အခန်း ၂၆၅

အခန်း ၂၆၅ - ပြိုင်ဘက်၏ အဆင့်မြင့် လက်နက်များ

ထိုနေ့ ညနေပိုင်းတွင် ဆွန်ဖုန်းသည် ဗန်ကူးဗားမှ နယူးဖောင်လန်ရှိ စိန့်ဂျွန်မြို့သို့ လေယာဉ်ဖြင့် ထွက်ခွာခဲ့သည်။ ဟွမ်ကျားချန်၏ အခြေအနေကိုတော့ သူမ၏ ကံတရားအပေါ်သာ ပုံအပ်ထားရတော့မည်။ စွမ်းရည်မြှင့် ဆေးရည် ထိုးပေးလိုက်သော်လည်း ရောဂါ လုံးဝ ပျောက်ကင်းသွားမည်ဟု အသံလက်ထောက်က အာမမခံရဲပေ။

နောက်တစ်နေ့ မွန်းတည့်ချိန်တွင် ဆွန်ဖုန်းသည် ဖုန်းရွေ့ သုတေသနဌာနသို့ အလျင်စလို ရောက်ရှိလာခဲ့သည်။

"အခု အခြေအနေ ဘယ်လို ရှိလဲ..."

ဆွန်ဖုန်းက လူစီကို မြင်သည်နှင့် စိုးရိမ်တကြီး မေးလိုက်သည်။

"သေသွားတဲ့ ပါရဂူ ငါးယောက်ရဲ့ အလောင်းတွေကို ကျန်တဲ့ ပါရဂူ ဆယ်ယောက်က ရှင်းလင်းပေးလိုက်ပါပြီ... လူသတ်သမားကိုလည်း ဖမ်းမိထားပြီး မြေအောက်ခန်းထဲမှာ ပိတ်လှောင်ထားပါတယ်... သူဌေး ပြန်လာပြီး စစ်ဆေးဖို့ စောင့်နေတာပါ... X2 စုပ်ယူပစ္စည်းနဲ့ ပတ်သက်တဲ့ အချက်အလက် အားလုံးကိုလည်း လုံခြုံတဲ့ နေရာမှာ သိမ်းဆည်းထားလိုက်ပါပြီ... လောလောဆယ် ဘာပြဿနာမှ ထပ်မဖြစ်သေးပါဘူး... ပြင်ပကလည်း ဒီလူသတ်မှုနဲ့ သူခိုးဝင်တဲ့ ကိစ္စကို မသိသေးပါဘူး..."

လူစီက အစီရင်ခံသည်။

"အရမ်းကောင်းတယ်... မင်း သွားနားလို့ ရပြီ... လောလောဆယ်တော့ မင်း ဒီသုတေသနဌာနထဲမှာပဲ နေပါဦး... ဒီက လုံခြုံရေးတွေကို ငါ အများကြီး တိုးချထားတယ်... ဒီမှာနေတာ အလုံခြုံဆုံးပါပဲ... အပြင်မှာ သွားနေရင် အန္တရာယ် တစ်ခုခု ကြုံရနိုင်တယ်..."

ဆွန်ဖုန်းက လူစီကို သတိပေးလိုက်သည်။

ဤကဲ့သို့သော ပြဿနာမျိုး ဖြစ်လာပြီးနောက် နောက်ထပ် ပြဿနာများလည်း ဆက်တိုက် ဖြစ်လာနိုင်သေးသည်။ ဘယ်လို အန္တရာယ်မျိုးနဲ့ ကြုံရမည်ကို သူ ကိုယ်တိုင်လည်း မပြောနိုင်ပေ။ ထို့ကြောင့် သူမကို ဤနေရာတွင်သာ ထားခြင်းက အကောင်းဆုံး ရွေးချယ်မှုပင်။

"ဟုတ်ကဲ့ပါ..."

