အခန်း ၁၀၄၄

အခန်း ၁၀၄၄ သူ တတိယအကြိမ်မြောက် ပြုံးလိုက်သောအခါ

ရှင်ခြင်း နယ်ပယ်နှင့် သက်ဆိုင်သော စွမ်းအားများ ပျံ့လွင့်သွားသည့် အခိုက်အတန့်တွင် နဂါးငွေ့တန်း တစ်ခုလုံးသည် ကျယ်လောင်သော မြည်ဟည်းသံနှင့်အတူ ချက်ချင်း တုန်ခါသွားပြီး ထိုဧရိယာရှိ သောင်းနှင့်ချီသော ကျင့်ကြံသူအားလုံး၏ မျက်နှာအမူအရာများ ပြင်းထန်စွာ ပြောင်းလဲသွားစေတော့သည်။ သူတို့၏ နှလုံးသားများထဲတွင် မမြင်နိုင်သော တူကြီးတစ်ချောင်းဖြင့် ပြင်းထန်စွာ ထုရိုက်ခံလိုက်ရ သကဲ့သို့ တစ်ပြိုင်နက်တည်း တုန်လှုပ်သွားကြပြီး သောင်းနှင့်ချီသော လူများမှာ ထိတ်လန့် အံ့အားသင့် သွားကြရသည်။ သူတို့၏ ကျင့်ကြံခြင်း အဆင့်များမှာလည်း လုံးဝ ဖိနှိပ်ခံလိုက်ရသကဲ့သို့ ဖြစ်သွားသည်။ သူတို့၏ စိတ်အာရုံများမှာ ဗလာကျင်းသွားပြီး တရုန်းရုန်း မြည်ဟည်းနေတော့သည်။

​အဖိုးအိုမှာမူ အခြေအနေ အနည်းငယ် ပိုကောင်းသည်။ ထိုအခိုက်တွင် သူ့မျက်နှာမှာ ဖြူလျော်နေသော်လည်း တည်ငြိမ်နေဆဲ ဖြစ်သည်။ အဆုံးတွင်မူ သူသည် ယခင်ကတည်းက ကျူးယိုချိုက်၏ ကျင့်ကြံခြင်း အဆင့်ကို ခန့်မှန်းထားပြီးသား ဖြစ်သည်။ ယခုအခိုက်အတန့်မှာ သူ့ခန့်မှန်းချက် မှန်ကန်ကြောင်း သက်သေပြလိုက်ခြင်းသာ ဖြစ်သည်။

​သို့သော်လည်း သူ့ဘေးရှိ သက်လတ်ပိုင်း အမျိုးသား၏ မျက်နှာပေါ်တွင်မူ မယုံကြည်နိုင်စရာ အမူအရာများဖြင့် ပြည့်နှက်နေသည်။ သူ့မျက်လုံးများမှာ ဗလာကျင်းနေပြီး ခေါင်းထဲတွင် မိုးကြိုးပေါင်းထောင်သောင်း တစ်ပြိုင်နက်တည်း ပေါက်ကွဲသွားသကဲ့သို့ စိတ်အာရုံများ ထစ်ချုန်းနေတော့သည်။ သာမန် ကျင့်ကြံသူများအနေဖြင့် ရှင်ခြင်း နယ်ပယ်၏ အဓိပ္ပာယ်ကို သိရှိနိုင်မည် မဟုတ်ပေ။ အဘယ်ကြောင့်ဆိုသော် သူတို့၏ မျက်စိထဲတွင် ကံကြမ္မာနှင့် ရှင်ခြင်းသေခြင်း အရှင်သခင်များ ဖြစ်လာခြင်းမှာ နယ်ပယ်တစ်ခုသို့ ရောက်ရှိခြင်းမျှသာ ဖြစ်ပြီး စုမင်ကိုယ်တိုင်ပင်လျှင် ကံကြမ္မာနှင့် ရှင်ခြင်းသေခြင်း အရှင်သခင်များအကြောင်း သိရှိပြီးနောက် အချိန်အတော်ကြာမှသာ အသေးစိတ် ခွဲခြားမှုများကို တဖြည်းဖြည်း နားလည် သဘောပေါက်ခဲ့ခြင်း ဖြစ်သည်။

​သို့သော် အရှင်သခင် နယ်ပယ်မှ တန်ခိုးရှင်တစ်ဦးအနေဖြင့် ဤနယ်ပယ်သို့ ရောက်ရှိခါစ ဖြစ်သော်လည်း ဤသက်လတ်ပိုင်း အမျိုးသား၏ ရှင်ခြင်း နယ်ပယ်အပေါ် နားလည်မှုမှာ သူ့ပတ်ပတ်လည်ရှိ သောင်းနှင့်ချီသော ကျင့်ကြံသူများထက် သေချာပေါက် ပိုမို နက်ရှိုင်းသည်။

​"မသိခြင်းသည် ချမ်းသာတစ်ပါး" ဟူသည် ရှေးရိုးစကားပုံ တစ်ခု ရှိသည်။ ဤသည်မှာ လူတစ်ယောက်သည် အရာတစ်ခု၏ ကြောက်မက်ဖွယ်ကောင်းမှုကို မသိရှိပါက ထိုအရာကို ကြောက်ရွံ့မည် မဟုတ်ဟူသော အဓိပ္ပာယ် ဖြစ်သည်။ ဤသည်မှာ အမြင်ကျဉ်းမြောင်းသော သဘောတရား ဖြစ်သော်လည်း ဆင်ခြင်စရာ ကျိုးကြောင်းဆီလျော်မှုတစ်ခုတော့ ရှိနေသည်။ အခြားတစ်ဖက်တွင်မူ လူတစ်ဦးသည် တစ်စုံတစ်ခု၏ ကြောက်မက်ဖွယ်ကောင်းမှုကို ပိုမို နားလည်လေလေ ထိုအရာအား ပိုမို ကြောက်ရွံ့လေလေ ဖြစ်သည်။ ဤအချက်မှာ ထိုအခိုက်အတန့်တွင် သက်လတ်ပိုင်း အမျိုးသားအပေါ် အတိုင်းအဆမရှိ ကြီးမားကျယ်ပြန့်စွာ သက်ရောက်နေတော့သည်။

