အခန်း ၂၂၁

အပိုင်း ၂၂၁

ဘာသာပြန် - Author Ko Yoohtoo

True Immortal Team

နေရာကူးပြောင်းခြင်း တံခါးပေါက်ကို ဖြတ်သန်းပြီးနောက် ကျောက်ဝေ၏ ပတ်ဝန်းကျင်ရှိ ရှုခင်းများသည် ချက်ချင်း ပြောင်းလဲသွားသည်။ သူသည် ဘေးပတ်ဝန်းကျင်ကို စူးစမ်းလိုစိတ်ဖြင့် လိုက်လံကြည့်ရှုလိုက်သည်။

မကြာမီ ထိုနေရာသည် သူနှင့် ရင်းနှီးပြီးသားဖြစ်သော သေခြင်းနယ်မြေ ဖြစ်နေသည်ကို တွေ့လိုက်ရသဖြင့် အလွန်အမင်း တုန်လှုပ်ချောက်ချားစွာ ရေရွတ်လိုက်သည်။ "အရှင်မင်းကြီး... ကမ်းရိုးတန်းပြည်နယ်ကလည်း သွေးနက်မျိုးနွယ်တွေရဲ့ လက်ချက်နဲ့ ကျဆုံးသွားပြီလား။"

လင်းချန်က တည်ငြိမ်စွာ ရှင်းပြလိုက်သည်။ "ဒီနေရာက ငါ အရင်က နေခဲ့တဲ့ ဂိုဏ်းတစ်ခုပါ... ဒီလိုလုပ်သွားတာက လုရှန်တာကလွဲပြီး တခြားသူ မဟုတ်နိုင်ဘူး။ ငါ မူလပြည်နယ်ထဲ ဝင်သွားတုန်းက နည်းနည်း စိတ်ပူနေခဲ့မိတာ... ဘာလို့လဲဆိုတော့ ငါတို့ ရင်ဆိုင်ရမှာက သေခြင်းရှင်ခြင်း နယ်ပယ်က ပညာရှင်တစ်ယောက် ဖြစ်နေလို့ပဲ။ အဲဒါက တော်တော်လေး ဒုက္ခပေးနိုင်ပြီး ကိုင်တွယ်ရ ခက်ခဲလိမ့်မယ်။ မထင်မှတ်ထားတာက သူ မူလပြည်နယ်ထဲ ဝင်သွားပြီးတဲ့နောက်မှာ သွေးနက်မျိုးနွယ် တော်ဝင်မိသားစုရဲ့ ဘိုးဘေးခန္ဓာကိုယ်ကို ရသွားပေမဲ့... နောက်ဆုံးတော့ သူ့သေတွင်း သူတူးကာ အဆုံးသတ်သွားပြီလေ။"

ဤအကြောင်းကို တွေးမိပြီး လင်းချန် အသံထွက်အောင် ရယ်မောလိုက်မိသည်။ အခြေအနေများ၏ ပြောင်းလဲမှုသည် မထင်မှတ်ထားလောက်အောင် ချောမွေ့နေခဲ့သည်။

လင်းချန် သက်ပြင်းတစ်ချက်ချကာ ရေရွတ်လိုက်၏။ "နှစ်နှစ်တောင် ကုန်ဆုံးသွားပြီပဲ... ကမ်းရိုးတန်းပြည်နယ်ရဲ့ လက်ရှိအခြေအနေ ဘယ်လိုရှိနေပြီလဲ မသိဘူး။"

မူလပြည်နယ်နှင့် ကမ်းရိုးတန်းပြည်နယ်ကို ပြန်လည်ဆက်သွယ်နိုင်ရန် ကမ္ဘာငယ်လေး တစ်ခုလုံးကို ပိတ်ဆို့ထားရန် လိုအပ်ခဲ့ရာ ပြင်ပကမ္ဘာမှ သတင်းအချက်အလက်များကို ရရှိနိုင်ခြင်း မရှိတော့ပေ။ ကမ်းရိုးတန်းပြည်နယ်ရှိ စစ်သင်္ဘောများနှင့်လည်း ဆက်သွယ်၍ မရနိုင်တော့ချေ။

ထို့ကြောင့် လင်းချန်သည် စိတ်ကိုနှစ်ကာ ကျင့်ကြံခြင်းကိုသာ အာရုံစိုက်ခဲ့သည်။ သူ၏ ဆရာသခင် ရှိနေသည့်အပြင် စစ်သင်္ဘောများပေါ်တွင်လည်း စစ်သည်သောင်းချီ ကျန်ရှိနေသေးသဖြင့် သူတို့၏ ဘေးကင်းရေးအတွက် စိတ်ပူစရာမလိုဟု ယုံကြည်ထားခဲ့ခြင်း ဖြစ်၏။

