အခန်း ၁၄၁

အခန်း (၁၄၁) ကံကြမ္မာကို ထုတ်ယူခြင်း၊ အနန္တဝိညာဉ် သုံးချောင်းထောက် မီးဖိုကြီးကို ပြည့်စုံစေခြင်း

ဘွဲ့နာမည် အဆင့်တက်ခြင်း၊ အဆင့်မြင့် ကံကြမ္မာထုတ်ယူခွင့် တစ်ကြိမ်၊ အထွတ်အထိပ် ကံကြမ္မာထုတ်ယူခွင့် တစ်ကြိမ်နှင့် ဇာတ်ညွှန်း ပေါင်းစပ်ခွင့်။

ရှုချွမ်းက စနစ်၏ ဆုလာဘ်များအပေါ် အလွန်အမင်း စိတ်ကျေနပ်မှု ရှိနေခဲ့သည်။

"ထုတ်ယူမယ်"

ရှုချွမ်းက စိုးစဉ်းမျှ တုံ့ဆိုင်းမနေဘဲ ကံကြမ္မာကို ချက်ချင်း စတင်ထုတ်ယူလိုက်တော့သည်။

သူ၏ မျက်နှာထက်တွင် မျှော်လင့်ချက်အပြည့်ရှိသော အမူအရာတစ်ခု ပေါ်ထွက်လာခဲ့၏။

သူက ကံကြမ္မာကို မည်မျှပင် အကြိမ်ကြိမ် ထုတ်ယူခဲ့ဖူးပါစေဦး ရှုချွမ်းက အမြဲတမ်း မျှော်လင့်ချက်များဖြင့် ပြည့်နှက်နေခဲ့စမြဲ ဖြစ်သည်။

၎င်းမှာ လူတိုင်း၏ နှလုံးသားထဲတွင် ရှိနေတတ်သော ကံစမ်းလိုသည့် သဘာဝကြောင့် ဖြစ်ပေလိမ့်မည်။

'လောင်းကြေးထပ်လိုက်စမ်းပါ... စက်ဘီးကနေ ဆိုင်ကယ် ဖြစ်သွားနိုင်တာပဲ'

ဤနိယာမမှာ လူတိုင်း၏ စိတ်ထဲ၌ နက်ရှိုင်းစွာ စွဲထင်နေခဲ့ပြီး ရှုချွမ်းသည်လည်း ချွင်းချက်မဟုတ်ခဲ့ပေ။

ရှုချွမ်း၏ အမိန့်ပေးမှုနှင့်အတူ အဆင့်မြင့် ကံကြမ္မာထုတ်ယူခြင်းမှာ တရားဝင် စတင်လာခဲ့တော့သည်။

ခေတ္တမျှ စောင့်ဆိုင်းလိုက်ပြီးနောက် စနစ်၏ သတိပေးချက်တစ်ခု ထွက်ပေါ်လာခဲ့၏။

【ထုတ်ယူခြင်း ပြီးဆုံးပါပြီ】

【ဂုဏ်ယူပါသည်... သင်သည် အနီရောင် ကံကြမ္မာသစ် 【ကံကြမ္မာ ပြောင်းပြန်လှန်ခြင်း】 ကို ရရှိခဲ့ပါသည်】

【ကံကြမ္မာ ပြောင်းပြန်လှန်ခြင်း - အလွန်အမင်း အေးစက်လှသော အအေးပိုင်းဒေသ သို့ ရောက်ရှိနေပါက အပူချိန် ပိုမိုနိမ့်ဆင်းလေလေ အလွန်အမင်း ယန်စွမ်းအားပြင်းထန်သော ကျင့်စဉ်များကို ကျင့်ကြံရာတွင် ပိုမိုထိရောက် အစွမ်းထက်လေလေ ဖြစ်လိမ့်မည်】

၎င်းမှာ အနီရောင်အဆင့် ကံကြမ္မာတစ်ခု ဖြစ်သော်လည်း ရှုချွမ်းမှာ စိတ်ပျက်ခြင်းမရှိခဲ့ချေ။

ဘာပဲဖြစ်ဖြစ် ဤအဆင့် ကံကြမ္မာမှာပင် အလွန်အမင်း တန်ဖိုးကြီးလှပေသည်၊ လူအများစုတွင် ထိုကဲ့သို့သော ကံကြမ္မာမျိုးပင် ရှိမနေကြချေ။

