အခန်း ၂၃၀

အခန်း ၂၃၀ - အမေရိကန်ဒေါ်လာ တစ်ဘီလီယံ ရင်းနှီးမြှုပ်နှံခြင်း

ဖုန်းရွေ့ သုတေသနဌာနအနေဖြင့် ပင်လယ်ရေထဲမှ ယူရေနီယမ် ထုတ်ယူသည့် လုပ်ငန်းနယ်ပယ်သို့ ဝင်ရောက်မည် ဖြစ်ပြီး ယူရေနီယမ် ထုတ်ယူရေး စက်ရုံတစ်ရုံကိုလည်း တည်ဆောက်သွားမည်ဟု လူစီက ကြေညာပြီးနောက် ပင်လယ်ရေထဲမှ ယူရေနီယမ် ထုတ်ယူခြင်းနှင့် ပတ်သက်သည့် သုတေသန စာတမ်းနှင့် သူမ၏ အမြင်များကို ဆက်လက် ရှင်းပြသည်။

ဤယူရေနီယမ် ထုတ်ယူခြင်းနှင့် ပတ်သက်သော စာတမ်းသည် လူစီ ကိုယ်တိုင် စဉ်းစားထားခြင်း မဟုတ်ဘဲ အသံလက်ထောက်က လေ့လာမှုများ ပြုလုပ်ပြီးနောက် ပြည့်စုံအောင် ရေးသားပေးထားခြင်း ဖြစ်သည်။

ဤစာတမ်းသည် အလွန်ပင် ပညာရပ်ပိုင်းဆိုင်ရာ ကျွမ်းကျင်မှု မြင့်မားလှသည်။ ယူရေနီယမ် ထုတ်ယူပုံနှင့် ပတ်သက်ပြီး ထူးခြားဆန်းသစ်သော အမြင်များ ပါဝင်ရုံသာမက ရိုးရာနည်းလမ်းများကိုလည်း ပိုမိုကောင်းမွန်အောင် ပြုပြင်ပြောင်းလဲထားသဖြင့် အလွန် ကောင်းမွန်သည့် စာတမ်းတစ်စောင် ဖြစ်သည်။

လူစီအနေဖြင့် ဤစာတမ်းကို ထုတ်ပြန်လိုက်သည်နှင့် သိပ္ပံလောကတွင် နာမည်ကြီးသွားမည်မှာ သေချာသည်။ သူမအနေဖြင့် သက်ကြီး သိပ္ပံပညာရှင်ကြီးများ၏ စာတမ်းများနှင့် ရင်ပေါင်တန်းနိုင်ရုံမက အချို့နေရာများတွင်ပင် ကျော်တက်သွားနိုင်သေးသည်။

"ဖုန်းရွေ့ သုတေသနဌာနက ပင်လယ်ရေထဲကနေ ယူရေနီယမ် ထုတ်ယူတဲ့ စက်ရုံ တည်ဆောက်တော့မယ်ဆိုတော့ ဆွန်ဖုန်း တစ်ယောက် တကယ်ကို လုပ်တော့မှာပဲ... တကယ်လို့ သူပြောသလို ယူရေနီယမ် တစ်ပေါင်ကို ဒေါ်လာ ၂၇၀ နဲ့ ထုတ်နိုင်ရင်တော့ ဒီနယ်ပယ်မှာ သူက ကိတ်မုန့်ကြီး တစ်ခုလုံးကို ဝါးမြိုသွားတော့မှာပဲ"

သတင်းထောက် တစ်ဦးက လူစီ၏ စကားကို ကြားပြီးနောက် စိတ်လှုပ်ရှားစွာ ပြောလိုက်သည်။ ဤသတင်းမှာ သတင်းခေါင်းကြီးပိုင်းတွင် ဖော်ပြခံရမည်မှာ သေချာသည်။

နောက်ပိုင်းတွင် အခြားသော ယူရေနီယမ် လုပ်ငန်းရှင်ကြီးများနှင့် ဆွန်ဖုန်းတို့အကြား စီးပွားရေး စစ်ပွဲများ ဖြစ်လာတော့မည် ဖြစ်သည်။

