိယမြောက် ဆုလာဘ်နှင့် တစ်ကမ္ဘာလုံး မနာလိုဖြစ်ခြင်း (၂)

ရွှီရှင်းသည် စိတ်ထဲ၌ ခဏမျှ စိတ်လှုပ်ရှားသွားခဲ့ရသည်မှာ မှန်သော်လည်း ၎င်းနောက် ဧရာမမြေကျင်းကြီးအတွင်းက ကျောက်ဆစ်ရုပ်တုကြီးများကို မြင်တွေ့လိုက်ရသည့်ခဏ၌ ချက်ချင်းပင် ဦးနှောက်ခြောက်မတတ် ပြန်လည်ဗျာများသွားခဲ့ရပြန်ချေပြီ။

အကယ်၍ ဤကျောက်ဆစ်ရုပ်တုကြီးများ၏ ပြဿနာကိုသာ အပြီးတိုင် မဖြေရှင်းနိုင်ခဲ့ဘူးဆိုလျှင်မူ ၎င်းတယ်လီပို့စနစ်ကြီးနှစ်ခုကို တစ်နည်းနည်းနှင့် အပြန်အလှန် ချိတ်ဆက်ပေးလိုက်နိုင်သည်ဆိုပါစေဦးတော့ ၎င်းတို့ကြား၌ ဘေးကင်းလုံခြုံစွာဖြင့် အသုံးပြုနိုင်ဖို့ဆိုတာ ဘယ်လိုနည်းနဲ့မှ ဖြစ်နိုင်လိမ့်မည် မဟုတ်ပါချေ။

"အီး..."

လီဝမ်ရှီး၏ ရင်ခွင်အတွင်း၌ ရှိနေသော ခဲခဲလေးသည် ဧရာမမြေကျင်းကြီးအတွင်း၌ ကျန်ရှိနေသေးသော ထိုကျောက်ဆစ်ရုပ်တုကြီးများရှိရာဆီသို့ လှမ်း၍ တစ်ချက်ကြည့်လိုက်ပြီးနောက် မိမိ၏ ခေါင်းလေးကို ချက်ချင်းပင် အောက်သို့ နှိမ့်ချလျက် လီဝမ်ရှီး၏ ရင်ခွင်အတွင်းဆီသို့ ဇွတ်အတင်း တိုးဝင်ဝှက်ထားလိုက်ပြီး ဧရာမအမြီးပွပွကြီးကိုပါ အပေါ်သို့ တင်းကြပ်စွာ လိပ်ကွေးထားရှာပေသည်။

၎င်းသည် ဤကျောက်ဆစ်ရုပ်တုကြီးများထံမှနေ၍ ပြင်းထန်လှသော ဘေးအန္တရာယ် အရိပ်အယောင်များကို သေချာ ကြိုတင်၍ ပြင်းပြင်းထန်ထန် အာရုံခံမိနေဆဲဖြစ်ကြောင်း လုံးဝ ထင်ရှားလှပေသည်။

"အား...အစ်မကွေ့ရှင်းက ဖုန်းခေါ်နေပြီ"

လီဝမ်ရှီးသည် လက်ပတ်နာရီ ရုတ်တရက် ပြင်းထန်စွာ တုန်ခါလာခဲ့သဖြင့် မထိန်းနိုင်ဘဲ အလန့်တကြား အော်ဟစ်လိုက်မိရှာပေသည်။

သူမသည် ခေါ်ဆိုမှုကို ချက်ချင်းပင် လက်ခံလိုက်မိပြီး အသံကိုပါ တစ်ပါတည်း တိုက်ရိုက် ဖွင့်ပေးလိုက်တော့၏။

"ဝမ်ရှီး... အဲ့ဖက်က အခြေအနေတွေ အတိအကျ ဘယ်လိုရှိနေပြီလဲဟင်။ ရွှီရှင်းက ကျောက်ဆစ်ရုပ်တုကြီးတွေလား ဘာလားဆိုတဲ့ ကောင်တွေကို ခြေမှုန်းလို့ ပြီးသွားပြီလား"

ဝမ်ကွေ့ရှင်း၏ လေသံအတွင်း၌မူ ဖုံးကွယ်မရနိုင်လောက်အောင် စိတ်လှုပ်ရှားမှု အရှိန်အဟုန်များ ပြည့်နှက်နေခဲ့ချေပြီ။

မည်သို့ပင်ဆိုစေ မိမိတို့ဖက်က တယ်လီပို့စနစ်ကြီးကို အခုတင်ပဲ အောင်မြင်စွာ အသက်သွင်းနိုင်ခဲ့ခြင်းဖြစ်ပြီး ၎င်းသတင်းစကားမှာလည်း တစ်ကမ္ဘာလုံးအတိုင်းအတာအထိ ပျံ့နှံ့သွားခဲ့ပြီးသား ဖြစ်နေသောကြောင့် ဖြစ်ပေသည်။

"ကျွန်မလည်း ဒီနေရာကို ရောက်နေပြီး ပြဿနာတွေကို အတူတူ ဝိုင်းဖြေရှင်းပေးနေတာ။ ရွှီရှင်းကလည်း လက်ရှိ ကျွန်မရဲ့ ဘေးတင် ရှိနေတာပါ"