ထို့အပြင် ဤကံကြမ္မာမှာ သူ၏ ကျင့်ကြံခြင်းကို မြှင့်တင်ပေးနိုင်သဖြင့် ပို၍ပင် ရှားပါးလှပေသည်။

"မဆိုးဘူး... တော်တော်လေး စိတ်ဝင်စားစရာကောင်းသားပဲ"

ရှုချွမ်းက ပြုံးလျက် ရေရွတ်လိုက်၏။

【ကံကြမ္မာသစ်ကို တပ်ဆင်ပြီးပါပြီ။ ကျေးဇူးပြု၍ စစ်ဆေးပါ】

စနစ်၏ သတိပေးချက် ပေါ်ထွက်လာခဲ့သည်နှင့်အမျှ ရှုချွမ်းသည် သူ၏ ခန္ဓာကိုယ်အတွင်း၌ နွေးထွေးသော အရှိန်အဝါတစ်ခု ဖြတ်သန်းစီးဆင်းသွားခဲ့ပြီး ခြေလက်များနှင့် အရိုးအဆစ်များဆီသို့ ပျံ့နှံ့သွားခဲ့သည်ကို ခံစားလိုက်ရသည်။

ထို့နောက် ချက်ချင်းဆိုသလိုပင် အချိန်အတော်ကြာအောင် တန့်နေခဲ့သော သူ၏ ကျင့်ကြံခြင်းနယ်ပယ်မှာ အနည်းငယ် ပြောင်းလဲတိုးတက်မည့် အရိပ်အယောင်များ ပြသလာခဲ့တော့၏။

ရှုချွမ်း၏ လက်ရှိတည်နေရာမှာ အစကတည်းက အလွန်အမင်း အေးစက်လှသော အအေးပိုင်းဒေသ ဖြစ်နေခဲ့သဖြင့် ဤကံကြမ္မာမှာ ချက်ချင်း အသက်ဝင်လာခဲ့ခြင်း ဖြစ်သည်။

သူ၏ ခန္ဓာကိုယ်အတွင်း၌ ပြီးပြည့်စုံသည့် မဟာယန်ကျင့်စဉ်မှာ အလိုအလျောက် လည်ပတ်သွားခဲ့ပြီး သူ၏ ကျင့်ကြံခြင်းအဆင့်မှာ တဖြည်းဖြည်းချင်း မြင့်တက်လာခဲ့တော့သည်။

အရှိန်အဟုန်မှာ မမြန်ဆန်လှသော်လည်း တည်ငြိမ်စွာဖြင့် မြင့်တက်နေခဲ့ခြင်း ဖြစ်၏။

ဤအခိုက်အတန့်တွင်မူ ကံကြမ္မာသစ်ဖြစ်သည့် 【ကံကြမ္မာ ပြောင်းပြန်လှန်ခြင်း】 မှာ သူ၏ ဇာတ်ညွှန်းအချက်အလက်ထဲတွင် ပေါ်ထွက်နေခဲ့ပြီ ဖြစ်သည်။

ရှုချွမ်းက ခေါင်းညိတ်လိုက်ပြီးနောက် သူ၏ အကြည့်များကို ပြန်လည်ရုပ်သိမ်းလိုက်ကာ နောက်ထပ် ရောက်ရှိလာတော့မည့် အထွတ်အထိပ် ကံကြမ္မာထုတ်ယူခြင်းဆီသို့ အာရုံစိုက်လိုက်တော့သည်။

၎င်းမှာ ယနေ့၏ အဓိက အပိုင်းအစပင် ဖြစ်၏။

ဤအထွတ်အထိပ် ကံကြမ္မာထုတ်ယူခြင်းတွင်မူ အနိမ့်ဆုံး ရရှိနိုင်မည့် ကံကြမ္မာမှာပင် အနီရောင်အဆင့် ရှိပေသည်။

"လာစမ်း... ဒီနေ့ ငါ့ရဲ့ ကံတရားက ဘယ်လောက်အထိ ကောင်းမလဲဆိုတာ ကြည့်ရသေးတာပေါ့"

