အခန်း ၉၀၃

အခန်း (၉၀၃) - အစစ်အမှန်ဝိညာဉ်များ သန်မာရခြင်း၏ လျှို့ဝှက်ချက်၊ အင်မော်တယ်သလင်းကျောက် တစ်သိန်းရရှိခြင်း (၃)

"ဒါကို ခြင်နက်မျိုးနွယ်စုရဲ့ အစွမ်းလို့ပဲ ပြောလို့မရဘူး... ကြယ်ကွဲပင်လယ်ပြင်ကြီးက အရမ်းချမ်းသာလွန်းလို့လို့ ပြောရမယ်..."

"အတိုင်းအဆမဲ့ ကျယ်ပြောလှတဲ့ ပင်လယ်ပြင်ကြီးထဲမှာ ရှားပါးပစ္စည်းတွေ ဘယ်လောက်တောင် ရှိနေမလဲ မသိနိုင်ဘူး..."

"ငါတို့နေထိုင်တဲ့ နေရာထက် ဘယ်လောက်တောင် အဆပေါင်းများစွာပိုပြီး ချမ်းသာကြွယ်ဝလဲ မသိရဘူး..."

"တစ်နည်းအားဖြင့် ပြောရရင် ခြင်နက်မျိုးနွယ်စုက ချမ်းသာတာ မဟုတ်ဘူး... ငါတို့လူသားမျိုးနွယ်ကိုက အရမ်းဆင်းရဲလွန်းနေတာ..."

ဟွားစစ်ချင်က သက်ပြင်းချရင်း ပြောလိုက်၏။

ဤသည်မှာလည်း မတတ်နိုင်သော ကိစ္စတစ်ခုပင် ဖြစ်ပေသည်။

လူသားမျိုးနွယ်မှာ အားနည်းလွန်းသဖြင့် ဝေးလံခေါင်သီပြီး ခြောက်သွေ့ဆိတ်သုဉ်းသော နေရာများကိုသာ သိမ်းပိုက်ခွင့် ရရှိကြသည်။ ထိုနေရာများ၌ မည်သည့်အရင်းအမြစ်မှ မရှိဘဲ ဝိညာဉ်ကြောအနည်းငယ်သာ ရှိသည်။

ရှားပါးသတ္တုကြောများအကြောင်းကိုမူ တွေးပင်မတွေးဝံ့ချေ။

ထိုကဲ့သို့သော ရှားပါးသတ္တုကြောများ ပေါ်ထွက်လာပါကလည်း အင်အားကြီးမျိုးနွယ်စုကြီးများကသာ သိမ်းပိုက်သွားကြမည်ဖြစ်ပြီး လူသားမျိုးနွယ်အတွက် အလှည့်ကျလိမ့်မည် မဟုတ်ချေ။

အကယ်၍ အတင်းအကြပ် သိမ်းပိုက်ရန် ကြိုးစားပါကလည်း လူသားမျိုးနွယ်အတွက် ကပ်ဘေးဆိုးကြီးကိုသာ ဖိတ်ခေါ်ရာရောက်ပေလိမ့်မည်။

ထို့ကြောင့်ပင် လူသားမျိုးနွယ်သည် အလွန်အမင်း ဆင်းရဲမွဲတေနေပြီး ပျံသန်းရေးသင်္ဘောများကိုပင် များစွာ မသွန်းလုပ်နိုင်ကြချေ။

"တကယ်တော့ ယောက်ျား စိုးရိမ်နေတဲ့ အချက်က လုံးဝ ပြဿနာမဟုတ်ဘူး..."

"ကျွန်မတို့ ဖုန်းရှီးမြို့တော်မှာလည်း တော်တော်လေး ထူးချွန်တဲ့ လက်နက်သွန်းလုပ်သူတွေ အများကြီး ရှိတာပဲ..."