လီဝမ်ရှီးသည် ဧရာမမြေကျင်းကြီး၏ အတွင်းပိုင်းဆီသို့ မျက်မှောင်ကျုံ့လျက် လှမ်း၍ တစ်ချက်ကြည့်ရှုစစ်ဆေးလိုက်မိပြီး အတွင်း၌ ထူးခြားလှသော လှုပ်ရှားမှုမျိုး ရှိမနေသေးကြောင်း သေသေချာချာ အတည်ပြုလိုက်နိုင်သည့် အခါကျမှသာ စိတ်ထဲ၌ အနည်းငယ် စိတ်အေးသက်သာသွားခဲ့ရရှာကာ မျက်နှာတွင် အပြုံးတစ်ခု ထုတ်ဖော်ပြသလာခဲ့၏။

"ဟင်... ရွှီရှင်းက နင့်ကိုပါ တိုက်ပွဲထဲ ဝင် တိုက်ခွင့် ပြုလိုက်တာ ဟုတ်လား။ ငါကတော့ သူတို့တွေ တိုက်ပွဲပြင်းထန်နေတဲ့ အချိန်အတွင်း ဖုန်းခေါ်တာတွေနဲ့ သွားပြီး နှောင့်ယှက်မိမှာကို စိုးရိမ်တာနဲ့ပဲ နင့်ဆီကို သီးသန့်လှမ်းပြီး ဆက်သွယ်လိုက်တာ၊ မမျှော်လင့်ဘဲ နင်ကိုယ်တိုင်ပါ အဲ့နေရာကို ရောက်နေလိမ့်မယ်လို့ လုံးဝ ထင်မထားမိခဲ့ဘူး။ ဒါဆိုရင် အခု ငါပြောသမျှ စကားလုံးတွေကို သူတို့အားလုံးပါ ရှင်းရှင်းလင်းလင်း ကြားနေရတာလားဟင်"

"ကြားနေရပါတယ်ဟာ၊ ငါတို့အားလုံး ဘေးနားတင်ပဲ အတူတူ ရှိနေကြတာမို့လို့ပါ။"

ရွှီရှင်းကလည်း ချက်ချင်းပင် လှမ်း၍ စကားဆိုလိုက်မိပြီး မိမိတို့ ရှိနေကြသော နေရာဆီသို့ လွန်ခဲ့သည့်ခဏကတည်းက တောက်လျှောက် တည့်တည့်မတ်မတ် စိုက်ကြည့်နေခဲ့သော ထိုဧရာမရှူးပျံရုပ်တုကြီးရှိရာဆီသို့ မျက်လုံးများဖြင့် လှမ်း၍ တစ်ချက် စိုက်ကြည့်လိုက်မိပေသည်။

သူသည် စိတ်ထဲ၌ အနည်းငယ် အံ့အားသင့်သွားခဲ့ရသည်မှာ ထိုရှူးပျံရုပ်တုကြီး၏ ဧရာမခေါင်းကြီးမှာမူ ယခုအခါ၌ မူလအတိုင်း ပုံမှန်နေရာဆီသို့ ဖြည်းဖြည်းချင်း ပြန်လည်လှည့်သွားခဲ့ ယုံမကဘဲ မိမိတို့ ရှိနေကြသော တည်နေရာဆီသို့လည်း အနည်းငယ် စောင်းလျက် စိုက်ကြည့်နေခြင်းမျိုး လုံးဝ မရှိတော့ချေ။

၎င်း၏ ကျောက်သားမျက်လုံး အစုံမှာလည်း မိမိတို့အပေါ်သို့ စူးစိုက်ထားခြင်းမျိုး လုံးဝ ကွယ်ပျောက်သွားခဲ့ပြီ ဖြစ်ပေသည်။

ဒါက ဘာဖြစ်လို့လဲ...။

ဖြစ်နိုင်တာကတော့ ရှောင်ဟုန်တစ်ယောက် ရတနာသေတ္တာ သားရဲကြီး၏ ဝမ်းဗိုက်အတွင်းဆီသို့ ဝါးမြိုသိမ်းဆည်းခြင်း ခံလိုက်ရပြီ ဖြစ်သဖြင့် ၎င်းနောက်ကွယ်က ကြိုးကိုင်သူအနေဖြင့် ရှောင်ဟုန်၏ သက်စောင့်အရှိန်အဝါ အားလုံးကို ထပ်မံ၍ လုံးဝ အာရုံခံနိုင်စွမ်း မရှိတော့ခြင်းကြောင့်လား မသိပါချေ။

ဤအချက်အရဆိုလျှင်မူ ထိုဧရာမရှူးပျံရုပ်တုကြီးသည် လွန်ခဲ့သည့်ခဏတုန်းက မိမိတို့ငါးဦးစလုံး၏ လှုပ်ရှားမှုများကို စောင့်ကြည့်နေခဲ့ခြင်း မဟုတ်ဘဲ တကယ့်တော့ ရှောင်ဟုန်၏ ကျောက်ဆစ်ရုပ်တုကိုသာ သီးသန့်စူးစိုက်ကြည့်ရှုနေခဲ့ခြင်း ဖြစ်ရမည် မဟုတ်ပါလား။

