အခန်း ၄၈

အခန်း ၄၈: ရှင်းထျန်း ဓမ္မပုံရိပ်ယောင်

လုရန်ထံတွင် သိချင်စိတ်များဖြင့် ပြည့်နှက်နေပြီး အရိုးစုကို ကောက်ယူကာ အပြာရောင်ဂိုဏ်း၏ သိုင်းပညာလေ့ကျင့်ရေးကွင်းသို့ ပျံသန်းသွားတော့သည်။

ဤသိုင်းပညာလေ့ကျင့်ရေးကွင်း၏ အတိုင်းအတာသည် မဟာလော့ဓားဂိုဏ်းထက် များစွာပို၍ကြီးမားသည်။

ထိုနေရာကို ပင်မတောင်ထိပ်နံဘေးရှိ အရန်တောင်ထိပ်တစ်ခုကို အလယ်တည့်တည့်မှ ဖြတ်တောက်၍ ဖန်တီးထားပေ၏။ ထို့ပြင် ထိုနေရာကို သံကြိုးလျှောက်လမ်းများမှတစ်ဆင့် ပင်မတောင်ထိပ်နှင့် တခြားအရန်တောင်ထိပ်များနှင့် ချိတ်ဆက်ထားသည်။

မဟာလော့ဓားဂိုဏ်းနှင့် သစ်ရွက်နီမျှော်စင်တို့မှ တပည့်များ မပြောင်းရွှေ့လာကြသေးသဖြင့် ဤနေရာသည် အနည်းငယ် ခြောက်ကပ်နေပုံရသည်။

လုရန်သည် အလယ်ဗဟိုတွင် မတ်တတ်ရပ်ကာ အရိုးစုကို မြေပြင်ပေါ်တွင် ချထားပြီး ပလ္လင်ခွေထိုင်လိုက်၏။

ထို့နောက် သူက မျက်လုံးများကို စုံမှိတ်လိုက်သည်။

တခြားတပည့်များသည် သိုင်းပညာလေ့ကျင့်ရေးကွင်းကို ဝိုင်းရံကာ လုရန်ကို မျှော်လင့်ချက်အပြည့်ဖြင့် ကြည့်နေကြသည်။

စက္ကန့်အနည်းငယ်အကြာတွင် လုရန်က မျက်လုံးများကို ဖွင့်လိုက်သည်။

"ဒါနဲ့... ဓမ္မပုံရိပ်ယောင်တစ်ခုကို ဘယ်လို ထုတ်ယူရမလဲ..."

လုရန်က မေးလိုက်သည်။

အို...

တပည့်များအားလုံး ရယ်မောမိလုနီးပါး ဖြစ်သွားကြ၏။

ယဲ့ဟုန်ရီက ပြောဆိုသည်။

"ဆရာ့ရဲ့ နတ်ဘုရားစိတ်ဝိညာဉ်နဲ့ ဆက်သွယ်ရုံပါပဲ... အရိုးစုရဲ့ ပိုင်ရှင်က သေသွားပြီဆိုတော့ ဘာခုခံမှုမှ ရှိမှာ မဟုတ်ဘူး... ဆရာ ဓမ္မပုံရိပ်ယောင်ကို ခံစားရတာနဲ့ တစ်ပြိုင်နက် ဆရာ့ကို သူ့ရဲ့ သခင်အဖြစ် အသိအမှတ်ပြုခိုင်းလိုက်ရုံပါပဲ..."

ဤသည်က အလွန်ရိုးရှင်းသည်။

အရိုးစုသည် ပိုင်ရှင်မဲ့ ဓမ္မပုံရိပ်ယောင်တစ်ခုအတွက် အခွံတစ်ခု ဖြစ်လာခဲ့လေပြီ။

လုရန်က မျက်လုံးများကို နောက်တစ်ကြိမ် မှိတ်ထားလိုက်၏။ ယဲ့ဟုန်ရီ၏ ညွှန်ကြားချက်များအတိုင်း သူ၏ နတ်ဘုရားစိတ်ဝိညာဉ် စွမ်းအားများ စိမ့်ထွက်လာပြီး အရိုးစုတစ်ခုလုံးကို မကြာမီ ဖုံးလွှမ်းသွားတော့သည်။

တွေးထင်ထားသည့်အတိုင်းပင်...

