အခန်း ၅၃၆

အခန်း (၅၃၆) - ဒါသာမန်ဥတစ်လုံးမဟုတ်ဘူး ၂

ငွေရောင်ဘုရင်နှင့် မီမီတို့က မီးလင်းဖိုဘေးတွင် တိတ်ဆိတ်စွာ လှဲလျောင်းနေကြ၏။

ရွှီရှင်း ထွက်လာသည်ကို မြင်လိုက်ရသည့်ခဏ ငွေရောင်ဘုရင်က ခေါင်းကိုမော့၍ "အူး..."ဟု အသံတိုးတိုးဖြင့် နှုတ်ဆက်လိုက်၏။

မီမီကတော့ မျက်လုံးကိုသာ ဖွင့်၍ သူ့ကို တစ်ချက်လှမ်းကြည့်ပြီးနောက် ပြန်လည်ငြိမ်သက်သွားခဲ့လေသည်။

အက်ကွဲရာများ ပြည့်နှက်နေသော ထူးဆန်းသည့် ဥကြီးကတော့ မီးလင်းဖိုဘေးတွင် ယခင်အတိုင်း ငြိမ်သက်စွာ ရှိနေဆဲဖြစ်ပြီး ပေါက်လာတော့မည့် အရိပ်အယောင်တစ်စုံတစ်ရာကိုလည်း မတွေ့ရသေးပေ။

ခဲခဲလေးကတော့ ဥကြီးဘေးတွင် ဝပ်နေကာ ၎င်းကို မျက်တောင်မခတ်တမ်း စိုက်ကြည့်နေခဲ့၏။

သူမ၏ ခြေသည်းလေးတစ်ဖက်က မသိမသာ ရှေ့သို့ တိုးသွားပြီး ဥကြီးကို တို့ကြည့်ချင်ဟန် ရှိသော်လည်း မတော်တဆ ခွဲမိမည်ကို စိုးရိမ်သွားပုံရကာ ချက်ချင်းပင် ပြန်ရုပ်သိမ်းလိုက်သည်။

ထိုအချိန်မှာပင် ရွှီရှင်းကို မြင်လိုက်ရသဖြင့် သူမက ခေါင်းလေးကို ချက်ချင်းလှည့်လာပြီး "အီး" ဟု အသံပေးကာ မကျေနပ်သလို တိုင်ကြားလိုက်လေသည်။

၎င်းပုံစံကို ကြည့်ရသည်မှာ လွန်ခဲ့သည့်ခဏက ရွှီရှင်းက သူမကို အိပ်ခန်းအပြင်ဘက်သို့ အတင်းထုတ်ပစ်ခဲ့သည့် ကိစ္စအတွက် မကျေနပ်သေးပုံရ၏။

ရွှီရှင်းက ပြုံးလိုက်ပြီး ခဲခဲလေး၏ နူးညံ့သော မေးစေ့လေးကို အသာအယာ ပွတ်သပ်ပေးလိုက်သည်။

ထို့နောက် သူ၏ အကြည့်က အက်ကွဲရာများဖြင့် ဖုံးလွှမ်းနေသော ဥကြီးဆီသို့ ပြောင်းလဲသွား၏။

ယနေ့တွင် သူ့ထံ၌ သောအကြားအာရုံ စွမ်းရည်မြှင့်တင်မှု မရှိတော့သဖြင့် ဥအတွင်းရှိ သေးငယ်သော သက်ရှိလေး၏ အသက်ရှူသံကိုပင် မကြားနိုင်တော့ပေ။

ထိုအချက်ကြောင့် ရွှီရှင်း၏ စိတ်ထဲတွင် မသိမသာ စိုးရိမ်စိတ်တစ်ခု ပေါ်ပေါက်လာခဲ့သည်။

"တကယ်ပဲ... သေသွားပြီများလား..."

