အခန်း ၅၁၉

အခန်း (၅၁၉) - ရှူးပျံရုပ်တုကြီး၏ ဗီဇပြောင်းလဲမှုနှင့် တယ်လီပို့စနစ်ကြီး စတင်အသက်ဝင်ခြင်း

"သူတို့တွေ ချိတ်ဆက်မိသွားကြပြီဟေ့။ အလင်းတိုင်နှစ်ခုက တကယ်ကြီး ချိတ်ဆက်မိသွားတာဗျာ"

"တောက်... ငါ မျက်စိမှားနေတာလို့ပဲ ထင်နေတာ၊ ဒါပေမဲ့ ဒါက တကယ့်အမှန်တရားကြီးပဲဥစ္စာ"

"ဒါက တကယ့်ကို မယုံနိုင်လောက်အောင်ပါပဲဗျာ"

"ဒါဆိုရင်... နယ်မြေ ၁၈၈ ထဲက တယ်လီပို့စနစ်နှစ်ခုက အချင်းချင်း ချိတ်ဆက်မိသွားတာပေါ့ ဟုတ်လား"

"အား... ငါ အခုမှပဲ သေသေချာချာ သဘောပေါက်သွားတော့တယ်၊ချိတ်ဆက်မိသွားတဲ့ တယ်လီပို့စနစ်နှစ်ခုက မိုင်ပေါင်းထောင်ချီ ဝေးကွာတဲ့ နေရာဆီကို တိုက်ရိုက် တယ်လီပို့လုပ်ပေးနိုင်တာပဲဗျာ"

"အဲ့တာရဲ့နာမည်ကို ကြည့်ရုံနဲ့တင် တယ်လီပို့စနစ်အချင်းချင်း ကူးပြောင်းနိုင်မယ်ဆိုတာကို ကြိုတင်သိနိုင်တာ မှန်ပေမယ့်၊ ဒီလောက်အထိ ခမ်းနားလှတဲ့ မြင်ကွင်းကြီး ပေါ်လာလိမ့်မယ်လို့တော့ လုံးဝ ထင်မထားမိခဲ့ဘူး"

"ခဏနေဦးဗျာ၊ ဒီလိုမျိုးဆိုရင်တော့ တယ်လီပို့စနစ် ရှိနှင့်နေတဲ့ နယ်မြေတွေကော နယ်မြေ ၁၈၈ ရဲ့ တယ်လီပို့စနစ်နဲ့ လာပြီး ချိတ်ဆက်လို့ ရနိုင်မလားဟင်။ ပြီးတော့ အဲ့စနစ်ကို သုံးပြီးတော့ နယ်မြေ ၁၈၈ ထဲကို သွားရောက်ပူးပေါင်းလို့ကော ရနိုင်မလားဗျာ"

"တကယ်ကြီးလားဟင်"

"ဒါက ငါတို့ရဲ့ ကိုယ်ပိုင်နယ်မြေအတွင်းမှာပဲ သီးသန့် အလုပ်လုပ်နိုင်တာ ဖြစ်ရမယ်၊ ဟုတ်တယ်မလား။ နယ်မြေအချင်းချင်း ကူးပြောင်းတယ်ဆိုတာကတော့... ဒါက တကယ့်ကို ယုတ္တိမရှိလွန်းလှဘူး မဟုတ်လားဗျာ"

"အကယ်လို့ အဲ့တာက တကယ်ကြီး ဖြစ်နိုင်တယ်ဆိုဦးတော့၊ တယ်လီပို့စနစ်ကို အောင်မြင်အောင် အသက်သွင်းနိုင်စွမ်းရှိတဲ့သူတွေဆိုတာ သေချာပေါက် အစွမ်းထက်တဲ့ နယ်မြေက လူတွေပဲ ဖြစ်ရမှာပဲဥစ္စာ။ သူတို့တွေက ဘာဖြစ်လို့ နယ်မြေ ၁၈၈ ဆီကို သွားရောက်ပူးပေါင်းချင်ကြရမှာလဲ၊ အဲ့တာက တကယ့်ကို အတွေးလွန်နေတာ သက်သက်ပါပဲ"

"နင်ပြောတာလည်း ဟုတ်တာပဲ..."

"ငါတို့ ရထားတဲ့ အတွင်းသတင်းတွေအရဆိုရင်တော့ အဲ့တာက ကိုယ်ပိုင်နယ်မြေအတွင်းမှာပဲ သီးသန့် တယ်လီပို့လုပ်နိုင်တာ ဖြစ်ရမယ်။ နယ်မြေအချင်းချင်း ဖြတ်ကျော်ပြီး တယ်လီပို့လုပ်မယ့် ကိစ္စကိုတော့ လုံးဝ သွားပြီး မတွေးတောကြပါနဲ့ဦး၊ အဲ့တာက ဘယ်လိုမှ မဖြစ်နိုင်လို့ပါ"

"ကောင်းပါပြီဗျာ။"

"အခြားနယ်မြေက လူတွေလည်း အရှိန်မြှင့်ပြီး ကြိုးစားကြဦးနော်။ နယ်မြေ ၁၈၈ ကတော့ သူတို့ရဲ့ တယ်လီပို့စနစ်တွေကို အောင်မြင်အောင် ချိတ်ဆက်ပြီး စတင်အသုံးပြုနေကြပြီ နင်တို့တွေကတော့ လက်ရှိအချိန်အထိ ဘာဖြစ်လို့ တစ်ခုမှ အသက်မသွင်းနိုင်ကြသေးတာလဲမသိဘူး..."

"နယ်မြေ ၁၄၈ က လူက ဘာတွေ လာပြီး လေကန်နေတာလဲဗျာ။ မင်းတို့ နယ်မြေထဲမှာ လက်ရှိ ရှင်ကျန်သူ အရေအတွက် စုစုပေါင်း လေးဆယ်ဝန်းကျင်လောက်ပဲ ကျန်ရှိတော့တာကိုငါတို့ကို ဒီလိုလေသံမျိုးနဲ့ လာပြီးတော့ ပြောဆိုဝံ့သေးတယ် ဟုတ်လား"

"ငါတို့ နယ်မြေထဲမှာ လူအနည်းငယ်ပဲ ကျန်တော့တာမို့ မင်းတို့ကိုပဲ အပြည့်အဝ အားကိုးနေရတာ မဟုတ်လား။ အကယ်လို့ မင်းတို့တွေသာ တယ်လီပို့စနစ်တွေကို အောင်မြင်အောင် အသက်မသွင်းနိုင်ကြဘူးဆိုရင်တော့ ဘယ်သူက ဆက်ပြီး လုပ်ဆောင်နိုင်ဦးမှာလဲ။ အရှိန်မြှင့်ပြီး ဆောင်းရာသီဆိုးကြီးကို အမြန်ဆုံး ကျော်ဖြတ်နိုင်အောင် ကူညီပေးကြပါ"

"နယ်မြေ ၁ က လူတွေလည်း မကြာခင် အောင်မြင်တော့မှာ ဖြစ်ရမယ်၊ ဟုတ်တယ်မလား။ နယ်မြေ ၁၈၈ ကလွဲရင် သူတို့က ကမ္ဘာလုံးဆိုင်ရာ အမှတ်စာရင်းဘုတ်ပေါ်မှာ အမြဲတမ်း နေရာအများဆုံး ရရှိထားတဲ့သူတွေလေ"

"ဒါပေမဲ့လည်း အဲ့ဖက်မှာက လူနှစ်ယောက်တည်း ရှိတာဖြစ်ပြီး နယ်မြေ ၁၈၈ မှာတော့ စုစုပေါင်း ငါးယောက်အထိ ရှိနေတာလေ..."

