အခန်း (၁၆၁၁-၁၆၁၂)

အခန်း (၁၆၁၁) : နံပါတ်တစ်နေရာအတွက် တိုက်ပွဲ

"စိတ်ဝင်စားစရာပဲ" ဝူဟုန်က ပြုံးလိုက်သည်။ ဤကဲ့သို့ လှပသော မျက်နှာပိုင်ရှင်၏ အပြုံးသည် ချစ်စရာကောင်းခြင်း၊ မြတ်နိုးစရာကောင်းခြင်း သို့မဟုတ် ဆွဲဆောင်မှုရှိခြင်းတို့ ရှိသင့်သော်လည်း သူမ၏ အပြုံးကမူ လူအများ၏ ကျောရိုးထဲအထိ ကြက်သီးထသွားစေနိုင်သည်။

သူမအကြောင်းကို သိသော မည်သူမဆို ဤအရာသည် ပျော်ရွှင်၍ ပြုံးသော အပြုံးမျိုးမဟုတ်ကြောင်း နားလည်ကြပေလိမ့်မည်။ မဟုတ်သေးဘူး ... ဤအပြုံးသည် တောဘုရင်မအနေနှင့် သူမ၏ လက်အောက်ခံတစ်ယောက်က သူမကို ရင်ဆိုင်ရဲသည့် သတ္တိရှိကြောင်း ရှာဖွေတွေ့ရှိသွားသည့် အချိန်မျိုးတွင် ပြုံးသည့် အပြုံးမျိုး ဖြစ်၏။

ဝူဟုန်၏ ကျော်ကြားမှုမှာ ရလဒ်များအပေါ်တွင် တည်ဆောက်ထားခြင်း ဖြစ်ပေသည်။ သူမက လူတိုင်း မတိုက်ခိုက်လိုဆုံး ပုဂ္ဂိုလ်ဖြစ်ကြောင်း အားလုံးက သိထားကြသည်။ ယန်းအိုက်တွင် အသုံးချနိုင်သော အားနည်းချက်တစ်ခု ရှိသော်လည်း ဝူဟုန်တွင်မူ မရှိချေ။ သူမ၏ တိုက်ခိုက်ရေးစွမ်းရည်မှာ ၉၉ ရာခိုင်နှုန်းအထိ ရှိပြီး တိုက်ခိုက်မှုပုံစံကလည်း စုံလင်လှသည်။

သူမ၏ ခန္ဓာကိုယ်မှာလည်း ပြီးပြည့်စုံအောင် ကျင့်ကြံထားသဖြင့် သူမ၏ ကြံ့ခိုင်မှုစွမ်းရည်မှာ အလွန်မြင့်မားလှသည်။ ဆိုလိုသည်မှာ သူမတွင် တခြားလူများကို အနှောင့်အယှက်အပေးနိုင်ဆုံးသော တိုက်ခိုက်မှုပုံစံများထဲမှ တစ်ခု ရှိနေခြင်းပင် ဖြစ်သည်။

သူမက မည်သည့်နည်းနှင့်မျှ အနိုင်မခံနိုင်သောသူတော့ မဟုတ်ချေ။ မည်သူမျှ ထိုကဲ့သို့သော အောင်မြင်မှုကို မကြွေးကြော်နိုင်ကြချေ။ သူမ ရှေးဦးမူလအဆင့်သို့ ရောက်ခါစ အစောပိုင်းကာလများတွင် ဝူဟုန်အနေနှင့် သူမ၏ အသက်အရွယ်ကြောင့် တခြားလူများနှင့် အမီလိုက်နေရုံသာ ရှိသေးသည်။

သို့သော် သူမ၏ အထွတ်အထိပ်သို့ တဖြည်းဖြည်း ရောက်ရှိလာသောအခါတွင်မူ သူမကို ကိုင်တွယ်ရန် အကောင်းဆုံးနည်းလမ်းမှာ အုပ်စုဖွဲ့ တိုက်ခိုက်ခြင်းဖြစ်ကြောင်း လူတိုင်း သိရှိသွားခဲ့ကြသည်။ သို့သော် ထိုကဲ့သို့သော နည်းဗျူဟာများကိုပင် အကောင်အထည်ဖော်ရန် ခက်ခဲလွန်းလှသည်။

ဒုတိယမူလစစ်ပွဲ မတိုင်မီလေး ကောင်းကင်တာအိုသည် လာမည့်အပြောင်းအလဲကို အာရုံခံမိ၍သော်လည်းကောင်း သို့မဟုတ် ကြိုတင်သိရှိနေ၍သော်လည်းကောင်း လောကကြီးကို ပြင်ဆင်ပေးရန်အတွက် ကံအပြောင်းအလဲအခွင့်အရေးများစွာကို ထုတ်လွှတ်ပေးခဲ့သည်။

ထိုလျှို့ဝှက်စမ်းသပ်ချက်တစ်ခုတွင် ဝူဟုန်သည် လူငါးယောက်နှင့် ရင်ဆိုင်ခဲ့ရသည်။ ထိုသူတို့မှာ ရှောင်ဘိုးဘေး၊ ပိုင်ချီ၊ ရှန်ထျန်း၊ တာအိုစိတ်သုံးပါးနှင့် မြေကမ္ဘာဓားနတ်ဘုရားတို့ ဖြစ်ကြသည်။

သူတို့သည် သူမကို အကြီးမားဆုံးသော ခြိမ်းခြောက်မှုအဖြစ် ချက်ချင်း ရှုမြင်ကြပြီး သူမကို ဆန့်ကျင်ရန် ပူးပေါင်းခဲ့ကြသည်။ ဤတိုက်ပွဲမှာ ဒဏ္ဍာရီဆန်လှပြီး လောကတွင် ဝူဟုန်၏ အဆင့်အတန်းကို ခိုင်မာစေရန် အခြေခံ ဖြစ်လာခဲ့သည်။

ဤမျှော်လင့်ချက်မဲ့သော တိုက်ပွဲတွင် သူမသည် ထိုလူများထဲမှ သုံးယောက်ကို အောင်မြင်စွာ ချိတ်ပိတ်ခတ်နိုင်ခဲ့ပြီး ပိုင်ချီနှင့် ရှောင်ဘိုးဘေးတို့ကို လဲ့ဖေးချီ ရောက်ရှိလာပြီး သူတို့ကို မောင်းထုတ်နိုင်ခဲ့သည့် အချိန်အထိ ကြာမြင့်စွာ တိုက်ခိုက်နိုင်ခဲ့သည်။

ယခုတွင် ကိုးဘုံမျှော်နန်းဆောင်ငယ်တစ်ခုက ရှေ့တွင် ပျံဝဲလာပြီးနောက် သူမ၏ ခန္ဓာကိုယ်နှင့် ပေါင်းစပ်သွားကာ နဖူးထက်တွင် အနီရောင် အမှတ်အသားတစ်ခု ချန်ရစ်ထားလေသည်။ ပုံမှန်အားဖြင့်ဆိုလျှင် ဤကဲ့သို့သော အလှဆင်မှုမျိုးက သူမ၏ အလှတရားကို ပိုမိုပေါ်လွင်စေမည်ဖြစ်သော်လည်း သူမ၏ ကြောက်မက်ဖွယ်ကောင်းသော အရှိန်အဝါကမူ သူမကို ပိုမိုအန္တရာယ်များပုံပေါ်စေသည်။

သူမ၏ နောက်ကွယ်တွင် ပုံရိပ်ခြောက်ခု ပေါ်ထွက်လာပြီး ဟန်ချက်ညီသော မြင်ကွင်းတစ်ခုကို ဖန်တီးလိုက်သည်။

ယင်ကျန်းကလည်း အရှုံးမပေးလိုသဖြင့် ဧကရာဇ်တံဆိပ်တော်တစ်ခု သူ့ရှေ့တွင် ပျံဝဲလာပြီးနောက် သူ့ခန္ဓာကိုယ်အတွင်းသို့ ဝင်ရောက်သွားခဲ့သည်။ ထို့အပြင် ရွှေရောင်နဂါးချပ်ဝတ်တန်ဆာတစ်ခုသည် သူ့ခန္ဓာကိုယ်ပေါ်တွင် ရုပ်လုံးပေါ်လာပြီး သူ၏ ဆွဲဆောင်မှုနှင့် ကြီးကျယ်ခမ်းနားမှုကို ပိုမိုမြင့်မားစေသည်။

