အခန်း ၂၃၄

အခန်း ၂၃၄ - ဘာမြူဒါတြိဂံသို့ ခရီးနှင်ခြင်း

ဆွန်ဖုန်းသည် ဗန်ကူးဗားတွင် ရက်အနည်းငယ်မျှ အေးအေးလူလူ အနားယူနေခဲ့သည်။ ယခုအခါ သူ့အတွက် အလုပ်များစရာ ကိစ္စကြီးကြီးမားမား မရှိတော့ပေ။

ပင်လယ်ရေထဲမှ ယူရေနီယမ် ထုတ်ယူရေး လုပ်ငန်းအတွက် ကုမ္ပဏီ မှတ်ပုံတင်ခြင်းနှင့် စက်ရုံ တည်ဆောက်ခြင်း ကိစ္စရပ်များကို အလောတကြီး လုပ်ဆောင်၍ မရဘဲ အဆင့်လိုက် လုပ်ဆောင်ရမည် ဖြစ်ရာ ထိုကိစ္စများကို စူးမေးက တာဝန်ယူ စီစဉ်ပေးနေသည်။

မားစ် သံရိုင်းတွင်းနှင့် ရှန်းဖုန်း ရေနံမြေအတွက်လည်း အထူးတလည် ပူပန်စရာ မလိုတော့ပေ။ ကျန်ရှိနေသည်မှာ နောက်လတွင် ကျင်းပမည့် ရွှေသင်္ဘောစုမှ ရတနာများ၏ ဒုတိယပိုင်း လေလံပွဲအတွက်သာ ဖြစ်ပြီး ထိုအချိန်ကျမှ ဆွန်ဖုန်း တစ်ယောက် အလုပ်များတော့မည် ဖြစ်သည်။

စာကြည့်ခန်းထဲတွင် ဆွန်ဖုန်းသည် သားဖြစ်သူ ဆွန်ရွိုက်ကို ပိုက်ထားရင်း လက်ဆွဲကွန်ပျူတာဖြင့် အင်တာနက် သုံးနေသည်။

ကလေးမိခင် ဟယ်မင်ယမှာ ယနေ့တွင် လျန်ယင်၊ ယန်ရွှယ် တို့နှင့်အတူ အပြင်သို့ လည်ပတ်ရန် ထွက်သွားကြသဖြင့် သားဖြစ်သူကို ဆွန်ဖုန်းထံသို့ အပ်ထားခဲ့ခြင်း ဖြစ်သည်။

ကလေးကို အတော်လေး အချိန်ယူ ချော့သိပ်ပြီးနောက် ဆွန်ဖုန်းသည် နဖူးကို ပွတ်သပ်ကာ သက်ပြင်းချလိုက်သည်။ ကလေးထိန်းရခြင်းမှာ မိန်းမများနှင့် ရန်ဖြစ်ရသည်ထက်ပင် ပို၍ ပင်ပန်းလှသည်။

အွန်လိုင်းဂိမ်း အနည်းငယ် ဆော့ကစားပြီးနောက် အသံလက်ထောက်၏ အသံက ဆွန်ဖုန်း၏ ဦးနှောက်ထဲတွင် ရုတ်တရက် ထွက်ပေါ်လာသည်။

"သခင်... စောစောက လူသားတွေရဲ့ အင်တာနက်ကွန်ရက်ထဲကို လျှောက်ကြည့်ရင်းနဲ့ စိတ်ဝင်စားစရာကောင်းတဲ့ ကိစ္စတစ်ခုကို တွေ့ထားတယ်..."