"ဒီခြင်နက်မျိုးနွယ်စုရဲ့ ပျံသန်းရေးသင်္ဘောတွေကို အစိတ်အပိုင်းတွေအဖြစ် လုံးဝ ဖြုတ်ချလိုက်လို့ ရတယ်..."

"ပြီးတော့မှ ပျံသန်းရေးသင်္ဘောအသစ်အဖြစ် ပြန်လည် တပ်ဆင်လိုက်လို့ ရတာပဲ..."

"ဒီလိုဆိုရင် ပျံသန်းရေးသင်္ဘောတွေပေါ်က အမှတ်အသားတွေကို လုံးဝ ဖျက်ဆီးပစ်နိုင်ပြီး ခြင်နက်မျိုးနွယ်စုက ရိပ်မိသွားမှာကိုလည်း ကာကွယ်နိုင်လိမ့်မယ်..."

ထောင်ချီလီက သင့်လျော်ကောင်းမွန်သော ဖြေရှင်းနည်းတစ်ခုကို တင်ပြလိုက်၏။

"မဆိုးဘူး... ဒါကလည်း တကယ့်ကို နည်းလမ်းကောင်းတစ်ခုပဲ..."

ဤစကားကို ကြားသောအခါ ကျိုးစွေ့က ခေါင်းညိတ်လိုက်ပြီး ဤအချက်ကို သဘောတူလိုက်လေသည်။

ဤပျံသန်းရေးသင်္ဘောများကို သန့်စင်အောင် ပြုလုပ်နိုင်ပြီး ပေါ်တင် အသုံးပြုနိုင်သရွေ့ မည်သည့်ပြဿနာမျှ ရှိလိမ့်မည် မဟုတ်ပေ။

"ပျံသန်းရေးသင်္ဘောတွေအပြင် အဆင့်မြင့်ဝိညာဉ်ရတနာတွေလည်း အများကြီး ရခဲ့သေးတယ်..."

"အထွတ်အထိပ်အဆင့် ဝိညာဉ်ရတနာ တစ်ခု... အလယ်အလတ်အဆင့် ဝိညာဉ်ရတနာ သုံးရာနဲ့ အဆင့်နိမ့်ဝိညာဉ်ရတနာ တစ်ထောင်..."

ကျိုးစွေ့က လက်ဝှေ့ယမ်းလိုက်ပြီး ခြင်နက်မျိုးနွယ်စု ကျင့်ကြံသူများ၏ သိုလှောင်အိတ်များကို ဖွင့်ကာ အကုန်လုံးကို ထုတ်ယူလိုက်၏။

မြေပြင်ပေါ်တွင် ဝိညာဉ်ရတနာများ ပြန့်ကျဲနေပြီး ရတနာအလင်းတန်းများမှာ တောက်ပလွန်းလှသည်။

အတိတ်ကာလ ကျင့်ကြံခြင်းလောက၌ ဝိညာဉ်ရတနာ အနည်းငယ်သာ ရှိခဲ့ခြင်းမှာ ကျင့်ကြံခြင်းလောကက အလွန်ဆင်းရဲမွဲတေပြီး ပဉ္စမအဆင့်၊ ဆဋ္ဌမအဆင့်၊ သတ္တမအဆင့်ပစ္စည်းများ ကင်းမဲ့နေသောကြောင့် ဖြစ်၏။

ထိုပစ္စည်းများ မရှိသကဲ့သို့ ဝိညာဉ်ရတနာများကို သွန်းလုပ်ရန် နည်းလမ်းများလည်း မရှိသဖြင့် သဘာဝကျကျပင် အလွန်တရာ ရှားပါးလှပေသည်။

သို့သော် ဝိညာဉ်လောကကြီးမှာမူ မတူညီပေ။

အရင်းအမြစ်များ ကြွယ်ဝလှသကဲ့သို့ မှော်ရတနာများ သွန်းလုပ်သည့် နည်းလမ်းများလည်း ကင်းမဲ့ခြင်းမရှိသဖြင့် ဝိညာဉ်ရတနာများကို နေရာအနှံ့အပြားတွင် တွေ့မြင်နိုင်သည်။