ထိုခဏ၌ ရွှီရှင်းနှင့် သူ၏ အဖွဲ့သားအားလုံးမှာလည်း ၎င်းတို့၏ မျက်လုံးအစုံကို ပြူးကျယ်လျက် ကောင်းကင်ပြင်ကြီးထက်က ခရမ်းနက်ရောင် အလင်းတန်း ကွင်းကြီးရှိရာဆီသို့ တုန်လှုပ်စွာဖြင့် မော့ကြည့်နေခဲ့ကြမိပေသည်။

ဤမြင်ကွင်းကတော့ အလွန်ပင် လူအများ၏ အာရုံကို ဆွဲဆောင်လွန်းလှပေသည်။

ထိုအချိန်၌ အလင်းတိုင်ကြီး၏ အောက်ခြေနယ်ပယ်အတွင်းမှနေ၍ ထူးဆန်းလှသော ပြောင်းလဲမှု ဖြစ်စဉ်အသစ်တစ်ခု ချက်ချင်းပင် စတင်၍ ပေါ်ထွက်လာခဲ့ချေပြီ။

မူလက ထိုတြိဂံပုံစံ မှော်စာလုံးသင်္ကေတ တည်ရှိရာ နေရာမှနေ၍သာ ခရမ်းနက်ရောင် အလင်းတန်းကြီးတစ်ခု ကောင်းကင်ယံထက်ဆီသို့ တည့်တည့်မတ်မတ် ထိုးတက်နေခဲ့ခြင်း ဖြစ်သော်လည်း ယခုအခါတွင်မူ ၎င်းတြိဂံပုံစံ၏ ဘေးပတ်ပတ်လည်တွင် ရှိနေကြသော စက်ဝိုင်းပုံစံ မှော်စာလုံးသင်္ကေတ သုံးခုစလုံးမှာလည်း နောက်တစ်ကြိမ် ပြန်လည်၍ ခရမ်းနက်ရောင် အလင်းတန်းများ ပြင်းထန်စွာ တောက်ပလာခဲ့ကြပြီ ဖြစ်ပြီး ၎င်းနောက်တွင်မူ ထိုခရမ်းနက်ရောင် မှော်မျဉ်းကြောင်းများမှာ အပြင်ဘက် နေရာအနှံ့သို့ လျင်မြန်လှသော အရှိန်ဖြင့် ပြင်းထန်စွာ ထိုးထွက်ပြန့်ကျဲသွားခဲ့ကြချေပြီ။

၎င်းပုံစံမှာ ယခင်က ဆီးနှင်းတောင်ကြီးတစ်ခုလုံး မြေအောက်အောက်ခြေဆီသို့ ပြင်းထန်စွာ နစ်မြုပ်မသွားခင် အချိန်တုန်းက အခြေအနေနှင့် များစွာ ဆင်တူလှပေသည်။

ဤမှော်မျဉ်းကြောင်းများမှာ ပင့်ကူအိမ်ကြီးတစ်ခုအလား အရပ်မျက်နှာအနှံ့သို့ လျင်မြန်စွာဖြင့် ဖြာထွက်သွားခဲ့ကြခြင်း ဖြစ်ပေသည်။

စက္ကန့်အနည်းငယ်မျှသော အချိန်တိုလေးအတွင်းမှာတင် ဧရာမမြေကျင်းကြီး၏ အောက်ခြေမြေပြင်တစ်ခုလုံးမှာမူ ဤခရမ်းနက်ရောင် မှော်မျဉ်းကြောင်းများဖြင့် နောက်တစ်ကြိမ် ထပ်၍ အပြည့်အဝ ဖုံးလွှမ်းသွားခဲ့ရရှာတော့၏။

၎င်းတို့အားလုံး ဧရာမမြေကျင်းကြီး၏ အတွင်းပိုင်းဆီသို့ လှမ်း၍ ငုံ့ကြည့်လိုက်ကြမိရာ ထိုထူထပ်များပြားလှသော မှော်မျဉ်းကြောင်းများကြောင့် မြေကျင်းကြီး၏ အောက်ခြေမြေပြင်တစ်ခုလုံးမှာ ခရမ်းနက်ရောင် အလင်းတန်းဖျော့ဖျော့အချို့ဖြင့် ထူးဆန်းစွာ လင်းထိန်နေခဲ့ချေပြီ။

ဒါတင်မကသေးဘဲ ဤခရမ်းရောင် မှော်မျဉ်းကြောင်းများမှာ မြေပြင်ပေါ်၌ တည်ငြိမ်စွာ ရှိနေကြခြင်းမျိုး လုံးဝ မဟုတ်ဘဲ၊ ၎င်းအစား မြေကျင်းကြီး၏ အလယ်ဗဟိုတည့်တည့်က တြိဂံပုံစံ မှော်စာလုံးသင်္ကေတကို ဗဟိုပြုလျက် ပတ်ပတ်လည်သို့ ဖြည်းဖြည်းချင်း စတင်၍ လည်ပတ်လှုပ်ရှားနေခဲ့ကြခြင်း ဖြစ်ပေသည်။

ရွှီရှင်းသည်လည်း ကွက်တိပင် ဤအချက်ကို သေသေချာချာ သတိပြုမိသွားခဲ့ရမိပေသည်။

မြေကျင်းကြီး၏ အလယ်ဗဟိုက ထိုတြိဂံပုံစံ မှော်စာလုံးသင်္ကေတ ကိုယ်တိုင်ကလည်း လက်ရှိအချိန်၌ တဖြည်းည်းချင်း စတင်၍ လည်ပတ်နေခဲ့ခြင်း ဖြစ်ပြီး ၎င်း၏ လည်ပတ်မှု အရှိန်အဟုန်ကြောင့် မြေကျင်းကြီး၏ အောက်ခြေက မှော်မျဉ်းကြောင်း အားလုံးကိုပါ တစ်ပါးတည်း တိုက်ရိုက် လိုက်လံလည်ပတ်သွားစေခြင်း ဖြစ်ပေသည်။

ဤခံစားချက်ဆိုးကြီးကတော့ အခြေခံအားဖြင့် ခရမ်းနက်ရောင် မရဏဝဲဂယက်ကြီးတစ်ခုနှင့် များစွာ အလားသဏ္ဌာန် တူလှပေသည်။

အဝေးမှ လှမ်းကြည့်လိုက်မည်ဆိုပါက ဤဧရာမမြေကျင်းကြီးတစ်ခုလုံးသည် တကယ့်ကို ကြီးမားထည်ဝါလှသော ဧရာမတယ်လီပို့ မှော်ဝင်တံခါးကြီးတစ်ခုအလား ထင်မှတ်ရပေသည်။

"ခမ်းနားလိုက်တာ"

လီဝမ်ရှီးသည် မိမိ၏ ရှေ့မှောက်က ဆန်းပြားလှသော ပြောင်းလဲမှု ဖြစ်စဉ်အားလုံးကို ရင်သပ်ရှုမောဖွယ် ခံစားချက်များဖြင့် စိုက်ကြည့်နေမိဆဲ ဖြစ်ပြီး "ဒီမြေကျင်းကြီးတစ်ခုလုံးက တကယ်ကြီး တယ်လီပို့ တံခါးကြီးတစ်ခုအဖြစ် ပြောင်းလဲသွားတာလားဟင်။ အကယ်လို့ ငါတို့တွေ အောက်ခြေကို တိုက်ရိုက် ခုန်ချလိုက်မယ်ဆိုရင်ကော တယ်လီပို့စနစ်ကို အသုံးပြုပြီးတော့ ချက်ချင်း ကူးပြောင်းသွားနိုင်မလား" ဟု မေးမြန်းလိုက်၏။

ကျိချောင်းယန်က မိမိ၏ မေးစေ့ကို လက်ဖြင့် သာသာယာယာလေး ပွတ်သပ်ရင်း ဝင်ရောက် သုံးသပ်ပြလာခဲ့ပေသည်။

"အဲ့တာက တယ်လီပို့စနစ်ကြီးတစ်ခု ဖြစ်နေခဲ့တာဆိုမှတော့ တစ်ပြိုင်တည်းမှာတင် ဘယ်အရာဝတ္ထုပစ္စည်း ကိုမဆို တိုက်ရိုက် တယ်လီပို့လုပ်ပေးနိုင်စွမ်း ရှိမှာပဲ။ ဖြစ်နိုင်တာကတော့ တစ်စုံတစ်ယောက်က အလင်းတိုင်ကြီးရဲ့ အတွင်းပိုင်းထဲကနေပြီးတော့ တယ်လီပို့စနစ်ကြီးတစ်ခုလုံးကို အပြည့်အဝ အသက်သွင်းလိုက်ဖို့ သီးသန့် လိုအပ်နေတာ ဖြစ်ရမယ်။ပြီး ကျမှပဲ ဒီမြေကျင်းကြီးအတွင်းမှာ ရှိနေသမျှ ရှင်ကျန်သူအားလုံးကို အခြားတစ်ဖက်နယ်မြေဆီ အပြည့်အဝ ပေးပို့နိုင်လိမ့်မယ်။"

"အီး... အီး အီး..."

