အခန်း ၃၅

အခန်း ၃၅: နောက်ထပ် ကြီးမြတ်တဲ့ အင်မော်တယ် တစ်ယောက် ရောက်လာပြန်ပြီလား

ထိုစကားကို ကြားသောအခါ ကုဟိုင်၏ မျက်နှာအမူအရာ ချက်ချင်းတည်ကြည်လေးနက်သွားသည်။

သူက ခေါင်းညိတ်ပြကာ ပြောဆိုသည်။

"အလယ်ပိုင်းပြည်နယ်မှာ ခရီးသွားခဲ့တဲ့ ကျွန်တော့်ရဲ့ အစောပိုင်းနှစ်တွေမှာ ဆရာကတော်က... သူက ကျွန်တော့်ကို တစ်ခါ ကယ်ခဲ့ဖူးတယ်..."

အို...

လုရန်၏ မျက်လုံးများ တောက်ပသွားသည်။

"မင်း မင်းရဲ့ ဆရာကတော်ကို တွေ့ဖူးတယ်ပေါ့... သူ... သူ ဘယ်လိုနေလဲ..."

သို့သော် ကုဟိုင်က ချက်ချင်းခေါင်းခါယမ်းပြပြီး သူက ပြောလိုက်၏။

"ကျွန်တော် ဆရာကတော်ကို မတွေ့ခဲ့ရဘူး... ကျွန်တော့်ကို ကယ်ခဲ့တာက သူမရဲ့ လက်အောက်ငယ်သားပါ... ပြီးတော့ ကျွန်တော့်ကို အလယ်ပိုင်းပြည်နယ်ကနေ ထွက်သွားဖို့ တိုက်တွန်းခဲ့တယ်... အဲ့ဒီနောက်ပိုင်း သတင်းမကြားရတော့ဘူး..."

ချင်ဝူယောင်းရဲ့ လက်အောက်ငယ်သားလား...

လုရန် အနည်းငယ် ဇဝေဇဝါ ဖြစ်သွားသည်။

"ဆရာကတော်က ကျွန်တော်ရဲ့ အထောက်အထားကို ဘယ်လိုသိလဲဆိုတာတော့ ကျွန်တော်လည်း မသိဘူး... မတော်တဆ ဖြစ်နိုင်တယ်... ဒါပေမဲ့ ကျွန်တော့်ကို ကယ်ခဲ့တဲ့သူက တကယ်ကို ဆရာကတော်ရဲ့ နာမည်နဲ့ လုပ်ဆောင်ခဲ့တာပါ..."

ကုဟိုင်က စဉ်းစားဟန်ဖြင့် ပြောလိုက်သည်။

ထို့ပြင် ထိုအချိန်က ကုဟိုင်သည် အစစ်အမှန် အင်မော်တယ်နယ်ပယ် တတိယအဆင့်ရှိ သာမန်လူတစ်ဦးသာ ဖြစ်ပြီး တစ်ဖက်လူသည် အနည်းဆုံး မဟာပေါင်းစည်းခြင်းအင်မော်တယ်အဆင့်တွင် ရှိနေသည်။

သူသည် အင်မော်တယ်သခင်တစ်ယောက်ပင် ဖြစ်နိုင်ချေရှိပေ၏။

"ဒါတောင်မှ အဲ့ဒီလူက ဆရာကတော်အကြောင်း ပြောတဲ့အချိန်မှာ အရမ်းကို ရိုသေတယ်... ဆရာကတော်ရဲ့ နယ်ပယ်က အဲ့ဒီလူထက်တောင် ပိုမြင့်လောက်တယ်..."

