အခန်း ၁၀၂၉

အခန်း (၁၀၂၉) - နတ်ဘုရား သံကြိုးများ

ကောင်းကင်ယံကြီး ကွဲအက်သွားသကဲ့သို့ ကြေးဝါရောင် ဧရာမလူသား၏ ပုဆိန်ချက်မှာ တစ္ဆေလက်ဖဝါးကြီးကို ဦးစွာ ထိမှန်လိုက်သည်။ ထိုတစ္ဆေလက်ဖဝါးမှာ အပြာရောင်ကောင်းကင်၏ တစ်ဝက်ကို ဖုံးလွှမ်းသွားပြီး ကြေးဝါရောင် ဧရာမလူသား၏ ပုဆိန်ကို ချက်ချင်း ဆုပ်ကိုင်လိုက်သည်။

ထိုလက်ဖဝါးကြီးထဲမှ ဦးခေါင်းတုများ ပေါ်ထွက်လာပြီး ပုဆိန်ကို ကိုက်ဖြတ်နေကြသကဲ့သို့ ဝိညာဉ်သန်းပေါင်းများစွာ၏ နားကို စူးဝင်သွားစေသည့် အော်ဟစ်သံများ ထွက်ပေါ်လာသည်။

“ဒီတိုက်ကွက်က…”

ယီယွင်မှာ သူ၏ ဝိညာဉ်ပင် ဆွဲထုတ်ခံလိုက်ရသကဲ့သို့ ခံစားလိုက်ရသည်။

“ကြေးဝါရောင် ဧရာမလူသားနဲ့ နတ်ဘုရားသခင် တွေရဲ့ တိုက်ပွဲက ဒီလောက်တောင် ကြောက်ဖို့ကောင်းတာလား… ငါတို့တောင် ဒီတိုက်ပွဲရဲ့ နောက်ဆက်တွဲ သက်ရောက်မှုတွေကို မခံနိုင်ဘူး…”။

ယင်အဘွားသည် ဆေးလုံးတစ်လုံးကို သောက်သုံးလိုက်ပြီး မျက်နှာမှာ ပုံမှန်မဟုတ်ဘဲ နီရဲသွားကာ ယွမ်ချီ အကာအကွယ်တစ်ခုကို ဖန်တီးလိုက်သည်။

ယင်အဘွား၏ ယွမ်ချီ အကာအကွယ်ရှိသော်လည်း ယီယွင်တို့အဖွဲ့မှာ မုန်တိုင်းထန်သော ပင်လယ်ပြင်တွင် သေးငယ်သော လှေငယ်များ စီးနင်းနေရသကဲ့သို့ ခံစားနေကြရသည်။

“ဒါတွေက နတ်ဘုရားသခင်တွေရဲ့ စွမ်းအားတွေပေါ့…” ယွဲ့ရင်းရှာမှာ သူမရှေ့တွင် ဖြစ်ပျက်နေသည်ကို ကြည့်ရင်း တိုးတိုးလေး ရေရွတ်လိုက်သည်။

သူမသည် မြစိမ်းသစ်သား မဟာကမ္ဘာတွင် စစ်သည်အနည်းငယ်ကိုသာ တွေ့ဖူးပြီး ဤနတ်ဘုရားသခင် အပြင်လူများကို တစ်ခါမျှ မတွေ့ဖူးပေ။ မြစိမ်းသစ်သား အိမ်တော်၏ စာအုပ်မှတ်တမ်းများတွင်သာ နတ်ဘုရားသခင်တို့၏ စွမ်းအားကို အနည်းငယ် ဖတ်ဖူးပြီး၊ ယခုကဲ့သို့ ကိုယ်တိုင် မြင်တွေ့ရချိန်တွင် ကြေးဝါရောင် ဧရာမလူသားကို တိုက်ခိုက်နိုင်သည့် သူတို့၏ စွမ်းအားကို အံ့အားသင့်နေရသည်။

ထိုအချိန်တွင် ကြေးဝါရောင် ဧရာမလူသား၏ ပုဆိန်မှ သွေးနီရောင် အလင်းတန်းတစ်ခု ရုတ်တရက် ပေါ်ထွက်လာသည်။ ၎င်းသည် အရာအားလုံးကို ဝါးမြိုသွားနိုင်မည့် အဆုံးမရှိသော သတ်ဖြတ်လိုစိတ်ကို ထုတ်လွှတ်လိုက်သည်။

“အား အား အား”

