အခန်း ၁၃၂၀
Vol. 115 Ch. 1320
အခန်း ၁၃၂၀
ယခု ကျူးဝူတွင် ရှိသမျှအရာအားလုံးမှာ ယီရန်ပင်း ပေးထားခြင်းဖြစ်သော်လည်း သူသည် အလွန်ပင် စိတ်ကျေနပ်အားရနေဆဲ ဖြစ်သည်။
သဘာဝကျစွာပင် ကျူးဝူသည် ထိုရောင်းဝယ်ရန် တောင်းဆိုနေကြသော အသက်ရှင်ကျန်ရစ်သူများကို လျစ်လျူရှုထားလိုက်သည်။ ဘာပဲဖြစ်ဖြစ် သူကိုယ်တိုင်လည်း ရှင်သန်ရန် လိုအပ်နေသဖြင့် ဤပစ္စည်းများကို လွယ်လွယ်ကူကူ ထုတ်ရောင်း၍ မဖြစ်နိုင်ချေ။
“ဒီဒီ... လူစိမ်းတစ်ဦးက သီးသန့်မက်ဆေ့ခ်ျ ပို့ထားပါသည်။ မက်ဆေ့ခ်ျကို လက်ခံပါမည်လား။”
ကျူးဝူသည် ထိုလူစိမ်း၏ သီးသန့်မက်ဆေ့ခ်ျ တောင်းဆိုချက်ကို လှမ်းကြည့်လိုက်ရာ သူ၏မျက်လုံးများ ချက်ချင်းပင် ပြူးထွက်သွားတော့သည်။
အကြောင်းမှာ ထိုသီးသန့်မက်ဆေ့ခ်ျ ပို့လာသူ၏ စာသားပုံစံမှာ ယီရန်ပင်း သုံးနှုန်းသည့် ပုံစံနှင့် အတိအကျ တူညီနေသောကြောင့်ပင်။
ဤအတောအတွင်း လူအများအပြား သူ့ထံ သီးသန့်မက်ဆေ့ခ်ျများ ဆက်တိုက် ပို့နေကြခြင်းဖြစ်ပြီး သူက အားလုံးကို ငြင်းပယ်ခဲ့သည်။
သို့သော် ဤတစ်ခုကိုမူ သူ မငြင်းပယ်နိုင်ပါချေ။ ထို့ပြင် မက်ဆေ့ခ်ျကို လက်ခံရန် ချက်ချင်းပင် သဘောတူလိုက်သည်။
သူဌေးနှင့် ပတ်သက်နိုင်ခြေရှိသောသူကို သေချာပေါက် ငြင်းပယ်၍ မရနိုင်ပါချေ။
“မင်္ဂလာပါ။ မင်းပြောနေတဲ့ သူဌေးရဲ့ နာမည်က ယီရန်ပင်းလို့ ခေါ်တာလား။”
ထျန်းကျိယာဟု အိုင်ဒီပေးထားသော အသက်ရှင်ကျန်ရစ်သူတစ်ဦးက မေးထားခြင်းဖြစ်၏။
ထိုလူ၏ မက်ဆေ့ခ်ျကို မြင်လိုက်ရသောအခါ ကျူးဝူ ဆွံ့အသွားခဲ့သည်။ သူသည် ယခုဂလက်ဆီ၏ အများသုံးချန်နယ်တွင် ကြွားဝါစဉ်က ယီရန်ပင်းဆိုသည့် ဤသုံးလုံးကို တစ်ခါမျှ ထုတ်မပြောခဲ့ဖူးချေ။
ယီရန်ပင်းဆိုသည့် စကားလုံးကို တိတိကျကျ ပြောနိုင်သူမှန်သမျှသည် သူဌေးကို သိနေသည့်သူသာ သေချာပေါက် ဖြစ်ရမည်။
“မင်းက ဘယ်သူလဲ။”
ကျူးဝူက သူ၏မေးခွန်းကို ပြန်မဖြေဘဲ ခပ်ပြတ်ပြတ် ပြန်မေးလိုက်သည်။ ထိုအခါ ထျန်းကျိယာက ပြန်ဖြေလာခဲ့သည်။
