အခန်း ၂၆၃

အခန်း ၂၆၃ - ဟင်းလင်းပြင် အနက်ရောင်တံခါး၊ အမွေးထူသော လက်မောင်း

"မင်းက မူလဝိညာဉ်ကျောက်တုံးထဲမှာ ဒီအချိန်တစ်လျှောက်လုံး ချိတ်ပိတ်ခံထားရတာဆိုတော့... အပြင်မှာ ဘာတွေ ဖြစ်ခဲ့တယ်ဆိုတာကို မင်း သဘာဝကျကျပဲ သိမှာမဟုတ်ဘူးလေ... ဒီကိစ္စက မင်းနဲ့ ဘာမှမဆိုင်ပါဘူး... ထလော့..."

ရီယွင်က တည်ငြိမ်စွာ ပြောလိုက်ပြီး တစ်ချိန်တည်းမှာပင် လွမ်ငှက်၏ ကိုယ်ခန္ဓာကို မတ်တတ်ရပ်စေရန် သူ၏ ဝိညာဉ်စွမ်းအားများကို လွှတ်ထုတ်လိုက်သည်။

လွမ်ငှက်မှာ ဘေးတွင် ရပ်နေပြီး အနေခက်နေကာ ဘာပြောရမှန်းမသိ ဖြစ်နေခဲ့သည်။

ရီယွင်၏ အနောက်တွင် ရပ်နေကြသော ကြောင်နက်ကြီးနှင့် အခြားသူများမှာ ဖြစ်စဉ်တစ်ခုလုံးကို မြင်တွေ့လိုက်ရသည့်အခါ အလွန်အမင်း တုန်လှုပ်သွားခဲ့ကြပြီး သူတို့၏ မျက်နှာများပေါ်တွင် မယုံကြည်နိုင်မှုများ အထင်းသား ပေါ်လွင်နေခဲ့သည်။

"ဒီကစီနီယာကြီး... စီနီယာက နှစ်ပေါင်း တစ်သိန်းတိုင်တိုင် အသက်ရှင်ခဲ့တာလား..."

ကြောင်နက်ကြီးက မျက်လုံးပြူးကာ ရဲဝံ့စွာ မေးမြန်းလိုက်သည်။

၎င်း၏ မှတ်ဉာဏ်ထဲတွင် ချန်းနန်ကုန်းမြေကြီးပေါ်၌ မည်သူကမျှ နှစ်ပေါင်း တစ်သိန်းတိုင်တိုင် အသက်ရှင်ခဲ့ဖူးခြင်း မရှိချေ။

မိစ္ဆာမျိုးနွယ်များက သက်တမ်း ရှည်ကြသည်ဟု ဆိုကြသော်လည်း ထာဝရနယ်ပယ်ရှိ အစွမ်းထက် မိစ္ဆာများပင်လျှင် နှစ်ပေါင်း တစ်သိန်းတိုင်တိုင် အသက်မရှင်နိုင်ကြချေ။

"ဒါက တော်တော်လေးတော့ ရှက်စရာကောင်းပါတယ်... ငါက မူလဝိညာဉ်ကျောက်တုံးကို အားကိုးပြီးမှ နှစ်ပေါင်း တစ်သိန်း အသက်ရှင်နိုင်ခဲ့တာပါ... ဒါပေမဲ့ အခု ငါ့ရဲ့ ရုပ်ပိုင်းဆိုင်ရာ ကိုယ်ခန္ဓာက ဆွေးမြည့်နေပြီဖြစ်ပြီး... ငါ့ရဲ့ မူလဝိညာဉ်ကလည်း အားနည်းနေပြီ... အများဆုံး ငါ နောက်ထပ် အနှစ်တစ်ရာလောက်ပဲ အသက်ဆက်ရှင်နိုင်တော့မယ်..."

လွမ်ငှက်က ပြန်လည်ဖြေကြားလိုက်ရာ ၎င်း၏ မျက်နှာပေါ်တွင် ရှက်ရွံ့နေသည့် အမူအရာများ ပေါ်လွင်နေခဲ့သည်။

"ဒါက တကယ်ကို မယုံနိုင်စရာပဲ..."