တစ္ဆေလက်ဖဝါးမှ ဦးခေါင်းများမှာ ထိုသွေးနီရောင် အလင်းတန်းနှင့် ထိတွေ့မိသည့်အခါ ပြင်းထန်စွာ အော်ဟစ်ကာ သွေးများကဲ့သို့ ပျောက်ကွယ်သွားကြသည်။

ကြေးဝါရောင် ဧရာမလူသား၏ ပုဆိန်မှာ ရှေ့သို့ ဆက်လက်တိုးဝင်သွားပြီး ကြွပ်ဆတ်သော အသံများနှင့်အတူ တစ္ဆေလက်ဖဝါးကြီးကို အပိုင်းပိုင်း ကြေမွသွားစေသည်။

“အလောင်းကောင် လက်ဖဝါး ပျက်စီးသွားပြီ” ဖေးမိစ္ဆာ ဂိုဏ်းမှ နတ်ဆိုးမျက်လုံးသခင် သည် လေထဲတွင် ပေါ်လာသည်။

သူ၏ နောက်ကျောတွင် မျက်လုံးနေရာများတွင် တစ္ဆေမီးများ တောက်လောင်နေသည့် သွေးရောင် ဦးခေါင်းခွံကြီးတစ်ခု ရှိနေပြီး ၎င်းမှာ ကိုယ်ပိုင်အသိစိတ် ရှိနေသည့်အတိုင်းပင်။ နတ်ဆိုးမျက်လုံးသခင် သည် အနည်းငယ် မျက်မှောင်ကြုတ်သွားသည်။ ကြေးဝါရောင် ဧရာမလူသားမှာ သူထင်ထားသည်ထက် ပို၍ ခံနိုင်ရည်ရှိနေသည်။

ချက်ချင်းပင် ကြေးဝါရောင် ဧရာမလူသားမှာ ရှေ့သို့ တစ်လှမ်း တိုးလိုက်ရာ သူ၏ ခန္ဓာကိုယ်ပေါ်ရှိ သံကြိုးများမှာ ဆူညံစွာ အော်ဟစ်သံများ ထွက်ပေါ်လာသည်။ သူသည် ပုဆိန်ကို မြှောက်ကာ ဖေးမိစ္ဆာ ဂိုဏ်းမှ ထိပ်တန်းပုဂ္ဂိုလ်များ ပူးပေါင်း ဖန်တီးထားသည့် ဝိညာဉ်ဆိုးကို ခုတ်ပိုင်းလိုက်သည်။

ဝိညာဉ်ဆိုးမှာ ဧရာမအရွယ်အစားရှိပြီး ခေါင်းပေါ်တွင် ချိုများပါရှိသည်။ ၎င်းဖြတ်သန်းရာ လမ်းကြောင်းတစ်လျှောက် မြေပြင်ရှိ အပင်များမှာ ပြာအဖြစ် ပြောင်းလဲသွားပြီး သေခြင်းနိယာမ၏ အနံ့ဆိုးများဖြင့် ပြည့်နှက်သွားသည်။ သို့သော် ကြေးဝါရောင် ဧရာမလူသား၏ ပုဆိန်နှင့် ရင်ဆိုင်ရချိန်တွင် ဝိညာဉ်ဆိုးမှာ အလွန်အားနည်းသွားသည်။

ပုဆိန်ချက်မှာ ဝိညာဉ်ဆိုး၏ ခေါင်းပေါ်သို့ ကျရောက်ကာ နှစ်ပိုင်းဖြစ်သွားစေသည် “အာ” ဝိညာဉ်ဆိုး ပျက်စီးသွားချိန်တွင် ဖေးမိစ္ဆာ ဂိုဏ်းမှ ထိပ်တန်းပုဂ္ဂိုလ်များမှာ ပြင်းထန်စွာ ဒဏ်ရာရသွားကြပြီး မျက်နှာများမှာ ဖြူဖျော့သွားကာ သွေးနက်များ အန်ထုတ်လိုက်ကြသည်။ ကြေးဝါရောင် ဧရာမလူသား၏ တိုက်ခိုက်မှုမှာ သူတို့၏ အနှစ်သာရကို ထိခိုက်သွားစေသည်။

“ရေခဲနတ်သခင်” နတ်ဆိုးမျက်လုံးသခင် က အော်ခေါ်လိုက်သည်။ နူးညံ့သော လေတိုက်ခတ်မှုနှင့်အတူ ကောင်းကင်နှင့် မြေကြီးမှာ ချက်ချင်းဆိုသလို နှစ်ခြမ်းကွဲသွားပြီး အလွန်လှပသော အမျိုးသမီးတစ်ဦး ဖြည်းညှင်းစွာ ဆင်းသက်လာသည်။