လူစီက လိမ္မာစွာ ခေါင်းညိတ်လိုက်သည်။

ထိုညက ဖြစ်ပွားခဲ့သော တိုက်ပွဲကို သူမ သေချာ မမြင်လိုက်ရသော်လည်း အလွန် သွေးထွက်သံယို ဖြစ်ခဲ့မှန်းတော့ သိသည်။ သူမ ကိုယ်တိုင်လည်း ထိုလူသတ်သမား လက်ထဲတွင် သေမလို ဖြစ်ခဲ့ရသည်။

ယခုအခါ ပြင်ပကမ္ဘာတွင် သူမ၏ နာမည်က အလွန် ကြီးမားနေပြီ ဖြစ်ရာ မသမာသူများက သူမကို ဖမ်းဆီးပြီး X2 စုပ်ယူပစ္စည်း အကြောင်း ခြိမ်းခြောက် မေးမြန်းနိုင်သည် မဟုတ်ပါလား။ မိန်းမသား တစ်ယောက်တည်း အပြင်မှာ နေရန် တကယ်ကို အန္တရာယ် များလှသည်။

လူစီ ထွက်သွားပြီးနောက် ဆွန်ဖုန်းသည် စက်ရုပ် သက်တော်စောင့် လေးယောက်ကို ဖုန်းရွေ့ သုတေသနဌာန၏ တံခါးပေါက်တွင် စောင့်ကြပ်ရန် အမိန့်ပေးခဲ့ပြီး သူကိုယ်တိုင် မြေအောက်ခန်းဆီသို့ သွားလိုက်သည်။

ခုနက အသံလက်ထောက်က ထိုစက်ရုပ်များနှင့် ဆက်သွယ်ပြီးနောက် အလွန် အရေးကြီးသည့် ကိစ္စတစ်ခုကို တွေ့ရှိထားကြောင်း ပြောထားသည်။ ဤကဲ့သို့ လျှို့ဝှက်ချက်များကို လူစီအား ပေးမသိခြင်းက အကောင်းဆုံးပင်။

မြေအောက်ခန်းသို့ ရောက်သောအခါ ဆွန်ဖုန်းက အသံလက်ထောက်ကို မေးလိုက်သည်။

"ဘာ အရေးကြီးတဲ့ ကိစ္စ တွေ့ထားလို့လဲ... အဲဒီကောင်ဆီက သတင်း တစ်ခုခု ရလိုက်လို့လား..."

"မဟုတ်ဘူး... အဲဒီထက် ပိုအရေးကြီးတယ်... ဝင်ခိုးတဲ့ သူ သုံးခဲ့တဲ့ တစ်ကိုယ်တော် တိုက်ခိုက်ရေး လက်နက်တွေက အရမ်း အဆင့်မြင့်နေတယ်... လက်ရှိ ကမ္ဘာမြေပေါ်က လူတွေ တီထွင်နိုင်တဲ့ အဆင့်မျိုး မဟုတ်ဘူး..."

အသံလက်ထောက်က ပြောလိုက်သည်။

"အဆင့်မြင့်တဲ့ တစ်ကိုယ်တော် တိုက်ခိုက်ရေး လက်နက် ဟုတ်လား..."

ဆွန်ဖုန်း အနည်းငယ် အံ့ဩသွားသည်။ ဆွန်ဖုန်း အနေဖြင့် စူပါပါဝါ နိုင်ငံကြီးများ၏ လက်နက်များကို မမြင်ဖူးသလို မည်သို့သော လက်နက်မျိုးကို အဆင့်မြင့်သည်ဟု သတ်မှတ်ရမည်မှန်းလည်း မသိပေ။

သို့သော် အသံလက်ထောက်က အဆင့်မြင့်သည်ဟု ပြောလျှင် ထိုနည်းပညာက လက်ရှိ ကမ္ဘာ့ နည်းပညာ အဆင့်ထက် ကျော်လွန်နေမည်မှာ သေချာသည်။ အသံလက်ထောက်က ကမ္ဘာ့ နည်းပညာများကို သိပ်ပြီး အထင်ကြီးလေ့ မရှိပေ။

"အဲဒီလူရဲ့ နောက်ကွယ်မှာ ဂြိုဟ်သားတွေများ ပါနေလို့လား... ကမ္ဘာပေါ်မှာ ဂြိုဟ်သားတွေ ရှိနေတာလား..."