ကြောင်နက်ကြီးက တီးတိုးရေရွတ်လိုက်သည်။ ၎င်းက လေထဲတွင် လွင့်မျောနေပြီး ယခုအခါတွင် သာမန်ကျောက်တုံး တစ်တုံးနှင့် တူနေသော မူလဝိညာဉ်ကျောက်တုံးကို ငေးကြည့်နေခဲ့ရာ ၎င်း၏ မျက်လုံးများတွင် ပြင်းပြသော အလင်းတန်းတစ်ခု တောက်ပနေခဲ့သည်။

'မူလဝိညာဉ်ကျောက်တုံးတွေက တကယ့်ကို အံ့ဩစရာကောင်းတာပဲ...'

မူလဝိညာဉ်ကျောက်တုံးများ၏ နာမည်ကျော်ကြားမှုကို သူ ကြားဖူးသော်လည်း တစ်ခါမျှ မမြင်တွေ့ခဲ့ဖူးချေ။

မူလဝိညာဉ်ကျောက်တုံးများမှာ အလွန်တရာ ရှားပါးလှပေသည်။ ချန်းနန်ကုန်းမြေကြီးပေါ်တွင် မူလဝိညာဉ်ကျောက်တုံး တစ်ခု ပေါ်ထွက်လာတိုင်း ဤသည်က သွေးထွက်သံယို အားပြိုင်မှု တစ်ခုကို အမြဲတမ်း ဖြစ်ပေါ်စေလေ့ရှိသည်။

မည်သို့ပင်ဆိုစေ မူလဝိညာဉ်ကျောက်တုံး တစ်ခုကို ရယူပြီး ထိုကျောက်တုံးအတွင်း၌ ကိုယ့်ကိုယ်ကိုယ် ချိတ်ပိတ်ရန် အထူးနည်းလမ်း တစ်ခုကို အသုံးပြုခြင်းက လူတစ်ယောက်၏ သက်တမ်း ကုန်ဆုံးမှုကို နှေးကွေးစေနိုင်ပေသည်။

သို့သော် မူလဝိညာဉ်ကျောက်တုံး တစ်ခု၏ ချိတ်ပိတ်နိုင်စွမ်းမှာ အကန့်အသတ်မရှိ မဟုတ်ချေ။ ယေဘုယျအားဖြင့် မူလဝိညာဉ်ကျောက်တုံး တစ်ခုကို ချိတ်ပိတ်ခြင်းအတွက် အများဆုံး သုံးကြိမ်သာ အသုံးပြုနိုင်ပေသည်။

တစ်နည်းအားဖြင့် မူလဝိညာဉ်ကျောက်တုံး တစ်ခုအတွင်း၌ ချိတ်ပိတ်ခံရခြင်းက ၎င်း၏ မြုပ်ကွယ်နေသော စွမ်းအင်များကို ကုန်ခမ်းစေသည်။ အပြင်သို့ ထွက်ခြင်းနှင့် ထပ်မံချိတ်ပိတ်ခံရရန် ပြန်လည် ဝင်ရောက်ခြင်း ဖြစ်စဉ်က အသုံးပြုမှု နှစ်ကြိမ်အဖြစ် ရေတွက်ရပေသည်။

မူလဝိညာဉ်ကျောက်တုံး၏ အရည်အသွေး မြင့်မားလေလေ ၎င်းကို အသုံးပြုနိုင်သော အကြိမ်အရေအတွက် ပိုများလေလေ ဖြစ်သော်လည်း သုံးကြိမ်ထက် ပို၍ အသုံးပြု၍မရနိုင်ချေ။

လူသားမျိုးနွယ် ဖြစ်စေ မိစ္ဆာမျိုးနွယ် ဖြစ်စေ တစ်သီးပုဂ္ဂလများက သေလုမျောပါး အခြေအနေသို့ ရောက်ရှိနေခြင်း မဟုတ်ပါက သူတို့ကိုယ်သူတို့ မူလဝိညာဉ်ကျောက်တုံး တစ်ခုအတွင်း၌ လုံးဝ ချိတ်ပိတ်ကြမည် မဟုတ်ချေ။