[နဂါးနှိမ်နင်းရေး လက်သီး]

ယင်ကျန်းက ရှေ့သို့ လက်သီးဖြင့် ထိုးလိုက်ရာ ပတ်ပတ်လည်ရှိ စည်းမျဉ်းများ၏ လည်ပတ်မှုကို ဟန့်တားနိုင်သော ဖိနှိပ်နိုင်ဖွယ် အရှိန်အဝါပါရှိသည့် ရွှေရောင်နဂါးတစ်ကောင် ထွက်ပေါ်လာသည်။ ၎င်းတွင် အရာအားလုံးသည် ဧကရာဇ်၏ အလိုဆန္ဒအတိုင်း ဖြစ်လာစေရန် သေချာစေသည့် ဖြစ်နိုင်ခြေစွမ်းအားများ ကိန်းအောင်းနေသည်။

ထိုစဉ် ဝူဟုန်က ဘယ်လက်ကို ဝှေ့ယမ်းလိုက်ရာ ထိုနဂါးသည် ဘတ်စကက်ဘောလုံး အရွယ်အစားရှိသော အလင်းစက်တစ်ခုအဖြစ် ပြောင်းလဲသွားခဲ့သည်။ တစ်ချိန်တည်းမှာပင် သူမ၏ ညာဘက်လက်က ကြေးညိုရောင် မီးပြင်းဖိုတစ်လုံးကို ဖန်တီးလိုက်သည်။

ယင်ကျန်းက အေးစက်စွာ နှာခေါင်းရှုံ့လိုက်ရာ ထိုဖြူစင်သော အလင်းတန်းသည် နဂါးတစ်ကောင်အဖြစ် ပြန်လည်ပြောင်းလဲသွားခဲ့သော်လည်း တစ်စက္ကန့်ပင်မပြည့်မီ အချိန်အတွင်းမှာပင် မူလအတိုင်း ပြန်ဖြစ်သွားခဲ့သဖြင့် သူ့ကို မျက်မှောင်ကြုတ်သွားစေခဲ့သည်။

ထို့နောက် သူက လက်သီးချက်ပေါင်းများစွာနှင့် နဂါးပေါင်းများစွာကို ထုတ်လွှတ်လိုက်တော့သည်။ မီးပြင်းဖိုက အသက်ဝင်လာပြီး နဂါးအားလုံးကို အထဲဆွဲခေါ်လိုက်သည်။ သူတို့က ရုန်းကန်ခဲ့ကြသော်လည်း အလင်းသည် တွင်းနက်ကြီးတစ်ခုမှ မလွတ်မြောက်နိုင်သကဲ့သို့ ဤတိုက်ခိုက်မှုများသည်လည်း သူတို့၏ ကံကြမ္မာမှ မလွတ်မြောက်နိုင်ကြချေ။

သူတို့က အဖြူရောင်အလင်းတန်းများအဖြစ် ပြောင်းလဲသွားခဲ့ပြီး အချို့မှာ ခဏမျှ ပြန်လည်ပြောင်းလဲသွားခဲ့သော်လည်း သူတို့အားလုံး ချက်ချင်းပင် နဂိုမူလပုံစံသို့ ပြန်ပြောင်းသွားကြသည်။

မီးပြင်းဖိုက ကြေးညိုရောင်မှ ငွေရောင်သို့ လျင်မြန်စွာ ပြောင်းလဲသွားလေ၏။ ဝူဟုန်က ထိုအရာကို ထိန်းချုပ်ကာ ပြိုင်ဘက်ကို တိုက်ခိုက်လိုက်တော့သည်။

ယင်ကျန်း၏ ပထမဆုံး အသိစိတ်မှာ ရှောင်တိမ်းရန် ဖြစ်သော်လည်း ထိုမီးပြင်းဖိုထဲတွင် လောကကြီးတစ်ခုလုံး၏ အလေးချိန် ပါရှိနေပုံရပြီး ဆွဲငင်အားကို မဖြစ်နိုင်လောက်အောင် မြင့်မားသော အဆင့်သို့ မြှင့်တင်ရန် အသုံးပြုနေကာ ကာလံဒေသံအထိ သက်ရောက်မှုရှိနေသည်။

"ပယ်ဖျက်စေ" ယင်ကျန်းက ဆိုလိုက်သည်။

အုပ်စိုးသူတစ်ဦးအနေဖြင့် သူ့စကားလုံးများသည် အကြွင်းမဲ့ ဖြစ်၏။ မီးပြင်းဖိုက အချိန်ခဏမျှ ရပ်တန့်သွားခဲ့သော်လည်း သူ့အတွက် ထိုအရာ၏ အတိုင်းအတာအတွင်းမှ လွတ်မြောက်ရန်အတွက် လုံလောက်လှသည်။

"တော်လှန်စေ"

သူ့အမိန့်ပေးစေမှုနှင့်အတူ လေဟာနယ်တိုက်ပွဲကွင်းပြင်၏ အဓိက အစိတ်အပိုင်းတစ်ခုမှာ အသက်ဝင်လာပြီး သူ့နယ်ပယ်အတွင်းရှိ ဝူဟုန်၏ တည်ရှိမှုကို တော်လှန်လိုက်တော့သည်။

သူတို့သည် သူမကို လေဟာနယ်စွမ်းအားများ ပြည့်နှက်နေသည့် ပူဖောင်းတစ်ခုအတွင်း ပိတ်လှောင်လိုက်ပြီး သူမ၏ တည်ရှိမှုကို ဖျက်ဆီးပစ်ရန် ကြိုးပမ်းခဲ့ကြသည်။

သို့သော် သူမက တည်တည်ငြိမ်ငြိမ်ဖြင့် သင်္ကေတတစ်ခုကို ဆွဲသားလိုက်ရာ ထိုအရာက ပူဖောင်းနှင့် အထဲမှစွမ်းအားအားလုံးကို ချက်ချင်း စုပ်ယူသွားခဲ့သည်။

သူမက ထိုသင်္ကေတကို ချေမှုန်းပစ်လိုက်ပြီး ထိုအရာ၏ စွမ်းအားကို ပြိုင်ဘက်ဆီသို့ ထုတ်လွှတ်လိုက်တော့သည်။

"တားမြစ် … "

ဝူဟုန်က ယင်ကျန်း၏ နောက်ကွယ်တွင် ပေါ်လာခဲ့သည်။ သူမ၏ သင်္ကေတက တိုက်ပွဲကွင်းပြင်၏ စွမ်းအားကို စုပ်ယူရုံသာမကဘဲ အခွင့်အာဏာအချို့ကိုပါ ထိန်းချုပ်နိုင်ခဲ့ကာ ထိုအရာကို အသုံးပြု၍ သူမ၏ ပြိုင်ဘက် တုံ့ပြန်နိုင်စွမ်းထက် ကျော်လွန်သော အရှိန်နှုန်းဖြင့် ရွှေ့ပြောင်းလိုက်ခြင်း ဖြစ်သည်။

ယင်ကျန်းက ပြင်းထန်သော ကန်ချက်တစ်ခုကြောင့် လွင့်ထွက်သွားခဲ့ရသည်။

ဟင်...

ဝူဟုန်က တွေးလိုက်မိသည်။ ထိုချပ်ဝတ်တန်ဆာက စိတ်ဝင်စားစရာ ကောင်းလှသည်။ သူမ၏ တိုက်ကွက်က မည်သည့်ထိခိုက်မှုကိုမျှ မဖြစ်စေခဲ့ချေ။ ထို့အပြင် သူမ၏ စည်းတံဆိပ်မှာလည်း ကျရှုံးခဲ့ရသည်။

သူမက ထိုအရာ၏ စွမ်းအား အနည်းငယ်မျှကိုပင် စည်းတံဆိပ်မခတ်နိုင်ခဲ့ချေ။

ငါ မသိတဲ့ စွမ်းအားလား... မဟုတ်ဘူး၊ ငါ ကံကြမ္မာနဲ့ ကံကောင်းခြင်း စွမ်းအားကို သေချာပေါက် ခံစားမိပါတယ်... ဒါဆိုရင် ဒါက အမည်မသိအသုံးပြုမှုတစ်ခုလား... ဒါမှမဟုတ် ငါ့ရဲ့ အသိစိတ်က မသိလိုက်တဲ့ တစ်ခုခု ရှိနေတာလား...

