အခန်း ၉၀၈

အခန်း (၉၀၈) - ‘မိုးကြိုးကပ်ဘေးကူ’ သတ္တမအဆင့်သို့ အဆင့်တက်ခြင်း၊ နတ်ဘုရားစွမ်းရည် ဥက္ကာပျံမိုးကြိုးလက်ညိုးနှင့် သတ္တမအဆင့်ဆေးနည်းများ ရရှိခြင်း (၅)

ဝုန်း...

ဤသို့ တွေးမိလိုက်သည်နှင့် ကျိုးစွေ့က တုံ့ဆိုင်းမနေဘဲ ခန္ဓာကိုယ်ပေါ်ရှိ သွေးမျိုးဆက် ထူးကဲစွမ်းရည်ကို လှုံ့ဆော်လိုက်တော့သည်။ ထိုအခါ အဆုံးအစမရှိသော ကပ်ဘေးမိုးကြိုးစွမ်းအင်များက သူ၏ ခန္ဓာကိုယ်ပေါ်တွင် စုစည်းလာပြီး ခန္ဓာကိုယ်တစ်ခုလုံးကို မရေမတွက်နိုင်သော မိုးကြိုးများဖြင့် ရစ်ပတ်ဖုံးလွှမ်းထားကာ တဖျစ်ဖျစ် မြည်ဟည်းသံများ ထွက်ပေါ်လာလေသည်။

သူ၏ ခန္ဓာကိုယ်တစ်ခုလုံးမှာ မိုးကြိုးနတ်ဘုရားတစ်ပါးအလား ဖြစ်သွားပြီး ရေတွက်၍မရနိုင်သော မိုးကြိုးရုန်းသင်္ကေတများ တဖျတ်ဖျတ် လက်လာကာ ရုန်းသင်္ကေတအကာအကွယ်တစ်ခုကို ဖန်တီးလိုက်၏။

ထိုအခိုက်အတန့်တွင် မရေမတွက်နိုင်သော မိုးကြိုးစွမ်းအင်များက သူ၏ ညာဘက်လက်ညိုးပေါ်တွင် စုစည်းသွားသည်ကို တွေ့လိုက်ရပြီး ထိုလက်ညိုးလေးမှာ မိုးကြိုးစွမ်းအင်များဖြင့် ပေါင်းစပ်ဖွဲ့စည်းထားသကဲ့သို့ ခရမ်းရောင် သန်းသွားကာ နက်နဲဆန်းကြယ်လှသော မိုးကြိုးရုန်းသင်္ကေတများစွာ ပါဝင်နေလေသည်။

တစ်ချိန်တည်းမှာပင် လေဟာနယ်စွမ်းအင် အမျှင်တန်းများလည်း ၎င်းအတွင်းသို့ ဝင်ရောက်ပေါင်းစပ်သွားကြသည်။

ရွှစ်…

နောက်တစ်စက္ကန့်တွင် ကျိုးစွေ့သည် စိတ်ဆန္ဒတစ်ချက်ဖြင့် ဤစွမ်းအင်များကို ချက်ချင်း ထုတ်လွှတ်လိုက်၏။

သွေးမျိုးဆက် ထူးကဲစွမ်းရည် - ဥက္ကာပျံမိုးကြိုးလက်ညိုး။

ဤလက်ညိုးတစ်ချောင်း၏ တိုက်ခိုက်မှုတွင် သေဆုံးကြွေကျခြင်းနှင့် ပျက်စီးခြင်း အငွေ့အသက်များ ပါဝင်နေသကဲ့သို့ ဖြစ်ပြီး လေထုထဲတွင် မျက်စိဖြင့်မမြင်နိုင်သော စွမ်းအင်တစ်ခု ပေါ်ထွက်လာကာ အမြန်နှုန်းမှာလည်း မယုံနိုင်လောက်အောင် မြန်ဆန်လွန်းလှသည်။

ဘန်း...