ကုဟိုင်က ခွဲခြမ်းစိတ်ဖြာလိုက်သည်။

လုရန် များစွာအံ့အားသင့်သွားခဲ့ခြင်း မရှိချေ။

အောက်ဘုံတွင် သူသည် တပည့်များစွာကို လက်ခံခဲ့ပြီး ပါရမီကောင်းသူများ အလွန်ပေါများသည်။

သို့သော် ချင်ဝူယောင်းကဲ့သို့ ကောင်းကင်ကို အံတုသော ပါရမီရှင်မျိုး ထပ်ပေါ်မလာတော့ချေ။

လုရန် ချင်ဝူယောင်းနှင့် ပထမဆုံး တွေ့ဆုံချိန်က သူမသည် အသက်ဆယ့်ခြောက်နှစ်သာ ရှိသေးသော်လည်း ရွှေအမြုတေနယ်ပယ်သို့ ရောက်ရှိနေလေပြီ။

ဆန့်ကျင်ဘက်အနေဖြင့် ထိုအချိန်က လုရန်သည် စနစ်ကို ယခုမှ ချိတ်ဆက်မိပြီး တက်ရောက်စာရင်းသွင်းခြင်းများအပေါ် မှီခိုကာ လျင်မြန်စွာ တိုးတက်နေချိန်ဖြစ်သည်။

သို့သော် စနစ်ရှိနေသော်လည်း ချင်ဝူယောင်း၏ ကျင့်ကြံမှုအမြန်နှုန်းကို သူ လိုက်မမီခဲ့ပေ။

သူတို့နှစ်ဦးသား လောကကြီးအတွင်း၌ အတူတကွ ခရီးသွားခဲ့ကြသည်။

နှစ်တစ်ရာ မပြည့်မီမှာပင် ချင်ဝူယောင်းသည် ကပ်ဘေးဒုက္ခဖြတ်ကျော်ပြီး အထက်ဘုံသို့ တက်လှမ်းသွားခဲ့ပေ၏။

အင်မော်တယ် ကျင့်ကြံခြင်းသမိုင်းတွင် ထိုကဲ့သို့ ကြောက်မက်ဖွယ်ကောင်းသော ပါရမီရှင်မျိုး တစ်ကြိမ်တစ်ခါမျှ မပေါ်ပေါက်ဖူးချေ။

တပည့်များ လက်ခံခြင်းနှင့် ပတ်သက်၍ ချင်ဝူယောင်း အထက်ဘုံသို့ တက်လှမ်းသွားပြီးနောက် လုရန်သည် တက်ရောက်စာရင်းသွင်းခြင်းများမှ စွမ်းရည်များ အမြင့်ဆုံးအဆင့်အထိ ရောက်ရှိခဲ့သော်လည်း အထက်ဘုံသို့ မတက်လှမ်းနိုင်သေးချိန် ပျင်းရိမှုကြောင့်သာ စတင်လုပ်ဆောင်ခဲ့ခြင်းဖြစ်သည်။

ချင်ဝူယောင်းသည် အထက်ဘုံသို့ တက်လှမ်းသွားခဲ့သော လုရန် သိသည့် ပထမဆုံးလူပင်။

သူမ၏ပါရမီနှင့် ပေါင်းစပ်လိုက်သောအခါ သဘောတရားအရ သူမ၏ကျင့်ကြံမှုသည် အပြာရောင်ဂိုဏ်း တပည့်များအားလုံးထက် သေချာပေါက် ပို၍မြင့်မားနေပေမည်။

"အဲ့ဒီနောက်ပိုင်း ဆရာကတော်အကြောင်း သတင်းကို စုံစမ်းဖို့ ကျွန်တော် ကြိုးစားခဲ့ပေမဲ့ မအောင်မြင်ခဲ့ပါဘူး..."

ကုဟိုင်က သက်ပြင်းချကာ ပြောလိုက်သည်။

လုရန်အား ထိရောက်သော အချက်အလက်များ မပေးနိုင်ခဲ့သည့်အတွက် သူ အပြစ်ရှိသကဲ့သို့ ခံစားနေရပုံရသည်။

"အဲ့ဒါက ဘယ်တုန်းက ဖြစ်ခဲ့တာလဲ..."

