အခန်း ၃၇၇

အခန်း ၃၇၇ - တူးဖော်မှု အောင်မြင်ခြင်း

အချိန်များ လျင်မြန်စွာ ကုန်ဆုံးသွားပြီး မကြာမီမှာပင် နောက်လ ၁၀ ရက်နေ့သို့ ရောက်ရှိလာခဲ့လေသည်။ လွန်ခဲ့သော နှစ်ရက်ကတည်းက၊ ဆိုလိုသည်မှာ ၈ ရက်နေ့ကတည်းက X အမျိုးအစား ကမ်းလွန် ရေနံတူးဖော်ရေး စင်မြင့် နံပါတ် ၁၊ ၂ နှင့် ၃ တို့ကို တပ်ဆင် စမ်းသပ်မှုများ ပြီးစီးခဲ့ပြီ ဖြစ်သည်။

ယနေ့သည် ဂျားလော့ ရေနံမြေ၏ တရားဝင် စမ်းသပ် တူးဖော်မည့်နေ့ ဖြစ်လေသည်။ တူးဖော်ရေး စင်မြင့် သုံးခုပေါ်တွင် ဝန်ထမ်းများနှင့် ကွပ်ကဲရေးမှူး အားလုံး အသင့်အနေအထား ရှိနေကြပြီ ဖြစ်သည်။ ဆွန်ဖုန်း ကိုယ်တိုင်လည်း နံပါတ် ၁ စင်မြင့်ပေါ်သို့ ရောက်ရှိလာပြီး စမ်းသပ် တူးဖော်မှု ရလဒ်များကို ကိုယ်တိုင် ကိုယ်ကျ ကြည့်ရှုရန် ပြင်ဆင်နေလေသည်။

X အမျိုးအစား ရေနံတူးဖော်ရေး စင်မြင့်မှာ တစ်နေရာတည်းတွင် ပြီးပြည့်စုံစွာ လုပ်ဆောင်နိုင်သော တူးဖော်ရေး စင်မြင့် တစ်ခုဟု ဆိုနိုင်ပေသည်။

ပထမဦးစွာ တူးဖော်ရေး စက်ခေါင်း အတွင်းတွင် ကျောက်ခွဲ အလင်းလှိုင်း စက် ကို တပ်ဆင်ထားပြီး ၎င်းက မြေလွှာကျောက် အလွှာများကို ကောင်းစွာ ခွဲဖြာနိုင်စွမ်း ရှိလေသည်။ ရေနံတွင်း တစ်တွင်း တူးဖော်ပြီးသည်နှင့် တစ်ပြိုင်နက် ရေနံစုပ်ပိုက်များကို အသုံးပြု၍ ချက်ချင်း ရေနံ စုပ်ယူနိုင်မည် ဖြစ်လေသည်။

မနက် ကိုးနာရီ အချိန်တွင် လုပ်ငန်းစဉ် အားလုံး အဆင်သင့် ဖြစ်သွားသောအခါ ဆွန်ဖုန်းက ဘေးတွင် ရှိနေသော ချားလ်စ်ကို မေးလိုက်လေသည်။

"စလို့ ရပြီလား"

"ဘော့စ် ရပါပြီ"

အဘိုးကြီး ချားလ်စ်က ခေါင်းညိတ်ကာ ပြန်ဖြေလိုက်လေသည်။

"ကောင်းပြီ ဝန်ထမ်း အားလုံးကို အဆင်သင့် ပြင်ခိုင်းလိုက် စက်တွေကို နှိုးပြီး ချက်ချင်း စတင် တူးဖော်မယ် ရေနံတွေ တူးဖော်မယ်"

ဆွန်ဖုန်းက အမိန့်ပေးလိုက်လေသည်။

"ဟုတ်ကဲ့ပါ"

ချားလ်စ် တစ်ယောက် ယနေ့ အလွန် စိတ်လှုပ်ရှားပြီး ပျော်ရွှင်နေမိသည်။ သူက ဆွန်ဖုန်းနှင့် အတူ အလုပ်လုပ်လာသည်မှာ တစ်နှစ်ကျော်ပြီ ဖြစ်ပြီး ယခုအခါ ရေနံစည်ပေါင်း သန်း ၄၅၀ ခန့် ရှိသော ဤရေနံမြေကြီး တူးဖော်ရေးတွင် ပါဝင်ခွင့် ရရှိနေပြီ ဖြစ်ရာ မည်သို့ မပျော်ရွှင်ဘဲ နေမည်နည်း။ သူက ဒီ နံပါတ် ၁ စင်မြင့်ပေါ်ရှိ တာဝန်ခံ တစ်ဦးပင် ဖြစ်လေသည်။

"နောက်ဆုံးတော့ စတင်နိုင်ပြီ တကယ်ကို ရင်ခုန်စရာ ကောင်းတာပဲ"

စူးမေးက ဝန်ထမ်းများ မိမိတို့၏ တာဝန် အသီးသီးကို စတင် ထမ်းဆောင်နေကြပြီး X အမျိုးအစား တူးဖော်ရေး စက်ပစ္စည်း တစ်စုံလုံး စတင် လည်ပတ်နေပြီ ဖြစ်သည်ကို မြင်သောအခါ အနည်းငယ် ရင်ခုန်ပြီး စိတ်လှုပ်ရှားလာလေသည်။

"ဟုတ်တယ် တကယ်လို့ အောင်မြင်သွားပြီ ဆိုရင် နောက်နှစ်ရက် နေရင် အဲဒီလူတွေကို ငါတို့ရဲ့ တူးဖော်ရေး စင်မြင့်ကို လာကြည့်ဖို့ ဖိတ်လို့ ရပြီ"