“ပထမအဆင့်တုန်းက ငါက ယီရန်ပင်း မဟာမိတ်အဖွဲ့ရဲ့ စစ်ရေးဆိုင်ရာ တာဝန်ခံပဲ။”
“အဲဒါကို မင်း ဘယ်လို သက်သေပြမှာလဲ။”
ကျူးဝူက မျက်မှောင်ကြုတ်လျက် မေးလိုက်သည်။
အသက်ရှင်ကျန်ရစ်သူ အများစုသည် ပြိုင်ဘက် ဆက်ဆံရေးမျိုး ဖြစ်နေကြပြီး သူတို့က ယီရန်ပင်းကို သိနေလျှင်ပင် မိတ်ဆွေ ဖြစ်ချင်မှ ဖြစ်လိမ့်မည်ကို သူ သိထားသည်။
ထို့ပြင် ယခင်ကလည်း ယီရန်ပင်းသည် သူ့အား ပထမအဆင့်မှ မိတ်ဆွေများအကြောင်းကို ပြောမပြခဲ့ဖူးသဖြင့် ဤလူသည် မိတ်ဆွေလား၊ ရန်သူလားဆိုသည်ကို ကျူးဝူ သဘာဝအတိုင်း ခွဲခြားမသိနိုင်ပေ။
ထျန်းကျိယာ ခေတ္တမျှ တိတ်ဆိတ်သွားပြီးနောက် ပြောလာခဲ့သည်။
“ငါ့မှာ သက်သေပြစရာ နည်းလမ်းတော့ မရှိဘူး။ ငါ အချို့အရာတွေကို ပြောပြနိုင်ရင်တောင်မှ ယီရန်ပင်းက မင်းကို ဒီလောက်အထိ အသေးစိတ် အချက်အလက်တွေ ပြောပြထားမှာ မဟုတ်ဘူး။”
“ပြောကြည့်လေ။”
ကျူးဝူက ဆိုသည်။ ထျန်းကျိယာ ထပ်မံ၍ ခေတ္တမျှ တိတ်ဆိတ်သွားပြီးမှ ပြောလာခဲ့သည်။
“ငါ မသက်သေပြနိုင်ပါဘူး။ ဒါပေမဲ့ ငါကတော့ ကျွန်းပိုင်ရှင်နဲ့ ပြန်မဆုံခင်အထိ တောင့်ခံနိုင်တော့မယ်မထင်ဘူး။ သူ ဒုတိယအဆင့်ကို ဝင်လာတုန်းက အုတ်မြစ်ကျောက်တွေ တစ်ခုမှ ပါမလာခဲ့ဘူး။ တကယ်လို့ မင်းပြောတဲ့ ဆရာကြီးက ယီရန်ပင်း အစစ်အမှန်ဆိုရင်... မင်း အခွင့်အရေးရတဲ့အခါ ငါ့ရဲ့ အုတ်မြစ်ကျောက်တွေကို သူ့ဆီ လွှဲပေးဖို့ ကူညီပေးနိုင်မလား။”
ထိုအရာကို မြင်သောအခါ ကျူးဝူသည် သူ၏မျက်လုံးများကို မှေးစဥ်းလိုက်ကာ ထျန်းကျိယာ ပို့ထားသော မက်ဆေ့ခ်ျကို သေချာကြည့်လိုက်သည်။
တူညီသော စာသားပုံစံအရ ဤလူသည် ပထမအဆင့်တုန်းက ယီရန်ပင်းနှင့် ကမ္ဘာဂြိုဟ်တစ်ခုတည်းတွင် ရှိခဲ့သည်မှာ ထင်ရှားသည်။
ထို့ပြင် ယီရန်ပင်းတွင် ဒုတိယအဆင့်သို့ အုတ်မြစ်ကျောက်များ ပါမလာခဲ့သည့်အချက်ကိုလည်း သူ သိနေပြီး သူ၏ အုတ်မြစ်ကျောက်များ အားလုံးကို ယီရန်ပင်းအား ပေးချင်နေခဲ့သည်။