လုရန်သည် အရိုးစုအတွင်း ရောနှောနေသော အထူး စွမ်းအင်ခန္ဓာကိုယ်တစ်ခုကို လျှင်မြန်စွာ တွေ့ရှိခဲ့သည်။

လုရန်၏ နတ်ဘုရားစိတ်ဝိညာဉ် စွမ်းအားများ ထိတွေ့သည်အထိ ထိုအရာသည် ငြိမ်သက်စွာ နေခဲ့ပြီးနောက် ဖြည်းညှင်းစွာ စတင်၍ လှုပ်ရှားလာတော့သည်။

"ဒါက ဓမ္မပုံရိပ်ယောင် ဖြစ်ရမယ်..."

လုရန်က တီးတိုးရေရွတ်လိုက်၏။

သူသည် ဓမ္မပုံရိပ်ယောင်ကို အရိုးစုမှ ခွာထွက်ရန် ဂရုတစိုက် စတင်လမ်းညွှန်လိုက်သည်။

သို့သော် ထိုအချိန်မှာပင်...

ထူးဆန်းသော မြင်ကွင်းတစ်ခု ထွက်ပေါ်လာသည်။

မလှုပ်မယှက်ဖြစ်နေသော အရိုးစုသည် ရုတ်တရက် တုန်ခါသွားပြီးနောက် မတ်မတ်ထထိုင်လာတော့သည်။

ဦးခေါင်းခွံ၏ အခေါင်းပေါက်ဖြစ်နေသော မျက်လုံးအိမ်များအတွင်း မီးပွားနှစ်ခု လင်းလက်လာပြီး လုရန်ကဲ့သို့ တူညီသော ကိုယ်ဟန်အနေအထားကို ထိန်းသိမ်းထားရင်း သူ့ကို စိုက်ကြည့်နေသည်။

ပတ်ဝန်းကျင်ရှိ တပည့်များ အံ့အားသင့်သွားကြသည်။

ဘာတွေ ဖြစ်နေတာလဲ...

လုရန်လည်း တစ်ခုခု မှားယွင်းနေကြောင်း ခံစားမိပေ၏။

သူ ဓမ္မပုံရိပ်ယောင်ကို ဆွဲယူနေစဉ် အရိုးစုအတွင်း၌ ငြိမ်သက်နေသည့် တခြားနတ်ဘုရားစိတ်ဝိညာဉ် စွမ်းအားတစ်ခုက ရုတ်တရက် ခုန်ထွက်လာပြီး လုရန်၏နတ်ဘုရားစိတ်ဝိညာဉ်ကို ဆွဲငင်လိုက်သည်။

"ဒီသောက်ကောင်က... မသေသေးဘူးပဲ..."

လုရန် အလွန်အမင်း ထိတ်လန့်သွားတော့သည်။

ဤအရိုးစုသည် ထိုရှေးဟောင်းကန့်သတ်ချက်အတွင်း၌ အချိန်မည်မျှထိကြာအောင် ရှိနေခဲ့သည်ကို မသိရသော်လည်း ထိုအရိုးစုသည် သူ၏နတ်ဘုရားစိတ်ဝိညာဉ် မီးတောက်ကို မငြိမ်းသတ်စေဘဲ အမှန်တကယ်ပင် ထိန်းသိမ်းထားနိုင်ခဲ့သည်။

အသက်ရှင်စဉ်က သူသည် အလွန်အစွမ်းထက်သော ပုဂ္ဂိုလ်တစ်ဦး ဖြစ်ခဲ့မည်မှာ သေချာပေါက်ပင်။

သူသည် အင်မော်တယ်ဧကရာဇ်နယ်ပယ်ထက်ပင် ကျော်လွန်နေနိုင်ပေ၏။

ထိုအရိုးစုပိုင်ရှင်သည် မဟာအင်မော်တယ်ဧကရာဇ် တစ်ပါး ဖြစ်နေနိုင်သလော...