ထိုအရာများသည် ကျင့်ကြံသူများ၏ ပုံမှန်အသုံးပြုသည့် လက်နက်များပင် ဖြစ်လာခဲ့ကြပြီ ဖြစ်၏။

တစ်ခုတည်းသော ကင်းမဲ့နေသည့်အရာမှာ ရွှမ်ထျန်းရတနာ သို့မဟုတ် အင်မော်တယ်ရတနာများ ဖြစ်သည်။

အဘယ်ကြောင့်ဆိုသော် ထိုကဲ့သို့သော အဆင့်အတန်းရှိသည့် မှော်ရတနာများကို အင်မော်တယ်လောက၌သာ သွန်းလုပ်နိုင်ပြီး ဝိညာဉ်လောကတွင်မူ အင်မော်တယ်ရတနာများ သွန်းလုပ်ရန် ပစ္စည်းများနှင့် နည်းလမ်းများ လုံးဝ မရှိသောကြောင့် ဖြစ်၏။

များစွာသော အင်မော်တယ်ရတနာများသည် အမှန်တကယ်တမ်းတွင် အင်မော်တယ်လောကမှ သယ်ဆောင်လာခဲ့ကြခြင်း ဖြစ်ပေသည်။

"အရမ်းချမ်းသာတာပဲ..."

"ကြယ်ကွဲပင်လယ်ပြင်က မျိုးနွယ်စု ဆိုတဲ့အတိုင်းပါပဲ... လူတိုင်းက ဝိညာဉ်ရတနာ တစ်ခုစီကို ကိုင်ဆောင်ထားနိုင်ကြတယ်..."

ဟွားစစ်ချင်က တအံ့တဩ ချီးမွမ်းလိုက်၏။

ကြယ်ကွဲပင်လယ်ပြင်ကြီးသည် ကောလာဟလများအတိုင်း အရင်းအမြစ်များ အလွန်တရာ ကြွယ်ဝလှသည်ဟုသာ ဆိုရပေမည်။

အခြေခံအားဖြင့် လုံလောက်သော စွမ်းအားရှိသရွေ့ အရင်းအမြစ်မြောက်မြားစွာကို သိမ်းပိုက်နိုင်ပြီး လျင်မြန်စွာ ကြီးထွားဖွံ့ဖြိုးလာနိုင်သည်။

သို့သော် အားနည်းသော မျိုးနွယ်စုများမှာမူ တစ်နေရာရာတွင် ခိုအောင်းနေရပြီး ဆင်းရဲမွဲတေမှုကို ခံစားနေရမည်သာ ဖြစ်သည်။

ကြယ်ကွဲပင်လယ်ပြင်၏ အရင်းအမြစ်များမှာလည်း ထိုသူများနှင့် မည်သို့မျှ သက်ဆိုင်လိမ့်မည် မဟုတ်ပေ။

ခြင်နက်မျိုးနွယ်စုမှာမူ သံသယဖြစ်ဖွယ်မရှိဘဲ အင်အားကြီးမျိုးနွယ်စုကြီးတစ်ခု ဖြစ်ပြီး ၎င်းတို့မျိုးနွယ်စုအတွင်း၌ မဟာယာနအဆင့် ကျင့်ကြံသူ အယောက်နှစ်ဆယ်ကျော် ရှိပေသည်။

လူသားမျိုးနွယ်ထက် မည်မျှပင် သန်မာသည်ကို မသိနိုင်ချေ။

ထို့ကြောင့် ၎င်းတို့၏ ချမ်းသာကြွယ်ဝမှုမှာ လူသားမျိုးနွယ်နှင့် ယှဉ်ပြိုင်နိုင်စရာ မရှိချေ။

ခြင်နက်မျိုးနွယ်စု၏ သင်္ဘောအုပ်စုတစ်စုကို လုယက်ရုံနှင့်ပင် မမျှော်လင့်ထားသော ရတနာပုံကြီးကို ရရှိနိုင်ပေသည်။

"အိုး... အင်မော်တယ်သလင်းကျောက်တွေလည်း အများကြီး ရခဲ့တာပဲ..."

