အခန်း ၁၃၁၃
Vol. 115 Ch. 1313
အခန်း ၁၃၁၃
“သုံးရက် ဟုတ်လား။ ကောင်းပြီလေ။ ဒါဆိုရင်လည်း မင်းတို့အားလုံး သုံးရက် စောင့်လိုက်ကြပေါ့။ သုံးရက်ကြာလို့မှ ငါ အသက်ရှင်နေသေးရင် ပစ္စည်းစျေးနှုန်းအားလုံးကို နောက်ထပ် တစ်ဆ ထပ်မြှင့်မယ်။”
ရှောင်းယီက ဂရုချက်ထဲတွင် ပြောလိုက်သည်။
“အော်... ဒါနဲ့ ငါ့ဆီမှာ ဒါလည်း ရှိသေးတယ်နော် - ရေသန့်စက် (C အဆင့်) ၁။”
ရှောင်းယီ၏ စကားကို မြင်လိုက်ရသောအခါ ထိုအသက်ရှင်ကျန်ရစ်သူများ ချက်ချင်း စိတ်ဓာတ်ကျ ပျက်စီးသွားကြတော့သည်။
အထူးသဖြင့် အဆုံးနားက ရေသန့်စက်ကြီးကြောင့် ဖြစ်သည်။
“အမလေး ဘုရားရေ... သူဌေးမှာ ရေသန့်စက်တောင် ရှိနေတာပဲ။ သုံးရက်မကလို့ သုံးလတောင် သူ တောင့်ခံနိုင်တယ်။”
“မင်းတို့လို အရူးတွေက ကိုယ့်ကိုယ်ကိုယ် တော်လှပြီ ထင်နေတာပဲ။ မင်းတို့စကားကိုသာ နားထောင်မိရင် ငါတို့တစ်နှစ်လုံး အခွင့်အရေးတွေ ဆုံးရှုံးရတော့မယ်။”
“တော်ပြီ။ မင်းတို့ ကြိုက်သလို ကစားကြတော့။ ငါမပါတော့ဘူး။ ငါ သူဌေးနဲ့ သွားလဲတော့မယ်။ ငါ့ဆီမှာ ရေသန့်တွေ အများကြီး ရှိသေးတယ်။”
ရှောင်းယီ အများသုံးချန်နယ်တွင် တင်လိုက်သော ရေသန့်စက်သည် စျေးနှိမ်ရန် ဖွဲ့စည်းထားသည့် မဟာမိတ်အဖွဲ့ကို အစအနမကျန် ချေမှုန်းပစ်လိုက်၏။
တဒင်္ဂအတွင်း လူအများအပြားသည် ရှောင်းယီထံသို့ သီးသန့်မက်ဆေ့ခ်ျများ ပေးပို့ကာ ရေသန့်နှင့် လဲလှယ်ရန် မျှော်လင့်နေကြသည်။
ရှောင်းယီသည် မိမိ၏ သီးသန့်မက်ဆေ့ခ်ျများကို ပိတ်လိုက်ပြီးနောက် လောင်စာဆီ၊ လျှပ်စစ်ဓာတ်အားနှင့် အောက်ဆီဂျင်တို့ကို ရေသန့်နှင့် လဲလှယ်မည့် အရောင်းအဝယ်များကို ဈေးကွက်ခန်းမတွင် ချက်ချင်း တင်လိုက်သည်။ စျေးနှုန်းများမှာမူ သေချာပေါက် နှစ်ဆ ဖြစ်သွားခဲ့ပြီဖြစ်သည်။
ဤဖြစ်ရပ် ဖြစ်ပွားပြီးနောက် ရှောင်းယီသည် သူတို့ကို နောက်ထပ် အလိုလိုက်တော့မည်မဟုတ်ပေ။
“မင်းတို့အားလုံး ငါနဲ့ ရေသန့် လဲချင်ကြတယ်ဆိုလို့ ငါ ဈေးကွက်ခန်းမမှာ တင်ပေးထားတယ်။ အရောင်းအဝယ်လုပ်တာက လုံးဝ စေတနာအလျောက်ပဲ။”
ရှောင်းယီက အများသုံးချန်နယ်တွင် ပြောလိုက်သည်။
လူတိုင်း အပြေးအလွှား သွားကြည့်လိုက်ကြသော်လည်း စျေးနှုန်းမှာ ပထမအကြိမ်ထက် နှစ်ဆ တက်သွားသည်ကို တွေ့လိုက်ရသဖြင့် အားလုံး စိတ်ပျက်လက်ပျက် ဖြစ်သွားကြတော့သည်။