ဤချပ်ဝတ်တန်ဆာကို ကိုင်တွယ်ရန် အကောင်းဆုံးနည်းလမ်းမှာ ထိုအရာ၏ လျှို့ဝှက်ချက်ကို ဖော်ထုတ်ရန် ဖြစ်ပြီး … အလျင်မြန်ဆုံး အောင်မြင်နိုင်မည့် နည်းလမ်းမှာ ထိုအရာ၏ အစိတ်အပိုင်းတစ်ခုကို ဖျက်ဆီးပြီး အဓိကအချက်ကို လေ့လာခြင်း ဖြစ်၏။

ဝူဟုန်၏ နောက်ကွယ်တွင် ကမ္ဘာတစ်ခု၏ ပုံရိပ် ဖျက်ခနဲ ပေါ်လာပြီးနောက် မဟာယန္တရားများနှင့် ပေါင်းစပ်သွားခဲ့လေသည်။ အဓိက ကမ္ဘာဦးဟွင်သွမ်းနှင့် ဖြစ်၏။

[ကောင်းကင်တာအို၏ စိစစ်မှု]

ဝူဟုန်က သူမ၏ ခန္ဓာကိုယ်ကို ပိုမိုသန့်စင်စေရန်အတွက် နုပျိုသော ဟွင်သွမ်းကမ္ဘာတစ်ခုကို သူမ၏ ခန္ဓာကိုယ်အတွင်း တစ်ကြိမ် ချိတ်ပိတ်ခဲ့ဖူးသည်။ ထိုလုပ်ငန်းစဉ်အတွင်း သူမသည် ပေါ်ထွန်းစ ကောင်းကင်တာအိုကို ထိန်းသိမ်းရန်အတွက် ပိုမိုကြိုးပမ်းခဲ့ပြီး ထိုအရာသည် သူမ ပြုလုပ်ခဲ့သမျှထဲတွင် အကောင်းဆုံးသော ဆုံးဖြတ်ချက် ဖြစ်ပေလိမ့်မည်။

ထိုကောင်းကင်တာအိုသည် အသိပညာများ ရရှိရန်နှင့် သူမအတွက် စည်းတံဆိပ်တာအို မြှင့်တင်ရန်အတွက် အရေးပါသော အခန်းကဏ္ဍမှ ပါဝင်ခဲ့သည်။

ယင်ကျန်းက အန္တရာယ်ကို ခံစားမိသဖြင့် မိုးမြေ၏ မထိုက်တန်မှု ဟူသော ကာကွယ်ရေးကျင့်စဉ်တစ်ခုကို ချက်ချင်း အသုံးပြုလိုက်သည်။ သူ့ခန္ဓာကိုယ်က မိုးမြေကြားရှိ အရာအားလုံးသည် သူ့ကို သက်ရောက်မှုရှိရန် မထိုက်တန်တော့သကဲ့သို့ ထူးဆန်းသော အခြေအနေတစ်ခုအတွင်းသို့ ဝင်ရောက်သွားသည်။

ထိုအရာသည် ကာလံဒေသံ၊ သေခြင်းတရား သို့မဟုတ် အကျိုးအကြောင်းတရားပင် ဖြစ်ပါစေ... အန္တရာယ်ပြုရန် မဆိုထားနှင့် … သက်ရောက်မှုရှိရန်ပင် မထိုက်တန်ကြချေ။

မမြင်နိုင်သော စွမ်းအားတစ်ခုက ဝူဟုန်၏ ခြေလှမ်းကို ပိတ်ဆို့ထားခဲ့သော်လည်း ယာယီမျှသာ ဖြစ်၏။ သူမက အတားအဆီးကို အတင်းဖောက်ထွက်လာတာကြောင့် ယင်ကျန်းအနေနှင့် ခုခံကာကွယ်ဖို့အတွက် လက်မောင်းနှစ်ဖက်ကို အရှေ့မှာ ယှက်ပြီး ကာထားလိုက်ရတော့သည်။

ထို့နောက် သူက ကွဲအက်သံတစ်ခုကို ကြားလိုက်ရပြီး သူ့ချပ်ဝတ်တန်ဆာမှ သေးငယ်သော အစိတ်အပိုင်းတစ်ခု ကွဲထွက်သွားခဲ့၍ အံ့အားသင့်သွားမိသည်။

ဝူဟုန်က ဤအခွင့်အရေးကို လက်လွှတ်မခံဘဲ တိုက်ခိုက်မှုပေါင်းများစွာကို စတင်လိုက်တော့သည်။ ကံဆိုးစွာဖြင့် ပထမဆုံး တိုက်ခိုက်မှုသာလျှင် အစစ်အမှန် ထိခိုက်မှုကို ဖြစ်စေသည်။ သို့သော် သူမ၏ အဓိက ရည်ရွယ်ချက်ကတော့ အောင်မြင်သွားခဲ့လေပြီ။

ပထမဆုံး ကွဲအက်မှုအပြီးနောက်တွင် သူမ၏ ကောင်းကင်တာအိုသည် လက်သီးချက် သို့မဟုတ် ကန်ချက်တစ်ခုစီတိုင်းနှင့်အတူ များစွာသော အချက်အလက်များကို စုဆောင်းနိုင်ခဲ့သည်။

အမည်မသိသမိုင်းကြောင်းနဲ့ ချိတ်ဆက်ထားတဲ့ ချပ်ဝတ်တန်ဆာတစ်ခုပဲ... အဲဒီသမိုင်းကြောင်းကို မသိဘဲနဲ့ ဒဏ်ရာတွေရဲ့ ၉၉.၉၉၉ ရာခိုင်နှုန်းကို ပယ်ဖျက်ပစ်လိမ့်မယ်

ဝူဟုန်က ဆန်းစစ်လိုက်သည်။

ဒီသမိုင်းကြောင်းက ကမ္ဘာမြေပေါ်မှာ သူ ရှိတုန်းက ဖြစ်ရမယ်... ဒါမှမဟုတ် သူ့ရဲ့ ပထမဆုံးဘဝကနေ ဖြစ်ရမယ်

အတွေးများစွာက သူမ၏ စိတ်ထဲတွင် ဖြတ်ပြေးသွားခဲ့သည်။

ကမ္ဘာမြေက ပိုပြီး စိတ်ချရတဲ့ လောင်းကြေးတစ်ခု ဖြစ်လိမ့်မယ်... ဒါပေမဲ့ အခုအချိန်မှာတော့ သူက ဝမ်ဝေ့ရဲ့ ဇစ်မြစ်ကို ရိပ်မိနေလောက်ပြီ ဆိုတော့ သူ့ရဲ့ သံသယစိတ်က ဒီလိုမျိုး ဖြစ်နိုင်ခြေရှိတဲ့ အားနည်းချက်ကို ခွင့်ပြုမှာ မဟုတ်ဘူး...

ဒါဆိုရင် သူ့ရဲ့ ဒုတိယမြောက်ဘဝပဲ ကျန်တော့တယ်... သူက ပြန်လည်ဝင်စားခြင်း မတိုင်ခင်မှာ ချင်တိုင်းပြည်ကို ဖျက်ဆီးပစ်ခဲ့ပြီး သမိုင်းကြောင်းကို အဓိကထား သုတ်သင်ပစ်ခဲ့တယ်...