လုရန်က မေးလိုက်သည်။

"လွန်ခဲ့တဲ့ နှစ်ပေါင်း တစ်သောင်းနှစ်ထောင်ကျော်လောက်ကပါ... အလယ်ပိုင်းပြည်နယ်ကနေ ပြန်လာပြီးတဲ့နောက်မှာ ကျွန်တော် ရှပြည်နယ်ကို ရောက်လာပြီး ဂျူနီယာညီမ စုယွဲ့လင်နဲ့ မတော်တဆ ဆုံတွေ့ခဲ့တယ်... အဲ့ဒီနောက် စိတ်ဝိညာဉ်ချီတွေ ပေါကြွယ်ဝတဲ့ ဒီနေရာကောင်းလေးကို တွေ့တော့ ဒီနေရာမှာ ဂိုဏ်းတစ်ခု တည်ထောင်ခဲ့တာပါ..."

ကုဟိုင်က ပြန်ပြောပြလေသည်။

နှစ်ပေါင်း တစ်သောင်းကျော်...

ထိုမျှရှည်လျားသော အချိန်ကာလသည် ကိစ္စများစွာ ဖြစ်ပျက်ရန် လုံလောက်ပါသည်။

လုရန် စိတ်ပူပန်မှုကို မထိန်းနိုင်တော့သော်လည်း အသုံးမဝင်သဖြင့် အသက်ပြင်းပြင်းတစ်ချက်သာ ရှူလိုက်နိုင်သည်။

သူက ခေါင်းညိတ်ပြပြီး ပြောဆိုသည်။

"ကိစ္စမရှိပါဘူး... အနှေးနဲ့အမြန်တော့ ငါ အလယ်ပိုင်းပြည်နယ်ကို သွားမှာပါ... သူ အသက်ရှင်နေသေးသရွေ့တော့ ငါတို့ နောက်ဆုံးမှာ တွေ့ကြမှာပါ..."

ဤအချိန်တွင် နံဘေးရှိ လင်းပေါင်အာသည် အဝစားပြီးနောက် လေချဉ်တက်ကာ လုရန်ကို သက်တောင့်သက်သာမှီ၍ သူမ၏ဗိုက်လေးကို ပုတ်နေသည်။

လုရန် ရယ်ရမလို ငိုရမလို ဖြစ်သွားသည်။

သူက ခေါင်းမော့ကြည့်ပြီး ကုဟိုင်ကို ဆက်ပြောလိုက်သည်။

"နောက်ထပ် ကိစ္စတစ်ခု ရှိသေးတယ်... ကျင်းလင်မြို့က မြင့်မြတ်မီးတောက်ဂိုဏ်း ချင်းရွှမ်ဂိုဏ်း ထျန်းကန်းဂိုဏ်းနဲ့ ယီချီစမ်းချောင်းဂိုဏ်းဆိုတဲ့ အင်အားစုလေးခုအကြောင်း မင်း သိလား..."

ကုဟိုင်က ခေါင်းညိတ်လိုက်၏။

"သေချာတာပေါ့... သူတို့က နှစ်တိုင်း ကျွန်တော့်ဆီကနေ ဆေးလုံးတွေ တော်တော်များများ ဝယ်ကြတယ်..."

လုရန်က ဆက်ပြောသည်။

"သူတို့က ရုတ်တရက်ကြီး တာအိုဆွေးနွေးပွဲကို လုပ်နေကြတယ်... သဘောတရားအရဆိုရင် မင်းကို အကြောင်းကြားမှာ မဟုတ်ဘူး... ဒါပေမဲ့ ယွဲ့လင်ရဲ့ အဆိုအရ အချိန်က စောနေတယ်... အဲ့ဒါက ငါ့ကို ပစ်မှတ်ထားတာ ဖြစ်ဖို့များပြီးတော့ ဦးဆောင်နေတာက ချင်းရွှမ်ဂိုဏ်းပဲ..."

ထိုစကားကို ကြားသောအခါ ကုဟိုင်၏ မျက်နှာအမူအရာ ချက်ချင်းတည်ကြည်လေးနက်သွားသည်။ သူက စိုးရိမ်တကြီး ပြောလိုက်၏။

"ဒီလိုဆိုမှတော့ ဆရာ... သွားကြစို့..."