ဥတစ်လုံးလုံး၏ မျက်နှာပြင်တွင် အက်ကွဲရာများဖြင့် ဖုံးလွှမ်းနေသော်လည်း အတွင်းရှိ သက်ရှိလေးကတော့ ယခုထိ အပြင်သို့ မပေါက်ဖွားလာသေးပေ။

အကယ်၍ ၎င်းတွင် အခွံကို ဖောက်ထွက်နိုင်သည့် အင်အားပင် မကျန်တော့ဘူးဆိုလျှင် သူ ဘာလုပ်သင့်သလဲမသိချေ။

သို့သော် အကြောင်းမဲ့သက်သက် ရွှီရှင်း၏ စိတ်ထဲတွင် ဥအတွင်းရှိ သက်ရှိလေးသည် သာမန်မဟုတ်ဘဲ အလွန်အစွမ်းထက်သော သတ္တဝါတစ်ကောင် ဖြစ်မည်ဟု အမြဲယုံကြည်နေခဲ့၏။

မည်သို့ပင်ဖြစ်စေ ၎င်းကို အောင်မြင်စွာ ပေါက်ဖွားလာစေရန် သူ အစွမ်းကုန် ကြိုးစားပေးရမည်။

သို့သော် ဘယ်လိုနည်းနဲ့လုပ်ရမလဲမသိချေ။

"ဟုတ်သားပဲ..."

ရွှီရှင်း၏ မျက်လုံးများ တောက်ပသွား၏။

ဆီးနှင်းတောင်ထိပ်သို့ တက်ခဲ့စဉ်က သူ၏ ကျောပိုးအိတ်ထဲရှိ ဧရာမလူသား၏ စွမ်းအင်အူတိုင် အပိုင်းအစ ကြောင့်သာ ဤဥအတွင်းရှိ သက်ရှိလေးသည် ရုတ်တရက် အသက်ဝင်လှုပ်ရှားလာခဲ့ပြီး ထူးဆန်းသော အသံများကိုပင် ထုတ်ဖော်ခဲ့ဖူးသည် မဟုတ်ပါလား။

ထိုအတွေးပေါ်လာသည်နှင့် ရွှီရှင်းက ကျောပိုးအိတ်အတွင်းမှ စွမ်းအင်အူတိုင် အပိုင်းအစကို ချက်ချင်း ထုတ်ယူလိုက်၏။

ဤအရာသည် ရှေးဦးခေတ် ဧရာမလူသားကြီး၏ စွမ်းအားအနက် အလွန်သေးငယ်သော အစိတ်အပိုင်းတစ်ခုသာ ဖြစ်ပုံရသဖြင့် ထုတ်လွှတ်နိုင်သည့် စွမ်းအားမှာလည်း သူ မျှော်မှန်းထားသလောက် မပြင်းထန်ခဲ့ပေ။

သစ်ပင်အိမ် ကာကွယ်ရေးတိုက်ပွဲအတွင်း တွေ့ကြုံခဲ့ရသည့် အဖြစ်အပျက်များအရ ဤစွမ်းအင်အူတိုင် အပိုင်းအစသည် ဗီဇပြောင်းသတ္တဝါများကို တိုက်ရိုက် သတ်ဖြတ်နိုင်သည့် စွမ်းအားမျိုး မပိုင်ဆိုင်ပေ။

၎င်း၏ စွမ်းအားမှာ သတ္တဝါများ၏ စိတ်အာရုံကို ဖိနှိပ်၍ ထိတ်လန့်ကြောက်ရွံ့စေသော ဖိအားတစ်မျိုးကိုသာ ထုတ်လွှတ်နိုင်ခြင်း ဖြစ်သည်။

ရွှီရှင်းက စွမ်းအင်အူတိုင် အပိုင်းအစကို လက်ဖဝါးထဲသို့ ထုတ်ယူလိုက်သည်နှင့် ၎င်းထံမှ နူးညံ့သော အလင်းရောင်တစ်ခု ဖြာထွက်လာကာ သစ်ပင်အိမ်တစ်ခုလုံးကို ချက်ချင်း လင်းထိန်သွားစေခဲ့သည်။

