အခန်း ၅၂၇

အခန်း (၅၂၇) - တစ်ဖက်နယ်မြေ၌ တယ်လီပို့ တည်နေရာ ကူးပြောင်းစက် တည်ဆောက်ခြင်းနှင့် ချိတ်ဆက်မိခြင်း ၃

ချင်ယွန်ဟုနှင့် နှိုင်းယှဉ်လိုက်လျှင် ချင်ယွန်လုံက ပို၍ ရင့်ကျက်တည်ငြိမ်သည့် ပုံစံရှိပေသည်။

အမှန်တော့ သူသည် အဖွဲ့ထဲတွင် အသက်အကြီးဆုံးသူ ဖြစ်ပြီး အသက်သုံးဆယ်ဝန်းကျင်ခန့်သာ ရှိသေးသော်လည်း အပြောအဆိုနှင့် အမူအရာများက အတော်လေး တည်ကြည်လှ၏။

"ရော့ အစ်ကိုရှင်း၊ ဒါ မင်းရဲ့လက်ကောက်။"

ကျောက်ရှောင်ချွမ်းက အာကာသလက်ကောက်ကို ပြန်ပေးလာသည်။

ရွှီရှင်းက လက်ကောက်ကို ယူကာ လက်ကောက်ဝတ်တွင် ပြန်ဝတ်လိုက်ပြီးနောက် ပြောလိုက်၏။

"သွားကြရအောင်။ ဝမ်ကွေ့ရှင်းရဲ့ သစ်ပင်အိမ်ဆီ အမြန်ဆုံး ရောက်မှ ဖြစ်မယ်။ ကူးပြောင်းစက်ကို အဲဒီမှာ ချထားလိုက်ရင် ငါတို့ကိုးယောက်လုံး တကယ် အိမ်နီးချင်းတွေ ဖြစ်သွားပြီ။"

"ဒီနေ့ကို ငါ အကြာကြီး စောင့်နေခဲ့တာ။"

ချင်ယွန်လုံက ရယ်မောလိုက်လေသည်။

"ငါတို့နယ်မြေမှာ လူချင်းတွေ့ဖို့တောင် တစ်ခါတလေ နေ့တစ်ပိုင်းလောက် ခရီးနှင်ရတယ်။ မင်းတို့လို မနက်စာတောင် အတူတူ ထိုင်စားနိုင်တဲ့ အခြေအနေမျိုးကိုတော့ အားကျမိနေတာ။"

လူအားလုံး မြေကျင်းအစွန်းဘက်သို့ ဦးတည်လျှောက်သွားခဲ့ကြ၏။

ထိုအချိန်တွင် မြေပြင်ပေါ်ရှိ ခရမ်းနက်ရောင် မှော်မျဉ်းကြောင်းများမှာလည်း အလယ်ဗဟိုဆီသို့ တဖြည်းဖြည်း ပြန်လည်စုပြုံဝင်ရောက်သွားပြီး မကြာမီ ပျောက်ကွယ်သွားခဲ့၏။

မြေကျင်းအစွန်းသို့ ရောက်သည်နှင့် ရွှီရှင်းက ပေါ့ပါးစွာ ခုန်လိုက်လေသည်။

သူ၏ ခန္ဓာကိုယ်မှာ ငါးမီတာကျော်မြင့်သော မြေကျင်းအပေါ်သို့ တိုက်ရိုက် ရောက်သွားခဲ့၏။

ခုန်ပျံနိုင်သော အထူးစွမ်းရည်၏ သက်ရောက်မှုက ရှိနေဆဲ ဖြစ်သောကြောင့်ပင်။

"ဝါး"

"ဒါ..."