လုရန်၏စိတ်နှလုံးသား တုန်ရီသွားပြီး တစ်ဖက်လူသည် ဤအခွင့်အရေးကို အသုံးပြု၍ ပူးကပ်ဝင်ရောက်ရန် ရည်ရွယ်နေကြောင်း သူ ချက်ချင်း သဘောပေါက်သွားသည်။

မူလက သူသည် ရုန်းကန်ပြီး သူ၏ နတ်ဘုရားစိတ်ဝိညာဉ်ကို နောက်သို့ဆွဲယူရန် ရည်ရွယ်ခဲ့သည်။

သို့သော် ထို့နောက် တစ်ခုခုကို တွေးမိသည့်အလား သူ ငြိမ်ငြိမ်နေလိုက်၏။

နတ်ဘုရားစိတ်ဝိညာဉ်၏ဆန္ဒကြောင့် တွန်းအားပေးခံရသဖြင့် အရိုးစု တစ်ခုလုံးသည် ရုတ်တရက် ရှေ့သို့ ခုန်အုပ်လာပြီး လုရန်၏ခန္ဓာကိုယ်အပေါ်သို့ ဖိကပ်လိုက်တော့သည်။

ဤထူးဆန်းသော မြင်ကွင်းကြောင့် တပည့်များအားလုံး ကြောက်ရွံ့သွားကာ သူတို့၏မျက်နှာများ ဖြူရော်သွားသည်။

သူတို့သည် ဤကဲ့သို့ အခြေအနေမျိုးကို တစ်ကြိမ်တစ်ခါမျှ မမြင်ဖူးခဲ့ကြချေ

သို့တိုင် လုရန်ကမူ လုံးလုံးလျားလျား ငြိမ်သက်နေဆဲပင်။

အရိုးစုသည် လုရန်ကို ဖိကပ်ထားပြီး ထူးဆန်းသော ပုံစံဖြင့် သူ၏အဝတ်အစားများကို ဖောက်ထွင်းကာ သူ၏အသားထဲသို့ ပေါင်းစည်းသွားပြီး သူ၏အရိုးများဆီသို့ တဖြည်းဖြည်း ချဉ်းကပ်လာတော့သည်။

ထိုအရိုးစုသည် လုရန်၏အရိုးများကို အစားထိုးရန် ဤမြင့်မြတ်သွေးကြော ကျောက်စိမ်းအရိုးများကို အသုံးပြုပြီးနောက် ဤခန္ဓာကိုယ်ကို လုံးလုံးလျားလျား ထိန်းချုပ်ကာ ပြန်လည်မွေးဖွားခြင်းကို ရရှိရန်အတွက် သူ၏ နတ်ဘုရားစိတ်ဝိညာဉ်ဖြင့် ကျူးကျော်ဝင်ရောက်ရန် ရည်ရွယ်ထားပုံရသည်။

လုရန်သည် ထိုအရာကို သတိထားမိသော်လည်း ဂရုမစိုက်သေးချေ။

သို့သော် ထိုဖြစ်စဉ်အတွင်း သူ အလွန်အမင်းနာကျင်မှုကို ခံစားနေရသည်။

မြင့်မြတ်သွေးကြော ကျောက်စိမ်းအရိုးများသည် လုရန်၏ အရိုးများဆီသို့ ချဉ်းကပ်လာပြီး ပြင်းထန်သော အစားထိုးမှုကို စတင်တော့သည်။

ခရက်... ခရက်... ခရက်...