"အော်... ဘာများ စိတ်ဝင်စားစရာ ရှိလို့လဲ..." ဟု ဆွန်ဖုန်းက ဂိမ်းဆော့ရင်း ပြန်မေးလိုက်သည်။ အသံလက်ထောက်သည် လူသားများ၏ ကွန်ပျူတာ ကွန်ရက်ကမ္ဘာထဲသို့ ဝင်ရောက်နိုင်ပြီး ကမ္ဘာပေါ်တွင် ဖြစ်ပျက်နေသော သတင်းများကို ရှာဖွေနိုင်ကြောင်း သူ သိထားပြီး ဖြစ်သည်။

"ဘာမြူဒါတြိဂံမှာ ဒီတစ်လအတွင်း သင်္ဘောတွေ တစ်စင်းပြီးတစ်စင်း နစ်မြုပ်သွားတယ်လို့ သိရတယ်... အတော်လေး ထူးဆန်းနေတယ်... အခု သတင်းတွေမှာလည်း အဲဒီအကြောင်းတွေချည်းပဲ ဆူညံနေကြပြီ... ဘာမြူဒါတြိဂံနဲ့ ပတ်သက်တဲ့ အရင်က အချက်အလက်တွေကို ကျွန်တော် ထပ်ရှာကြည့်တော့ လူသားတွေက အဲဒီနေရာကို သေမင်းရဲ့ ပင်လယ်လို့တောင် ခေါ်ကြတာပဲ... အဲဒီနေရာကို ဖြတ်သွားတဲ့ သင်္ဘောတွေ မကြာခဏ နစ်မြုပ်တာတွေ ပျောက်ဆုံးတာတွေ ဖြစ်တတ်တယ်တဲ့..." ဟု အသံလက်ထောက်က ပြောပြသည်။

"ထားလိုက်ပါကွာ... အဲဒါတွေက မီဒီယာတွေနဲ့ လူတချို့က တမင်သက်သက် သတင်းကြီးအောင် လုပ်ကြံဖန်တီးထားတာတွေပါ... ဘာမှ ထူးဆန်းတာ မရှိပါဘူး... အဲဒီသင်္ဘောတွေက မုန်တိုင်းမိတာ ဒါမှမဟုတ် ကျောက်ဆောင်နဲ့ တိုက်မိပြီး နစ်သွားတာပဲ ဖြစ်မှာပါ..." ဟု ဆွန်ဖုန်းက အရေးမစိုက်ဟန်ဖြင့် တုံ့ပြန်လိုက်သည်။

ဘာမြူဒါတြိဂံနှင့် ပတ်သက်သည့် အကြောင်းအရာများကို အရင်ကတည်းက ဆွန်ဖုန်း မကြာခဏ ကြားဖူးထားသည်။ မည်သို့ပင်ဖြစ်စေ အင်တာနက်နှင့် သတင်းများတွင် ထိုအကြောင်းများကို အများအပြား ဖော်ပြလေ့ရှိကြသည်။

ထိုပင်လယ်ပြင်တွင် သင်္ဘောများ နစ်မြုပ်ပျောက်ဆုံးမှုများ တကယ်ပင် ဖြစ်ပွားခဲ့ဖူးပြီး ထိုနေရာကို တားမြစ်ပင်လယ် ဟုပင် ပြောစမှတ် ပြုကြသည်။

ထိုပင်လယ်အောက်တွင် တစ္ဆေ သရဲများ ရှိသည်ဟု ဆိုသလို ဘာမြူဒါတြိဂံသည် လျှို့ဝှက်ဆန်းကြယ်သော အာကာသနယ်မြေ သို့မဟုတ် အခြားကမ္ဘာတစ်ခုဆီသို့ သွားရာ လမ်းကြောင်းဖြစ်သည် ဟူ၍လည်း အမျိုးမျိုး ကောလာဟလ ထွက်နေကြသည်။

သို့သော်လည်း နောက်ပိုင်းတွင် ၎င်းတို့မှာ သတင်းလုပ်ကြံမှုများသာ ဖြစ်ကြောင်း မီဒီယာများက ရှင်းလင်းခဲ့ကြသည်။

ထိုနစ်မြုပ်ပျောက်ဆုံးမှုများမှာ သဘာဝဘေးအန္တရာယ်နှင့် ကြုံတွေ့ရခြင်း သို့မဟုတ် ကိုယ့်ပေါ့ဆမှုကြောင့် ကျောက်ဆောင်နှင့် တိုက်မိခြင်းတို့ကြောင့်သာ ဖြစ်သည်။