အဝေးရှိ လူသူကင်းမဲ့သော ကျွန်းတစ်ကျွန်းသည် ဤလက်ညိုးတိုက်ကွက်ကို ခံလိုက်ရတော့သည်။ မျက်စိတစ်မှိတ်အတွင်းမှာပင် ကျွန်းတစ်ခုလုံး အစိတ်စိတ်အမွှာမွှာ ကွဲအက်သွားကာ အမှုန့်ဖြစ်သွားသည်အထိ ပြင်းထန်စွာ တိုက်ခိုက်ခံလိုက်ရပြီး ဤပင်လယ်ပြင်ကြီးထဲတွင် လုံးဝ ပျောက်ကွယ်သွားတော့သည်။

ဤပင်လယ်ပြင်တွင်လည်း အဆုံးအစမရှိသော မိုးကြိုးစွမ်းအင်များ ပေါ်ထွက်လာ၏။

ဤပင်လယ်ပြင်၌ ရှင်သန်နေထိုင်ကြသော သမုဒ္ဒရာရေသတ္တဝါများ အားလုံးမှာလည်း ချက်ချင်းပင် ဓာတ်လိုက်သေဆုံးသွားကြပြီး ပင်လယ်ရေပြင်ပေါ်တွင် ပေါ်လောပေါ်နေကြတော့သည်။

မရေမတွက်နိုင်သော ငါးသေများ ပင်လယ်ရေပြင်ပေါ်တွင် မျောပါနေသည်မှာ အလွန်ပင် ကြီးကျယ်ခမ်းနားသော မြင်ကွင်းတစ်ခုပမာ ဖြစ်နေတော့သည်။

‘‘မိုးကြိုးကပ်ဘေးကူ’ရဲ့ သွေးမျိုးဆက် နတ်ဘုရားစွမ်းရည်လို့ ခေါ်ထိုက်ပါပေတယ်...'

'ဒီနတ်ဘုရားစွမ်းရည် ဥက္ကာပျံမိုးကြိုးလက်ညိုးက အရှိန်အဟုန် အရမ်းမြန်သလို လေဟာနယ်ရဲ့ စွမ်းအားလည်း ပေါင်းစပ်ပါဝင်နေတယ်...'

'ဒါကြောင့် ထုတ်သုံးလိုက်တဲ့ ခဏချင်းမှာပဲ ရန်သူ့အနေနဲ့ လုံးဝရိပ်မိနိုင်မှာ မဟုတ်ဘူး...'

'လက်ညိုးတစ်ချက် ထိုးလိုက်ရုံနဲ့တင် ရန်သူကို ပုံသဏ္ဌာန်မဲ့ ခြေရာလက်ရာမကျန် သုတ်သင်ပစ်နိုင်တယ်...'

'တစ်ချိန်တည်းမှာပဲ ဖျက်ဆီးအားကလည်း အရမ်းပြင်းထန်လှတယ်၊ ခန္ဓာပေါင်းစည်းခြင်းအဆင့် ကျင့်ကြံသူတစ်ယောက်ရဲ့ ခုခံကာကွယ်ရေးအတားအဆီးတောင်မှ တားဆီးနိုင်မှာ မဟုတ်ဘူး...'

'ဒါတင်မကသေးဘူး၊ ကပ်ဘေးမိုးကြိုးရဲ့ စွမ်းအားကိုလည်း ထည့်သွင်းပေါင်းစပ်လို့ ရသေးတယ်...'

'ဘယ်လောက်ထိ ကြောက်စရာကောင်းတဲ့ ကပ်ဘေးမိုးကြိုးကို ထည့်သွင်းပေါင်းစပ်သလဲ… အဲဒီအပေါ်မူတည်ပြီး အဖျက်စွမ်းအားကလည်း ပိုပြီးတော့ ကြောက်မက်ဖွယ်ကောင်းလာမှာပဲ...'

'ဥပမာ ရှန်ရှောင်းမိုးကြိုးကို ထည့်သွင်းပေါင်းစပ်မယ်ဆိုရင် ဥက္ကာပျံမိုးကြိုးလက်ညိုးရဲ့ စွမ်းအားက အသံမရှိ၊ အရိပ်အယောင်လည်းမရှိ ဖြစ်သွားလိမ့်မယ်...'

'အကယ်လို့ ယွီရှူးမိုးကြိုးကိုသာ ပေါင်းစပ်လိုက်မယ်ဆိုရင်တော့ အဖြူရောင်ကျောက်စိမ်းလို မိုးကြိုးအဖြစ် ပြောင်းလဲသွားပြီး အံ့ဩစရာကောင်းတဲ့ ဖျက်ဆီးခြင်းအစွမ်းကို ရရှိလိမ့်မယ်...'