ချိတ်ကြိုးများ ထုတ်နေသော လူသုံးယောက်စလုံး အံ့ဩသွားကြခဲ့၏။

ငါးမီတာကျော်မြင့်သည့် အကွာအဝေးကို ကိရိယာမလိုဘဲ တစ်ချက်တည်း ခုန်တက်နိုင်သည်ဆိုသည်မှာ သာမန်လူသားတစ်ယောက်၏ စွမ်းရည် မဟုတ်တော့ပေ။

သူတို့သုံးယောက်လည်း ချိတ်ကြိုးများကို ပစ်လွှတ်ကာ ကျောက်နံရံကို အားပြုပြီး အပေါ်သို့ တက်လာကြရသည်။

"အစ်ကိုရှင်း၊ အဲဒီစွမ်းရည်က ဘာကြီးလဲဗျ။ အရမ်းမိုက်တာပဲ"

ကျောက်ရှောင်ချွမ်းက မျက်လုံးအရောင်တောက်လျက် မေးလိုက်၏။

"ဒီလောက်လည်း မဟုတ်ပါဘူး။"

ရွှီရှင်းက ပြုံးရင်း စကိတ်ဘုတ်ကို ကျောပိုးအိတ်ထဲမှ ထုတ်လိုက်လေသည်။

ထို့နောက် မြေကျင်းရှိရာဘက်သို့ လှည့်ကြည့်လိုက်၏။

ခရမ်းနက်ရောင် အလင်းတိုင်ကြီးမှာ ကောင်းကင်ကို ထိုးဖောက်လျက် အဝေးရှိ နယ်မြေ ၁၈၈ နှင့် ချိတ်ဆက်နေဆဲပင် ဖြစ်သည်။

သူ၏ မြေပုံစနစ်တွင်လည်း ပတ်ဝန်းကျင်တစ်ခုလုံး မှောင်မည်းနေ၏။

ဤနေရာသည် သူ မရောက်ဖူးသေးသော နယ်မြေအသစ်ဖြစ်သောကြောင့် မြေပုံဒေတာ မရှိသေးခြင်းပင်။

မိနစ်ပိုင်းအတွင်း ကီလိုမီတာထောင်ချီ ဝေးကွာသော နေရာသို့ ရောက်လာနိုင်ခဲ့ခြင်းမှာ ယခုတိုင် မယုံနိုင်စရာကောင်းနေဆဲပင်။

သူကစူးစမ်းရှာဖွေသူများ ချန်နယ်ထဲတွင် မိမိ ဘေးကင်းစွာ ရောက်ရှိလာကြောင်း သတင်းပို့လိုက်ပြီးနောက် စကိတ်ဘုတ်ကို စတင်မောင်းနှင်လိုက်၏။

ဝမ်ကွေ့ရှင်း၏ သစ်ပင်အိမ်သို့ သွားရပေမည်။

နှစ်မိနစ်ပင် မကြာလိုက်။

အဖွဲ့သားအားလုံး သတ်မှတ်ထားသော နေရာသို့ ရောက်ရှိသွား၏။

ဝမ်ကွေ့ရှင်း၏ သစ်ပင်အိမ်မှာ လီဝမ်ရှီးနှင့် ချီရွှယ်ဖေးတို့၏ သစ်ပင်အိမ်များကဲ့သို့ သုံးထပ်မြင့် အပြာရောင်အဆင့် သစ်ပင်အိမ်ကြီး ဖြစ်ပေသည်။

သို့သော် ကွာခြားချက်တစ်ခုတော့ ရှိ၏။

အိမ်ပတ်လည်တစ်ခုလုံးကို ထင်းရှူးပင်ကြီးများက ဝန်းရံထား၏။

ဆီးနှင်းများ ဖုံးလွှမ်းနေသော်လည်း ထင်းရှူးပင်များက စိမ်းစိုသန်စွမ်းနေဆဲဖြစ်ရာ ပတ်ဝန်းကျင်တစ်ခုလုံးကို အသက်ဝင်နေသည့် ခံစားချက် ပေးစွမ်းနေခဲ့ပေသည်။

သစ်ပင်အိမ်ကြီးပတ်လည်တွင် ကပ်ပါးသစ်ပင်အိမ် လေးလုံးကိုလည်း တွေ့လိုက်ရသည်။

ထိုအချိန်၌ ကပ်ပါးသစ်ပင်အိမ်တစ်လုံး၏ ပြတင်းပေါက်မှ လူတစ်ယောက် ခေါင်းပြူထွက်လာကာ ၎င်းတို့ကို ကြည့်လိုက်၏။

