အခန်း ၁၅၀

အခန်း (၁၅၀) အရသာရှိလှသော အာလူးကြွပ်ကြော်... အံ့မခန်း အရသာ

အာလူးများ ဤသို့ဖြင့် အောင်မြင်စွာ ရောင်းချပြီးသွားခဲ့သည်။

ရွှီယန် မည်သို့ ရောင်းချရမည်ကို ခေါင်းခဲနေချိန်တွင် အရာအားလုံးက ကြိုတင် စီစဉ်ထားသကဲ့သို့ ဖြစ်သွားခဲ့၏။

ပထမဆုံး စိုက်ပျိုးရေးတက္ကသိုလ်မှ ဆရာက သူစိုက်ပျိုးထားသော အာလူးများကို ခွဲခြမ်းစိတ်ဖြာပြီး အစီရင်ခံစာ ထုတ်ပေးခဲ့သည်။

ထို့နောက် ရွှီယန်က အင်တာနက်ပေါ်တွင် ကြော်ငြာလိုက်ရာ လုပ်ငန်းကျွမ်းကျင်သူများ၏ သတိထားမိခြင်းကို ခံလိုက်ရ၏။

ထိုမှတစ်ဆင့် ကုန်သည်များက ပူးပေါင်းလုပ်ဆောင်ရန် အိမ်တိုင်ရာရောက် လာရောက် ဆွေးနွေးကြခြင်းပင် ဖြစ်သည်။

မန်နေဂျာ ကျိန့်က နောက်ပိုင်းတွင် ရေရှည် ပူးပေါင်းလုပ်ဆောင်လိုပြီး ရွှီယန် အာလူးများ ထပ်မံ စိုက်ပျိုးပါက အကုန်လုံးကို ဝယ်ယူချင်ကြောင်း ပြောဆိုခဲ့သည်။

သူ၏ အပန်းဖြေစခန်းတွင် အရည်အသွေးမြင့် အာလူး လိုအပ်ချက် ပမာဏ အတော်လေး ရှိနေသောကြောင့် ဖြစ်၏။

စိတ်ဝင်စားစရာ ကောင်းသည်မှာ နောက်ပိုင်းတွင် အဆင့်မြင့် ဈေးကွက်မှ အာလူးလိုအပ်သော အခြား ကုန်သည်အချို့ကလည်း ရွှီယန်ထံ ဆက်သွယ်ကာ အာလူးဝယ်ယူရန် စုံစမ်းလာကြခြင်းပင်။

ဤအရာအားလုံး၏ အဓိက အကြောင်းရင်းမှာ စိုက်ပျိုးရေးတက္ကသိုလ်၏ အစီရင်ခံစာကြောင့်ပင် ဖြစ်သည်။

နားလည်ကျွမ်းကျင်သူများက အမြဲတမ်း ရှိနေတတ်သည် မဟုတ်ပါလား။

ခွဲခြမ်းစိတ်ဖြာထားသော အချက်အလက်များက အရာများစွာကို သက်သေပြနေပေသည်။

ရွှီယန်၏ အာလူးများမှာ သာမန် အာလူးများထက် ပို၍ ကောင်းမွန်ပြီး အပြင်ပန်း အသွင်အပြင်သာမက အရည်အသွေးပါ ကောင်းမွန်လှ၏။

ထို့အပြင် ရှားပါးသော အရောင်စုံ အာလူးမျိုးစိတ် ဖြစ်နေသဖြင့် အဆင့်မြင့် ဈေးကွက်မှ ဖောက်သည်များက သေချာပေါက် သဘောကျကြမည် ဖြစ်သည်။

ဤသည်မှာ အစသာ ရှိသေးပြီး လူများက ရွှီယန် စိုက်ပျိုးထားသော အာလူးများ၏ အရသာကို မမြည်းစမ်းရသေးချေ။

စားကြည့်ပြီးပါက နောက်ထပ် အံ့အားသင့်စရာ တစ်ခု ဖြစ်လာဦးမည်သာ ဖြစ်၏။

အာလူးများတွင် မျိုးစိတ်များစွာ ရှိပေသည်။

အချို့အာလူးများက ချက်ပြုတ်လိုက်ပါက နူးညံ့အိစက်နေပြီး အလွန် မွှေးပျံ့ကာ မည်သည့်အရာနှင့် ရောချက်ချက် နူးအိကာ အရသာဝင်လွယ်သည်။

အချို့အာလူးများကတော့ မကျက်သေးသကဲ့သို့ မာတောင့်တောင့် ဖြစ်နေတတ်၏။

ကုန်တင်ကားကြီး တစ်စီးက လယ်ယာခြံဝင်းထဲတွင် ရပ်နားထားပြီး အာလူးအိတ်များကို အရင်ဆုံး ချိန်တွယ်မှတ်တမ်းတင်ကာ ကားပေါ်သို့ တင်နေကြသည်။