ထိုအချိန်မှာပင် ရွှီရှင်း၏ မျက်လုံးများ အနည်းငယ် ပြူးကျယ်သွားခဲ့၏။

မီးလင်းဖိုဘေးရှိ ဥကြီးထံမှ နောက်တစ်ကြိမ် ထူးဆန်းသော တုံ့ပြန်မှုတစ်ခု ပေါ်ထွက်လာခဲ့လေသည်။

သို့သော် ထိုတုံ့ပြန်မှုက ဥအတွင်းရှိ သက်ရှိလေးသည် အခွံကို ဖောက်ခွဲပြီး အပြင်သို့ ပေါက်ဖွားလာခြင်းမျိုး မဟုတ်ခဲ့ပေ။

အဲဒီအစား ဥ၏ မျက်နှာပြင်အနှံ့ ဖုံးလွှမ်းနေခဲ့သော အက်ကွဲရာများသည် မျက်စိရှေ့မှာပင် ဖြည်းဖြည်းချင်း ပြန်လည်ပေါင်းစည်းလာပြီး တစ်ခုချင်းစီ ပျောက်ကွယ်သွားခဲ့၏။

ခဏအတွင်းမှာပင် အက်ကွဲရာများဖြင့် ပြည့်နှက်နေခဲ့သော ဥကြီးသည် မူလအတိုင်း ချောမွေ့ပြောင်လက်သည့် အခြေအနေသို့ ပြန်လည်ရောက်ရှိသွား၏။

တစ်ချိန်တည်းမှာပင် ဥအတွင်းမှ"ကရက်... ကရက်..." ဟူသော တိုးဖျော့သည့် အသံများ ဆက်တိုက် ထွက်ပေါ်လာလေသည်။

ထိုအသံက ရွှီရှင်းအတွက် အလွန်ရင်းနှီးလှ၏။

အကြောင်းမှာ ဆီးနှင်းတောင်ထိပ်သို့ ရောက်ရှိခဲ့စဉ်က ဤဥကြီးထံမှ အတိအကျ ထွက်ပေါ်ခဲ့သည့် အသံနှင့် တစ်ထပ်တည်း တူညီနေသောကြောင့် ဖြစ်သည်။

သို့သော် ယခုတစ်ကြိမ်တွင် ပြောင်းလဲနေသည်မှာ ဥအခွံ ကွဲအက်လာခြင်း မဟုတ်ပေ။

စွမ်းအင်အူတိုင် အပိုင်းအစထံမှ ဖြာထွက်နေသော အလင်းရောင်၏ သက်ရောက်မှုအောက်တွင် ဥ၏ မျက်နှာပြင်ပေါ်ရှိ အက်ကွဲရာများက တဖြည်းဖြည်း ပြန်လည်ပေါင်းစည်းကာ အံ့အားသင့်ဖွယ်ကောင်းလောက်အောင် အလိုအလျောက် ပြန်လည်ကောင်းမွန်လာခဲ့ခြင်းသာ ဖြစ်သည်။

သစ်ပင်အိမ်အတွင်းရှိ အပူချိန်မှာလည်း ပုံမှန်အတိုင်း တည်ငြိမ်နေသဖြင့် စွမ်းအင်အူတိုင် အပိုင်းအစသည် ပတ်ဝန်းကျင်ကို နွေးထွေးစေရန် စွမ်းအင်အများအပြား သုံးစွဲနေရသည့် အခြေအနေ မဟုတ်ပေ။

ထို့ကြောင့် ၎င်းအတွင်းရှိ စွမ်းအင်များ လျင်မြန်စွာ ကုန်ခမ်းသွားမည်ကို ရွှီရှင်း စိုးရိမ်နေစရာလည်း မလိုတော့ချေ။