မူလဝိညာဉ်ကျောက်တုံးများမှာ အလွန်တရာ အဖိုးတန်လွန်းလှရာ သူတို့၏ ချိတ်ပိတ်နိုင်စွမ်း အသုံးပြုမှုတိုင်းကို အချည်းနှီး အလဟဿ မဖြုန်းတီးပစ်နိုင်ချေ။

ရီယွင်က ပတ်ဝန်းကျင်ကို ဝေ့ကြည့်လိုက်ပြီး ဂရုမစိုက်စွာ ပြောလိုက်သည်။

"အခုဆိုရင် ဒီဝူခွန်းတောင်ပေါ်မှာ ဆက်ပြီး စူးစမ်းရှာဖွေစရာ ဘာမှ သိပ်မရှိတော့ဘူး... သွားကြစို့..."

ထိုသို့ပြောပြီးနောက် ရီယွင်က လေထဲမှ ဆင်းသက်လာပြီး တောင်ဆင်းလမ်းအတိုင်း ဖြည်းညင်းစွာ လျှောက်သွားခဲ့သည်။

လွမ်ငှက်က သူ၏နောက်မှ အနီးကပ် လိုက်ပါသွားပြီး လွန်ခဲ့သော နှစ်ပေါင်း တစ်သိန်းအတွင်း ဖြစ်ပျက်ခဲ့သော အဖြစ်အပျက်များစွာအကြောင်းကို သခင်ကြီးနှင့် ပြောဆိုရန် စိတ်အားထက်သန်နေခဲ့သည်။

ရီယွင်က တောင်ပေါ်မှ စတင်ဆင်းသက်လာသည်နှင့်တစ်ပြိုင်နက် ကောင်းကင်မျက်လုံးကို နောက်တစ်ကြိမ် အသက်သွင်းလိုက်ပြီး ဝူခွန်းတောင်ပေါ်ရှိ ကျင့်ကြံသူ အားလုံး၏ မှတ်ဉာဏ်များကို ဖျက်ပစ်လိုက်သည်။

ဝူခွန်းတောင်ပေါ်တွင် ရှိနေစဉ်အတွင်း ရီယွင်သည် ကျင့်ကြံသူများ၏ မှတ်ဉာဏ်များကို အကြိမ်များစွာ ဖျက်ပစ်ခဲ့ပြီး ဖြစ်သည်။ သူ ဤနေရာတွင် ရှိနေခဲ့သည်ကို မည်သူကမျှ မြင်တွေ့သွားမည်ကို သူ အလိုမရှိချေ။

ရီယွင်က သူ၏ လက်များကို နောက်ပစ်ကာ အေးအေးလူလူ လျှောက်လှမ်းနေပြီး လွမ်ငှက်က သူ၏ဘေးတွင် ရှိနေကာ ကြောင်နက်ကြီးနှင့် အခြားသူများကမူ နောက်ဘက် အတော်လေးခပ်လှမ်းလှမ်းမှ လိုက်ပါလာခဲ့ကြသည်။

ရီယွင်က အတားအဆီး တစ်ခုကို တည်ဆောက်လိုက်ပြီး သူ့ကိုယ်သူနှင့် လွမ်ငှက်ကို သီးခြား နေရာတစ်ခုတွင် ခွဲခြားထားလိုက်သည်။

လွမ်ငှက်မှာ နဂါးနတ်ဘုရားဂိုဏ်းမှ မွေးမြူထားသော မိစ္ဆာသားရဲတစ်ကောင်မျှသာ ဖြစ်သော်လည်း ၎င်းသည် နှစ်ပေါင်း တစ်သိန်းတိုင်တိုင် အသက်ရှင်ခဲ့ပြီး ဂိုဏ်းနှင့် ပတ်သက်၍ အကြောင်းအရာများစွာကို သိရှိထားသင့်ပေသည်။

"ဂိုဏ်းချုပ်... ကျွန်တော် ဂိုဏ်းချုပ်ကို ပြောပြစရာတွေ အများကြီး ရှိတယ်..."

အတားအဆီး ပေါ်လာသည်နှင့်တစ်ပြိုင်နက် လွမ်ငှက်၏ မျက်နှာအမူအရာ အနည်းငယ် ပြောင်းလဲသွားပြီး ၎င်းက လေးနက်သော မျက်နှာထားဖြင့် ပြောလိုက်သည်။

"ပြောပါ..."