ထိုအမျိုးသမီးမှာ အနီရောင် ဝတ်စုံကို ဝတ်ဆင်ထားပြီး နှင်းကဲ့သို့ ဖြူစင်သော အသားအရေရှိကာ အသက် ၁၆ နှစ်အရွယ်ကဲ့သို့ ထင်ရသည်။

“တိုက်ခိုက်”

သူမ၏ နူးညံ့သော လက်ကို ဆန့်ထုတ်လိုက်ရာ ကောင်းကင်မှ ပိုးဖဲကြိုးတစ်ခုမှာ ရေတံခွန်ကဲ့သို့ စီးကျလာပြီး ကြေးဝါရောင် ဧရာမလူသား၏ ပုဆိန်ကို တင်းကျပ်စွာ ရစ်ပတ်လိုက်သည်။

ထိုဖဲကြိုးမှာ ပေါ့ပါးနူးညံ့သည်ဟု ထင်ရသော်လည်း ၎င်းရစ်ပတ်မိသွားသည့်အခါ ပတ်ဝန်းကျင်ရှိ နေရာလပ်များပင် ပုံပျက်သွားသည်အထိ ဖိအားများ ပြင်းထန်လာသည်။ အကယ်၍သာ လူတစ်ဦးကို ရစ်ပတ်မိပါက သူ၏ အသားအရေနှင့် အရိုးများမှာ ပျော့ဖတ်ဖြစ်သွားပြီး ဖဲကြိုးကို သွေးရောင်အဖြစ် ပြောင်းလဲသွားစေမည်ဖြစ်သည်။

“အား......ဗုန်း.......”

ကြေးဝါရောင် ဧရာမလူသားသည် ဟိန်းဟောက်လိုက်ပြီး မြေပြင်ကို ပြင်းထန်စွာ စောင့်နင်းလိုက်ရာ ကမ္ဘာမြေကြီးမှာ ပြင်းထန်စွာ တုန်ခါသွားသည်။ ထို့နောက် သူ၏ လက်မောင်းကို ဝှေ့ယမ်းလိုက်ရာ သူ့ကို ရစ်ပတ်ထားသည့် ဖဲကြိုးမှာ စတင် ပြဲစုတ်သွားသည် ဖဲကြိုးများမှာ အလင်းစက်ပေါင်းများစွာအဖြစ် ပျောက်ကွယ်သွားပြီးနောက် ရေခဲနတ်သခင် ၏ လက်ထဲတွင် ပြန်လည် စုစည်းသွားသည်။

ရေခဲနတ်သခင် ၏ မျက်နှာပေါ်တွင် အေးစက်သော အမူအရာ ပေါ်လာပြီး ကြေးဝါရောင် ဧရာမလူသားကို ကြောက်ရွံ့စွာဖြင့် “ဘယ်လောက်တောင် အားကြီးလိုက်တဲ့ အင်အားလဲ” ဟု မှတ်ချက်ချလိုက်သည်။

နတ်ဘုရားသခင် နှစ်ပါး တိုက်ခိုက်ခဲ့သော်လည်း အချည်းနှီးသာ ဖြစ်ခဲ့ရသည်။

ကြေးဝါရောင် ဧရာမလူသားသည် နားစည်ကို ကွဲထွက်သွားစေနိုင်လောက်အောင် ကျယ်လောင်စွာ ဟိန်းဟောက်လိုက်သည်။ ယီယွင်သည် နားများကို ယွမ်ချီဖြင့် အမြန် ဖုံးအုပ်လိုက်ရသည်။

ယွဲ့ရင်းရှာ၏ ပိန်ပါးသော ခန္ဓာကိုယ်မှာလည်း တုန်ယင်သွားပြီး “ဒီကြေးဝါရောင် ဧရာမလူသားက တကယ်ကို ကြောက်ဖို့ကောင်းတယ်” ဟု ပြောလိုက်သည်။

ထိုအချိန်တွင် ကမ္ဘာကြီးကို နှစ်ခြမ်းကွဲသွားစေနိုင်သော ဓားအလင်းတန်းမှာ ဧရာမလူသား၏ ခေါင်းပေါ်သို့ ကျရောက်လာသည်။