“ဆရာကြီး စျေးလေး နည်းနည်းလောက် ပြန်ချပေးလို့ မရဘူးလား။ တော်တော်လေး စျေးကြီးနေလို့ပါ။”
“ဟုတ်ပါတယ်။ ကျွန်တော်တို့ မှားသွားမှန်း သိပါပြီ။ ကျေးဇူးပြုပြီး သနားညှာတာပြီး စျေးနှုန်းလေး လျှော့ပေးပါဦး။”
“ကျွန်တော်တို့ နောက်နောင် သူဌေးကို ဒီလိုမျိုး ဘယ်တော့မှ မခြိမ်းခြောက်တော့ပါဘူး။ ကျေးဇူးပြုပြီး ခွင့်လွှတ်ပေးပါ။”
“အမှားလုပ်မိရင် အကျိုးဆက်ကို ခံစားရမှာပဲ။ ဒါက အကျိုးဆက်ပဲ။”
ရှောင်းယီက အေးစက်စွာ ပြန်ဖြေလိုက်သည်။
“ငါ ထပ်လောင်းပြောလိုက်မယ်။ အရောင်းအဝယ်လုပ်တာက လုံးဝ စေတနာအလျောက်ပဲ။”
“ဆရာကြီး ဒါက နည်းနည်းတော့ မတရားဘူး မဟုတ်ဘူးလား။”
“မတရားဘူး ဟုတ်လား။ စောစောက မင်းတို့လုပ်ခဲ့တာကျတော့ တရားလို့လား။”
ရှောင်းယီက ပြန်ချေပလိုက်သည်။
“ကျွန်တော် အဲဒီထဲမှာ မပါဝင်ခဲ့ပါဘူး။ သူတို့တွေပဲ လုပ်ကြတာပါ။”
“မင်းတို့ရဲ့ နှုတ်ဆိတ်နေမှုက သူတို့ရဲ့ မောက်မာမှုကို အားပေး အားမြှောက် ပြုလိုက်တာပဲ။”
ရှောင်ယီက ပြန်ပြောလိုက်သည်။
“ဘာပဲဖြစ်ဖြစ် အခုစျေးနှုန်းက ဒါပဲ။ စေတနာအလျောက် လဲလှယ်နိုင်တယ်။ စျေးကြီးတယ်လို့ ထင်ရင် မဝယ်ဘဲ နေနိုင်တယ်။”
မည်သို့မျှ ရွေ့လျား၍မရသော ရှောင်းယီနှင့် ရင်ဆိုင်လိုက်ရသောအခါ အသက်ရှင်ကျန်ရစ်သူအားလုံး အားကိုးရာမဲ့သွားခဲ့ကြသည်။
သို့သော် နောက်တစ်ဦးချင်းစီတွင်မူ လူတိုင်း၏ ပစ်မှတ်မှာ စျေးနှိမ်ရန် ဦးဆောင်ခဲ့ကြသည့် လူအနည်းငယ်ထံသို့ ချက်ချင်း ပြောင်းလဲဦးတည်သွားတော့သည်။
“ဒါတွေ အားလုံး မင်းတို့လို အရူးတွေကြောင့်ပဲ။ မင်းတို့သာ မရှိရင် အခုလို စျေးတွေ အများကြီး ကြီးနေမှာ မဟုတ်ဘူး။”
“ဟုတ်တယ်။ အားလုံး သူတို့အပြစ်တွေပဲ။ ချီးပဲ... နောက်နောင် သူတို့ကို မြင်ရတဲ့အချိန်တိုင်း ငါ ကျိန်ဆဲပစ်မယ်။”
“ဆဲနေလို့ကော ဘာထူးမှာလဲ။ မြင်ရတဲ့အချိန်တိုင်း ထိုးပစ်ကြရမှာ။”
“ငါတို့က သူတို့ဆီ သွားလို့မရဘူးလေ။ အများသုံးချန်နယ်ထဲမှာပဲ ဆဲနိုင်တာ။”
“ဒီပြဿနာရှာတဲ့ကောင်တွေက ငါတို့ ဂလက်ဆီရဲ့ စျေးကွက်တစ်ခုလုံးကို ဖျက်ဆီးပစ်လိုက်ပြီပဲ။”
ဤအချိန်တွင် ရှောင်းယီ ဈေးကွက်ခန်းမ၌ တင်ထားသော အရောင်းအဝယ်အချို့မှာ စတင်ကာ အောင်မြင်နေပြီဖြစ်သည်။