ကျိချောင်းယန်သည်လည်း ဤလက်တွေ့မြေပြင် အခြေအနေ ပြောင်းလဲမှုကို သေသေချာချာ ကွက်တိ သတိပြုမိသွားခဲ့ခြင်း ဖြစ်ပေသည်။

သူသည် အလင်းတိုင်ကြီး၏ ဘေးပတ်ဝန်းကျင်၌ ရှိနေကြသော ခရမ်းနက်ရောင် အရှိန်အဟုန်များ ပြင်းထန်စွာ ဖုံးလွှမ်းနေဆဲဖြစ်သော ထိုဧရာမရှူးပျံရုပ်တုကြီးနှစ်ခုရှိရာဆီသို့ လှမ်း၍ စိုက်ကြည့်လိုက်မိရင်း စိတ်ထဲ၌ အတွေးနက်လျက် ရှိနေခဲ့မိ၏။

ဝမ်ကွေ့ရှင်းကတော့ ဖုန်းထဲမှနေ၍ ဆက်လက်၍ စကားဆိုလာခဲ့ချေပြီ။

"ဒါဆိုရင်တော့ တကယ့်ကို အဆင်ပြေတာပေါ့၊ ငါလည်း အရေးကြီးတဲ့ အဓိက အကြောင်းအရာကိုပဲ ပွင့်ပွင့်လင်းလင်း ပြောပြလိုက်ပါ့မယ်။ ငါတို့ဖက်မှာတော့ တယ်လီပို့စနစ်ကြီးတစ်ခုလုံးကို အပြည့်အဝ အောင်မြင်စွာ အသက်သွင်းလို့ ပြီးသွားခဲ့ပြီ။ နင်တို့လည်း အလင်းတိုင်ကြီးရဲ့ အတွင်းပိုင်းထဲမှာ ဘာတွေ ရှိနေမလဲဆိုတာကိုတော့ သေချာပေါက် သိထားကြပြီးသား ဖြစ်ရမယ်၊ ငါကတော့ စနစ်ရဲ့ ပြသမှုပေါ်က နင်တို့ရဲ့ တောက်ပနေတဲ့ ခရမ်းနက်ရောင် အစက်အပြောက်လေးကို နှိပ်ပြီးအပြန်အလှန် ချိတ်ဆက်နိုင်ဖို့အတွက် တောင်းဆိုမှု တစ်ခုကို ချက်ချင်း ပေးပို့ထားခဲ့ပြီးပြီ။ အခု နင်တို့ဖက်က အသက်သွင်းသူ တွေအနေနဲ့ အဲ့တောင်းဆိုမှုကို အောင်မြင်အောင် အတည်ပြုပေးဖို့ပဲ လိုအပ်နေတာ။"

တယ်လီပို့စနစ်ကြီးနှစ်ခုကြား၌ အပြန်အလှန် ချိတ်ဆက်မှုများကို ပြီးမြောက်အောင် လုပ်ဆောင်နိုင်ရန်အတွက်မူ သေချာပေါက် နှစ်ဖက်စလုံးက အသက်သွင်းသူများ၏ ပြိုင်တူ လက်ခံအတည်ပြုပေးမှုများ လိုအပ်နေခြင်း ဖြစ်ပေရာ...။

ဆိုလိုသည်မှာ ရွှီရှင်းအနေဖြင့် ၎င်းကိစ္စကို ပြီးမြောက်စေရန်အတွက် ထိုခရမ်းနက်ရောင် အလင်းတိုင်ကြီး၏ အတွင်းပိုင်းဆီသို့ နောက်ထပ်တစ်ကြိမ် ထပ်၍ လူကိုယ်တိုင် ခြေချဝင်ရောက်ရန် လိုအပ်နေသေးခြင်း ဖြစ်ပေသည်။

"ငါတို့တွေ လွန်ခဲ့တဲ့ အချိန်တုန်းက လက်တွေ့စမ်းသပ်ချက်တစ်ခုကို လုခဲ့ကြသေးတယ် ဒီတယ်လီပို့စနစ်ကြီးရဲ့ အသက်သွင်းသူ ဆိုတာက စနစ်ရဲ့ ဆန်းကြယ်တဲ့ အသံကြီးက တစ်ကမ္ဘာလုံးကို ထုတ်ပြန်ကြေညာပေးလိုက်တဲ့ လူတစ်ဦးတည်းကိုသာ ရည်ညွှန်းနေတာမျိုး လုံးဝ မဟုတ်ဘူး။ ငါတစ်ယောက်တည်းကိုတင် ဆိုလိုနေတာ မဟုတ်ပဲ ငါတို့ဖက်က အခြား သူနှစ်ဦးဖြစ်တဲ့ ဝမ်လေ့နဲ့ ကျောက်ရှောင်ချွမ်းတို့နှစ်ယောက်စလုံးကလည်း တယ်လီပို့စနစ်ကြီးရဲ့ အသက်သွင်းသူ စာရင်းအတွင်းမှာ ပါဝင်နေခဲ့ကြတာ။"

ဩော်....