အမ်...

လုရန် အံ့အားသင့်သွားသည်။

"ဘယ်သွားမလို့လဲ..."

"ရှပြည်နယ်ကနေ ထွက်သွားမယ်လေ..."

ကုဟိုင်က ပြောဆိုသည်။

"ပြီးတော့ ဂျူနီယာညီမ ယွဲ့လင်ကိုပါ ခေါ်သွားရမယ်... ကျွန်တော်တို့ ပြေးကြစို့... သူရဲကောင်းဆိုတာ ချက်ချင်းကြုံရမယ့် အရှုံးကို မခံစားသင့်ဘူး... လက်စားချေဖို့ဆိုတာ ဆယ်နှစ်စောင့်လို့ ရပါတယ်..."

ထိုစကားကို ကြားသောအခါ လုရန်က အော်ဟစ်ရယ်မောလိုက်၏။

သူက လက်ဝှေ့ယမ်းပြပြီး ပြောလိုက်သည်။

"ဒီလောက်ထိ မဟုတ်ပါဘူး... ချင်းရွှမ်ဂိုဏ်းက ငါ့ကို ဘာမှလုပ်လို့ မရပါဘူး..."

သို့သော် ကုဟိုင်သည် အလွန်စိုးရိမ်နေဆဲပင်။

"ဆရာက ရွှေအင်မော်တယ် တစ်ယောက်ပါ... ဒါပေမဲ့ အဲ့ဒီအင်အားစုလေးခုမှာလည်း ရွှေအင်မော်တယ် တော်တော်များများ ရှိတယ်... ဒါ့ပြင် ချင်းရွှမ်ဂိုဏ်းရဲ့ နောက်ကွယ်မှာ မဟာပေါင်းစည်းခြင်း အင်မော်တယ်နယ်ပယ် ဘိုးဘေးတစ်ယောက် ရှိတယ်လို့ ကောလာဟလတွေ ရှိတယ်..."

ကုဟိုင်၏ စိုးရိမ်မှုသည် အကြောင်းပြချက် မရှိသည်တော့ မဟုတ်ပေ။

လုရန်သည် ရွှေအင်မော်တယ်တစ်ဦး ဖြစ်သော်လည်း သူတို့ဘက်တွင် ရွှေအင်မော်တယ် အများအပြား ရှိနေသည်။

အကယ်၍ သူတို့က လုရန်ကို ဝိုင်းရံတိုက်ခိုက်ပါက အထက်ဘုံသို့ တက်လှမ်းလာသည်မှာ ရက်အနည်းငယ်သာ ရှိသေးသော သူသည် မည်သို့ တုံ့ပြန်တိုက်ခိုက်နိုင်မည်နည်း။

မဟာပေါင်းစည်းခြင်း အင်မော်တယ် ဘိုးဘေးတစ်ဦး အပါအဝင်ဆိုလျှင် လုရန် သေချာပေါက် သေရပေမည်။

သို့သော် လက်တွေ့တွင် လုရန်သည် မဟာပေါင်းစည်းခြင်း အင်မော်တယ်အောက်ရှိ မည်သူ့ကိုမဆို ချက်ချင်းသတ်ဖြတ်နိုင်သည်။

သူ၏ အင်မော်တယ် နည်းစနစ်က ရွှေအင်မော်တယ်များကို ချက်ချင်းသတ်ဖြတ်နိုင်ပြီး ရွှေအင်မော်တယ်အောက်ရှိ အဆင့်မြင့် အင်မော်တယ်များနှင့် အစစ်အမှန် အင်မော်တယ်များအတွက်မူ လုရန်က သူ၏ နယ်ပယ်ဖြင့် တိုက်ရိုက်ဖိနှိပ်နိုင်သည်။