ထိုအချိန်တွင် လီဝမ်ရှီးလည်း ရေချိုးခန်းထဲမှ ထွက်လာခဲ့၏။

ရေချိုးပြီးစ ဆံပင်ရှည်များပေါ်တွင် ရေစက်များ တွဲခိုနေဆဲဖြစ်ပြီး သူမက ဆံပင်ကို အသာအယာ သုတ်ရင်း ညည်းလိုက်၏။

"ဟင်း... ဒီကမ္ဘာကို ရောက်လာပြီးကတည်းက ကမ္ဘာဟောင်းမှာ သုံးနေကျ ဆံပင်အခြောက်ခံစက်ကို အရမ်းလွမ်းတာပဲ...။"

ထို့နောက် ရွှီရှင်းဘက်သို့ လျှောက်လာရင်း မေးလိုက်၏။

"ဒါနဲ့... နင် ဘာလုပ်နေတာလဲဟင်"

သူမ ရွှီရှင်းအနား ရောက်လာသည်နှင့် ဥကြီးကို မြင်လိုက်ရပြီး မျက်လုံးများ ပြူးကျယ်သွားသည်။

"ဟင်... ဒါက ဥပေါက်တာ မဟုတ်ဘဲ ပြောင်းပြန်အခြေအနေဖြစ်နေတာ မဟုတ်ဘူးလား"

သူမက အံ့ဩစွာ ရေရွတ်လိုက်၏။

"ဥပေါ်က အက်ကွဲရာတွေ အားလုံးက ပြန်ပြီး ပေါင်းစည်းသွားနေတာပဲ"

ရွှီရှင်းသည်လည်း လက်ထဲရှိ စွမ်းအင်အူတိုင် အပိုင်းအစကို ငုံ့ကြည့်လိုက်၏။

စောစောကအထိ တောက်ပနေသည့် ဖြူဖျော့သော အလင်းရောင်သည် ယခုအခါ မျက်စိဖြင့်မမြင်နိုင်လောက်အောင် မှိန်ဖျော့လာနေခဲ့ချေပြီ။

ထိုမြင်ကွင်းကြောင့် သူ၏ မျက်လုံးများ ကျဉ်းမြောင်းသွား၏။

ကြည့်ရသည်မှာ ဥကြီးသည် စွမ်းအင်အူတိုင် အပိုင်းအစအတွင်း ကျန်ရှိနေသည့် ရှေးဦးခေတ် ဧရာမလူသား၏ စွမ်းအင်ကို အရှိန်အဟုန်ဖြင့် စုပ်ယူနေခြင်း ဖြစ်ပုံရပေသည်။

"ဝါး..."

ရွှီရှင်းက မအောင့်နိုင်ဘဲ ရေရွတ်လိုက်၏။

"ဒီဥကြီးက... ဧရာမလူသားရဲ့ စွမ်းအင်ကိုတောင် စုပ်ယူနိုင်တာလား..."

လွန်ခဲ့သည့် မိနစ်ပိုင်းကပင် ရွှီရှင်းသည် စွမ်းအင်အူတိုင် အပိုင်းအစအတွင်းရှိ စွမ်းအင်များ အလွယ်တကူ ကုန်ခမ်းသွားမည် မဟုတ်ဟု ယုံကြည်ထားခဲ့၏။

သို့သော် ယခုတော့ သူ့ရှေ့မှာပင် ၎င်းထံမှ ဖြာထွက်နေသော အလင်းရောင်က မျက်စိဖြင့်မမြင်နိုင်လောက်အောင် လျင်မြန်စွာ မှိန်ဖျော့လာနေခဲ့သည်။