ခဲခဲလေးသည် ရုတ်တရက် တရစပ် အော်ဟစ်လိုက်မိပြီး မိမိ၏ ခြေဖဝါးအသေးလေးဖြင့် မြေကျင်းကြီး၏ အလယ်ဗဟိုတည့်တည့် တည်ရှိရာ နေရာဆီသို့ စိုးရိမ်တကြီးဖြင့် လှမ်း၍ ညွှန်ပြလိုက်ရှာပေသည်။

ရွှီရှင်းသည် ခဲခဲလေး ညွှန်ပြရာ နေရာဆီသို့ ချက်ချင်းပင် လှမ်း၍ စူးစိုက်ကြည့်လိုက်မိပြီး "ဘာများ ဖြစ်လို့လဲ.." ဟု ဆိုလိုက်မိ၏။

၎င်းနောက်တွင်မူ သူ၏ မျက်စိသူငယ်အိမ်များမှာ တစ်ခဏချင်းအတွင်း ပြူးကျယ်သွားခဲ့ရပြီး "ရှူးပျံကြီးတွေက တကယ်ကြီး လှုပ်ရှားလာကြပြီ" ဟု လန့်ဖျတ်စွာ အော်လိုက်မိပေသည်။

ထိုအချိန်၌ ခရမ်းနက်ရောင် အလင်းတိုင်ကြီး၏ အတွင်းပိုင်း၌ တည်ရှိနေသော အလင်းတန်းများမှာ ရုတ်တရက် ပြင်းထန်စွာ လှုပ်ခါသွားခဲ့ရပြီး လုဖေးအာသည် ၎င်းအတွင်းမှနေ၍ လျင်မြန်လှသော အရှိန်ဖြင့် ဖျတ်ခနဲ အပြင်သို့ ပြန်လည်ပြေးထွက်လာခဲ့ချေပြီ။

သူမသည် ၎င်းအတွင်းမှ အပြင်သို့ လုံးဝ မထွက်ခွာလာခင် အချိန်ကတည်းကပင် မိမိဆုတ်ခွာရမည့် လမ်းကြောင်းကို စိတ်ထဲ၌ သေသေချာချာ ကြိုတင်၍ အပိုင်တွက်ချက်ထားခဲ့ပြီးသား ဖြစ်ပေသည်။ ထို့ကြောင့် သူမသည် မိမိ၏ ဘေးပတ်ဝန်းကျင်က မည်သည့်ကျောက်ဆစ်ရုပ်တုတစ်ခုကိုမျှ လှည့်ပတ်ကြည့်ရှုခြင်းမျိုး လုံးဝ မပြုလုပ်တော့ဘဲ လျှပ်စီးကြောင်းတစ်ခုအလား လျင်မြန်သွက်လက်လှသော အရှိန်ဖြင့် ရွှီရှင်းနှင့် သူ၏ အဖွဲ့သားများ ရှိနေကြသော အရပ်ဆီသို့ တည့်တည့်မတ်မတ် အပြေးအလွှား ဆုတ်ခွာလာခဲ့တော့၏။

မြေကျင်းကြီး၏ အလယ်ဗဟိုနေရာမှနေ၍ အစွန်းဆုံး ချောက်ကမ်းပါးနေရာအထိ အကွာအဝေး အခြေခံအားဖြင့် မီတာရာဂဏန်းခန့်မျှသာ ရှိနေခြင်း ဖြစ်ပေသည်။

လုဖေးအာ လက်ရှိ ပိုင်ဆိုင်ထားသော လှုပ်ရှားမှု အရှိန်အဟုန်မှာမူ သာမန်လူသားတစ်ဦး၏ အမြင့်ဆုံး ကန့်သတ်ချက်ကို အစောကြီးကတည်းက ဖြတ်ကျော်နေခဲ့ပြီ ဖြစ်ရမည် ဖြစ်ပေသည်။

ထို့ကြောင့် သူမအနေဖြင့် ဧရာမမြေကျင်းကြီး၏ အစွန်းနေရာဆီသို့ ရောက်ရှိရန်အတွက် လေးစက္ကန့် သို့မဟုတ် ငါးစက္ကန့်ခန့်မျှသော အချိန်တိုလေးအတွင်းမှာတင် အောင်မြင်စွာ ပြန်လည်ရောက်ရှိလာခဲ့ချေပြီ။

မိမိ၏ ရှေ့မှောက်က ငါးမီတာခန့် မြင့်လှသော မြေကျင်းကြီး၏ ကျောက်နံရံကြီးနှင့် ရင်ဆိုင်လိုက်ရသည့် ခဏ၌မူ သူမသည် မိမိ၏ ကျောပိုးအိတ်အတွင်းက ချိတ်ကြိုးများကို ထုတ်ယူအသုံးပြုခြင်းမျိုး လုံးဝ မပြုလုပ်ဘဲ ၎င်းအစား သူမ၏ အရှိန်ကို အစွမ်းကုန် ထပ်မံမြှင့်တင်လိုက်ပြီး ခြေနှစ်ဖက်ဖြင့် ကျောက်နံရံပေါ်သို့ ပြင်းထန်စွာ ကန်ကျောက်လျက် လက်နှစ်ဖက် ခြေနှစ်ဖက်စလုံးကို စနစ်တကျ အသုံးပြုကာ တကယ့်ကို ပါးနပ်သွက်လက်လှသော ကြောင်ကလေးတစ်ကောင်အလား ကျောက်နံရံပေါ်သို့ လျင်မြန်စွာ တွားတက်လာခဲ့တော့သည်။

"တကယ့်ကို ကြောက်စရာကောင်းလွန်းတယ်"

သူမသည် အပေါ်သို့ အောင်မြင်စွာ ခုန်တက်လိုက်နိုင်ခဲ့သည့် ခဏအတွင်းမှာတင် မိမိ၏ စိတ်ထဲက ထိတ်လန့်မှုများကို မထိန်းနိုင်ဘဲ အလန့်တကြား အော်ဟစ်လိုက်မိပြီး လီဝမ်ရှီး ရှိနေတဲ့ နေရာဆီသို့ တိုက်ရိုက်ရောက်သွားခဲ့၏။

"အီး..."

ခဲခဲလေးကတော့ လီဝမ်ရှီး၏ ရင်ခွင်အတွင်းမှနေ၍ အခြေအနေများကို ကြိုတင်ရိပ်မိပုံရပြီး အစောကြီးကတည်းက ဘေးကင်းစွာ ခုန်ထွက်လိုက်ခြင်း ဖြစ်ပေသည်။

၎င်းနောက် ရွှီရှင်း၏ ပုခုံးပေါ်သို့ ဘေးကင်းစွာဖြင့် လာရောက်နေရာယူလိုက်၏။

"အား..."

လီဝမ်ရှီးသည် ထိုစဉ်က ကောင်းကင်ယံထက်က အသက်ဝင်လာခဲ့သော တယ်လီပို့စနစ်ကြီး၏ မြင်ကွင်းကြောင့် မှင်သက်နေခဲ့ရဆဲ ဖြစ်ခြင်းဖြစ်သဖြင့် လုဖေးအာ၏ လျင်မြန်လှသော အရှိန်အဟုန်ဖြင့် ပြေးဝင်လာမှုကြောင့် စိတ်ထဲ၌ အလန့်တကြား ဖြစ်သွားခဲ့ရပြီး ၎င်း၏ တွန်းကန်မှုဒဏ်ကြောင့် မြေပြင်ပေါ်သို့ ခန္ဓာကိုယ်ချင်း ပြိုင်တူ မှောက်ရက်လဲကျသွားခဲ့ရရှာတော့သည်။

"အာ... နင် ဘာမှ မဖြစ်ဘူး မဟုတ်လားဟင်"

လုဖေးအာသည် မြေပြင်ပေါ်မှနေ၍ ချက်ချင်းပင် အမြန် ပြန်ထရပ်လိုက်မိပြီး လီဝမ်ရှီး၏ လက်ကလေးကို အမြန်ဆုံး ဆွဲကိုင်လျက် မြေပြင်ပေါ်မှနေ၍ အဆင်ပြေအောင် တွဲထူပေးလိုက်ရှာပေသည်။

"နင့်ရဲ့ ပြေးတဲ့ အရှိန်ကတော့ တကယ်ကြီး မြန်ဆန်လှတာပါလား..."