"ဟုတ်တယ်... ဒါပေမဲ့ ဒီ X စုပ်ယူပစ္စည်းက တကယ်ပဲ အဲဒီလောက် ထိရောက်ပါ့မလား... ကုန်ကျစရိတ်ကို ၁၀ ရာခိုင်နှုန်း လျှော့ချနိုင်ရင်တော့ ဖုန်းရွေ့ သုတေသနဌာနက နာမည်ကြီးလာတော့မှာပဲ... သိပ္ပံလောကမှာလည်း အသိအမှတ်ပြု ခံရပြီး ဆုတံဆိပ်တွေ ဘာတွေတောင် ရနိုင်သေးတယ်... ဒီလို သုတေသနမျိုးက လူသားမျိုးနွယ်အတွက် တကယ်ကို အကျိုးပြုပါတယ်" ဟု အနီးရှိ သတင်းထောက် တစ်ဦးက ရယ်မောကာ ပြောလိုက်သည်။

"တော်စမ်းပါ... လူသားမျိုးနွယ်ကို အကျိုးပြုတာတို့ ဘာတို့... ဒီအရင်းရှင်တွေက ငွေရှာဖို့ပဲ ရည်ရွယ်ပြီး သုတေသန လုပ်နေကြတာလေ" ဟု အခြား သတင်းထောက် တစ်ဦးက ဝင်ရောက် ငြင်းဆိုလိုက်သည်။

"ဟွန်း... လူဆိုတာ ငွေရှာဖို့ မဟုတ်ရင် ဘာလုပ်ဖို့လဲ... မင်းလို လူမျိုးက တစ်သက်လုံး ကင်မရာပုခုံးထမ်းပြီး ပြေးလွှားနေရတဲ့ အဆင့်ပဲ ဖြစ်မှာ" ဟု အပြန်အလှန် လှောင်ပြောင် ပြောဆိုကြသည်။

ထိုသတင်းထောက်များ မသိလိုက်သည်မှာ ဆယ်နှစ်ကျော် ကြာသောအခါ ထိုသို့ အလှောင်ခံရသော သတင်းထောက်မှာ အောင်မြင်သော လုပ်ငန်းရှင်ကြီး တစ်ယောက် ဖြစ်လာလိမ့်မည် ဆိုသည်ကိုပင်။

စင်အောက်တွင် ကင်မရာများက တစ်ဖျတ်ဖျတ် လင်းလက်နေပြီး လူစီက စာတမ်းကို ဆက်လက် ဖတ်ကြားနေသည်။ သတင်းထောက်များကလည်း စိတ်ဝင်တစား မှတ်စုများ ထုတ်မှတ်နေကြသည်။

မိနစ် ၃၀ ကြာပြီးနောက် လူစီ၏ စာတမ်း ဖတ်ကြားမှု ပြီးဆုံးသွားပြီး ခန်းမတစ်ခုလုံး လှိုင်လှိုင်ထ သော လက်ခုပ်သံများဖြင့် ပြည့်နှက်သွားသည်။

ဤစာတမ်းမှာ အလွန်တန်ဖိုးရှိပြီး ယူရေနီယမ် ထုတ်ယူသည့် နည်းလမ်းများတွင် တော်လှန်ပြောင်းလဲမှုများ ဖြစ်ပေါ်လာတော့မည်ဟု ခံစားမိလိုက်ကြသည်။

ထို့နောက် သတင်းထောက်များက မေးခွန်းထုတ်သည့် အစီအစဉ် စတင်သည်။

"လူစီ... ကျွန်မတို့ သိသလောက်ဆိုရင် ဖုန်းရွေ့ သုတေသနဌာန ဖွဲ့စည်းတာ နှစ်လတောင် မရှိသေးပါဘူး... ဒီလောက်မြန်မြန်နဲ့ အဆင့်မြင့်တဲ့ စုပ်ယူပစ္စည်းကို ဘယ်လိုများ တီထွင်လိုက်နိုင်တာလဲ... ပင်လယ်ရေထဲက ယူရေနီယမ် ထုတ်ယူတာက ဒီလောက်တောင် လွယ်ကူနေတာလား" ဟု သတင်းထောက် တစ်ဦးက မေးလိုက်သည်။

"အဟမ်း... ဒီမေးခွန်းကိုတော့ ကျွန်တော်ပဲ ဖြေပါ့မယ်" ဟု ဆွန်ဖုန်းက မိုက်ခရိုဖုန်းကို ယူလိုက်သည်။