မည်သို့ပင်ဆိုစေကာမူ ဆွန်ဖုန်းသည် ဤကဲ့သို့သော ကိစ္စများကို ဘယ်သောအခါမှ မယုံကြည်ခဲ့ပေ။ ဂြိုဟ်သားများ ရှိသည်ဆိုလျှင်တော့ သူ ယုံကြည်နိုင်သော်လည်း တစ္ဆေ သရဲများ ရှိသည်ဆိုခြင်းနှင့် အခြားကမ္ဘာနှင့် ဆက်သွယ်ထားသော လမ်းကြောင်း ရှိသည်ဆိုသည်ကိုတော့ သူ လုံးဝ ယုံကြည်မည် မဟုတ်ပေ။

အကယ်၍များ တကယ် ရှိနေခဲ့လျှင်ပင် ထိုလမ်းကြောင်းမှတစ်ဆင့် ကမ္ဘာကြီးသည် ဟိုးအရင်ကတည်းက ဘီလူးသတ္တဝါများ၏ ကျူးကျော်သိမ်းပိုက်ခြင်းကို ခံနေရလောက်ပြီ ဖြစ်သည်။

"သခင်... အမှန်အမှားတော့ မသိဘူး... ကျွန်တော်တို့ ပင်လယ်ထဲမှာ သွားပြီး လမ်းလျှောက် ထွက်ကြရအောင်လေ..." ဟု အသံလက်ထောက်က အကြံပြုလာသည်။

လက်ရှိအချိန်အထိ ရေနက်ပိုင်း ဉာဏ်ရည်တု စက်ရုံအနေဖြင့် ကမ္ဘာပေါ်တွင် ဂြိုဟ်သားများ၏ အရိပ်အယောင်ကို မတွေ့ရှိရသေးပေ။ ထို့ကြောင့် ကမ္ဘာမြေပေါ်သို့ ဂြိုဟ်သားများ ရောက်မလာသေးကြောင်း အသံလက်ထောက်က အသေအချာ ကောက်ချက်ချထားသည်။

မှန်ပါသည်။ ရေနက်ပိုင်း ဉာဏ်ရည်တု စက်ရုံဆိုသည်မှာ ဂြိုဟ်သား မဟုတ်ဘဲ ပြင်ပဂြိုဟ်၏ ထုတ်ကုန်တစ်ခုသာ ဖြစ်သည်။

"ဘာမှ ပျော်စရာ မကောင်းဘဲနဲ့ ငါ မသွားချင်ပါဘူး..." ဆွန်ဖုန်းက နှုတ်ခမ်းမဲ့ကာ ပြောလိုက်သည်။ ပင်လယ်အောက်ခြေသို့ သွားပြီး အလကား အချိန်ဖြုန်းနေမည့်အစား အိမ်မှာ ကလေးထိန်းရင်း အွန်လိုင်းဂိမ်း ဆော့နေရသည်ကမှ ပို၍ ကောင်းသေးသည်။

"သွားကြရအောင်ပါ... သခင်မလေးတွေက တူနာငါး စားချင်တယ်လို့ ပူဆာနေကြတာလေ... ဒီတစ်ခေါက် အဲဒီကို သွားရင်းနဲ့ ပင်လယ်ထဲကနေ ငါးအကောင်ကြီးကြီး နည်းနည်းလောက် ဖမ်းလာခဲ့လို့ ရတာပေါ့..." ဟု အသံလက်ထောက်က ဆက်လက် မြှူဆွယ်နေသည်။

နောက်ဆုံးတွင်တော့ ဆွန်ဖုန်းသည် အသံလက်ထောက်၏ အကြံပြုချက်ကို သဘောတူ လက်ခံလိုက်ရသည်။