ရှုချွမ်းက လက်နှစ်ဖက်ကို ပွတ်သပ်ရင်း ကံစမ်းမဲနှိုက်ခြင်းကို စတင်လိုက်တော့၏။

【ထုတ်ယူနေပါသည်... ကျေးဇူးပြု၍ ခေတ္တစောင့်ဆိုင်းပါ】

【ထုတ်ယူခြင်း ပြီးဆုံးပါပြီ】

【ဂုဏ်ယူပါသည်... သင်သည် ရွှေရောင်ကံကြမ္မာတစ်ခုဖြစ်သည့် 【တိုက်ပွဲတိုင်းတွင် ပြိုင်ဘက်ကင်း 】 ကို ရရှိခဲ့ပါသည်】

【တိုက်ပွဲတိုင်းတွင် ပြိုင်ဘက်ကင်း - ပိုမိုတိုက်ခိုက်လေလေ ပိုမိုရဲရင့်လာလေလေဖြစ်ပြီး တိုက်ပွဲတိုင်းတွင် ပြိုင်ဘက်ကင်း လိမ့်မည်။ တိုက်ခိုက်နေစဉ်အတွင်း ရန်သူက ပိုမိုအင်အားကြီးမားလေလေ၊ အန္တရာယ်က ပိုမိုကြီးမားလေလေ ဖြစ်ပါက မိမိထုတ်ဖော်နိုင်မည့် ခွန်အားမှာ ပိုမိုပြင်းထန်လာလေလေ ဖြစ်လိမ့်မည်】

နောက်ထပ် ရွှေရောင်ကံကြမ္မာတစ်ခု။

စူးရှတောက်ပလှသော ရွှေရောင်အလင်းတန်းများနှင့်အတူ 【တိုက်ပွဲတိုင်းတွင် ပြိုင်ဘက်ကင်း 】 က ရှုချွမ်း၏ မျက်စိရှေ့မှောက်တွင် ပေါ်ထွက်လာခဲ့ရာ ရှုချွမ်းကိုယ်တိုင်ပင် အနည်းငယ် အံ့အားသင့်သွားခဲ့ရတော့သည်။

အထွတ်အထိပ် ကံကြမ္မာထုတ်ယူခြင်းမှ ရွှေရောင်ကံကြမ္မာကို ရရှိနိုင်မည့် အခွင့်အလမ်းမှာ ပိုမိုမြင့်မားသည်ဆိုသော်လည်း မိမိကဲ့သို့ ကံကြမ္မာထုတ်ယူသည့် အကြိမ်တိုင်းတွင် ရွှေရောင်ကံကြမ္မာကို ဆက်တိုက် ရရှိနိုင်မည့်သူမျိုး မည်သို့ ရှိနိုင်ပါမည်နည်း။

၎င်းမှာ ကောင်းကင်ဘုံ၏ သဘာဝကို ဆန့်ကျင်သော ကံကောင်းမှုမျိုးပင် ဖြစ်ချေသည်။

ဤကံကြမ္မာမှာ အကျပ်အတည်းများနှင့် ရင်ဆိုင်ရချိန်တွင် ပေါက်ကွဲထွက်လာမည့် စွမ်းအားမျိုး ဖြစ်ပြီး ရန်သူက ပိုမိုသန်မာ လေလေ၊ ဘေးအန္တရာယ်က ပိုမိုကြီးမားလေလေ မိမိထုတ်ဖော်နိုင်မည့် ခွန်အားက ပိုမိုပြင်းထန်လာလေလေ ဖြစ်ပေလိမ့်မည်။

နောင်အနာဂတ်တွင် ရှုချွမ်းအနေဖြင့် မိမိကိုယ်ကိုယ် အန္တရာယ်ရှိသော အခြေအနေများထဲသို့ ရောက်ရှိအောင် ပြုလုပ်လိမ့်မည်မဟုတ်သည်မှာ သေချာသလောက် ရှိသော်လည်း ဤကံကြမ္မာ ရှိနေခြင်းက သူ၏ ခွန်အားအတွက် နောက်ထပ် အကာအကွယ်အလွှာတစ်ခု ထပ်မံရရှိသွားသကဲ့သို့ပင် ဖြစ်၏။

"ဒီကံကြမ္မာက ကြည့်ရတာ... တကယ့် ရွေးချယ်ခံရတဲ့ ဇာတ်လိုက်တစ်ယောက်လို ခံစားချက်မျိုး ပေးတာပဲ"