"ပထမဆုံး ပြောချင်တာက ဖုန်းရွေ့ သုတေသနဌာနကို အပြင်ကို ကြေညာခင် ခြောက်လလောက် ကတည်းက ကျွန်တော် ဖွဲ့စည်းထားတာပါ... အကြောင်းအမျိုးမျိုးကြောင့် မကြေညာခဲ့တာပါ... ပင်လယ်ရေထဲက ယူရေနီယမ် ထုတ်ယူခြင်း သုတေသနကိုလည်း အဲဒီအချိန်ကတည်းက စတင် လုပ်ဆောင်ခဲ့တာ... အခု လူစီတို့လို ထက်မြက်တဲ့ သိပ္ပံပညာရှင်တွေ ရောက်လာတော့ သုတေသန လုပ်ငန်းတွေ ပိုမြန်ဆန်သွားပြီး X စုပ်ယူပစ္စည်း ဆိုတာ ပေါ်ပေါက်လာတာပဲ" ဟု ဆွန်ဖုန်းက ဖြေကြားလိုက်သည်။

"ဪ... ဒီလိုကိုး... နှစ်လနဲ့ တီထွင်လိုက်တာ မဟုတ်ဘူးဆိုတော့ ယုတ္တိရှိပါတယ်" ဟု သတင်းထောက်များက အချင်းချင်း တိုးတိုးလေး ပြောဆိုနေကြသည်။ သိပ္ပံ သုတေသန လုပ်ငန်း ဆိုသည်မှာ ဆယ်စုနှစ်ချီ ကြာမြင့်နိုင်သလို အခွင့်သာပါက လျင်မြန်စွာလည်း အောင်မြင်နိုင်ပေသည်။

ထို့အပြင် ပင်လယ်ရေထဲမှ ယူရေနီယမ် ထုတ်ယူခြင်းကို လူအများက လွန်ခဲ့သော နှစ်ပေါင်းများစွာကတည်းက သုတေသန ပြုလုပ်နေခဲ့ကြခြင်း ဖြစ်ရာ ဖုန်းရွေ့ သုတေသနဌာနမှာ ယခင်ရှိပြီးသား အခြေခံများ ပေါ်တွင်မှ ပိုမိုကောင်းမွန်အောင် ပြုပြင်မွမ်းမံခြင်းသာ ဖြစ်သဖြင့် အချိန် အတိုအရှည်မှာ ပြောရခက်လှသည်။

သို့သော် ကုန်ကျစရိတ် ၁၀ ရာခိုင်နှုန်း လျှော့ချနိုင်ခြင်းမှာမူ တကယ့်ကို ထူးခြားသည့် ရလဒ်ပင် ဖြစ်သည်။

"မစ္စတာဆွန်... ခင်ဗျားတို့ရဲ့ ယူရေနီယမ် ထုတ်ယူရေး စက်ရုံကို ဘယ်မှာ တည်ဆောက်မလဲ... ကနေဒါမှာလား" ဟု ဒုတိယမြောက် သတင်းထောက်က မေးသည်။

"ဒီကိစ္စကိုတော့ လက်ရှိအချိန်မှာ ပြောပြလို့ မရသေးပါဘူး ခင်ဗျားတို့ မီဒီယာ သူငယ်ချင်းတွေကို တောင်းပန်ပါတယ်" ဟု ဆွန်ဖုန်းက ပြန်ဖြေလိုက်သည်။

"မစ္စတာဆွန်... ဒီ သုတေသနအတွက် ရန်ပုံငွေ ဘယ်လောက်လောက် သုံးစွဲထားပါလဲ"

"လက်ရှိမှာတော့ အမေရိကန် ဒေါ်လာ သန်း ၅၀၀ လောက် ရင်းနှီးမြှုပ်နှံထားပါတယ်... အနာဂတ်မှာ ပိုပြီးတောင် ရင်းနှီးမြှုပ်နှံသွားဦးမှာပါ" ဟု ဆွန်ဖုန်းက လိမ်ညာ ပြောဆိုလိုက်သည်။

တကယ်တမ်းတွင် သူသည် အဆောက်အအုံ ငှားရမ်းခနှင့် အခြား အနည်းအကျဉ်းသာ သုံးစွဲထားခြင်း ဖြစ်သော်လည်း အပြင်လူများ မသိအောင် မိမိ သဘောအတိုင်း ပြောလိုက်ခြင်း ဖြစ်သည်။