ဆွန်ဖုန်းက အံ့ဩတကြီး မေးလိုက်သည်။

မြေအောက်ခန်းထဲတွင် စက်ရုပ် လေးယောက်က ထိုလူသတ်သမားကို စောင့်ကြပ်နေကြသည်။

ဆွန်ဖုန်း ရောက်သွားသောအခါ ထိုလူကြမ်းကြီးမှာ သံကြိုးများဖြင့် အထပ်ထပ် ချည်နှောင်ခံထားရပြီး လှုပ်ပင် မလှုပ်နိုင်တော့သည်ကို တွေ့လိုက်ရသည်။ ပါးစပ်ထဲတွင်လည်း ခြေအိတ်စုတ် အချို့ကို ဆို့ထားသဖြင့် လျှာကိုက်သေရန်ပင် မဖြစ်နိုင်တော့ပေ။ သူ၏ မျက်နှာမှာ အလွန် ခံရခက်နေသည့် ပုံစံ ပေါက်နေသည်။

"သူ့ရဲ့ လက်နက်တွေကို ငါ့ကို ပြစမ်း..."

ဆွန်ဖုန်းက စက်ရုပ် တစ်ယောက်ကို ညွှန်ကြားလိုက်သည်။

မကြာမီ ဆွန်ဖုန်း၏ ရှေ့သို့ ထိုလက်နက်များ ရောက်လာသည်။ သေနတ် တစ်လက်၊ ကျည်ကာအင်္ကျီ တစ်ထည်နှင့် သာမန် နေကာမျက်မှန် တစ်လက်တို့ ဖြစ်သည်။ ကြည့်လိုက်ရုံဖြင့် ဤအရာများက အဆင့်မြင့်သည်ဟု လုံးဝ မထင်ရပေ။

"အသံလက်ထောက်... ဒီလက်နက်တွေက သာမန် ပစ္စည်းတွေလိုပဲနော်... ဘာတွေများ အဆင့်မြင့်နေလို့လဲ..."

ဆွန်ဖုန်းက နားမလည်နိုင်စွာဖြင့် မေးလိုက်သည်။

"ပိုင်ရှင်... အပြင်ပန်း ကြည့်ရင်တော့ ဒီအရာတွေက လက်ရှိ လူတွေ သုံးနေတဲ့ လက်နက်တွေနဲ့ သိပ်မကွာဘူး... ထူးခြားတယ်လို့လည်း မထင်ရဘူး... ဒါပေမဲ့ ဒီအရာတွေရဲ့ အစစ်အမှန် စွမ်းဆောင်ရည်ကို သိရင် ခင်ဗျား အံ့ဩသွားလိမ့်မယ်..."

အသံလက်ထောက်က ရှင်းပြသည်။

"အော်... ပြောပြပါဦး..."

ဆွန်ဖုန်း အနည်းငယ် အံ့ဩသွားသည်။ ကြည့်ရသည်မှာ ကြမ်းပြင်ပေါ်တွင် သေလုမျောပါး လဲနေသော ဤလူသတ်သမား၏ နောက်ခံမှာ မရိုးရှင်းလှပေ။

"ဒီမျက်မှန် အကြောင်း အရင် ပြောပြမယ်... ဒါက သာမန် မျက်မှန် မဟုတ်ဘူး... တပ်ဆင်ထားတဲ့ သူကို အာရုံစူးစိုက်မှု အားကောင်းစေပြီး ပစ်မှတ်ကို အလိုအလျောက် ရှာဖွေပေးနိုင်တယ်... အမြင်အာရုံကို ကြည်လင်စေပြီး လှုပ်ရှားမှု လမ်းကြောင်းတွေကိုလည်း ခွဲခြမ်းစိတ်ဖြာ ပေးနိုင်တယ်... လွယ်လွယ် ပြောရရင် ဒီမျက်မှန်ကိုသာ တပ်ထားရင် အရူးတောင် စနိုက်ပါ သေနတ်သမား တစ်ယောက် ဖြစ်သွားနိုင်တယ်"

"ဒီလောက်တောင် စွမ်းတာလား..."