ကျိုးစွေ့သည် မိမိ၏ သိစိတ်ပင်လယ်အနက်ပိုင်းတွင် ကြီးမားလှသော အချက်အလက်များ စီးဆင်းလာသည်ကို ခံစားလိုက်ရ၏။

ထင်ရှားသည်မှာ လတ်တလောတွင် ဥက္ကာပျံမိုးကြိုးလက်ညိုး နတ်ဘုရားစွမ်းရည်ကို ထုတ်ဖော်လိုက်ခြင်းက သူ့အား ဤသွေးမျိုးဆက် နတ်ဘုရားစွမ်းရည်နှင့် ပတ်သက်၍ အလွန်တရာ ရင်းနှီးကျွမ်းဝင်သွားစေခဲ့သည်။

ခဏတာအတွင်းမှာပင် သူသည် ဤသွေးမျိုးဆက် နတ်ဘုရားစွမ်းရည်၏ ဆန်းကြယ်မှုများစွာကို နားလည်သဘောပေါက်သွားခဲ့လေသည်။

ထို့အပြင် ၎င်းကို အသုံးပြုနိုင်မည့် နည်းလမ်းအမျိုးမျိုးကိုလည်း သိရှိသွားခဲ့၏။

ဤမျှအခြေအနေထိ ထူးချွန်ပြောင်မြောက်နေရခြင်းမှာ အဋ္ဌမအဆင့် ‘စာအုပ်ကူ’ ၏ ဉာဏ်ပညာစွမ်းအား ပံ့ပိုးပေးမှုကြောင့် ဖြစ်သည်မှာ မြေကြီးလက်ခတ်မလွဲပေ။

၎င်းက သူ့ကို တုနှိုင်းမဲ့ ပါရမီရှင်တစ်ဦး၏ ဉာဏ်ပညာမျိုး ရရှိစေကာ မည်သည့်အရာကိုမဆို အလွယ်တကူ သဘောပေါက်နားလည်စေခဲ့သည်။

တစ်ကြိမ်မျှသာ စမ်းသပ်ထုတ်ဖော်လိုက်ရသော်လည်း ဤနတ်ဘုရားစွမ်းရည်ကို ဆယ်စုနှစ်ပေါင်းများစွာ ကျင့်ကြံခဲ့ရသကဲ့သို့ ခံစားချက်မျိုး ပေးစွမ်းနိုင်၏။

ဤသည်မှာ အစွမ်းထက်သော ဉာဏ်အလင်းပွင့်ခြင်း၏ ကောင်းကျိုးပင်။

မည်သည့်အရာကိုမဆို သင်ယူရာတွင် အရှိန်အဟုန်က အံ့မခန်း မြန်ဆန်စေ၏။

မိနစ်အနည်းငယ် ကြာပြီးနောက်...

ကျိုးစွေ့သည် ဥက္ကာပျံမိုးကြိုးလက်ညိုး နတ်ဘုရားစွမ်းရည်ကို နောက်ထပ် အကြိမ်အနည်းငယ် ထုတ်သုံးကြည့်လိုက်ရာ ရာစုနှစ်တစ်ခုနီးပါး ကျင့်ကြံခဲ့သည့်အလား ဤနတ်ဘုရားစွမ်းရည်ကို လုံးဝဥဿုံ ကျွမ်းကျင်သွားခဲ့ချေပြီ။

ထို့နောက်မှ သူသည် စိတ်ကျေနပ်အားရစွာဖြင့် မိမိ၏ ကျင့်ကြံရေးဂူဆီသို့ ပြန်သွားလေသည်။

ဤပင်လယ်ပြင်တစ်ခုလုံးမှာမူ ပျက်စီးယိုယွင်းနေဆဲဖြစ်ပြီး လူသူမဲ့ကျွန်း အများအပြားမှာလည်း ချေမှုန်းဖျက်ဆီးခြင်း ခံထားရသည်။

ပင်လယ်ရေပြင်ပေါ်တွင်လည်း ကန္တာရသားရဲများ၏ အလောင်းများ ပြန့်ကျဲစွာ ပေါလောပေါ်နေချေသည်။

၎င်းမှာ မကြုံစဖူး ပြင်းထန်လှသည့် တိုက်ပွဲကြီးတစ်ပွဲ ဖြစ်ပွားခဲ့သည့်အလားပင်။

'မဆိုးဘူး... မဆိုးဘူး... ‘မိုးကြိုးကပ်ဘေးကူ’က သတ္တမအဆင့် အောက်ခြေအဆင့်ကို တက်လှမ်းသွားခဲ့ပြီ...'