သို့သော် မကြာမီ သူ၏ အတွေးများ မှားယွင်းကြောင်း လင်းချန် နားလည်လိုက်ရတော့သည်။

ယခင်က လေထဲတွင် ရပ်တန့်ထားခဲ့သော စစ်သင်္ဘောကြီးသည် ယခုအခါ အရိပ်အယောင်မျှပင် မတွေ့ရတော့ဘဲ မြေပြင်ပေါ်တွင်မူ စစ်သင်္ဘော၏ အပျက်အစီးများကို လင်းချန် တွေ့လိုက်ရ၏။ အပျက်အစီးများ၏ အနေအထားအရ စစ်သင်္ဘောသည် တိုက်ခိုက်ခံရ၍ ပျက်စီးသွားခြင်း မဟုတ်ဘဲ ကိုယ့်ကိုယ်ကိုယ် ဖျက်ဆီးခဲ့ခြင်းဖြစ်ကြောင်း လင်းချန် အကဲခတ်မိလိုက်သည်။

လင်းချန်က ပြောလိုက်သည်။ "မင်း ဒီမှာပဲ နေခဲ့။"

စကားဆုံးသည်နှင့် တစ်ပြိုင်နက် သူသည် နေရာမှ ပျောက်ကွယ်သွားပြီး ကျောက်ဝေတစ်ယောက်တည်းသာ ကျန်ရစ်ခဲ့သည်။

အင်ပါယာထဲ ရောက်ပြီးနောက် လင်းချန်သည် ကျူးကော့မင်၏ ရှေ့မှောက်သို့ ချက်ချင်း ရောက်ရှိသွားသည်။ လင်းချန်သည် မျက်မှောင်ကို တင်းတင်းကြပ်ကြပ် ကြုတ်လျက် ကျူးကော့မင်ကို တဲ့တိုးပင် မေးမြန်းလိုက်သည်။ "ကမ်းရိုးတန်းပြည်နယ်မှာ ဘာတွေဖြစ်တာလဲ... ဘာလို့ စစ်သင်္ဘောတစ်စီးက ကိုယ့်ကိုယ်ကိုယ် ဖျက်ဆီးထားရတာလဲ။ ဘာကြောင့် ဒီကိစ္စကို ငါ့ဆီ အစီရင်ခံစာ မတင်ခဲ့တာလဲ။"

လင်းချန်၏ မေးခွန်းကို ကြားရသည့်အခါ ကျူးကော့မင်သည် ကြိုတင်မျှော်လင့်ထားပုံရပြီး ဒူးထောက်ကာ လျှောက်တင်လိုက်သည်။ "အရှင်မင်းကြီး... အရှင်မင်းကြီး အဆင့်တက်ဖို့ အရေးကြီးနေတဲ့ အချိန်ဖြစ်နေလို့ ကျွန်တော်မျိုး အနှောင့်အယှက် မပေးရဲခဲ့ပါဘူး... ဒါ့အပြင် အခြေအနေက သိပ်ပြီး ဆိုးရွားတာမရှိလို့ အစီရင်ခံစာ မတင်ခဲ့တာပါ။"

ထို့နောက် ကျူးကော့မင်သည် အဖြစ်အပျက် အလုံးစုံကို လင်းချန်အား အသေးစိတ် ရှင်းပြလေ၏။

လွန်ခဲ့သည့် တစ်လကျော်ခန့်က ရှန်ထျန်ဂိုဏ်းသည် လက်ရှိ ဓားနတ်ဘုရားဂိုဏ်း၊ မဟာလှံတံဂိုဏ်း၊ သားရဲသခင်ဂိုဏ်း၊ ပန်းပဲမီးလျှံဂိုဏ်းနှင့် ဂမ္ဘီရနတ်ဆေးဂိုဏ်းတို့နှင့် ပူးပေါင်းကာ နတ်ဓားဂိုဏ်းနှင့် အနီးနားရှိ ကမ်းရိုးတန်းဂိုဏ်းကို စစ်ကြေညာခဲ့သည်။

ထိုမျှကြီးမားသော အင်အားစုကြီးကို မြင်ရသည့်အခါ ကမ်းရိုးတန်းဂိုဏ်း၏ ဂိုဏ်းချုပ် ဟိုင်ရှောင်ယွင်သည် ချက်ချင်း ဘက်ပြောင်းသွားပြီး နတ်ဓားဂိုဏ်းကို တိုက်ခိုက်မည့် အင်အားစုများနှင့် ပူးပေါင်းသွားခဲ့သည်။

