အခန်း ၁၀၃၄

အခန်း (၁၀၃၄) - လျှို့ဝှက်ဇုန်ထဲသို့ ဝင်ရောက်ခြင်း

ပြင်းထန်သော တိုက်ပွဲအတွင်းမှ ပန်းထွက်လာသည့် ယွမ်ချီအငွေ့အသက်များသည် လူတစ်ယောက်ကို ပြာဖြစ်သွားစေရန် လုံလောက်သည်။

“ဒီအိုမင်းနေတဲ့ အရိုးစုတွေကတော့ ခင်ဗျားတို့နှစ်ယောက်ကို နတ်ဘုရားသစ်ပင်ဆီ လုံခြုံစွာ ပို့ဆောင်ပေးနိုင်တာကလွဲရင် ဘာမှ အသုံးမဝင်တော့ပါဘူး” ဟု ယင်အဘွား က ပြောသည်။

“မင်းသမီးလေး၊ ဘာမှထပ်မပြောပါနဲ့တော့။ ဒီနတ်ဘုရားသစ်ပင်ရဲ့ ပင်စည်ကို ကိုယ်တိုင် ပြန်မြင်တွေ့ခွင့်ရတာတင် ကျွန်မအတွက် ကံကောင်းခြင်းပါပဲ” ယင်အဘွား က တိမ်ထိမတတ် မြင့်မားသည့် နတ်ဘုရားသစ်ပင်ကို အလွန်ရိုသေစွာ ကြည့်လိုက်သည်။

သူမသည် ဆေးလုံးတစ်လုံးကို ထပ်မံသောက်သုံးပြီးနောက် သူမ၏ တုတ်ကောက်ဖြင့် မြေပြင်ကို ဆောင့်လိုက်ရာ ယွမ်ချီ အကာအကွယ်တစ်ခု ပေါ်ထွက်လာသည်။

ချက်ချင်းဆိုသလိုပင် သူတို့ရှေ့ရှိ လေပြင်းမုန်တိုင်းများကို ယွမ်ချီ အကာအကွယ်က တားဆီးလိုက်သည်။

“ဒါကလည်း ကျွန်မရဲ့ ဆန္ဒတစ်ခုပါ။ သွားကြစို့”

ယွဲ့ရင်းရှာသည် ယင်အဘွား ၏ ကျောပြင်ကို ကြည့်ရင်း သွားများကို အနည်းငယ် ကြိတ်လိုက်ကာ ယီယွင်ကို ကြည့်ပြီး “သွားကြစို့” ဟု ပြောသည်။

ယင်အဘွား ၏ ယွမ်ချီ အကာအကွယ်အောက်တွင် ယီယွင်နှင့် ယွဲ့ရင်းရှာတို့ ရှေ့ဆက်တိုးကြသည်။

မုန်တိုင်းထဲတွင် ပြည့်နှက်နေသော စွမ်းအားများသည် ယွမ်ချီ အကာအကွယ်ကို ထိမှန်သည့်အခါ မီးတောင်ချော်ရည်များ ဆူပွက်နေသည့်အသံမျိုးကို သူတို့ ကြားနေရသည်။ ယွမ်ချီ အကာအကွယ်မှာ လျင်မြန်စွာ ကုန်ခမ်းနေပြီး နတ်ဘုရားသစ်ပင်နှင့် ကြေးဝါရောင် ဧရာမလူသားကြားရှိ အကွာအဝေးမှာလည်း တဖြည်းဖြည်း လျော့နည်းလာသည်။

ယီယွင်သည် ကြေးဝါရောင် ဧရာမလူသားကို မော့ကြည့်လိုက်သောအခါ အလွန်အံ့အားသင့်သွားသည်။ သူ့ခန္ဓာကိုယ်မှာ ဧရာမကြီးဖြစ်ပြီး မြေပြင်ပေါ်ရှိ သံကြိုးများမှာ တောင်တန်းများကဲ့သို့ ကြီးမားသည်။