ဆွန်ဖုန်း အနည်းငယ် လန့်သွားသည်။ ဤကဲ့သို့သော နည်းပညာမြင့် မျက်မှန်မျိုးကို လက်ရှိ ကမ္ဘာပေါ်တွင် တီထွင်နိုင်ခြင်း မရှိသေးပေ။ ဒီအရာတွေက တကယ်ပဲ မရိုးရှင်းဘူးဟု သူ တွေးလိုက်မိသည်။

"ကျန်တဲ့ အရာတွေကကော..."

"ဒီကျည်ကာအင်္ကျီကို... ကမ္ဘာပေါ်က အပြင်းဆုံး ဘားရက် စနိုက်ပါ ကျည်တောင် ဖောက်နိုင်မှာ မဟုတ်ဘူး... ဘယ်လောက် စွမ်းလဲ တွေးကြည့်ပေါ့... ဒီအင်္ကျီကို ချုပ်လုပ်ထားတဲ့ ပစ္စည်းက ပေါင်းစပ် ကုန်ကြမ်း အသစ် တစ်မျိုး ဖြစ်ပြီး... စွမ်းအင်သစ်တွေကိုပါ အသုံးပြုထားတယ်... ဒါကြောင့် ဒီအရာတွေကို လက်ရှိ ကမ္ဘာမြေပေါ်က နည်းပညာနဲ့ မတီထွင်နိုင်သေးဘူးလို့ ကျွန်တော် ရဲရဲကြီး ပြောရဲတာ..."

"ဒီသေနတ်က ပိုပြီး အဆင့်မြင့်သေးတယ်... ယမ်းမှုန့်တွေ၊ သံကျည်ဆန်တွေကို မသုံးဘူး... အဆင့်နိမ့် စွမ်းအင်ကို အသုံးပြုထားတာ... သေနတ်ထဲမှာ စွမ်းအင် ကျည်ဆန်တွေ ဖန်တီးပေးတဲ့ စနစ် တစ်ခု ပါတယ်... အလွန် မာကျောတဲ့ ရေခဲကျည်ဆန်ကို ပစ်ခတ်နိုင်တယ်... ဒီကျည်ဆန်က လူ ဒါမှမဟုတ် ပစ္စည်း တစ်ခုခုကို မှန်သွားရင် သုံးမိနစ် အကြာမှာ အရည်ပျော်သွားတယ်...

"ဒီသေနတ်ရဲ့ တိကျမှု၊ ပစ်ခတ်နိုင်တဲ့ အကွာအဝေး၊ ဖောက်ထွင်းနိုင်စွမ်းတွေက လက်ရှိ ကမ္ဘာပေါ်က ဘယ်သေနတ်နဲ့မှ ယှဉ်လို့ မရဘူး... ဒီသေနတ်က အဆင့်နိမ့် စွမ်းအင်ကို ကနဦး အသုံးပြုထားတဲ့ အဆင့်လို့ ပြောလို့ ရတယ်... ဒီတော့ စဉ်းစားကြည့်... ဒီရှာဖွေတွေ့ရှိမှုက ကြီးမားတဲ့ ရှာဖွေတွေ့ရှိမှု မဟုတ်ဘူးလား... ဒီလို လက်နက်မျိုးကို ပိုပြီး အဆင့်မြင့်တဲ့ လူ့အဖွဲ့အစည်းကပဲ တီထွင်နိုင်မှာ..."

