အခန်း ၃၄၄

အခန်း ၃၄၄ - မြေရှားသတ္တု တန်ချိန် တစ်သန်း

"မြန်မြန် အလောင်းတွေကို မြန်မြန် ဆယ်ယူလိုက် ပြီးတော့ ဌာနချုပ်ကို ချက်ချင်း သတင်းပို့ ဒါ ဘာဖြစ်တာလဲ လူသေတာက အရေးမကြီးသေးဘူး စင်မြင့်ကြီးက ဘယ်ရောက်သွားတာလဲ"

ကပ္ပတိန်က ထိုအလောင်းများကို ဆယ်ယူရန် လူများကို အလျင်အမြန် စီစဉ်ညွှန်ကြားလိုက်လေသည်။

ဆယ်မိနစ်ခန့် အကြာတွင် ဒီထိတ်လန့်တုန်လှုပ်ဖွယ် သတင်းသည် ရေနံ ဌာနချုပ်သို့ ရောက်ရှိသွားခဲ့သည်။

ဌာနချုပ်မှလည်း စုံစမ်းစစ်ဆေးရန်နှင့် ဖြေရှင်းရန် လူများကို ချက်ချင်း စေလွှတ်လိုက်သည်။ နာရီအနည်းငယ် အကြာတွင် ထိုသူများက အလွန် ထိတ်လန့် အံ့ဩဖွယ်ကောင်းသော သတင်းတစ်ခုကို ရရှိသွားကြသည်။

ရေပေါ် ရေနံတူးဖော်ရေး စင်မြင့်ကြီးမှာ ပင်လယ်ကြမ်းပြင်အောက်သို့ နစ်မြုပ်သွားခဲ့ပြီ ဖြစ်သည်။

ဒီပေါက်ကွဲအားပြင်းလှသော သတင်းကြီး ပျံ့နှံ့သွားချိန်တွင် လူမည်မျှကို တုန်လှုပ်သွားစေခဲ့မည် မသိပေ။ အထူးသဖြင့် ထိုရေနံကုမ္ပဏီမှာ ပို၍ ဆိုးရွားသည်။ ဒီရေနံစင်မြင့်ကြီးကို ပုံမှန် ပြုပြင်ထိန်းသိမ်းမှုများ ပြုလုပ်ထားပြီး နောက်ထပ် အနှစ်နှစ်ဆယ်ခန့် အသုံးပြုနိုင်သေးသည်။ ယခုကဲ့သို့ ကောင်းမွန်နေသော အခြေအနေမှ ပင်လယ်အောက်သို့ ရုတ်တရက် နစ်မြုပ်သွားရခြင်းမှာ လုံးဝ မဖြစ်နိုင်ပေ။

သေချာသည်ပေါ့ ဤသည်မှာ ကနဦး တွေ့ရှိချက်သာ ဖြစ်ပြီး ပင်လယ်အောက် ရောက်သွားသော စင်မြင့်ကြီးကို အသေးစိတ် စုံစမ်းစစ်ဆေးမှုများ ဆက်လက် လုပ်ဆောင်ရဦးမည် ဖြစ်သည်။

သို့သော် ဒီအဖြစ်အပျက်က အလွန် ကြီးမားသော အာရုံစိုက်မှုကို ခံလိုက်ရသည်။ ဒီမျှ ကြီးမားသော အဖြစ်အပျက်ကြီး အတွင်းတွင် ထူးဆန်းမှုများနှင့် လျှို့ဝှက်ချက်များစွာ ပါဝင်နေသောကြောင့်ပင်။ လက်ရှိအချိန်အထိ အဖြစ်မှန်ကို မည်သူကမျှ မသိရှိကြသေးပေ။

ဒုတိယ အချက်အနေဖြင့် ပြဿနာ ဖြစ်ပွားချိန်တွင် ရေနံစင်မြင့်ကြီးမှာ အကူအညီတောင်းခံသည့် အချက်ပြမှုပင် မပေးပို့နိုင်လိုက်ဘဲ ပင်လယ်အောက်သို့ ချက်ချင်း နစ်မြုပ်သွားခဲ့ခြင်း ဖြစ်သည်။ ဤအချက်များကို ကြည့်ခြင်းအားဖြင့် ဒီကိစ္စက သာမန် မဟုတ်ကြောင်း သက်သေပြနေလေသည်။