"တကယ့်ကို လွန်လွန်းတယ်... စုစုပေါင်း အင်မော်တယ်သလင်းကျောက် တစ်သိန်းနှစ်သောင်းရှစ်ထောင်တောင် ရှိတာပဲ..."

ကျိုးစွေ့က မျက်တောင်တခတ်ခတ်ဖြင့် အံ့ဩသွားရ၏။

သူကိုယ်တိုင်လည်း အလွန်အံ့အားသင့်သွားပြီး ဤမျှများပြားသော အင်မော်တယ်သလင်းကျောက်များကို ရရှိလိမ့်မည်ဟု မထင်မှတ်ထားခဲ့သဖြင့် တစ်ညတည်းနှင့် ချမ်းသာကြွယ်ဝသွားခဲ့ရလေသည်။

သာမန် ခန္ဓာပေါင်းစည်းခြင်းအဆင့် ကျင့်ကြံသူတစ်ဦးသည် ဤမျှများပြားသော အင်မော်တယ်သလင်းကျောက်များကို ပိုင်ဆိုင်ရန် မဖြစ်နိုင်ပေ။

ဤမျှများပြားစွာ ရရှိခဲ့ရခြင်းမှာ သဘာဝကျကျပင် သူ သတ်ဖြတ်ခဲ့သော ခြင်နက်မျိုးနွယ်စုကျင့်ကြံသူ အရေအတွက် အလွန်များပြားခဲ့သောကြောင့် ဖြစ်၏။

ထိုလေဟာနယ်သန့်စင်ခြင်းအဆင့် ကျင့်ကြံသူများ၏ ကိုယ်ပေါ်ရှိ အင်မော်တယ်သလင်းကျောက်များမှာ များစွာမလိုအပ်ဘဲ တစ်ဦးလျှင် တစ်ရာခန့်စီ ရှိကြရာ အားလုံးပေါင်းလိုက်လျှင် အင်မော်တယ်သလင်းကျောက် တစ်သိန်းကျော်သွားခဲ့သဖြင့် ယခုတစ်ကြိမ်တွင် အင်မော်တယ်သလင်းကျောက် အမြောက်အမြားကို သဘာဝကျကျ ရရှိခဲ့ခြင်း ဖြစ်ပေသည်။

အမှန်တကယ်ပင် နေ့ချင်းညချင်း ချမ်းသာကြွယ်ဝသွားခဲ့ခြင်း ဖြစ်၏။

တစ်နည်းအားဖြင့် ဆိုရသော် သူသည် ယခုအခါ ခြင်နက်မျိုးနွယ်စု၏ လေဟာနယ်သန့်စင်ခြင်းအဆင့် ကျင့်ကြံသူ အများအပြား၏ ပိုင်ဆိုင်မှုအားလုံးကို ရရှိခဲ့ခြင်း ဖြစ်ပေသည်။

"ကြယ်ကွဲပင်လယ်ပြင်က ချမ်းသာကြွယ်ဝတယ်ဆိုတဲ့ ကောလာဟလက အမှန်ပဲ... အခုတော့ လက်တွေ့မြင်လိုက်ရပြီ..."

"ခြင်နက်မျိုးနွယ်စုရဲ့ သာမန်အဖွဲ့ဝင်တစ်ယောက်ရဲ့ ကိုယ်ပေါ်မှာတင် အင်မော်တယ်သလင်းကျောက်တွေ ဒီလောက်တောင် များတာပဲ..."