ဒေါသထွက်သွားသော ချင်ဝူရွှမ်သည် လင်းချန် ပေးအပ်ထားခဲ့ဖူးသော သိုလှောင်လက်စွပ်ကို ဟိုင်ရှောင်ယွင်ထံမှ ပြန်လည်တောင်းဆိုခဲ့၏။ သို့သော် ဟိုင်ရှောင်ယွင်သည် ထိုပစ္စည်းမရှိကြောင်း ပြောင်ငြင်းဆိုခဲ့သဖြင့် ချင်ဝူရွှမ်မှာ ဒေါသတကြီး အပြစ်တင် ကြိမ်းမောင်းခဲ့ရသည်။

နောက်ဆုံးတွင် မူလက လူအင်အား ရာဂဏန်းမျှသာရှိသော နတ်ဓားဂိုဏ်းသည် ကမ်းရိုးတန်းပြည်နယ်ရှိ ကျန်ရှိသော အင်အားစုများကို ရင်ဆိုင်ရတော့သည်။

ထိုအချိန်၌ ကျူးကော့မင်သည် လင်းချန် ပြန်မရောက်လာသေးသရွေ့ တစ်စုံတစ်ရာ မလုပ်ဆောင်ရန် ဆုံးဖြတ်ခဲ့သည်။ ထို့ကြောင့် ရန်သူ့တပ်ဖွဲ့ကြီး စတင်တိုက်ခိုက်လာသည့်အခါ ကျူးကော့မင်သည် စစ်သင်္ဘောတစ်စီးကို စွန့်လွှတ်ရန် အမိန့်ပေးခဲ့ပြီး ကိုယ့်ကိုယ်ကိုယ် ဖျက်ဆီးစေကာ ရန်သူကို ခြိမ်းခြောက်ခဲ့သည်။

ကျူးကော့မင်၏ ဆုံးဖြတ်ချက်သည် အလွန်ထိရောက်ခဲ့ပြီး တစ်ဖက်ရန်သူများကို အထိနာစေခဲ့၏။ ကျန်ရှိသော စစ်သင်္ဘောလေးစီးသည် ကမ်းရိုးတန်းပြည်နယ်၏ ကုန်းမြေမှ ထွက်ခွာကာ ပင်လယ်ပြင်ဘက်သို့ ရှောင်တိမ်းနေခဲ့ကြပြီး မည်သည့် တုံ့ပြန်မှုကိုမျှ မပြုလုပ်ခဲ့ပေ။

အရာအားလုံးသည် လင်းချန် ပြန်လာမည့်အချိန်ကို စောင့်ဆိုင်းနေခြင်းသာ ဖြစ်သည်။ အရှင်မင်းကြီး မူလပြည်နယ်မှ ပြန်ရောက်လာသည်နှင့် အရာအားလုံးကို ကိုင်တွယ်ဖြေရှင်းနိုင်မည်ဟု ကျူးကော့မင် သိထားသောကြောင့် ဖြစ်သည်။

ကျူးကော့မင်၏ အစီရင်ခံစာကို ကြားပြီးနောက် လင်းချန်သည် ကျေနပ်အားရစွာ ခေါင်းညိတ်လိုက်သည်။ "ကောင်းတယ်... မင်းရဲ့ ကိုင်တွယ်ဖြေရှင်းပုံကို ငါသဘောကျတယ်... မင်းမှာ အပြစ်မရှိစေရဘူး... ထတော့။"

ကျူးကော့မင်သည် ကြမ်းပြင်မှ အလျင်အမြန် ထလိုက်ပြီး လင်းချန်အပေါ် ကျေးဇူးတင်စိတ်များဖြင့် မျက်ရည်များပင် ဝဲလာရသည်။ သူက ပြောလိုက်၏။ "ကျေးဇူးကြီးလှပါတယ် အရှင်မင်းကြီး။ ဒါပေမဲ့ အရှင်မင်းကြီး... ကျွန်တော်မျိုး အလျင်စလို မလုပ်ဆောင်ခဲ့ရတဲ့ နောက်ထပ် အကြောင်းပြချက် နှစ်ချက် ရှိပါသေးတယ်။"