မသွားခင် ဆွန်ဖုန်းသည် လွန်ခဲ့သော ရက်အနည်းငယ်က ဘာမြူဒါတြိဂံတွင် ဖြစ်ပွားခဲ့သည့် လျှို့ဝှက်ဆန်းကြယ်သော သင်္ဘောပျောက်ဆုံးမှု သတင်းများကို အင်တာနက်ပေါ်တွင် ရှာဖွေ ဖတ်ရှုလိုက်သည်။

အကြောင်းအရာမှာ ဤသို့ဖြစ်သည်။ ဤတစ်လအတွင်း ကုန်တင်သင်္ဘော သုံးစင်းနှင့် အပျော်စီးသင်္ဘော တစ်စင်းတို့သည် ဘာမြူဒါတြိဂံ ပင်လယ်ပြင်ရှိ ရေကြောင်းလမ်းမှ ဖြတ်သန်းသွားစဉ် ရုတ်တရက် အဆက်အသွယ် ပြတ်တောက်သွားခဲ့သည်။

သင်္ဘောများမှာ မျှော်မှန်းထားသည့် အချိန်တွင် ခရီးဆုံး ဆိပ်ကမ်းများသို့ ရောက်ရှိမလာခဲ့ပေ။ ထို့ကြောင့် ရေကြောင်း ပို့ဆောင်ရေး ကုမ္ပဏီ ရုံးချုပ်များက သင်္ဘောများနှင့် အဆက်အသွယ် ပြတ်တောက်သွားပြီ ဖြစ်ကြောင်း စတင် သိရှိခဲ့ကြသည်။

ထိုသင်္ဘောများသည် ဘာမြူဒါတြိဂံအတွင်းတွင် ထိုသို့ပင် လျှို့ဝှက်ဆန်းကြယ်စွာ ပျောက်ဆုံးသွားခဲ့ခြင်း ဖြစ်သည်။ ကုမ္ပဏီ ရုံးချုပ်များမှ သင်္ဘောများကို ဆက်သွယ်၍ မရတော့သလို သင်္ဘောများ၏ အချက်ပြ သင်္ကေတများကိုလည်း ရှာဖွေ၍ မတွေ့တော့ပေ။

လက်ရှိတွင် ကယ်ဆယ်ရေး သင်္ဘောများ စေလွှတ်၍ ရှာဖွေနေသော်လည်း ယခုအချိန်အထိ ဘာသဲလွန်စမှ မတွေ့ရသေးပေ။

တစ်လအတွင်း သင်္ဘော လေးစင်းတိတိ ပျောက်ဆုံးသွားခြင်းမှာ တကယ်ပင် ထူးဆန်းလွန်းလှသည်။ ထို့ကြောင့် အင်တာနက်ပေါ်တွင် ဤသတင်းနှင့် ပတ်သက်၍ အုတ်အော်သောင်းနင်း ဖြစ်နေကြခြင်းပင်။

ဘာမြူဒါ သရဲတြိဂံ ဟူသော အမည်မှာ ၁၉၄၅ ခုနှစ်၊ ဒီဇင်ဘာလ ၅ ရက်နေ့တွင် အမေရိကန်တပ်ဖွဲ့၏ လေယာဉ်အမှတ် ၁၉ သည် လေ့ကျင့်ရေး ဆင်းနေစဉ် ရုတ်တရက် ပျောက်ဆုံးသွားခဲ့ရာမှ စတင် ပေါ်ပေါက်လာခြင်း ဖြစ်သည်။