ဒါက လှည့်ကွက်တစ်ခု ဖြစ်နေရင်ကော။ ဒါပေမဲ့ လှည့်ကွက်မဟုတ်ရင်ကော။
ကျူးဝူ စိတ်ထဲတွင် ခေတ္တမျှ ဗျာဆိုင်းနေပြီးနောက် ပြောလိုက်သည်။
“မင်း သက်သေမပြနိုင်တဲ့အတွက် ငါ မင်းကို လုံးဝ မယုံကြည်နိုင်သေးဘူး။ သူဌေးမှာ အုတ်မြစ်ကျောက် မရှိတဲ့ကိစ္စကိုတော့ မင်း လုံးဝ စိုးရိမ်နေစရာ မလိုပါဘူး။ ဘာလို့လဲဆိုတော့ သူဌေးက အခု ငါတို့ဂလက်ဆီမှာ အုတ်မြစ်ကျောက် အများဆုံးရှိတဲ့သူတွေထဲက တစ်ယောက် ဖြစ်နေလို့ပဲ။”
“ကျွန်းပိုင်ရှင်က တကယ် အသန်မာဆုံးပဲ။ ဒါဆိုရင်တော့ ငါ စိုးရိမ်စရာမလိုတော့ဘူး။”
ထျန်းကျိယာက ပြန်ပြောလာခဲ့သည်။
“ဒီသတင်းကို ပြောပြပေးတဲ့အတွက် ကျေးဇူးတင်ပါတယ်။ ငါ့မှာရှိတဲ့ အုတ်မြစ်ကျောက်တွေအားလုံးကို မင်းဆီ ပေးလိုက်မယ်။ ကျေးဇူးပြုပြီး ဒါတွေကို ယီရန်ပင်းဆီ လွှဲပေးဖို့ ကူညီပေးပါ။ အဖိုးအခအနေနဲ့ မင်း အုတ်မြစ်ကျောက် တစ်သိန်း သိမ်းထားလိုက်လို့ရတယ်။ ကျွန်းပိုင်ရှင်လည်း သဘောတူလိမ့်မယ်လို့ ငါ ယုံကြည်တယ်။”
တစ်ဖက်လူက “ကျွန်းပိုင်ရှင်” နှင့် “ယီရန်ပင်း” ဟူသော နာမည်များကို တစ်လှည့်စီ သုံးနှုန်းနေသည်ကို ကြည့်ရင်း ကျူးဝူ မျက်မှောင်ကြုတ်ကာ စဉ်းစားလိုက်သည်။
“အုတ်မြစ်ကျောက် ၁.၃ သန်း - အခမဲ့လဲလှယ်ခြင်း။”
တစ်ဖက်လူ ပို့လာသော အရောင်းအဝယ်ကို မြင်လိုက်ရသောအခါ ဤလူသည် သူဌေး၏ မိတ်ဆွေအစစ်အမှန်ဖြစ်ပြီး သေဖော်သေဖက် သူငယ်ချင်းမျိုး ဖြစ်နိုင်သည်ဟု ကျူးဝူ ခန့်မှန်းမိလိုက်သည်။ မဟုတ်ပါက မည်သူက မိမိ၏ အုတ်မြစ်ကျောက်အားလုံးကို ထုတ်ယူပြီး ယီရန်ပင်းကို သိနိုင်ခြေရှိရုံမျှသာရှိသော အသက်ရှင်ကျန်ရစ်သူတစ်ဦးထံသို့ ဤအတိုင်း ပေးအပ်ဝံ့ပါမည်နည်း။
ထိုသို့ တွေးမိပြီးနောက် ကျူးဝူသည် တစ်ဖက်လူ၏ အရောင်းအဝယ်ကို တိုက်ရိုက်ပင် ငြင်းပယ်လိုက်ပြီး ပြောလိုက်သည်။
“ကောင်းပြီ။ လောလောဆယ်တော့ ငါ မင်းကို ယုံပေးလိုက်မယ်။ မင်းက သူဌေးရဲ့ မိတ်ဆွေဖြစ်နေမှတော့ ငါလည်း ဒီအတိုင်း ကြည့်မနေနိုင်ဘူး။ မင်းရဲ့ လက်ရှိအခြေအနေက ဘယ်လိုလဲ။”