ထိုအချိန်တွင် သီးသန့်ချတ်ချန်နယ်၌ လုမေယွီကလည်း အရောင်းအဝယ်တစ်ခု ပေးပို့လာသည်။
“ရေသန့် ၁ ကီလိုဂရမ် - အခမဲ့လဲလှယ်ခြင်း။”
“သူဌေး စောစောက ကျွန်တော် ရိက္ခာသေတ္တာတွေ လိုက်သိမ်းနေလို့ အများသုံးချန်နယ်ကို သတိမထားမိလိုက်ဘဲ မင်းကို အချိန်မီ မထောက်ခံပေးနိုင်ခဲ့ဘူး။ ကျေးဇူးပြုပြီး ခွင့်လွှတ်ပေးပါ။”
လုမေယွီက ရှင်းပြလိုက်သည်။
“ကျွန်တော့်ဆီမှာ ရေသန့် အချို့ ရှိနေသေးလို့ ဒါကို အရင်ပေးလိုက်ပါတယ်။”
လုမေယွီ၏ ရှင်းပြချက်ကို မြင်သောအခါ ရှောင်းယီ ပြုံးလိုက်သည်။ လုမေယွီ အမှန်အတိုင်း ပြောနေခြင်း ဟုတ်၊ မဟုတ်ကို သူဂရုမစိုက်ပေ။ အနည်းဆုံးတော့ ထိုသူ၏ သဘောထားမှာ လက်ခံနိုင်လောက်စရာ ရှိပေသည်။
အရောင်းအဝယ်ကို လက်ခံလိုက်သည်။
“ရပါတယ်။ ငါလည်း အားလုံးနဲ့ ပေါ့ပေါ့ပါးပါး စကားပြောနေရုံတင်ပါ။ တကူးတက ထောက်ခံပေးဖို့ မလိုပါဘူး။”
ရှောင်းယီက ပြန်ဖြေလိုက်သည်။
ရှောင်ယီသည် လုမေယုယွီထံသို့ ပစ္စည်းကောင်းအချို့ ပေးအပ်ထားဖူးသဖြင့် လုမေယွီ ပေးလာသည့် ဤရေ တစ်ကီလိုဂရမ်ကို ငြင်းပယ်နေစရာ မလိုတော့ပေ။
ရှောင်းယီက မိမိ၏ အရောင်းအဝယ်ကို လက်ခံလိုက်သည်ကို မြင်သောအခါ လုမေယွီလည်း အတန်ငယ် စိတ်သက်သာရာရသွားခဲ့သည်။
ဤအရောင်းအဝယ်ကို လက်ခံလိုက်ခြင်းသည် သူ့စေတနာကို လက်ခံလိုက်ခြင်းဖြစ်ရာ အနည်းဆုံးတော့ ဆက်ဆံရေးကို ဆက်လက်ထိန်းသိမ်းထားနိုင်ခဲ့ပြီ ဖြစ်သည်။
“သူဌေး ခင်ဗျားဆီမှာ ရေသန့် တကယ်ပဲ ပြတ်လပ်နေလို့လား။”
လုမေယွီက စူးစမ်းလိုစိတ်ဖြင့် မေးလိုက်သည်။
“ဟုတ်တယ်။ ငါ ပစ္စည်းအချို့ စိုက်ပျိုးထားလို့ ရေလောင်းဖို့အတွက် ရေသန့် လိုအပ်နေတယ်။”
ရှောင်းယီက ပြန်ဖြေလိုက်သည်။
ရှောင်းယီ၏ အဖြေကို ကြားလိုက်ရသောအခါ လုမေယွီ၏ မျက်လုံးများ တောက်ပသွားပြီး စူးစမ်းလိုစိတ်ဖြင့် အလျင်အမြန် မေးလိုက်သည်။
“သူဌေး ခင်ဗျား မြေကြီး ရှာတွေ့သွားပြီလား။”
“ဟုတ်တယ်။ အဲဒါက ဗာမီကျူလိုက်လို့ ခေါ်တဲ့ အရာတစ်ခုပဲ။ အာကာသစိုက်ပျိုးရေးအတွက် မြေကြီးနေရာမှာ သုံးလို့ရတယ်။”
ရှောင်းယီက ရှင်းပြလိုက်သည်။
“ဒါဆိုရင် သူဌေး... ခင်ဗျား အာလူးတွေ စိုက်လို့ အောင်မြင်ရင် ကျွန်တော့်ကိုလည်း အချို့ ရောင်းပေးဖို့ မမေ့နဲ့ဦးနော်။”
လုမေယွီက အလျင်အမြန် ပြောလိုက်သည်။