'နောက်ဆုံးတော့ ငါ့မှာ ခန္ဓာပေါင်းစည်းခြင်းအဆင့်ရဲ့ ပုံမှန်တိုက်ခိုက်ရေးစွမ်းအား ရှိလာခဲ့ပြီ...'

ကျိုးစွေ့က ကြမ်းပြင်ပေါ်တွင် တင်ပျဉ်ခွေထိုင်ကာ အလွန်တရာ စိတ်ကျေနပ်နေမိ၏။

သူ့တွင် အဆင့်ကျော် ဖြတ်ကျော်တိုက်ခိုက်နိုင်သည့် နည်းလမ်းများစွာ ရှိသည်။ ဥပမာ ကုယုံဆန်းကြယ်အလင်းသည် အသက်ကို အသက်ချင်းလဲလှယ်နိုင်စွမ်းရှိပြီး၊ နှလုံးသားမျက်လုံးသည် သေခြင်းတရားနိယာမကို ထိန်းချုပ်နိုင်စွမ်းရှိသည်။

သို့သော်လည်း ထိုကဲ့သို့သော နည်းလမ်းများသည် ဘေးထွက်ဆိုးကျိုး အရမ်းများလှပေရာ တခြားရွေးချယ်စရာမရှိသည့် အဆုံးစွန်သောအခြေအနေမှလွဲ၍ သူသည် လုံးဝထုတ်သုံးမည်မဟုတ်ပေ။ ‘မိုးကြိုးကပ်ဘေးကူ’ မှာမူ ကွဲပြားခြားနားပေသည်။

သတ္တမအဆင့် အောက်ခြေအဆင့်သို့ တက်လှမ်းပြီးနောက်တွင် ဤစွမ်းအားကို မည်သည့်ဘေးထွက်ဆိုးကျိုးမျှမရှိဘဲ စိတ်တိုင်းကျ ထုတ်သုံးနိုင်သည်။

ထိုကဲ့သို့သော စွမ်းအားမျိုးသည်သာ သူရရှိချင်ဆုံးအရာ ဖြစ်ပေသည်။

အကောင်းဆုံးမှာမူ သူ၏ကျင့်ကြံမှုအဆင့်က ခန္ဓာပေါင်းစည်းခြင်းအဆင့်သို့ တိုက်ရိုက်တက်လှမ်းနိုင်ရန်ပင်။

သို့သော် ယခုအချိန်အတွက်မူ ဤအရာသည် အချိန်တိုအတွင်း လုပ်ဆောင်နိုင်မည့်ကိစ္စ မဟုတ်သေးပေ။

'ဟုတ်သားပဲ... အရင်ဆုံး ဆဋ္ဌမအဆင့် အဆင့်မြင့်ရတနာဆေးလုံး သုံးလုံးကို စမ်းသုံးကြည့်ရအောင်...'

ကျိုးစွေ့သည် စစ်ယွီရှီးထံမှ ရရှိခဲ့သည့် ကွေ့ဆွေ့နဂါးဝါဆေးလုံး သုံးလုံးကို သတိရသွားသည်။ သူသည် ထိုဆေးလုံးသုံးလုံးစလုံးကို ပါးစပ်ထဲသို့ တစ်ပြိုင်နက်တည်း ထည့်ကာ သောက်သုံးလိုက်၏။

အကယ်၍ သာမန် လေဟာနယ်သန့်စင်ခြင်း အလယ်အလတ်အဆင့် ကျင့်ကြံသူတစ်ဦးသာဆိုလျှင် ဤဆေးလုံးသုံးလုံး၏ ပြင်းထန်လှသော ဆေးစွမ်းကြောင့် ခန္ဓာကိုယ် ပေါက်ကွဲပျက်စီးသွားမည်မှာ သေချာသည်။

သို့သော် သူ၏အတွက်မူကား ဆဋ္ဌမအဆင့် အဆင့်မြင့်ရတနာဆေးလုံး သုံးလုံးမျှသာဖြစ်ပြီး အပန်းမကြီးလှပေ။

ဝုန်း... ဝုန်း... ဝုန်း...