​သူ တုန်လှုပ်နေစဉ် မျက်လုံးများထဲ၌ ကြီးမားသော အံ့အားသင့်မှုနှင့် ထိတ်လန့်မှုများ ပေါ်ပေါက်လာခဲ့သည်။ သူ့ဘေးရှိ အဖိုးအိုသည် သက်လတ်ပိုင်း အမျိုးသမီးအား ဤလူစုကို ရန်မစရန် အကြိမ်ကြိမ် အဘယ်ကြောင့် တားဆီးခဲ့သည်အား သူ ချက်ချင်း နားလည်သွားတော့သည်။ အကယ်၍ လူတစ်ယောက်သည် ရှင်ခြင်း နယ်ပယ်မှ တန်ခိုးရှင်တစ်ဦးကို မိမိနောက်သို့ လိုလိုလားလား လိုက်ပါစေနိုင်သည်ဆိုလျှင် ထိုတန်ခိုးရှင်အား နောက်လိုက် ဖြစ်စေသည့် အရာမှာ သူ့စွမ်းအားကြောင့် မဟုတ်ခဲ့လျှင်ပင် ၎င်းမှာ လူတစ်ဦးကို ထိတ်လန့်သွားစေရန်နှင့် အစွမ်းထက်သော ကျင့်ကြံသူ အားလုံးက သူ့အား အလွန် အလေးအနက်ထား ဆက်ဆံရန် လုံလောက်သည်။

​စုမင်က သူတို့ကို သေချင်နေသည်လောဟု ခြိမ်းခြောက်ခဲ့ခြင်းမှာ အလကား ပြောခဲ့သည့် စကားလုံးများ မဟုတ်ကြောင်းကိုလည်း သူ ချက်ချင်း နားလည်သွားခဲ့သည်။ သူက ခြိမ်းခြောက်မှုကို အကောင်အထည်ဖော်ရန် ကိုယ်ပိုင် နည်းလမ်းများ ရှိနေသည်။

​သူကိုယ်တိုင်ပင် ဤမျှအထိ ထိတ်လန့်နေရသည်ဆိုလျှင် ဤပြဿနာ အားလုံးကို စတင်ခဲ့သော သက်လတ်ပိုင်း အမျိုးသမီးမှာမူ ပြောနေစရာပင် မလိုတော့ပေ။ ဤအမျိုးသမီးသည် အရှင်သခင် နယ်ပယ်မှ တန်ခိုးရှင်တစ်ဦး ဖြစ်နိုင်သော်လည်း သက်လတ်ပိုင်း အမျိုးသားကဲ့သို့ပင် ဤနယ်ပယ်သို့ ရောက်ရှိခါစသာ ဖြစ်ပြီး အရှင်သခင် နယ်ပယ်တွင် အပြည့်အဝ မပြီးမြောက်သေးသူ ဖြစ်သည်။ ထိုအခိုက်အတန့်တွင် အမျိုးသမီးသည် တုန်ရီသွားပြီး သူမ မျက်လုံးများထဲ၌ ထိတ်လန့် ကြောက်ရွံ့မှုများနှင့်အတူ မယုံကြည်နိုင်ခြင်းများ ပေါ်ပေါက်လာခဲ့သည်။ သူမ စိတ်ထဲတွင် ပြင်းထန်သော မုန်တိုင်းတစ်စင်း တိုက်ခတ်နေပြီး ကြီးမားသော နိမိတ်မကောင်းသည့် ခံစားချက်ကြီးက ရေလှိုင်းလုံးကြီး တစ်လှိုင်းအလား သူမ နှလုံးသားကို ချက်ချင်း လွှမ်းမိုးသွားတော့သည်။

အမျိုး​သမီးသည် စိတ်ဆင်းရဲ ကိုယ်ဆင်းရဲဖြင့် ခေါင်းလှည့်ကာ သူ့ဘေးရှိ အဖိုးအိုကို လှမ်းကြည့်လိုက်သည်။ အဖိုးအိုက တည်ငြိမ်နေပြီး သူမအား ရှုပ်ထွေးသော အကြည့်ဖြင့်သာ စိုက်ကြည့်နေသည်ကို မြင်သောအခါ ယခင်က သူ သူမအား အဘယ်ကြောင့် တားဆီးနေခဲ့ကြောင်းကို ဤအမျိုးသမီး မသိဘဲ မနေနိုင်တော့ပေ။ သို့သော်လည်း အရာအားလုံးက နောက်ကျသွားခဲ့ပြီ ဖြစ်သည်။ သူမသည် သူမ ညီမလေးအား အကြောင်းကြားပြီးသား ဖြစ်သဖြင့် ရိုးရှင်းသင့်သော ကိစ္စတစ်ခုမှာ ပိုမို ရှုပ်ထွေးလာပြီး ပိုမို အန္တရာယ် ကြီးမားလာခဲ့ပြီ ဖြစ်သည်။

