အခန်း ၁၄၄

အခန်း (၁၄၄) တောထဲကတာဝန်... ရင်သပ်ရှုမောဖွယ် မြင်ကွင်းကြီး

လယ်ယာခြံဝင်း၏ အနောက်ဘက်ရှိ တောင်တန်းကြီး၏ အခြေအနေများကို ရွှီယန် အကြမ်းဖျင်း နားလည်သဘောပေါက်နေပြီ ဖြစ်သည်။

အန္တရာယ်အများဆုံးမှာ သာမန်တောဝက်များထက် ပိုကြီးပြီး အလွန်ကြမ်းတမ်းသော တောဝက်ကြီးပင် ဖြစ်၏။ ၎င်းသည် သက်ရှိများကို မြင်သည်နှင့် တိုက်ခိုက်တတ်လေသည်။

ထို့နောက်တွင်တော့ ကျားသစ် နှစ်ကောင် ရှိသည်။ သို့သော် ကျားသစ်များမှာ အလွန် သတိကြီးကြပြီး လူကိုတွေ့လျှင် ရှောင်ပုန်းတတ်ကြကာ ရွှီယန်ကို မြင်မှသာ ထွက်လာတတ်ကြခြင်း ဖြစ်၏။

အထဲသို့ အနည်းငယ် ထပ်ဝင်သွားပါက ဝက်ဝံညိုများ ရှိပေသည်။ တစ်ခါတစ်ရံ မြေခွေးများနှင့် ကြောင်ကတိုးများကို တွေ့ရတတ်သော်လည်း ဤအကောင်များက လူကို အန္တရာယ် မပေးနိုင်ချေ။

ဤသို့ကြည့်မည်ဆိုပါက တောင်ပေါ်မှာ အတော်လေး လုံခြုံသေးသည်ဟု ဆိုရမည်။ သေချာသည်မှာ ထိုသို့တွေးနေသူမှာ သူတစ်ယောက်တည်းသာ ရှိခြင်းဖြစ်သည်။ သာမန်လူများအဖို့ တောင်ပေါ်တွင် ကျားသစ်နှင့် တောဝက် ရှိနေသည်ကို ကြားလျှင် မပြောနှင့် ဝက်ဝံညို ရှိနေသည်ဟု ကြားရုံဖြင့် လုံးဝ သွားရဲကြမည် မဟုတ်ပေ။ ၎င်းမှာ သေလမ်းရှာခြင်းနှင့် ဘာများ ကွာခြားမည်နည်း။

ရွှီယန်သည် ကျားသစ်ပေါက်လေးကို ခေါ်ဆောင်ကာ တောင်ပေါ်သို့ ဆော့ကစားရန် ထွက်လာခဲ့သည်။ အရှေ့ဘက်တွင် ရေပြင်တစ်ခုကို မြင်လိုက်ရသဖြင့် အနားသို့သွား၍ ကြည့်ရှုရန် ရည်ရွယ်လိုက်၏။

ငါးအကောင်ရေ အနည်းငယ်ခန့် ကောက်ရချင်လည်း ရနိုင်ပေသည်။ သို့မဟုတ် ဝက်ဝံညိုများ ငါးဖမ်းနေသည်ကို ကြည့်ရလျှင်လည်း မဆိုးလှချေ။

သို့သော် ဤတစ်ကြိမ်တွင်တော့ ရွှီယန် အနည်းငယ် စိတ်ပျက်သွားခဲ့ရသည်။ မြစ်လက်တက်များ ယှက်နွယ်နေပြီး ရေကန်ငယ် အနည်းငယ်လည်း ရှိနေသော်လည်း ဝက်ဝံညို၏ အရိပ်အယောင်ကို လုံးဝ မတွေ့ရပေ။ မြစ်ကမ်းဘေးတွင် ရေသောက်နေသော ဒရယ်ပြောက် အနည်းငယ်ကိုတော့ တွေ့လိုက်ရ၏။