လုမေယွီသည် ရှောင်းယီ စိုက်ပျိုးတော့မည့်အရာမှာ မိမိပေးထားခဲ့သည့် အာလူးများဖြစ်လိမ့်မည်ဟု ထင်မှတ်နေခြင်း ဖြစ်သည်။
“ပြဿနာမရှိဘူး။”
ရှောင်းယီက ပြုံးလိုက်ပြီး ထပ်ပြီး အကျယ်တဝင့် ရှင်းမပြတော့ပေ။
“ဒါဆိုရင် ကျေးဇူးအများကြီးတင်ပါတယ် သူဌေး။”
လုမေယွီက ဝမ်းသာအားရ ပြောလိုက်သည်။
ယီရန်ပင်းသည် ဗာမီကျူလိုက်ကို ရှာဖွေတွေ့ရှိထားပြီးပြီဖြစ်ရာ သူသည် အစားအစာများကို အစဉ်မပြတ် စိုက်ပျိုးထုတ်လုပ်နိုင်တော့မည်ဟု ဆိုလိုခြင်း ဖြစ်သည်။ ဤနေရာရှိ အဓိက အစားအစာ ထုတ်လုပ်သူကြီးနှင့် ကောင်းမွန်သော ဆက်ဆံရေးတစ်ခု ထိန်းသိမ်းထားရန်မှာ အလွန်ပင် အရေးကြီးလှပေသည်။
“မလိုပါဘူး။”
ရှောင်းယီက ပြန်ဖြေလိုက်သည်။
ထိုအချိန်တွင် ကျူးဝူကလည်း ရှောင်းယီထံသို့ သီးသန့်မက်ဆေ့ခ်ျတစ်ခု ပေးပို့လာခဲ့သည်။
“သူဌေး သူတို့တွေ အရှုံးပေးသွားကြပြီလား။”
“သေချာတာပေါ့။ အခု ငါတို့ဆီမှာ ရေသန့်တွေ အရမ်းပေါနေပြီ။ မင်း ကြိုက်သလောက် သောက်လို့ရတယ်။”
ရှောင်းယီက ပြုံးကာ ပြန်ဖြေလိုက်သည်။
“သူဌေးကတော့ လန်းတယ်ဗျို့။”
ကျူးဝူက ဝမ်းသာအားရ ပြောလိုက်သည်။
“ဒီကျေးဇူးကန်းတဲ့ ကောင်တွေ အလွန်ဆုံး တောင့်ခံနိုင်ရင် နာရီဝက်ပဲလို့ ကျွန်တော် ပြောခဲ့သားပဲ။ အခုကြည့်ရတာ နာရီဝက်တောင် မခံဘူးပဲ။”
ရှောင်းယီက ပြုံးလိုက်သည်။
“ဒါက ဈေးကွက်လက်ဝါးကြီးအုပ်ခြင်းရဲ့ အားသာချက်ပဲလေ။”
ကျူးဝူက ခေါင်းညိတ်လိုက်ပြီးနောက် စူးစမ်းလိုစိတ်ဖြင့် မေးလာခဲ့သည်။
“သူဌေး... သူဌေးက ဟိုက်ဒရိုဂျင်နဲ့ အောက်ဆီဂျင်ကို ထုတ်လုပ်နိုင်ပြီး ဟိုက်ဒရိုဂျင်အရည်နဲ့ အောက်ဆီဂျင်အရည် လောင်စာဆီတွေကိုလည်း လုပ်နိုင်နေတာပဲကို ဘာလို့ ဟိုက်ဒရိုဂျင်နဲ့ အောက်ဆီဂျင် လောင်ကျွမ်းမှုကို တိုက်ရိုက်အသုံးပြုပြီး ရေသန့်ကို မယူတာလဲ။”
“အဲဒါကို ငါ အရင်ကတည်းက စမ်းသပ်ကြည့်ပြီးပြီ။”
ရှောင်းယီက ရှင်းပြလိုက်သည်။
“ငါ လျှပ်စစ်ဓာတ်ခွဲပြီး ရလာတဲ့ ဟိုက်ဒရိုဂျင်နဲ့ အောက်ဆီဂျင်ကို ရှို့လိုက်လို့ ရလာတဲ့ ရေက ကျွန်းအထိမ်းအမှတ်ကျောက်တိုင်ပေါ်မှာ [ရေ] လို့ပဲ ပြနေတုန်းပဲ။ [ရေသန့်] လို့ မပြဘူး။ အဲ့ဒါကြောင့် ဒီလိုရှို့လို့ ရလာတဲ့ရေက ရေသန့်စက်ကို ဖြတ်ဖို့ လိုနေသေးတုန်းပဲ။”