ရွှီရှင်းသည် စိတ်ထဲ၌ ချက်ချင်းပင် သဘောပေါက်သွားခဲ့ပေသည်။

စနစ်၏ ဆန်းကြယ်လှသော အသံကြီးက တစ်ကမ္ဘာလုံး အတိုင်းအတာအရ လူတစ်ဦးတည်း၏ အမည်ကိုသာ သီးသန့် ထုတ်ပြန်ကြေညာပေးခဲ့သည်မှာ မှန်သော်လည်း လက်တွေ့အခြေအနေအရ တိတိကျကျ ပြောရမည်ဆိုပါက သူ၊ ကျိချောင်းယန် နဲ့ လုဖေးအာပါ ဤတယ်လီပို့စနစ်ကြီးအား အောင်မြင်အောင် အသက်သွင်းနိုင်ခဲ့ကြသည့် အဓိက အသက်သွင်းသူများသာ ဖြစ်ကြပေသည်။

၎င်းတို့သုံးဦးအနက် မည်သူတစ်ဦးတစ်ယောက်မျှ ရှိမနေခဲ့ဘူးဆိုလျှင်မူ ဤတယ်လီပို့စနစ်ကြီးကို ဘယ်လိုနည်းနဲ့မှ အောင်မြင်စွာ အသက်သွင်းနိုင်ခဲ့ကြလိမ့်မည် မဟုတ်ပါချေ။

"နင်တို့ဖက်က ကျောက်ဆစ်ရုပ်တုကြီးတွေရဲ့ ပြဿနာကို ဖြေရှင်းလို့ ပြီးသွားကြပြီလား။ တယ်လီပို့စနစ်ရဲ့ အတွင်းပိုင်းထဲကို နောက်ထပ်တစ်ကြိမ် ထပ်ဝင်ပြီး ငါတို့ရဲ့ ချိတ်ဆက်မှု တောင်းဆိုချက်ကို အတည်ပြုပေးလို့ ရနိုင်မလား။ အဲ့တာဆို ငါတို့အားလုံးလည်း အမှန်အကန် ချိတ်ဆက်မိသွားကြမှာ။ပြီးတော့ လူကိုယ်တိုင် အပြင်မှာ ဆုံနိုင်ကြတော့မှာ။ သေချာကတော့ ငါက လက်ရှိအချိန်အထိ ရွှီရှင်းတစ်ယောက် အပြင်မှာ ဘယ်လိုမျိုး ရုပ်ရည် ရှိနေမလဲဆိုတာကို လုံးဝ မသိသေးဘူး"

ဝမ်ကွေ့ရှင်း၏ မျှော်လင့်တောင့်တမှုများ ပြည့်နှက်နေသော အသံကြီးမှာ ၎င်းတို့ငါးဦးစလုံး၏ နားစည်အတွင်းဆီသို့ တိတ်ဆိတ်စွာ စီးဝင်လာခဲ့သည်မှာ မှန်သော်လည်း ၎င်းတို့ငါးဦးစလုံးမှာမူ တစ်ဦးကိုတစ်ဦး လှမ်းကြည့်လိုက်ကြမိပြီးနောက် မျက်နှာပေါ်တွင် တကယ့်ကို မတတ်သာလှသော ခါးသီးလှသည့် အပြုံးဖျော့ဖျော့လေးများကိုသာ အချင်းချင်း ထုတ်ဖော်ပြသလိုက်ကြမိပေသည်။

ဤအခြေအနေက အနည်းငယ် စိတ်အနှောင့်အယှက် ဖြစ်စရာကောင်းလှပေသည်။

၎င်းတို့အနေဖြင့် အဓိက အရေးကြီးလှသော နောက်ဆုံးပန်းတိုင် ခြေလှမ်းကြီးဆီသို့ အောင်မြင်စွာ ရောက်ရှိနေခဲ့ကြပြီ ဖြစ်သော်လည်း ကွက်တိပင် ဤနေရာ၌သာ ပြင်းထန်စွာ ပိတ်ဆို့နေခဲ့ကြရခြင်း ဖြစ်သောကြောင့် ဖြစ်ပေသည်။

လွန်ခဲ့သည့်အချိန်က အဆင့်နိမ့် ဗီဇပြောင်းသတ္တဝါ အုပ်စုကြီးကိုသာ ရင်ဆိုင်ဖြေရှင်းခဲ့ရသည်မှာမှန်သော်လည်း ၎င်းတို့အနေဖြင့် အလွန် ခက်ခဲပင်ပန်းစွာ အားစိုက်ထုတ်ခဲ့ကြရခြင်း ဖြစ်ပေသည်။

ယခုအခါတွင်မူ ၎င်းတို့ထက် များစွာ ပို၍ သန်မာလှသော အလယ်အလတ်အဆင့် ဗီဇပြောင်းသတ္တဝါ ရုပ်တုကြီးများနှင့် ထိုအလယ်ဗဟိုက ဧရာမရှူးပျံရုပ်တုကြီးနှစ်ခု ကိစ္စကြီးများ ကျန်ရှိနေသေးခြင်းဖြစ်ရာ ၎င်းတို့ကို ကိုယ်တိုင်ဝင်ရောက်၍ အပြတ်အသတ် ချေမှုန်းနိုင်စွမ်းရှိမည့် ယုံကြည်ချက်မျိုးတော့ ၎င်းတို့၏ စိတ်ထဲ၌ လက်ရှိအချိန်အထိ လုံးဝ ရှိမနေကြသေးပါပေ။