"ဝုန်း ဝုန်း ဝုန်း"

တူးဖော်ရေး စက်ကြီး၏ အင်ဂျင်များ စတင် လည်ပတ်လာပြီး ပြင်းထန်ပြီး အားကောင်းသော အသံကြီးများ ထွက်ပေါ်လာလေသည်။ ဌာန အသီးသီးကလည်း ညွှန်ကြားချက်များ အတိုင်း လုပ်ဆောင်နေကြပြီး အချက်အလက်များကို ထောက်လှမ်းခြင်း၊ အချိန်နှင့် တစ်ပြေးညီ အစီရင်ခံခြင်းများကို လုပ်ဆောင်နေကြလေသည်။

တူးဖော်ရေး စက်ခေါင်းကြီးမှာ ယခုအခါ ရူးသွပ်စွာ လည်ပတ်နေပြီ ဖြစ်ပြီး စိန်သွားကြီးများက မြေကြီးထဲသို့ စတင် ထိုးဖောက် ဝင်ရောက်သွားလေပြီ။ ကမ္ဘာမြေ အောက်သို့ ဦးတည်၍ တူးဖော်နေခြင်း ဖြစ်သည်။

ပင်လယ်ကြမ်းပြင်မှ ရေနံလွှာ အထိ အကြမ်းဖျင်းအားဖြင့် မီတာ ၃၀၀ ခန့် ထူထဲသော ကျောက်လွှာများ ဖုံးလွှမ်းနေကြောင်း အသံလက်ထောက်က ဆွန်ဖုန်းကို ပြောပြခဲ့ဖူးသည်။ ထို မီတာ ၃၀၀ အထူ ရှိသော ကျောက်လွှာများကို ဖောက်ထွင်းနိုင်ပါက ရေနံလွှာ ဒေသသို့ ရောက်ရှိမည် ဖြစ်ပြီး ရေနံများကို စတင် စုပ်ယူနိုင်မည် ဖြစ်လေသည်။

"တီ တီ တီ... တူးဖော်ရေး စက်ခေါင်း မြေအောက် ၃၀ မီတာ အထိ ရောက်ရှိသွားပါပြီ ရွှံ့နွံလွှာကို ဖောက်ထွင်းပြီး မာကျောတဲ့ မြေလွှာထဲ ဝင်ရောက်သွားပါပြီ... စက်ခေါင်း ၅၀ မီတာ အထိ ရောက်ရှိသွားပါပြီ စက်ခေါင်းက မြေလွှာကျောက် အလွှာရဲ့ မျက်နှာပြင်နဲ့ ထိတွေ့နေပါပြီ"

"အင်အား အပြည့် တင်ထား စက်ခေါင်းရဲ့ အပူချိန်ကို သတိထားပြီး အကောင်းဆုံး အဝင်လမ်းကြောင်းနဲ့ အဖောက်လမ်းကြောင်းကို ရှာဖွေပါ"

အဘိုးကြီး ချားလ်စ်က ကွပ်ကဲရေး အခန်းထဲတွင် ထိုင်လျက် ပြန်လည် ရောက်ရှိလာသော အချက်အလက်များကို ကြည့်ရှုကာ ညွှန်ကြားချက်များ ပေးနေလေသည်။

မီတာ ၃၀၀ အထူ ဆိုသည်မှာ ရက်အနည်းငယ် အတွင်း ဖောက်ထွင်းနိုင်သော အရာ မဟုတ်ပေ။ အထူးသဖြင့် ဤကဲ့သို့သော မြေလွှာကျောက် အလွှာများ ဆိုပါက မီတာ ၃၀၀ မဆိုထားနှင့်၊ မီတာ ၁၀၀ ပင်လျှင် သုံးလ အချိန်ပေးရသည့်တိုင် ဖောက်ထွင်းနိုင်မည် မဟုတ်ချေ။ သို့သော် ဤအရာများ အားလုံးမှာ ဆွန်ဖုန်း၏ တူးဖော်ရေး စင်မြင့် အတွက်တော့ ပြဿနာ မဟုတ်ပေ။

ယခုအချိန်တွင် တူးဖော်ရေး စက်ခေါင်းရှိ ကျောက်ခွဲ အလင်းလှိုင်း စက် က စတင် အလုပ်လုပ်နေပြီ ဖြစ်ပြီး ဤ X အမျိုးအစား တူးဖော်ရေး စက်ကြီးကလည်း ၎င်း၏ ဧရာမ လည်ပတ်အားကို အသုံးပြုနေပြီ ဖြစ်သည်။

ဤမြေလွှာကျောက် အလွှာများမှာ ဤလက်နက်ကြီး နှစ်ခု၏ တိုက်ခိုက်မှု အောက်တွင် လုံးဝ အလဲလဲ အကွဲကွဲ ဖြစ်နေတော့သည်။

ချားလ်စ် ယခု မြင်တွေ့နေရသည်မှာ တူးဖော်ရေး စက်ခေါင်းက ကမ္ဘာမြေ အောက်သို့ ဖြည်းဖြည်းချင်း ထိုးဖောက် ဝင်ရောက်သွားနေခြင်းကို ဖြစ်သည်။

စက်ခေါင်း၏ အပူချိန်မှာ အဆက်မပြတ် မြင့်တက်နေသော်လည်း သတင်းကောင်းမှာ သူတို့၏ စက်ခေါင်းက ဖြည်းဖြည်းချင်း အောက်သို့ ဆင်းသွားနေပြီး ဘာအတားအဆီးမှ မတွေ့ရခြင်းပင် ဖြစ်လေသည်။