"ဒီနေ့ ခပ်ပိုက် မပါလာဘူး... မဟုတ်ရင် မြစ်ထဲဆင်းပြီး ငါးနည်းနည်းလောက် ခပ်လိုက်ရင် သိပ်ကောင်းမှာပဲ... အဓိကက ဆောင်းဦးရာသီဆိုတော့ နည်းနည်းအေးနေလို့ ရေထဲ မဆင်းချင်တာနဲ့ ယူမလာခဲ့တာ"

ရွှီယန်က မြစ်ပြင်ကို ကြည့်ရင်း အင်တာနက်သုံးစွဲသူများကို ပြောလိုက်သည်။

ထိုအချိန်တွင် သူက ရတနာရှာဖွေရေး သံလိုက်အိမ်မြှောင်၏ အကြိမ်ရေများကို ရတနာရှာဖွေရေး တာဝန်အဖြစ် တိတ်တဆိတ် လဲလှယ်လိုက်ပြီး တာဝန်ကို ဖွင့်လိုက်လေသည်။

'ရတနာရှာဖွေရေး တာဝန် ပေါ်ပေါက်လာပါပြီ... ဒဏ်ရာရနေသော အရှေ့တိုင်းငှက်ကျားကို ကယ်ဆယ်ရန်'

'တာဝန် သတ်မှတ်ချက်... အရှေ့တိုင်းငှက်ကျား အုပ်စုကြီး နေရာရွှေ့ပြောင်းတော့မည်ဖြစ်ရာ ဒဏ်ရာရ၍ ထွက်မခွာနိုင်သော ငှက်တစ်ကောင် ရှိနေသဖြင့် ကယ်ဆယ်ပေးပါ'

'တာဝန် ဆုလာဘ်... အနွေးဓာတ် အလွန်ကောင်းမွန်သော အထူးထုတ် အနွေးထည် တစ်ထည်... အရောင်နှင့် ဒီဇိုင်းကို ရွေးချယ်နိုင်သည်'

တာဝန် အသိပေးချက်များက ရွှီယန်၏ မျက်စိရှေ့တွင် ပေါ်လာခဲ့သည်။

'အရှေ့တိုင်းငှက်ကျားလား'

ရွှီယန်၏ မျက်လုံးများ အနည်းငယ် ပြောင်းလဲသွား၏။

အရှေ့တိုင်းငှက်ကျား ဆိုသည်ကို သူ သေချာပေါက် သိထားပေသည်။ ၎င်းတို့မှာ နိုင်ငံတော်အဆင့် ၁ ကာကွယ်စောင့်ရှောက်ရမည့် တိရစ္ဆာန်ဖြစ်ပြီး အန္တရာယ်အဆင့်မှာ မျိုးတုံးလုနီးပါး အဆင့်တွင် ရှိသည်။

ဤအကောင်များက တရုတ်နိုင်ငံ အရှေ့မြောက်ပိုင်းနှင့် အတွင်းမွန်ဂိုလီးယား ဒေသများတွင် အဓိက နေထိုင်ကြပြီး နှစ်စဉ် အုပ်စုလိုက် ယန်ဇီမြစ်ဝှမ်း တစ်ဝိုက်သို့ ဆောင်းခိုရန် နေရာရွှေ့ပြောင်းလေ့ ရှိကြ၏။ နောက်နှစ် နွေဦးပေါက်မှသာ ပြန်လည် ပျံသန်းလာကြခြင်း ဖြစ်သည်။

ယခင်က အရှေ့တိုင်းငှက်ကျားများ နေရာရွှေ့ပြောင်းသည့် မြင်ကွင်းကို ရိုက်ကူးမိဖူးသူများ ရှိခဲ့သည်။ ထိုအချိန်က ကောင်းကင်တစ်ခွင်လုံးတွင် ပျံသန်းနေသော ငှက်ကြီးများနှင့် ပြည့်နှက်နေပြီး မြင်ကွင်းက တကယ်ကို ကြီးကျယ်ခမ်းနားလွန်းလှပေသည်။