ထိုဧရာမရှူးပျံရုပ်တုကြီးနှစ်ခုကို လောလောဆယ် ထည့်သွင်းမတွက်ချက်သေးဘဲ ထိုအလယ်အလတ်အဆင့် ဗီဇပြောင်းသတ္တဝါ ရုပ်တုကြီးများ၏ ခန္ဓာကိုယ် အရွယ်အစား ပမာဏကိုသာ စစ်ဆေးကြည့်ရှုမည်ဆိုပါက အလွန်ကြီးမားထူထဲလွန်းလှပေသည်။

၎င်းတို့၏ အခြေခံခွန်အား ပမာဏမှာလည်း ငွေရောင်ဘုရင် သို့မဟုတ် မီမီတို့ထက်စာလျှင် များစွာ ပို၍ အားနည်းနေလိမ့်မည် မဟုတ်ပါချေ။

ဒါတင်မကသေးဘဲ ဤကျောက်ဆစ်ရုပ်တုကြီးများသည် မိမိတို့၏ ကျောက်သားခေါင်းကြီးများ လုံးဝ ပြတ်တောက်သွားခဲ့ရသည့်တိုင်အောင် ဆက်လက်၍ အသက်ဝင်လှုပ်ရှားနိုင်စွမ်း ရှိကြသေးခြင်း ဖြစ်ပေသည်။

သာမန် သားရဲရုပ်တုကြီးများဆိုလျှင်မူ ခန္ဓာကိုယ်ပေါ်၌ တစ်စုံတစ်ခုထိခိုက်ဒဏ်ရာများ ရရှိသွားခဲ့ရုံမျှဖြင့်တင် ချက်ချင်းပင် ကြေမွပျက်စီးသွားကြလေ့ရှိခြင်းဖြစ်ပြီး အဆင့်နိမ့် ဗီဇပြောင်းသတ္တဝါ ရုပ်တုကြီးများမှာမူ ၎င်းတို့၏ ရင်ဘတ်က အားနည်းချက်နေရာကို တိကျစွာ တိုက်ခိုက်ခြေမှုန်းနိုင်မှသာ အပြီးတိုင် ကြေမွပျက်စီးသွားကြခြင်း ဖြစ်ပေသည်။

ထို့ကြောင့် သူ၏ စိတ်ထဲက ကြိုတင်တွက်ချက်မှုအရဆိုလျှင်မူ ဤအလယ်အလတ်အဆင့် ဗီဇပြောင်းသတ္တဝါ ရုပ်တုကြီးများသည် သေချာပေါက် အဆင့်နိမ့် ရုပ်တုကြီးများကဲ့သို့ ရင်ဘတ်နေရာ၌ အလွယ်တကူ တိုက်ခိုက်ဖျက်ဆီးနိုင်မည့် အားနည်းချက်မျိုး ရှိနေလိမ့်မည် မဟုတ်ပါချေ။

၎င်းတို့အားလုံးမှာ သေချာပေါက် ရင်ဆိုင်ဖြေရှင်းရန်အတွက် များစွာ ပိုမိုခက်ခဲလှပေလိမ့်မည်။

ရွှီရှင်းသည် စိတ်ထဲ၌ အတွေးများကို သေသေချာချာ ဆက်၍ ကြံဆတွက်ချက်နေမိပေသည်။

ယခုအခါ သူ၏ စိတ်ထဲ၌ ဤကျောက်ဆစ်ရုပ်တုကြီးများသည် ဧရာမမြေကျင်းကြီး၏ အတွင်းပိုင်းမှနေ၍ အပြင်ဘက်ဆီသို့ ကိုယ်တိုင် တွားတက်လာနိုင်စွမ်း သေချာပေါက် ရှိကြကြောင်းကို အပြည့်အဝ အတည်ပြုလိုက်နိုင်ခဲ့ပြီ ဖြစ်ပေသည်။

ထို့ကြောင့် သူသည် ၎င်းတို့ကို မိမိ၏ သစ်ပင်အိမ် ရှိရာ ပတ်ဝန်းကျင် နေရာဆီသို့ ရည်ရွယ်ချက်ရှိရှိဖြင့် မျှားခေါ်သွားလို့ ရနိုင်မလားဟုတွေးနေမိ၏။

အကယ်၍ ၎င်းတို့အားလုံးသာ မိမိ၏ သစ်ပင်အိမ် ပတ်ဝန်းကျင်ဆီသို့ ရောက်ရှိသွားခဲ့ကြမည်ဆိုပါက ၎င်းနေရာ၌မူ သစ်ပင်အိမ်အမြုတေ၏ အကာအကွယ်များ ရှိနေသလို အစွမ်းထက်လှသော လက်နက်စနစ်များနှင့် ပေါက်ကွဲအားပြင်းလှသည့် လက်နက်ကြီးများစွာ ရှိနှင့်နေခဲ့ပြီးသား ဖြစ်ပေသည်။