“ဒီက အခြေအနေက အရမ်းဆိုးတယ်။ အောက်ဆီဂျင်မရှိ၊ လျှပ်စစ်ဓာတ်အားမရှိ၊ လောင်စာဆီလည်း မရှိဘူး။ ကယ်ဆယ်ရေးယာဉ်ကလည်း ပျက်စီးနေပြီး အနက်ရောင်ရွှေကလည်း မလုံလောက်ဘူးဖြစ်နေတယ်။”
ထျန်းကျိယာက အားကိုးရာမဲ့စွာဖြင့် ပြန်ဖြေလိုက်သည်။
ကျူးဝူသည် အနည်းငယ် စဉ်းစားလိုက်ပြီးနောက် ချက်ချင်းပင် အရောင်းအဝယ်တစ်ခုကို စတင်လိုက်တော့သည်။
“အောက်ဆီဂျင် ၅ လီတာ၊ လျှပ်စစ်ဓာတ်အား ၅၀%၊ လောင်စာဆီ ၅၀%၊ အနက်ရောင်ရွှေ ၈ - အခမဲ့လဲလှယ်ခြင်း။”
ကျူးဝူ အရောင်းအဝယ်လုပ်ပြီး ပို့ပေးလိုက်သော ပစ္စည်းများကို မြင်သောအခါ ထျန်းကျိယာ ကြောင်အသွားခဲ့ရသည်။ အောက်ဆီဂျင် ပြင်းထန်စွာ ပြတ်လပ်နေမှုကြောင့်လားမသိ၊ သူ၏ဦးနှောက်က တုံ့ပြန်ရန် အနည်းငယ် နှေးကွေးနေခဲ့သည်။
“အရောင်းအဝယ်ကို သဘောတူလိုက်စမ်းပါ။ ဒါတွေအားလုံးက ငါ့ကို ဆရာကြီး ယီရန်ပင်း ပေးထားတာတွေချည်းပဲ။ မင်းက သူ့ သူငယ်ချင်းဖြစ်နေမှတော့ မင်းကို ပေးတာက မမှားပါဘူး။”
ကျူးဝူက ချက်ချင်း ပြောလိုက်သည်။
“ကျေးဇူးတင်ပါတယ်။ ငါ့နာမည်က ကျန်းယွင်ထျန်းပါ။”
တစ်ဖက်လူက ပြောပြီးနောက် အရောင်းအဝယ်ကို သဘောတူလိုက်သည်။
ထျန်းကျိယာဟု အိုင်ဒီပေးထားသော ဤအသက်ရှင်ကျန်ရစ်သူသည် အမှန်တကယ်ပင် ကျန်းယွင်ထျန်း ဖြစ်ပေသည်။ ဤဒုတိယအဆင့်သို့ ရောက်ရှိလာပြီးနောက် သူ၏ကံဇာတာမှာ တကယ့်ကို ဆိုးရွားလှပြီး နေ့တိုင်း ဥက္ကာခဲများနှင့် အတိုက်ခံခဲ့ရသည်။
သူရရှိထားသော အနက်ရောင်ရွှေမှာလည်း ပြုပြင်မှုအနည်းငယ်အတွက်သာ လုံလောက်ခဲ့ပြီး ယခုနောက်ဆုံးအကြိမ် ဥက္ကာခဲနှင့် ထပ်မံတိုက်မိပြီးနောက်တွင်မူ လုံးဝ မလုံလောက်တော့ချေ။
ယခုအချိန်တွင် လောင်စာဆီနှင့် လျှပ်စစ်ဓာတ်အား နှစ်ခုစလုံး လုံးဝ ကုန်ခမ်းသွားခဲ့ပြီ ဖြစ်သည်။ ဤအခြေအနေမျိုးတွင် ရိက္ခာသေတ္တာများကို ဆက်လက်ကောက်ယူရန် မည်သို့မျှ မဖြစ်နိုင်တော့သဖြင့် လုံးဝ လမ်းပိတ်နေသောအခြေအနေသို့ ရောက်ရှိနေခြင်း ဖြစ်သည်။