​သို့သော် ထိုအမျိုးသမီးသည် သူမ အမှားကို ဝန်ခံရန် ငြင်းဆန်ခဲ့သည်။ သူမ မျက်လုံးများထဲတွင် တောက်ပသော အလင်းတန်း တစ်တန်း ဖြတ်ပြေးသွားသည်။ ဤလူက ရှင်ခြင်း နယ်ပယ်မှ တန်ခိုးရှင်တစ်ဦး ဖြစ်နေလျှင်ကော မည်သို့ ဖြစ်သနည်း။ ဤနေရာတွင် တပ်စွဲထားသော မဟာလောကကြီး လေးခု၏ အင်အားစုများထဲတွင် ရှင်ခြင်း နယ်ပယ်မှ တန်ခိုးရှင်များ မရှိသည် မဟုတ်ပေ။

အမျိုး​သမီး သိရှိထားချက်အရ ဂြိုဟ်များဖြင့် ဖွဲ့စည်းထားသော ဝဲဂယက်ကြီး၏ ဗဟိုချက်တွင် အစစ်အမှန် ယင်လောကမှ ဘိုးဘေးတစ်ဦး ရှိနေသည်။ ထိုပုဂ္ဂိုလ်သည် အချိန်အတော်ကြာအောင် ပေါ်ထွက်လာခြင်း မရှိဘဲ တံခါးပိတ် ကျင့်ကြံခြင်းကိုသာ အမြဲ လုပ်ဆောင်နေခဲ့သည်။ ဤနေရာ၏ ရှင်သန်ရပ်တည်မှုနှင့် ဆက်စပ်နေသော ကြီးမားသည့် အဖြစ်အပျက်များ သို့မဟုတ် အခြားသူများ မယှဉ်ပြိုင်နိုင်လောက်အောင် သန်မာလွန်းသော အင်အားကြီး ရန်သူတစ်ဦး ပေါ်ပေါက်လာခြင်းမှလွဲ၍ ထိုပုဂ္ဂိုလ်သည် တံခါးပိတ် ကျင့်ကြံခြင်းမှ ထွက်လာမည် မဟုတ်ပေ။

​ဤနေရာတွင် တပ်စွဲထားသော မဟာလောကကြီး လေးခု၏ အင်အားစု တစ်ခုချင်းစီ အတွင်း၌ ဤကဲ့သို့သော မိစ္ဆာအိုကြီး တစ်ပါးစီ ရှိနေကြသည်။ သူတို့မှာ မဟာလောကကြီး လေးခုက နတ်ဘုရား အနှစ်သာရ နယ်မြေတွင် ချန်ထားရစ်ခဲ့သော အင်အားအကောင်းဆုံး ကာကွယ်ရေးများ ဖြစ်ကြသည်။ ထိုကြောင့်ပင် သူတို့သည် နတ်ဘုရားအနှစ်သာရ နယ်မြေကို သူတို့၏ အမြင့်ဆုံး အတိုင်းအဆအထိ ထိန်းချုပ်ထားနိုင်ခြင်း ဖြစ်သည်။

​နတ်ဘုရား အနှစ်သာရ နယ်မြေတွင် သေခြင်း နယ်ပယ်မှ တန်ခိုးရှင်တစ်ဦး ပေါ်ပေါက်မလာသရွေ့ပင်။ သို့သော်လည်း မဟာလောကကြီး လေးခုမှ ရှင်ခြင်း နယ်ပယ်တွင် ရှိသူများမှာပင် စုစုပေါင်း ဆယ့်နှစ်ယောက်ခန့်သာ ရှိသည်။ သေခြင်း နယ်ပယ်မှ တန်ခိုးရှင်များမှာမူ ပိုမို၍ပင် ရှားပါးသည်။ ထိုလူများမှာ လောကတစ်ခုချင်းစီ၏ ကပ်လောက အရှင်သခင် အဆင့်တွင် ရှိနေကြပြီး စစ်မှန်သော ဘိုးဘေးများပြီးလျှင် ဒုတိယအဆင့်ရှိသော ဖြစ်တည်မှုများ ဖြစ်ကြသည်။ သူတို့မှာ ဆယ်ယောက်ပင် မပြည့်ချေ။

​နတ်ဘုရား အနှစ်သာရ နယ်မြေပေါ်တွင် ချမှတ်ထားသော ကန့်သတ်ချက်များ အောက်၌ ပထမနေရာတွင် ရောက်ရှိရန် အလွန် ခဲယဉ်းသော ဤနယ်ပယ်သို့ ဤနေရာမှ လူတစ်ဦး ရောက်ရှိရန်မှာ မဖြစ်နိုင်ပေ။ အကယ်၍ ထိုပုဂ္ဂိုလ်က တကယ်တမ်း ပေါ်ပေါက်လာခဲ့လျှင်ပင် မဟာလောကကြီး လေးခုမှ သေခြင်း နယ်ပယ် တန်ခိုးရှင် အချို့သည် ချက်ချင်း ထွက်ပေါ်လာပြီး သူ့အား တိုက်ရိုက် တိုက်ခိုက်ခြင်း၊ သတ်ဖြတ်ခြင်း သို့မဟုတ် ချိတ်ပိတ်ခြင်းများ ပြုလုပ်ကြမည် ဖြစ်သည်။

​ထို့ကြောင့်ပင် သက်လတ်ပိုင်း အမျိုးသမီးသည် သူမအနေဖြင့် ကံကောင်းထောက်မစွာဖြင့် အထိအခိုက်မရှိ လွတ်မြောက်နိုင်မည်ဟု ယုံကြည်နေဆဲ ဖြစ်သည်။