ရီယွင်က ခေါင်းညိတ်ပြလိုက်သည်။

ထို့နောက် တစ်စုံတစ်ခုကို သတိရသွားသည့်အလား သူက ရယ်မောလိုက်ပြီး ပြောလိုက်သည်။

"နှစ်ပေါင်း တစ်သိန်းတောင် ကြာသွားပြီပဲ... ငါက အခု ဂိုဏ်းချုပ် မဟုတ်တော့ပါဘူး... နဂါးနတ်ဘုရားဂိုဏ်းရဲ့ လက်ရှိ ဂိုဏ်းချုပ်က မျိုးဆက် (၂၉၈) ဆက်မြောက် လော့လီ ပဲ... အခုကစပြီး ငါ့ကို သခင်ကြီး လို့ပဲ ခေါ်ပါ..."

လွမ်ငှက်မှာ ခေတ္တမျှ မှင်တက်မိသွားခဲ့သော်လည်း အလျင်အမြန် သဘောတူကြောင်း ခေါင်းညိတ်ပြလိုက်သည်။

"နဂါးနတ်ဘုရားဂိုဏ်းမှာ မျိုးဆက်တွေ ရှိနေသေးတယ်ဆိုတော့... ကောင်းကင်ကြီးက တကယ် မျက်စိရှိတာပဲ..."

လွမ်ငှက်မှာ အတော်လေး စိတ်လှုပ်ရှားနေပုံရပြီး ၎င်း၏ မျက်လုံးများ အနည်းငယ် နီရဲလာခဲ့သည်။

သူသည် လက်ရှိတွင် အနက်ရောင်ဝတ်စုံကို ဝတ်ဆင်ထားသော ပိန်လှီသည့် သက်လတ်ပိုင်းအရွယ် အမျိုးသားတစ်ဦးအဖြစ် ပေါ်ထွက်နေပြီး ၎င်း၏ မျက်နှာအဆင်းမှာ ဖြူရော်နေကာ ရောဂါသည်တစ်ဦး၏ အော်ရာမျိုးကို ထုတ်လွှတ်နေခဲ့သည်။

စိတ်ခံစားမှု ပြင်းထန်လာသည့်အတွက် ၎င်း၏ မျက်နှာပေါ်တွင် သွေးရောင် အနည်းငယ် ပြန်လည်လင်းလက်လာခဲ့သည်။

"သခင်ကြီး... သခင်ကြီး ကျဆုံးသွားပြီး သိပ်မကြာခင်မှာပဲ နဂါးနတ်ဘုရားဂိုဏ်းကို ရှေးဟောင်း ဧရာမ မိစ္ဆာကြီးတွေက လာရောက်ဝိုင်းရံခဲ့ကြတယ်..."

လွမ်ငှက်က လေးနက်စွာ ပြောလိုက်သည်။

သူ၏ စိတ်အခြေအနေမှာ မှုန်ကုပ်သွားပြီး သူသည် အချိန်မြစ်ကြောင်းထဲသို့ ဝင်ရောက်သွားကာ အတိတ်က နဂါးနတ်ဘုရားဂိုဏ်းသို့ ပြန်လည်ရောက်ရှိသွားသကဲ့သို့ သူ၏ အမြင်အာရုံများမှာ ဝေဝါးသွားခဲ့သည်။

"ရှေးဟောင်း ဧရာမ မိစ္ဆာကြီးတွေက နဂါးနတ်ဘုရားဂိုဏ်းကို ဝိုင်းရံခဲ့တယ် ဟုတ်လား... ပျက်စီးဆုံးရှုံးမှုက ဘယ်လောက်တောင် ကြီးမားခဲ့လို့လဲ..."