ကျူးဝူ၏ အရောင်းအဝယ်ကို လက်ခံပြီးနောက် သူသည် ကယ်ဆယ်ရေးယာဉ်ကို ချက်ချင်း ပြုပြင်လိုက်ပြီး အောက်ဆီဂျင်ကို လွှတ်ထုတ်လိုက်သည်။ အောက်ဆီဂျင် ပြတ်လပ်မှုကြောင့် မူးဝေနောက်ကျိနေသော ကျန်းယွင်ထျန်းသည်လည်း ချက်ချင်းပင် ပြန်လည်လန်းဆန်းလာခဲ့သည်။
ကချေသည်ဝက်နှင့် စောစောက ပြောခဲ့သော ချတ်တင်စာသားများကို ပြန်ကြည့်ရင်း ကျန်းယွင်ထျန်း အားကိုးရာမဲ့စွာဖြင့် ခေါင်းခါလိုက်မိသည်။ အကယ်၍ သူ၏ဦးနှောက်သာ အောက်ဆီဂျင် ပြတ်လပ်မနေခဲ့ပါက သူ၏ အုတ်မြစ်ကျောက်အားလုံးကို တစ်ဖက်လူထံ တစ်ပြိုင်နက်တည်း ဤအတိုင်း လွှဲပေးမိလိမ့်မည် မဟုတ်ပါချေ။
ကံကောင်းထောက်မစွာဖြင့် တစ်ဖက်လူ သိထားသော ဆရာကြီးမှာ ယီရန်ပင်း အစစ်အမှန် ဖြစ်နေ၍ တော်သေးသည်။ မဟုတ်ပါက ဤအုတ်မြစ်ကျောက် ၁.၃ သန်းမှာ သေချာပေါက် အလဟဿ ဖြစ်သွားရပေလိမ့်မည်။
“မင်း ငါ့ကို လျှပ်စစ်ဓာတ်အားနဲ့ လောင်စာဆီတွေ အများကြီး ပေးလိုက်တာပဲ။ မင်းအတွက်ကော ကျန်သေးရဲ့လား။”
ကျန်းယွင်ထျန်းက လေးနက်သောလေသံဖြင့် မေးလိုက်သည်။
“ရပါတယ်။ ငါ့ကို ကြယ်တံခွန်က ဆွဲခေါ်သွားပေးနေတာဆိုတော့ လောင်စာဆီ သိပ်မလိုဘူး။ လျှပ်စစ်ဓာတ်အားအတွက်ကတော့ ငါ့မှာ ဒါရှိတယ်။”
ကျူးဝူက ပြန်ဖြေလိုက်သည်။
“[ဟိုက်ဒရိုဂျင်-အောက်ဆီဂျင် လောင်စာဘက်ထရီ ၁]။ ဒါကလည်း သဘာဝအတိုင်း ဆရာကြီး ပေးထားတာပဲ။”
ကျန်းယွင်ထျန်းက ခေါင်းညိတ်လိုက်သည်။
“ကျေးဇူးတင်ပါတယ်။”
“ရပါတယ် မလိုပါဘူး။”
ကျူးဝူက ပြန်ပြောလိုက်သည်။
“တကယ်လို့ ငါ ပြန်သွားလို့ရရင် မင်း ဒီဂလက်ဆီမှာ ရှိနေတဲ့ အခြေအနေကို သူဌေးကို သေချာပေါက် ပြန်ပြောပြပေးပါ့မယ်။ မင်းတို့ကြားမှာ ကြိုတင်သတ်မှတ်ထားတဲ့ လျှို့ဝှက်ကုဒ် ဒါမှမဟုတ် တခြားအရာတစ်ခုခု ရှိသလား။”
“မရှိပါဘူး။ မင်း ငါနဲ့ ဆုံခဲ့တဲ့အကြောင်း ပြောပြလိုက်ရုံနဲ့တင် သူ သဘာဝအတိုင်း သိသွားပါလိမ့်မယ်။”