ဤငှက်မျိုးက အဖြူနှင့်အမည်း ရောစပ်နေသော အရောင်ရှိသည်။ ခန္ဓာကိုယ်က အဖြူရောင်ဖြစ်ပြီး အတောင်ပံ အစွန်းများက အမည်းရောင်ဖြစ်ရာ ကောင်းကင်တွင် ပျံသန်းနေသည့်အချိန်၌ အလွန် ကြည့်ကောင်းပြီး မြေကြီးပေါ် ရပ်နေသည့်အချိန်တွင်တော့ ရုပ်ထွက်က အနည်းငယ် ကျဆင်းသွားတတ်၏။

'တာဝန်က အရှေ့တိုင်းငှက်ကျားနဲ့ ပတ်သက်နေတာပဲ... ဒီငှက်မျိုးကို တောထဲမှာ ငါ တစ်ခါမှ မတွေ့ဖူးသေးဘူး... သူတို့ရဲ့ စရိုက်က အေးဆေးပြီး သတိအရမ်းကြီးကြတယ်... တောနက်ကြီးထဲက ရေကန်တွေနားမှာ နေတတ်တယ် ဆိုတာလောက်ပဲ သိတာ'

ရွှီယန် စိတ်ထဲမှနေ၍ တွေးလိုက်သည်။

ထိုအချိန်မှာပင် သူ တစ်ခုခုကို ခံစားမိသွားပြီး ခေါင်းမော့ကြည့်လိုက်၏။ ကောင်းကင်ယံတွင် အတောင်ပံများ ခတ်ကာ ပေါ်လာသော ငှက်အနည်းငယ်ကို တွေ့လိုက်ရသည်။

အဝေးကြီး ကွာဝေးနေသော်လည်း ရွှီယန်က ရှင်းရှင်းလင်းလင်း မြင်တွေ့နေရဆဲ ဖြစ်၏။ ဤသည်ကပင် ဤငှက်များ၏ ခန္ဓာကိုယ် အရွယ်အစားမှာ အလွန်ကြီးမားကြောင်းကို ပြသနေခြင်းပင်။

အဖြူအမည်း ရောစပ်နေသော အရှေ့တိုင်းငှက်ကျားများ ပျံသန်းနေသည်မှာ အလွန် ကြည့်ကောင်းလှသည်။ အဖြူရောင် ခန္ဓာကိုယ်နှင့် အမည်းရောင် အတောင်ပံ တွဲဖက်မှုက ၎င်း၏ ပုံစံကို ပို၍ ဆွဲဆောင်မှု ရှိစေ၏။ တရုတ်ယဉ်ကျေးမှု၏ အဖြူအမည်း ရောစပ်မှု အလှတရားမျိုးပင် ဖြစ်သည်။

အစပိုင်းတွင်တော့ အကောင်အနည်းငယ်သာ ရှိသော်လည်း နောက်ပိုင်းတွင်တော့ ရင်သပ်ရှုမောဖွယ် မြင်ကွင်းကြီး ထွက်ပေါ်လာတော့သည်။

ကောင်းကင်ယံသို့ ပျံတက်လာသော မရေမတွက်နိုင်သည့် ငှက်ကြီးများကို မြင်လိုက်ရ၏။ တန်းစီမနေဘဲ ရှုပ်ယှက်ခတ်ကာ စုရုံးလျက် အပြင်ဘက်သို့ ပျံသန်းသွားကြခြင်း ဖြစ်သည်။

ရွှီယန်က ချက်ချင်းပင် အံ့ဩတကြီး အော်ဟစ်လိုက်သည်။

"ဟိုဘက်ကို ကြည့်လိုက်... ရွှေ့ပြောင်းငှက်တွေ နေရာရွှေ့နေကြပြီ... အရှေ့တိုင်းငှက်ကျားတွေပဲ"