"အောင်မြင်ပြီ အောင်မြင်သွားပြီ ဒီ X အမျိုးအစား တူးဖော်ရေး စက်ကြီးက တကယ်ကို မိုက်တာပဲ ဒီမြေလွှာကျောက် အလွှာတွေက ငါတို့ကို လုံးဝ မတားဆီးနိုင်ဘူး အို ဘုရားသခင် ဘော့စ်ရဲ့ သုတေသန ဌာနက ထုတ်လုပ်လိုက်တဲ့ ပစ္စည်းတွေက တကယ်ကို အံ့မခန်းပဲ"

ချားလ်စ်က အရာအားလုံး ချောမွေ့နေသည်ကို မြင်သောအခါ အံ့သြဝမ်းသာစွာ အော်ဟစ်လိုက်လေသည်။

ဘေးရှိ ဝန်ထမ်းများကလည်း ဤအခြေအနေကို မြင်သောအခါ ဝမ်းသာအားရ အော်ဟစ်နေကြလေသည်။

"ကဲပါ မင်းတို့တွေ စောစောစီးစီး အရမ်း မပျော်ကြပါနဲ့ဦး အလုပ်ကို သေချာ အာရုံစိုက် လုပ်ကြပါ"

ဆွန်ဖုန်းက ပတ်ဝန်းကျင်ရှိ လူများ အားလုံး ဝမ်းသာအားရ ခုန်ပေါက်နေကြသည်ကို မြင်သောအခါ ပြုံးလျက် သတိပေးလိုက်လေသည်။

"ဟုတ်ကဲ့ပါ ဘော့စ်"

"အင်း ဒါကို အောင်မြင်တယ်လို့ သတ်မှတ်လို့ ရပြီလား"

မနက်ပိုင်း ကုန်ဆုံးသွားသောအခါ တူးဖော်ရေး လုပ်ငန်းစဉ်မှာ အတော်လေး ချောမွေ့နေဆဲ ဖြစ်ပြီး ဝါရင့်ကြီး ချားလ်စ်ကလည်း အလျင်မလိုဘဲ အရာအားလုံးကို ကောင်းမွန်စွာ ထိန်းချုပ်ထားနိုင်ခဲ့သည်။

မွန်းတည့် ထမင်းစားချိန် ရောက်သောအခါ ၇၀ မီတာ အနက်အထိ တူးဖော်နိုင်ခဲ့ပြီ ဖြစ်သည်။ ဆိုလိုသည်မှာ မနက်ပိုင်း အချိန်အတွင်း မြေလွှာကျောက် အလွှာ ၂၀ မီတာ အထူကို တူးဖော်နိုင်ခဲ့ခြင်းပင်။

ပထမနေ့တွင် ဆွန်ဖုန်းက ကျောက်ခွဲ အလင်းလှိုင်း စက် ၏ တူးဖော်မှု အရှိန်ကို အနည်းငယ် ထိန်းချုပ်ထားရန် တမင် ရည်ရွယ်ထားခဲ့သည်။ အကယ်၍ အရမ်း မြန်လွန်းပါက လူများကို အလွန် အံ့အားသင့်သွားစေမည် ဖြစ်သည်။ သို့သော် ယခု မနက်ပိုင်းလေးတွင် မြေလွှာကျောက် အလွှာ ၂၀ မီတာကို ဖောက်ထွင်းနိုင်ခဲ့ခြင်းကပင် အလွန် စိတ်လှုပ်ရှားဖွယ် သတင်းကောင်း တစ်ခု ဖြစ်နေလေပြီ။

သိထားရမည်မှာ လက်ရှိ ကမ္ဘာ့ မြေလွှာကျောက် အလွှာ တူးဖော်ရေး အရှိန်နှင့် ယှဉ်ကြည့်ပါက ဤရလဒ်မှာ တစ်ကမ္ဘာလုံးကို သေချာပေါက် ဦးဆောင်နေပြီ ဖြစ်ကြောင်းကိုပင်။

"အင်း သတ်မှတ်လို့ ရတာပေါ့ ဘယ်လိုလဲ မင်းကို ငါပြောသားပဲ ငါ့ကို ယုံပါလို့ အခု မင်း တွေ့ပြီ မဟုတ်လား တူးဖော်ရေးက အဆင်ပြေ ချောမွေ့နေတာပဲ ငါ့ရဲ့ ဖုန်းရွေ့ သုတေသန ဌာန အပေါ်မှာ ငါ ယုံကြည်မှု အပြည့် ရှိတယ် ကိုယ့်ကိုယ်ကိုယ်လည်း ယုံကြည်မှု ရှိတယ်"

ဆွန်ဖုန်းက စူးမေး၏ ပခုံးပေါ်သို့ လက်တင်ကာ ဟီးဟီးဟားဟား ရယ်မောလျက် ပြောလိုက်လေသည်။

"ကောင်းပါပြီ ရှင် နိုင်ပါတယ်"