ချင်ယွန်လုံတို့ကို မြင်သည်နှင့် လက်ကိုဝှေ့ယမ်းကာနှုတ်ဆက်လိုက်သော်လည်း ရွှီရှင်းကိုတော့ စူးစမ်းသည့် မျက်ဝန်းများဖြင့် တစ်ချက်သာ ကြည့်လိုက်ပြီး အိမ်ထဲသို့ ပြန်ဝင်သွားခဲ့သည်။

ဝမ်ကွေ့ရှင်းသည် ကပ်ပါးသစ်ပင်အိမ်များစွာ ပိုင်ဆိုင်ထားပြီး လက်အောက်ခံ ရှင်ကျန်သူများကိုလည်း အများအပြား စုဆောင်းထားနိုင်ပုံ ရပေသည်။

"မီတာငါးဆယ်အတွင်း ဘယ်နေရာမှာမဆို ချထားလို့ရတယ်လို့ ပြောထားခဲ့တယ် မဟုတ်လား..."

ရွှီရှင်းက မြေကွက်လပ်တစ်ခု ရွေးချယ်လိုက်၏။

ထို့နောက် ကျောပိုးအိတ်ထဲမှ ကူးပြောင်းစက်ကို ထုတ်ယူကာ မြေပြင်ပေါ် ချလိုက်၏။

"ဒုန်း"

ကူးပြောင်းစက်သည် မြေပြင်ပေါ် တည်ငြိမ်စွာ ကျရောက်သွား၏။

"ဒါက ကူးပြောင်းစက်လား..."

ကျောက်ရှောင်ချွမ်းနှင့် အခြားနှစ်ယောက်က အနီးကပ် ကြည့်ရှုနေကြ၏။

"ဟုတ်တယ်။ ဒါကို ငါကလွဲရင် ဘယ်သူမှ အသက်သွင်းလို့ မရဘူး။"

ရွှီရှင်းက ပြောပြီးသည်နှင့် ချက်ချင်း အသက်သွင်းလိုက်၏။

ဝမ်ကွေ့ရှင်း၏ သစ်ပင်အိမ် ဟု အမည်သတ်မှတ်လိုက်သည်နှင့် အမှတ်အသားတစ်ခုလုံး တုန်ခါလာခဲ့၏။

မြေကြီးအတွင်းသို့ အမြစ်တွယ်သလို နစ်ဝင်သွားပြီးနောက် သံမဏိတိုင်ကြီး ငါးတိုင်က မြေပြင်ထဲမှ ထိုးထွက်လာခဲ့လေသည်။

ထိုအချိန်တွင် စနစ်သတိပေးချက်လည်းထွက်ပေါ်လာ၏။

"လီဝမ်ရှီး၏ သစ်ပင်အိမ်"

"ရွှီရှင်း၏ သစ်ပင်အိမ်"

"ကျိချောင်းယန်၏ သစ်ပင်အိမ်"

တည်နေရာများကို အောင်မြင်စွာ ချိတ်ဆက်နိုင်ကြောင်း ပြသနေခဲ့လေသည်။

ကီလိုမီတာ တစ်ထောင်ကျော် ဝေးကွာသည့် အကွာအဝေးကိုပင်...။

သာမန်အခြေအနေတွင် မဖြစ်နိုင်သော ခရီးလမ်းပင် ဖြစ်သည်။

သို့သော် ယခု သူတို့တွင် တယ်လီပို့စနစ် ရှိနေပြီဖြစ်၏။

ရွှီရှင်းက တွေဝေမနေတော့ဘဲ ရွှီရှင်း၏ သစ်ပင်အိမ်ဆိုသည်ကို ရွေးချယ်လိုက်၏။

ချက်ချင်းပင် သံမဏိတိုင်ငါးတိုင်၏ ပတ်ဝန်းကျင်တွင် ခရမ်းနက်ရောင် စွမ်းအင်များ စတင်စုဝေးလာပြီးခရမ်းနက်ရောင် ဝဲဂယက်ကြီးတစ်ခု သူတို့ရှေ့တွင် ပေါ်ထွက်လာခဲ့၏။

အောင်မြင်သွားချေပြီ။

နောက်ဆုံးတွင် သစ်ပင်အိမ်နှစ်ခုကြား တရားဝင် ချိတ်ဆက်မှု အောင်မြင်စွာ တည်ဆောက်နိုင်ခဲ့လေတော့၏။

အခန်း ၅၂၇ ပြီး။