ဆိုလိုသည်မှာ သူကိုယ်တိုင်လည်း ဤကျောက်ဆစ်ရုပ်တုကြီးများအားလုံးကို စိတ်ထဲ၌ ကြောက်ရွံ့ထိတ်လန့်မှုမျိုး လုံးဝ ရှိနေတော့မည် မဟုတ်ပါချေ။

"ဟဲလို... အဲ့ဖက်မှာ တစ်ယောက်ယောက် ရှိနေသေးလား။ ဘာဖြစ်လို့ ဘယ်သူမှ စကားပြန်ပြီးတော့ မပြောကြတော့တာလဲ"

ဝမ်ကွေ့ရှင်း၏ လှမ်း၍ မေးမြန်းသံမှာ ဖုန်းထဲမှနေ၍ နောက်ထပ်တစ်ကြိမ် ထပ်မံထွက်ပေါ်လာခဲ့ပြန်ချေပြီ။

"အီး..."

လူတိုင်းမှာ စကားတစ်ခွန်းမျှ မဆိုဘဲ လုံးဝ တိတ်ဆိတ်ငြိမ်သက်နေကြသည်ကို မြင်တွေ့လိုက်ရသောအခါ လီဝမ်ရှီး၏ ရင်ခွင်အတွင်း၌ ရှိနေသော ခဲခဲလေးသည် မိမိ၏ ဧရာမခေါင်းလေးကို အနည်းငယ် စောင်းလိုက်ပြီး အသံဖြင့် နှစ်ကြိမ်ခန့် ဆက်တိုက် ပြန်လည်အော်ဟစ်ပြရှာကာ "အီး အီး" ဟု ဆိုလိုက်ပေသည်။

"အား..."

လီဝမ်ရှီးသည်လည်း ချက်ချင်းပင် အသိစိတ် ပြန်ဝင်လာခဲ့ပြီး ဖုန်းရှိရာဆီသို့ "ညီမတို့ဖက်မှာ တကယ့်ကို ပြဿနာအချို့ ပေါ်နေလို့ပါ... ဒါကြောင့်မို့လို့ ကိစ္စတွေကို ဖြေရှင်းဖို့အတွက် အချိန်အနည်းငယ် ထပ်ပြီးတော့ လိုဦးမှာ သေချာတယ်။ အကယ်လို့ အမက ရွှီရှင်း ဘယ်လိုမျိုး ရုပ်ရည်ရှိနေမလဲဆိုတာကို တကယ်ကြီး မြင်ချင်နေတာ ဆိုရင်တော့၊ အခုပဲ ညီမတို့ဆီကို ဗီဒီယိုခေါ်ဆိုမှု တစ်ခု ချက်ချင်း လှမ်းပြီး ခေါ်လိုက်လို့ ရတာပဲကို" ဟု ဆိုလိုက်ပေသည်။

"ဩော်... ခုဏက ထွက်လာတဲ့ အသံလေးက ရွှီရှင်းရဲ့ ဘေးနားက ထိုဝက်ဝံပန်ဒါ ကောင်လေးရဲ့ အော်သံလေး မဟုတ်လား။ နားထောင်ရတာ ချစ်စရာကောင်းလိုက်တာ။ငါကိုယ်တိုင်လည်း လှမ်းပြီးတော့ ပွေ့ချီမထားနိုင်တာ နှမြောစရာပဲ။ဒါဆိုရင်တော့ ဗီဒီယိုခေါ်မယ့် ကိစ္စကို လောလောဆယ် ဘေးဖယ်ထားလိုက်ကြရအောင်။ဘာပဲဖြစ်ဖြစ် ငါတို့အားလုံးလည်း မကြာခင်မှာ လူကိုယ်တိုင် ဆုံကြတော့မှာပဲဥစ္စာ။ အချင်းချင်းကြားက ဆန်းကြယ်လှတဲ့ ခံစားချက်လေးကို ဒီအတိုင်းပဲ ဆက်ပြီးတော့ ထိန်းသိမ်းထားတာက ပိုကောင်းတာပေါ့၊ ငါကတော့ နင်တို့အားလုံးရဲ့ တကယ့် အမှန်အကန် ရုပ်ရည်တွေကို လူကိုယ်တိုင် တွေ့ချင်လွန်းနေပြီ"

ဝမ်ကွေ့ရှင်းက ချက်ချင်းပင် ငြင်းပယ်လိုက်ပေသည်။

ကျိချောင်းယန်သည်လည်း ကွက်တိပင် ဝင်ရောက်လျက် စကားဆိုလာခဲ့၏။

"ငါတို့ဖက်က ကိစ္စတွေကတော့ သေချာပေါက် အချိန်အပိုင်းအခြားတစ်ခုအထိ ထပ်ပြီး ကြန့်ကြာသွားမှာ သေချာတယ်။ ငါတို့တွေ လက်ရှိအချိန်အထိ တကယ့်ကို ရင်ဆိုင်ရ ခက်ခဲတဲ့ ထိပ်တန်း ကျောက်ဆစ်ရုပ်တု