ရှုချွမ်းက ခပ်ဖွဖွ ရယ်မောရင်း ပြောလိုက်သည်။

【ကံကြမ္မာသစ်ကို တပ်ဆင်ပြီးပါပြီ။ ကျေးဇူးပြု၍ စစ်ဆေးပါ】

သို့သော် ဤရွှေရောင်ကံကြမ္မာကို တပ်ဆင်လိုက်ချိန်တွင်မူ သူ၏ ခန္ဓာကိုယ်၌ ထူးခြားသော ပြောင်းလဲမှုတစ်စုံတစ်ရာ ပေါ်ထွက်လာခြင်း မရှိခဲ့ချေ။

ရှုချွမ်းက မတတ်သာဘဲ ခေါင်းခါလိုက်မိပြီး ၎င်းကို ဆက်လက်အာရုံမစိုက်တော့ချေ။

၎င်းက ထိုနေရာ၌ ရှိနေပြီဖြစ်ရာ နောင်အနာဂတ်တွင် အခွင့်အခါသင့်လာပါက ၎င်း၏ အစွမ်းကို သေချာပေါက် ခံစားရမည် ဖြစ်ပေသည်။

ကံကြမ္မာထုတ်ယူခြင်းများ ပြီးဆုံးသွားခဲ့ပြီးနောက်တွင်မူ ဇာတ်ညွှန်းကို ပေါက်စပ်ရမည့် အချိန်သို့ ရောက်ရှိလာခဲ့ပြီ ဖြစ်၏။

"ဇာတ်ညွှန်းကို ပေါင်းစပ်လိုက်မယ်"

ရှုချွမ်းက ပြောလိုက်သည်။

သူ၏ အသံကျသွားခဲ့သည်နှင့်တစ်ပြိုင်နက်...

ချန်ဖုန်း၏ "အနန္တဝိညာဉ်တို့၏ ဘိုးဘေး" ဆိုသော ဇာတ်ညွှန်းမှာ ရှုချွမ်း၏ ခန္ဓာကိုယ်အတွင်းသို့ ချက်ချင်းပင် ပေါင်းစပ်ဝင်ရောက်သွားခဲ့တော့၏။

ထိုအခိုက်အတန့်၌ပင် ကြီးမားလှသော ပြောင်းလဲမှုတစ်ခု စတင်ဖြစ်ပေါ်လာခဲ့သည်။

ပထမဆုံးအနေဖြင့် ကံကြမ္မာ ပင် ဖြစ်၏။

ရှုချွမ်းက ကောင်းကင်ထက်သို့ မော့ကြည့်လိုက်သည်။

ကြီးမားလှသော နတ်ဘုရားအလင်းတန်းကြီးတစ်ခုသည် ဧရာမ မီးဖိုအိုးကြီးတစ်ခုအဖြစ်သို့ ပြောင်းလဲသွားခဲ့ပြီး ၎င်း၏အထက်တွင် အနန္တ သက်ရှိသက်မဲ့ အပေါင်းကို ထုဆစ်ထားကာ ယခုအချိန်တွင် တောက်ပစွာ လင်းလက်နေခဲ့သည်ကိုသာ သူ မြင်တွေ့လိုက်ရတော့၏။

၎င်းမှာ ချန်ဖုန်း၏ ဘဝဇာတ်ညွှန်းက ထုတ်ဖော်ပြသလိုက်သော ပုံရိပ်ပင် ဖြစ်သည်။

ချန်ဖုန်း၏ အဓိက ရွှေလက်ချောင်းမှာ ထိုအနန္တဝိညာဉ် သုံးချောင်းထောက် မီးဖိုကြီးဖြစ်ပြီး ၎င်းမီးဖိုကြီးက သူ့ကို အားနည်းသောအဆင့်မှနေ၍ အထွတ်အထိပ်သို့ ရောက်ရှိအောင် ကူညီပေးခဲ့ခြင်းကြောင့် ဤအရာက ပုံရိပ်အဖြစ် ပေါ်ထွက်လာခဲ့ခြင်း ဖြစ်ပေသည်။

ထိုဧရာမ မီးဖိုကြီး၏ ကောင်းချီးပေးမှုအောက်တွင် ရှုချွမ်း၏ ကံဇာတာမှာ နောက်တစ်ကြိမ် ကမ္ဘာမြေကြီး တုန်ဟည်းသွားလောက်အောင် ပြောင်းလဲသွားခဲ့ရပြန်သည်။