ထောင်ချီလီက ပါးစပ်အဟောင်းသား ဖြစ်သွားရပြီး မယုံကြည်နိုင်လောက်အောင် ဖြစ်နေရှာသည်။

သူမသည် လူသားမျိုးနွယ်စုထဲတွင် ဆင်းရဲမွဲတေမှုဒဏ်ကို ကောင်းစွာ ခံစားခဲ့ရဖူးသဖြင့် ဤမျှများပြားသော အင်မော်တယ်သလင်းကျောက်များကို မည်သည့်အခါမျှ မမြင်ဖူးခဲ့ချေ။

လူသားမျိုးနွယ်၏ ခန္ဓာပေါင်းစည်းခြင်းအဆင့် ကျင့်ကြံသူများပင်လျှင် ဆင်းရဲမွဲတေကြပြီး ကိုယ်ပေါ်တွင် အင်မော်တယ်သလင်းကျောက် အနည်းငယ်မျှသာ ကျန်ရှိကြသည်။

ရှားပါးသော ရတနာများကို ဝယ်ယူလိုပါကလည်း ငွေကြေးမရှိသဖြင့် ‌ငေးကြည့်ရုံသာ ကြည့်နိုင်ကြပေသည်။

လေဟာနယ်သန့်စင်ခြင်းအဆင့် ကျင့်ကြံသူများအကြောင်းကိုမူ ပြောရန်ပင် မလိုတော့ချေ။ ကိုယ်ပေါ်၌ အင်မော်တယ်သလင်းကျောက် အနည်းငယ်ရှိရုံနှင့်ပင် တော်တော်လေး ကောင်းမွန်နေပြီ ဖြစ်သည်။

"ဒါကတော့ မတတ်နိုင်ဘူးလေ... ဒီခြင်နက်မျိုးနွယ်စုက ထျန်းဖန်မျိုးနွယ်စုရဲ့ လက်အောက်ခံမျိုးနွယ်စု ဖြစ်နေတာကိုး..."

"ထျန်းဖန်မျိုးနွယ်စုရဲ့ အစိတ်အပိုင်းတစ်ခုဆိုလည်း ဟုတ်တယ်..."

"ထျန်းဖန်မျိုးနွယ်စုက အစစ်အမှန်ဝိညာဉ်မျိုးနွယ်စု ဖြစ်တဲ့အတွက်ကြောင့် သဘာဝကျကျပဲ အင်မော်တယ်သလင်းကျောက် အမြောက်အမြားကို ရရှိနိုင်တဲ့ နည်းလမ်းတွေ ရှိမှာပဲ..."

ကျိုးစွေ့က ဤသည်ကို သဘာဝကျလှကြောင်း ခံစားမိလေသည်။

လူသားမျိုးနွယ်သည် ယခင်က သဲကန္တာရကဲ့သို့ ဆင်းရဲမွဲတေလှသော နေရာများတွင်သာ နေထိုင်ခဲ့ရသဖြင့် မည်သည့်အခါမျှ ဤမျှ ချမ်းသာကြွယ်ဝသော ပုံစံမျိုးကို မမြင်ဖူးခဲ့ကြချေ။

"ဒီမှာ အင်မော်တယ်သလင်းကျောက်တွေ ဒီလောက်တောင် များနေတာဆိုတော့ ကျင့်ကြံခြင်းအရှိန်က အနည်းဆုံး ဆယ်ဆလောက်တော့ တက်လာမှာပဲ..."

ပိုင်စုကျဲ့က အံ့ဩတကြီး ပြောလိုက်၏။

အကယ်၍ အင်မော်တယ်သလင်းကျောက်များကို အသုံးပြုကာ အချိန်ကြာမြင့်စွာ ကျင့်ကြံနိုင်ပါက အကျိုးသက်ရောက်မှုသည် ကောင်းကင်နှင့် မြေကြီး၏ စိတ်ဝိညာဉ်စွမ်းအင်များနှင့် ယှဉ်နိုင်မည်မဟုတ်သည်မှာ သဘာဝပင် ဖြစ်ပေသည်။

သတ္တမအဆင့် ဝိညာဉ်ကြော သို့မဟုတ် အဋ္ဌမအဆင့် ဝိညာဉ်ကြောများပင်လျှင် အင်မော်တယ်သလင်းကျောက်များနှင့် နှိုင်းယှဉ်၍မရနိုင်ပေ။