ရွှီယန်၏ အသံက လိုက်ဖ်မြင်ကွင်းထဲမှ ထွက်ပေါ်လာပြီး ဒရုန်း၏ ကင်မရာကလည်း ကောင်းကင်ယံဆီသို့ ချက်ချင်း လှည့်သွားလေသည်။ ကောင်းကင်ယံတွင် ပျံသန်းနေသော မရေမတွက်နိုင်သည့် ငှက်ကြီးများကို မြင်တွေ့လိုက်ရပြီး ကောင်းကင်ကြီး တစ်ခုလုံးကိုပင် ဖုံးလွှမ်းသွားစေ၏။

ဤငှက်များ၏ အရွယ်အစားက အလွန်ကြီးမားလွန်းသဖြင့် အတောင်ပံ ခတ်နေသည့် လှုပ်ရှားမှုများကိုပင် သိသိသာသာ မြင်တွေ့နေရသည်။

ရှုပ်ယှက်ခတ်နေသော ပန်းချီကား တစ်ချပ် လှုပ်ရှားနေသကဲ့သို့ပင် ဖြစ်၏။ လူများ အားလုံးက ဤမြင်ကွင်းကြောင့် ချက်ချင်းပင် မှင်သက်သွားကြတော့သည်။

'လခွမ်း... ငှက်တွေ အများကြီးပဲ'

'အရမ်းကို ကြီးကျယ်ခမ်းနားလွန်းတယ်နော်'

'ဒါ ဘယ်နှစ်ကောင်တောင် ရှိမလဲ... နေရာရွှေ့တော့မလို့လား'

'ဒါ ဘာငှက်တွေလဲ... ကြည့်ရတာ တော်တော်လှတာပဲ'

ကွန်မန့်များက အဆက်မပြတ် တက်လာနေသည်။

ကောင်းကင်ယံတွင် ပိုပို၍ များပြားလာသော ငှက်များက ပျံတက်လာပြီး အဝေးဆီသို့ တောက်လျှောက် ပျံသန်းသွားကြ၏။ အဝေးကြီး ကွာဝေးနေသော်လည်း ရွှီယန်က အတောင်ပံ ခတ်သံများကို ကြားနေရဆဲ ဖြစ်သည်။

ဤငှက်များက ခရီးဆုံးသို့ ရောက်ရှိရန် အဝေးကြီး ပျံသန်းရဦးမည် ဖြစ်၏။ သဘာဝတရားကြီး၏ ရှင်သန်နိုင်စွမ်းက ဤအချိန်တွင် အထင်းသား ပေါ်လွင်နေတော့သည်။

"အဲဒါက အရှေ့တိုင်းငှက်ကျားတွေလေ... အဆင့် ၁ ကာကွယ်စောင့်ရှောက်ရမယ့် တိရစ္ဆာန်တွေပေါ့... သူတို့က နှစ်တိုင်း ဒီကနေ ယန်ဇီမြစ်ဝှမ်းဆီကို နေရာရွှေ့ပြောင်းကြတာ... အရှေ့မြောက်ဒေသမှာ ရွှေ့ပြောင်းငှက်တွေ အရမ်းများတယ်... အကုန်လုံးက အုပ်စုလိုက် ရွှေ့ပြောင်းကြတာ... အတွင်းမွန်ဂိုလီးယား ဘက်မှာလည်း အဲဒီလိုပဲ... ဒီငှက်တွေက လူသူအရောက်အပေါက် နည်းတဲ့ ရေကန်တွေ စိမ့်မြေတွေမှာ နေထိုင်ကြလို့ ဘယ်သူ့ အနှောင့်အယှက်မှ မရှိဘူးလေ... ဒီအုပ်စုက အကောင်ရေ တစ်ထောင်လောက် ရှိမယ်လို့ ခန့်မှန်းရတယ်"

ရွှီယန်က ဗဟုသုတ မျှဝေပေးသည့် အခန်းကဏ္ဍမှနေ၍ ရှင်းပြနေသည်။

ဤမြင်ကွင်းကို လူအတော်များများက မှတ်တမ်းတင်ထားကြပြီး မှတ်တမ်းတင်ထားရန်လည်း တန်ဖိုးရှိလှပေသည်။ နှစ်စဉ် ဤကဲ့သို့ ဗီဒီယိုမျိုး တင်ကြသူများ ရှိကြ၏။ မည်သို့ပင်ဖြစ်စေ ဆောင်းဦးရာသီ ရောက်လာသည်နှင့် ရွှေ့ပြောင်းငှက်များက များပြားလာသည် မဟုတ်ပါလား။