သူသည် ကူနတ်ဘုရားကျင့်စဉ်ကို လည်ပတ်စေကာ ထိုဆေးလုံးသုံးလုံးကို အလျင်အမြန်ပင် ချေဖျက်ပစ်လိုက်ပြီး ကြီးမားလှသော ဆေးစွမ်းအင်များအဖြစ် ပြောင်းလဲလိုက်သည်။

ထိုဆေးစွမ်းအင်များသည် ရေလွှမ်းမိုးမှုကြီးပမာ သူ၏ခန္ဓာကိုယ်ထဲသို့ တိုးဝင်လာပြီးနောက် လေဟာနယ်သန့်စင်ခြင်း ကျင့်ကြံမှုစွမ်းအားအဖြစ်သို့ ပြောင်းလဲသွားလေသည်။

ခန္ဓာကိုယ်အတွင်းရှိ ဒန်တျန်ချီပင်လယ်၏ အနက်ရှိုင်းဆုံးနေရာမှ လေဟာနယ်သန့်စင်ခြင်း ကျင့်ကြံမှုစွမ်းအားများ တစ်လွှာပြီးတစ်လွှာ ပေါ်ထွက်လာကာ စွမ်းအင်ပင်လယ်အတွင်းရှိ စွမ်းအားများကို သိသိသာသာ တိုးပွားလာစေသည်။

ထင်ရှားသည်မှာ ဤဆဋ္ဌမအဆင့် ရတနာဆေးလုံး သုံးလုံး၏ ဆေးစွမ်းမှာ အမှန်တကယ်ပင် သာမန်မဟုတ်ချေ။

အကယ်၍ သာမန် လေဟာနယ်သန့်စင်ခြင်း ကျင့်ကြံသူတစ်ဦးဆိုပါက ဤဆေးလုံးများကို အပြီးသတ်ချေဖျက်ရန် နှစ်ပေါင်းများစွာ အချိန်ယူရပေလိမ့်မည်။

သို့သော် ကျိုးစွေ့အတွက်မူ ရက်အနည်းငယ်မျှဖြင့်ပင် လုံလောက်လှသည်။

နောက်ထပ် ရက်အနည်းငယ် ကုန်ဆုံးသွားပြီးနောက်...

ကျင့်ကြံရေးဂူအတွင်း၌ ကျိုးစွေ့သည် ထိုကွေ့ဆွေ့နဂါးဝါဆေးလုံး သုံးလုံးကို လုံးဝဥဿုံ ချေဖျက်ပြီးသွားခဲ့ရာ ခန္ဓာကိုယ်တွင်းရှိ ကျင့်ကြံမှုစွမ်းအားများ များစွာ တိုးတက်လာခဲ့သည်။

ထင်ရှားသည်မှာ ဤဆဋ္ဌမအဆင့် ရတနာဆေးလုံး သုံးလုံးက သူ့အား နှစ်ပေါင်းများစွာ ပင်ပန်းကြီးစွာ ကျင့်ကြံရမည့်အချိန်များကို အများအပြား သက်သာစေခဲ့သည်။

'တိုးတက်မှုက ၂၅ ရာခိုင်နှုန်းပဲ...'

'ဆဋ္ဌမအဆင့် အဆင့်မြင့်ဆေးလုံးလို့ ခေါ်ထိုက်ပါပေတယ်… တခြားဆေးလုံးတွေနဲ့ နှိုင်းယှဉ်လို့တောင် မရဘူး...'

'ကျင့်ကြံသူတစ်ယောက်အနေနဲ့ ဆေးလုံးတွေကို မှီဝဲရမှာပဲ...'

'မဟုတ်ရင် ကျင့်ကြံခြင်းအရှိန်အဟုန်ကို ဘယ်လိုလုပ်ပြီး မြှင့်တင်နိုင်မှာလဲ...'

ကျိုးစွေ့သည် မိမိ၏ကိုယ်တွင်းရှိ ကျင့်ကြံမှုစွမ်းအားများ ပိုမိုတိုးပွားလာသည်ကို ခံစားမိကာ အလွန်တရာ စိတ်ကျေနပ်နေမိ၏။

ယခင်က သူ၏တိုးတက်မှုမှာ ၁၀ ရာခိုင်နှုန်းမျှသာ ရှိခဲ့သော်လည်း ယခုအခါ မျက်စိတစ်မှိတ်အတွင်း ၂၅ ရာခိုင်နှုန်းအဖြစ်သို့ တိုးတက်သွားခဲ့သည်။

ဤကဲ့သို့သောအရှိန်အဟုန်မှာ အမှန်တကယ်ပင် အံ့မခန်း မြန်ဆန်လှပေသည်။

သို့သော် နှမြောစရာကောင်းသည်မှာ တူညီသော ဆေးလုံးများကို အလွန်အကျွံ သုံးစွဲ၍ မရခြင်းပင်။ အခြေခံအားဖြင့် တတိယမြောက် ဆေးလုံးမှစတင်ကာ ဆေးယဉ်ပါးမှု ဖြစ်ပေါ်လာတတ်သည်။