စူးမေးက ဆွန်ဖုန်းကို မျက်စောင်းထိုးလိုက်လေသည်။

သူမက ယခင်က ဆွန်ဖုန်းအပေါ် ယုံကြည်မှု မရှိခဲ့ခြင်း မဟုတ်ဘဲ ဆွန်ဖုန်းကို စိတ်ပူနေခဲ့ခြင်းသာ ဖြစ်သည်။ ဘာပဲဖြစ်ဖြစ် အမေရိကန် ဒေါ်လာ ၁.၁ ဘီလီယံ ရင်းနှီးမြှုပ်နှံမှု ဆိုသည်မှာ နောက်ပြောင်စရာ ကိစ္စ မဟုတ်ပေ။ ဆွန်ဖုန်း၏ ငွေများကလည်း လေတိုက်ပြီး ပါလာခြင်း မဟုတ်ပေ။

အကယ်၍ ဒေါ်လာ ၁.၁ ဘီလီယံ ရင်းနှီးမြှုပ်နှံပြီး အရှုံးပေါ်သွားပါက ဆွန်ဖုန်း၏ စတော့ရှယ်ယာ ဈေးကွက် ဝင်ရောက်မှုနှင့် ဖုန်းရွေ့ စက်မှုလုပ်ငန်းစု အတွက် ကြီးမားသော ဆုံးရှုံးမှုများ ဖြစ်ပေါ်လာမည်မှာ သေချာလှသည်။

"ငါ နိုင်ရင် ငါ့ကို ဘာဆုချမလဲ"

ဆွန်ဖုန်းက စူးမေး၏ သေးသွယ်သော ခါးလေးကို ဖက်လိုက်ပြီး ပိုမို နီးကပ်စွာ ဆွဲယူကာ သူမ၏ နားနားသို့ ကပ်၍ လေပူလေးများ မှုတ်ထုတ်ရင်း မေးလိုက်လေသည်။

"ဆု ထပ်လိုချင်သေးတာလား ခေါင်းကြီးပဲ ဆုချမယ်"

စူးမေးက ဆွန်ဖုန်း၏ သားရေဖိနပ်ကို ခြေထောက်ဖြင့် တစ်ချက် ပေါက်ကာ ဒေါသတကြီး ထွက်သွားလေတော့သည်။

"သောက်ကျိုးနည်း ဘယ်အချိန်ကတည်းက ဒီလောက်တောင် ရိုင်းစိုင်းသွားရတာလဲ"

စူးမေး၏ လှပသော ကျောပြင်လေးကို ကြည့်ကာ ဆွန်ဖုန်း တစ်ယောက် အော်ဟစ်လိုက်လေသည်။

"ရှင့်လို နှာဘူးကို ဒီလိုမျိုး ကြမ်းကြမ်းတမ်းတမ်း ဆက်ဆံမှ ရမယ် မဟုတ်ရင် ရှင် နာမှန်း သိမှာ မဟုတ်ဘူး"

စူးမေးက နောက်လှည့်မကြည့်ဘဲ လက်ဝှေ့ယမ်းကာ ချွဲနွဲ့သော အသံဖြင့် ပြောလိုက်လေသည်။

"ဒုက္ခပါပဲ"

နှစ်ရက် ကုန်လွန်ပြီးနောက် နံပါတ် ၁၊ ၂ နှင့် ၃ ကမ်းလွန် ရေနံတူးဖော်ရေး စင်မြင့် အားလုံး ၁၀၀ မီတာ အနက် အထိ တူးဖော်နိုင်ခဲ့ပြီ ဖြစ်သည်။ ဆိုလိုသည်မှာ နောက်ထပ် မီတာ ၂၀၀ ဆက်တူးပါက ရေနံလွှာ ဒေသသို့ ရောက်ရှိမည် ဖြစ်လေသည်။

၁၂ ရက်နေ့တွင်တော့ ဖီးလက်စ်၊ ကျင်းချန် ရေနံကုမ္ပဏီမှ လူများ၊ ရေနံလောကမှ မိတ်ဆွေ အချို့၊ သတင်းထောက် အချို့နှင့် သေချာသည်ပေါ့ ဝမ်လွန်း ရေနံကုမ္ပဏီမှ ဒေးဗစ် တို့ကိုပါ ဆွန်ဖုန်းက ဂျားလော့ ရေနံမြေ၏ နံပါတ် ၁ စင်မြင့်ပေါ်သို့ ဖိတ်ခေါ်ထားလေသည်။

ပြောရမည်ဆိုလျှင် ဤ နံပါတ် ၁ ကမ်းလွန် ရေနံတူးဖော်ရေး စင်မြင့်မှာ သာမန် စင်မြင့်များထက် နှစ်ဆခန့် ပိုမို ကြီးမားလေသည်။ လက်ရှိ ကမ္ဘာပေါ်တွင် အကြီးဆုံး ကမ်းလွန် ရေနံတူးဖော်ရေး စင်မြင့်ကြီးဟု ဆိုနိုင်ပေသည်။ ထို့ကြောင့် လူအများအပြား လာရောက်သော်လည်း ကောင်းမွန်စွာ ဧည့်ခံ စီစဉ်ပေးနိုင်လေသည်။

ဆွန်ဖုန်းက ဤလူများကို သယ်ဆောင်ရန် ရဟတ်ယာဉ် တစ်စီး ငှားရမ်းထားခဲ့လေသည်။

ပထမဆုံး ရောက်ရှိလာသူမှာ ဖီးလက်စ် ဖြစ်သည်။ ဤသူဌေးသားက မိမိ၏ ကိုယ်ပိုင် ရဟတ်ယာဉ်ဖြင့် လာရောက်ခြင်း ဖြစ်သည်။ လေယာဉ်ပေါ်မှ ဆင်းဆင်းချင်း ဖီးလက်စ်က ဆွန်ဖုန်းကို တင်းကျပ်စွာ ဖက်လိုက်လေသည်။