ထိုအချိန်က သတ်မှတ်ထားသော လေယာဉ်ပျံသန်းမှု လမ်းကြောင်းမှာ တြိဂံပုံစံ ဖြစ်နေသည်။ ထို့ကြောင့် နောက်ပိုင်းတွင် လူအများက အမေရိကန် အရှေ့တောင်ဘက် ကမ်းရိုးတန်းရှိ အနောက်အတ္တလန္တိတ် သမုဒ္ဒရာပြင်ပေါ်တွင် ဘာမြူဒါမှ စတင်ကာ ဖလော်ရီဒါပြည်နယ် တောင်ပိုင်းရှိ မိုင်ယာမီအထိ ဆန့်တန်းထားပြီး ထိုမှတစ်ဆင့် ဘဟားမား ကျွန်းစုများကို ဖြတ်ကျော်ကာ ပွာတိုရီကို ကျွန်းဆီသို့၊ ထို့နောက် အနောက်လောင်ဂျီတွဒ် ၄၀ မျဉ်းအနီးရှိ ဆန်ဟွမ်သို့၊ ထိုမှတစ်ဖန် ဘာမြူဒါသို့ ပြန်လည် ချိတ်ဆက်ထားသော တြိဂံပုံစံ ဒေသတစ်ခုကို ဘာမြူဒါတြိဂံ သို့မဟုတ် သရဲတြိဂံ ဟု ခေါ်ဆိုလာကြသည်။

ထိုနေရာသည် သေမင်း၏ စံအိမ် ဟူသော နာမည်ဆိုးဖြင့်လည်း ကျော်ကြားသည်။ ဤဒေသတွင် သင်္ဘောများနှင့် လေယာဉ်များ ရာနှင့်ချီ၍ မတော်တဆမှုများ ဖြစ်ပွားခဲ့ပြီး လူပေါင်း ထောင်နှင့်ချီ၍ အသက်ဆုံးရှုံးခဲ့ရသည်။

၁၈၈၀ ပြည့်နှစ်မှ ၁၉၇၆ ခုနှစ်အတွင်း ပျောက်ဆုံးမှုပေါင်း ၁၅၈ ကြိမ်ခန့် ရှိခဲ့ပြီး အများစုမှာ ၁၉၄၉ ခုနှစ်နောက်ပိုင်း အနှစ် ၃၀ အတွင်း ဖြစ်ပွားခဲ့ခြင်း ဖြစ်သည်။ ထိုကာလအတွင်း ပျောက်ဆုံးမှု ၉၇ ကြိမ် ဖြစ်ပွားခဲ့ပြီး လူပေါင်း ၂၀၀၀ အနည်းဆုံး သေဆုံး သို့မဟုတ် ပျောက်ဆုံးခဲ့ရသည်။

ဤထူးဆန်းသော ပျောက်ဆုံးမှုများမှာ အဓိကအားဖြင့် အနောက်အတ္တလန္တိတ် သမုဒ္ဒရာရှိ ဆာဂါဆို ပင်လယ် ဟု ခေါ်သော မြောက်လတ္တီတွဒ် ၂၀ မှ ၄၀ ဒီဂရီ၊ အနောက်လောင်ဂျီတွဒ် ၃၅ မှ ၇၅ ဒီဂရီကြားရှိ ကျယ်ပြောလှသော ရေပြင်တွင် ဖြစ်ပွားလေ့ရှိသည်။

ထိုနေရာတွင် ကမ္ဘာကျော် မက္ကဆီကို ရေနွေးကြောင်း ဖြတ်သန်းစီးဆင်းနေပြီး နေ့စဉ်နှင့်အမျှ တစ်ရက်လျှင် ကီလိုမီတာ ၁၂၀ မှ ၁၉၀ အထိ မြန်နှုန်းဖြင့် စီးဆင်းနေကာ ရေဝဲများ၊ တိုင်ဖွန်းမုန်တိုင်းများနှင့် လေဆင်နှာမောင်းများ မကြာခဏ ဖြစ်ပေါ်လေ့ရှိသည်။

ထိုမျှမက ထိုနေရာရှိ ပင်လယ်ရေအနက်မှာ မီတာ ၄၀၀၀ မှ ၅၀၀၀ အထိ ရှိပြီး ပွာတိုရီကို ရေအောက်ချောက်ကမ်းပါးကြီးလည်း ရှိကာ ရေအနက် မီတာ ၇၀၀၀ ကျော်မှ အနက်ဆုံးနေရာတွင် မီတာ ၉၂၁၈ အထိ ရှိသည်။