​ကျူးယိုချိုက်သည် သူ့စွမ်းအားများကို အပြင်သို့ ထုတ်လွှတ်လိုက်သည်။ သူ့စကားသံများမှာ ဟင်းလင်းပြင်ထဲတွင် ပဲ့တင်ထပ်သွားသည်နှင့် ဂြိုဟ်များဖြင့် ဖွဲ့စည်းထားသော ဝဲဂယက်ကြီး အတွင်းမှ အဖိုးအို၏ အသံမှာ ချက်ချင်း ပျောက်ကွယ်သွားတော့သည်။ အချိန်အတော်ကြာပြီးနောက် ဝဲဂယက်ကြီး လည်ပတ်နေစဉ် လျှော်တေ ဝတ်ရုံရှည်ကို ဝတ်ဆင်ထားသော အဖိုးအိုတစ်ဦး လမ်းလျှောက်ထွက်လာခဲ့သည်။

​ထိုအဖိုးအို၏ မျက်နှာအမူအရာမှာ ခက်ထန်တည်ကြည်နေသည်။ သူ ထွက်လာသည်နှင့် ချက်ချင်း ကျူးယိုချိုက်ထံသို့ အကြည့် ပို့လွှတ်လိုက်ပြီးနောက် လက်သီးကိုဆုပ်ကာ သူ့အား ဦးညွှတ်လိုက်သည်။

​"စီနီယာ... စီနီယာ့ရဲ့ စွမ်းအားနဲ့ဆိုရင် ဒီနေရာကနေ ဘယ်သူ့ကို လာရှာတာလဲဆိုတာ သိပါရစေ" အဖိုးအိုက ခေါင်းကိုမော့ပြီး ဖြည်းညှင်းစွာ ပြောလိုက်သည်။

​"ဟုန်ကျူး" ကျူးယိုချိုက်သည် အခြေအနေများ လှည့်ပြန်၍ မရနိုင်သော အဆင့်အထိ ကြီးထွားမသွားစေချင်သဖြင့် တိုးညှင်းသော အသံဖြင့် ပြောလိုက်သည်။

​အဖိုးအိုသည် ခေတ္တမျှ စောင့်ဆိုင်းလိုက်သည်။ ဟုန်ကျူးမှာ ဂြိုဟ်များဖြင့် ဖွဲ့စည်းထားသော ဝဲဂယက်ကြီး အတွင်းမှ မိမိအလိုအလျောက် ထွက်မလာသည်ကို မြင်သောအခါ သူက မျက်မှောင်အနည်းငယ် ကြုတ်လိုက်ပြီး ကျူးယိုချိုက်အား ပြောလိုက်သည်။ "ဒီနေရာက ဒီမှာ တပ်စွဲထားတဲ့ မဟာလောကကြီး လေးခုရဲ့ အဓိက စခန်းပဲ။ ဒီမှာ နေတဲ့ လူအားလုံးက သူတို့ လုပ်ချင်တာကို လုပ်ဖို့ အပြည့်အဝ လွတ်လပ်ခွင့် ရှိကြတယ်။ ငါ့အနေနဲ့ အများကြီး ဝင်စွက်ဖက်ဖို့ မသင့်တော်ဘူး။ ဒီလူက ထွက်မလာချင်ဘူးဆိုမှတော့ ကျေးဇူးပြုပြီး ပြန်လှည့်သွားပါ၊ အစစ်အမှန် ယင်လောကရဲ့ ငြိမ်းချမ်းမှုကို မဖျက်ဆီးပါနဲ့"

​ဤစကားများကို ကြားလိုက်ရသောအခါ ကျူးယိုချိုက်၏ မျက်လုံးများထဲတွင် တောက်ပသော အလင်းတန်း တစ်တန်း ဖြတ်ပြေးသွားသည်။ သူသည် ဤနေရာမှ လူများကို လုံလောက်စွာ ငဲ့ညှာပေးခဲ့ပြီးပြီဟု ယုံကြည်ထားသည်။ အကယ်၍ သူသည် အတိတ်တုန်းက အစစ်အမှန် ယင်လောက၏ အဖွဲ့ဝင်တစ်ဦး မဟုတ်ခဲ့ပါက ဤကိစ္စကို ဂရုစိုက်နေမည် မဟုတ်ပေ။ သူ့ရှေ့ရှိ အဖိုးအိုက ဤကဲ့သို့ ပြောဆိုနေသည်ကို မြင်သောအခါ သူသည် အေးစက်စွာ နှာခေါင်းရှုံ့လိုက်ပြီး ရှေ့သို့ ခြေတစ်လှမ်း လှမ်းလိုက်တော့သည်။

​လျှော်တေ ဝတ်ရုံရှည်ကို ဝတ်ဆင်ထားသော အဖိုးအိုသည် ခန္ဓာကိုယ်ကို ဘေးသို့ စောင်းပေးလိုက်ပြီး သူ့အား တားဆီးခြင်းပင် မပြုခဲ့ပေ။ သူကိုယ်တိုင်လည်း သူ့စွမ်းအားဖြင့် သူ့ရှေ့မှ ရှင်ခြင်း နယ်ပယ် တန်ခိုးရှင်အား တားဆီးရန် အခွင့်အရေး မရှိကြောင်း သိရှိထားသည်။ သို့သော်လည်း ဤနေရာမှာ နတ်ဘုရား အနှစ်သာရ နယ်မြေတွင် တပ်စွဲထားသော အစစ်အမှန် ယင်လောက အင်အားစုများ၏ အဓိက စခန်း ဖြစ်သည်။ သူ နောက်သို့ ဆုတ်ခွာသွားစဉ် အဖိုးအို၏ မျက်နှာပေါ်တွင် တည်ငြိမ်သော အမူအရာတစ်ခု ရှိနေပြီး မည်သည့် စိတ်လှုပ်ရှားမှု အရိပ်အယောင်မျှ ပြောင်းလဲခြင်း မရှိခဲ့ပေ။