ဒါပေမဲ့ အချို့အရာတွေကို ဖျက်ဆီးလို့မရဘူး... ဥပမာအနေနဲ့ ချင်မင်းဆက်နဲ့ ပတ်သက်နေတာ ဒါမှမဟုတ် ပိုင်ချီလို လူမျိုးတွေ ရှိနေသေးတယ်ဆိုတဲ့ အချက်ပဲ

ထိုအချက်အလက်အနည်းငယ်မျှဖြင့် ဝူဟုန်အတွက် အမည်မသိသမိုင်းကြောင်းနှင့် ပတ်သက်သည့် အမှန်တရားအချို့ကို အကျိုးအကြောင်းဆင်ခြင်ရန်အတွက် လုံလောက်ပေသည်။ သူမတွင် လုံလောက်သော အသိပညာရှိနေသရွေ့ ထိုချပ်ဝတ်တန်ဆာကို စည်းတံဆိပ်ခတ်ခြင်းမှာ ငှက်ပျောသီးအခွံခွာရသည်ထက်ပင် ရိုးရှင်းလိမ့်မည်။

ထို့နောက် သူမက ပိုမိုများပြားသော ကွဲအက်မှုများကို ဖန်တီးရန်နှင့် ပိုမိုများပြားသော အနှစ်သာရများကို ဖမ်းဆုပ်ဖို့ ကြိုးပမ်းရင်း တိုက်ခိုက်မှုမှာ ပိုမိုပြင်းထန်လာခဲ့သည်။

ယင်ကျန်းက မျက်မှောင်ကြုတ်လိုက်သည်။ ဝူဟုန်တစ်ယောက်တည်းက သူမ၏ ပြိုင်ဘက်ကို နားလည်ရန် ကြိုးပမ်းနေသည့်သူ မဟုတ်ချေ။ သူက ဤတိုက်ပွဲအတွင်းသို့ မည်သည့်ပြင်ဆင်မှုမျှမရှိဘဲ ဝင်ရောက်လာခဲ့ခြင်း မဟုတ်ချေ။

ထိုအရာမှာ မာနထောင်လွှားခြင်း ဖြစ်ပေလိမ့်မည်။ ယင်ကျန်းကမူ ယုံကြည်ချက် ရှိနေခဲ့သည်။ တိုက်ပွဲအစတွင် သူက စည်းတံဆိပ်များကို အတင်းအကြပ် ဖောက်ထွက်ရန်အတွက် စွမ်းအားများ ပေါက်ကွဲစေသည့် နည်းဗျူဟာကို စမ်းသပ်ခဲ့သော်လည်း ဤချဉ်းကပ်မှုက အလုပ်မဖြစ်ခဲ့ချေ။

ထို့နောက် သူက စည်းတံဆိပ်ကို ဖော်ထုတ်ရန်နှင့် သူ့တိုက်ခိုက်မှုများကို ထုတ်ဖော်နိုင်စေရန်အတွက် အစစ်အမှန်စိတ်ဆန္ဒ ကျင့်စဉ်ကို အသုံးပြုရန် ကြိုးပမ်းခဲ့သော်လည်း အလုပ်မဖြစ်ခဲ့ချေ။ ထို့ကြောင့် ယင်ကျန်းက ပေါက်ကွဲမှုနှင့် အစစ်အမှန်စိတ်ဆန္ဒ အသုံးချမှုတို့ကို ပေါင်းစပ်ရန် ကြိုးစားခဲ့သည်။

ထိုအရာမှာ သီးခြားလုပ်ဆောင်မှုများထက် ပိုမိုအောင်မြင်ခဲ့သော်လည်း ဝူဟုန်က သူ၏ ကျင့်စဉ်ကို တန်ပြန်ရန်အတွက် သူမ၏ ကိုယ်ပိုင် အစစ်အမှန်စိတ်ဆန္ဒ စွမ်းရည်ကို အသုံးပြုခဲ့သဖြင့် ဤနည်းဗျူဟာမှာလည်း ကျရှုံးခဲ့ရပြန်သည်။

နောက်ဆုံးတွင် ယင်ကျန်းက ဤတိုက်ပွဲအတွက် အကောင်းဆုံးသော နည်းဗျူဟာကို စမ်းသပ်လိုက်တော့သည်။ ဤသည်မှာ စွမ်းရည်များကို ဆင့်ကဲပြောင်းလဲစေခြင်း ဖြစ်၏။

ဝူဟုန်၏ စည်းတံဆိပ်တာအို သော့ချက်မှာ သူမ၏ ကျယ်ပြန့်လှသော အသိပညာပင် ဖြစ်၏။ သူမသည် မည်သည့်ကျင့်စဉ်မဆို အားနည်းချက် သို့မဟုတ် အနှစ်သာရကို ပစ်မှတ်ထားနိုင်လေသည်။

ထို့ကြောင့် ချက်ချင်း စည်းတံဆိပ်ခတ်နိုင်သည့် အကျိုးသက်ရောက်မှုကို ရရှိစေသည်။ သို့သော် အကယ်၍ စွမ်းရည်များသည် အမြဲတမ်း ဆင့်ကဲပြောင်းလဲနေလျှင် သို့မဟုတ် အလျှင်းသင့်သလို ပြောင်းလဲနေလျှင် သူမ၏ စည်းတံဆိပ်များသည်လည်း အထိုက်အလျောက် ဆင့်ကဲပြောင်းလဲရန် လိုအပ်ပေလိမ့်မည်။

သူမတွင် ထိုကဲ့သို့သော စွမ်းဆောင်ရည်များ ရှိကြောင်း ယင်ကျန်းအနေနှင့် သံသယမရှိခဲ့ချေ။ သို့သော် ဤကဲ့သို့သော စည်းတံဆိပ်အမျိုးအစား၏ အားနည်းချက်မှာ သက်လုံကို ကုန်ခမ်းစေလေ၏။ အထူးသဖြင့် ဆင့်ကဲပြောင်းလဲမှု သို့မဟုတ် လိုက်လျောညီထွေဖြစ်အောင် လုပ်ဆောင်မှုတစ်ခုစီတိုင်းအကြားတွင် အနည်းငယ်မျှသော ရပ်တန့်မှုတစ်ခု ရှိနေခြင်းလေသည်။

အကယ်၍ သူသာ ထိုဟာကွက်ကို အသုံးပြုနိုင်လျှင် သူ့တိုက်ခိုက်မှုအများစုမှာ သူမ၏ ကာကွယ်ရေးကို ကျော်လွှားနိုင်လိမ့်မည်။

ယင်ကျန်းက ဤသီအိုရီကို ချက်ချင်းပင် စမ်းသပ်လိုက်ရာ ရလဒ်များကို ချက်ချင်း မြင်တွေ့လိုက်ရသည်။ သူတို့ ထိပ်တိုက်တွေ့ဆုံကြစဉ်မှာပင် သူ့တိုက်ခိုက်မှုအများစုမှာ သူ့ခန္ဓာကိုယ်မှ ထွက်ခွာပြီး သူမ၏ ကာကွယ်ရေးနယ်ပယ်သို့ ရောက်ရှိနိုင်ခဲ့သဖြင့် သူမအတွက် ပိတ်ဆို့ရန်နှင့် အခြားနည်းလမ်းများကို အသုံးပြုဖို့ ဖိအားဖြစ်စေသည်။

သို့သော် ခဏမျှ စောင့်ကြည့်ပြီးနောက်တွင် သူက တစ်စုံတစ်ခုကို သဘောပေါက်သွားပြီး သူ့ကိုယ်သူ အကွာအဝေးတစ်ခု ခြားစေလိုက်သည်။

"မင်းက ဒီလောက်အထိ တိုက်ခိုက်မှုတွေ အများကြီး လုပ်ပြီးတာတောင်မှ ချောမွေ့ပြီး ထိန်းချုပ်ထားနိုင်တဲ့ အသက်ရှုနှုန်းနဲ့ ပြီးပြည့်စုံနေတုန်းပဲ" ယင်ကျန်းက မှတ်ချက်ပြုလိုက်သည်။

"ဒါက အချက်တစ်ခုတည်းကိုပဲ ဆိုလိုတာ... သာလွန်အုတ်မြစ်ပဲ"

" ရှင်က ရှင်တစ်ယောက်တည်းပဲ ရှိတယ်လို့ ထင်နေတာလား" ဝူဟုန်က တည်ငြိမ်စွာ ပြန်လည်ဖြေကြားလိုက်သည်။

