အခန်း ၁၀၂၁

အခန်း (၁၀၂၁) - နတ်ဘုရားသစ်ပင်

“ခွပ်.......ခရက်......”

အုပ်စုလိုက် ကြည့်ရှုနေသူများ ထိတ်လန့်တုန်လှုပ်နေစဉ်မှာပင် ရေခဲရုပ်တုပေါ်၌ အက်ကြောင်းများ ဖုံးလွှမ်းသွားသည်။ ထို့နောက် ၎င်းတို့၏ မျက်စိရှေ့တွင်ပင် ရေခဲရုပ်တုမှာ အပိုင်းပိုင်းကွဲကြေသွားပြီး မြေပြင်ပေါ်သို့ ရေခဲစများအဖြစ် ပြန့်ကျဲသွားတော့သည်။

ရေခဲအပိုင်းအစများသည် ဆန်စေ့ခန့်သာ ရှိသည်။ ၎င်းတို့သည် နီမြန်းသောသဲပြင်ပေါ်သို့ ကျရောက်သွားသည့်အခါ ရွေ့လျားနေသော သဲများဖြင့် လျင်မြန်စွာ ဖုံးလွှမ်းသွားပြီး ပျောက်ကွယ်သွားတော့သည်။ မဲ့ကွက်ပါသော ထိုလူမှာ လေထဲတွင် အငွေ့ပျံသွားသကဲ့သို့ ဘာမျှကျန်မနေခဲ့ပေ။

ထိုမြင်ကွင်းကို မြင်လိုက်ရသည့်အခါ မြစိမ်းသစ်သား အိမ်တော်ခွဲထွက်သူများ၏ နှလုံးသားထဲတွင် အေးစက်စက် တုန်လှုပ်မှုတစ်ခု ဝင်ရောက်လာသည်။

၎င်းမှာ သာမန်ရေခဲကိုက်ခြင်းမျိုး မဟုတ်ဘဲ ထူးဆန်းသော နိယာမဥပဒေသတစ်ခု၏ ဖော်ပြချက် ဖြစ်သည်။ ရေခဲများမှာ သေဆုံးသွားသူ၏ ခန္ဓာကိုယ်အတွင်းမှ ပေါက်ကွဲထွက်လာခြင်း ဖြစ်သည်။

“ဒါ ဘယ်လိုလုပ် ဖြစ်နိုင်မှာလဲ။ ငါတို့က သေချာပေါက် လိုက်လာနေတာကို…” အတောင်ခုနှချောင်းက ရုတ်တရက် ယီယွင်ဘက်သို့ လှည့်ကြည့်လိုက်သည်။

မြစိမ်းသစ်သား အိမ်တော်မှ ခွဲထွက်လာသူများမှာ ယီယွင်၏ ခြေရာအတိုင်း လိုက်လာခဲ့ခြင်း ဖြစ်သည်။ ၎င်းတို့ဘက်မှ တစ်လှမ်းမျှပင် မှားယွင်းမှု မရှိခဲ့ပေ။ ထိုသို့သော အခြေအနေမျိုးတွင် ယီယွင်ကဲ့သို့ပင် ဘာမှမဖြစ်သင့်ပေလော။ အဘယ်ကြောင့် ထိုသို့သော အဖြစ်အပျက်မျိုး ကြုံတွေ့ရသနည်း။

တစ်စုံတစ်ယောက်က ယီယွင်သည် ၎င်းတို့ကို လှည့်စားရန်အတွက် တစ်ခုခု လုပ်ဆောင်ခဲ့သည်ဟု သံသယဝင်လာသည်။

“ဟေ့ကောင်၊ မင်း တိတ်တိတ်ကလေး တစ်ခုခု လုပ်လိုက်တာလား” ဟု မြစိမ်းသစ်သား အိမ်တော်မှ လူတစ်ယောက်က ခြိမ်းခြောက်သည့် အသံဖြင့် မေးမြန်းလိုက်သည်။