ဖတ်စာအုပ်များထဲတွင်ပင် ငန်းရိုင်းများက တစ်ခါတစ်ရံ လူ ပုံစံ စီတန်းပြီး တစ်ခါတစ်ရံ တစ်ဂဏန်း ပုံစံ စီတန်းကာ ဆောင်းဦးရာသီ ရောက်လာပြီဟု ညည်းတွားတတ်ကြကြောင်း ရေးသားထားသေးသည်။ ဆောင်းဦးရာသီမှာ နေရာရွှေ့ပြောင်းရမည့် ရာသီပင် ဖြစ်၏။

ရွှီယန်က အောက်မှနေ၍ တိတ်တဆိတ် ကြည့်ရှုနေလိုက်သည်။ သူက သဘာဝတရားကြီး၏ ဤကဲ့သို့ တက်ကြွရှင်သန်နေသော ခံစားချက်မျိုးကို အလွန် သဘောကျပေသည်။

ရှင်သန်ရပ်တည်ရေးအတွက် တောင်များ ရေများကို ဖြတ်ကျော်ကာ နောက်ထပ် နေရာတစ်ခုဆီသို့ သွားကြရခြင်း ဖြစ်၏။ တကယ်ကို လေးစားချီးကျူးစရာပင် ဖြစ်သည်။

ကျားသစ်ပေါက်လေးကလည်း ခေါင်းမော့၍ ကြည့်နေလေသည်။ ၎င်း မြင်တွေ့နေရသည်ကတော့ နောက်ထပ် မြင်ကွင်း တစ်မျိုးပင် ဖြစ်၏။

ဤမျှ စားကောင်းမည့် အရာများက ဘာကြောင့် ပျံသန်းနေကြသနည်းဟု တွေးတောနေလောက်ပေသည်။

နောက်ဆက်တွဲ လိုက်ဖ်မြင်ကွင်းကတော့ ကောင်းကင်ယံ ဖြစ်ပြီး ပျံသန်းနေသော အရှေ့တိုင်းငှက်ကျားများက ပိုပို၍ များလာကာ ကောင်းကင်ကို ဖုံးလွှမ်းသွားတော့သည်။ ၎င်းတို့က ရွှီယန်၏ ခေါင်းပေါ်မှ ဖြတ်ပျံသွားပြီး အဝေးဆီသို့ တောက်လျှောက် ပျံသန်းသွားကြ၏။

ရွှီယန်က အရှေ့တိုင်းငှက်ကျားများ အဝေးသို့ ထွက်သွားသည့် အရိပ်အယောင်ကို ကြည့်ပြီးနောက် အရှေ့ဘက်သို့ ဆက်လျှောက်သွားလိုက်သည်။

"ငှက်ကျားတွေ နေရာရွှေ့တဲ့ နေရာကို သွားကြည့်လိုက်ဦးမယ်... နှစ်တိုင်း ရွှေ့ပြောင်းငှက်တွေ နေရာရွှေ့ရင် နောက်ကျကျန်ခဲ့တာ ဒါမှမဟုတ် မတော်တဆ ဖြစ်တာတွေ အမြဲ ရှိတတ်တယ်လေ... ဒီတစ်ခေါက်လည်း အဲဒီလို အခြေအနေမျိုး ရှိချင် ရှိနိုင်တယ်... ကူညီနိုင်ရင်လည်း ကူညီပေးရတာပေါ့"