ထိုဓားအလင်းတန်းမှာ ထူထပ်သော မိုးဖွဲဖွဲကဲ့သို့ ဖြစ်သော်လည်း မိုးစက်တိုင်းတွင် သေစေနိုင်သော သတ်ဖြတ်လိုစိတ်များ ပါဝင်နေသည်။ မင်္ဂလာမိုးစက် နတ်ဘုရား သည် မိုးရေထဲတွင် ပေါ်လာပြီး လက်ထဲတွင် ဓားကို ကိုင်ဆောင်ထားကာ သူ၏ အပြာရောင် ဝတ်စုံမှာ လေထဲတွင် လွင့်ပျံနေပြီး ကောင်းကင်ဘုံမှ နတ်သားတစ်ပါးကဲ့သို့ပင်။

“မိုးစက်မုန်တိုင်းဓား”

မင်္ဂလာမိုးစက် နတ်ဘုရား ၏ ဓားနှင့် မိုးစက်များမှာ ဧရာမလူသားကို ဦးတည်သွားကြသည်။ ထိုနေရာ တစ်ဝိုက်လုံးမှာ သူ၏ ဓားအလင်းတန်းများဖြင့် လွှမ်းခြုံသွားသည်။ ယွမ်ချီ အကာအကွယ် ရှိသော်လည်း ဓားအလင်းတန်းများမှာ ယီယွင်ကိုပင် စူးရှစွာ ထိခိုက်နေသကဲ့သို့ ခံစားရသည်။

“ဒါက မိုးစက်မုန်တိုင်းဓား ပဲ…”

ယီယွင်မှာ ကောင်းကင်တစ်ခုလုံး ပြည့်နှက်သွားသော ဓားအလင်းတန်းများကို မြင်ရချိန်တွင် တုန်လှုပ်သွားသည်။ နတ်ဘုရားသခင်တစ်ပါးအနေဖြင့် မင်္ဂလာမိုးစက် နတ်ဘုရား ၏ တိုက်ကွက်မှာ ကောင်းကင်ကိုပင် ခွဲထုတ်နိုင်စွမ်း ရှိသည်။

ထိုအချိန်တွင် စစ်မြေပြင်၏ အခြားတစ်ဖက်တွင် လူတစ်ဦး ရုတ်တရက် ပေါ်လာသည်။ သူမှာ နတ်ဘုရားတစ်ပါးကဲ့သို့ အငွေ့အသက်ရှိသော သက်ကြီးရွယ်အိုတစ်ဦးဖြစ်ပြီး ဖြူဖွေးသော ဝတ်ရုံကို ဝတ်ဆင်ကာ အပြာရောင် ဓားကို ကိုင်ဆောင်ထားသည်။

“မိုးစက်မုန်တိုင်းဓား”

ထိုသက်ကြီးရွယ်အိုကလည်း ဓားကို ဝှေ့ယမ်းကာ မိုးဓားတိုက်ကွက်ဖြင့် တိုက်ခိုက်လိုက်ရာ မိုးစက်များမှာ ကောင်းကင်မှ အဆက်မပြတ် ကျဆင်းလာသည်။

“ဒီလူက အင်မော်တယ်မိုးစက် ဂိုဏ်းရဲ့ နတ်ဘုရားသခင် ဖြစ်မလား” ယီယွင်မှာ အံ့အားသင့်စွာဖြင့် တွေးမိသည်။ သို့သော် အင်မော်တယ်မိုးစက် ဂိုဏ်းမှ နတ်ဘုရားသခင်တစ်ပါး မြစိမ်းသစ်သား မဟာကမ္ဘာသို့ ရောက်လာခြင်းမှာ ထူးဆန်းသည်တော့ မဟုတ်ပေ။

အလားတူ မိုးဓားတိုက်ကွက်ဖြင့် မိုးစက်ကလေးများမှာ ပူးပေါင်းကာ ကြေးဝါရောင် ဧရာမလူသား၏ ခေါင်းကို ထိမှန်သွားစေရန် ရည်ရွယ်ထားသည်။ ကြေးဝါရောင် ဧရာမလူသားသည် လာမည့် ဓားအလင်းတန်းများကြောင့် အန္တရာယ်ကို သတိပြုမိသွားသည်။

သူသည် ပြင်းထန်စွာ ဟိန်းဟောက်လိုက်ပြီး သူ၏ ခန္ဓာကိုယ်မှာ တုန်ခါသွားသည်။ ဗုန်း ကမ္ဘာမြေကြီးမှာ သံကြိုးများနှင့်အတူ တုန်ခါသွားသည်။ ချက်ချင်းဆိုသလိုပင် မရဏမြစ်၏ အမည်းရောင် ရေတိုင်များမှာ နေရာအသီးသီးမှ ရေလွှမ်းမိုးသကဲ့သို့ ပေါက်ထွက်လာသည်။