ဤအခြေအနေက အဖြေတစ်ခုတည်းကိုသာ ညွှန်ပြနေ၏။

ဤဥကြီးသည် သာမန်ဥတစ်လုံး လုံးဝ မဟုတ်ပေ။

မကြာမီတွင် ဥ၏ မျက်နှာပြင်ပေါ်ရှိ အက်ကွဲရာအားလုံး အပြီးအပိုင် ပျောက်ကွယ်သွားခဲ့ပြီး ကျောက်သားအခွံတစ်ခုလုံးလည်း မူလအတိုင်း ပြန်လည်ချောမွေ့သွားခဲ့သည်။

ယခင်က ကွဲအက်ခဲ့သည့် သဲလွန်စတစ်စက်မျှပင် မကျန်ရစ်တော့ပေ။

ဥကြီး၏ ကျောက်သားအခွံမှာ အပြည့်အဝ ပြန်လည်ကောင်းမွန်သွားခဲ့လေ၏။

ရွှီရှင်းသည် စွမ်းအင်အူတိုင် အပိုင်းအစက ဥကြီးအပေါ် နောက်ထပ် သက်ရောက်မှု မရှိတော့ကြောင်း သေချာသွားလေသည်။

ထို့ပြင် ၎င်းထံမှ ဖြာထွက်နေသော ဖြူဖျော့သောအလင်းရောင်မှာလည်း သိသိသာသာ မှိန်လာနေသဖြင့် စွမ်းအင်အူတိုင်ကို ကျောပိုးအိတ်အတွင်း ပြန်လည်သိမ်းဆည်းလိုက်၏။

မည်သို့ပင်ဆိုစေ ဤစွမ်းအင်အူတိုင် အပိုင်းအစသည် အလွန်အရေးပါသော အရာဝတ္ထုတစ်ခုဖြစ်ကြောင်းမှာ သံသယရှိစရာ မလိုတော့ပေ။

"ဟင်... ရွှီရှင်း၊ အမြန်ကြည့်လိုက်ဦး"

လီဝမ်ရှီးက အံ့အားသင့်စွာ အော်လိုက်၏။

"ငါ့မျက်စိမှားတာ မဟုတ်ရင်... ဒီဥကြီး အခုလေးတင် လှုပ်သွားသလိုပဲ"

သူမသည် ဥကြီးအနားသို့ အမြန်လျှောက်သွားကာ ဒူးထောက်ထိုင်ပြီး လက်ဖြင့် ထိရန် ပြင်လိုက်၏။

သို့သော် ထိုအခိုက်အတန့်၌ ရွှီရှင်းနှင့် လီဝမ်ရှီးတို့ နှစ်ဦးစလုံးကို အံ့အားသင့်သွားစေသော ဖြစ်ရပ်တစ်ခု ဖြစ်ပေါ်လာခဲ့သည်။

မီးလင်းဖိုဘေးရှိ ဥကြီးသည် လေထဲသို့ ဖျတ်ခနဲ ခုန်တက်သွားလေသည်။

ထိုခုန်ပုံမှာ အလွန်ချောမွေ့လွန်းပြီး လီဝမ်ရှီး၏ လက်နှင့် ထိမိမည့် အကွာအဝေးကို အတိအကျ ရှောင်တိမ်းလိုက်သကဲ့သို့ ဖြစ်နေခဲ့၏။

"အီး"

"အူး"

ခဲခဲလေးနှင့် ငွေရောင်ဘုရင်တို့လည်း ချက်ချင်း ထရပ်လိုက်ကြ၏။

နှစ်ဦးစလုံး၏ အကြည့်မှာ လေထဲတွင် အလိုလို လှုပ်ရှားနေသော ဥကြီးအပေါ် တစ်ပြိုင်နက် ရောက်သွားကြ၏။

အဝေးတွင် အေးအေးလူလူ လှဲနေသော မီမီပင်လျှင် မျက်လုံးဖွင့်ကာ ထိုဥကြီးကို တိတ်တဆိတ် စိုက်ကြည့်နေတော့သည်။

အခန်း ၅၃၆ ပြီး။