“ငါ မင်းတို့ကို ရှင်းပြဖို့ လိုသေးလို့လား။ မင်းတို့ကို ငါ့နောက် လိုက်ခဲ့ဖို့ ပြောခဲ့လို့လား” ဟု ယီယွင်က ထိုမေးခွန်းထုတ်သည့် မြစိမ်းသစ်သား အိမ်တော် တပည့်အား မိုက်မဲသူတစ်ယောက်ကို ကြည့်သကဲ့သို့ ကြည့်လိုက်သည်။

“မင်းတို့ရဲ့ ဗေဒင်တွက်ချက်မှုအရ လမ်းကြောင်းက ငါ့လမ်းကြောင်းနဲ့ တူတူပဲလို့ ပြောခဲ့တာ မဟုတ်ဘူးလား။ အခု ဘာလို့ ငါ့ကို လာမေးနေတာလဲ”

ယီယွင်၏ စကားတစ်ခွန်းတည်းဖြင့် ၎င်းတို့၏ ပါးစပ်ကို ပိတ်သွားစေသည်။

မည်မျှပင် ရှက်ရွံ့မှုကင်းမဲ့စေကာမူ ၎င်းတို့မှာ စကားတစ်ခွန်းမျှ ပြန်မပြောနိုင်တော့ပေ။ ရိုးရိုးသားသား ပြောရလျှင် ၎င်းတို့၏ အပေါင်းအပါ သေဆုံးခြင်းမှာ ၎င်းတို့ကိုယ်တိုင် ရွေးချယ်မှုကြောင့် ဖြစ်သည်။

“မင်းတို့က ငါ့နောက် လိုက်ချင်သေးတယ်ဆိုရင်လည်း ဆက်လိုက်ခဲ့ကြပေတော့” ယီယွင်က ထိုသို့ပြောပြီးနောက် ထိုလူအုပ်စုကို လျစ်လျူရှုကာ ရှေ့သို့ ဆက်လက်တိုးသွားသည်။

ထိုအချိန်တွင် ခရမ်းရောင်ဝတ်ရုံနှင့် လူကြီးက သက်ပြင်းချကာ “သွေးသဲကန္တာရထဲက သဘာဝစွမ်းအားတွေက တစ်နေရာတည်းမှာ ရပ်တန့်မနေဘူး။ ငါတို့က တခြားဒေသတစ်ခုကို ရောက်သွားပြီဖြစ်လို့ နိယာမဥပဒေသတွေကလည်း ပြောင်းလဲသွားမှာပဲ။

တခြားသူတွေအတွက် အဆင်ပြေကောင်း ပြေနိုင်ပေမဲ့ ခြေရာတွေကို လိုက်တဲ့အခါမှာတော့ ဒုက္ခတွေ ရောက်လာနိုင်တယ်” ဟု ပြောသည်။

ခရမ်းရောင်ဝတ်ရုံနှင့် လူကြီး စကားပြောနေစဉ်မှာပင် ယီယွင်မှာ အကွာအဝေး အတောင်တစ်ရာခန့်အထိ ရောက်သွားပြီဖြစ်သည်။ အတောင်တစ်ရာအတွင်းတွင် ဖြစ်ပျက်နိုင်သော အပြောင်းအလဲများစွာ ရှိသည်။ ထို့အပြင် သွေးသဲကန္တာရမှာ အလွန်ထူးဆန်းသည်။

အတောင်တစ်ရာဆိုသည်မှာ ယီယွင်၏ ပုံရိပ်ကို ၎င်းတို့၏ အမြင်အာရုံမှ ဝါးတားတား ဖြစ်သွားစေရန် လုံလောက်သည်။ ယီယွင်၏ ခြေထောက်ချလိုက်သည့် နေရာကို ခွဲခြားသိမြင်နိုင်ရန်လည်း မဖြစ်နိုင်ပေ။