ယနေ့တွင် ရွှီယန်က တောင်ထွက်ပစ္စည်း ရှာဖွေရန် မရည်ရွယ်ထားဘဲ တောင်ပေါ်တွင် လျှောက်သွားရင်း တာဝန်လေး လုပ်ဆောင်ရန်သာ ဖြစ်သည်။ စိတ်အပန်းဖြေသည့် အနေဖြင့် ဖြစ်၏။ ယခုကဲ့သို့ တောင်ပေါ်တက်ရခြင်းက တောင်ထွက်ပစ္စည်း ရှာဖွေရမည့် ဖိအားမရှိသဖြင့် သူ့အတွက် ပို၍ ပေါ့ပါးပျော်ရွှင်စရာ ကောင်းနေပေသည်။

လူတစ်ယောက်နှင့် ကျားသစ်တစ်ကောင်တို့ တောထဲသို့ လျှောက်သွားနေကြသည်။

ရွှီယန်က အရှေ့တိုင်းငှက်ကျားများ နေထိုင်သည့် နေရာကို အကြမ်းဖျင်း ခန့်မှန်းနိုင်၏။ သို့သော် တောင်ပေါ်တွင် အမြင်နီးပြီး အသွားဝေးသည် ဆိုသည့် စကားတစ်ခွန်း ရှိလေသည်။ တောင်ပေါ်ရှိ အကွာအဝေးကို ရိုးရိုးရှင်းရှင်း မျဉ်းဖြောင့်အတိုင်း တိုင်းတာ၍ မရဘဲ အနိမ့်အမြင့် ဖြစ်နေသော လမ်းခရီးကိုပါ ထည့်တွက်ရမည် ဖြစ်သည်။

လူနှင့် ကျားသစ်က အတွင်းဘက်သို့ တောက်လျှောက် ဝင်သွားကြသည်။

နှစ်နာရီခန့် ကြာပြီးနောက် ရွှီယန်သည် တောရိုင်း ရေကန်တစ်ခု၏ ဘေးသို့ ရောက်ရှိလာခဲ့၏။ ဤရေကန်က ကြည့်ရသည်မှာ အနည်းငယ် မွဲခြောက်ခြောက် ဖြစ်နေပြီး သိပ်မတောက်ပလှချေ။ ပတ်ဝန်းကျင်တွင်လည်း ငှက်ကျား အမွေးများ အများအပြား ရှိနေပေသည်။

"အရှေ့တိုင်းငှက်ကျားတွေ နေရာရွှေ့တဲ့ နေရာက ဒီမှာပဲ... အခု ဆောင်းဦးရာသီဆိုတော့ ရေက အရမ်းအေးနေပြီ... သူတို့လည်း ရေတွေ အေးလာတာကို ခံစားမိပြီး ဆက်ရှင်သန်ဖို့ မသင့်တော်တော့ဘူးဆိုတာ သိလို့ အကုန်လုံး နေရာရွှေ့ပြီး ထွက်သွားကြတာ ဖြစ်မယ်... နောက်ဆုံးတော့ ရှာတွေ့သွားပြီပဲ"

ရွှီယန်က ရေကန်ဘေးတွင် လိုက်လံ အကဲခတ်နေလိုက်သည်။

'လိုက်ဖ်လွှင့်သူက တောင်ပေါ်မှာ လမ်းကြောင်း ခန့်မှန်းတဲ့ နေရာမှာ တော်တော် ကျွမ်းတာပဲ... ရွှေ့ပြောင်းငှက်တွေ အဝေးကြီးကနေ ပျံတက်လာတာတောင် သူက တိကျတဲ့ နေရာကို ရှာတွေ့နိုင်တယ်... ဒါက တကယ့် အရည်အချင်းပဲ'

လိုက်ဖ်ထဲမှ နားလည်သော အင်တာနက်သုံးစွဲသူ တစ်ယောက်က ရင်ထဲမှနေ၍ ချီးကျူးလိုက်သည်။

'လောင်ရွှီ ရဲ့ တောင်ပေါ်တက်တဲ့ စွမ်းရည်ကိုတော့ သံသယဖြစ်စရာ မလိုဘူး... နည်းနည်းလေးတောင် ဟန်ဆောင်ထားတာ မဟုတ်ဘူး'