သူ၏ ကံဇာတာမှာ ယခင်က သူ ကြုံတွေ့ခဲ့ဖူးသော ရွေးချယ်ခံရသည့် ဇာတ်လိုက်များထက်မက အဆပေါင်းများစွာ ပိုမိုပြင်းထန် ထူထပ်လာခဲ့ပြီ ဖြစ်၏။

သူ၌ ဇာတ်လိုက်တစ်ဦး၏ အဆင့်အတန်း မရှိသော်လည်း ဇာတ်လိုက်ထက်ပင် ပိုမိုကြောက်မက်ဖွယ်ကောင်းသော ကံကြမ္မာ မျိုးကို ပိုင်ဆိုင်ထားခဲ့ပြီ ဖြစ်သည်။

ယခုအချိန်တွင် ရှုချွမ်း၏ အခြေအနေကို ဤသို့ပင် ဖော်ပြရပေလိမ့်မည်။

စိတ်ကူးရရုံမျှဖြင့်ပင် ရှုချွမ်း၏ ဇာတ်ညွှန်းအချက်အလက်များမှာ သူ၏ မျက်စိရှေ့မှောက်တွင် ထပ်မံပေါ်ထွက်လာခဲ့တော့၏။

【အမည် - ရှုချွမ်း】

【ကျင့်ကြံခြင်းနယ်ပယ် - နိဗ္ဗာနနယ်ပယ် အဆင့် ၂】

【ပါရမီ - ပြိုင်ဘက်ကင်း ဘုရင်】

【ကံကြမ္မာ - ကံတရားကို ပြောင်းပြန်လှန်နိုင်သူ (ရွှေရောင်)၊ သိုင်းပညာကျွမ်းကျင်သူ (ရွှေရောင်)၊ တိုက်ပွဲတိုင်းတွင် ပြိုင်ဘက်ကင်း (ရွှေရောင်)၊ ရွေးချယ်ခံရသော ဇာတ်လိုက် (ရွှေရောင်)၊ တစ်ချက်ထိုး လူသား (ခရမ်းရောင်)၊ လူနှင့် ဓား တစ်သားတည်း (ခရမ်းရောင်)၊ ဓားဝိညာဉ်မျိုးစေ့ (အနီရောင်)၊ ကံကြမ္မာ ပြောင်းပြန်လှန်ခြင်း (အနီရောင်)၊ ပြိုင်ဘက်ကင်းပြီး သန့်စင်ခြင်း(အနီရောင်)၊ သမာဓိချီ (အပြာရောင်)】

【နတ်ဘုရား စွမ်းရည် - ရွှေကျီးကန်းသက်တန့်အသွင်ပြောင်းခြင်းကျင့်စဉ်၊ နေမင်းအစစ်အမှန်မီးတောက်၊ အဆတစ်ရာ တိုးပွားခြင်း၊ မူလအစကို ထိုးထွင်းသိမြင်နိုင်ခြင်း】

【ဘဝဇာတ်ညွှန်း - "အနန္တနတ်ဘုရား ကျင့်စဉ်" နှင့် "အနန္တဝိညာဉ်တို့၏ ဘိုးဘေး" တို့ ပေါင်းစပ်ထားသော အခြေအနေ】

【ဘဝလမ်းကြောင်း - သင်သည် ကံတရားကို ပြောင်းပြန်လှန်နိုင်စွမ်း ရှိသဖြင့် အတိတ်နှင့် အနာဂတ်ကို ခြေရာခံ၍မရနိုင်ပါ】

【အခွင့်အလမ်း - သင်သည် ကံတရားကို ပြောင်းပြန်လှန်နိုင်စွမ်း ရှိသဖြင့် အတိတ်နှင့် အနာဂတ်ကို ခြေရာခံ၍မရနိုင်ပါ】

...