အားလုံးကို လုံးဝမဖြေရှင်းနိုင်ကြသေးဘူး၊ ဒါတင်မကသေးဘဲ အခြား မမျှော်လင့်ထားတဲ့ အခြေအနေ အသစ်တစ်ခုပါ ထပ်ဖြစ်လာခဲ့တာဖြစ်လို့ လက်ရှိအချိန်မှာ ရှေ့ကို ဇွတ်အတင်း တိုးပြီးလုပ်လို့ မရနိုင်သေးလို့ပါ"

သူသည် သဘာဝအတိုင်း ရှောင်ဟုန်နှင့် ပတ်သက်၍ ဖြစ်ပျက်ခဲ့သော ထူးဆန်းလှသည့် ဖြစ်စဉ်ကြီးကို သွယ်ဝိုက်လျက် ရည်ညွှန်းပြောဆိုလိုက်ခြင်း ဖြစ်ပေသည်။

"ဟင်... အဲ့တာကက တိုက်ပွဲပိုင်းဆိုင်ရာ ပြဿနာတစ်ခုခု ဖြစ်နေလို့များလား"

ဝမ်ကွေ့ရှင်းက ချက်ချင်းပင် စိုးရိမ်တကြီးဖြင့် လှမ်း၍ မေးမြန်းလိုက်ပြီး ၎င်းနောက် ချက်ချင်းပင် အကြံပြုချက်တစ်ခု ပေးခဲ့၏။

"ဒါဆိုရင်တော့ နင်တို့အနေနဲ့ ဘယ်လို နည်းလမ်းကိုပဲဖြစ်ဖြစ် အမြန်ဆုံး ကြံဆပြီး တယ်လီပို့စနစ်ကြီး အပြန်အလှန် ချိတ်ဆက်မိသွားအောင်ပဲ အဓိက ဦးစားပေးပြီးတော့ လုပ်ဆောင်လိုက်တော့။ အကယ်လို့ ဒီစနစ်ကြီးသာ အမှန်အကန် ချိတ်ဆက်မိသွားခဲ့ပြီဆိုတာနဲ့ ငါကိုယ်တိုင်လည်း တယ်လီပို့စနစ်ကို အသုံးပြုပြီးတော့ နင်တို့ဆီကို တိုက်ရိုက် ကူးပြောင်းလာပြီး ဝိုင်းကူပေးလို့ ရတာပဲ မဟုတ်လား။ ဒါတင်မကသေးဘူး ငါတို့ဖက်မှာ ကျောက်ရှောင်ချွမ်းနဲ့ ဝမ်လေ့တို့နှစ်ယောက်စလုံး ရှိနေကြသလို၊ ချင်ယွန်လုံနဲ့ သူ့ ညီကလည်း မကြာခင် ဒီနေရာကို သေချာပေါက် ရောက်လာကြတော့မှာ။ လူအင်အား ပိုများလေလေ ခွန်အားပိုင်းဆိုင်ရာ ပိုပြီးတော့ ကြီးမားလေလေ ဖြစ်မှာ သေချာတယ်။ အထူးသဖြင့် နင်တို့ဖက်က အဖွဲ့သားအများစုက တကယ့်တော့ အထူး ပံ့ပိုးရေး စွမ်းရည်အမျိုးအစားတွေကိုသာ အဓိက ပိုင်ဆိုင်ထားကြတာ မဟုတ်လား။ ဒါကြောင့်မို့လို့ ရှေ့တန်းက တကယ့် သတ်ဖြတ်ချေမှုန်းရေး တိုက်ပွဲအားလုံးကိုတော့ ငါတို့အုပ်စုကိုပဲ အပြည့်အဝ လွှဲပြီး စိတ်ကြိုက် စီမံခွင့် ပြုလိုက်ပါ"

သူမ၏ ပြောပြချက်များမှာမူ အလွန်ပင် ယုတ္တိရှိလှပေသည်။

အခြားသော တစ်ဖက်နယ်မြေတွင်မူ ၎င်းတို့ အဖွဲ့သားအားလုံး၏ ခန္ဓာကိုယ် ကြံ့ခိုင်မှုပိုင်းဆိုင်ရာနှင့် အခြေခံခွန်အား ပမာဏအားလုံးမှာ အခြေခံအားဖြင့် အဆပေါင်းများစွာအထိ မြင့်မားနေခဲ့ကြပြီ ဖြစ်ပေသည်။

ထို့ကြောင့် တိုက်ပွဲပိုင်းဆိုင်ရာ စွမ်းဆောင်ရည်များနှင့် ပတ်သက်၍ တွက်ချက်ကြည့်မည်ဆိုပါက ဝမ်လေ့ သို့မဟုတ် ကျောက်ရှောင်ချွမ်း နှစ်ဦးတည်း၏ အင်အားဖြင့်ပင် ထိပ်တန်း အဆင့်အတန်းတစ်ခုတွင် တည်ရှိနေခဲ့ကြပြီမှာ လုံးဝ ငြင်း၍ မရနိုင်သောအချက် ဖြစ်ပေသည်။