လုရန်၏အရိုးများသည် တစ်လက်မချင်းစီ အပိုင်းပိုင်းအစစ ဖြစ်သွားပေ၏။

ထို့နောက် မြင့်မြတ်သွေးကြော ကျောက်စိမ်းအရိုးများက လုရန်၏ အရိုးများကို တစ်လက်မချင်းစီ အစားထိုးလိုက်သည်။ ဤနာကျင်မှုသည် သူ၏ခန္ဓာကိုယ်ကို အကြိမ်တစ်ထောင် လှီးဖြတ်ခံရသည်ထက်ပင် ပို၍နှိပ်စက်ညှဉ်းပန်းမှု ဖြစ်နေသည်။

လုရန်ပင်လျှင် ချွေးများရွှဲနစ်နေပြီး သူ၏ ခန္ဓာကိုယ် အထိန်းအကွပ်မဲ့စွာ တုန်ယင်နေတော့သည်။

တပည့်များအားလုံး ထိတ်လန့်သွားကြ၏။

"စီနီယာအစ်မ ရှောက်ယင်း... မြန်မြန်နည်းလမ်းတစ်ခုခု စဉ်းစားပါဦး... ဘာ... ဘာတွေ ဖြစ်နေတာလဲ..."

ယဲ့ဟုန်ရီက စိုးရိမ်တကြီး အော်ဟစ်လိုက်သည်။

ရှောက်ယင်းက မျက်မှောင်ကြုတ်ပြီး အံ့တင်းတင်းကြိတ်ကာ ပြောဆိုသည်။

"ငါတို့ရဲ့ စွမ်းအားတွေကို ပေါင်းစည်းပြီးတော့ အဲ့ဒီအရိုးစုကို အရင် ဆွဲထုတ်ကြရအောင်... သောက်ကျိုးနည်း... ဘာတွေ ဖြစ်နေတာလဲ..."

ထိုသို့ပြောဆိုပြီးနောက်...

တပည့်အနည်းငယ်သည် ရှေ့သို့တက်ရန် ဟန်ပြင်လိုက်ကြ၏။

"ငါ့ကို ဂရုမစိုက်နဲ့... နောက်ဆုတ်..."

လုရန်သည် သူ့တပည့်များ၏ ရည်ရွယ်ချက်များကို သတိထားမိပုံရပြီး ဝင်ပြောလိုက်သည်။

သူ၏အသံမှာ အနည်းငယ် အက်ရှပြီး တုန်ယင်နေသည်။

ဤအချိန်အခိုက်အတန့်တွင်...

မြင့်မြတ်သွေးကြော ကျောက်စိမ်းအရိုးများ အစားထိုးမှု အဆုံးသတ်သွားလေပြီ။

လုရန်၏ မူလအရိုးများသည် အညစ်အကြေးများ ဖယ်ရှားခံရသည့်အလား အမှုန်အမွှားများအဖြစ် ကြေမွှပျက်စီးသွားပြီး သွေးမြှုပ်များနှင့်အတူ သူ၏ အရေပြားမှ ယိုစိမ့်ထွက်လာတော့သည်။

ထိုအရာက လုရန်ကို သွေးများဖြင့် ဖုံးလွှမ်းနေသကဲ့သို့ ဖြစ်စေခဲ့သည်။

မြင့်မြတ်သွေးကြော ကျောက်စိမ်းအရိုးများ အစားထိုးမှု ပြီးစီးသွားသည့် အခိုက်အတန့်မှာပင် မူလနတ်ဘုရားစိတ်ဝိညာဉ် စွမ်းအားများသည် ထိုအရာများကို ဗဟိုပြု၍ ပြင်းထန်စွာ လှုပ်ခတ်လာတော့သည်။

ထိုစွမ်းအားများသည် အတွင်းမှနေ၍ အပြင်သို့ လုရန်၏ခန္ဓာကိုယ်ကို လုံးလုံးလျားလျား လွှမ်းမိုးရန် ရည်ရွယ်ထားပေ၏။