အခန်း (၁၆၁၂) : ကံကြမ္မာ၏ မျက်နှာသာပေးမှု

ယင်ကျန်းက မျက်မှောင်ကြုတ်လိုက်ပြီး ပြောလိုက်သည်။

“မှန်တယ်... မင်းရဲ့ပါရမီက ကမ္ဘာကြီးတစ်ခုလုံး မနာလိုစရာပဲ။ ပြီးတော့ မင်းက ကံကောင်းမှုရဲ့ သမီးတော်တစ်ယောက်လည်း ဖြစ်နေတာဆိုတော့ မင်း ဒီအဆင့်အထိ ရောက်နေတာကို ငါ အံ့သြမနေသင့်တော့ဘူး။ ဒါပေမဲ့ ဒါက ဘာကိုမှ ပြောင်းလဲပစ်နိုင်မှာမဟုတ်ဘူး”

“ရှင် အဲလိုထင်ရင်လည်း ဟုတ်တာပေါ့”

ဝူဟုန်က တည်ငြိမ်စွာ ပြန်ပြောလိုက်သည်။ သူမ တိုက်ပွဲကို ပြန်စရန် ပြင်လိုက်စဉ်မှာပင် တစ်စုံတစ်ခုကို ရုတ်တရက် အာရုံခံမိသွားပြီး အဝေးသို့ လှမ်းကြည့်လိုက်မိသည်။ စုန့်လုလီ ရှုံးနိမ့်သွားခဲ့လေပြီ။

“လဲ့ဖေးချီ ထွက်သွားလိမ့်မယ်လို့ မထင်ထားခဲ့ပေမဲ့ ကံကြမ္မာက ငါ့အတွက် မျက်နှာသာပေးလိုက်တဲ့ပုံပဲ”

ယင်ကျန်းက ပြုံးကာ ပြောလိုက်သည်။

ဝူဟုန်က အံ့သြမမိပေ။ စုန့်လုလီနှင့် ပိုင်ချီကြားရှိ ကွာဟချက်က အလွန်ကြီးမားလွန်းလှသဖြင့် သူမအနေဖြင့် အနည်းငယ်မျှ ပိုပြီး တောင့်ခံနိုင်ရန်သာ မျှော်လင့်ခဲ့ခြင်း ဖြစ်သည်။ စိတ်မကောင်းစရာမှာ အမြွှာနှစ်ယောက်ထဲက မည်သူ့ကို ရွေးချယ်စေကာမူ ရလဒ်က အတူတူပင် ဖြစ်နေလိမ့်မည်။

ဝူဟုန်က စိတ်ထဲမှ တိုးတိုးလေး သက်ပြင်းချလိုက်မိသည်။ ယခု ရှုံးနိမ့်မှုက သူမ၏ ကုန်းမြေအခြေခံအုတ်မြစ်သည် အားအနည်းဆုံးထဲတွင် ပါဝင်နေသေးကြောင်း နှိုးဆော်လိုက်ခြင်းပင် ဖြစ်ပြီး လဲ့ဖေးချီ ထွက်ခွာသွားခြင်းကြောင့် အခြေအနေက ပို၍ ဆိုးဝါးသွားခဲ့ရသည်။ ကံကောင်းထောက်မစွာဖြင့် သူမတွင် ပြုစုပျိုးထောင်ရေးအမြုတေ ရှိနေသေးသလို လဲလှယ်ရေးစာရင်းကြောင့်လည်း အမြွှာနှစ်ယောက်က လျင်မြန်သောနှုန်းဖြင့် ကြီးထွားလာနိုင်ပေမည်။

“ဒါ ငါ ခံစားနေရတာ စိုးရိမ်စိတ်လား”

“ငါက ဘာလို့ စိုးရိမ်ရမှာလဲ” ဝူဟုန်က တည်ငြိမ်စွာ ပြောလိုက်သည်။

“တကယ်လား ... မင်း ပိုင်ချီကို ဘယ်လိုတားမလဲဆိုတာ ငါ သိချင်လှပြီ” ယင်ကျန်းက လှောင်ပြုံး ပြုံးလိုက်သည်။

“ငါ့လူက အဲဒီမှာ ရှိနေတာပဲ မဟုတ်လား”

“အဲဒီကောင်စုတ်လေးကလား… သူက ဘာလုပ်နိုင်မှာလဲ” ယင်ကျန်းက နှာခေါင်းရှုံ့လိုက်သည်။

“ရှင် မကြာခင် သိရမှာပါ”

ဝူဟုန်က စကားဆက်ပြောချင်စိတ် မရှိတော့ပေ။ သူမက သင်္ကေတပိုင်နက်စွမ်းရည်ကို အသက်သွင်းလိုက်သည်။ သူမက ယင်ကျန်း၏ ရှေ့သို့ ကူးသန်းပြောင်းရွေ့သွားပြီး သူမ၏ လက်ဆစ်ပေါ်တွင် ထွင်းထုထားသော ဖျက်ဆီးခြင်းသင်္ကေတဖြင့် သူ့ကို ထိုးနှက်လိုက်သည်။ ယခု တိုက်ခိုက်မှုတွင် အသန့်စင်ဆုံးသော ဖျက်ဆီးခြင်းပုံစံသာမက ဝူဟုန်၏ ထိတ်လန့်ဖွယ်ကောင်းသော စွမ်းအားမှ ထွက်ပေါ်လာသည့် ခွန်အားများလည်း ပါဝင်နေသည်။

စည်းမျဉ်းပယ်ဖျက်ခြင်း

စွမ်းအားပယ်ဖျက်ခြင်း

ယင်ကျန်းက မိုးမြေကို လွှမ်းမိုးချုပ်ကိုင်လိုက်ပြီး လက်တွေ့ကမ္ဘာကြီးကို သူ၏ အလိုဆန္ဒအတိုင်း ကွေးညွတ်သွားစေရန် ဖိအားပေးလိုက်သည်။ ပိုင်နက်ကို ပယ်ဖျက်ရန် ကြိုးပမ်းနေရင်း သူ့ခန္ဓာကိုယ်မှ အမည်မသိ စွမ်းအားတစ်ခု လျှံထွက်လာခဲ့သည်။

သို့သော်လည်း ထိုစွမ်းအားနှင့်အတူ ပယ်ဖျက်ခြင်းသင်္ကေတက ရုပ်လုံးပေါ်လာပြီး ဝူဟုန်က လက်တစ်ချက် ဝေ့ယမ်းရုံမျှဖြင့် ထိုအကျိုးသက်ရောက်မှုကို ထိန်းချုပ်ကာ ဖျက်သိမ်းပစ်လိုက်သည်။

ဘုန်း…

ထိုလက်သီးချက်က ယင်ကျန်းကို အလင်းနှစ်အနည်းငယ်အကွာအဝေးအထိ တွန်းထုတ်သွားပြီး သူ့ချပ်ဝတ်ပေါ်တွင် လက်နှစ်ချောင်းစာခန့် အက်ကွဲကြောင်းတစ်ခု ပြန့်နှံ့သွားသည်ကို မြင်လိုက်ရသဖြင့် သူ ထိတ်လန့်သွားခဲ့သည်။

သူမက ချပ်ဝတ်ရဲ့ လျှို့ဝှက်ချက်ကို ဒီလောက်မြန်မြန် သိသွားတာလား.. တောက်..