အဘယ်ကြောင့်ဆိုသော် အင်မော်တယ်သလင်းကျောက်များတွင် အင်မော်တယ်ကမ္ဘာမှ လာသော စွမ်းအင်များ ပါဝင်နေသောကြောင့် ကျင့်ကြံသူများအတွက် အကျိုးကျေးဇူးမှာ အလွန်တရာ ကြီးမားလွန်းသောကြောင့်ပင် ဖြစ်လေသည်။

အကယ်၍ လေဟာနယ်သန့်စင်ခြင်းအဆင့် ကျင့်ကြံသူတစ်ယောက်သည် ကျင့်ကြံမှုအဆင့် ပြီးပြည့်စုံရန်အတွက် နှစ်ထောင်ချီကြာအောင် ပြင်းပြင်းထန်ထန် ကျင့်ကြံရမည်ဆိုပါက အင်မော်တယ်သလင်းကျောက်များကိုသာ အသုံးပြု၍ ကျင့်ကြံမည်ဆိုလျှင် နှစ်ရာဂဏန်းမျှဖြင့် ပြီးပြည့်စုံသွားနိုင်ပေသည်။ နှစ်ခုကြားမှ ကွာဟချက်မှာ ဤမျှလောက်ပင် အံ့မခန်း ဖြစ်ချေ၏။

ကောလာဟလများအရ ထိုအစစ်အမှန်ဝိညာဉ်မျိုးနွယ်စုမှ ပါရမီရှင်များသည် အင်မော်တယ်သလင်းကျောက်များကို အသုံးပြု၍ ကျင့်ကြံကြသည်ဟု ဆို၏။

ထို့ကြောင့် ၎င်းတို့သည် ကျင့်ကြံမှုအဆင့်တက်ရန် အချိန်အများကြီးပေးစရာ မလိုအပ်ဘဲ အခက်အခဲများကို ဖြတ်ကျော်ရန်သာ လိုအပ်ပေသည်။ ထို့ကြောင့် ၎င်းတို့၏ တိုးတက်မှုနှုန်းသည် အလွန်မြန်ဆန်လွန်းလှပြီး အခြားသော မျိုးနွယ်စုများနှင့် ယှဉ်ပြိုင်နိုင်စွမ်းမရှိလောက်အောင်ပင် ကွာခြားလွန်းလှသည်။

"ဒီမဟာမျိုးနွယ်စုကြီးတွေက အရမ်းကို ချမ်းသာလွန်းတယ်... ထိပ်တန်းပညာရှင်တွေ အများကြီးကို မွေးထုတ်ပေးနိုင်တာ အံ့ဩစရာ မဟုတ်တော့ဘူး... လူသားမျိုးနွယ်နဲ့ ယှဉ်လိုက်ရင် အရမ်းကို ကွာခြားလွန်းလှတယ်..."

ဟွားစစ်ချင်က သက်ပြင်းချကာ ပြောလိုက်၏။

သူမအနေဖြင့် မျိုးနွယ်စုအသီးသီး၏ မညီမျှမှုများကို သဘောပေါက်သွားခဲ့ရချေပြီ။ ယခုနှစ်များအတွင်း လူသားမျိုးနွယ် တိုးတက်ရန် အဘယ်ကြောင့် ခက်ခဲနေရသည်ကို နားလည်နိုင်ပေသည်။ အရင်းအမြစ်များကို ကြည့်ရုံမျှဖြင့် ကြီးမားလှသော ကွာဟချက်ကို ပြသနေသည်။

အကယ်၍ ဤမျိုးနွယ်စုကြီးများထံမှ အရင်းအမြစ်များကို မလုယူပါက လူသားမျိုးနွယ်သည် မည်သို့လျှင် အလျင်အမြန် တိုးတက်လာနိုင်မည်နည်း။