သို့သော် ရုတ်ချည်းဆိုပင် ထိုနတ်ဘုရားစိတ်ဝိညာဉ်သည် တစ်ခုခုမှားယွင်းနေကြောင်း နားလည်သဘောပေါက်သွားတော့သည်။

သူသည် အရိုးများမှ စိမ့်ထွက်၍ မရကြောင်း သူ တွေ့ရှိခဲ့သည်။

ကြောက်မက်ဖွယ်ကောင်းပြီး လွှမ်းမိုးချုပ်ကိုင်နိုင်သော ဖိအားတစ်ရပ်က သူ့ကို သူ၏ကိုယ်ပိုင်အရိုးများအတွင်း၌ ခိုင်မြဲစွာ ချုပ်နှောင်ထားပြီး သူ့ကို မလှုပ်ရှားနိုင်အောင် ပြုလုပ်ထားသည်။

ထို့ပြင် ထိုဖိအားသည် အဆက်မပြတ် မြင့်တက်နေပေ၏။

ထိုသို့ဖြစ်ရသည့် အကြောင်းရင်းမှာ အမှန်အားမြင့် လုရန်၏ဒန်တျန်အတွင်း၌ လှည့်ပတ်နေသော စတုရန်းပုံ ရှေးဟောင်းတံဆိပ်တုံးကြောင့်ပင်။

"လူသားမျိုးနွယ်ရဲ့ မြင့်မြတ်တဲ့ အရာတစ်ခု..."

ပထမဆုံးအကြိမ်အဖြစ် ထိုနတ်ဘုရားစိတ်ဝိညာဉ်၏ အသိစိတ်မှ အသံတစ်ခု ထွက်ပေါ်လာသည်။ ထိုအသံသည် အနည်းငယ် အိုမင်းနေပုံရသော်လည်း ခံစားချက် အတက်အကျ တစ်စုံတစ်ရာကို မကြားရပေ။

ထိုအစား သူက မေးလိုက်သည်။

"မင်းရဲ့ အထောက်အထားက ဘာလဲ လူငယ်လေး... လူသားမျိုးနွယ်ရဲ့ မြင့်မြတ်တဲ့ အရာတစ်ခုက ဘာလို့ မင်းဆီမှာ ရှိနေရတာလဲ..."

လုရန် အသက်ပြင်းပြင်းတစ်ချက် ရှူထုတ်ပြီး သူက ပြောလိုက်သည်။

"အဲ့ဒါက ခင်ဗျားနဲ့ ဘာမှမဆိုင်ဘူး... ခင်ဗျားအတွက်ကတော့ အဘိုးကြီး... ခင်ဗျားက အဲ့ဒီရှေးဟောင်း ကန့်သတ်ချက်ထဲမှာ နှစ်သောင်းနဲ့ချီပြီး ပိတ်မိနေခဲ့တာ... ပြီးတော့ ခင်ဗျားရဲ့ နတ်ဘုရားစိတ်ဝိညာဉ်က အချိန်အကြာကြီးကတည်းက ပျက်စီးသွားခဲ့ပြီ... ဒါတောင် ခင်ဗျားက ကျုပ်ကို ပူးကပ်ဖို့ ကြိုးစားသေးတယ်ပေါ့... အိပ်မက်မက်နေလိုက်... ဒါပေမဲ့ ဒီမြင့်မြတ်သွေးကြော ကျောက်စိမ်းအရိုးတွေကတော့ ကျုပ်အတွက် တကယ်ကို အသုံးဝင်တယ်..."

မဟာပေါင်းစည်းခြင်း အင်မော်တယ်နယ်ပယ်တွင် ရှိနေသော်လည်း အင်မော်တယ်ဧကရာဇ်နယ်ပယ်ရှိ သူများသာ ပိုင်ဆိုင်သင့်သော မြင့်မြတ်သွေးကြော ကျောက်စိမ်းအရိုးများကို ပိုင်ဆိုင်ထားခြင်း...