အသံလက်ထောက်က ရှင်းပြသည်။

"နောက်ပြီး... ဒီလက်နက်တွေက ကျွန်တော်တို့ရဲ့ ဉာဏ်ရည်တု စက်ရုပ်တွေကိုပါ ခြိမ်းခြောက်နိုင်တယ်... တိုက်ပွဲ ဖြစ်တုန်းက စက်ရုပ် တစ်ယောက် ထိခိုက်သွားလို့ ပြန်ပြင်ပြီးမှ သုံးလို့ ရတော့မယ်..."

အသံလက်ထောက်က လေးနက်စွာ ဆက်ပြောသည်။

ဆွန်ဖုန်း ဤစကားကို ကြားသောအခါ မျက်မှောင် အလွန် ကြုတ်သွားသည်။ ဤလက်နက်များကို တီထွင်နိုင်သည့် အဖွဲ့အစည်းမှာ လုံးဝ မရိုးရှင်းနိုင်ပေ။ အလွန် ကြီးမားသော အင်အားစုကြီး တစ်ခု ဖြစ်နေနိုင်သည်။

အရေးအကြီးဆုံးမှာ ထိုသူများက သူ့ကို၊ ပိုမှန်အောင် ပြောရလျှင် သူ၏ X2 စုပ်ယူပစ္စည်းကို မျက်စိကျနေခြင်းပင်။ သူ၏ လျှို့ဝှက်ချက်တော့ ပေါက်ကြားသွားမည် မဟုတ်ကြောင်း ဆွန်ဖုန်း ယုံကြည်သည်။

"သူတို့က ဒီလောက် အင်အား ကြီးမားနေမှတော့... ငါ့ရဲ့ ဖုန်းရွေ့ သုတေသနဌာနကို နောက်ထပ် ဆက်ပြီး လာစုံစမ်းဦးမှာ သေချာတယ်... သူတို့ လွှတ်လိုက်တဲ့လူက ပြန်မရောက်သွားဘူးလေ..."

ဆွန်ဖုန်းက တွေးတောနေမိသည်။

ဤတစ်ကြိမ်တွင် တကယ် ပြဿနာ ကြီးနေပြီ ဖြစ်ပြီး ပြိုင်ဘက်ကလည်း မလွယ်လှပေ။ ပြိုင်ဘက်၏ လက်နက်က သူ၏ စက်ရုပ်ကိုပင် ထိခိုက်စေနိုင်သည် မဟုတ်ပါလား။

ဤစက်ရုပ်များက တိုက်ခိုက်ရေး စက်ရုပ်များ မဟုတ်ဘဲ စွမ်းအင် တူးဖော်ရန် အသုံးပြုသည့် စက်ရုပ်များ ဖြစ်သော်လည်း ရိုးရိုး စက်ရုပ်များတော့ မဟုတ်ပေ။

ရေငုပ်ဝတ်စုံနှင့် ယှဉ်လျှင် အဆတစ်ရာခန့် ကွာခြားသော်လည်း ထိခိုက်သွားသည် ဆိုခြင်းက တစ်ဖက်လူ၏ လက်နက်က အတော်လေး အစွမ်းထက်ကြောင်း သက်သေပြနေသည်။

"သူတို့က ငါ့ရဲ့ X2 စုပ်ယူပစ္စည်းကို အတင်းအကျပ် လုယူချင်တာ... ငွေကြောင့် ဒါမှမဟုတ် ဒီနည်းပညာကြောင့် ဖြစ်မယ်... ဒါပေမဲ့ ဘယ်လို ရည်ရွယ်ချက်ပဲ ဖြစ်ဖြစ် ငါ့အတွက်တော့ အန္တရာယ် ရှိတယ်... ငါ သေချာ စီစဉ်ရတော့မယ်..."

ဆွန်ဖုန်းက ပြောလိုက်သည်။

"ပိုင်ရှင်... ဒီလူကို စစ်ဆေးကြည့်ပါလား... သူ့ဆီက ဘာသတင်းတွေများ ရနိုင်မလဲ ဆိုတာကို..."

အသံလက်ထောက်က အကြံပေးလိုက်သည်။

"ကောင်းပြီ..."