ရီယွင်က မျက်မှောင်ကြုတ်လျက် မေးမြန်းလိုက်သည်။

"သခင်ကြီး... ရှေးဟောင်း ဧရာမ မိစ္ဆာကြီးတွေက သိပ်မများပါဘူး... ပြီးတော့ ကျွန်တော်တို့ နဂါးနတ်ဘုရားဂိုဏ်းရဲ့ ခွန်အားနဲ့ဆိုရင် သူတို့ကို ဟန့်တားထားနိုင်ပါတယ်... ဒါပေမဲ့... ကျွန်တော်တို့ နဂါးနတ်ဘုရားဂိုဏ်းကို တကယ် တိုက်ခိုက်ခဲ့တဲ့သူတွေက ရှေးဟောင်း ဧရာမ မိစ္ဆာကြီးတွေ မဟုတ်ပါဘူး..."

လွမ်ငှက်က အံ့အားသင့်ဖွယ်ကောင်းသော စကားတစ်ခွန်းကို ရုတ်တရက် ပြောလိုက်သည်။

"အိုး..."

ရီယွင်၏ မျက်လုံးများမှာ အနည်းငယ် ကျဉ်းမြောင်းသွားပြီး ၎င်းတို့ထဲတွင် ထက်မြက်သော အလင်းတန်းတစ်ခု ဝင်းခနဲ ဖြတ်သန်းသွားခဲ့သည်။

'ဒီတော့ နဂါးနတ်ဘုရားဂိုဏ်းကို တိုက်ခိုက်ခဲ့တဲ့ အဓိက အင်အားစုက ရှေးဟောင်း ဧရာမ မိစ္ဆာကြီးတွေ မဟုတ်ဘူးပေါ့... ဒါက တကယ်ကို ငါ့ရဲ့ မျှော်လင့်ထားမှုတွေထက် ကျော်လွန်နေတာပဲ...'

နန်ကုန်းယွီသည် ရှေးဟောင်း ဧရာမ မိစ္ဆာကြီးများကို ဦးဆောင်ကာ နဂါးနတ်ဘုရားဂိုဏ်းကို တိုက်ခိုက်နေသည်ကို ချင်ယောင် တစ်ကြိမ် မြင်တွေ့ခဲ့ဖူးသည်။ ရှေးဟောင်း ဧရာမ မိစ္ဆာကြီးများ၏ ခွန်အားကို အခြေခံ၍ စဉ်းစားကြည့်မည်ဆိုလျှင် သူတို့သည် နဂါးနတ်ဘုရားဂိုဏ်းနှင့် အမှန်တကယ် ယှဉ်ပြိုင်နိုင်စွမ်း ရှိကြပေသည်။

သို့သော် နဂါးနတ်ဘုရားဂိုဏ်းကို စစ်မှန်စွာ တိုက်ခိုက်ခဲ့သူများမှာ ရှေးဟောင်း ဧရာမ မိစ္ဆာကြီးများ မဟုတ်ဘဲ အခြားသော အင်အားစု တစ်ခု ဖြစ်လိမ့်မည်ဟု ရီယွင် မထင်မှတ်ထားခဲ့ချေ။

"ဘယ်သူလဲ..."

ရီယွင်၏ အသံမှာ တည်ငြိမ်နေသော်လည်း ဤသည်က ကျရောက်လာတော့မည့် မိုးသက်မုန်တိုင်းတစ်ခုအလား မယိမ်းယိုင်သော စိတ်ဆန္ဒတစ်ခုကို သယ်ဆောင်ထားပေသည်။

"အဲ့ဒါက အနက်ရောင် တံခါးတစ်ချပ် ပါ..."

လွမ်ငှက်က လေးနက်သော အမူအရာဖြင့် ပြောလိုက်သည်။

"အနက်ရောင် တံခါးတစ်ချပ် ဟုတ်လား..."

ရီယွင်၏ မျက်မှောင်များ တွန့်ချိုးသွားပြီး သူ၏ မျက်နှာပေါ်တွင် ထိတ်လန့်မှု အရိပ်အယောင်တစ်ခု ပေါ်ထွက်လာခဲ့သည်။

"သခင်ကြီး... ရှေးဟောင်း ဧရာမ မိစ္ဆာကြီးတွေက နဂါးနတ်ဘုရားဂိုဏ်းကို ဝိုင်းရံထားတုန်းက... တိုက်ပွဲက အရမ်းကို ဖရိုဖရဲ ဖြစ်နေခဲ့တာ... ငှက်တစ်ရာတောအုပ်လည်း ပျက်စီးသွားခဲ့တယ်... အဲ့ဒီအချိန်တုန်းက ကျွန်တော်နဲ့ အစ်ကိုကြီးက အရမ်းကို အားနည်းသေးတော့... အဲ့ဒီ ထာဝရနယ်ပယ် ရှေးဟောင်း ဧရာမ မိစ္ဆာကြီးတွေကို မယှဉ်နိုင်ခဲ့ဘူး... ဒါကြောင့် ကျွန်တော်တို့က အဝေးကို ပျံသန်းပြီး ထွက်ပြေးဖို့ စီစဉ်ခဲ့ကြတယ်..."