ဒီဘက်တွင် လူများက စုံစမ်းစစ်ဆေးမှုများ ပြုလုပ်နေချိန်တွင် ဆွန်ဖုန်းကတော့ ရေငုပ်ဝတ်စုံကို မောင်းနှင်ကာ ဂျပန် ကမ်းရိုးတန်း တစ်လျှောက် ဆက်လက် ကင်းလှည့်နေဆဲ ဖြစ်သည်။

သုံးလေးနာရီခန့် ပတ်ကြည့်ပြီးနောက် သတင်းတွေက လုံးဝ လိမ်ညာထားကြောင်း ဆွန်ဖုန်း တွေ့ရှိသွားလေသည်။ အဘယ်ကြောင့်ဆိုသော် ကျောက်မီးသွေးဖြင့် ပင်လယ်ကိုဖို့သည့် နေရာတစ်ခုကိုမျှ သူ မတွေ့ရသောကြောင့်ပင်။

ကျောက်မီးသွေးဖြင့် ပင်လယ်ဖို့ခြင်း မဆိုထားနှင့် သတင်းထဲတွင် ပြောထားသကဲ့သို့ ဂျပန်များက တွင်းထွက်သယံဇာတ အချို့ကို ကမ်းလွန်ပင်လယ်ပြင်တွင် သိုလှောင်ထားသည် ဆိုသည်ကိုလည်း လုံးဝ မတွေ့ရပေ။

ဆွန်ဖုန်းက ဂျပန် ကမ်းရိုးတန်း တစ်ဝက်ကျော်ခန့်ကို ရှာဖွေပြီးသွားပြီ ဖြစ်သော်လည်း လက်ရှိအချိန်အထိ ကမ်းစပ်အနီး ပင်လယ်ထဲတွင် တွင်းထွက်သယံဇာတများကို မတွေ့ရသေးပေ။

"သောက်ကျိုးနည်း သတင်းတွေရဲ့ လိမ်ညာတာကို ခံလိုက်ရပြန်ပြီ ဒီဂျပန်တွေက သတင်းတွေထဲကလို တွင်းထွက်သယံဇာတတွေကို ကမ်းလွန်ပင်လယ်ပြင်မှာ သိုလှောင်မထားပါဘူး"

ဆွန်ဖုန်းက စိတ်ပျက်လက်ပျက်ဖြင့် ညည်းညူလိုက်သည်။

"ပိုင်ရှင် စိတ်ဓာတ်မကျပါနဲ့ ဒီကမ်းရိုးတန်း တစ်လျှောက်လုံးကို အကုန်ရှာကြည့်လိုက်ရအောင် တကယ်လို့မှ ရှာမတွေ့ရင် သောက်ကျိုးနည်း ပင်လယ်ထဲက ရေနံစင်မြင့်တွေ အကုန်လုံးကို သွားဖောက်ခွဲပစ်ကြတာပေါ့ ဒါဆို ခင်ဗျား ဒေါသပြေလောက်ပြီမလား"

အသံလက်ထောက်က ဟီးဟီးရယ်လျက် ပြောလိုက်သည်။

"ကောင်းပြီ မင်းပြောတဲ့အတိုင်း ဆက်လုပ်ကြတာပေါ့ ဘာပဲဖြစ်ဖြစ် နောက်ထပ် သုံးလေးနာရီဆိုရင် ကျန်တာတွေ အကုန် ရှာလို့ ပြီးသွားပြီပဲဟာ"

ဆွန်ဖုန်းက ကြားပြီးနောက် ခေါင်းညိတ်ကာ ပြောလိုက်သည်။

ထိုသို့ဖြင့် နောက်ထပ် တစ်နာရီခန့် ဆက်လက် ရေငုပ်လာခဲ့ပြီးနောက် နောက်ဆုံးတွင် ဆွန်ဖုန်းကို အလွန် အံ့အားသင့် ဝမ်းသာသွားစေမည့် အရာတစ်ခုကို ရေငုပ်ဝတ်စုံက ထောက်လှမ်း တွေ့ရှိသွားခဲ့လေသည်။