သူကိုယ်တိုင်ကလည်း ရွှေအင်မော်တယ်များ၏ တိုက်ခိုက်မှုများကို ကာကွယ်နိုင်စွမ်းရှိသည်။ အစစ်အမှန် အင်မော်တယ်များနှင့် အဆင့်မြင့် အင်မော်တယ်များအတွက်မူ လုရန်ကဲ့သို့ ရွှေအင်မော်တယ်တစ်ဦး၏ ကာကွယ်မှုကို ချိုးဖျက်ရန် မလွယ်ကူချေ။

ထို့ကြောင့် အခြေခံအားဖြင့် မဟာပေါင်းစည်းခြင်း အင်မော်တယ်အောက်တွင် လုရန်သည် ပြိုင်ဘက်ကင်းပင်။

မဟာပေါင်းစည်းခြင်း အင်မော်တယ်များနှင့် ပတ်သက်၍မူ လုရန်၏ လက်ရှိနယ်ပယ်သည် ရွှေအင်မော်တယ်နယ်ပယ် တတိယအဆင့်သို့ ရောက်ရှိနေလေပြီ။

သူသည် နံနက်ပိုင်းတွင် ရွှေအင်မော်တယ်အဆင့်သို့ တက်လှမ်းခဲ့သည်။ ဤနေရာသို့ ခရီးသွားပြီးနောက် လင်းပေါင်အာ၏ အရှိန်မြှင့်တင်မှုနှင့် အချိန်ကုန်လွန်မှုတို့ ပေါင်းစပ်ကာ မှောင်လုနီးပါး ဖြစ်လာချိန်တွင် လုရန်၏ နယ်ပယ်သည် ရွှေအင်မော်တယ် တတိယအဆင့်သို့ တိတ်တဆိတ် ရောက်ရှိသွားခဲ့သည်။

ငါးရက်အတွင်း သူ မဟာပေါင်းစည်းခြင်းနယ်ပယ်သို့ သေချာပေါက် တက်လှမ်းနိုင်မည်ဟု လုရန် အကြမ်းဖျင်း တွက်ချက်လိုက်၏။

တစ်ချိန်တည်းမှာပင် ရှောက်ယင်းနှင့် ဖေးလော့ထျန်းတို့လည်း ရှိနေသည်။

နတ်ဆိုးဘုရင်တစ်ပါး၊ ကောင်းကင်နတ်ဆိုးတစ်ပါးရှိနေကာ နှစ်ဦးလုံးသည် မဟာပေါင်းစည်းခြင်းအင်မော်တယ်နှင့် တူညီသောအဆင့်တွင် ရှိကြသည်။

လုရန်တွင် ခုန်းတုန်ကောင်းကင်ချိတ်ပိတ်စည်းတံဆိပ်လည်း ရှိနေသဖြင့် ထိုချင်းရွှမ်ဂိုဏ်း၏ဘိုးဘေးကို သူ မကြောက်ချေ။

"ဆရာ... ကျွန်တော် ပြောတာ နားထောင်ပါ... ဆရာ လုံးဝ မသွားသင့်ဘူး..."

လုရန် စကားမပြောသည်ကို မြင်သောအခါ ကုဟိုင်က ထပ်မံ၍ ဖျောင်းဖျလိုက်သည်။

"ဒီနေရာက အောက်ဘုံနဲ့ မတူဘူး... အောက်ဘုံမှာ အပြာရောင်ဂိုဏ်း တပည့်တွေက ထင်သလို သောင်းကျန်းလို့ ရပေမဲ့ ဒီစိတ်ဝိညာဉ်နယ်မြေမှာ ဆရာက မဟာပေါင်းစည်းခြင်း အင်မော်တယ်တစ်ယောက်ရဲ့ ကြောက်ဖို့ကောင်းတာကို မကြုံဖူးသေးလို့ပါ..."

လုရန်က လက်ဝှေ့ယမ်းပြပြီး ပြောဆိုသည်။

"ကိစ္စမရှိပါဘူး... မင်းရဲ့ စီနီယာအစ်မနဲ့ စီနီယာအစ်ကို ရှိနေတာဆိုတော့ ဘာပြဿနာမှ မရှိပါဘူး..."