လီဝမ်ရှီးသည် အနည်းငယ် နာကျင်ကိုက်ခဲသွားခဲ့ရရှာသော တင်ပါးဆုံနေရာလေးကို လက်ကလေးဖြင့် သာသာယာယာလေး ပြန်လည်နှိပ်နယ်ရင်း လေသံလေးဖြင့် "တကယ့်ကို ကမ္ဘာကျော် အပြေးသမားကြီး ဘိုးလ် ထက်တောင်မှ ပိုပြီးတော့ မြန်နေဦးမှာ သေချာတယ်ဟ" ဟု ဆိုလိုက်၏။

"အဲ့လိုမျိုးလည်း မဟုတ်ပါဘူးဟာ..."

"ကဲပါ... အားလုံးပဲ တကယ့်အရေးကြီးတဲ့ အခြေအနေမှာ လျှောက်ပြီးတော့ နောက်ပြောင်မနေကြပါနဲ့ဦးနော်။"

ချီရွှယ်ဖေးသည် ၎င်းတို့နှစ်ဦးကြားက နောက်ပြောင်မှု အားလုံးကို အမြန်ဆုံး ဝင်ရောက်တားဆီးလိုက်မိပြီး မျက်နှာတွင် အလွန်ပင် လေးနက်တည်ကြည်လှသော အမူအရာများ ပြည့်နှက်နေလျက် အောက်ခြေက ကျောက်ဆစ်ရုပ်တုကြီးများရှိရာဆီသို့ စူးစိုက်ကြည့်ရှုလိုက်မိရင်း "ငါတို့တွေ ဒီတစ်ကြိမ်မှာတော့ တကယ့်ကို ပြဿနာဆိုးကြီးတစ်ခုနဲ့ သေချာပေါက် ရင်ဆိုင်တွေ့နေရပြီ" ဟု ဆိုလိုက်ပေသည်။

ထိုစကားလုံးများကို ကြားလိုက်ရသည့် ခဏ၌ ၎င်းတို့နှစ်ဦးစလုံးသည်လည်း မိမိတို့၏ ကိုယ်ကို အမြန်ဆုံး ပြန်လည်လှည့်လိုက်ကြပြီး ဧရာမမြေကျင်းကြီး၏ အတွင်းပိုင်းဆီသို့ ချက်ချင်းပင် လှမ်း၍ ငုံ့ကြည့်လိုက်မိကြရာ နှစ်ယောက်စလုံး၏ မျက်လုံးအစုံမှာ တစ်ခဏချင်းအတွင်း ပြင်းထန်စွာ တုန်ရီသွားခဲ့ရရှာပေသည်။

မူလက မြေကျင်းကြီး၏ အလယ်ဗဟိုနေရာ၌ ခွေဝပ်လျက် အေးဆေးစွာ အိပ်စက်နေခဲ့ကြသော ထိုဧရာမရှူးပျံရုပ်တုကြီး နှစ်ခုစလုံးမှာမူ ယခုအခါတွင် ၎င်းတို့၏ ဧရာမကျောက်သားခန္ဓာကိုယ်ကြီးများကို တစ်ပြိုင်နက်တည်းမှာတင် အပြည့်အဝ လှည့်ပတ်လိုက်ကြပြီ ဖြစ်ပေသည်။

ဒါတင်မကသေးဘဲ ၎င်းတို့ထုတ်ဖော်ပြသလာခဲ့ကြသော လှုပ်ရှားမှု ပုံသဏ္ဌာန်များမှာလည်း ယခင်က အခြေအနေများနှင့် လုံးဝ များစွာ ကွဲပြားခြားနားသွားခဲ့ချေပြီ။

၎င်းတို့သည် တောင်ပံကြီးများနှင့် တိုက်ရိုက်ဆက်စပ်နေခဲ့ကြသည့် သန်မာလှသော ရှေ့ခြေနှစ်ဖက်ကြီးကို အသုံးပြုလျက် မြေပြင်ပေါ်သို့ ပြင်းထန်စွာ အားပြုကာ တွန်းကန်လိုက်ကြခြင်းဖြစ်ပြီး ၎င်းတို့၏ ဧရာမခန္ဓာကိုယ်ကြီးတစ်ခုလုံးကို ရှေ့မျက်နှာစာဆီသို့ ဖြည်းည်းချင်း ကိုင်းညွတ်လိုက်ကြ၏။

၎င်းတို့၏ ကြီးမားလှသော ဧရာမခေါင်းကြီးများကိုမူ ရှင်ကျန်သူများ ရှိနေကြသော အရပ်မျက်နှာဆီသို့ စူးစိုက်လျက် ရှေ့သို့ ဆန့်ထုတ်လိုက်ကြပေသည်။

တစ်ပြိုင်နက်တည်းမှာပင် ၎င်းတို့နှစ်ကောင်စလုံး၏ ဧရာမပါးစပ်ကြီးအတွင်းမှနေ၍ နားကွဲမတတ် ဧရာမဟောက်သံဆိုးကြီးတစ်ခု ပြိုင်တူ ထွက်ပေါ်လာခဲ့၏။

ထိုကျောက်ဆစ်ရှူးပျံကြီးနှစ်ကောင်စလုံးက အမှန်တကယ်ပင် ရက်ရက်စက်စက် အော်ဟစ်လိုက်ကြခြင်း ဖြစ်ပေသည်။

ဩော်...

ဒါဆိုရင် ဧရာမရှူးပျံကြီးတစ်ကောင်ရဲ့ တကယ့် အော်ဟစ်အသံဆိုးဆိုတာ ဒီလိုပုံစံမျိုး ဖြစ်နေခဲ့တာပါလား။

"အီး..."

ခဲခဲလေးသည် ရွှီရှင်း၏ ကျောပြင်ကြီးအထက်ဆီသို့ တင်းကြပ်စွာ ကပ်တွယ်လိုက်မိပြီး ခေါင်းလေးကို မသိမသာ ဆန့်ထုတ်လျက် အောက်ခြေက ထိုဧရာမရှူးပျံရုပ်တုကြီးများရှိရာဆီသို့ စိုးရိမ်တကြီးဖြင့် လှမ်း၍ ချောင်းမြောင်းကြည့်ရှုနေရှာပေသည်။

"သူတို့တွေက တကယ်ကြီး ပျံသန်းတော့မည့် ပုံစံမျိုးပဲ"

ကျိချောင်းယန်၏ မျက်နှာတစ်ခုလုံးမှာအလွန် လေးနက်တည်ကြည်မှုများဖြင့် အပြည့်အဝ ဖုံးလွှမ်းသွားခဲ့ရလေပြီ။

သူသည် မိမိ၏ လက်ထဲက ခရမ်းရောင်အဆင့်ရှိသော ဒူးလေးကို ချက်ချင်းပင် ရှေ့သို့ မြှင့်တင်လျက် မြှားတံကို တင်းကြပ်စွာ တပ်ဆင်လိုက်မိကာ ထိုဧရာမရှူးပျံရုပ်တုကြီးတစ်ကောင်ရှိရာဆီသို့ တိုက်ရိုက်ပင် စူးစိုက်ချိန်ရွယ်လိုက်တော့သည်။

"တကယ်ကိုအတီးခံရတော့မှာပေါ့"

ရွှီရှင်းသည်လည်းသွားများကို တင်းကြပ်စွာ ကြိတ်လိုက်မိပေသည်။

အကယ်၍ ဤဧရာမကျောက်ဆစ်ရှူးပျံကြီးသာ တကယ်ကြီး အသက်ဝင်လှုပ်ရှားလာခဲ့ပြီး လေထုထဲသို့ အပြည့်အဝ ပျံသန်းလာခဲ့မယ်ဆိုရင်တော့ သူကိုယ်တိုင်အနေဖြင့်လည်း ဘေးပတ်ဝန်းကျင်က အခြားသော အဖွဲ့သားများအားလုံးရဲ့ အသက်အန္တရာယ် ဘေးကင်းမှုကို ဘယ်လိုမှ ရာနှုန်းပြည့် အာမခံချက် ပေးနိုင်စွမ်း ရှိလိမ့်မည် မဟုတ်ပါချေ။