"အစီရင်ခံပါတယ် ပိုင်ရှင် ရှေ့ဘက် ကီလိုမီတာ တစ်ရာ အကွာမှာ မြေရှားသတ္တုတွေ တွေ့ရှိထားပါတယ်"

"ဘာ မြေရှားသတ္တု ဟုတ်လား ရှုး"

ဆွန်ဖုန်း ကြားလိုက်ရချိန်တွင် အံ့ဩလွန်း၍ လေကို အပြင်းအထန် ရှူသွင်းလိုက်မိသည်။ မြေရှားသတ္တုတဲ့လား။ ဤဂျပန်များက ကမ်းလွန်ပင်လယ်ပြင်တွင် မြေရှားသတ္တုများကို တကယ် ဖုံးကွယ်ထားလိမ့်မည်ဟု သူ လုံးဝ မထင်မှတ်ထားခဲ့ပေ။

မြေရှားသတ္တု ဆိုသည်မှာ ကမ္ဘာလုံးဆိုင်ရာ မဟာဗျူဟာမြောက် သယံဇာတ တစ်ခု ဖြစ်သည်။ ယူရေနီယမ် ထက်ပင် ပို၍ အရေးပါသော သယံဇာတ ဖြစ်လေသည်။

"ဟုတ်ပါတယ် ပိုင်ရှင် လောလောဆယ် အသေးစိတ် ထောက်လှမ်းပြီး အချက်အလက်တွေ စုဆောင်းနေပါတယ် ခဏစောင့်ပါ"

အသံလက်ထောက်က အစီရင်ခံလိုက်သည်။

သိပ်မကြာခင်မှာပင် ထောက်လှမ်းမှု ရလဒ်များ ထွက်ပေါ်လာသည်။

"ထောက်လှမ်းလို့ ပြီးပါပြီ ရှေ့ဘက် ကီလိုမီတာ တစ်ရာ အကွာ ကမ်းလွန် ပင်လယ်ကြမ်းပြင်မှာ မြေရှားသတ္တု တန်ချိန် တစ်သန်းလောက် သိုလှောင်ထားပါတယ်"

"တန်ချိန် တစ်သန်း"

ဆွန်ဖုန်း၏ မျက်လုံးများမှာ မီးဟုန်းဟုန်း တောက်သွားလေသည်။ ဒီတန်ချိန် တစ်သန်း ဆိုသည်မှာ သံရိုင်း သို့မဟုတ် ရေနံတို့နှင့် ယှဉ်လျှင် သိပ်မများလှသော်လည်း ယခုအရာက မြေရှားသတ္တု ဖြစ်ကြောင်း မေ့ထား၍ မရပေ။

လက်ရှိ ကမ္ဘာပေါ်တွင် မြေရှားသတ္တု အများဆုံး ပိုင်ဆိုင်သော တရုတ်နိုင်ငံတွင်ပင် စုစုပေါင်း သိုလှောင်မှုမှာ တန်ချိန် သန်းနှစ်ရာခန့်သာ ရှိသည်။ ထို့ကြောင့် တန်ချိန် တစ်သန်း ဆိုသည်မှာ အလွန် ကြီးမားလှသော ပမာဏ တစ်ခု ဖြစ်နေလေပြီ။

"သောက်ကျိုးနည်း ဒီဂျပန်နိုင်ငံလေးက ဒီလောက်များတဲ့ မြေရှားသတ္တုတွေကို ဖွက်ထားတာပဲ ကြည့်ရတာ သူတို့လည်း ကြိုတင် ပြင်ဆင်ထားကြတာကိုး"

ဆွန်ဖုန်းက ကောက်ကျစ်စွာ ပြုံးလိုက်သည်။

'ဟွန့် ဒါပေမဲ့ ဒီတစ်ကြိမ် ငါနဲ့ တွေ့မှတော့ မင်းတို့ အနှစ်ဆယ်ချီ ဝှက်ထားတဲ့ မြေရှားသတ္တုတွေကို ငါက တစ်ကျိုက်တည်းနဲ့ မျိုချပစ်မှာ အသေအချာပဲ' ဟု တွေးလိုက်မိသည်။