​ကျူးယိုချိုက်သည် ဝဲဂယက်ကြီး အနီးသို့ ချဉ်းကပ်သွားစဉ် ညာလက်ကို မြှောက်ကာ သူ့ရှေ့ရှိ ဂြိုဟ်များဖြင့် ဖွဲ့စည်းထားသော ဝဲဂယက်ကြီးဆီသို့ ဟင်းလင်းပြင်အား လှမ်း၍ ဆွဲကိုင်လိုက်သည်။ ထိုနှင့်အတူ ဝဲဂယက်ကြီးသည် ကျယ်လောင်သော ပေါက်ကွဲသံနှင့်အတူ တုန်ခါသွားတော့သည်။ ထိုအသံမှာ အလွန်ပင် ကျယ်လောင်သဖြင့် အရပ်မျက်နှာအနှံ့သို့ ပဲ့တင်ထပ်သွားပြီး နဂါးငွေ့တန်း တစ်ခုလုံး တုန်လှုပ်ကာ အဆုံးမရှိသော ဂယက်လှိုင်းများ ပေါ်ပေါက်လာစေတော့သည်။

​ဝုန်း...

​ဝဲဂယက်ကြီးနှင့် နဂါးငွေ့တန်းတို့ တုန်လှုပ်နေစဉ် ကျူးယိုချိုက်သည် လက်မောင်းများကို မြှောက်ကာ ဟင်းလင်းပြင်အား ဆွဲဖြဲပစ်လိုက်သကဲ့သို့ ဝဲဂယက်ကြီးအား ပြင်းထန်စွာ ဆွဲဖြဲလိုက်တော့သည်။ ထိုနှင့်အတူ နဂါးငွေ့တန်း၏ တုန်ခါမှုများမှာ ပိုမို ပြင်းထန်လာခဲ့သည်။ ရေတွက်၍ မရနိုင်သော ဂြိုဟ်များ တုန်ရီသွားပြီး ကြီးမားသော မြူခိုးထုကြီး ပေါက်ကွဲထွက်လာခဲ့သည်။ ရက်စက်ကြမ်းကြုတ်သော ဆွဲဖြဲမှုနှင့်အတူ နဂါးငွေ့တန်းထဲ၌ ကြီးမားသော အက်ကြောင်းကြီး တစ်ကြောင်း ချက်ချင်း ပေါ်ပေါက်လာခဲ့သည်။ ထိုအက်ကြောင်း ဖြတ်သန်းသွားသောအခါ ဝဲဂယက်ကြီးအား ထက်ပိုင်း ပိုင်းဖြတ်ပစ်တော့မည့်အလား ထင်မှတ်ရသည်။

​သူ၏ ရှင်ခြင်း နယ်ပယ် စွမ်းအားများမှာ မည်သည့် ထိန်းချန်မှုမျှ မရှိဘဲ အပြင်သို့ လျှံထွက်လာခဲ့သည်။ ယင်းသည် နဂါးငွေ့တန်း၏ ထောင့်စွန်းတိုင်းသို့ ပြည့်နှက်သွားပြီး ဝဲဂယက် အတွင်းရှိ ရေတွက်၍ မရနိုင်သော ဂြိုဟ်များကို ပြင်းထန်စွာ တုန်ခါသွားစေကာ တံခါးပိတ်ကျင့်ကြံနေသော လူအများအပြားအား ထိတ်လန့် နိုးကြားသွားစေသည်။ ဟုန်ကျူး ရှိရာ ဂြိုဟ်ပေါ်ရှိ သဲကန္တာရကြီးမှာ တုန်လှုပ်သွားခဲ့သည်။ ကောင်းကင်ယံမှာ ကမောက်ကမ ဖြစ်သွားသည်။ နန်းတော်အတွင်းရှိ ဖယောင်းတိုင်မီးမှာ ပြင်းထန်စွာ လှုပ်ခတ်သွားပြီး အမျိုးသမီးတစ်ဦး၏ မျက်နှာကို ထင်ဟပ်ပေါ်ပေါက်စေသည်။ သူမ၏ မျက်နှာမှာ ခက်ထန်ညိုမှောင်နေပြီး မျက်လုံးများထဲတွင် အလင်းတန်းများ ဖြတ်ပြေးနေကာ နှုတ်ခမ်းထောင့်တွင် အေးစက်သော လှောင်ပြုံးတစ်ခု ပေါ်ပေါက်နေတော့သည်။

​"ကိုယ့်အရည်အချင်းကိုယ် မသိတာပဲ။ နင်က ရှင်ခြင်း နယ်ပယ်မှာ ရှိနေရင်ရော ဘာဖြစ်လဲ။ အပြင်လောကမှာသာဆိုရင် ငါ သေချာပေါက် သေရမှာ ဆိုပေမဲ့ ဒါက အစစ်အမှန် ယင်လောကရဲ့ အဓိက စခန်းပဲ။ ဒီမြေရဲ့ နိယာမတွေက ငါ အပြင်မထွက်ချင်ဘူးဆိုရင် ဘယ်သူမှ ငါ့ကို အတင်းအကျပ် ထွက်သွားအောင် မလုပ်နိုင်ဘူးလို့ သတ်မှတ်ထားတယ်"