ကျူးကော့မင် ဦးညွှတ်နေသည်ကို မြင်လိုက်ရသောအခါ လင်းချန် ပေါ့ပါးစွာ ရယ်မောလိုက်သည်။ "ပထမအချက်ကိုတော့ ငါမှန်းဆကြည့်လို့ရတယ်... ကမ်းရိုးတန်းပြည်နယ်ကို တရားဝင် ဒုတိယမြောက် မူလပြည်နယ်အဖြစ် ပြောင်းလဲပစ်ဖို့မလား။"

ကျူးကော့မင် ရယ်မောကာ ပြန်ဖြေလိုက်၏။ "မှန်လှပါ အရှင်မင်းကြီး။ သူတို့က အရင်စတိုက်ပြီး အခုဆို ကမ်းရိုးတန်းပြည်နယ်တစ်ခုလုံးကို သိမ်းပိုက်ထားပြီးပါပြီ... ဒီအချိန်ဆို ရှန်ထျန်ဂိုဏ်းက သေချာပေါက် ဘဝင်မြင့်နေလောက်ပါပြီ။ ရှန်ထျန်ဂိုဏ်းရဲ့ စိတ်နေသဘောထားကိုလည်း ကျွန်တော်မျိုး စုံစမ်းပြီး နားလည်ထားပြီးသားပါ။ အချိန်တစ်ခု ကြာလာတဲ့အခါ ရှန်ထျန်ဂိုဏ်းနောက်ကို လိုက်ခဲ့တဲ့သူတွေ နောင်တရလာကြပါလိမ့်မယ်... ရှန်ထျန်ဂိုဏ်းက သူတို့ကို ပေးထားခဲ့တဲ့ ကတိတွေဟာ ဟာသသက်သက်ပဲဆိုတာ တွေ့ရှိလာကြမှာပါ။ အဲဒီအချိန်ရောက်ရင် ရှန်ထျန်ဂိုဏ်းက လူထုထောက်ခံမှု ဆုံးရှုံးသွားမှာဖြစ်ပြီး ကျွန်တော်တို့ရဲ့ တန်ပြန်တိုက်စစ်က တရားမျှတမှု ရှိလာပါလိမ့်မယ်... အဲဒီအခါကျမှ အရှင်မင်းကြီးက ကမ်းရိုးတန်းပြည်နယ်ကို တရားဝင် သိမ်းပိုက်လိုက်မယ်ဆိုရင် အားလုံးက ယုတ္တိရှိသွားပါလိမ့်မယ်။"

ဤသည်မှာ ကျူးကော့မင်၏ အစီအစဉ်ပင် ဖြစ်သည်။ နတ်ဓားဂိုဏ်းသည် အရှင်မင်းကြီးအတွက် ဆရာသခင် ဝေဝူရွှမ်နောက်သို့ လိုက်ပါရန် ယာယီတည်းခိုရာ နေရာတစ်ခုမျှသာ ဖြစ်၏။ သူတို့ဘက်မှ ကျင့်ဝတ်အရ လုပ်သင့်သည်များ လုပ်ပေးခဲ့ပြီးပြီ ဖြစ်သည်။ နတ်ဓားဂိုဏ်းအတွက် သက်သက်နှင့်တော့ ရှန်ထျန်ဂိုဏ်းကို စစ်ခင်းစရာ မလိုချေ။

သို့သော် ရှန်ထျန်ဂိုဏ်းနှင့် စစ်ပွဲသည် ရှောင်လွှဲ၍မရသလို အနိုင်ရဖို့လည်း သေချာနေသည်။ ထို့ကြောင့် ထိုမတိုင်ခင် အရှင်မင်းကြီးအတွက် အကျိုးအမြတ် အများဆုံးရအောင် မည်သို့လုပ်ရမည်နည်း ဆိုသည်ကို ကျူးကော့မင် ထည့်သွင်းစဉ်းစားခဲ့ခြင်း ဖြစ်၏။

လင်းချန်က မေးလိုက်သည်။ "ဒုတိယအချက်ကရော ဘာလဲ။"

ကျူးကော့မင် ဆက်လက်ရှင်းပြသည်။ "ရှန်ထျန်ဂိုဏ်းဘက်က အပေါ်ယံ မြင်ရသလောက် ရိုးရှင်းပုံမရပါဘူး... သူတို့နောက်ကွယ်မှာ ကျောထောက်နောက်ခံ ပေးထားသူ ရှိနေပုံရပါတယ်။ ဒီလို မရေရာမှုတွေ ရှိနေတာကြောင့် အရှင်မင်းကြီး ပြန်မရောက်လာခင် ကျွန်တော်မျိုး အလျင်စလို မတိုက်ခိုက်ရဲခဲ့တာပါ... အရှင်မင်းကြီး ပြန်ရောက်လာပြီး ဆုံးဖြတ်ချက်ချဖို့ စောင့်ဆိုင်းနေခဲ့တာ ဖြစ်ပါတယ်။"