ဆွန်ဖုန်းက ယူသွားပြီးနောက် ပြန်မရောင်းရလျှင်ပင် ဂျပန်များကိုတော့ လုံးဝ ပေးမသုံးချင်ပေ။ ထို့အပြင် ပင်လယ်ကြမ်းပြင် အောက်တွင်လည်း မြေရှားသတ္တုများ ရှိနိုင်သေးသည်။ တစ်ချိန်ချိန်တွင် သူ၏ စက်မှုလုပ်ငန်းများ အတိုင်းအတာ တစ်ခုအထိ အားကောင်းလာချိန်ကျလျှင် အကြီးအကျယ် စတင် တူးဖော်တော့မည် ဖြစ်သည်။ ကမ္ဘာ့ သယံဇာတ လောကကြီးကို ကြီးစိုးပစ်မည် ဖြစ်သည်။

"သွားမယ် သတ်မှတ်ထားတဲ့ နေရာကို ထွက်ကြစို့"

ဆွန်ဖုန်း ဒီသတင်းကောင်းကို ရရှိသွားပြီးနောက် သူ၏ စိတ်အခြေအနေမှာ ချက်ချင်းပင် အလွန် ကောင်းမွန်သွားလေသည်။ စကားများများ မပြောတော့ဘဲ အခြေအနေ အမှန်ကို သွားရောက် ကြည့်ရှုရန် ဆုံးဖြတ်လိုက်သည်။

သိပ်မကြာခင်မှာပင် ဆွန်ဖုန်းက ရေငုပ်ဝတ်စုံကို မောင်းနှင်ကာ မြေရှားသတ္တုများ လျှို့ဝှက် သိုလှောင်ထားရာ နေရာသို့ ရောက်ရှိလာခဲ့သည်။

ဒီနေရာမှာ ကုန်းပေါ်မှ ကြည့်လျှင်ဖြစ်စေ ပင်လယ်ထဲမှ ကြည့်လျှင်ဖြစ်စေ အလွန် လျှို့ဝှက်သော နေရာတစ်ခု ဖြစ်သည်။ ဂျပန်များက ဒီနေရာတွင် ကမ်းလွန် လျှို့ဝှက် သိုလှောင်ရေး စခန်းတစ်ခု တည်ဆောက်ထားလိမ့်မည်ဟု ဆွန်ဖုန်း လုံးဝ မထင်မှတ်ထားခဲ့ပေ။

တကယ်တမ်းတော့ ဒီလျှို့ဝှက် စခန်းက ပင်လယ်အောက်တွင် ရှိသည်ဟု ပြော၍ မရပေ။ ကမ်းစပ်တွင် တည်ဆောက်ထားသည်ဟု ပြောလျှင် ပိုမှန်ပေမည်။ ၎င်းမှာ ကမ်းစပ်ရှိ မြေအောက် ဂိုဒေါင်တစ်ခု ဖြစ်သည်။ ဒီနေရာနှင့် မနီးမဝေးတွင် နာမည်ကြီး ဆိပ်ကမ်း တစ်ခု ရှိသည်။

ကြည့်ရသည်မှာ ဒီဂျပန်များက မြေရှားသတ္တုများကို ဝယ်ယူပြီးနောက် ဒီနေရာသို့ သယ်ဆောင်လာကာ လျှို့ဝှက် သိုလှောင်ထားခြင်း ဖြစ်မည်ဟု ခန့်မှန်းရသည်။ မဟာဗျူဟာမြောက် လျှို့ဝှက်စခန်း ဖြစ်မည်မှာ သေချာလှသည်။ ဂျပန်နိုင်ငံမှာ မူလကတည်းက မြေနေရာ ရှားပါးသဖြင့် ဒီအရာများကို ကုန်းတွင်းပိုင်း အထိ သယ်ဆောင်သွားပြီး သိုလှောင်ထားမည် မဟုတ်ပေ။

"တီ တီ တီ အစီရင်ခံပါတယ် ပိုင်ရှင် ဒီမြေရှားသတ္တုတွေ အားလုံးက ဘက်စ်နက်ဆိုက် သတ္တုတွေပါ ၎င်းတို့က ဖလိုရိုကာဗွန်နိတ် သတ္တုအမျိုးအစားတွေ ဖြစ်ပြီး မြေရှားဒြပ်စင် ပါဝင်တဲ့ သတ္တုတချို့နဲ့ တွဲဖက် ပါဝင်လေ့ရှိပါတယ် ဒီသတ္တုတွေရဲ့ အရောင်က အဝါရောင်ကနေ အညိုဖျော့ရောင် အထိ ရှိတတ်ပြီး ဖန်သားလို အရောင်လက်တဲ့ ပုံစံရှိပါတယ် အပြားလိုက် ဒါမှမဟုတ် အတုံးအခဲလိုက် ရှိတတ်ပါတယ်"