လွန်ခဲ့သော ဆယ်စုနှစ်များအတွင်း သင်္ဘောပျောက်ဆုံးမှုများ ကြီးကြီးမားမား မရှိခဲ့သော်လည်း ယခုအချိန်တွင် တစ်လအတွင်း သင်္ဘော လေးစင်းတိတိ ဆက်တိုက် ပျောက်ဆုံးသွားပြန်ရာ ဤသရဲတြိဂံ ပင်လယ်ပြင်၏ နာမည်ဆိုးမှာ ပြန်လည် ကျော်ကြားလာခဲ့ပြန်သည်။

ဤသတင်းများကို ဖတ်ပြီးနောက် ဆွန်ဖုန်းသည် နှုတ်ခမ်းမဲ့ကာ အတွေးပေါက်သွားသည်။

"ဒီရာသီက ဘာမြူဒါတြိဂံ ပင်လယ်ပြင်မှာ တိုင်ဖွန်းမုန်တိုင်းတွေ လေဆင်နှာမောင်းတွေနဲ့ ရေအောက် ရေဝဲတွေ အများဆုံး ဖြစ်ပေါ်တတ်တဲ့ အချိန်နဲ့ တိုက်ဆိုင်နေလို့များလား... အဲဒါကြောင့် ဒီသင်္ဘော လေးစင်းက ကံမကောင်းတာပဲ ဖြစ်မှာပါ..."

လျှို့ဝှက်ဆန်းကြယ်သည့် အဖြစ်အပျက်များ ဆိုသည်ကိုတော့ သူ ဘယ်တော့မှ ယုံကြည်မည် မဟုတ်ပေ။

"ကဲပါ... ကျွန်တော်တို့ သွားကြည့်ကြတာပေါ့... ဒီနှစ်တွေထဲမှာ ဘာမြူဒါတြိဂံမှာ သင်္ဘောတွေ အများကြီး နစ်မြုပ်ခဲ့တာဆိုတော့ သခင်လည်း တန်ဖိုးကြီး ပစ္စည်းတွေ ကောက်ရနိုင်တာပဲလေ... လမ်းကြုံရင် ဂျပန်ပင်လယ်ဘက် ကူးပြီး တူနာငါး နည်းနည်းလောက် သွားဖမ်းကြမယ်... ဘယ်လိုပဲဖြစ်ဖြစ် သခင် အရှုံးမရှိပါဘူး..."

"ကောင်းပြီလေ... နှစ်သစ်ကူးပြီးနောက် ပထမဆုံး ပင်လယ်ထဲ ဆင်းတာပေါ့..." ဟု ဆွန်ဖုန်းက ပြောလိုက်သည်။

မကြာမီပင် ဆွန်ဖုန်းသည် ဗန်ကူးဗား ကမ်းခြေသို့ ကားမောင်းသွားလိုက်သည်။ ကားကို သေချာစွာ ရပ်နားပြီးနောက် လူသူကင်းမဲ့သော နေရာတစ်ခုကို ရှာကာ ရေငုပ်စစ်ဝတ်စုံကို ဝတ်ဆင်ပြီး ပင်လယ်ရေထဲသို့ လျှပ်တစ်ပြက် ပျံသန်း ဝင်ရောက်သွားလေသည်။

"ပစ်မှတ်က... ဘာမြူဒါတြိဂံ ပင်လယ်ပြင်ဆီကို..."

ဆွန်ဖုန်းသည် ရေငုပ်စစ်ဝတ်စုံကို မောင်းနှင်ရင်း ခရီးဆုံး ပန်းတိုင်ဆီသို့ စတင် ထွက်ခွာလာခဲ့သည်။ ဤတစ်ကြိမ် ရေအောက်ခရီးစဉ်မှာ အလွန် စိတ်ဝင်စားစရာ ကောင်းလိမ့်မည်ဟု ဆွန်ဖုန်း၏ စိတ်ထဲတွင် တိတ်တဆိတ် ခံစားနေရလေသည်။