ရွှေရောင်‌လေးခု၊ ခရမ်းရောင်နှစ်ခု၊ အနီရောင်သုံးခုနှင့် အပြာရောင်တစ်ခု။

ဤမျှလောက် များပြားလှသော ကံကြမ္မာမျိုးမှာ တစ်ကြိမ်တစ်ခါမျှ မရှိခဲ့ဖူးသကဲ့သို့ ကြားပင်မကြားဖူးခဲ့ပါချေ။

၎င်းကို ရှုချွမ်းတစ်ဦးတည်း၏ ကိုယ်ပေါ်တွင်သာ မြင်တွေ့နိုင်ခြင်း ဖြစ်ပေသည်။

မိမိ၏ အချက်အလက်များကို ပြန်လည်ဖတ်ရှုပြီးနောက် ရှုချွမ်းသည် ယခင်က လျှို့ဝှက်ဆန်းကြယ် ရေခဲကျောက်စိမ်းကို ရှာဖွေတွေ့ရှိခဲ့သည့် နေရာသို့ ပြန်လည်ရောက်ရှိလာခဲ့သည်။

သူက ဤကာလအတွင်း ရရှိခဲ့သော အကျိုးအမြတ်များကို ဤနေရာ၌ ကောင်းမွန်စွာ စနစ်တကျ ပြန်လည်ပြင်ဆင်ရန် စိတ်ကူးထားခြင်း ဖြစ်၏။

ပထမဆုံးအနေဖြင့် ဤနေရာမှာ လုံလောက်စွာ ဆိတ်ငြိမ်လှပေသည်၊ ကြောက်မက်ဖွယ်ကောင်းလှသော အအေးဒဏ်ကို အံတုပြီး ဤနေရာသို့ ရောက်ရှိလာနိုင်မည့်သူမှာ အလွန်ပင် ရှားပါးလှ၏။

ဒုတိယအနေဖြင့် သူ ယခုလေးတင် ရရှိထားခဲ့သော ကံကြမ္မာသစ်မှာ ဤနေရာနှင့် ကွက်တိ ကိုက်ညီနေခဲ့ခြင်းပင်။

ဤအအေးပိုင်းဒေသကြီးမှာ ရှုချွမ်းအတွက် သီးသန့် ပြင်ဆင်ပေးထားသကဲ့သို့ပင် ဖြစ်နေခဲ့ရသည်။

ပလ္လင်ထက်တွင် တင်ပျဉ်ခွေထိုင်လျက် ရှုချွမ်းက ချန်ဖုန်းထံမှ သိမ်းဆည်းရမိခဲ့သော 'အနန္တဝိညာဉ် သုံးချောင်းထောက် မီးဖိုအိုးကြီး' နှင့် ယခင်က ကျောက်စိမ်းကံစမ်းသည့်ဆိုင်မှ ရရှိခဲ့သော 'အမည်းရောင်ကျောက်တုံး' တို့ကို ထုတ်ယူလိုက်တော့သည်။

အမည်းရောင်ကျောက်တုံးကို ခွဲလိုက်သောအခါ အတွင်းပိုင်း၌ အပိုင်းအစတစ်ခု အမှန်တကယ်ပင် ကိန်းဝပ်နေခဲ့ပြီး ၎င်းမှာ အနန္တဝိညာဉ် မီးဖိုကြီး၏ အဓိကအကျဆုံးသော အပိုင်းအစ ဖြစ်ပေလိမ့်မည်။

၎င်းတို့နှစ်ဦးမှာ မူလဇစ်မြစ်တစ်ခုတည်းမှ ဆင်းသက်လာခဲ့ကြခြင်းဖြစ်ရာ ရှုချွမ်း၏ လက်ထဲတွင် ပေါ်ထွက်လာခဲ့သည့် ထိုအခိုက်အတန့်၌ပင် အနန္တဝိညာဉ် မီးဖိုကြီးမှာ ရူးသွပ်မတတ် စတင်တုန်ရင်လာခဲ့ပြီး ထိုအပိုင်းအစဆီသို့ ဦးတည်ပျံသန်းသွားရန် ကြိုးပမ်းလာခဲ့တော့သည်။

သို့သော်လည်း ရှုချွမ်းက ၎င်းကို လက်ထဲ၌ တင်းတင်းကြပ်ကြပ် ချုပ်ကိုင်ထားခဲ့သဖြင့် စိုးစဉ်းမျှ မလှုပ်ရှားနိုင်ခဲ့ချေ။

စနစ်က ပေးအပ်ထားသော သတင်းအချက်အလက်များအရ ပြည့်စုံသွားခဲ့သော အနန္တဝိညာဉ် မီးဖိုကြီးမှာ ဆဋ္ဌမအဆင့် ဧကရာဇ်လက်နက် သို့မဟုတ် 'မူလ ဝိညာဉ်ရတနာ' နှင့် ညီမျှပေသည်။