အသံလက်ထောက်က မိတ်ဆက် ရှင်းပြလိုက်သည်။

"ဒီလို သတ္တုမျိုးကိုး အင်း မဆိုးပါဘူး အများကြီး ဂရုစိုက်မနေတော့ဘူး ဒီက ဟာတွေ အကုန်လုံး အပြောင်ခိုးလိုက်ကြတာပေါ့"

ဆွန်ဖုန်းက မည်သည့် သတ္တုအမျိုးအစား ဖြစ်သည်ကို ဂရုမစိုက်ပေ။ အရင်ဆုံး မိမိ၏ အိတ်ကပ်ထဲသို့ ထည့်ပြီးမှ ဖြည်းဖြည်းချင်း လေ့လာတော့မည်ဟု ဆုံးဖြတ်လိုက်သည်။

"အသံလက်ထောက် စနစ် ငါတို့ ဘယ်လို စလုပ်ကြမလဲ"

ဆွန်ဖုန်းက မေးလိုက်သည်။ ယခုကဲ့သို့ နေ့ခင်းကြောင်တောင် အချိန်ကြီးတွင် အရမ်းကြီး ကြမ်းကြမ်းတမ်းတမ်း မလုပ်လျှင် ပိုကောင်းမည် မဟုတ်ပါလား။

"ဒီဂိုဒေါင်က တော်တော်လေး ကြီးတယ် တစ်ဝက်မြုပ်နေတဲ့ ပုံစံမျိုးပဲ အောက်ပိုင်း တစ်ဝက်က မြေအောက်မှာ ရှိပြီး အပေါ်ပိုင်း တစ်ဝက်က မြေပြင်ပေါ်မှာ ပေါ်နေတာ ဒီဂိုဒေါင်ရဲ့ အပြင်ဘက်က ပင်လယ်ပြင်နဲ့ ကပ်နေတယ် ဒီလိုဆိုတော့ ကျွန်တော်တို့က တိုက်ရိုက် တွင်းတူးပြီး ဒီဂိုဒေါင်ထဲကို ဝင်ရောက် ဖောက်ထွင်းလိုက်မယ် ပြီးရင် သိုလှောင်ခန်းကို ဖွင့်ပြီး ဒီမြေရှားသတ္တုတွေကို အကုန် သိမ်းယူလိုက်မယ် ပြီးတာနဲ့ လစ်လို့ရပြီလေ"

အသံလက်ထောက်က အကြံပေးလိုက်သည်။

"ကောင်းပြီ အဲဒီလိုပဲ လုပ်ကြတာပေါ့"

ဆွန်ဖုန်းက ပေါင်ကို တစ်ချက် ရိုက်လိုက်သည်။

သိပ်မကြာခင်မှာပင် ရေငုပ်ဝတ်စုံက သေမင်းတမန် အလင်းတန်းကို အသုံးပြု၍ ဆွန်ဖုန်းအတွက် လမ်းဖောက်ပေးလေသည်။ တွင်းတူးသည့် အရှိန်က အလွန် မြန်ဆန်လှသည်။

မကြာမီမှာပင် ဆွန်ဖုန်းက ဒီတစ်ဝက်မြုပ်နေသော ဂိုဒေါင်၏ အတွင်းပိုင်းသို့ တွင်းဖောက် ဝင်ရောက်သွားနိုင်ခဲ့သည်။ ဒီသံမဏိနှင့် ကွန်ကရစ်များမှာ အခြားသူများ အမြင်တွင် အလွန် ခိုင်မာသော်လည်း ဆွန်ဖုန်း အတွက်ကတော့ တို့ဟူးကို လှီးဖြတ်ရသကဲ့သို့ အလွန် လွယ်ကူစွာဖြင့် ပြီးစီးသွားလေသည်။