ဤသည်မှာ သူ့အတွက် ကြီးမားသော အမြတ်အစွန်းပင်။

ထိုနတ်ဘုရားစိတ်ဝိညာဉ်သည် အချိန်အတော်ကြာ တိတ်ဆိတ်သွားတော့သည်။

လုရန်၏ စကားများကြောင့် သူ ဒေါသမထွက်ခဲ့ချေ။ ထိုအစား သူက သက်ပြင်းချကာ ရေရွတ်လိုက်သည်။

"နှမြောစရာပဲ... တကယ့်ကို နှမြောစရာပဲ..."

ထို့နောက် ခုန်းတုန် ကောင်းကင်ချိတ်ပိတ်စည်းတံဆိပ်အောက်တွင် ထိုနတ်ဘုရားစိတ်ဝိညာဥ်သည် အမှန်တကယ်ပင် သူ့အလိုလို လွင့်စင်သွားပြီး အစအနမကျန် ပျောက်ကွယ်သွားတော့သည်။

လုရန် အံ့အားသင့်သွားသော်လည်း ထိုကိစ္စနှင့်ပတ်သက်၍ များစွာစဉ်းစားနေရန် အချိန်မရှိပေ။

ဖိနှိပ်ထားသော ဓမ္မပုံရိပ်ယောင် စွမ်းအားသည် အရိုးများမှ ပေါက်ကွဲထွက်လာပြီး လုရန်ကို သခင်အဖြစ် အသိအမှတ်ပြုလိုက်၏။

ဝီ...

ကောင်းကင်ဘုံကိုးထပ်အထက်မှ တောက်ပသော အလင်းတန်းတစ်ခု ကျဆင်းလာတော့သည်။

ကြောက်မက်ဖွယ်ကောင်းသော ဖိအားတစ်ခုနှင့်အတူ ထိုအလင်းတန်းသည် လုရန်ကို ဗဟိုပြု၍ မြေပြင်မှ မြင့်တက်လာသည်။

သူ၏နံဘေးရှိ တပည့်များသည် ဤဖိအားကြောင့် သိုင်းပညာပြိုင်ကွင်း၏ အစွန်းသို့ ဆုတ်ခွာရန် ဖိအားပေးခံရပြီး စက်ဝိုင်းပုံစံပြန့်ကျဲကာ လုရန်ကို မယုံကြည်နိုင်စွာ ကြည့်နေကြ၏။

"ဒီလောက်ပြင်းထန်တဲ့ ဖိအား... ဒါက ဘာကြီးလဲ..."

"ဒါက ဓမ္မပုံရိပ်ယောင်တစ်ခုရဲ့ အရှိန်အဝါပဲ... ဒါပေမဲ့ သူ့ရဲ့ စွမ်းအားက အရမ်း ကြောက်စရာကောင်းတယ်... ဒီလိုမျိုးကို တစ်ခါမှ မမြင်ဖူးဘူး..."

"ဆရာက အခု ဘယ်လို အခြေအနေမျိုးမှာ ရှိနေလဲ... အဲ့ဒီအရိုးစုရဲ့ လှည့်ကွက်ထဲ သူ ကျမသွားလောက်ဘူး မဟုတ်လား..."

...

တပည့်များ၏ စကားပြောဆိုသံများကြားတွင်...

လုရန်၏ နောက်တွင်...

ဝုန်း...

နတ်ဘုရားတစ်ပါး၏ ပုံရိပ်ယောင် ရုတ်တရက် ထွက်ပေါ်လာတော့သည်။ သူ တာလော့ဓမ္မပုံရိပ်ယောင်ကို အောင်မြင်စွာ ပေါင်းစပ်နိုင်ခဲ့လေပြီ။

လုရန်၏ နယ်ပယ်သည်လည်း ခြေလှမ်းတစ်ဝက် မဟာပေါင်းစည်းခြင်း အင်မော်တယ် အင်မော်တယ်နယ်ပယ်မှ မဟာပေါင်းစည်းခြင်း အင်မော်တယ်အဖြစ်သို့ ချောမွေ့စွာ တက်လှမ်းလာတော့သည်။