သူသည် ခေါင်းကို အနောက်သို့ ပြန်လည်လှည့်ကြည့်ခြင်းမျိုး လုံးဝ မပြုလုပ်တော့ဘဲ နောက်၌ ရှိနေကြသော လီဝမ်ရှီးနှင့် ချီရွှယ်ဖေးတို့နှစ်ဦးအား တိကျပြတ်သားစွာဖြင့် လှမ်း၍ မှာကြားလိုက်ပေသည်။

"နင်တို့နှစ်ယောက်စလုံး ငါ့ရဲ့ ဘေးကို အနီးဆုံး ဖြစ်အောင် ကပ်ထားကြဦးနော်။ အကယ်လို့ အသက်အန္တရာယ် ကြုံရမယ့် ဘေးဆိုးကြီးတစ်ခုခု ရုတ်တရက် ဖြစ်လာခဲ့မယ်ဆိုရင်တော့ ငါက နင်တို့နှစ်ယောက်စလုံးကို ငါ့ရဲ့ အာကာသလက်စွပ်ထဲကို ချက်ချင်း ထည့်လိုက်တော့မှာမို့လို့"

သူ၏ အာကာသလက်စွပ်အတွင်းဆီသို့ ရောက်ရှိသွားမှသာ လျှင် ၎င်းတို့နှစ်ဦးစလုံးအတွက် တကယ့်ကို ရာနှုန်းပြည့် ဘေးကင်းလုံခြုံမှု ရှိနိုင်တော့မည် ဖြစ်ပေသည်။

ထိုအမျိုးသမီးနှစ်ဦးစလုံးမှာလည်း မည်သည့်တွေဝေမှုမျိုးမှ ရှိမနေခဲ့ကြဘဲ ရွှီရှင်း၏ ဘေးဆီသို့ ချက်ချင်းပင် အနီးဆုံးဖြစ်အောင် တိုးကပ်လိုက်ကြပေသည်။

"ဟို... ဒါက တကယ့်တော့ ငါ့ကြောင့်များ ဖြစ်သွားရတာလားဟင်။ ငါ စောစောက အတွင်းထဲကို အရှိန်မြှင့်ပြီးတော့ ပြေးဝင်ခဲ့မိတာကြောင့်မို့လို့ ရုပ်တုကြီးတွေကို သွားပြီးတော့ နှိုးဆော်မိသလိုမျိုး ဖြစ်သွားပြီး အသက်ဝင်လာကြတာလားမသိဘူး"

လုဖေးအာ၏ မျက်နှာတစ်ခုလုံးမှာ နောက်တစ်ကြိမ် ထပ်၍ ဖြူစုတ်သွားခဲ့ရရှာပြန်၏။

"မဟုတ်ဘူး၊ ဒါက နင့်ကြောင့်တော့ လုံးဝ မဟုတ်ဘူး။တယ်လီပို့စနစ်ကြီး အချင်းချင်း ချိတ်ဆက်မိသွားတဲ့ ခဏအတွင်းမှာတင် ဧရာမရှူးပျံရုပ်တုကြီး နှစ်ခုစလုံးက အလိုအလျောက် စတင်ပြီးတော့ လှုပ်ရှားလာခဲ့ကြတာမို့လို့ပါ"

ရွှီရှင်းက လေးနက်တည်ကြည်လှသော လေသံဖြင့် ပြန်လည်ရှင်းပြလိုက်ပြီး "အကယ်လို့ နင်ကိုယ်တိုင်လည်း စိတ်ထဲမှာ ပြင်းပြင်းထန်ထန် ထိတ်လန့်နေမိတယ်ဆိုရင်တော့ ငါ နင့်ကိုပါ အာကာသလက်စွပ်ထဲကို ချက်ချင်းထည့်ပေးလိုက်မယ်လေ" ဟု ဆိုလိုက်၏။

"ငါ..."

လုဖေးအာသည် ၎င်းစကားလုံးများကို ကြားလိုက်ရသည့်အခါ စိတ်ထဲ၌ ချက်ချင်းပင် အလွန်တုန်လှုပ်ကာ ဝေခွဲမရ ဖြစ်သွားခဲ့ရရှာပေသည်။

ရွှီရှင်းကတော့ မိမိ၏ မျက်လုံးအစုံကို လုံးဝ မမှိတ်ဘဲ အောက်ခြေက ထိုဧရာမရှူးပျံရုပ်တုကြီးရှိရာဆီသို့ သေသေချာချာ ဆက်လက်၍ စူးစိုက်ကြည့်ရှုနေခဲ့မိပေသည်။

သူသည် ဤရှူးပျံကြီး ထုတ်ဖော်ပြသလာခဲ့သော လှုပ်ရှားမှု ပုံသဏ္ဌာန်ကြီးကို ကောင်းမွန်စွာ မှတ်မိနေခြင်း ဖြစ်ပေသည်။

ကျိချောင်းယန် သေသေချာချာ သုံးသပ်ပြခဲ့ဖူးသလိုမျိုးပင် ၎င်းက တကယ်ကြီး လေထုထဲသို့ အပြည့်အဝ ပျံသန်းထွက်ခွာတော့မည့် ပုံစံမျိုး ဖြစ်ပေသည်။

ဤသည်မှာ တကယ့်မြေပြင်က ဧရာမရှူးပျံကြီးများအနေဖြင့် လေထုထဲသို့ ပျံသန်းခြင်း မပြုလုပ်မီ အချိန်အတွင်း မြေပြင်ပေါ်မှနေ၍ အရှိန်အဟုန်ဖြင့် စတင်ပျံတက်တော့မည့် အဓိက အသက်ဝင်လှုပ်ရှားမှု ဖြစ်စဉ်ကြီး ဖြစ်ပေသည် မဟုတ်ပါလား။

ကမ္ဘာဦး ရှေးခေတ်တုန်းက ကောင်းကင်ယံထက်က အကြီးဆုံး ပျံသန်းနိုင်စွမ်းရှိတဲ့ ဧရာမသတ္တဝါကြီးများအဖြစ် သတ်မှတ်ခြင်း ခံထားခဲ့ကြရသော ဤရှူးပျံကြီးများသည် တကယ့်မြေပြင် မှနေ၍ လေထုထဲသို့ တိုက်ရိုက်ပင် အလွယ်တကူ ပျံသန်းထွက်ခွာနိုင်စွမ်း ရှိကြသောကြောင့် ဖြစ်ပေသည်။

လက်ရှိ ကမ္ဘာမြေပြင်ပေါ်တွင် တည်ရှိနေကြဆဲဖြစ်သော အကြီးဆုံး ပျံသန်းနိုင်စွမ်းရှိသည့် သတ္တဝါဆိုးကြီးများကတော့ ရွှီရှင်း လွန်ခဲ့သည့်အချိန်တုန်းက ဆီးနှင်းတောင်ကြီး၏ လမ်းခုလတ်နေရာ၌ ကိုယ်တိုင်ရင်ဆိုင်ကြုံတွေ့ခဲ့ဖူးသော ထိုဧရာမလင်းတဆိုးကြီးများသာ ဖြစ်ကြပေသည်။

ဤလင်းတဆိုးကြီးများသည် လက်ရှိခေတ်ကာလတွင် အကြီးဆုံး ပျံသန်းနိုင်စွမ်းရှိသည့် ငှက်ဆိုးကြီးများ ဖြစ်ကြသည်မှာ မှန်သော်လည်း ၎င်းတို့အနေဖြင့် မြေပြင်ပေါ်မှနေ၍ လေထုထဲသို့ တိုက်ရိုက်ပင် အရှိန်ဖြင့် ပျံသန်းထွက်ခွာနိုင်စွမ်းမျိုး လုံးဝ ရှိမနေကြပါပေ။

အကြောင်းမှာ ၎င်းတို့၏ အတောင်ပံကြီးများထံမှ ထွက်ပေါ်လာသော ပင့်တင်ခွန်အား ပမာဏမှာ ၎င်းတို့၏ ကြီးမားလှသော ခန္ဓာကိုယ် အလေးချိန်ဒဏ်ကို ဘယ်လိုမှပင့် မတင်နိုင်ကြသောကြောင့် ဖြစ်ပေသည်။