'တကယ်ပဲ... အဲဒီအကြောင်းပြချက်ကြောင့်သာ သူ့လိုက်ဖ်ကို ငါ အမြဲကြည့်နေတာ... အရင်ကဆို ငါ လိုက်ဖ်တွေ လုံးဝ မကြည့်ဘူး'

လူအတော်များများက ပြန်လည် တုံ့ပြန်ကြ၏။

ပရိသတ်များက မြင်ကွင်းထဲရှိ ရေကန်ကို ကြည့်ရှုနေကြသည်။ ဤအချိန်တွင် ရေကန်က အနည်းငယ် ခြောက်ကပ် တိတ်ဆိတ်နေ၏။ ငှက်များ အကုန် ထွက်သွားပြီဖြစ်သလို ဆောင်းဦးရာသီလည်း ဖြစ်နေသဖြင့် ဤနေရာက ပို၍ ခြောက်သွေ့ ညှိုးနွမ်းနေသကဲ့သို့ ခံစားရပေသည်။

ထိုအချိန်မှာပင် ရွှီယန်က ဒဏ်ရာရနေသော အရှေ့တိုင်းငှက်ကျားကို နောက်ဆုံးတွင် ရှာတွေ့သွားခဲ့သည်။

၎င်းက မြက်ခင်းထဲတွင် ပုန်းနေပြီး ကိုယ်ကို နှိမ့်ထားကာ အပေါင်းအသင်းများ ထွက်သွားသည့် အဝေးဆီသို့ ခေါင်းမော့ကြည့်နေပြီး သေမင်းကို တိတ်တဆိတ် စောင့်ဆိုင်းနေသကဲ့သို့ပင် ဖြစ်၏။

ဤသည်မှာ အရွယ်ရောက်ပြီးသော အရှေ့တိုင်းငှက်ကျား တစ်ကောင် ဖြစ်သည်။ အရွယ်အစားက အလွန် ကြီးမား၏။

အရွယ်ရောက်ပြီးသော အရှေ့တိုင်းငှက်ကျား၏ ခန္ဓာကိုယ် အရှည်က တစ်မီတာ နှစ်ဆယ်ခန့် ရှိပြီး သွယ်လျသော ခြေတံနှစ်ချောင်းဖြင့် မတ်တတ်ရပ်လိုက်ပါက ခန္ဓာကိုယ်က သွယ်လျရှည်လျားနေပေသည်။ ဂျပန်ကြိုးကြာငှက်နှင့် အနည်းငယ် ဆင်တူသည့် ခံစားချက်မျိုးပင် ဖြစ်သည်။

"လခွမ်း... အရှေ့တိုင်းငှက်ကျား တစ်ကောင်ကို တကယ် မြင်လိုက်ရပြီဟ... သူက ပျံမသွားဘူး... ဒဏ်ရာရနေတာ ဖြစ်မယ်"

ရွှီယန်က တမင်တကာ အံ့အားသင့်ဟန်ဆောင်ကာ ပြောလိုက်ရာ သူ၏ စကားက အင်တာနက်သုံးစွဲသူများ၏ အာရုံစိုက်မှုကို ချက်ချင်း ရရှိသွားစေသည်။

ရွှီယန်က အရှေ့သို့ ခပ်သွက်သွက် လျှောက်သွားလိုက်ပြီး ဤအချိန်မှာပင် အင်တာနက်သုံးစွဲသူများကလည်း သေမင်းကို စောင့်ဆိုင်းနေသော အရှေ့တိုင်းငှက်ကျားကို သတိထားမိသွားကြ၏။

'ဒီငှက်က ဘာလို့ ဒီလောက်တောင် ကြီးရတာလဲ'

အင်တာနက်သုံးစွဲသူ တစ်ယောက်က အံ့အားသင့်စွာ ရေရွတ်လိုက်သည်။

'ဟုတ်ပါရဲ့... ခုနက ကောင်းကင်မှာ ပျံနေတုန်းက ငါ သတိမထားမိဘူး... ဒီလောက်တောင် ကြီးတာပဲ'