ထိုနတ်ဘုရားပုံရိပ်ယောင်တွင် ခန္ဓာကိုယ်အထက်ပိုင်း ဗလာကျင်းနေပြီး ကြွက်သားများ အဖုအထစ်ထနေသည်။

သူ၏ ဘယ်ဘက်လက်သည် မြေကြီးပေါ်တွင် စိုက်ထားသော ဧရာမ ပုဆိန်ကြီးကို ကိုင်ထားပြီး ညာဘက်လက်က ရက်စက်ကြမ်းကြုတ်သော နတ်ဆိုးမျက်နှာ ထွင်းထုထားသည့် ဧရာမဒိုင်းကြီးကို ကိုင်ထားလေ၏။

ထိုနတ်ဘုရားတွင် ခေါင်းမရှိပေ။ ရင်ဘတ်နေရာတွင် ကြီးမားသော မျက်လုံးတစ်စုံ ရှိပြီး ချက်တွင် ဟောင်းလောင်းပွင့်နေသော ပါးစပ်တစ်ခု ရှိသည်။

ထိုနတ်ဘုရား၏ အရွယ်အစားသက်သက်ကပင် တပည့်ဆယ့်နှစ်ဦး၏ ဓမ္မပုံရိပ်ယောင်များထက် များစွာပို၍ကြီးမားနေသည်။

ဤဓမ္မပုံရိပ်ယောင် ထွက်ပေါ်လာသည့် အခိုက်အတန့်တွင် အထီးကျန်ဆန်သော ရှေးဟောင်း အရှိန်အဝါတစ်ရပ်က လေထုထဲတွင် ပျံ့နှံ့သွားသည်။ တပည့် ဆယ့်နှစ်ဦး၏ ဓမ္မပုံရိပ်ယောင်များသည် စိတ်ဖိစီးမှုဆိုင်ရာ တုံ့ပြန်မှုတစ်ခုအလား အလိုအလျောက် အမှန်တကယ် ထွက်ပေါ်လာကြ၏။

"ဒါက ဘယ်လို ဓမ္မပုံရိပ်ယောင်မျိုးလဲ..."

"တစ်ခါမှ မမြင်ဖူးဘူး... ဘယ်လိုလုပ်ပြီး ခေါင်းတောင် မရှိရတာလဲ..."

"အင်မော်တယ်ဧကရာဇ် နယ်ပယ်က ဓမ္မပုံရိပ်ယောင် တစ်ခုက တကယ့်ကို သာမန် မဟုတ်ဘူးပဲ..."

...

လူအုပ်၏ ဆွေးနွေးမှုများကြားတွင်...

သာမန်အားဖြင့် ပျင်းရိပြီး စကားနည်းသော စွန်းထျန်းယိုက ရုတ်တရက် တီးတိုးရေရွတ်လိုက်သည်။

"သူက အမြင့်မြတ်ဆုံး နတ်ဘုရားနဲ့ နတ်ဘုရားဖြစ်ဖို့ တိုက်ခိုက်ခဲ့တယ်... နတ်ဘုရားက သူ့ခေါင်းကို ဖြတ်ပြီး ချန်ယန်တောင်မှာ မြှုပ်နှံခဲ့တယ်... ဒါကြောင့် သူက သူ့ရဲ့ နို့သီးခေါင်းတွေကို မျက်လုံးအဖြစ် သုံးပြီး ချက်ကို ပါးစပ်အဖြစ် သုံးပြီးတော့ သူ့ရဲ့ ပုဆိန်နဲ့ ဒိုင်းလွှားကိုကိုင်ပြီး ကခုန်ခဲ့တယ်... ဒီဓမ္မပုံရိပ်ယောင်က..."

"စစ်နတ်ဘုရား ရှင်းထျန်း...”