ထို့ကြောင့် ၎င်းတို့အနေဖြင့် လေထုထဲသို့ ပျံသန်းနိုင်ရန်အတွက်မူ သေချာပေါက် မြင့်မားလှသော ကုန်းမြင့်ဒေသ တစ်နေရာဆီသို့ အရင်ဆုံး ပင်ပန်းခံတွားတက်ကြရလေ့ရှိခြင်းဖြစ်ပြီး ၎င်းနောက် မြင့်မားလှသော အမြင့်ပေ အခြေအနေနှင့် လေထုထဲက လေစီးကြောင်းများ၏ တွန်းကန်မှုဒဏ်ကို အပြည့်အဝ အသုံးချလိုက်မှသာ လျှင် လေထုထဲသို့ ဘေးကင်းစွာဖြင့် စတင်၍ ပျံသန်းလှုပ်ရှားနိုင်ကြခြင်း ဖြစ်ပေသည်။

သို့သော်လည်း လွန်ခဲ့သည့် နှစ်ပေါင်းသန်းပေါင်းများစွာ သို့မဟုတ် ကုဋေပေါင်းများစွာ ခေတ်ကာလတုန်းက ကမ္ဘာမြေပြင်ပေါ်၌ တကယ့်ကို ကြီးစိုးရှင်သန်ခဲ့ကြဖူးသော ဤကမ္ဘာဦး ရှူးပျံကြီးများ၏ အခြေခံ ခန္ဓာကိုယ် အရွယ်အစား ပမာဏမှာမူ လက်ရှိခေတ်က လင်းတဆိုးကြီးများထက်စာလျှင် များစွာ ပို၍ ကြီးမားလွန်းလှသည်မှာ အမှန်ပင်ဖြစ်သော်လည်း ဤမျှအထိ ကြီးမားလှသော သတ္တဝါကြီးများ ဖြစ်ကြသည့်တိုင်အောင် ၎င်းတို့ လေထုထဲသို့ ပျံသန်းနိုင်ရန်အတွက်မူ ဤကဲ့သို့ ခက်ခဲသည့် လုပ်ငန်းစဉ်မျိုးကို လုံးဝ လုပ်ဆောင်နေဖို့ လိုအပ်ခြင်း မရှိကြပါပေ။

ကမ္ဘာဦးခေတ်ကာလတုန်းက ကောင်းကင်ပြင်ကြီးတစ်ခုလုံးကို အပိုင်စီးလျက် အပြည့်အဝ အုပ်စိုးခဲ့ကြဖူးသော ဤကောင်းကင်ယံထက်က ဘုရင်ကြီးများထံ၌မူ သူတို့ကိုယ်ပိုင် ထူးခြားဆန်းပြားလှသော ပျံသန်းခြင်း အတတ်ပညာ စွမ်းရည်များစွာ ရှိနှင့်နေခဲ့ပြီးသား ဖြစ်ပေသည်။

၎င်းမှာ မြေပြင်ပေါ်မှနေ၍ တိုက်ရိုက် ခုန်ပျံတက်ခြင်း ဖြစ်ပေသည်။

၎င်းတို့သည် မိမိတို့၏ အတောင်ပံကြီးများနှင့် တိုက်ရိုက်ဆက်စပ်နေခဲ့ကြသည့် သန်မာလှသည့် ရှေ့ခြေနှစ်ဖက်ကြီးကို အပြည့်အဝ အသုံးချလိုက်ခြင်း ဖြစ်ပြီး မြေပြင်ပေါ်သို့ ပြင်းထန်စွာ အားပြုလျက် ခန္ဓာကိုယ်ကြီးကို အထက်မျက်နှာစာဆီသို့ ဒုန်းခနဲ ပြင်းထန်စွာ ကန်ကျောက်ကာလှမ်းပျံလိုက်ခြင်း ဖြစ်ပေသည်။

ဤကဲ့သို့ ပျံလိုက်ခြင်း အရှိန်အဟုန်ကြောင့် ၎င်းတို့၏ ခန္ဓာကိုယ်အား လေထုထဲသို့ ပျံသန်းနိုင်စွမ်းရှိမည့် အမြင့်ပေ ပမာဏနှင့် လျင်မြန်လှသော စတင်ပျံသန်းမှု အရှိန်အဟုန်ကောင်းကို အလွယ်တကူ ပေးစွမ်းနိုင်ခြင်း ဖြစ်ပေရာ ထို့ကြောင့်သာ ကောင်းကင်ယံထက်ဆီသို့ တိုက်ရိုက်ပင် လွတ်လပ်စွာဖြင့် အဆက်မပြတ် ပျံသန်းအုပ်စိုးနိုင်ကြခြင်း ဖြစ်ပေသည်။

ယခုအခါတွင်မူ ဤဧရာမရှူးပျံရုပ်တုကြီး နှစ်ခုစလုံးမှာလည်း ၎င်းကဲ့သို့ပင် မြေပြင်ပေါ်မှနေ၍ လေထုထဲသို့ တိုက်ရိုက်ပင် ခုန်ပျံတက်တော့မည့် အန္တရာယ်ရှိလှသော ပုံသဏ္ဌာန်မျိုးကို အသေအချာ ထုတ်ဖော်ပြသလာခဲ့ကြခြင်း ဖြစ်ပေသည်။

ငွေရောင်ဘုရင်နှင့် မီမီတို့မှာမူ သဘာဝ သားရဲကြီးများ၏ အာရုံခံစားမှုများအရ အခြေအနေများကို အလိုအလျောက် ကြိုတင်ရိပ်မိပုံရပြီး ခန္ဓာကိုယ်များကို နောက်ဘက်ဆီသို့ ခြေလှမ်းနှစ်လှမ်းခန့် ချက်ချင်းပင် သတိကြီးစွာဖြင့် ပြန်လည်ဆုတ်ခွာလိုက်ကြပေသည်။

လုဖေးအာကဲ့သို့ပင် ၎င်းတို့ သားရဲဆိုးကြီးနှစ်ကောင်စလုံးသည်လည်း ရှေ့မှောက်က ဧရာမရှူးပျံရုပ်တုကြီးနှစ်ခုထံမှ ထွက်ပေါ်နေသော ပြင်းထန်လှသော ဖိအားကြီးကြောင့် စိတ်ထဲ၌ အလွန် ကြောက်ရွံ့ထိတ်လန့်မိနေကြဆဲ ဖြစ်ကြောင်း လုံးဝ ထင်ရှားလှပေသည်။

၎င်းတို့ ခံစားနေရတဲ့ တုန်လှုပ်မှုကတော့ အဆင့်မြင့် ဗီဇပြောင်းသတ္တဝါကြီးများထံမှ ထွက်ပေါ်လေ့ရှိတဲ့ ထူးခြားလှတဲ့ သွေးမျိုးဆက်ဖိနှိပ်ချုပ်ချယ်မှု ဒဏ်ကြောင့် စိတ်ထဲကနေ အလိုအလျောက် ဦးညွှတ်မိနေကြခြင်း ဖြစ်ပေသည်။

၎င်းတို့သည် ယခင်က မိမိတို့ထက် များစွာ ပိုမိုလှသော ထိုဧရာမ မြွေနဂါးဆိုးကြီးနှင့် တိုက်ရိုက် ရင်ဆိုင်ကြုံတွေ့ခဲ့ရစဉ်တုန်းကပင် စိတ်ထဲ၌ ဤမျှအထိ ကြီးမားလှသော ကြောက်ရွံ့ထိတ်လန့်မှုမျိုး လုံးဝ ရှိမနေခဲ့ကြပါချေ။

ယခုအခါ သူတို့ရှေ့က ဧရာမရှူးပျံရုပ်တုကြီးများနှင့် ရင်ဆိုင်လိုက်ရသည့် အခါ၌မူ ခန္ဓာကိုယ်များပါ အလိုအလျောက် တုန်လှုပ်ချောက်ချားနေခဲ့ကြရခြင်း ဖြစ်ပေသည်။