​"ငါ့ကို ဒီနေရာကနေ အတင်းအကျပ် ထွက်သွားခိုင်းမယ်ဆိုရင် အစစ်အမှန် ယင်လောက တစ်ခုလုံးရဲ့ သိက္ခာ ညှိုးနွမ်းသွားလိမ့်မယ်။ ဝဲဂယက်ထဲက မှော်သင်္ကေတသာ ဆွဲဲဖြဲခံလိုက်ရရင်လည်း အစစ်အမှန် ယင်လောကရဲ့ သိက္ခာက ညှိုးနွမ်းသွားဦးမှာပဲ။ စစ်မှန်တဲ့ လောကတစ်ခု အတွက်တော့ သူတို့ရဲ့ သိက္ခာက အလွန် အရေးကြီးတယ်"

​"ငါ အပြင်မထွက်သရွေ့တော့ ဘယ်သူမှ ငါ့ကို ဘာမှ လုပ်နိုင်မှာ မဟုတ်ဘူး"

​ဖယောင်းတိုင် မီးတောက်ထဲမှ အမျိုးသမီး၏ ခက်ထန်သော မျက်နှာက အေးစက်စွာ လှောင်ရယ်လိုက်သည့် အခိုက်အတန့်တွင် သူမသည် ဂြိုဟ်များဖြင့် ဖွဲ့စည်းထားသော ဝဲဂယက်ကြီး၏ အောက်ခြေနက်ရှိုင်းသော နေရာမှ အရပ်မျက်နှာအနှံ့သို့ ဖြည်းညှင်းစွာ ပျံ့လွင့်လာကာ ဝဲဂယက် ပြင်ပသို့ စီးဆင်းသွားသည့် ရှေးဟောင်းအသံ တစ်သံကို ချက်ချင်း ကြားလိုက်ရသည်။ ထိုအသံကို ကြားလိုက်ရသည့် အခိုက်အတန့်တွင် သူမ၏ နှုတ်ခမ်းထောင့်မှ အေးစက်သော လှောင်ပြုံးမှာ ပိုမို ကြီးမားလာတော့သည်။

​"မင်းက အခု စိတ်အာရုံ စတင် ဖြစ်တည်လာပြီ ဖြစ်ပေမဲ့ မင်းရဲ့ ခန္ဓာကိုယ်ကတော့ မပြီးမြောက်သေးဘူး။ မင်းကို ငါ့ရဲ့ ရှင်ခြင်း နယ်ပယ်က မိတ်ဆွေတစ်ဝက်လို့ သတ်မှတ်လို့ရပါတယ်။ မင်းရဲ့ ကျင့်ကြံခြင်း လမ်းစဉ်မှာ အခက်အခဲတွေ အများကြီး ကြုံတွေ့ခဲ့ရမှာဖြစ်ပြီး ငါတို့ရဲ့ အတိတ်ကို ငဲ့ညှာတဲ့အနေနဲ့ မင်း အစစ်အမှန် ယင်လောကရဲ့ အဓိက စခန်းကို ကျူးကျော်ဝင်ရောက်ခဲ့တဲ့ ကိစ္စကို ငါ အရေးယူမှာ မဟုတ်ဘူး။ ပြန်လှည့်သွားပါတော့..." ထိုအိုမင်းသော အသံမှာ ပိုင်ရှင်သည် နှစ်ပေါင်းများစွာ စကားမပြောခဲ့ရ သကဲ့သို့ပင် ဖြစ်သည်။ စကားလုံးများမှာ အနည်းငယ် ထစ်ငေါ့နေပြီး ထိုထဲတွင် အဆုံးမရှိသော ရှေးဟောင်း အငွေ့အသက်များ ကိန်းအောင်းနေသည်။ အသံသည် ဟင်းလင်းပြင်ထဲသို့ ပျံ့လွင့်သွားသောအခါ ကြားလိုက်ရသူ အားလုံးကို ထိုအသံထံမှ အချိန်များ ကုန်ဆုံးသွားသကဲ့သို့ ခံစားရစေသည်။ ထိုအသံနှင့်အတူ သူတို့၏ သွေးသား၊ အနှစ်သာရ၊ အသက်စွမ်းအားနှင့် ကျင့်ကြံခြင်း အဆင့်များပင်လျှင် ညှိုးနွမ်း အနွမ်းဖတ်သွားတော့မည်ကဲ့သို့ မှားယွင်းသော ခံစားချက်တစ်ခု ပေါ်ပေါက်လာစေသည်။

​ကျူးယိုချိုက်အတွက်မူ ပို၍ပင် ဆိုးရွားသည်။ သူ့ခန္ဓာကိုယ်မှာ အလျင်အမြန် တုန်ရီသွားပြီး မျက်လုံးများထဲတွင် ရှုပ်ထွေးသော အမူအရာတစ်ခု ပေါ်ပေါက်လာခဲ့သည်။ ထိုပုဂ္ဂိုလ်မှာ သူ့အား သေချာပေါက် မှတ်မိနေပြီး သူကိုယ်တိုင်လည်း ထိုစကားများကို ပြောဆိုနေသူအား မှတ်မိသည်။ ထိုသူမှာ အစစ်အမှန် ယင်လောကရှိ သူ၏ စီနီယာ အကြီးအကဲများအနက် တစ်ဦး ဖြစ်သည်။