ဆွန်ဖုန်းက ထိုလူ၏ ရှေ့သို့ သွားကာ ဆောင့်ကြောင့်ထိုင်လိုက်ပြီး သူ၏ ပါးစပ်ထဲမှ ခြေအိတ်စုတ်ကို ဆွဲထုတ်လိုက်ကာ အေးစက်စက် လေသံဖြင့် မေးလိုက်သည်။

"မင်း နာမည် ဘယ်သူလဲ... ဘယ်သူက လွှတ်လိုက်တာလဲ... ငါ့ရဲ့ X2 စုပ်ယူပစ္စည်းကို ဘာလို့ လာခိုးတာလဲ..."

ထိုလူကြမ်းကြီးမှာ အလွန် တောင့်တင်း ခိုင်မာပြီး ကြွက်သားများ အပြည့်အမောက် ရှိကာ လူသတ်သမား တစ်ယောက်၏ အငွေ့အသက်များ အပြည့် ရှိနေသည်။

"ဟွန်း... ငါ လုံးဝ မပြောဘူး... ငါ့ကို သတ်လိုက်တော့..."

ထိုလူကြမ်းကြီးက ဆွန်ဖုန်းကို မောက်မာစွာ ကြည့်ကာ မျက်လုံးများ မှိတ်လိုက်ပြီး အလွန် ခေါင်းမာကြောင်း ပြသလိုက်သည်။

"ဟားဟား... တော်တော် ခေါင်းမာတာပဲ... သူ့လက်ကို အရင် ဖြတ်လိုက်စမ်း..."

ဆွန်ဖုန်းက အေးစက်စက် ပြုံးကာ စက်ရုပ် တစ်ယောက်ကို လှမ်းခေါ်လိုက်သည်။

"မင်း သတ္တိရှိရင် ငါ့ကို သတ်လိုက်လေ... ငါ့ကို လာမစော်ကားနဲ့..."

ထိုလူကြမ်းကြီးက မျက်လုံးများ ဖွင့်ကာ ဆွန်ဖုန်းကို ဒေါသတကြီး စိုက်ကြည့်ပြီး အော်ဟစ်လိုက်သည်။

"မင်းမှာ ရွေးချယ်ခွင့် မရှိဘူး... ပြောမလား... မပြောဘူးလား... မင်းကို နောက်တစ်ခါ အခွင့်အရေး ပေးမယ်..."

ဆွန်ဖုန်းက ပြုံးစိစိဖြင့် ပြောလိုက်သည်။

"ငါ အဖွဲ့အစည်းကို ဘယ်တော့မှ သစ္စာမဖောက်ဘူး..."

"အရမ်းကောင်းတယ်... လက်နှစ်ဖက်လုံးကို ဖြတ်လိုက်..."

ဆွန်ဖုန်းက နေရာမှ ထကာ နောက်သို့ လှည့်လိုက်သည်။

နောက်တစ်စက္ကန့်တွင် ညည်းတွားသံ တစ်ချက်နှင့်အတူ ထိုလူသတ်သမား၏ လက်ကောက်ဝတ် နှစ်ဖက်စလုံး ပြတ်ထွက်သွားပြီး သွေးများ ပန်းထွက်လာကာ ကြမ်းပြင် တစ်ခုလုံး နီရဲသွားတော့သည်။ မြေအောက်ခန်း တစ်ခုလုံးလည်း သွေးနံ့များ ဖုံးလွှမ်းသွားသည်။

"ရှီး... ငါ့ကို သတ်လိုက်... ငါ့ကို သတ်လိုက်..."