ယီယွင် ထွက်ခွာသွားတော့မည့်အချိန်တွင် အတောင်ခုနှချောင်းနှင့် အဖွဲ့မှာ ဒေါသထွက်ပြီး စိုးရိမ်လာကြသည်။

“တာဂူ လူကြီးမင်း”

ရွေးချယ်စရာ မရှိတော့သည့်အခါ အတောင်ခုနှချောင်းမှာ တာဂူ လူကြီးမင်းကိုသာ ပြန်ကြည့်နိုင်တော့သည်။

“မင်းတို့ ဘာလို့ ထိတ်လန့်နေကြတာလဲ ငါ နောက်တစ်ကြိမ် ဗေဒင်ထပ်တွက်လိုက်ရင် သွေးသဲကန္တာရကနေ သေချာပေါက် ထွက်သွားနိုင်မှာပါ” ဟု တာဂူ လူကြီးမင်းက ဒေါသတကြီး ပြောလိုက်သည်။

သူက အင်မော်တယ်မိုးစက်ဂိုဏ်းမှ လူများဆီသို့ အေးစက်စက် အကြည့်များ ပို့လိုက်သည့်အခါ နယ်စား ဝူယွင်၏ နှလုံးသားမှာ နစ်ဝင်သွားသည်။

အကယ်၍ ၎င်းတို့ အသက်ရှင်ချင်လျှင် မြစိမ်းသစ်သား အိမ်တော်မှ ခွဲထွက်လာသူများ၏ နောက်ကို လိုက်ရမည်ဖြစ်သည်။ သို့သော် ၎င်းတို့ကို ခြေလှမ်းကျောက်တုံးများအဖြစ် အသုံးပြုခံရမည်မှာ ပြောစရာပင် မလိုတော့ပေ။

ယွဲ့ရင်းရှာ၏ အနီးကပ် လိုက်ပါလာသော ယင်အဘွားမှာ တိုးတက်စွာဖြင့် မေးမြန်းလိုက်ရသည်၊

“ဆက်ခံသူ၊ အဲဒီလူတွေကို တကယ်ပဲ စွန့်ပစ်ခဲ့တော့မှာလား”

သူမသည် ၎င်းတို့ကို မနှစ်မြို့သော်လည်း ၎င်းတို့မှာ မြစိမ်းသစ်သား အိမ်တော်၏ ပျောက်ဆုံးသွားသော သားစဉ်မြေးဆက်များ ဖြစ်သည်။ ၎င်းတို့ကို စွန့်ပစ်လိုက်ပါက မည်မျှသေဆုံးမည်ကို မသိနိုင်ပေ။

ယွဲ့ရင်းရှာက နောက်သို့ လှည့်ကြည့်လိုက်သည်။ အတောင်တစ်ရာကျော်မျှသာ ရှိသေးသော်လည်း ထိုလူများမှာ ဝါးတားတား ပုံရိပ်များ ဖြစ်သွားကြပြီဖြစ်သည်။

သူမက အကြည့်ကို ပြန်ရုပ်သိမ်းလိုက်ပြီး ခံစားချက်မဲ့စွာဖြင့်

“အဘွား၊ ဒီလူတွေက မကောင်းဆိုးဝါးစိတ်ဓာတ်ရှိတဲ့ သူတွေပါ။ သူတို့က ကိုယ့်အတွက်ပဲ လုပ်နေကြတာ။ မြစိမ်းသစ်သား အိမ်တော်အပေါ်မှာ သူတို့မှာ သံယောဇဉ်ရှိမယ်လို့ မထင်ဘူး။ သွေးသဲကန္တာရကနေ လွတ်မြောက်နိုင်တာက ယီယွင်ရဲ့ ကျေးဇူးကြောင့်ပဲ” ဟု ပြောသည်။