သို့သော်လည်း ချန်ဖုန်း၏ လက်ထဲတွင် ရှိနေစဉ်ကမူ ၎င်းမီးဖိုကြီးမှာ ထိုကဲ့သို့သော မူလဝိညာဉ်ရတနာ၏ စွမ်းအားမျိုးကို စိုးစဉ်းမျှ ထုတ်ဖော်ပြသနိုင်ခြင်း မရှိခဲ့ပါချေ။

ဤအချက်က ရှုချွမ်းကို အနည်းငယ် ဝေခွဲမရ ဖြစ်စေခဲ့ရသည်။

ရှုချွမ်းက ထိုအပိုင်းအစကို ကောက်ယူကာ ခေတ္တမျှ စူးစမ်းလေ့လာခဲ့သော်လည်း မည်သည့်အရာကိုမျှ ထူးခြားစွာ ရှာဖွေတွေ့ရှိခြင်း မရှိခဲ့ချေ။

မတတ်သာသည့်အဆုံး ရှုချွမ်းက တုန်ရင်နေသော အနန္တဝိညာဉ် မီးဖိုကြီးကို ဖိနှိပ်လိုက်ပြီးနောက် ထိုအပိုင်းအစကို အနန္တဝိညာဉ် မီးဖိုကြီး၏ ပျက်စီးယိုယွင်းနေသော နေရာထက်သို့ ဂရုတစိုက်ဖြင့် တပ်ဆင်လိုက်တော့သည်။

"ဘုန်း..."

ရှုချွမ်းက ၎င်းကို တပ်ဆင်လိုက်သည်နှင့်တစ်ပြိုင်နက် ယခင်က သာမန်မျှသာ ထင်မှတ်ခဲ့ရသော အနန္တဝိညာဉ် မီးဖိုကြီးထံမှ တောက်ပလွန်းလှသော နတ်ဘုရားအလင်းတန်းများ ရုတ်တရက် ပွင့်ထွက်လာခဲ့ပြီး အလွန်အမင်း အစွမ်းထက်လှသော အော်ရာတစ်ခု ထွက်ပေါ်လာခဲ့ရာ ပလ္လင်တစ်ခုလုံးကို ချက်ချင်း ဖုံးလွှမ်းသွားခဲ့ရုံမျှမက မိုင်ပေါင်း တစ်သိန်းကျော်ရှိသော ပတ်ဝန်းကျင် ဧရိယာကြီးတစ်ခုလုံးဆီသို့ တဟုန်ထိုး ရိုက်ခတ်သွားခဲ့တော့သည်။

ထိုအခိုက်အတန့်၌ပင်...

အတိုင်းအဆမရှိလှသော မိစ္ဆာမျိုးနွယ်စုဝင် အမြောက်အမြားမှာ ထိတ်လန့်တုန်လှုပ်သွားခဲ့ရပြီး ကြီးမားလှသော ကပ်ဘေးကြီးတစ်ခု ဆိုက်ရောက်တော့မည်ကဲ့သို့ ခံစားလိုက်ရသဖြင့် မြေပြင်ပေါ်တွင် ဝပ်စင်းလိုက်ကြရတော့သည်။

ထို့အပြင် ရှုချွမ်းနှင့် အတော်အတန် နီးကပ်သောနေရာတွင် ရှိနေကြသည့် ပါရမီရှင်အချို့မှာလည်း ထိုပြင်းထန်လှသော ဖိနှိပ်မှုအော်ရာကြောင့် ချက်ချင်းပင် စိတ်အာရုံများ ဝေဝါးသွားခဲ့ရတော့၏။

ထို့နောက်တွင်မူ သူတို့သည် မျက်လုံးများ ပြူးကျယ်သွားခဲ့ကြပြီး အလွန်အမင်း အေးစက်လှသော အအေးပိုင်းဒေသဆီသို့ လှမ်းမြော်ကြည့်လိုက်ကြသည်။

သူတို့၏ မျက်လုံးများထဲတွင်မူ အတိုင်းအဆမရှိသော ထိတ်လန့်ကြောက်ရွံ့မှုများ အထင်အရှား ပေါ်ထွက်နေခဲ့ကြတော့သည် ဖြစ်ပေတော့သည်။