"မစ္စတာဆွန်... နောက်ပြီး စက်ရုံ တည်ဆောက်ဖို့ ဘယ်လောက် ရင်းနှီးမလဲ... တစ်နှစ်ကို ယူရေနီယမ် ဘယ်နှစ်တန်လောက် ထုတ်လုပ်နိုင်မလဲ"

"အစပိုင်းမှာတော့ ဒေါ်လာ တစ်ဘီလီယံလောက် ရင်းနှီးပြီး ကြီးမားတဲ့ စက်ရုံ တစ်ရုံ တည်ဆောက်ဖို့ စီစဉ်ထားပါတယ်... အနာဂတ်မှာလည်း ပိုပြီး ရင်းနှီးမြှုပ်နှံသွားမှာပါ... ကျွန်တော် ဒီလုပ်ငန်းကို အလွန် စိတ်ဝင်စားပါတယ်... နှစ်စဉ် ထုတ်လုပ်နိုင်မယ့် ပမာဏကိုတော့ နောက်မှ စောင့်ကြည့်ပေးကြပါ" ဟု ဆွန်ဖုန်းက နှာခေါင်းကို ပွတ်ရင်း ပြောလိုက်သည်။

ဒေါ်လာ တစ်ဘီလီယံ ဆိုသည်မှာ အလွန်ကြီးမားသော ပမာဏ ဖြစ်သော်လည်း ကြီးမားသော စက်ရုံ တစ်ရုံအတွက်တော့ လုံလောက်ပေသည်။

ဆွန်ဖုန်း အနေဖြင့် အလုပ်ကို အလျင်စလို မလုပ်ဘဲ ဖြည်းဖြည်းချင်း တည်ဆောက်သွားမည် ဖြစ်ပြီး လက်ရှိတွင် ပိုမို အဆင့်မြင့်သော စုပ်ယူပစ္စည်းများ ရရှိရန်သာ အဓိကထား လုပ်ဆောင်သွားမည် ဖြစ်သည်။

"ဒေါ်လာ တစ်ဘီလီယံ... ဆွန်ဖုန်းကတော့ တကယ့်ကို ပြိုင်ဘက်တွေကို အံတုတော့မှာပဲ"

"ဆွန်ဖုန်းမှာ နည်းပညာရော ငွေကြေးပါ ရှိနေတာပဲ... ရွှေသင်္ဘောစုကို လေလံတင်လို့ ရထားတဲ့ ဒေါ်လာ သန်းပေါင်းများစွာနဲ့ ဆိုတော့ သူက တကယ့်ကို သူဌေးကြီးပါပဲ"

သတင်းထောက်များကြားတွင် ဆွန်ဖုန်းအကြောင်း ပြောဆိုသံများ ဆူညံနေသည်။

"ဆွန်ဖုန်းက ချောလည်း ချောတယ် ငယ်လည်း ငယ်တယ် ဘီလီယံနာ ပိုင်ရှင်လည်း ဖြစ်တယ်... သူ့သာ ငါ့ရည်းစား ဖြစ်ရင် အရမ်းကောင်းမှာပဲ" ဟု သတင်းထောက်မလေး တစ်ဦးက စိတ်ကူးယဉ်နေသည်။

"နင့်လို အသားအရေတွေ ပျက်စီးနေတဲ့ မိန်းကလေးကို သူက ဘယ်လိုလုပ် သဘောကျမှာလဲ" ဟု အနီးရှိ နောက်ထပ် လှပသော အမျိုးသမီး သတင်းထောက် တစ်ဦးက မထီမဲ့မြင် ပြုံးလိုက်သည်။

"ငါလို ရုပ်ရည်မျိုးမှပဲ အခွင့်အရေး ရှိမှာ" ဟု သူမက အထက်စီးမှ ပြောလိုက်သည်။

"ဟွန့်... နင် ဘယ်နှယောက်နဲ့ အိပ်ခဲ့ဖူးလဲဆိုတာ ဘယ်သူမှ မသိဘူး... ဆွန်ဖုန်းက နင့်ကို ဘယ်တော့မှ သဘောကျမှာ မဟုတ်ဘူး... ဆွန်ဖုန်းရဲ့ ဘေးက လူစီကို မမြင်ဘူးလား... နင့်ထက် ပိုပြီး ဆွဲဆောင်မှု ရှိသေးတယ်" ဟု သတင်းထောက်မလေးနှစ်ဦး အပြန်အလှန် စကားများနေကြသည်။