ယင်အဘွားတွင် ပြန်ပြောစရာ စကားမရှိတော့ပေ။ ယီယွင်အပေါ် သူမ၏ ယခင်သဘောထားကို ကြည့်လျှင် ယီယွင်က အခွင့်အရေးယူပြီး အနိုင်မကျင့်သည်ကိုပင် ကျေးဇူးတင်ရမည် ဖြစ်သည်။ သူမမှာ သက်ပြင်းရှည်ကြီး ချလိုက်နိုင်ရုံသာ တတ်နိုင်တော့သည်။

“ယီယွင်၊ မင်းမှာ ဒီလိုမျိုး အစီအရင်ပညာမှာ အရည်အချင်းရှိလိမ့်မယ်လို့ မထင်ထားခဲ့မိဘူး။ မင်းက အစီအရင်ပညာကို လေ့လာခဲ့တာ ဘယ်လောက်ကြာပြီလဲ” ဟု ယင်အဘွားက သိလိုစိတ်ဖြင့် မေးလိုက်သည်။

တာဂူ လူကြီးမင်းက သူ၏ အစီအရင်ပညာကို ယုံကြည်မှုအပြည့်ဖြင့် ဝါကြွားခဲ့သော်လည်း ယီယွင်နှင့် ယှဉ်လျှင် အလွန်ပင် ညံ့ဖျင်းလွန်းသည်။

ယီယွင်သည် မိခင်ဝမ်းဗိုက်ထဲကပင် အစီအရင်ပညာကို လေ့လာခဲ့သည်ဆိုဦးတော့ ဆယ်စုနှစ်အနည်းငယ်သာ ရှိဦးမည်ဖြစ်သည်။ စစ်သည်များအတွက် ထိုအချိန်ကာလမှာ သာမန်လူသားများအတွက် ကလေးအရွယ်နှင့် အတူတူပင် ဖြစ်သည်။ ၎င်းမှာ အစပျိုးရုံမျှသာ ရှိသေးသည်။

“ကျွန်တော်က အစီအရင်ပညာအကြောင်း သိပ်မသိပါဘူး” ဟု ယီယွင်က ပြောသည်။

အစီအရင်ပညာကို မသိဘူးလား။ ယင်အဘွားမှာ ခဏမျှ အံ့အားသင့်သွားပြီး

“ဒါဆိုရင်…”

“ကျွန်တော်က အစီအရင်ပညာကို တစ်ခါမှ မလေ့လာခဲ့ဘူး။ ကျွန်တော် လုပ်ခဲ့တာက သဘာဝရဲ့ စွမ်းအားတွေနဲ့ စွမ်းအင်တွေရဲ့ ဆင့်ကဲပြောင်းလဲမှုကို လေ့လာခဲ့တာပါ။ အဲဒီကနေတစ်ဆင့် ပုံစံတွေကို သတိပြုမိပြီး အခြေခံစည်းမျဉ်းတွေကို နားလည်ခဲ့တာပါ” ဟု ယီယွင်က ပေါ့ပေါ့ပါးပါး ရှင်းပြသည်။

ယင်အဘွားမှာ ယီယွင်၏ ရှင်းပြချက်ကို ကြားလိုက်ရသည့်အခါ ယုံကြည်ရခက်နေသည်။ သို့သော်လည်း သူ၏ ငြိမ်သက်နေသည့် အခြေအနေကို ကြည့်လျှင် သူ လိမ်ပြောနေပုံ မပေါ်ပေ။

အကယ်၍ ယီယွင်မှာ သဘာဝစွမ်းအားများ သို့မဟုတ် စွမ်းအင်အပြောင်းအလဲများကို အာရုံခံရာတွင် ထိုမျှလောက် ထက်မြက်သည်ဆိုပါက သူ၏ အရည်အချင်းမှာ အလွန်တုန်လှုပ်ဖွယ် ကောင်းလှသည်။

“အကယ်၍ အဲဒါ အမှန်ဆိုရင် ဒီကလေးက တကယ်ကို အရည်အချင်းရှိတာပဲ။ ကံမကောင်းစွာနဲ့ပဲ သူက ငါ့မြစိမ်းသစ်သား အိမ်တော်ရဲ့ တပည့် မဟုတ်ဘူး” ဟု ယင်အဘွားက တွေးလိုက်သည်။