ဒါတင်မကသေးဘဲ ထိုဖက်နယ်မြေတွင်မူ မယုံကြည်နိုင်လောက်အောင် အစွမ်းထက်လွန်းလှသော တစ်ကမ္ဘာလုံးက ကြောက်ရွံ့ရသည့် ဧကရီကြီး ကိုယ်တိုင် ရှိနှင့်နေခဲ့ပြီးသား ဖြစ်ပေသည် မဟုတ်ပါလား။

အကယ်၍ ဝမ်ကွေ့ရှင်း ပိုင်ဆိုင်ထားသော ထိုပြင်းထန်လှသော အဆိပ်စွမ်းရည်များသည် ဤကျောက်ဆစ်ရုပ်တုကြီးများအပေါ်၌လည်း အမှန်အကန် အကျိုးသက်ရောက်မှု ရှိနေခဲ့မည်ဆိုပါက ရှေ့က တိုက်ပွဲကြီးတစ်ခုလုံး၏ ခက်ခဲမှု အဆင့်အတန်းမှာလည်း တစ်ခဏချင်းအတွင်း လေပြေညင်းလေးတစ်ခုအလား အလွန်ပင် ရိုးရှင်းလွယ်ကူသွားနိုင်သဖြင့် စိတ်ထဲ၌ စိုးရိမ်ပူပန်မှုမှာ လုံးဝ ရှိနေစရာ လိုအပ်တော့မည် မဟုတ်ပါချေ။

သို့သော်လည်း သူမ ပိုင်ဆိုင်ထားသော ထိုစိတ်ဝိဉာဉ် အဆိပ်အတောက် စွမ်းရည်များသည် ဤကျောက်ဆစ်ရုပ်တုကြီးများအပေါ်၌ အမှန်အကန် သက်ရောက်မှု ရှိမရှိဆိုသည်မှာကတော့ လက်ရှိအချိန်အထိ မေးခွန်းထုတ်စရာ အချက်ကြီးတစ်ခုအဖြစ် ဆက်လက်၍ ရှိနေဆဲ ဖြစ်ပေသည်။

မည်သို့ပင်ဆိုစေ ဤကျောက်ဆစ်ရုပ်တုကြီးများသည် ၎င်းတို့၏ ဦးနှောက်စနစ် လုံးဝ ရှိမနေကြဘဲ မိမိတို့၏ ကျောက်သားခေါင်းကြီးများ လုံးဝ ပြတ်တောက်သွားခဲ့ရသည့်တိုင်အောင် ရှေ့သို့ ဆက်၍ ရက်စက်စွာ လာရောက်တိုက်ခိုက်နိုင်စွမ်း ရှိကြသောကြောင့် ဖြစ်ပေသည်...။

ထို့ကြောင့် ၎င်းတို့သည် သူမ၏ ထိုစိတ်ဝိဉာဉ် အဆိပ်အတောက်များ၏ ဘေးဒဏ်ကို ခံရခြင်းမျိုး လုံးဝ ရှိနေလိမ့်မည် မဟုတ်ပါချေ။

သို့သော်လည်း သူမအနေဖြင့် မိမိ၏ ထိုအဆိပ်အတောက် စွမ်းရည်များကို လုံးဝ အသုံးမပြုပါဘူးဆိုဦးတော့ ဝမ်ကွေ့ရှင်း၏ လက်တွေ့မြေပြင် အခြေခံခွန်အား ပမာဏနှင့် တိုက်ခိုက်ရေး အရည်အချင်းမှာ တကယ့်ကို မယုံကြည်နိုင်လောက်အောင် သန်မာထက်မြက်လွန်းလှသည်မှာ အမှန်ပင်ဖြစ်သည်။

အကယ်၍ ခန္ဓာကိုယ် အခြေခံခွန်အားပိုင်းဆိုင်ရာ တစ်ခုတည်းဖြင့်သာ သီးသန့် ယှဉ်ပြိုင်ကြမည်ဆိုပါက ရွှီရှင်းကိုယ်တိုင်ပင်လျှင် သူမ၏ လက်အောက်၌ ဆက်လက်၍ အလွယ်တကူ ယှဉ်ပြိုင်နိုင်စွမ်း ရှိလိမ့်မည် မဟုတ်ပါချေ။

ဒါတင်မကသေးဘဲ အခြားသော အစွမ်းထက်လှသည့် သူငယ်ချင်းများစွာပါ ထပ်မံ၍ တိုးလာဦးမည်ဖြစ်ရာ အကယ်၍ ၎င်းတို့အနေဖြင့် မည်သည့်နည်းလမ်းကိုမဆို အသုံးပြုလျက် အခြားသော တစ်ဖက်နယ်မြေက လူသားအားလုံးကို ဤဖက်သို့ ဘေးကင်းစွာဖြင့် တိုက်ရိုက် ခေါ်ဆောင်လာနိုင်ခဲ့ကြမည်ဆိုပါက ၎င်းတို့အဖွဲ့၏ စုစုပေါင်း တိုက်ခိုက်ရေး စွမ်းရည် ပမာဏမှာမူ တစ်ခဏချင်းအတွင်းမှာတင် အဆပေါင်း နှစ်ဆကျော်ခန့်အထိ သေချာပေါက် တိုးမြင့်သွားနိုင်လိမ့်မည် ဖြစ်ပေသည်။

အခန်း ( ၅၁၆ ပြီး။