"ဆွန်ဖုန်း ငါတို့ ပြန်တွေ့ကြပြန်ပြီ ဟားဟား ဒါပေမဲ့ မင်း ငါ့ညီမ အီဗာကို ဘယ်လိုများ ဒေါသထွက်အောင် လုပ်ခဲ့လဲ မသိဘူး ငါ မင်း အကြောင်း ပြောလိုက်တိုင်း သူမက အရမ်း ဒေါသထွက်နေပြီး နောက်ဆုံး ငါ့ကိုတောင် မုန်းသွားတယ် မင်း ပြောစမ်း မင်း သူမကို ဘာတွေများ လုပ်ခဲ့လို့လဲ သူမ မသိအောင် တခြား မိန်းမတွေ သွားရှာခဲ့တာလား"

ဖီးလက်စ်က ဆွန်ဖုန်းကို ဆွဲကာ မေးလိုက်လေသည်။

သူက ယခင် ညစာစားပွဲတွင် ဆွန်ဖုန်းနှင့် အီဗာတို့ အတူတူ ကခဲ့ဖူးသည်ကို မြင်ခဲ့ဖူးသဖြင့် ဆွန်ဖုန်းနှင့် သူ၏ ညီမတို့ အကြားတွင် လျှို့ဝှက် ဇာတ်လမ်း ရှိနေသည်ဟု သူ ထင်နေခဲ့သည်။ ထို့အပြင် သူနှင့် ဆွန်ဖုန်းတို့မှာလည်း မိတ်ဆွေများ ဖြစ်နေပြီ ဖြစ်ရာ တစ်ခါတစ်ရံ ဆွန်ဖုန်း အကြောင်း ပြောမိသည့်အခါ အီဗာက ဆွန်ဖုန်းကို အလွန် ရွံရှာနေသကဲ့သို့ ဖြစ်နေသည်ကို တွေ့ရသဖြင့် အံ့သြနေမိခြင်း ဖြစ်လေသည်။

"အာ ဟားဟား ဘာမှ မဖြစ်ပါဘူး ကျွန်တော်တို့ လမ်းခွဲလိုက်ကြပြီ ဟုတ်တယ် လမ်းခွဲလိုက်တာ"

ဆွန်ဖုန်း တစ်ယောက် လေလုံးထွားနေလေသည်။ သောက်ကျိုးနည်း အကယ်၍ အီဗာသာ ဆွန်ဖုန်း၏ ဤစကားကို ကြားသွားပါက သူ့ကို လည်ပင်း ညှစ်သတ်ချင်စိတ် ပေါက်သွားမည်မှာ သေချာလှသည်။

"အော် အဲဒီလိုလား နှမြောစရာပဲ အီဗာက တော်တော်လေး ကောင်းတဲ့ မိန်းကလေး တစ်ယောက်ပါ"

ဖီးလက်စ်က သူ၏ ညီမကို ချီးကျူးနေလေသည်။

ဆွန်ဖုန်း တစ်ယောက် ကြားပြီးနောက် စိတ်ထဲမှ 'သောက်ကျိုးနည်း သူက အရမ်းကို ရောင့်တက်တဲ့ သူဌေးသမီးလေးပါ ဒေါသကြီးတယ် အကြောင်းပြချက် မရှိဘူး ဘာတွေများ ကောင်းနေလို့လဲ ငါသာ နည်းနည်းလေး စွမ်းဆောင်နိုင်စွမ်း မရှိရင် သူ့လက်ထဲမှာတင် သေသွားလောက်ပြီ' ဟု တိတ်တဆိတ် တွေးလိုက်မိလေသည်။

"ဟုတ်တယ် သူက ကောင်လေး ချောချောလေး အသစ် တစ်ယောက် ရသွားလို့ ကျွန်တော့်ကို ပစ်ထားခဲ့တာ"

ဆွန်ဖုန်းက လက်နှစ်ဖက်ကို ဖြန့်ကာ အီဗာကို ဆက်လက် အသရေဖျက် လေလုံးထွားနေလေသည်။

သို့သော် အနောက်တိုင်းသားများမှာ အလွန် ပွင့်လင်းကြလေသည်။ တွေးခေါ်မှု အပိုင်းတွင် ဖြစ်စေ၊ ပညာရေး အပိုင်းတွင် ဖြစ်စေ၊ မိသားစု သင်ကြားမှု အပိုင်းတွင် ဖြစ်စေ သူတို့က သားသမီးများ၏ အချစ်ရေးနှင့် ပတ်သက်၍ အလွန် လွတ်လပ်စွာ ထားရှိတတ်ကြလေသည်။

ဆွန်ဖုန်းက ဖီးလက်စ်ကို ဧည့်ခံပြီးနောက် မကြာမီမှာပင် အခြားသူများ အားလုံး ရောက်ရှိလာကြလေသည်။ ဤတစ်ကြိမ်တွင် ယန်ကျစ်လည်း ရောက်လာခဲ့သည်။ နောက်ဆုံးတွင် ဆွန်ဖုန်းသည် ဒေးဗစ်ကိုပါ မြင်တွေ့လိုက်ရလေသည်။

အပေါ်ယံ ကြည့်မည်ဆိုပါက ဤတစ်ကြိမ် ဒေးဗစ် ဆွန်ဖုန်းကို မြင်တွေ့ရချိန်တွင် ယခင်ကကဲ့သို့ ရိုသေလေးစားပြီး ဖားယားနေသည့် ဟန်ပန်မျိုး လုံးဝ မရှိတော့ပေ။ ယခင်က အထက်စီးမှ နေတတ်သည့် ဟန်ပန်မျိုး ချက်ချင်း ပြန်ရောက်သွားလေသည်။