“အို ငါတို့ သွေးသဲကန္တာရကနေ ထွက်လာခဲ့ပြီလား”

နီမြန်းသော သဲပြင်များ ကုန်ဆုံးသွားသည်ကို မြင်လိုက်ရသည့်အခါ ယွဲ့ရင်းရှာ၏ လှပသော မျက်နှာပေါ်တွင် ဝမ်းသာမှုများ ပေါ်လာသည်။

နီမြန်းသောသဲပြင်ကြောင့် ဖြစ်ပေါ်လာသည့် နယ်နိမိတ်ကို ဖြတ်ကျော်လိုက်သည့်အခါ ယွဲ့ရင်းရှာမှာ ဟင်းလင်းပြင် အပြောင်းအလဲကို ခံစားလိုက်ရသည်။ သူမအောက်ရှိ မြေပြင်မှာ ရုတ်တရက်ပင် သက်ဝင်လှုပ်ရှားနေသော မြက်ခင်းပြင်ကြီး ဖြစ်လာသည်။ သူမ၏ ခေါင်းပေါ်ရှိ ပူပြင်းသော နေမင်းမှာ ပျောက်ကွယ်သွားသည်။

သူမ နောက်သို့ လှည့်ကြည့်လိုက်သည့်အခါ သူမ၏ နောက်ကွယ်မှ သွေးသဲကန္တာရမှာလည်း ပျောက်ကွယ်သွားသည်။ ၎င်းမှာ ဘယ်တုန်းကမှ မရှိခဲ့သကဲ့သို့ ဖြစ်နေသည်။

သွေးသဲကန္တာရမှာ တကယ်တော့ မကြီးမားပေ၊ သို့သော် မှန်ကန်သော လမ်းကြောင်းကို မတွေ့ရှိပါက လူတို့မှာ တစ်သက်လုံး လမ်းပျောက်နေမည် သို့မဟုတ် လျင်မြန်စွာ သေဆုံးသွားမည် ဖြစ်သည်။

“ဒါက…”

ယီယွင်က အဝေးသို့ အကြည့်ပို့လိုက်သည်။ သူသည် ဝေးလံသော နေရာတွင် ကောင်းကင်ယံကို ဖြတ်ကျော်နေသော ဧရာမ နဂါးကြီးကဲ့သို့ အမည်းရောင် တောင်တန်းကြီးကို မြင်လိုက်ရသည်။

ထူးဆန်းသည်မှာ ထိုတောင်တန်းကြီးဆီမှ ထွက်ပေါ်လာသော ကြွယ်ဝပြီး ပြည့်စုံနေသည့် အသက်စွမ်းအင်များ ဖြစ်သည်။

ထို့အပြင် တောင်တန်းကြီးတွင် သူ၏ ခရမ်းရောင် ပုံဆောင်ခဲ၏ စွမ်းအင်အမြင်အာရုံအတိုင်း ပင်လယ်ကဲ့သို့ လှိုင်းထန်နေသော အသက်စွမ်းအင်များ ပါဝင်နေသည်။

အသက်စွမ်းအင်များရှိသော တောင်တန်းကြီးတစ်ခုလား။

ကောင်းကင်ဘုံ ၃၃ ထပ်သို့ဝင်ပေါက်မှာ တကယ်ကို စိတ်ဝင်စားဖို့ ကောင်းလှသည်။

“ဒါက… တောင်တန်းကြီးတော့ မဟုတ်လောက်ဘူး” ဟု ယွဲ့ရင်းရှာက မျက်လုံးများကို မှိတ်ထားလျက် ပြောသည်။ သူမမှာလည်း တောင်တန်းကြီးအတွင်းမှ အသက်စွမ်းအင်ကို အာရုံခံမိသည်။ သူမ၏ အမူအရာမှာ ရိုသေလေးစားမှုနှင့် ကြည်ညိုမှုများ ဖြစ်နေသည်။