ကျူးဝူသည် ရုတ်တရက် သဘောပေါက်သွားကာ ခေါင်းညိတ်လိုက်သည်။ ရှောင်းယီက ပြုံးကာ ဆက်ပြောလိုက်သည်။
“တကယ်လို့ ဒီရေကို တိုက်ရိုက်သောက်လို့ရမယ်ဆိုရင် ပစ္စည်းသိမ်းဆည်းတဲ့သူက လောင်စာဆီ ထွက်ပေါက်မှာပဲ နေပြီးတော့ လောင်စာဆီတွေ လောင်ကျွမ်းပြီး ထွက်လာတဲ့ ရေတွေကို သိမ်းဆည်းပြီး သောက်လိုက်ရုံပဲပေါ့။”
လောင်စာဆီဆိုသည်မှာ အောက်ဆီဂျင်အရည်နှင့် ဟိုက်ဒရိုဂျင်အရည်တို့ လောင်ကျွမ်းခြင်းမှ ထွက်ပေါ်လာသည့် တွန်းကန်အား ဖြစ်သည်။
ကျူးဝူသည် ထိုစကားကို ကြားသောအခါ အနည်းငယ် ကြောင်အသွားပြီးနောက် ရယ်မောကာ ပြောလိုက်သည်။
“အဲဒါဆိုရင် ကယ်ဆယ်ရေးယာဉ်ရဲ့ အိတ်ဇောပိုက်ကို လှမ်းဖက်ပြီး အိတ်ဇောရေကို သောက်နေရသလို ဖြစ်မနေဘူးလား။”
“ပုံစံချင်းကတော့ အတူတူပဲ။ မင်း စမ်းကြည့်ချင်လည်း ရတယ်။ ဒါပေမဲ့ ဝမ်းလျှောလို့ကတော့ ငါ့တာဝန် မဟုတ်ဘူးနော်။”
ရှောင်းယီက ပြုံးကာ ပြန်ဖြေလိုက်သည်။
“သူဌေးနောက်ကို လိုက်နေတဲ့ ကျွန်တော်က အိတ်ဇောရေ သောက်ပါ့မလား။ နောက်တာပါ။ SSS အဆင့် ရေမဟုတ်ရင် ကျွန်တော့်အဆင့်နဲ့ မကိုက်ဘူး။”
ကျူးဝူက ချက်ချင်းပင် ကြွားလုံးထုတ်လိုက်သည်။
“အေးပါ...လာမြှောက်မနေနဲ့။ ငါ့ဆီမှာ အခုလောလောဆယ် အဲဒီလို အဆင့်မြင့် ရေသန့် မရှိသေးဘူး။”
“နောင်ကျရင်တော့ သေချာပေါက် ရှိလာမှာပါ။”
ကျူးဝူက ပြန်ဖြေလိုက်သည်။
“အင်း...နောင်ကျရင်တော့ သေချာပေါက် ရှိလာမှာပါ။”
ရှောင်းယီက ပြောလိုက်သည်။
“ကောင်းပြီ... မင်း လုပ်စရာရှိတာ သွားလုပ်တော့။ စောစောက မင်းနဲ့ စကားပြောရင်းနဲ့ ငါ ချက်ချင်း ပြဿနာတစ်ခုကို သတိထားမိသွားလို့။ သွားပြီး အတည်ပြုရဦးမယ်။”
“ဟုတ်ကဲ့ သူဌေး။ ကြိုးစားလိုက်ပါဦး။ ကျွန်တော်ကတော့ အများသုံးချန်နယ်ထဲမှာပဲ ဆက်ပြီး အချိန်ဖြုန်းနေလိုက်ပါဦးမယ်။”
ကျူးဝူက ပြုံးကာ ပြန်ဖြေလိုက်သည်။
ရှောင်းယီသည် ကျူးဝူနှင့် စကားပြောပြီးနောက် အသေးစားအာကာသယာဉ်၏ စွမ်းအင်အခန်းဆီသို့ ချက်ချင်း မျောလွင့်သွားခဲ့သည်။
ယခင်က ကယ်ဆယ်ရေးယာဉ်၏ လောင်စာဆီလောင်ကျွမ်းမှုမှ ထွက်လာသော အိတ်ဇောဓာတ်ငွေ့များကို အာကာသဟင်းလင်းပြင်ထဲသို့ တိုက်ရိုက် စွန့်ထုတ်ခဲ့ခြင်း ဖြစ်သည်။ ယခုအခါ အသေးစားအာကာသယာဉ်အဖြစ် အဆင့်မြှင့်တင်လိုက်ပြီဖြစ်ရာ တစ်စုံတစ်ရာ ပြောင်းလဲမှုများ ရှိလာနိုင်မည်လော။