ဆွန်ဖုန်း သိလိုက်သည်မှာ ဤသူက မိမိကို အကူအညီ တောင်းစရာ မလိုတော့သဖြင့် သူ၏ မူလ စရိုက် အစစ်အမှန် ပေါ်လာခြင်း ဖြစ်ကြောင်းကိုပင်။ ယခင်က စာချုပ် ချုပ်ဆိုရန် မိမိကို အကူအညီ တောင်းခဲ့စဉ်ကဆိုလျှင် မိမိရှေ့တွင် ဒူးထောက်လုမတတ် သနားစရာ ကောင်းနေခဲ့သည် မဟုတ်ပါလော။

"မစ္စတာဆွန်ဖုန်း မင်္ဂလာပါ"

ဒေးဗစ်က ဆင်းလာပြီးနောက် ဆွန်ဖုန်းကို မခို့တရို့ နှုတ်ဆက်လိုက်လေသည်။ ခင်ဗျား ဆိုသည့် အသုံးအနှုန်းပင် မသုံးတော့ချေ။

"မင်္ဂလာပါ"

ဆွန်ဖုန်းကလည်း ခပ်ပေါ့ပေါ့သာ ပြန်ဖြေလိုက်လေသည်။

"မစ္စတာဆွန်ဖုန်း ခင်ဗျားတို့ရဲ့ လက်ရှိ တူးဖော်ရေး အခြေအနေက ဘယ်လိုရှိလဲ ဘာတိုးတက်မှုများ ရှိလဲ မသိဘူး"

ဒေးဗစ်က ဝုန်းဝုန်းကျည်ကျည် လည်ပတ်နေသော တူးဖော်ရေး စင်မြင့်ကြီးကို ကြည့်ကာ သိချင်စိတ်ဖြင့် မေးလိုက်လေသည်။

တကယ်တမ်းတွင် ဤနေရာရှိ လူတိုင်း သိချင်နေသော မေးခွန်းလည်း ဖြစ်လေသည်။ ယခုအခါ ဒေးဗစ်က ဆွန်ဖုန်း၏ အရှက်ကွဲမည့် အချိန်ကို အလွန် ကြည့်ချင်နေမိသည်။ ကမ်းလွန် မြေလွှာကျောက် ရေနံမြေကို တူးဖော်ရာတွင် ဆွန်ဖုန်း၏ ဤစင်မြင့်က ဘာတိုးတက်မှုမှ ရှိမည် မဟုတ်ဟု သူ ထင်နေလေသည်။

ဤတူးဖော်ရေး စင်မြင့်ကြီးက ကြည့်ရသည်မှာ အဆင့်မြင့်ပုံ ရပြီး ခမ်းနားကြီးကျယ်သော်လည်း လက်တွေ့တွင် အသုံးမဝင်ဟု သူ ထင်နေလေသည်။

"ဒေးဗစ်က ဒီလို မေးလာမှတော့ ကျွန်တော်လည်း အားလုံးကို အရင် ပြောပြလိုက်ပါ့မယ် ပြီးမှ အားလုံးကို လိုက်ပြပြီး တစ်ခုချင်းစီ မိတ်ဆက်ပေးမယ်"

ဆွန်ဖုန်းက လည်ချောင်းဟန့်ကာ ပြောလိုက်လေသည်။

"ကျွန်တော်တို့ ရောက်နေတဲ့ ဒီတူးဖော်ရေး စင်မြင့်က နံပါတ် ၁ စင်မြင့် ဖြစ်ပြီး သာမန် တူးဖော်ရေး စင်မြင့်တွေထက် နှစ်ဆလောက် ပိုကြီးပါတယ် ၁၀ ရက်နေ့ မနက် ၉ နာရီမှာ တူးဖော်ရေး စတင်ခဲ့ပါတယ် အခုချိန်ထိ မြေအောက် မီတာ ၁၀၀ အနက် အထိ တူးဖော်နိုင်ခဲ့ပါပြီ အဲဒီအထဲမှာ မြေလွှာကျောက် အလွှာက မီတာ ၅၀ အထူ ရှိပါတယ် လက်ရှိ အရှိန်အတိုင်း ဆိုရင် သိပ်မကြာခင်မှာပဲ ကျွန်တော့်ရဲ့ ဒီစင်မြင့်ကနေ ပထမဆုံး ရေနံတွင်းကို အောင်မြင်စွာ တူးဖော်နိုင်တော့မယ်လို့ ကျွန်တော် ယုံကြည်ပါတယ်"

ဆွန်ဖုန်းက လူတိုင်းကို အပြုံးလေးဖြင့် ပြောလိုက်လေသည်။

"ရှူး နှစ်ရက် အတွင်း မီတာ ၁၀၀ အနက် အထိ တူးနိုင်ခဲ့တယ်တဲ့လား အဲဒီအထဲမှာ မီတာ ၅၀ က မြေလွှာကျောက် အလွှာတွေတဲ့ ဒါက အရမ်း စွမ်းလွန်းတာပဲ တကယ်လို့ အဲဒါသာ အမှန်ဆိုရင် ဒီမြေလွှာကျောက် အလွှာတွေက ဆွန်ဖုန်း အတွက် ဘာမှ မဟုတ်ဘူးပေါ့ သာမန် ကျောက်လွှာတွေလို ဖြစ်သွားပြီပေါ့"