မိမိ၏ တာအိုကို အသိပညာအပေါ် အခြေခံထားသော လူတစ်ယောက်အနေဖြင့် ယခုလို သိရှိသွားနိုင်သည်ကို သူ မျှော်လင့်ထားခဲ့သော်လည်း သူ့အတွက် အချိန်ပိုရလိမ့်ဦးမည်ဟု ထင်မှတ်ခဲ့မိလေသည်။

စည်းမျဉ်းကပ်ဘေး

ယင်ကျန်း၏ ပတ်ပတ်လည်တွင် စွမ်းအင်လုံးပေါင်း သုံးထောင်ရှစ်ရာ ရုပ်လုံးပေါ်လာပြီး တစ်ခုချင်းစီက အခြေခံ မဟာတာအိုအရင်းအမြစ်တစ်ခုစီကို ကိုယ်စားပြုနေကြသည်။ ထိုစွမ်းအင်လုံးများ ပေါင်းစပ်သွားကာ ချေမှုန်းဖျက်ဆီးခြင်း စွမ်းအားတစ်ခုကို ထုတ်လွှတ်လာသည်။ ထိုစွမ်းအားသည် ကြမ်းတမ်း၍ ဖရိုဖရဲဆန်လှသဖြင့် အဖျက်စွမ်းအားဂုဏ်သတ္တိကို ပိုမိုမြင့်တက်သွားစေသည်။

သို့သော်လည်း ထိုစွမ်းအား ပြန့်နှံ့သွားပြီး အစစ်အမှန် ပျက်သုန်းခြင်းကို မဖြစ်စေခင် ထိုအရာတို့သည် ကောင်းမွန်စွာ ထိန်းချုပ်ထားသော သင်္ကေတပေါင်း ၃၈၀၀ အဖြစ်သို့ ပြိုကွဲပျက်စီးသွားသည်။

ယင်ကျန်းက ထိုရလဒ်ကြောင့် အံ့သြမမိပေ။ အစောကတည်းက ရှိနေသော သူ့အစီအစဉ်မှာ ဝူဟုန်အနေဖြင့် သင်္ကေတပေါင်း သုံးထောင်ကျော်ကို ခွဲခြမ်းစိတ်ဖြာပြီး အမျိုးအစားခွဲခြားကာ ထိန်းချုပ်နေရစဉ်အတွင်း သူမ၏ အရှိန်ကို နှေးကွေးသွားစေရန် ဖြစ်သည်။

နန်းတွင်းအကြံပေးကြီးက အခြားတိုက်ပွဲသို့ ဝင်ရောက်ပူးပေါင်းသွားပြီဖြစ်ကြောင်း အာရုံခံမိလိုက်သည့်အချိန်တွင် သူက နောက်ဆက်တွဲ တိုက်ခိုက်မှုကို ထုတ်လွှတ်ရန် ပြင်ဆင်လိုက်သည်။

ဒီနေ့ ကံကြမ္မာက ငါ့ဘက်မှာ တကယ်ပဲ ရှိနေတာပဲ

ယင်ကျန်းက ဝမ်းသာအားရ တွေးတောရင်း သူ့တိုက်ကွက်ကို ပြောင်းလဲလိုက်သည်။

ခံစားချက်လှုံ့ဆော်ကြိုးကိုင်ခြင်း - စိုးရိမ်ပူပန်မှု မြှင့်တင်ခြင်း

သူက ကံကောင်းမှုနှင့် ကောင်းကင်ဘုံ သတ်မှတ်ထားသော အုပ်ချုပ်သူ/ဧကရာဇ်ကို ကိုယ်စားပြုသည့် နဂါးကို လှည့်စားခြင်း/ထိန်းချုပ်ခြင်းနှင့် ကြမ္မာတို့ဖြင့် ပေါင်းစပ်ထားသည့် ထူးခြားသော တာအိုတစ်ခုဖြစ်သည့် နဂါးဧကရာဇ်တာအိုကို ကျင့်ကြံထားလေသည်။

သမိုင်းမတိုင်မီကမ္ဘာ၌ပင် ယင်ကျန်းက နဂါးကို အလွန်အမင်း စွဲလမ်းခဲ့ပြီး သူ့ဘွဲ့အမည်များထဲမှ တစ်ခုကို ရှေးဟောင်းနဂါးဟု အမည်တွင်စေရန် အမိန့်ပေးခဲ့ဖူးသည်။ ထို့ကြောင့် သူ လူဝင်စားလာသောအခါတွင် သူ၏ ရည်မှန်းချက်ကို အကောင်အထည်ဖော်ရန် အခွင့်အရေးကို ဆုပ်ကိုင်ခဲ့ပြီး ထိုအရာကို သူ့ပင်မလမ်းစဉ်အဖြစ် ရွေးချယ်ခဲ့လေသည်။

ဝူဟုန်၏ အကြည့်ထဲတွင် စိုးရိမ်စိတ် အနည်းငယ် ဖြတ်ပြေးသွားသော်လည်း သူမ၏ ကိုးဘုံမျှော်နန်းဆောင်ငယ်က သူမ၏ အသိစိတ်ပင်လယ်ထဲသို့ တည်ငြိမ်ခြင်းသင်္ကေတတစ်ခု ထုတ်လွှတ်ပေးလိုက်သဖြင့် စိတ်ကို အလွယ်တကူပင် ငြိမ်းချမ်းသွားစေသည်။

သူမက ဝမ်ဝေ့ထံသို့ တိုက်ရိုက် ဆက်သွယ်ကာ သတင်းစကား ပေးပို့လိုက်သည်။

“နောက်ဆုံးအဆင့် အကာအကွယ်ပုံစံကို အသက်သွင်းလိုက်တော့”

ထိုစကားများကို ပြောဆိုပြီး သတင်းအချက်အလက် ပေးပို့ရန်အတွက် စက္ကန့်၏ အပိုင်းအစမျှသာ ကြာမြင့်ခဲ့သော်လည်း ယခုကဲ့သို့ မြင့်မားသောအဆင့်ရှိ တိုက်ပွဲတစ်ခုတွင်မူ ယခုအချိန်က လုံလောက်သည်ထက်ပင် ပိုနေသေးသည်။

အံ့ဖွယ်ပြစ်ဒဏ်ပေးခြင်း အခွင့်အာဏာ

ကောင်းကင်ယံတွင် ထူထပ်သော ခရမ်းရောင်တိမ်တိုက်တစ်ခု ရုပ်လုံးပေါ်လာပြီးနောက် ကြီးမားလှသော ကမ္ဘာဦးစမ်းသပ်ချက် မိုးကြိုးတန်းတစ်ခုကို ထုတ်လွှတ်လိုက်သည်။ တစ်နေရာတည်းကို စုစည်းထားသော တိုက်ခိုက်မှုသည် မိုးမြေ၏ အမျက်ဒေါသအားလုံးကို သယ်ဆောင်လာပြီး ရင်ဆိုင်ဝံ့သူ မှန်သမျှကို အမြစ်ပြတ်ချေမှုန်းရန် ကြိုးပမ်းလာခြင်း ဖြစ်၏။ ကံမကောင်းစွာဖြင့် ထိုအရာသည် မိမိ၏ တည်ရှိမှုကို စိန်ခေါ်နိုင်စွမ်းရှိသော လူတစ်ယောက်နှင့် ထိပ်တိုက်တွေ့သွားခဲ့ရသည်။

ကမ္ဘာကြီးကို ပိတ်ဆို့ခြင်း

ဝူဟုန်က လက်ကို မြှောက်လိုက်ပြီး ထိုမိုးကြိုးတန်းနှင့် တိမ်တိုက်တို့ကို ချက်ချင်း ဝါးမြိုပစ်လိုက်သည့် အနက်ရောင်ကုဗတုံးတစ်ခုကို ဖန်တီးလိုက်သည်။ သူမက ယင်ကျန်း၏ ပတ်ပတ်လည်တွင် ပို၍ သေးငယ်သော ကုဗတုံးပေါင်း ထောင်ချီကို ဖန်တီးရန် လက်ဖျောက်တီးလိုက်သော်လည်း ယင်ကျန်းက အန္တရာယ်ကို ကြိုတင်ခံစားမိသွားကာ ချက်ချင်းပင် ထွက်ပြေးလွတ်မြောက်သွားသည်။

သို့သော်လည်း ဝူဟုန်က သူ့ထက် ခြေလှမ်းအနည်းငယ် ပိုစောနေ၏။ အနက်ရောင်ကုဗတုံးနှင့် ဆက်သွယ်ထားသော ကံကြမ္မာကြိုးတစ်မျှင် ထွက်ပေါ်လာပြီး သူမက သူ့ကို ဆွဲငင်လိုက်သည်။

ယင်ကျန်းက ထိုကြိုးကို ဖြတ်တောက်ပစ်ရန် အချိန်မီ တုံ့ပြန်နိုင်ခဲ့သော်လည်း သူ့လုပ်ရပ်ကြောင့် ဝှက်ထားသော အေးခဲခြင်းသင်္ကေတ တစ်ခု အသက်ဝင်လာသည်။ သူ့ခန္ဓာကိုယ်သည် တစ်စက္ကန့်ပင်မပြည့်သော အချိန်မျှ ရပ်တန့်သွားခဲ့သော်လည်း ကုဗတုံးများထဲမှ တစ်ခုက သူ့ကို ဝါးမြိုပစ်ရန်အတွက် လုံလောက်သွားခဲ့သည်။