“ ဒါနဲ့ပတ်သက်ပြီး ကျမ်းစာတွေထဲမှာ မှတ်တမ်းတင်ထားတာ ရှိလို့လား” ဟု ယီယွင်က ယွဲ့ရင်းရှာကို ကြည့်ကာ မေးလိုက်သည်။

“ကျမ်းစာတွေထဲမှာ ဒီအကြောင်း မပါဘူး။ ကျွန်မ ခန့်မှန်းကြည့်တာပါ။ နီးနီးလေး သွားကြည့်ရအောင်” ယွဲ့ရင်းရှာလည်း မသေချာပေ။ သူမသည် ယီယွင်နှင့်အတူ စိမ်းလန်းစိုပြည်သော မြက်ခင်းပြင်များကို ဖြတ်ကျော်ကာ တောင်တန်းကြီးဆီသို့ တဖြည်းဖြည်း ချဉ်းကပ်သွားရာမှ ယီယွင်လည်း ရှင်းရှင်းလင်းလင်း မြင်လိုက်ရတော့သည်။

ရှည်လျားသော တောင်တန်းကြီးပေါ်တွင် ရှေးကျပြီး သန်မာသော အပင်ကြီးများ ဖုံးလွှမ်းနေသည်။ သစ်သားအမျှင်များမှာ တောင်တန်းတစ်လျှောက် မြစ်တစ်စင်းကဲ့သို့ စီးဆင်းနေသကဲ့သို့ တွဲလျားကျနေသည်။

“ဒါက…”

ယီယွင် အံ့အားသင့်သွားသည်။

“နတ်ဘုရားသစ်ပင် ဒါ နတ်ဘုရားသစ်ပင်ရဲ့ အမြစ်တွေပဲ… ကျွန်မ ဒါနဲ့ ရင်းနှီးတဲ့ စွမ်းအင်တစ်ခုကို ခံစားမိတယ်။ ဒါက မြစိမ်းသစ်သား မဟာကမ္ဘာရဲ့ အလယ်ဗဟိုမှာရှိတဲ့ နတ်ဘုရားသစ်ပင် ဖြစ်ရမယ်” ဟု ယွဲ့ရင်းရှာက အံ့အားသင့်သည့် အမူအရာဖြင့် ပြောလိုက်သည်။

မြစိမ်းသစ်သား မဟာကမ္ဘာ၏ နတ်ဘုရားသစ်ပင်မှာ မြစိမ်းသစ်သား မဟာကမ္ဘာ၏ အလယ်ဗဟိုတွင် တည်ရှိပြီး ကမ္ဘာ၏ ကံကြမ္မာကို ဆုံးဖြတ်ပေးသည်။ နတ်ဘုရားသစ်ပင်သာ မရှိပါက မြစိမ်းသစ်သား မဟာကမ္ဘာမှာ ကြာမြင့်စွာကပင် ပျက်စီးသွားနှင့်ပြီ ဖြစ်သည်။

ယွဲ့ရင်းရှာမှာ ကောင်းကင်ဘုံ ၃၃ ထပ်သို့ဝင်ပေါက်မှာ မြစိမ်းသစ်သား မဟာကမ္ဘာနှင့် လုံးဝမတူညီသော နေရာတွင် ရှိသည်ဟု ထင်ထားခဲ့သည်။ သို့သော် နတ်ဘုရားသစ်ပင်၏ အမြစ်များမှာ ဟင်းလင်းပြင်၏ နယ်နိမိတ်နှင့် အတားအဆီးများကို ဖြတ်ကျော်ကာ ကောင်းကင်ဘုံ ၃၃ ထပ်သို့ဝင်ပေါက်ဆီသို့ ဆန့်တန်းရောက်ရှိနေခြင်း ဖြစ်သည်။