"တစ်ပတ်လောက် နေရင် ရေနံလွှာ အထိ ဖောက်ထွင်းနိုင်မှာပေါ့ အဲဒီအချိန် နောက်ထပ် တစ်ပတ်လောက် နေရင် ရေနံတွင်း တစ်တွင်း တူးဖော်နိုင်တော့မယ်ပေါ့ ဒီအရှိန်က အရမ်း မြန်လွန်းတာပဲ သာမန် ကျောက်လွှာတွေ တူးဖော်ရသလိုပဲ"

"ဒါကြောင့် ဆွန်ဖုန်းက ဝမ်လွန်း ရေနံကုမ္ပဏီ ဆီကနေ ဒီဂျားလော့ ရေနံမြေကို ဝယ်ဖို့ ဒီလောက်တောင် ယုံကြည်မှု ရှိနေတာကိုး ဆွန်ဖုန်းက အရင်ကတည်းက ရင်ဘတ်ထဲမှာ ယုံကြည်မှု အပြည့် ရှိနေခဲ့တာကိုး ကြည့်ရတာ အမေရိကန် ဒေါ်လာ ၁.၁ ဘီလီယံတည်းနဲ့ ဒီရေနံမြေကြီး တစ်ခုလုံးကို ဝယ်နိုင်ခဲ့တာဆိုတော့ အများကြီး မြတ်သွားပြီပေါ့"

"ကြည့်ရတာ ဖုန်းရွေ့ သုတေသန ဌာနက ထုတ်လုပ်လိုက်တဲ့ ပစ္စည်းတွေက တကယ်ကို အစွမ်းထက်ပြီး နာမည်ကြီးတာနဲ့ ထိုက်တန်တာပဲ"

ဆွန်ဖုန်း၏ စကား ထွက်လာသည်နှင့် ဤလူဆယ်ဂဏန်းခန့်မှာ တီးတိုး ဆွေးနွေးလာကြလေသည်။ သူတို့၏ မျက်နှာပေါ်တွင် အံ့အားသင့်မှု၊ တုန်လှုပ်မှု၊ မယုံကြည်နိုင်မှုများ အပြင် ချီးကျူးမှုများလည်း ပါဝင်နေလေသည်။ သေချာသည်ပေါ့ သံသယ ဝင်နေသူများလည်း ရှိလေသည်။ ဘာပဲဖြစ်ဖြစ် ယခုက ဆွန်ဖုန်း ပါးစပ်မှ ပြောနေခြင်း ဖြစ်ရာ ကိုယ်တိုင် လေလုံးထွားနေခြင်း ဟုတ်မဟုတ် မည်သူက သိနိုင်မည်နည်း။

အထူးသဖြင့် ဒေးဗစ်က အများဆုံး သံသယ ဝင်နေသူ ဖြစ်လေသည်။ ဂျားလော့ ရေနံမြေ အကြောင်းကို သူက အသိဆုံး ဖြစ်ပြီး ဤနေရာရှိ လူများ အားလုံးထက် သူက ပို၍ သေချာ သိရှိထားလေသည်။ အဘယ်ကြောင့်ဆိုသော် ဤရေနံမြေက မူလက သူတို့ ဝမ်လွန်း ရေနံကုမ္ပဏီ၏ ပိုင်ဆိုင်မှု ဖြစ်ခဲ့သောကြောင့်ပင်။

ဤရေနံမြေက ဆက်လက် တူးဖော်ရန် တန်ဖိုး မရှိတော့ကြောင်း သူ ကောင်းကောင်း သိထားလေသည်။ အထူးသဖြင့် ထိုမြေလွှာကျောက် အလွှာများမှာ တူးဖော်ရန် အလွန် ခက်ခဲလှသည်။

အကယ်၍ တူးဖော်နိုင်ခဲ့လျှင်ပင် ကြီးမားသော လူအင်အား၊ ငွေကြေး အင်အားများ အမြောက်အမြား လိုအပ်မည် ဖြစ်ပြီး အရေးအကြီးဆုံးမှာ အချိန်ပင် ဖြစ်လေသည်။ အကယ်၍ မြေလွှာကျောက် ရေနံမြေ ဖြစ်ပါက ထိုမြေလွှာကျောက် အလွှာများကို ဖောက်ထွင်းရန် အချိန်ဘယ်လောက် ယူရမည်ကို မသိနိုင်ပေ။

"မစ္စတာဆွန်ဖုန်း ကျွန်တော်တို့ကို အချက်အလက်တွေ သွားကြည့်ခွင့် ပြုနိုင်မလား"

ဒေးဗစ်က ဤသို့ တောင်းဆိုလိုက်လေသည်။

"သေချာတာပေါ့ ရပါတယ်"

ဆွန်ဖုန်းက အလွန် သဘောထား ကြီးစွာဖြင့် ပြန်ပြောလိုက်လေသည်။

"ညီလေးဆွန် မင်းပြောတာ တကယ်လား နှစ်ရက် အတွင်း မီတာ ၅၀ အထူရှိတဲ့ မြေလွှာကျောက် အလွှာကို တူးဖော်နိုင်ခဲ့တယ် ဟုတ်လား"