ထို့နောက် အခြားကုဗတုံးများက ပေါင်းစပ်သွားကာ ပိုမိုကြီးမားသော ပုံသဏ္ဍာန်တစ်ခုအဖြစ်သို့ ပြောင်းလဲသွားခဲ့ပြီး ယင်ကျန်း၏ အိပ်မက်ဆိုးကြီး စတင်ရာ ဖြစ်လာတော့သည်။

ဤကုဗတုံးများသည် ရိုးရိုးပိတ်ဆို့ခြင်းများသာ မဟုတ်ဘဲ သတ်ဖြတ်ရန်အတွက် သီးသန့်ပုံစံထုတ်ထားပြီး လွတ်မြောက်နိုင်စွမ်းမရှိသည့် ထူးခြားသော ကမ္ဘာငယ်လေးများ ဖြစ်ကြသည်။ ပထမဆုံးသော ပိတ်ဆို့ခြင်းကမ္ဘာတွင် ကမ္ဘာဦးလေပြင်းတစ်ခု ပါဝင်နေသည်။

ဟွင်သွမ်းကမ္ဘာအများစု၏ ကမ္ဘာဦးစမ်းသပ်ချက်များသည် မိုးကြိုးပုံသဏ္ဍာန်ဖြင့် ရုပ်လုံးပေါ်လာတတ်သော်လည်း အချို့ကမူ အခြားသော ဓာတ်ကြီးများကို အသုံးပြုကြသည်။

ဝူဟုန်က ထိုဓာတ်ကြီးများထဲမှ တစ်ခုကို ဖမ်းယူခဲ့ပြီး ဤကမ္ဘာကို တည်ဆောက်ရန် အသုံးပြုခဲ့ခြင်း ဖြစ်သည်။

ယင်ကျန်းက ထိုကျိန်စာသင့်လေပြင်းများထဲမှ လွတ်မြောက်ရန်အတွက် သူ့ကိုယ်သူ အနက်ရောင်နဂါးတစ်ကောင်အဖြစ် ပြောင်းလဲပေးသည့် အဆင့် ၆ မဟာယန္တရားစွမ်းရည်ကို အသုံးပြုခဲ့သော်လည်း ပို၍ အန္တရာယ်များသော နေရာတစ်ခုသို့ ရောက်ရှိသွားကြောင်း သိလိုက်ရသဖြင့် ထိတ်လန့်သွားရသည်။

လေဟာနယ်မီးတောက်မှ ဖန်တီးထားသော မီးတောက်ပင်လယ်ကြီးတစ်ခုက သူ့ဦးခေါင်းထက်တွင် ပေါ်ထွက်လာသည်။ ထို့အပြင် ထိုလေဟာနယ်ဆိုသည်မှာ ဟင်းလင်းပြင်သဘောတရားမျိုး မဟုတ်ဘဲ ဗလာနတ္ထိစွမ်းအားမှ လာသောအရာ ဖြစ်၏။

ချင်ဧကရာဇ်သည် သူမ ထိုမီးတောက်ကို ဖန်တီးခဲ့သည်လား သို့မဟုတ် တစ်နေရာရာမှ ရှာဖွေတွေ့ရှိခဲ့သည်လား ဆိုတာ မသိရှိသော်လည်း ထိုကိစ္စရပ်က အရေးမကြီးပေ။

သူ့စိတ်ထဲတွင် ရှိနေသော တစ်ခုတည်းသောအရာမှာ လွတ်မြောက်ရန်သာ ဖြစ်၏။ ငွေဖြူရောင် မီးတောက်ပင်လယ်ကြီးက မီးတောက်ရေစက်များကို စတင်ထုတ်လွှတ်လာသဖြင့် ယင်ကျန်းတစ်ယောက် နှလုံးခုန်မြန်သွားမိသည်။

ယင်ကျန်း၏ လက်ဖဝါးထက်တွင် နဂါးငယ်လေးတစ်ကောင် ရုပ်လုံးပေါ်လာ၏။ အစပိုင်းတွင် ထိုအရာက သုညဟူသော စာလုံးကို ဖန်တီးလိုက်ပြီးနောက် လျင်မြန်စွာ မြင့်တက်လာခဲ့သည်။

၀... ၁... ၂... ၄၅... ၇၈... ၉၃... ၁၀၀

ဝူဟုန်ကဲ့သို့သော တည်ရှိမှုမျိုးက ဖန်တီးထားသည့် နည်းစနစ်တစ်ခုက ချို့ယွင်းချက်ရှိနေပြီး လွတ်မြောက်ရန် လမ်းစတစ်ခု ချန်ထားခဲ့ဖို့ ဖြစ်နိုင်ခြေမှာ မည်မျှရှိမည်နည်း။ အဖြေမှာ အလွန်တရာ နည်းပါးလှသဖြင့် သုညပင် ဖြစ်နိုင်သည်။

သို့သော်လည်း ကံကောင်းမှုနှင့် ဖြစ်နိုင်ခြေကို ထိန်းချုပ်နိုင်စွမ်းရှိသော ပုဂ္ဂိုလ်အားလုံးကဲ့သို့ပင် ဤကိန်းဂဏန်းများသည် သူတို့အတွက် ဘာအဓိပ္ပာယ်မှ မရှိပေ။

ယင်ကျန်း ရှေ့တွင် လေဟာနယ်အက်ကွဲကြောင်းတစ်ခု ပေါ်လာသည့်အခါ သူက တွေဝေမနေဘဲ အထဲသို့ အပြေးအလွှား ဝင်ရောက်သွားခဲ့သည်။ သို့သော်လည်း ယခုကဲ့သို့ ကြီးမားလှသော စွမ်းအားကို ဆန့်ကျင်ပြီး ဖြစ်နိုင်ခြေကို ဤမျှအထိ နှောင့်ယှက်ဖျက်ဆီးခဲ့ခြင်း၏ တန်ပြန်သက်ရောက်မှုကြောင့် ပြင်းထန်သောပေါက်ကွဲမှုတစ်ခု ဖြစ်ပေါ်လာခဲ့ပြီး ယင်ကျန်းအား သူ့ချပ်ဝတ်ပေါ်တွင် လက်ဖျံတစ်ဖက်စာခန့် ရှည်လျားသော အက်ကွဲကြောင်းကြီးနှင့်အတူ အခြားသော ပိတ်ဆို့ခြင်းကမ္ဘာတစ်ခုထဲ လွှင့်ထုတ်ပစ်လိုက်တော့သည်။

ယင်ကျန်းက သူ့ပတ်ဝန်းကျင်ကို စူးစမ်းရန်အတွက် ပေါက်ကွဲမှုကြောင့် ဖြစ်ပေါ်လာသော မူးဝေနောက်ကျိမှုကို လျင်မြန်စွာ မောင်းထုတ်လိုက်သည်။ သူက အလင်းရောင် အားနည်းလှသော နေရာတစ်ခုတွင် ရောက်ရှိနေပြီး သူ့ရှေ့တွင် ဖောက်ထွင်းမြင်ရသော တည်ရှိမှုတစ်ခု ရပ်နေသည်။

သူ့ကို ပြုံး၍ ကြည့်နေသော ထိုသူစိမ်းသည် မိမိနှင့် တစ်ပုံစံတည်း တူညီသော ရုပ်သွင်နှင့် ခန္ဓာကိုယ်ပုံသဏ္ဍာန် ရှိနေကြောင်း သတိပြုမိရန် သူကိုယ်တိုင် ခေတ္တမျှ အချိန်ယူလိုက်ရသည်။ ထို့နောက် သူက ထိုသူ့ကို လှမ်းကြည့်လိုက်သည်နှင့် တစ်ပြိုင်နက် ယင်ကျန်းက ပုံရိပ်ယောင်တစ်ခုထဲ ကျဆင်းသွားခဲ့တော့သည်။