ထိုသံကြိုးများသည် နတ်ဘုရားသစ်ပင်၏ အမြစ်များနှင့် ပင်စည်သို့ တိုက်ရိုက် ချိတ်ဆက်ထားပြီး ဧရာမလူသားကို ချုပ်နှောင်ထားသည့် ကြောက်မက်ဖွယ် စွမ်းအားများ ပါဝင်နေသည်။

“ဘိုးဘေးက ဒီကြေးဝါရောင်လူသားကို ချုပ်နှောင်ဖို့အတွက် နတ်ဘုရားသစ်ပင်ကို စိုက်ပျိုးခဲ့တာများလား” ဟု ယီယွင် တွေးလိုက်သည်။

ဘုန်း ဘုန်း ဘုန်း

ဧရာမလူသား၊ နတ်ဘုရားသခင်များ၊ အထွတ်အထိပ် ပုဂ္ဂိုလ်များမှာ ပြင်းထန်သော တိုက်ပွဲကို ဆင်နွှဲနေဆဲဖြစ်သည်။ သူတို့ဆီသို့ ချဉ်းကပ်လာသည်နှင့်အမျှ လေပြင်းမုန်တိုင်းမှာ ကြောက်မက်ဖွယ်ကောင်းသော မုန်တိုင်းကြီးအဖြစ် ပြောင်းလဲသွားသည်။

ယွမ်ချီ အကာအကွယ်မှာ တစ်စုံတစ်ခုနှင့် ထိမှန်လျှင် ကွဲထွက်တော့မည့်အလား ညည်းညူသံများ ထွက်ပေါ်လာသည်။ ယင်အဘွား မှာ နာကျင်မှုကြောင့် မျက်နှာ ရှုံ့မဲ့သွားသည်။

“ယင်အဘွား” ယွဲ့ရင်းရှာ အော်လိုက်သည်။

“ငါ အဆင်ပြေပါတယ်” ယင်အဘွား က လက်ဖြင့် အချက်ပြသည်။ သူမ၏ အိုမင်းနေသော မျက်နှာပေါ်တွင် ပုံမှန်မဟုတ်သည့် သွေးရောင်များ ဖြာထွက်လာသည်။

ဘုန်း...........

သူမ၏ တုတ်ကောက်မှာ မြေပြင်ကို ပြင်းထန်စွာ ဆောင့်လိုက်သည်။ ကွဲထွက်တော့မည့် ယွမ်ချီ အကာအကွယ်မှာ ချက်ချင်း ပြန်လည် တောင့်တင်းသွားသည်။

“ယင်အဘွား က...” ယီယွင် ဘေးနားရှိ ယွဲ့ရင်းရှာကို ကြည့်လိုက်သည်။

ယွဲ့ရင်းရှာ၏ မျက်လုံးများ နီရဲနေသည်။ သူမလည်း ရိပ်မိလိုက်သည်။ ဤအခြေအနေမျိုးတွင် ယင်အဘွား သည် သူမ၏ အသက်သွေးကြောများကို လောင်ကျွမ်းစေပြီး စွမ်းအားထုတ်သုံးနေခြင်းဖြစ်သည်။ သူမတွင် ကျန်ရှိနေသည့် သက်တမ်းမှာလည်း မည်မျှမှ မရှိတော့ပေ။

ယင်အဘွား ရှေ့ဆက်တိုးလာစဉ် သူမ၏ ပါးစပ်ထောင့်မှ သွေးစက်များ စီးကျလာပြီး မြေပြင်ပေါ်သို့ ပေကျသွားသည်။ သူမ၏ အမြင်အာရုံမှာ ဝါးတားတား ဖြစ်လာသည်။

“ပင်စည်က ရှေ့နားလေးမှာပဲ” ယီယွင် ပြောလိုက်သည်။

ဧရာမလူသားမှာ သူတို့နှင့် မလှမ်းမကမ်းတွင် ရှိနေသည်။ ကြေးဝါရောင် ကြွက်သားများမှာ သတ္တုကဲ့သို့ တောင့်တင်းပြီး အရေပြားပေါ်ရှိ ထူးဆန်းသော အစီအရင် တံဆိပ်များမှာ တောက်ပနေသည်။ ထိုတံဆိပ်များတွင် ကြီးမားသော စွမ်းအားများ ပါဝင်သည်။