စီနီယာအစ်မနဲ့ စီနီယာအစ်ကိုလား...

"ဘယ်သူတွေလဲ..."

ကုဟိုင် အနည်းငယ် ဇဝေဇဝါ ဖြစ်သွားသည်။

စိတ်ဝိညာဉ်နယ်မြေတွင် သူ၏ စီနီယာအစ်ကိုများနှင့် စီနီယာအစ်မများ အများအပြား ရှိနေပြီး သူတို့အားလုံးသည် ထိပ်သီးပုဂ္ဂိုလ်များ ဖြစ်ကြသော်လည်း မည်သူမျှ ဤအင်အားစုလေးခု၏ စီရင်ပိုင်ခွင့်အောက်တွင် မရှိကြပေ။

ထိုသို့မဟုတ်ပါက ထိုအင်အားစုလေးခုသည် လွှမ်းမိုးခွင့်ရမည် မဟုတ်ပေ။

"မြောက်ပိုင်းတောရိုင်း နတ်ဆိုးမျိုးနွယ်က နတ်ဆိုးဘုရင် ရှောက်ယင်းနဲ့ နဝမအမှောင် သရဲဘုံက ကောင်းကင်နတ်ဆိုး ဖေးလော့ထျန်းလေ..."

လုရန်က ပြောလိုက်သည်။

"နတ်ဆိုးဘုရင်... ကောင်းကင်နတ်ဆိုး..."

ကုဟိုင်၏ မျက်လုံးများ တောက်ပသွားသည်။

အဲ့ဒါက မဟာပေါင်းစည်းခြင်း အင်မော်တယ် နှစ်ယောက်နဲ့ ညီမျှတယ်လေ...

ထို့ပြင် ယောင်မျိုးနွယ်နှင့် မိစ္ဆာမျိုးနွယ်တို့သည် လူသားမျိုးနွယ်ထက် ကျင့်ကြံခြင်းတိုးတက်မှု နှေးကွေးသော်လည်း တူညီသောအဆင့်တွင် သူတို့သည် လူသားမျိုးနွယ်ကို ခြေတစ်လှမ်းသာ၍ တည်ငြိမ်စွာ ဖိနှိပ်ထားနိုင်ပေ၏။

ထိုသို့ဆိုပါက ချင်းရွှမ်ဂိုဏ်း၏ဘိုးဘေးကို အလွန်အမင်း ကြောက်ရွံ့နေရန် အမှန်တကယ် မလိုအပ်ပေ။

"ဒီလိုဆိုမှတော့ ဆရာ... ကျွန်တော် လိုက်ခဲ့မယ်..."

ကုဟိုင်က ပြောလိုက်သည်။

"ထားလိုက်ပါတော့... မင်း ဒီမှာ အေးအေးဆေးဆေး နေခဲ့... အဲ့ဒီ အင်အားစုလေးခုကို သုတ်သင်ရှင်းလင်းမယ့် အချိန်ရောက်ရင် အပြာရောင်ဂိုဏ်းက သူတို့လက်အောက်က လုပ်ငန်းတွေအားလုံးကို လွှဲပြောင်းယူလိမ့်မယ်... အဲ့ဒီအခါကျရင် မင်း ပါဝင်လို့ရတယ်..."

လုရန်က ပြောလိုက်သည်။

ဂလု...

ကုဟိုင်သည် တံတွေးကို မြိုချလိုက်၏။

အို ဘုရားရေ... ဆရာရဲ့ရည်ရွယ်ချက်က အဲ့ဒီအင်အားစုလေးခုကို သုတ်သင်ရှင်းလင်းပြီး သူတို့ရဲ့ နှစ်ပေါင်းများစွာကြာမြင့်ခဲ့တဲ့ အုတ်မြစ်ကို လွှဲပြောင်းယူဖို့ပဲ...