သူက ပျက်စီးယိုယွင်းနေသော မဟာချင်တိုင်းပြည်၏ အပျက်အစီးများပေါ်တွင် ဒူးထောက်နေပြီး ဟုန်ကျွင်းက သူ့ကို အေးစက်စွာ လှောင်ပြုံး ပြုံးပြနေသည်ကို မြင်လိုက်ရသည်။ ထို့နောက် ဟုန်ကျွင်းက သူ၏ ဝိညာဉ်ကို ဆွဲထုတ်လိုက်ပြီး အာဟာရအဖြစ် သန့်စင်ပစ်လိုက်သည်။

ယင်ကျန်းက အကြောက်တရားဖြင့် လွှမ်းမိုးခံလိုက်ရသဖြင့် အော်ဟစ်လိုက်မိသည်။ ထိုပုံရိပ်ယောင်က အလွန်အမင်း ပြင်းထန်လှသဖြင့် သူ့ဝိညာဉ်ကိုပါ စတင်ထိခိုက်လာခဲ့သည်။

ကံကောင်းထောက်မစွာဖြင့် သူ့စိတ်ဓာတ်နှင့် ဝိညာဉ် ပြိုလဲပျက်စီးတော့မည့်အချိန် သူ့အသိစိတ်ပင်လယ်ထဲ နဂါးဟိန်းသံတစ်ခု ပျံ့နှံ့သွားသည်။

ယင်ကျန်း အသိပြန်ဝင်လာသောအခါတွင် မိမိရှေ့က လူသည် နှလုံးသားနတ်ဆိုး ဖြစ်ကြောင်း အသိအမှတ်ပြုလိုက်မိသည်။ အတိအကျပြောရလျှင် သူက ယခုကဲ့သို့ အဆုံးစွန်သော သွေးဆောင်ဖြားယောင်းမှု သတ္တဝါကြီးအဖြစ်သို့ ပြောင်းလဲရန် နှလုံးသားနတ်ဆိုးပေါင်း ရာချီ သို့မဟုတ် ထောင်ချီပေါင်းစပ်ကာ ဖန်တီးထားခြင်း ဖြစ်၏။

ယခုကဲ့သို့ တည်ရှိမှုမျိုးသည် တာအိုစိတ်နှလုံးသားကို လေ့ကျင့်ရန်အတွက် အကောင်းဆုံးနည်းလမ်း ဖြစ်သော်လည်း လက်နက်တစ်ခုအဖြစ် အသုံးပြုလာလျှင်မူ အိပ်မက်ဆိုးကြီးတစ်ခု ဖြစ်လာပေလိမ့်မည်။

“ထွက်သွားစမ်း”

ယင်ကျန်းက ဟိန်းဟောက်လိုက်သည်။ သူ့ခန္ဓာကိုယ်မှ ဗုဒ္ဓ၏ သန့်စင်သောစွမ်းအား အနည်းငယ် ပါဝင်နေသည့် အဖြူရောင်အလင်းတန်းတစ်ခု ထွက်ပေါ်လာပြီး အထွတ်အထိပ် နှလုံးသားနတ်ဆိုးကို လူစုခွဲပစ်လိုက်သည်။

“မဆိုးပါဘူး”

ဤကမ္ဘာ၏ အရပ်မျက်နှာအားလုံးမှ အသံတစ်ခု ပဲ့တင်ထပ်လာခဲ့သည်။

“ဘာပဲဖြစ်ဖြစ် ငါတို့အလုပ်ကို ဆက်လုပ်ကြရအောင်... ရှင့်မှာ ကြောက်ရွံ့မှုတွေနဲ့ မယုံကြည်မှုတွေ အများကြီး ရှိနေတာပဲ... အဲဒါတွေက ဘာကြောင့်လဲဆိုတာကို ငါတို့ ဆွေးနွေးကြည့်ရင် ဘယ်လိုလဲ”

ယင်ကျန်းက လေဟာနယ်ထဲ ယိုင်တိုင်တိုင်ဖြစ်သွားသည်။ သူ့စိတ်ဓာတ်ကို လျင်မြန်စွာ ဖျက်ဆီးနေသည့် ထိတ်လန့်ဖွယ်ကောင်းသော စွမ်းအားတစ်ခုကို သူ အာရုံခံမိလိုက်သည်။

သူ၏ ကြောက်ရွံ့မှုများနှင့် စိုးရိမ်ပူပန်မှုများကို ချဲ့ထွင်လိုက်ပြီး သူ့ကို ပြန်လည်တိုက်ခိုက်ရန် အသုံးပြုနေခြင်း ဖြစ်သည်။

တောက်.. နင် ဒါအတွက် ပြန်ပေးဆပ်စေရမယ်

ဘုန်း..

သူ့ဦးခေါင်းထက်တွင် ရွှေရောင်ခန္ဓာတစ်ခု ရုပ်လုံးပေါ်လာသည်နှင့်အမျှ သူ့ခန္ဓာကိုယ်မှ ရွှေရောင်အလင်းတန်းတစ်ခု ထွက်ပေါ်လာခဲ့သည်။ ယင်ကျန်းက ကုသိုလ်ရွှေရောင်ခန္ဓာကို (ပထမအဆင့်သာ ရှိသေးသော်လည်း) ကျင့်ကြံထားခြင်း ဖြစ်၏။

မကောင်းမှုကို မောင်းထုတ်နိုင်သည့် ပညာရှိဝိဇ္ဇာ၏ စွမ်းအားကြောင့် ယင်ကျန်းက ပိုမိုကြည်လင်ပြတ်သားလာခဲ့ပြီး သူ့အခြေအနေကို ခွဲခြမ်းစိတ်ဖြာကာ လွတ်မြောက်ရေးအစီအစဉ်တစ်ခုကို တွေးတောနိုင်ခွင့် ရရှိသွားလေသည်။

ငါ ဒီပိတ်ဆို့ခြင်းကနေ လွတ်မြောက်နိုင်မယ့် နည်းလမ်း နှစ်ခုပဲ ရှိတယ်။ ဆွဲသီးကို သုံးတာ ဒါမှမဟုတ် ငါ့ရဲ့ ချပ်ဝတ်ကို ပေါက်ကွဲထွက်စေတာပဲ

သူက ပတ်ပတ်လည်ကို စူးစမ်းလိုက်ပြီး အချက်အလက် အနည်းငယ်ကို ဂမ္ဘီရစွမ်းရည်ဖြင့် တွက်ချက်လိုက်သည်။

ချပ်ဝတ်တစ်ခုတည်းနဲ့တော့ ဖောက်ထွက်ဖို့ မလောက်ဘူး

သူ့အတွက် ရွေးချယ်စရာ တစ်ခုတည်းသာ ကျန်ရစ်စေတော့သည်။ သို့သော်လည်း ယင်ကျန်းက မိမိ၏ ဝှက်ဖဲကို ယခုကဲ့သို့ စောစောစီးစီး အသုံးပြုရန် ဖိအားပေးခံလိုက်ရသဖြင့် မွန်းကျပ်မှုကို ခံစားလိုက်ရသည်။

သို့သော်လည်း သူက ပြတ်ပြတ်သားသားဖြင့် ဆုံးဖြတ်ချက်တစ်ခု ချလိုက်သည်။ သူ လှုပ်ရှားရန် ပြင်လိုက်စဉ်မှာပင် ထိတ်လန့်ဖွယ်ကောင်းသော စွမ်းအားတစ်ခုက အဆုံးမဲ့တက်လှမ်းခြင်းကမ္ဘာတစ်ခုလုံးတွင် ပျံ့နှံ့လာခဲ့ပြီး စံပြအဆင့်များမှလွဲ၍ ကမ္ဘာကြီးတစ်ခုလုံးသည် ကျန်လူတိုင်းအတွက် အလုပ်မလုပ်တော့ဘဲ ရပ်တန့်သွားခဲ့သည့်ပုံပေါ်သည်။

ယင်ကျန်းက အဖြစ်အပျက်ကို မသိရှိသော်လည်း လွတ်မြောက်ရန်အတွက် ဤအခွင့်အရေးကို အသုံးချခြင်းမှ မတားဆီးနိုင်ပေ။