ဝေလငါးတစ်ကောင်က ရေကို စုပ်ယူသကဲ့သို့ ထိုရေတိုင်များမှာ ကြေးဝါရောင် ဧရာမလူသား၏ ခန္ဓာကိုယ်ထဲသို့ စီးဝင်သွားသည်။ ကြေးဝါရောင် ဧရာမလူသား၏ ခန္ဓာကိုယ်မှာ ချက်ချင်းဆိုသလို ပေရာနှင့်ချီ၍ ကြီးမားသွားပြီး သံကြိုးများမှာ တင်းကျပ်သွားကာ ဆူညံသွားသည်။

ဗုန်း........

ကြေးဝါရောင် ဧရာမလူသားသည် ပုဆိန်ကို ဝှေ့ယမ်းကာ ကောင်းကင်ကို ခုတ်လိုက်သည်။ ရုတ်တရက် ကောင်းကင်တွင် သွေးရောင် အက်ကြောင်းတစ်ခု ပေါ်လာသည်။ ထိုအက်ကြောင်းမှ ပြင်းထန်သော ယွမ်ချီများ ပေါက်ထွက်လာပြီး မိုးစက်များကို တစ်စစီ ဖျက်ဆီးပစ်လိုက်သည်။

သုံးကြိမ်တိုင်တိုင် ခုတ်လိုက်ပြီးနောက် မိုးစက်အားလုံး ပျောက်ကွယ်သွားသည်။ ထိုသေစေနိုင်သော ပုဆိန်မှာ မိုးစက်များ ပျောက်ကွယ်သွားပြီးနောက်တွင်လည်း ဆက်လက် ရွေ့လျားနေသည်။ နတ်ဘုရားသခင် အနည်းငယ်မှာ ပုဆိန်၏ ကောင်းကင်ကိုပင် ကွဲထွက်သွားစေနိုင်သော စွမ်းအားကို ရင်ဆိုင်ရချိန်တွင် သူတို့၏ မျက်နှာများမှာ ဖြူဖျော့သွားကြသည်။

ဗုန်း ......

ဗုန်း .......

ဗုန်း ..........

နေရာလပ်များမှာ ထိုစွမ်းအားကြောင့် အပိုင်းပိုင်း ကြေမွသွားသည်။

ထိုအချိန်တွင် ကြေးဝါရောင် ဧရာမလူသားကို ရစ်ပတ်ထားသော သံကြိုးများမှာ ရုတ်တရက် တင်းကျပ်သွားသည်။ ဒါဇင်နှင့်ချီသော သံကြိုးများမှာ ရှေးဟောင်း နက်နဲသော စာလုံးများဖြင့် တောက်ပလာသည်။ ကောင်းကင်နှင့် မြေကြီးမှ လာသော စွမ်းအားမှာ ကြေးဝါရောင် ဧရာမလူသားကို ထိုနေရာတွင် တုပ်နှောင်ထားလိုက်သည်။

သံကြိုးများ၏ အဆုံးမှာ ကြေးဝါရောင် ဧရာမလူသား၏ အသားထဲသို့ စိုက်ဝင်သွားပြီး မကောင်းဆိုးဝါး သွေးနက်များ ပန်းထွက်လာသည်။ ကြေးဝါရောင် ဧရာမလူသား၏ ခန္ဓာကိုယ်မှာ ရုတ်တရက် တုန်ခါသွားပြီး ပုဆိန်မှာ ရပ်တန့်သွားသည်။

ဒါဇင်နှင့်ချီသော သံကြိုးများနှင့် နက်နဲသော အဆောင်တံဆိပ်များ၏ စွမ်းအားမှာ ကြေးဝါရောင် ဧရာမလူသား၏ တိုက်ကွက်ကို တားဆီးနိုင်ခဲ့သည်။ နတ်ဘုရားသခင်များနှင့် ထိပ်တန်းပုဂ္ဂိုလ်အားလုံးမှာ အခွင့်အရေးကို အသုံးချကာ ဧရာမလူသားနှင့် အကွာအဝေးတစ်ခုသို့ ဆုတ်ခွာသွားကြသည်။