​သူ၏ တိတ်ဆိတ်မှုကြားတွင် ကျူးယိုချိုက်၏ မျက်လုံးများထဲ၌ တောက်ပသော အလင်းတန်း တစ်ချက် ဖြတ်ပြေးသွားသည်။ သူသည် နောက်မဆုတ်ဘဲ ရှေ့သို့ တိုးကာ ဂြိုဟ်များဖြင့် ဖွဲ့စည်းထားသော ဝဲဂယက်ကြီးဆီသို့ ပြေးဝင်သွားတော့သည်။

​"ငါ ဒီနေ့ လူတစ်ယောက်ကိုပဲ လာခေါ်တာ။ မင်း မှော်သင်္ကေတကို မဖွင့်ပေးဘူးဆိုရင် ငါ ထွက်သွားမှာ မဟုတ်ဘူး"

​သို့သော်လည်း ကျူးယိုချိုက်သည် ဂြိုဟ်များဖြင့် ဖွဲ့စည်းထားသော ဝဲဂယက်ကြီး အနီးသို့ ချဉ်းကပ်မိသည့် အခိုက်အတန့်တွင် ဝဲဂယက် အတွင်းမှ သက်ပြင်းချသံ တစ်သံ ထွက်ပေါ်လာခဲ့ပြီး ၎င်းနှင့်အတူ ကြီးမြတ်သော စွမ်းအားကြီးမားသည့် ဖိအားတစ်ခု ပါဝင်သော တွန်းကန်အား တစ်ခု ချက်ချင်း ပေါ်ထွက်လာခဲ့သည်။ ဝုန်းခနဲ အသံနှင့်အတူ တွန်းအားသည် ကျူးယိုချိုက် ပေါ်သို့ ကျရောက်သွားသည်။ ကျူးယိုချိုက် တုန်ရီသွားပြီး နောက်သို့ ခြေလှမ်းအနည်းငယ် ယိုင်ထွက်သွားခဲ့ရသည်။ သူ့ခန္ဓာကိုယ် ပတ်ပတ်လည်ရှိ ဧရိယာမှာ ချက်ချင်း ပုံပျက်သွားပြီး ကြီးမားသော အလင်းကွင်းကြီး တစ်ကွင်းက သူ့ခန္ဓာကိုယ် တစ်ကိုယ်လုံးကို ချက်ချင်း ဝန်းရံပိတ်ဆို့လိုက်တော့သည်။ သူသည် ချိတ်ပိတ်ခံလိုက်ရပြီး နဂါးငွေ့တန်းထဲတွင် ပေါလောပေါ်နေသော ရေပူဖောင်း တစ်လုံးအလား ပြောင်းလဲသွားခဲ့သည်။

​"အရှင်သခင် နယ်ပယ်ကလူကို သတ်ပစ်၊ ရှင်ခြင်း နယ်ပယ်ကလူကို မောင်းထုတ်... နံနက်ခင်း တာအိုဂိုဏ်းက ကောင်လေးကိုတော့ အခြားသူတွေကို သတိပေးတဲ့ အနေနဲ့ အစွမ်းမဲ့အောင် လုပ်ပစ်လိုက်စမ်း" ထိုအိုမင်းသော အသံ ထပ်မံ ပေါ်ထွက်လာသောအခါ သက်လတ်ပိုင်း အမျိုးသမီး၏ မျက်နှာပေါ်တွင် လှောင်ပြုံးတစ်ခု ပေါ်ပေါက်လာခဲ့သည်။ သူမသည် ခြေတစ်လှမ်း လှမ်းကာ စုမင်ထံသို့ ပြေးဝင်သွားတော့သည်။

​သူ့ဘေးရှိ သက်လတ်ပိုင်း အမျိုးသားသည်လည်း စိတ်ထဲတွင် သက်ပြင်းတစ်ချက် ချလိုက်နိုင်သည်။ သူသည်လည်း တည်ငြိမ်သော အမူအရာနှင့်အတူ စုမင်ထံသို့ ချဉ်းကပ်သွားခဲ့သည်။

​လျှော်တေ ဝတ်ရုံရှည်ကို ဝတ်ဆင်ထားသော အဖိုးအိုနှင့် ကျူးယိုချိုက်၏ ကျင့်ကြံခြင်း အဆင့်ကို ခန့်မှန်းနိုင်ခဲ့သော အဖိုးအိုတို့သည် တိတ်ဆိတ်သွားကြသည်။ သူတို့အနက် တစ်ဦးက မီးတောက်မိစ္ဆာ ဘိုးဘေးထံသို့ ခြေလှမ်းလှမ်းလိုက်ပြီး အခြားတစ်ဦးမှာမူ စုမင်ထံသို့ လျှောက်လှမ်းသွားခဲ့သည်။

​ချိတ်ပိတ်ခံထားရသော ကျူးယိုချိုက်သည် ဤမြင်ကွင်းကို မြင်သောအခါ သက်ပြင်း တစ်ချက် ခိုးချလိုက်မိသည်။ သူသည် စုမင်၏ နှုတ်ခမ်းထောင့်တွင် တတိယအကြိမ်မြောက် ရက်စက်ကြမ်းကြုတ်သော အပြုံး ပေါ်ပေါက်လာသည်ကို မြင်လိုက်ရပြီး မျက်လုံးများအား မှိတ်ထားလိုက်တော့သည်။