ထို့ကြောင့် ကျင့်ကြံသူများသည် ကျင့်ကြံမှုစွမ်းအား လျင်မြန်စွာ တိုးတက်စေရန်အတွက် ကွဲပြားခြားနားသော ဆေးလုံးများကို လိုအပ်ပေသည်။

ဆေးနည်းတစ်မျိုးတည်း၊ ဆေးလုံးတစ်မျိုးတည်းဖြင့်သာဆိုလျှင် လုံးဝလုံလောက်မှု မရှိနိုင်ပေ။

ဤအချိန်တွင် ကျင့်ကြံမှုအဆင့်ကို ဆက်လက်မြှင့်တင်လိုပါက ဒုတိယမြောက် ဆေးလုံးတစ်မျိုး လိုအပ်မည်ဖြစ်သည်။

သို့သော် ကျင့်ကြံသူတစ်ဦးအတွက်မူ ဆဋ္ဌမအဆင့် ရတနာဆေးလုံးတစ်မျိုးကို ရှာဖွေရန်မှာပင် အလွန်တရာ ခက်ခဲလှပြီ ဖြစ်၏။

ဒုတိယမြောက် သို့မဟုတ် တတိယမြောက် ဆေးလုံးများကို ထပ်မံရှာဖွေရန်မှာ ပို၍ပင် ခက်ခဲလာပေလိမ့်မည်။

ထို့အပြင် မျိုးနွယ်စုကြီးတစ်ခုစီသည် မိမိတို့ပိုင်ဆိုင်ထားသော ဆေးနည်းများကို အလွန်အမင်း တင်းကျပ်စွာ လျှို့ဝှက်ထားပြီး မည်သည့်အခါမျှ အပြင်သို့ မပေါက်ကြားစေပေ။

ထိုသို့ဖြစ်ခြင်းကြောင့် အားနည်းသော မျိုးနွယ်စုများမှ ကျင့်ကြံသူများအတွက် ကျင့်ကြံမှုအဆင့် မြှင့်တင်ရန် ပို၍ပင် ခက်ခဲလှပေသည်။

ကံကောင်းသည်မှာ ယခင် ခြင်နက်မျိုးနွယ်စုကို သုတ်သင်စဉ်က သတ္တမအဆင့် ဆေးနည်းသုံးခု ရရှိခဲ့ခြင်း ဖြစ်သည်။ ၎င်းမှာလည်း မသေးငယ်သော ရလဒ်တစ်ခုပင်။

အကယ်၍ ထိုဆေးလုံးများကို ဖော်စပ်နိုင်ပါက သူ၏ကျင့်ကြံမှုအဆင့်ကို အလွန်အမင်း မြှင့်တင်ပေးနိုင်မည်မှာ သေချာပေသည်။

'ဟမ်... ငါ့ရဲ့ကိုယ်ပွားက အဋ္ဌမအဆင့် ဆေးဘက်ဝင်အပင်ဖြစ်တဲ့ မသေမျိုးမြက်မျိုးစေ့ ရှိတဲ့နေရာကို ရှာတွေ့သွားတာလား...'

'အလုပ်လုပ်တာ ဒီလောက်တောင် မြန်တာလား...'

'ကြည့်ရတာ ဒီတစ်ခေါက်တော့ တကယ့်ကို ကံကောင်းခြင်းနတ်မင်းက မစနေတာပဲ...'

ထိုအချိန်တွင် ကျိုးစွေ့သည် စိတ်လှုပ်ရှားသွားပြီး မိမိ၏ကိုယ်ပွားထံမှ ပေးပို့လာသော သတင်းစကားကို ချက်ချင်းပင် သိရှိလိုက်ရ၏။

ထင်ရှားသည်မှာ အချိန်အတန်ကြာ ရှာဖွေပြီးနောက် ‘ပစ္စည်းရှာဖွေကူ’ ၏ လမ်းညွှန်မှုနှင့်အတူ သူ၏ကိုယ်ပွားသည် နောက်ဆုံးတွင် အဋ္ဌမအဆင့် မသေမျိုးမြက်မျိုးစေ့ ရှိရာနေရာအနီးသို့ ဆိုက်ဆိုက်မြိုက်မြိုက် ရောက်ရှိသွားခဲ့ချေပြီ။

...