ယန်ကျစ်က ရှေ့သို့ တိုးလာပြီး ဆွန်ဖုန်းကို တရုတ်လို မေးလိုက်လေသည်။

"အစ်ကိုကျစ် ကျွန်တော် ခင်ဗျားကို လိမ်ပါ့မလား ကျွန်တော် ပြောဖူးတယ်လေ မြေလွှာကျောက် ရေနံမြေကို တူးဖော်နိုင်ဖို့ အတွက် ကျွန်တော့်မှာ ဖြစ်နိုင်ခြေ ရှိပြီး အဆင့်မြင့်တဲ့ နည်းပညာ တစ်ခု ရှိနေပါပြီလို့ အခု ကျွန်တော်က လေလုံးထွားနေတာလား ဒါမှမဟုတ် တကယ် စွမ်းဆောင်နိုင်သလား ဆိုတာကို ခင်ဗျားကို ပြသနေတာပါ"

ဆွန်ဖုန်းက ရယ်မောကာ ပြန်ဖြေလိုက်လေသည်။

"ဆွန်ဖုန်း မင်းပြောတာ တကယ်လား"

ဖီးလက်စ် လည်း အနားသို့ ကပ်လာလေသည်။ ဤကိစ္စကို သူ အများဆုံး စိတ်ဝင်စားနေခြင်း ဖြစ်သည်။ အကယ်၍ ဆွန်ဖုန်းတွင် မြေလွှာကျောက် ရေနံမြေများကို တူးဖော်နိုင်သည့် ရင့်ကျက်သော နည်းပညာသာ ရှိနေပါက နယူးဖောင်လန် အနောက်ပိုင်းရှိ ရေနံစည်ပေါင်း ၃၅ ဘီလီယံ ရှိသော မြေလွှာကျောက် ရေနံမြေများကို သူတို့ သွားရောက် တူးဖော်ရန် စောင့်ဆိုင်းနေပြီ ဖြစ်လေသည်။

"တကယ်ပေါ့ အဲဒီအချိန်ကျရင် ခင်ဗျား တွေ့ရမှာပါ ကျွန်တော် လိမ်မလိမ် ဆိုတာကို ပြီးတော့ နောက်ထပ် နှစ်ပတ်လောက် နေရင် ရေနံတွေ ထွက်လာတော့မှာ အဲဒီအချိန်ကျရင် ခင်ဗျားတို့ ထပ်လာကြည့်လို့ ရပါတယ်"

ဆွန်ဖုန်းက ပြောလိုက်လေသည်။

"ကောင်းပြီ မင်းကို ငါ ယုံတယ် မင်းတို့ရဲ့ တူးဖော်ရေး အခြေအနေ ဘယ်လို ရှိလဲ ဆိုတာ အရင် သွားကြည့်ကြတာပေါ့"

ဖီးလက်စ်က ဆွန်ဖုန်း၏ ပခုံးကို ဖက်ကာ အချက်အလက် ခန်းသို့ ဦးတည် သွားလိုက်လေသည်။

လူအများစုက ဖီးလက်စ်နှင့် ဆွန်ဖုန်းတို့ ဤမျှ ရင်းနှီးနေကြသည်ကို မြင်သောအခါ အားလုံးက မနာလို ဖြစ်နေကြလေသည်။ ဖီးလက်စ် က ဘယ်သူလဲ ဆိုတာ သိထားရမည်။

လက်တင် လုပ်ငန်းစုကြီး၏ နောက်ဆက်ခံမည့်သူ ဖြစ်လေသည်။ သူနှင့် ဆက်ဆံရေး ကောင်းထားပါက ဧရာမ ကျောထောက်နောက်ခံကြီး တစ်ခု ရရှိသွားသည်နှင့် တူလေသည်။ ဒေးဗစ် ကိုယ်တိုင်ပင်လျှင် မနာလိုလွန်း၍ မျက်လုံးများပင် ပြူးကျယ်နေလေသည်။

သိပ်မကြာခင်မှာပင် ဆွန်ဖုန်းသည် လူအုပ်စုကို ခေါ်ဆောင်ကာ အချက်အလက် ခန်းသို့ ရောက်ရှိလာခဲ့လေသည်။ ဤနေရာတွင် တူးဖော်ရေး အခြေအနေများကို အချိန်နှင့် တစ်ပြေးညီ မှတ်တမ်းတင်ကာ အစီရင်ခံနေခြင်း ဖြစ်သည်။

ချားလ်စ် လည်း ဤနေရာတွင် အလုပ်လုပ်နေခြင်း ဖြစ်သည်။ လက်ရှိတွင် သူက ဤနေရာ၌ ကြီးကြပ် ကွပ်ကဲနေခြင်း ဖြစ်လေသည်။ ဆွန်ဖုန်းက သပ်ရပ်စွာ ဝတ်ဆင်ထားသော လူအုပ်ကြီး ဝင်လာသည်ကို မြင်သောအခါ သူတို့ အားလုံးက လာရောက် လေ့လာသူများ ဖြစ်ကြောင်းနှင့် သူ၏ ဘော့စ် အတွက် အလွန် အရေးကြီးကြောင်း သူ သိလိုက်လေသည်။

"ဘော့စ်"

ချားလ်စ်က ထိုလူများ ဝင်လာသည်ကို မြင်သောအခါ ချက်ချင်း မတ်တပ်ရပ်ကာ ကြိုဆိုလိုက်လေသည်။

"မင်း အခု သူတို့ကို ငါတို့ရဲ့ လက်ရှိ တူးဖော်ရေး အခြေအနေကို ရှင်းပြလိုက်ပါ အသေးစိတ်လေး ရှင်းပြပေးလိုက်"

ဆွန်ဖုန်းက ခပ်ပေါ့ပေါ့ ပြောလိုက်လေသည်။

"ဟုတ်ကဲ့ပါ ဘော့စ်"

ချားလ်စ်က ရိုသေစွာ ပြန်ဖြေလိုက်လေသည်။