စကားဆုံးသွားသည်နှင့် ကျူးကော့မင်သည် သုံးလှမ်းဆုတ်ကာ ခါးကိုကိုင်းလျက် နှုတ်ဆိတ်နေလိုက်သည်။

လင်းချန်လည်း တိတ်ဆိတ်သွားပြီး မျက်ဝန်းထဲ၌ အံ့ဩရိပ်များ ဖြတ်ပြေးသွား၏။ ကျူးကော့မင် ပြောသလိုဆိုလျှင် ထိုကိစ္စမျိုး တကယ်ရှိလာနိုင်ပေသည်။

ရှန်ထျန်ဂိုဏ်းကို နောက်ကွယ်ကနေ ဘယ်သူက ပံ့ပိုးပေးနေသနည်း။ သွေးနက်မျိုးနွယ် လုရှန်တာကတော့ မူလပြည်နယ်ရှိ သွေးနက်ခန်းမထဲတွင် စမ်းသပ်ပစ္စည်းတစ်ခု ဖြစ်သွားခဲ့ပြီ ဖြစ်သည်။ ဒါဆိုလျှင် ရှန်ထျန်ဂိုဏ်း၌ တခြားသူများ၏ အကူအညီများ ရှိနေသေးသည်လော။ သူတို့၏ လျှို့ဝှက်လက်နက်များမှာ သွေးနက်မျိုးနွယ် လုရှန်တာနှင့် အကြီးအကဲ ယွမ်ဝူကျီတို့ နှစ်ယောက်တည်း မဟုတ်ဘူးလော။

လင်းချန်သည် ခေတ္တမျှ တွေးတောပြီးနောက် ကျူးကော့မင်ကို မေးလိုက်သည်။ "အခြေအနေကြည့်ပြီး ဆက်လုပ်ကြတာပေါ့... အခု စစ်သင်္ဘောတွေ ဘယ်နေရာမှာ ရှိနေလဲ။"

ကျူးကော့မင်က စစ်သင်္ဘောများ ရှိနေသည့် လက်ရှိတည်နေရာကို လင်းချန်အား ချက်ချင်း တင်ပြလိုက်သည်။

တည်နေရာ အချက်အလက်ကို ရရှိပြီးနောက် လင်းချန်သည် ဟွာရှာအင်ပါယာထဲမှ ထွက်ခွာလာခဲ့ပြီး အပြင်ဘက်ရှိ ကျောက်ဝေနှင့် ပြန်လည်ဆုံတွေ့ကာ ကျူးကော့မင် ပြောပြသည့် အရပ်မျက်နှာဆီသို့ ပျံသန်းသွားလေသည်။

ကမ်းရိုးတန်းပြည်နယ် ကုန်းမြေမှ ထွက်ခွာလာပြီး ကျယ်ပြောလှသော မဟာသမုဒ္ဒရာကြီးကို မြင်လိုက်ရသည့်အခါ ဤကဲ့သို့ မြင်ကွင်းမျိုးကို တစ်ခါမျှ မမြင်ဖူးသော ကျောက်ဝေသည် အံ့ဩတကြီး ရေရွတ်မိ၏။ "ဒါကို ပင်လယ်လို့ ခေါ်တာလား... တကယ်ကို အဆုံးအစမဲ့ ကျယ်ပြောလှတာပဲ။"

ပင်လယ်ပြင်အတွင်း တစ်နာရီကျော်ကြာအောင် ပျံသန်းလာပြီးနောက် ကျောက်ဝေသည် ရှေ့ကို လက်ညှိုးထိုးပြပြီး အော်ဟစ်လိုက်သည်။ "အရှင်မင်းကြီး... ဟိုမှာ ကြည့်လိုက်ပါဦး။"

လင်းချန် တိတ်ဆိတ်စွာ ခေါင်းညိတ်လိုက်ပြီး ဆိုသည်။ "တွေ့ပြီ။"

သူတို့၏ ရှေ့မလှမ်းမကမ်း လေထုထဲတွင် ရပ်တန့်နေသော စစ်သင်္ဘောလေးစီးကို တွေ့လိုက်ရသည်။

ပြိုင်ဘက်ကင်း အင်ပါယာ။ အပိုင်း ၂၂၁ ပြီး။

ဘာသာပြန် - Author Ko Yoohtoo

True Immortal Team

ပြိုင်ဘက်ကင်း အင်ပါယာ။