​ထိုအခိုက်အတန့်တွင် ပတ်ပတ်လည်ရှိ သောင်းနှင့်ချီသော ကျင့်ကြံသူများသည် ရန်လိုသော အမူအရာများ ရှိနေကြသည်။ သူတို့သည် ကိုယ်ထင်မပြကြသော်လည်း ထိုဧရိယာကို ဝန်းရံကာ သူတို့အား သီးသန့်ခွဲထုတ်ရန် ကြီးမားသော မှော်သင်္ကေတ တစ်လုံးကို ဖွဲ့စည်းလိုက်ကြသည်။ သူတို့ ပတ်ပတ်လည်တွင် ဝိုင်းရံလိုက်ကြစဉ် မှော်သင်္ကေတမှာ ဟိန်းဟောက်လာပြီး ပိတ်မိနေသော စုမင်နှင့် မီးတောက်မိစ္ဆာ ဘိုးဘေးတို့ကို သိမ်းကျုံးကာ အစစ်အမှန် ယင်လောက အင်အားစုများ တပ်စွဲထားရာ စခန်းပြင်ပသို့ ရွှေ့ပြောင်းပစ်ရန် ရည်ရွယ်ထားသော စွမ်းအားကြီးမားသည့် တွန်းကန်အားတစ်ခုအဖြစ် ပြောင်းလဲသွားတော့သည်။

​ထိုအခိုက်တွင် အစွန်းပိုင်း ဧရိယာမှ ကြီးမားသော အခြေခံဂြိုဟ် အချို့သည်လည်း မျောလွင့်လာခဲ့သည်။ ၎င်းတို့ထံမှ ထွက်ပေါ်နေသော အလင်းတန်းမှာ ပေပေါင်း ရာထောင်ချီအဖြစ် ရောက်ရှိနေသည်။ ထိတ်လန့်ဖွယ်ကောင်းသော အငွေ့အသက်များမှာလည်း ၎င်းတို့ထံမှ ပျံ့လွင့်လာခဲ့သည်။ ဤသည်မှာ အစစ်အမှန် ယင်လောကသည် သူတို့၏ စခန်းအတွင်း စုဆောင်းထားသော စွမ်းအား အားလုံးကို အသက်သွင်းလိုက်ခြင်း ဖြစ်သည်။ ဤစွမ်းအားများနှင့်အတူ ကျူးယိုချိုက်၏ ကူညီမှုမရှိဘဲ သူတို့သည် စုမင်နှင့် မီးတောက်မိစ္ဆာ ဘိုးဘေးတို့ကို သတ်ပစ်ရန် စွမ်းဆောင်နိုင်ပုံရသည်။

​မီးတောက်မိစ္ဆာ ဘိုးဘေးထံတွင်မူ အနည်းငယ်မျှပင် ကြောက်ရွံ့ခြင်း မရှိချေ။ ထို့ပြင် သူက အေးစက်စွာ စတင် ရယ်မောလိုက်တော့သည်။ သူ့မျက်နှာပေါ်တွင် စိတ်လှုပ်ရှားတက်ကြွသော အမူအရာတစ်ခု ပေါ်ပေါက်လာစဉ် စုမင်၏ မျက်နှာပေါ်မှ အပြုံးမှာ ပိုမို ကျယ်ပြန့်လာခဲ့သည်။

​"ဒါဆိုရင်တော့ ဒီနေရာမှာ တပ်စွဲထားတဲ့ အင်အားစုလေးခုထဲက တစ်ခုက ပျောက်ကွယ်သွားသင့်ပြီ" စုမင်သည် ညာလက်ကို မြှောက်ကာ သူ့အထက်ရှိ နဂါးငွေ့တန်းဆီသို့ အလျင်အမြန် ညွှန်ပြလိုက်သည်။ ထိုနှင့်အတူ သူ့ဆံပင်ရှည်များသည် အရောင်အလျင်အမြန် ပြောင်းလဲသွားပြီး နီရဲသော အရောင်အဖြစ် ပြောင်းလဲသွားတော့သည်။ သူ့မျက်လုံးများထဲတွင် နီရဲသော အလင်းတန်းများ တောက်ပလာပြီး ပြင်းထန်သည့် သတ်ဖြတ်လိုစိတ်များမှာ စုမင်၏ ခန္ဓာကိုယ်ထဲမှ ဝုန်းခနဲ အသံနှင့်အတူ ချက်ချင်း ပေါက်ကွဲထွက်လာတော့သည်။

​သတ်ဖြတ်လိုစိတ်များ ပေါက်ကွဲထွက်လာသည်နှင့် သူတို့အထက်ရှိ နဂါးငွေ့တန်းသည်လည်း ထိုအခိုက်အတန့်တွင်ပင် ပြင်းထန်စွာ တုန်ခါသွားခဲ့သည်။ ဟင်းလင်းပြင်ထဲမှ မမြင်နိုင်သော စွမ်းအားတစ်ခုသည် ကျယ်လောင်သော မြည်ဟည်းသံနှင့်အတူ မြေပြင်ပေါ်သို့ အလျင်အမြန် ဖိနှိပ်ချလိုက်တော့သည်။

​နဂါးငွေ့တန်း တစ်ခုလုံး တုန်လှုပ်သွားခဲ့သည်။ မြည်ဟည်းသံများ ကောင်းကင်ယံကို တုန်ခါသွားစေစဉ် ဤမြေပေါ်ရှိ တန်ခိုးရှင်များ၏ မျက်နှာအမူအရာများမှာ ယခင်က တစ်ခါမျှ မဖြစ်ဖူးလောက်အောင် ပြင်းထန်စွာ ပြောင်းလဲသွားကြပြီးနောက် နဂါးငွေ့တန်းထဲတွင် ပဉ္စမမြောက် မီးဖို၏ အစိတ်အပိုင်း တစ်ခု ပေါ်ထွက်လာခဲ့တော့သည်။