"ပိုင်ရှင် ဒီဂိုဒေါင်မှာ စောင့်နေတဲ့သူ လေးငါးယောက် ရှိတယ် သွားစို့ သူတို့ကို အရင် သွားရှင်းပြီးမှ သတ္တုတွေ သိမ်းလည်း နောက်မကျပါဘူး"

အသံလက်ထောက်က ထောက်လှမ်းရေး စနစ်မှတစ်ဆင့် ဒီဂိုဒေါင်တွင် စောင့်ကြပ်နေသူများ ရှိကြောင်း မြင်တွေ့လိုက်ရသည်။ သို့သော် လူဦးရေက အလွန် နည်းပါးလှသည်။ သူတို့ကလည်း သူခိုး ဝင်ခိုးလိမ့်မည်၊ ထို့အပြင် အတွင်းပိုင်းအထိ ဖောက်ထွင်း ဝင်ရောက်လာနိုင်လိမ့်မည်ဟု လုံးဝ ထင်မှတ်ထားမည် မဟုတ်ပေ။

ခိုးမည် ဆိုလျှင်တောင် ဒီမျှ များပြားလှသော ပမာဏကို ဘယ်လောက်တောင် ခိုးနိုင်မည်နည်း။ ကိုယ်ပိုင် သယ်ယူပို့ဆောင်ရေး လုပ်မည် ဆိုလျှင်တောင် တစ်ပတ်အတွင်း အားလုံး သယ်ယူသွားနိုင်မည် မဟုတ်ပေ။ ခိုးယူရန် ဆိုသည်မှာ ပို၍ပင် မဖြစ်နိုင်ချေ။ သို့သော် ဆွန်ဖုန်းက သာမန်လူမျိုး မဟုတ်သည်ကတော့ ရှင်းလင်းလှသည်။

လက်ရှိ ဆွန်ဖုန်း၏ စွမ်းရည်ဖြင့် သာမန်လူ အနည်းငယ်ကို ဖြေရှင်းရန်မှာ အလွန် လွယ်ကူလှသည်။ သိပ်မကြာခင်မှာပင် သူတို့ကို ရှင်းလင်းပစ်လိုက်သည်။

ထို့နောက် ဒီမြေရှားသတ္တု တန်ချိန် တစ်သန်းမှာ ဆွန်ဖုန်း၏ သိုလှောင်ခန်း အတွင်းသို့ အားလုံး ရောက်ရှိသွားတော့သည်။

"ဟားဟား ဒီတစ်ခေါက်တော့ မရှုံးဘူး နောက်ထပ် အမြတ်ကြီး ထွက်ပြန်ပြီ"

ဆွန်ဖုန်းက ဒီမြေရှားသတ္တုများကို သိမ်းယူပြီးနောက် ရေငုပ်ဝတ်စုံကို ပြန်လည် ဝတ်ဆင်ကာ ထိုနေရာမှ ချက်ချင်း လစ်ထွက်သွားတော့သည်။

ဆွန်ဖုန်း လုပ်ငန်း အောင်မြင်သွားပြီး မကြာမီမှာပင် ဒီနေရာမှ မြေရှားသတ္တုများ လျှို့ဝှက်ဆန်းကြယ်စွာ ပျောက်ဆုံးသွားမှု၊ ကမ်းလွန် ရေနံစင်မြင့်ကြီး ရုတ်တရက် ပင်လယ်အောက်သို့ နစ်မြုပ်သွားမှုနှင့် ဝန်ထမ်း တစ်ရာကျော် သေဆုံးမှု စသည့် အဖြစ်အပျက်များ အားလုံးမှာ နောက်တစ်နေ့တွင် ပေါ်ထွက်လာတော့သည်။

ဒီထူးဆန်းသော အဖြစ်အပျက် နှစ်ခုက ဂျပန်နိုင်ငံကို နောက်တစ်ကြိမ် ရုတ်ရုတ်သဲသဲ ဖြစ်သွားစေပြန်သည်။ အထူးသဖြင့် ထိုကမ်းလွန် ရေနံတူးဖော်ရေး စင်မြင့်ကြီးမှာ အောက်ခြေ သံတိုင်များ ဖြတ်တောက်ခံရပြီး ပင်လယ်ထဲသို့ နစ်မြုပ်သွားခဲ့ရခြင်း ဖြစ်သည်။