ကြေးဝါရောင် ဧရာမလူသားမှာ သံကြိုးများဖြင့် တုပ်နှောင်ခံထားရကြောင်း သူတို့ အရင်ကတည်းက သိရှိထားပြီး ထိုသို့ဖြစ်လာမည်ကို ကြိုတင်မျှော်လင့်ထားခြင်း ဖြစ်သည်။ သူတို့မှာ ဧရာမလူသား၏ သေစေနိုင်သော အကွာအဝေးပြင်ပတွင် ရပ်နေကြသည်။ ကြေးဝါရောင် ဧရာမလူသားမှာ ပြန်လည် ငြိမ်သက်သွားသည်။

ရှေးဟောင်း သားရဲကြီးတစ်ကောင်ကဲ့သို့ပင် နောက်ဆုံး အသက်သေစေနိုင်သော တိုက်ကွက်ကို စောင့်ဆိုင်းနေပုံရသည်။ မင်္ဂလာမိုးစက် နတ်ဘုရား သည် အမြင့်နေရာတွင် ဓားကို ကိုင်ကာ မတ်တပ်ရပ်နေပြီး ကြေးဝါရောင် ဧရာမလူသားကို လေးနက်သော အမူအရာဖြင့် ကြည့်နေသည်။

“ကျွန်တော်တို့ လေးယောက်ရဲ့ ပူးပေါင်းတိုက်ခိုက်မှုနဲ့တောင် ကြေးဝါရောင် ဧရာမလူသားကို ဒဏ်ရာရအောင် မလုပ်နိုင်ဘူး။ ကျွန်တော်တို့ အခက်အခဲ ဖြစ်နေပြီ” ဟု နတ်ဆိုးမျက်လုံးသခင် က ပြောသည်။

“ခင်ဗျား တိုက်ခိုက်တဲ့အခါမှာ အင်အားအပြည့် မသုံးခဲ့ဘူး” ဟု မင်္ဂလာမိုးစက် နတ်ဘုရား က လှောင်ပြောင်သလို ပြောလိုက်သည်။

နတ်ဆိုးမျက်လုံးသခင် သည် ပြန်မပြောပေ။ ကြေးဝါရောင် ဧရာမလူသားမှာ ကြီးမားသော ခြိမ်းခြောက်မှုဖြစ်သော်လည်း မင်္ဂလာမိုးစက် နတ်ဘုရား မှာ သူ သတိထားရမည့်သူဖြစ်သည်။ ထို့အပြင် မင်္ဂလာမိုးစက် နတ်ဘုရား နှင့်အတူ အင်မော်တယ်မိုးစက် ဂိုဏ်းမှ နောက်ထပ် နတ်ဘုရားသခင်တစ်ပါးလည်း ရှိနေသည်။

သေခြင်းနိယာမ၏ မြေပြင်တွင် ပိတ်မိနေသည့် နတ်ဘုရားသခင် လေးပါးမှာ ကြေးဝါရောင် ဧရာမလူသားကို မတိုက်ခိုက်မီ အကွာအဝေးတစ်ခု ထိန်းထားရန် သဘောတူခဲ့ကြသည်။

သို့သော် ကြေးဝါရောင် ဧရာမလူသားမှာ အလွန် အားကြီးလွန်းသည်။ မည်သည့်နည်းပညာကိုပင် သုံးသုံး သူ့ကို သတ်ရန်မှာ မဖြစ်နိုင်သလောက်ပင်။ ထိုအချိန်တွင် မင်္ဂလာမိုးစက် နတ်ဘုရား သည် မြေပြင်ကို ကြည့်လိုက်ရာ တစ်စုံတစ်ခုကို သတိပြုမိသွားသည်။

သူသည် စစ်မြေပြင်ရှိ စွမ်းအင်မုန်တိုင်းများကို အနိုင်နိုင် ရင်ဆိုင်နေရသော ယွမ်ချီ အကာအကွယ်ငယ်တစ်ခုကို မြင်လိုက်ရသည်။ ထိုယွမ်ချီ အကာအကွယ်အတွင်းတွင် ယီယွင်ကို မြင်လိုက်ရသည့်အခါ အံ့အားသင့်သွားရသည်။

“ယီယွင်”

မင်္ဂလာမိုးစက် နတ်ဘုရား မှာ အနည်းငယ် တုန်လှုပ်သွားသည်။ ယီယွင်ကို ဤနေရာတွင် တွေ့ရလိမ့်မည်ဟု သူ လုံးဝ မမျှော်လင့်ထားခဲ့ပေ။