“ဒီလူတွေက ဘယ်မျိုးနွယ်စုလဲ” ယီယွင်၏ အမြင်အာရုံထဲတွင် သန့်စင်ယန်ဓားနန်းတော် ပိုင်ရှင်နှင့် ဧရာမလူသား တိုက်ခိုက်နေသည့် မြင်ကွင်း ပေါ်လာပြန်သည်။

“ယီယွင်”

မင်္ဂလာမိုးစက် နတ်ဘုရား ၏ အသံကို ယီယွင်၏ စိတ်ထဲတွင် ကြားလိုက်ရသည်။

“တို့အားလုံးက မင်းကို အခွင့်အရေးတစ်ခု ဖန်တီးပေးဖို့ အစွမ်းကုန် ကြိုးစားနေတာ။ အခွင့်အရေးကို လက်လွှတ်မခံနဲ့”

ကောင်းကင်တွင် ရှိနေသော နတ်ဘုရားသခင် လေးပါးက တစ်ပြိုင်နက်တိုက်ခိုက်လိုက်ရာ ကောင်းကင်တစ်ခုလုံး အရောင်ပြောင်းသွားပြီး နေရာအနှံ့ အက်ကွဲသွားသည်။ ဧရာမလူသားမှာ အော်ဟစ်လိုက်ပြီး သူ၏ အရေပြားပေါ်ရှိ တံဆိပ်များမှ ကြောက်မက်ဖွယ် စွမ်းအားများ ပန်းထွက်လာသည်။

“မင်းသမီးလေး နောက်ဆုံး ခရီးလမ်းမှာ ကျွန်မ ကူညီပေးမယ်”

ယင်အဘွား ၏ အရှိန်အဝါမှာ ရုတ်တရက် တိုးတက်လာပြီး အနက်ရောင် အရိပ်တစ်ခုက ယွဲ့ရင်းရှာနှင့် ယီယွင်ကို လွှမ်းခြုံလိုက်သည်။ ယီယွင်သည် သူတို့နှစ်ယောက် လွင့်ထွက်သွားသလို ခံစားလိုက်ရသည်။ သူ နောက်သို့ လှည့်ကြည့်လိုက်သောအခါ ယင်အဘွား ၏ အကာအကွယ်မှာ အပိုင်းပိုင်း ပြတ်တောက်နေသည်ကို တွေ့လိုက်ရသည်။ သူမမှာ မုန်တိုင်းထဲသို့ လွင့်ပါသွားသည်။

ဘုန်း..........

ယီယွင်နှင့် ယွဲ့ရင်းရှာတို့ ပေတစ်ထောင်ကျော် အကွာတွင် သက်ဆင်းလိုက်သည်။

“ယင်အဘွား” ယွဲ့ရင်းရှာ လှည့်ကြည့်ချင်သည်။

“အဘွားယင် အသက်ရှင်ပါသေးတယ်။ ဒါပေမဲ့... ပြင်းထန်စွာ ဒဏ်ရာရသွားတာ။ သွားကြစို့” ယီယွင်က အေးစက်နေသော ယွဲ့ရင်းရှာ၏ လက်ကောက်ဝတ်ကို ကိုင်ကာ ဆွဲခေါ်လိုက်သည်။

သူတို့ ကျရောက်သည့် နေရာမှာ ဧရာမလူသားနှင့် အလွန်နီးကပ်နေသည်။ တိုက်ပွဲ၏ ရိုက်ခတ်မှုများ ရောက်လာသည့်အခါ ယီယွင်သည် မင်္ဂလာမိုးစက် နတ်ဘုရား ပေးထားသော ဓားစွမ်းအားကို ထုတ်လွှတ်လိုက်သည်။

ဘုန်း.....