ကျန်းယွင်ထျန်းက လေးနက်စွာ ဆိုသည်။
“ကောင်းပါပြီ။”
ကျူးဝူက ပြန်ဖြေလိုက်သည်။
“ကျွန်းပိုင်ရှင်မှာ အခု တကယ်ပဲ အုတ်မြစ်ကျောက်တွေ မပြတ်လပ်တာ ဟုတ်ရဲ့လား။”
ကျန်းယွင်ထျန်းက စိုးရိမ်စိတ်ဖြင့် မနေနိုင်လဲ မေးလိုက်၏။
“သေချာတာပေါ့။ ငါ အများသုံးချန်နယ်ထဲမှာ ပြောခဲ့တာတွေအားလုံးက အမှန်တွေချည်းပဲ။ မင်းက မယုံတာတော့ မဟုတ်ပါဘူးနော်။ မင်းက ပထမအဆင့် တစ်ခုလုံးမှာ ဆရာကြီးနောက်ကို လိုက်လာခဲ့တာဆိုတော့ သူ ဘယ်လောက် အစွမ်းထက်လဲဆိုတာ ငါ့ထက်တောင် ပိုပြီး ရှင်းရှင်းလင်းလင်း သိမှာပေါ့။”
ကျူးဝူက ပြန်ပြောလိုက်သည်။
“ဒါလည်း ဟုတ်သားပဲ။”
ကျန်းယွင်ထျန်းက ပြန်ဖြေလိုက်သည်။
“ဒီကမ္ဘာရဲ့ စည်းမျဉ်းတွေက ကျွန်းပိုင်ရှင်ကို ဘယ်လိုပဲ ကန့်သတ်ထားပါစေ...သူ အသန်မာဆုံး ဖြစ်လာမှာကိုတော့ ဘယ်အရာကမှ တားဆီးနိုင်မှာ မဟုတ်ဘူး။”
ကျူးဝူသည်လည်း ဤအချက်ကို အလွန်ပင် ထောက်ခံပြီးနောက် စပ်စုချင်စိတ်ဖြင့် မေးလိုက်သည်။
“ဒါနဲ့... မင်းက သူ့ကို ဘာလို့ ကျွန်းပိုင်ရှင်လို့ပဲ ဆက်တိုက် ခေါ်နေရတာလဲ။”
ကျန်းယွင်ထျန်း ခေတ္တမျှ ကြောင်အသွားပြီးနောက် ပြန်ဖြေလိုက်သည်။
“ပထမအဆင့်တုန်းက အားလုံးက ကျွန်းတွေချည်းပဲလေ။ သူက လူတွေ သူ့ကို သခင်တို့ ဘာတို့ ခေါ်တာကို သိပ်အသားမကျလို့ ကျွန်းပိုင်ရှင်ဆိုတဲ့ ဘွဲ့အမည်ကို သူကိုယ်တိုင်ပဲ စဉ်းစားပြီး သတ်မှတ်ခဲ့တာ။”
“ဪ... ဒါကြောင့်ကိုး။”
ကျူးဝူ ရုတ်တရက် သဘောပေါက်သွားခဲ့သည်။
“ဒါပေမဲ့ နောက်ဆုံးကျတော့ ငါတို့ရဲ့ ကျွန်းတွေအားလုံးက တိုက်ကြီးတစ်ခုလို့တောင် ခေါ်လို့ရတဲ့အထိ ဖြစ်သွားခဲ့တယ်။ ဒါပေမဲ့လည်း ကျွန်းပိုင်ရှင်ဆိုတဲ့ အခေါ်အဝေါ်ကတော့ ဆက်ရှိနေတုန်းပဲ။”
ကျန်းယွန့်ထျန်းက ဆက်ပြောလိုက်သည်။
“တိုက်ကြီးတစ်ခု ဟုတ်လား။”
ကျူးဝူ ခေတ္တမျှ မှင်တက်သွားပြီးနောက် မေးလိုက်သည်။
“အဲဒီလောက်အထိတော့ မကြီးနိုင်ပါဘူး ဟုတ်တယ်မလား။ ဧရိယာအကျယ်အဝန်းက ဘယ်လောက်တောင် ရှိလို့လဲ။”