အဲ့ဒါက လုံးဝကို စည်းစိမ်ချမ်းသာပဲ...

ထို့ပြင် သူတို့သည် အပြာရောင်ဂိုဏ်း၏ အခြေခံအုတ်မြစ်ကို တည်ဆောက်ရန် ဤဒေသကို အားကိုးပြီးနောက် တဖြည်းဖြည်း တိုးချဲ့နိုင်သည်။

စိတ်ဝိညာဉ်နယ်မြေရဲ့ နံပါတ်တစ်ဂိုဏ်းက ထွက်ပေါ်လာတော့မှာပဲ...

ကုဟိုင်သည် ဤစကားကို ကြားပြီးနောက် စိတ်လှုပ်ရှားသွားပေ၏။ လုရန်အတွက် စိုးရိမ်ပြီး နောက်တစ်ကြိမ် ခွဲခွာရမည်ကို ဝမ်းနည်းကာ သူလည်း ပါဝင်ဆင်နွှဲချင်သည်။

သို့သော် ထိုအဆင့်ရှိ တိုက်ပွဲများတွင် သူ ပါဝင်၍မရကြောင်းကိုလည်း သူ သိထားသည်။

ကုဟိုင်သည် အဆင့်မြင့် အင်မော်တယ်တစ်ဦးသာ ဖြစ်ပြီး တိုက်ခိုက်ရေးတွင် မကျွမ်းကျင်ပေ။ ထိုနေရာသို့ သွားခြင်းက သူ၏အသက်ကို စတေးရုံသာ ဖြစ်ပြီး ဤသည်က သူ၏ တပည့်များကိုလည်း စိုးရိမ်မှုများ ဖြစ်စေပေလိမ့်မည်။

"ကောင်းပါပြီ... ကျွန်တော် ဒီနေရာမှာနေပြီး ဆရာ့ဆီက သတင်းကို စောင့်နေပါ့မယ်..."

ကုဟိုင်က ခေါင်းညိတ်လိုက်၏။

နတ်ဆိုးဘုရင်နှင့် ကောင်းကင်နတ်ဆိုး ရှိနေသဖြင့် ဤကိစ္စသည် အောင်မြင်မည်မှာ သေချာပေါက်ပင်။

မည်သို့ပင်ဆိုစေကာမူ ချင်းရွှမ်ဂိုဏ်းမှလွဲ၍ ကျန်မိသားစုသုံးခုမှာ ထိုဂိုဏ်း၏ အစေခံများသာ ဖြစ်ပြီး အလွယ်တကူ သုတ်သင်ရှင်းလင်းနိုင်သည်။

ချင်းရွှမ်ဂိုဏ်း၏ ဘိုးဘေးတစ်ယောက်တည်းကသာ ပြဿနာတစ်ရပ်ဖြစ်သည်။

သို့သော် နှစ်ယောက်နှင့် တစ်ယောက်ဖြစ်ပြီး ကောင်းကင်ယောင်တစ်ကောင်နှင့် ကောင်းကင်မိစ္ဆာ တစ်ကောင်က လူသားမျိုးနွယ် မဟာပေါင်းစည်းခြင်း အင်မော်တယ်တစ်ယောက်ကို တိုက်ခိုက်ရန် ပူးပေါင်းထားခြင်းဖြစ်သဖြင့် အနိုင်ရနိုင်ခြေက အလွန်မြင့်မားသည်။

သို့သော် လက်တွေ့တွင် ယခုတစ်ကြိမ် တာအိုဆွေးနွေးပွဲတွင် ပါဝင်မည့် အပြာရောင်ဂိုဏ်း တပည့်များထဲတွင် မဟာပေါင်းစည်းခြင်း အင်မော်တယ်များသည် ရှောက်ယင်းနှင့် ဖေးလော့ထျန်းတို့ထက် ပို၍ပါဝင်နေသည်။

နေမင်းကြီး အနောက်ဘက်သို့ ဝင်သွားသည်။

ကျင်းလင်မြို့ရှိ မြင့်မြတ်မီးတောက်ဂိုဏ်း အိမ်တော်အတွင်း၌....