ဓားစွမ်းအားနှင့် ရိုက်ခတ်မှုများ တိုက်မိကာ ပေါက်ကွဲသွားသည်။ ယီယွင်မှာ ဓားစွမ်းအား အနည်းငယ်ကိုသာ ထုတ်လွှတ်နိုင်သဖြင့် အပြည့်အဝ မကာကွယ်နိုင်ပေ။ သို့သော် ရလဒ်ကို စောင့်မနေဘဲ သူသည် ယွဲ့ရင်းရှာကို ဆွဲခေါ်ကာ ရှေ့သို့ အားကုန်ပြေးသည်။

အနောက်ဘက်မှ နောက်ထပ် ရိုက်ခတ်မှုတစ်ခု ရောက်လာသဖြင့် ယီယွင် လမ်းကြောင်းပြောင်းကာ နောက်ထပ် ဓားစွမ်းအားတစ်ခု ထုတ်လွှတ်လိုက်သည်။ ဓားစွမ်းအား နှစ်ခုစလုံး ကုန်သွားပြီ။

ထိုအချိန်တွင် ယီယွင်နှင့် ယွဲ့ရင်းရှာတို့ နတ်ဘုရားသစ်ပင်ရှေ့သို့ ရောက်ရှိသွားသည်။ နတ်ဘုရားသစ်ပင်မှာ မုန်တိုင်းများကြားထဲတွင်ပင် ရှေးဟောင်းကာလမှ အရာတစ်ခုကဲ့သို့ တည်ငြိမ်စွာ မတ်တပ်ရပ်နေသည်။

ယွဲ့ရင်းရှာသည် နတ်ဘုရားသစ်ပင်ကို ကြည့်ရင်း မှင်သက်နေသည်။ သူမ၏ မျက်ဝန်းထောင့်တွင် မျက်ရည်စများ ရှိနေသည်။

“နတ်ဘုရားသစ်ပင်... ဒီနေရာက မြစိမ်းသစ်သား အိမ်တော်ရဲ့ တကယ့်နေရာပဲ” ယွဲ့ရင်းရှာသည် နတ်ဘုရားသစ်ပင်၏ ပင်စည်ရှေ့တွင် ဒူးထောက်လိုက်သည်။

“တပည့် ယွဲ့ရင်းရှာ၊ မြစိမ်းသစ်သား အိမ်တော်ရဲ့ လျှို့ဝှက်ဇုန်ကို ဝင်ရောက်ခွင့် တောင်းခံပါတယ်”

သူမ၏ မျက်ရည်များ မြေပြင်သို့ စီးကျသွားပြီး သူမ၏ ခန္ဓာကိုယ်မှ ထူးခြားသော အရှိန်အဝါများ ထွက်ပေါ်လာသည်။ နတ်ဘုရားသစ်ပင်နှင့် သူမကြားတွင် ချိတ်ဆက်မှုတစ်ခု ပေါ်ပေါက်လာသကဲ့သို့ပင်။

ရှူး.........

နတ်ဘုရားသပင် ပင်စည်အောက်ခြေရှိ ဂူဝင်ပေါက်တစ်ခုမှ လေနုအေးတစ်ခု တိုက်ခတ်လာသည်။ ထိုဝင်ပေါက်ကို ယခင်က မတွေ့မိခဲ့သော်လည်း ယခုမူ ရုတ်တရက် ပေါ်ထွက်လာသည်။

“အဲဒါ... ကျမ်းစာတွေမှာ ပြောတဲ့ လျှို့ဝှက်ဇုန်ပဲ...” ယွဲ့ရင်းရှာက တုန်ယင်နေသောအသံဖြင့် ပြောသည်။ သူတို့သည် လူများစွာ၏ အသက်နှင့် မျှော်လင့်ချက်များကို တင်ဆောင်ထားပြီး ဤလောင်းကစားမှာ အဆုံးအဖြတ်ပင်ဖြစ်သည်။

“ဝင်ကြစို့” ယီယွင်သည် ယွဲ့ရင်းရှာကို ဆွဲခေါ်ကာ လျင်မြန်စွာပင် ဂူအတွင်းသို့ ဝင်ရောက်သွားသည်။