ဤသွေးရောင်မျဉ်း ဗီဇပြောင်းလဲမှုများထံမှ ထွက်ပေါ်လာသော သွေးမျိုးဆက် ဖိနှိပ်ချုပ်ချယ်မှု အထူးစွမ်းရည် သက်ရောက်မှုမှာမူ ၎င်းတို့ ကြိုတင်တွက်ချက်ထားခဲ့သည်ထက် များစွာ ပို၍ ပြင်းထန်လွန်းလှသည်မှာ တကယ့်ကို အမှန်ပင် ဖြစ်ပေသည်။

သို့သော်လည်း ၎င်းတို့ သားရဲကြီးနှစ်ကောင်စလုံးသည် မိမိတို့၏ ကိုယ်ပိုင်တိုက်ခိုက်ရေး စွမ်းရည်နှင့် စိတ်ဓာတ်ပိုင်းဆိုင်ရာ ကြံ့ခိုင်မှုအားလုံးကိုတော့ အပြည့်အဝ ဆုံးရှုံးသွားခြင်းမျိုး လုံးဝ မရှိကြသေးပါပေ။

၎င်းတို့သည် ခန္ဓာကိုယ်များကို နောက်ဘက်ဆီသို့ ခြေလှမ်းအနည်းငယ်ခန့် ဆုတ်ခွာလိုက်ကြသည်မှာ မှန်သော်လည်း ငွေရောင်ဘုရင်သည် မိမိ၏ ထက်မြက်လှသော သွားကြီးများကို အပြင်သို့ ထုတ်လျက် နှုတ်မှလည်း တုန်ခါလှသော ဟိန်းဟောက်သံများဖြင့် အဆက်မပြတ် အော်ဟစ်နေခဲ့သလို မီမီသည်လည်း မိမိ၏ ကျောပြင်ကြီးကို အထက်သို့ ပင့်လျက် တစ်ကိုယ်လုံးက အမွေးအမှင်များကိုပါ ထောင်ထစေကာ ရန်သူများအပေါ် စိန်ခေါ်လိုသည့် အမူအရာများဖြင့် လှမ်း၍ ရန်လိုပြနေခဲ့ရှာပေသည်။

ဤသားရဲကြီး နှစ်ကောင်စလုံးမှာမူ ၎င်းတို့၏ သွေးမျိုးဆက်ဖိနှိပ်မှုကြောင့် ထွက်ပေါ်လာသော ကြောက်ရွံ့မှု အားလုံးကို မိမိတို့၏ ကိုယ်ပိုင်စိတ်ဓာတ်ဖြင့် အပြည့်အဝ အသည်းအသန် ပြန်လည်ခုခံနေကြခြင်း ဖြစ်ပေသည်။

မည်သို့ပင်ဆိုစေ ၎င်းတို့သည် ယခင်က ဤရှူးပျံကြီးများထက် အဆပေါင်း ပို၍ ကြီးမားလွန်းလှသော ထိုဧရာမ မြွေနဂါးဆိုးကြီးကို ကိုယ်တိုင် မြင်တွေ့ဖူးခဲ့ကြပြီးသား ဖြစ်ပေသည်။

ထို့ကြောင့် ၎င်းနှင့် နှိုင်းယှဉ်ကြည့်မည်ဆိုပါက လက်ရှိ ရှေ့က အဆင့်မြင့် ဗီဇပြောင်းသတ္တဝါကြီးများထံမှ ထွက်ပေါ်လာသော ကြောက်ရွံ့မှု ပမာဏမှာမူ ၎င်းတို့အတွက်တော့ များစွာ ပို၍ လျော့နည်းသက်သာနေဆဲ ဖြစ်သောကြောင့် ဖြစ်၏။

အားလုံး၏ စိတ်အာရုံကြောများမှာလည်း တစ်ခဏချင်းအတွင်း တကယ့်ကို အမြင့်ဆုံး အခြေအနေသို့ တင်းကြပ်စွာ ရောက်ရှိသွားခဲ့ရပေသည်။

သို့သော်လည်း ဤပတ်ဝန်းကျင်၌ ရှိနေကြသော လူရော သားရဲ အားလုံး၏ စိုးရိမ်တကြီး စူးစိုက်ကြည့်ရှုခြင်း ကို အပြည့်အဝ ဆွဲဆောင်မိသွားခဲ့ပြီးနောက်ပိုင်းတွင်မူ ထိုဧရာမရှူးပျံရုပ်တုကြီး နှစ်ခုစလုံးမှာမူ တစ်ခဏချင်းအတွင်းမှာတင် နောက်တစ်ကြိမ် ထပ်မံ၍ လုံးဝ ငြိမ်သက်သွားခဲ့ကြပြန်ချေပြီ။

ထိုရုပ်တုကြီးများမှာ သေးငယ်လှသည့် မည်သည့်လှုပ်ရှားမှုမျိုးကိုမှ ထပ်မံ၍ ပြုလုပ်ခြင်း မရှိကြတော့ဘဲ ပတ်ဝန်းကျင်တစ်ခုလုံးကို နောက်တစ်ကြိမ် ထပ်မံ၍ တိတ်ဆိတ်ငြိမ်သက်ခြင်း အခြေအနေဆီသို့ အပြည့်အဝ ရောက်ရှိသွားစေခဲ့ပြန်သည်။

ဤကဲ့သို့သော ထူးဆန်းလှသည့် တုံ့ပြန်မှု ဖြစ်စဉ်ကြီးကြောင့် ဤနေရာ၌ ရှိနေကြသော လူတိုင်းကို စိတ်ထဲ၌ များစွာ ဇဝေဇဝါ ဖြစ်သွားစေခဲ့၏။

"ဒါက ဘာဖြစ်လို့လဲ... သူတို့တွေက ဘာဖြစ်လို့ ထပ်ပြီး လှုပ်ရှားမလာကြတော့တာလဲ"

ရွှီရှင်းသည် မိမိကိုယ်မိမိ စိတ်ထဲ၌ တိုးညှင်းစွာဖြင့် ရေရွတ်လိုက်မိပေသည်။

"မဖြစ်နိုင်တာ... သူတို့က ငါတို့ကို စိတ်ထဲကနေပြီးတော့ သက်သက် လာပြီး ခြိမ်းခြောက်လိုက်တာများလား မသိဘူး။အစောကတင်ပဲ အော်ဟစ်နေပြီး အခုကျတော့ ဘာဖြစ်လို့ လှုပ်ရှားမှုတွေ လုံးဝ ရပ်တန့်သွားကြပြန်တာလဲ"

လုဖေးအာသည် စိတ်ထဲ၌ တကယ့်ကို မတတ်သာလှစွာဖြင့်ရေရွတ်လိုက်မိသော်လည်း ၎င်းနှင့်အတူ စိတ်ထဲ၌လည်း အတိုင်းအတာတစ်ခုအထိ

စိတ်အေးသက်သာသွားခဲ့ရရှာပေသည်။

"မဟုတ်သေးဘူး။အခြေအနေက သေချာပေါက် လုံးဝ မရိုးရှင်းတော့ဘူး"

ကျိချောင်းယန်၏ မျက်စိသူငယ်အိမ်များမှာ တစ်ခဏချင်းအတွင်း ပြင်းထန်စွာ ကျုံ့သွားခဲ့ရပေသည်။

အမှန်ပင် ဖြစ်၏၊ ဧရာမမြေကျင်းကြီး၏ အတွင်းပိုင်းနယ်ပယ်ထဲတွင်မူ တကယ့်ကို ပြင်းထန်လှသော အလှည့်အပြောင်းသစ်တစ်ခု ရုတ်တရက် ထပ်မံဖြစ်ပေါ်လာခဲ့ချေပြီ။

မြေကျင်းကြီး၏ အတွင်းပိုင်း၌ ဝပ်စင်းနေခဲ့ကြဆဲဖြစ်သော ထိုအလယ်အလတ်အဆင့် ဗီဇပြောင်းသတ္တဝါ ရုပ်တုကြီး အားလုံးမှာမူ ခဏအတွင်းမှာတင် အားလုံး ပြိုင်တူ စတင်၍ လှုပ်ရှားလာခဲ့ကြခြင်း ဖြစ်ပေသည်