ထိုလူကြမ်းကြီး၏ မျက်နှာမှာ ဖြူရော်သွားပြီး နဖူးမှ ချွေးစေးများ ကျလာသော်လည်း နာကျင်စွာ အော်ဟစ်ခြင်း မပြုဘဲ တကယ့် ယောကျာ်းပီသစွာ တောင့်ခံနေသည်။

ဆွန်ဖုန်းက ထိုလူသတ်သမားကို သွေးတိတ်အောင် မလုပ်ပေးပေ။ အကြောင်းမှာ သူ့ကို အသက်ရှင်လျက် ထားရန် အစီအစဉ် မရှိသောကြောင့် ဖြစ်သည်။ သူက ဖုန်းရွေ့ သုတေသနဌာန၏ လျှို့ဝှက်ချက်များကို သိသွားပြီ မဟုတ်ပါလား။

ထိုလူသတ်သမားသည် ဉာဏ်ရည်တု စက်ရုပ်များနှင့် တိုက်ခိုက်စဉ်က တစ်ခုခု ထူးခြားနေကြောင်း သတိထားမိခဲ့သည်မှာ သေချာသည်။

အမှန်ပင်... ဤလူကြမ်းကြီးသည် ထိုစက်ရုပ် သိပ္ပံပညာရှင်များနှင့် တိုက်ခိုက်စဉ်က ထူးဆန်းမှု တစ်ချို့ကို တွေ့ရှိခဲ့သည်။ သူ၏ သေနတ်က ဤလူများကို တစ်ချက်တည်းနှင့် မသတ်နိုင်ခဲ့ပေ။

သူ ငါးချက်၊ ခြောက်ချက်လောက် ဆက်တိုက် ပစ်မှသာ လူတစ်ယောက်ကို သတ်နိုင်ခဲ့သည်။ ပုံမှန်ဆိုလျှင် တင့်ကားကိုပင် တစ်ချက်တည်းနှင့် ဖောက်ထွင်းနိုင်သော သူ၏ လက်နက်က ဤလူများကို မဖောက်နိုင်ခဲ့ပေ။

အကြောက်ဆုံး အရာကတော့ သူ၏ အသက်ကယ် ကျည်ကာအင်္ကျီမှာ တစ်ဖက်လူ၏ ပစ်ခတ်မှု တစ်ချက်တည်းဖြင့် ပေါက်ပြဲသွားခြင်းပင်။

သူ့အင်္ကျီက အပြင်းစား စနိုက်ပါကျည်ကိုပင် ခံနိုင်ရည် ရှိသော်လည်း ဤနေရာသို့ ရောက်မှ အလွယ်တကူ ပေါက်ပြဲသွားခဲ့ပြီး သူ့ကို ဒဏ်ရာရကာ အဖမ်းခံလိုက်ရသည်။

ထိုအချိန်က အပြာရောင် အလင်းတန်း တစ်ခု ထွက်လာသည်ကိုသာ သူ မြင်လိုက်ရပြီး ချက်ချင်း ဒဏ်ရာရသွားကာ ပြန်လည် ခုခံနိုင်စွမ်း လုံးဝ မရှိတော့ပေ။

သူ တပ်ဆင်ထားသော နည်းပညာမြင့် မျက်မှန်ကပင် ထိုအလင်းတန်း၏ လမ်းကြောင်းနှင့် အမြန်နှုန်းကို မထောက်လှမ်းနိုင်ခဲ့ပေ။ ထိုအလင်းတန်း၏ ဖျက်ဆီးနိုင်စွမ်းကလည်း ပြောစရာ မလိုတော့ပေ။

သူ အလုပ်လုပ်လာခဲ့သည့် တစ်လျှောက်လုံး ဤကဲ့သို့ ပြိုင်ဘက်မျိုးနှင့် ပထမဆုံး အကြိမ် တွေ့ဖူးခြင်း ဖြစ်ပြီး လုံးဝ အရှုံးပေးလိုက်ရခြင်း ဖြစ်သည်။

ဤအခြေအနေများကို အထက်လူကြီးများ သိရှိစေရန် အလွန် အစီရင်ခံချင်သော်လည်း သူ ဤနေရာမှ ထွက်ပြေးနိုင်တော့မည် မဟုတ်ကြောင်း ကောင်းကောင်း သိနေလေသည်။