"ဒါပေမဲ့ ကျွန်တော်တို့ ကောင်းကင်ယံထက်ကို ပျံတက်သွားတဲ့အခါ... တိမ်တွေကြားထဲမှာ ပုန်းကွယ်နေတဲ့ ဧရာမ အနက်ရောင် တံခါးကြီး တစ်ချပ်ကို ကျွန်တော်တို့ တွေ့လိုက်ရတယ်... အဲ့ဒါက အဟကွဲလေးတစ်ခု ပွင့်နေပြီး အဲ့ဒီ အဟကွဲထဲကနေပြီးတော့ ရေတွက်လို့မရနိုင်တဲ့ အမွေးအမျှင် အမည်းရောင်လေးတွေ မိုးရွာကျလာသလို ကျဆင်းလာခဲ့တယ်... ဒီအမွေးအမျှင်တွေက အရမ်းကို သေးငယ်ပြီး... ကျလာတဲ့အချိန်မှာ ဘယ်လို အော်ရာမျိုးကိုမှ မထုတ်လွှတ်တဲ့အတွက်... သူတို့ကို ဘယ်သူမှ မသိနိုင်လောက်အောင်ကို ဖြစ်စေခဲ့တယ်..."

"ကျွန်တော်တို့ ဂိုဏ်းသား အများအပြားက ဒီအမွေးအမျှင် အမည်းရောင်တွေရဲ့ ဝင်ရောက် ကျူးကျော်မှုကို ခံခဲ့ရတယ်... အမွေးအမျှင်တွေက သူတို့ရဲ့ ကိုယ်ခန္ဓာတွေကို ဖောက်ထွင်းဝင်ရောက်သွားခဲ့တယ်... ကျင့်ကြံမှုအဆင့် နိမ့်တဲ့သူတွေက ချက်ချင်း သေဆုံးသွားကြပြီး... ကျင့်ကြံမှုအဆင့် မြင့်တဲ့သူတွေက ချက်ချင်း မသေဆုံးသွားကြပေမဲ့လည်း သူတို့ရဲ့ ကိုယ်ခန္ဓာ ဖွဲ့စည်းပုံတွေက ပြင်းပြင်းထန်ထန် ပျက်စီးသွားသလိုပဲ..."

ဤအကြောင်းကို ပြောနေစဉ် လွမ်ငှက်မှာ မတုန်ရီဘဲ မနေနိုင်တော့ချေ။ ထိုဧရာမ အနက်ရောင် တံခါးကြီးအကြောင်း တွေးတောလိုက်ရုံဖြင့် ၎င်းကို လွှမ်းမိုးနိုင်သော ကြောက်ရွံ့မှုများဖြင့် ပြည့်နှက်သွားစေခဲ့သည်။

"ဒီအနက်ရောင် တံခါးက... တော်တော်လေး ထူးဆန်းတာပဲ..."

ရီယွင်က သူ၏ မေးစေ့ကို ပွတ်သပ်ကာ ဂရုမစိုက်ဟန် ပြုံးလျက် တွေးတောလိုက်သည်။

'အဲ့ဒါက မှော်လက်နက် တစ်ခုလား... ဒါမှမဟုတ် နတ်ဘုရားကုန်းမြေကြီးက တစ်ယောက်ယောက်ရဲ့ နတ်ဘုရားစွမ်းရည် တစ်ခုများလား...'