၎င်းတို့အားလုံး မြေပြင်ပေါ်မှနေ၍ ဖြည်းည်းချင်း မတ်တပ်ထရပ်လိုက်ကြပြီး ၎င်းတို့၏ ကျောက်သားခန္ဓာကိုယ်ကြီးများကို လှည့်လိုက်ကြကာ ရွှီရှင်းနှင့် သူ၏ အဖွဲ့သားများ ရှိနေကြသော နေရာဆီသို့ တည့်တည့်မတ်မတ် မျက်နှာမူလျက် စိုက်ကြည့်လိုက်ကြပေသည်။

နေရာအနှံ့အပြားတွင် ရှိနေကြသော သွေးနီရောင် တောက်ပလှသည့် မျက်လုံးများ မှာ လက်ရှိအချိန်၌ ဤနေရာက ရှင်ကျန်သူ လူသားအားလုံးကို တစ်ခဏချင်းအတွင်း အစိမ်းလိုက် ဝါးမြိုဖျက်ဆီးပစ်တော့မည့်အလား တကယ့်ကို ထိတ်လန့်ဖွယ် ကောင်းလှပေသည်။

ထိုဧရာမရှူးပျံရုပ်တုကြီးနှစ်ခု၏ လှုပ်ရှားမှုများမှာ လုံးဝ ရပ်တန့်သွားခဲ့ရသည်မှာ မှန်သော်လည်း အလယ်အလတ်အဆင့် ဗီဇပြောင်းသတ္တဝါ ရုပ်တုအုပ်စုကြီးတစ်ခုလုံးမှာမူ ယခုအခါ တကယ်ကြီး အသက်ဝင်လှုပ်ရှားလာခဲ့ကြပြီ ဖြစ်ပေသည်။

ဖြစ်နိုင်တာကတော့ ဤကိစ္စရပ်များအားလုံးသည် လွန်ခဲ့သည့်ခဏတုန်းက ထိုရှူးပျံကြီး၏ ပြင်းထန်လှသော အော်ဟစ်သံကြောင့် သွားရောက်လှုံ့ဆော်မိသလိုမျိုး ဖြစ်သွားခဲ့ခြင်းကြောင့်လား မသိပါချေ။

ဤကျောက်ဆစ်ရုပ်တုကြီးများသည် လွန်ခဲ့သည့်အချိန်တုန်းက အဆင့်နိမ့် ဗီဇပြောင်းသတ္တဝါ ရုပ်တုအုပ်စုကြီးကဲ့သို့ စည်းစနစ်မရှိပါဘဲ မိမိတို့ရှိရာဆီသို့ ရူးသွပ်မတတ် တစ်ရှိန်ထိုး စုပြုံပြေးလွှားလာကြခြင်းမျိုး လုံးဝ မပြုလုပ်ကြပါပေ။

၎င်းတို့သည် မူလက တောအုပ်အတွင်း၌ လူစုခွဲလျက် အဝိုင်းငယ်လေးတစ်ခုအဖြစ်သာ စနစ်တကျ ရှိနေခဲ့ကြခြင်း ဖြစ်သော်လည်း ယခုအခါတွင်မူ ၎င်းတို့အားလုံးမှာ တကယ့်ကို စနစ်တကျရှိလှသော စစ်တပ်ကြီးတစ်ခုအလား စည်းကမ်း ကြီးစွာဖြင့် တစ်နေရာတည်း၌ အပြည့်အဝ စတင်၍ စုစည်းလာခဲ့ကြခြင်း ဖြစ်ပေသည်။

၎င်းတို့၏ အပြုအမူများကို ကြည့်ရသလောက် စုစည်းလို့ ပြီးဆုံးသွားခဲ့ပြီးသည်နှင့်တစ်ပြိုင်နက် ရွှီရှင်းနှင့် သူ၏ အဖွဲ့သားများ ရှိနေကြသော နေရာဆီသို့ ပြင်းထန်လှသော တိုက်ခိုက်မှုကြီးတစ်ခုကို စနစ်တကျ စတင်၍ ဆင်နွှဲလာကြတော့မည့် ပုံစံမျိုး ဖြစ်ပေသည်။

တကယ့် အဖွဲ့အစည်းတစ်ခုလို စည်းစနစ် ရှိလှပြီး စည်းကမ်း ကြီးမားလှပေ၏။

ဤကဲ့သို့ စနစ်တကျရှိလှတဲ့ စစ်တပ်အလား ပြင်ဆင်မှု မြင်ကွင်းမျိုးကိုတော့ သူတို့အားလုံး ယခင်က သားရဲလှိုင်းကြီးနှင့် ကိုယ်တိုင် ရင်ဆိုင်ကြုံတွေ့ခဲ့ရစဉ်တုန်းကလည်း သေသေချာချာ မြင်တွေ့ဖူးခဲ့ကြပြီးသား ဖြစ်ပေသည်။

ယခုတစ်ကြိမ် တိုက်ခိုက်လာကြမည့် အလယ်အလတ်အဆင့် ဗီဇပြောင်းသတ္တဝါ ရုပ်တုကြီးများ၏တိုက်ခိုက်ရေး စွမ်းရည် ပမာဏမှာမူ လွန်ခဲ့သည့်အချိန်က အဆင့်နိမ့် ရုပ်တုအုပ်စုကြီးထက်စာလျှင် သေချာပေါက် အဆင့်အတန်းတစ်ခုခန့် ပိုမိုမြင့်မားနေလိမ့်မည် ဖြစ်ကြောင်း မြေကြီးလက်ခတ်မလွဲနိုင်ချေ။

သို့သော်လည်း ယခုတစ်ကြိမ်တွင်မူ ၎င်းတို့ငါးဦးတည်းသာ ဤကြောက်မက်ဖွယ်ကောင်းလှသော ကျောက်ဆစ်ရုပ်တုအုပ်စုကြီးကို အသည်းအသန် ရင်ဆိုင်တိုက်ခိုက်ကြရမှာမျိုးလုံး၀မဟုတ်ပါချေ။

ဒါပေမယ့် ဝမ်ကွေ့ရှင်းနှင့် အခြားလူများမှာ အခု ဘယ်နေရာကို ရောက်နေကြလဲမသိချေ။

သူတို့တွေက လက်ရှိအချိန်အထိ ဒီဖက်နယ်မြေဆီသို့ အမြန်ဆုံး ကူးပြောင်းရောက်ရှိလာခြင်းမျိုး လုံးဝ မရှိကြသေးချေ။

ရွှီရှင်း၏ စိတ်ထဲက မျှော်လင့်တောင့်တတဲ့ သတင်းစကားကို စနစ်က တိုက်ရိုက်ပင် ပြန်လည်တုံ့ပြန်လိုက်သည့်အလား ကွက်တိပင် ထိုခဏ၌ ဧရာမမြေကျင်းကြီး၏ အောက်ခြေမြေပြင်ပေါ်၌ တည်ရှိနေကြသော ထိုခရမ်းနက်ရောင် မှော်မျဉ်းကြောင်း အားလုံးထံမှနေ၍ ရုတ်တရက် စူးရှတောက်ပလှသော အလင်းတန်းကြီးတစ်ခု ထွက်ပေါ်လာတော့၏။

မြေကျင်းကြီး၏ အောက်ခြေ မြေပြင်နယ်ပယ်တစ်ခုလုံးမှာမူ တစ်ခဏချင်းအတွင်း လုံးဝ လင်းထိန်သွားခဲ့ရချေပြီ။

ထိုထွက်ပေါ်လာသော မှော်အလင်းတန်းကြီး၏ စူးရှလွန်းလှသော ဒဏ်ကြောင့် ၎င်းတို့အားလုံးမှာ မိမိတို့၏ မျက်လုံးများကို မထိန်းနိုင်ဘဲ မသိမသာ မှိတ်လိုက်ကြရပြီး မိမိတို့၏ ခေါင်းများကိုပါ ဘေးဖက်သို့ အမြန်ဆုံး လွှဲဖယ်လိုက်ကြမိပေသည်။

သို့မှသာလျှင် စူးရှလှသော အလင်းတန်းကြီး၏ ရိုက်ခတ်မှုဘေးမှ သေသေချာချာ ရှောင်တိမ်းနိုင်ကြမည် ဖြစ်သောကြောင့် ဖြစ်ပေသည်။

နောက်ဆုံးတော့ သူတို့တွေ တကယ်ကြီး ရောက်ရှိလာခဲ့ကြပြီ ဖြစ်လေသည်။

အခန်း ( ၅၁၉ ပြီး။