ကျွမ်းကျင်သူ အများအပြားက ဒီလုပ်ရပ်မှာ ယမန်နှစ်က တောင်တရုတ်ပင်လယ်တွင် ဖြစ်ပွားခဲ့သော အဖြစ်အပျက်များနှင့် အနည်းငယ် ဆင်တူသည်ဟု ယူဆကြသည်။ အဘယ်ကြောင့်ဆိုသော် ဒီနည်းလမ်းများက အလွန် ပြတ်သားလွန်းသောကြောင့်ပင်။

လက်ရှိ အခြေအနေအရ မည်သူကမျှ ဒီသို့ လုပ်ဆောင်နိုင်မည် မဟုတ်ပေ။ ဧရာမ သံတိုင်ကြီးများကို ချက်ချင်း ဖြတ်တောက်ပြီး စင်မြင့်ပေါ်ရှိ လူများ မိမိကိုယ်ကိုယ် ကယ်တင်ရန်နှင့် အကူအညီ တောင်းခံရန် အခွင့်အရေးပင် မရလိုက်ဘဲ ပင်လယ်အောက်သို့ နစ်မြုပ်သွားစေခဲ့ခြင်း ဖြစ်သည်။

ထို့အပြင် မြေရှားသတ္တုများ သိုလှောင်ထားသော ဂိုဒေါင်မှာလည်း လျှို့ဝှက်ဆန်းကြယ်စွာ တိုက်ခိုက်ခံလိုက်ရသည်။

မြေရှားသတ္တု တန်ချိန် တစ်သန်းမှာ ညတွင်းချင်း ပျောက်ဆုံးသွားခဲ့ရာ အဖွဲ့အစည်း အသီးသီးကို အလွန် အံ့အားသင့် တုန်လှုပ်သွားစေခဲ့သည်။ မြေရှားသတ္တု တန်ချိန် တစ်သန်းကို တစ်ရက်တည်းဖြင့် မည်သူကမျှ မသိရှိအောင် မည်သူကများ သယ်ဆောင်သွားနိုင်သနည်း။ ကြားရသည်မှာ မျက်လှည့်ပြလိုက်သကဲ့သို့ပင် အလွန် အံ့ဩစရာ ကောင်းလွန်းလှသည်။

ဂျပန် သတင်းဌာနများ၏ ညနေခင်း သတင်းများတွင်...

"ယမန်နေ့က ဂျပန် ကမ်းလွန်ပင်လယ်ပြင်ရှိ ဧရာမ ရေပေါ် ရေနံတူးဖော်ရေး စင်မြင့်ကြီး တစ်ခု အမည်မသိ အင်အားစုများ၏ တိုက်ခိုက်မှုကို ခံခဲ့ရပြီး ပင်လယ်ထဲသို့ နစ်မြုပ်သွားခဲ့ကြောင်း သတင်းရရှိပါတယ် ဝန်ထမ်း ၁၀၃ ဦးစလုံး သေဆုံးသွားခဲ့ပါတယ် လက်ရှိအချိန်အထိ စုံစမ်းစစ်ဆေးရေး အဖွဲ့တွေက ဒါဟာ ဘယ်အင်အားစုရဲ့ လက်ချက်လဲ ဆိုတာကို ရှာမတွေ့သေးပါဘူး တစ်ဖက်လူက ဒီလို အံ့ဩစရာကောင်းတဲ့ ကိစ္စရပ်ကို ဘယ်လို လုပ်ဆောင်ခဲ့သလဲ ဆိုတာကိုလည်း မသိရသေးပါဘူး ကျွမ်းကျင်သူတွေရဲ့ အဆိုအရ တောင်တရုတ်ပင်လယ်မှာ အမေရိကန်တွေရဲ့ ဖျက်သင်္ဘောကို ဖျက်ဆီးခဲ့တဲ့ အင်အားစုကသာ ဒါကို လုပ်နိုင်စွမ်း ရှိလိမ့်မယ်လို့ ဆိုပါတယ်..."