'ငါ နည်းနည်း ရင်သပ်ရှုမော ဖြစ်သွားတာ မဆန်းပါဘူး... အရင်ကလည်း ထောင်သောင်းချီတဲ့ စာကလေးတွေ ပျံနေတာ တွေ့ဖူးပေမယ့် ခုနကလို ခံစားချက်မျိုး မရခဲ့ဘူးလေ... တကယ့် ငှက်ကြီးတွေ ဖြစ်နေတာကိုး'

'အဆင့် ၁ ကာကွယ်စောင့်ရှောက်ရမယ့် တိရစ္ဆာန်ဆိုတော့ သေချာပေါက် တစ်ခုခုတော့ ထူးခြားမှာပဲ'

အားလုံးက အသီးသီး ဆွေးနွေးနေကြသည်။

ရွှီယန်က အရှေ့တိုင်းငှက်ကျား အနားသို့ လျှောက်သွားလိုက်၏။ အရှေ့တိုင်းငှက်ကျားက သူ့ကို သတိထား၍ စိုက်ကြည့်နေသော်လည်း မြေကြီးပေါ်မှ မထလာသလို ပြေးရန်ပင် မရည်ရွယ်ထားချေ။

ရွှီယန်က အကြမ်းဖျင်း တစ်ချက်ကြည့်လိုက်သည်နှင့် အတောင်ပံ အရိုးကျိုးနေသဖြင့် မပျံနိုင်ကြောင်း ခန့်မှန်းမိလိုက်သည်။ ကုသရန် အနည်းဆုံး လဝက်ခန့် အချိန်ယူရမှသာ ပြန်ပျံနိုင်မည် ဖြစ်၏။

"အတောင်ပံ အရိုးကျိုးနေပြီး ခြေထောက်မှာလည်း ဒဏ်ရာ နည်းနည်း ရှိနေတယ်... ဒါကြောင့် မပျံနိုင်တာပဲ... ဒီရာသီမှာ မပျံနိုင်ဘူးဆိုရင် အပူချိန်ကလည်း ဒီလောက်ကျနေတော့ သေဖို့ပဲ စောင့်ရတော့မှာ"

ရွှီယန်က အခြေအနေကို ခန့်မှန်းလိုက်သည်။

ထို့နောက် သူက ချက်ချင်းပင် လက်ကိုင်ဖုန်းကို ထုတ်ယူကာ ဒေသခံ ရဲစခန်းကို ဆက်သွယ်လိုက်၏။ ဤသည်မှာ အမှန်ကန်ဆုံး စံနမူနာ တစ်ခုပင် ဖြစ်သည်။

ဘေးနားရှိ ကျားသစ်ပေါက်လေးက အရှေ့တိုင်းငှက်ကျားကို သိချင်စိတ်အပြည့်ဖြင့် ကြည့်နေပြီး အတော်လေး ဖော်ရွေကာ မျက်လုံးပြူးကြီးများ ပုတ်ခတ်ပုတ်ခတ်ဖြင့် အလွန်ကို သိချင်နေပုံရကာ ချစ်စရာကောင်းသော ပုံစံလေး ဖြစ်နေဆဲပင်။

ဤအကောင်လေး၏ မွေးရာပါ စရိုက်က ဤသို့ဖြစ်နေသဖြင့် အခြားသူကို အပြစ်တင်၍ မရနိုင်ပေ။ မဟုတ်ပါက မိခင်ကျားသစ်မကြီးပင် တစ်ခါတစ်ရံ ခေါင်းကိုက်ရပြီး ၎င်းကို မည်သို့များ ကိုယ့်ဘာသာ ရပ်တည်နိုင်အောင် လုပ်ပေးရမည်ကို မသိနိုင်လောက်အောင်ပင် ဖြစ်၏။

မည်သို့ပင်ဖြစ်စေ ရွှီယန်ကတော့ ကျားသစ်ပေါက်လေး၏ ဤကဲ့သို့ ပုံစံမျိုးကို အတော်လေး သဘောကျနေသည်သာ ဖြစ်လေသည်။