ရှဲ့ထယ်ယန်က ခြံဝင်းအတွင်း၌ ငေးမောရင်းထိုင်နေသည်။

ဖေးလော့ထျန်းသည် ကျင့်ကြံနေပြီး မိစ္ဆာစစ်သည်တချို့ကိုသာ သူ့ကို စောင့်ကြည့်ခိုင်းထားသော်လည်း အမှန်အားဖြင့် မလိုအပ်ပေ။ သူ ထွက်ပြေးမည်မဟုတ်သလို ပြေးရန်လည်း မစဉ်းစားရဲချေ။

သူ၏ နတ်ဘုရားစိတ်ဝိညာဉ်ကို ဖေးလော့ထျန်းက ထိန်းချုပ်ထားဆဲပင်။ တစ်ဖက်လူ၏အတွေးတစ်ချက်ဖြင့် သူ၏စိတ်ဝိညာဉ်လွင့်စင်ပြီး စိတ်ဆန္ဒ ပျက်စီးသွားပေလိမ့်မည်။

သတင်းဖြန့်စဉ်က မြင့်မြတ်မီးတောက်ဂိုဏ်းသို့ သူတို့ကို မပို့ဆောင်ခဲ့သင့်ကြောင်း သူ အနည်းငယ် နောင်တရမိသည်။

လုရန် မဟာလော့ ဓားဂိုဏ်းမှာ ရှိနေတယ်ဆိုတဲ့ သတင်းကို ဖြန့်ချီလိုက်တာနဲ့ လုံလောက်ပြီ မဟုတ်ဘူးလား...

အခုတော့ အရမ်းကောင်းသွားပြီ... အပြာရောင်ဂိုဏ်းတပည့်တွေက ငါ့ကို တိုက်ရိုက်လာရှာကြပြီလေ...

"ဟူး... နတ်ဆိုးဘုရင်တစ်ပါးနဲ့ကောင်းကင်နတ်ဆိုး တစ်ပါး... ချင်းရွှမ်ဂိုဏ်းက သူတို့ကို တောင့်ခံနိုင်မှာ မဟုတ်ဘူး ထင်တယ်..."

ရှဲ့ထယ်ယန်က ဤတစ်ကြိမ် သူ၏ အစီအစဉ်များ အကောင်အထည်ပေါ်လာမည် မဟုတ်ကြောင်း သိနေသဖြင့် တီးတိုးရေရွတ်လိုက်သည်။

ထိုအချိန်မှာပင် အပူလှိုင်းတစ်ခုက ရုတ်တရက် သူ့ဆီသို့ ပြေးဝင်လာသည်။

သူ မော့ကြည့်လိုက်ရာ ကောင်းကင်ကို ပြည့်နှက်နေသော မြင့်မြတ်သော မီးတောက်များက ကောင်းကင်တစ်ဝက်ကို အနီရောင် ဆိုးထားသည်အား မြင်တွေ့လိုက်ရသည်။

တိမ်တိုက်များ၏ရှေ့တွင် အရက်ဘူးကို လွယ်ထားသော စုတ်ပြတ်နေသည့် သူတောင်းစားတစ်ဦးသည် ဟင်းလင်းပြင်ကို ဖြတ်သန်းလာပေ၏။

သူ၏နောက်တွင် ကောင်းကင်နှင့်မြေကြီးကို ထိစပ်နေသော ဧရာမဗာဂျရာပုံရိပ်ယောင်တစ်ခု ရှိနေသည်။

ရှဲ့ထယ်ယန်၏မျက်လုံးသူငယ်အိမ်များ ရုတ်တရက် ကျဥ်းမြောင်းသွားသည်။

"တာလော့... တာလော့ ဓမ္မပုံရိပ်ယောင်... နောက်ထပ် မဟာပေါင်းစည်းခြင်း အင်မော်တယ် တစ်ပါး ရောက်လာပြန်ပြီ..."