"ဆက်လက်ပြီး နောက်ထပ် သတင်းတစ်ပုဒ်ကို နားဆင်ကြပါရှင် ဒီနေ့မနက်ပိုင်းမှာ ဂျပန်နိုင်ငံ ဂျင်းမင်း မြို့နယ်က ဂျင်းမင်း ဂိုဒေါင်ဟာ အမည်မသိ အင်အားစုတွေရဲ့ ခိုးယူမှုကို ခံလိုက်ရပြီး တစ်ရက်တည်းနဲ့ မြေရှားသတ္တု တန်ချိန် တစ်သန်း ပျောက်ဆုံးသွားခဲ့ပါတယ် ဒါဟာလည်း အလားတူ အံ့ဩစရာ ကောင်းတဲ့ အဖြစ်အပျက် တစ်ခုပါပဲ ကျွမ်းကျင်သူ တချို့က မနေ့ကနဲ့ ဒီနေ့မနက် ဖြစ်ပွားခဲ့တဲ့ ကိစ္စရပ် နှစ်ခုဟာ သေချာပေါက် ဆက်စပ်နေလိမ့်မယ်လို့ ဆိုပါတယ် အကြောင်းကတော့ ဒီကိစ္စ နှစ်ခုစလုံးက ထူးဆန်းလွန်းပြီး သာမန်လူတွေ လုပ်နိုင်တဲ့ အရာမျိုး မဟုတ်လို့ပါ ဒီကိစ္စ နှစ်ခုစလုံးက တူညီတဲ့ အင်အားစု တစ်ခုတည်းက လုပ်ဆောင်ခဲ့တာ ဖြစ်နိုင်ခြေ အလွန်များပါတယ်ရှင်"

အင်တာနက် ပေါ်တွင်လည်း လူအချို့က ယမန်နှစ် တောင်တရုတ်ပင်လယ်တွင် သံရိုင်းတွင်းများ အခိုးခံရခြင်း၊ ရေနံများ အခိုးခံရခြင်း၊ ရွှေတွင်းများ အခိုးခံရခြင်းနှင့် ယခု ဂျင်းမင်း ဂိုဒေါင် အခိုးခံရခြင်းတို့မှာ အလွန် ဆင်တူနေကြောင်း ရဲတင်းစွာ ခန့်မှန်းနေကြသည်။

အဘယ်ကြောင့်ဆိုသော် အားလုံးမှာ အလွန် အံ့ဩစရာ ကောင်းပြီး မထင်မှတ်ထားလောက်အောင် ဖြစ်နေသောကြောင့်ပင်။ ဒီအရာများ အားလုံးသည် တူညီသော အင်အားစု တစ်ခုတည်းက လုပ်ဆောင်ခဲ့ခြင်း ဖြစ်နိုင်သည်။

နောက်ထပ် အချက်တစ်ခုမှာ ယမန်နှစ်က အမေရိကန် ဖျက်သင်္ဘောကို ဖျက်ဆီးခဲ့ခြင်းနှင့် ယခု ရေနံစင်မြင့်ကြီး လျှို့ဝှက်ဆန်းကြယ်စွာ နစ်မြုပ်သွားခြင်းမှာလည်း တူညီသော အင်အားစု တစ်ခုတည်း၏ လက်ချက် ဖြစ်နိုင်ကြောင်း ခန့်မှန်းနေကြသည်။

ဒီအင်တာနက် အသုံးပြုသူများ၏ တွေးခေါ်နိုင်စွမ်းက တကယ်ကို အံ့မခန်း ဖြစ်ကြောင်း ဝန်ခံရမည် ဖြစ်သည်။ တကယ်တမ်းတွင် သူတို့ ခန့်မှန်းချက်များက မှန်ကန်နေခဲ့သည်။

ဒီအရာများ အားလုံးကို ဆွန်ဖုန်း တစ်ယောက်တည်းက လုပ်ဆောင်ခဲ့ခြင်း ဖြစ်သည်။ သို့သော် သူတို့ မှန်းမိလျှင်ရော ဘာဖြစ်မည်နည်း။ မည်သူကမျှ ဆွန်ဖုန်းကို ဖမ်းဆီးနိုင်မည် မဟုတ်သလို ဒီအင်အားစုက မည်သူမည်ဝါ ဖြစ်သည်ကိုလည်း မည်သူကမျှ သိရှိနိုင်မည် မဟုတ်ပေ။