ရီယွင်၏ စိတ်ထဲတွင် အတွေးများစွာ ဝင်းခနဲ ဖြတ်သန်းသွားခဲ့သည်။

"သခင်ကြီး... အဲ့ဒီအနက်ရောင် တံခါးက တကယ်ကို ထူးဆန်းတယ်... ကျွန်တော်နဲ့ အစ်ကိုကြီးက စူးစမ်းကြည့်ဖို့ ဆုံးဖြတ်လိုက်ပြီး အဲ့ဒီဆီကို ပျံသန်းသွားခဲ့တယ်... ကျွန်တော်တို့ အနီးကပ် ရောက်သွားတဲ့အခါ... တံခါးထဲမှာ ရှေ့နောက် လှုပ်ရှားနေတဲ့ အမွေးထူတဲ့ လက်မောင်း တစ်ဖက်ကို ကျွန်တော်တို့ တွေ့လိုက်ရတယ်... အဲ့ဒီ အမွေးအမျှင် အမည်းရောင် သေးသေးလေးတွေ အားလုံးက အဲ့ဒီလက်မောင်းဆီကနေ ကျလာတာပဲ..."

လွမ်ငှက်က ဆက်လက် ပြောပြနေခဲ့သည်။

"အမွေးထူတဲ့ လက်မောင်း ဟုတ်လား..."

လွမ်ငှက်၏ ဖော်ပြချက်ကို ကြားလိုက်ရသည့်အခါ ရီယွင်၏ မျက်မှောင်များ သိသိသာသာ တွန့်ချိုးသွားခဲ့သည်။

'တိမ်တွေကြားထဲက ဧရာမ အနက်ရောင် တံခါးကြီးက နွားမွေးလို သေးငယ်တဲ့ ရတနာ တစ်ခုခုကို ဖြန်းပက်နေတယ်လို့ ငါ အစက ထင်ထားခဲ့တာ...'

'ဒါပေမဲ့ အခုတော့... မယုံနိုင်စရာကောင်းလောက်အောင် ရက်စက်ကြမ်းကြုတ်တဲ့ သတ္တဝါ တစ်ကောင်က အဲ့ဒီထဲမှာ ပုန်းအောင်းနေပြီး ကောင်းကင်ကနေ ကျလာတဲ့ ဘေးဒုက္ခ တိုက်ခိုက်မှုကို လုပ်ဖို့အတွက် သူ့ရဲ့ လက်မောင်းကနေ အမွေးအမျှင် အမည်းရောင်တွေကို ဖယ်ရှားနေတာ ဖြစ်နိုင်ခြေ ပိုများနေတယ်...'

"သခင်ကြီး... အဲ့ဒီအနက်ရောင် လက်မောင်းကို မြင်လိုက်ရတော့ ကျွန်တော်နဲ့ အစ်ကိုကြီးက အရမ်းကို လန့်သွားခဲ့တယ်... အဲ့ဒါက ဘယ်လို မိစ္ဆာကောင်မျိုးလဲဆိုတာ သေချာ သိရအောင် ပိုပြီး အနီးကပ် သွားကြည့်ချင်ခဲ့တယ်... ဒါပေမဲ့ မထင်မှတ်ဘဲ အဲ့ဒီမိစ္ဆာကောင်က ကျွန်တော်တို့ကို တွေ့သွားတယ်... ကျွန်တော့်ကို ကာကွယ်ပေးဖို့ အစ်ကိုကြီးက သူ့ရဲ့ ဝိညာဉ်စွမ်းအား အားလုံးကို နတ်ဘုရားစွမ်းရည် တစ်ခုအဖြစ် ပြောင်းလဲလိုက်ပြီး... ကျွန်တော့်ကို မိုင်သောင်းချီ အဝေးကို ပို့ပေးခဲ့တယ်... ကျွန်တော် လွတ်မြောက်သွားခဲ့ပေမဲ့... အစ်ကိုကြီးကတော့ အဲ့ဒီအမည်မသိ မိစ္ဆာကောင်ရဲ့ သတ်ဖြတ်တာကို ခံလိုက်ရတယ်..."

ဤနေရာသို့ ရောက်သောအခါ လွမ်ငှက်၏ လည်ချောင်းများမှာ ဆို့နင့်နေပြီး မျက်ရည်များ စီးကျလာတော့သည်။

အခန်း ၂၆၃ ပြီးပါပြီ။

--