အပန်းဖြေစခန်းဘက်မှ ဝန်ထမ်းများနှင့် ရွှီယန်တို့က အတူတကွ ကြီးကြပ်နေကြ၏။

အာလူးအိတ် တစ်အိတ်ချင်းစီ၏ အလေးချိန်ကို မှတ်တမ်းတင်နေကြသည်။

"အခုတင် ပိဿာ လေးသောင်း ကျော်နေပြီ... အနည်းဆုံး ငါးပုံတစ်ပုံလောက် ကားပေါ် မတင်ရသေးဘူး... ဒီငါးဧကရဲ့ အထွက်နှုန်းက အရမ်း များလွန်းနေပြီ"

ဝန်ထမ်း မာဝန်က အလွန် အံ့အားသင့်စွာဖြင့် ပြောလိုက်သည်။

သူက မျက်မှန် တပ်ထားပြီး အသားအရေက အနည်းငယ် ညိုမည်းနေသည်။ မာဝန်က လယ်ယာခြံဝင်း အလုပ်များကို နှစ်နှစ်ခန့် လုပ်ကိုင်ဖူးသဖြင့် လယ်ယာထွက်ကုန်များ၏ တစ်ဧက အထွက်နှုန်းကို အတော်လေး နားလည်ထားသူ ဖြစ်၏။

သာမန် အာလူးခင်းများ၏ တစ်ဧက အထွက်နှုန်းမှာ ပိဿာ သုံးထောင်မှ ငါးထောင်ခန့် ရှိပြီး သေချာ ဂရုစိုက် စိုက်ပျိုးပါက ပိဿာ ရှစ်ထောင်ခန့်အထိ ရရှိနိုင်သည်။

အကြောင်းမှာ အာလူးများက အာဟာရဓာတ်များကို ပိုမို စုပ်ယူနိုင်ပါက အလုံးပိုကြီးကာ သိပ်သည်းဆ ပိုများလာပြီး အလေးချိန်လည်း ပိုစီးလာသောကြောင့် ဖြစ်သည်။

အလုပ်သမားများက အာလူးများကို ချိန်ခွင်ပေါ်သို့ ဆက်လက် တင်နေကြပြီး လယ်ယာခြံဝင်းမှ ဝန်ထမ်းများကလည်း အတူတကွ ကူညီပေးနေကြသည်။

အာလူးအိတ် တစ်အိတ်ချင်းစီ၏ အလေးချိန်များကို မှတ်တမ်းတင်နေကြ၏။

နောက်ဆုံး အာလူးအိတ်ကို ကားပေါ် တင်ပြီးချိန်တွင် စုစုပေါင်း အလေးချိန်မှာ ပိဿာ ငါးသောင်းနှစ်ထောင် ရှိလေသည်။

သူတို့ မျှော်မှန်းထားသည်ထက် ပိုများနေပြီး တစ်ဧက အထွက်နှုန်းမှာ ပိဿာ တစ်သောင်း ကျော်လွန်သွားခဲ့ပြီ ဖြစ်၏။

ဝန်ထမ်းများ အားလုံးက တအံ့တဩ ဖြစ်နေကြသည်။

ရွှီယန်ကတော့ သိပ်ပြီး ထူးဆန်းနေသည်ဟု မခံစားရပေ။

"အခုခေတ်က သိပ္ပံနည်းကျ စိုက်ပျိုးကြတာဆိုတော့ မှန်လုံအိမ် အတော်များများမှာ စိုက်တဲ့ အာလူးတွေက တစ်ဧကကို ပိဿာ တစ်သောင်းသုံးထောင်လောက်အထိတောင် ရနေကြပြီ... ကျွန်တော့်ဆီက တစ်ဧက ပိဿာ တစ်သောင်းလောက်က သိပ်မများသေးပါဘူး"

ရွှီယန်က ရှင်းပြလိုက်သည်။

"နည်းနည်းပဲ စိုက်လိုက်မိတယ်... ဟိုဘက်မှာ မြေတွေ အများကြီး ရှိသေးတာကို ငါးဧကပဲ စိုက်လိုက်တာ... တိုက်ရိုက် စိုက်ပျိုးရောင်းချရတာ အမြတ် သိပ်မများဘူး ထင်လို့ အများကြီး မစိုက်လိုက်တာ"

ငါးဧကစာ အာလူးများက ယွမ် ငါးသောင်းနှစ်ထောင် ရရှိခဲ့သည်။

ထွန်စက် အသုံးပြုစရိတ် ဓာတ်မြေဩဇာစရိတ် စသည့် ကုန်ကျစရိတ်များကို နုတ်လိုက်ပါက အသားတင် အမြတ်ငွေ ယွမ် လေးသောင်းကျော် ငါးသောင်းနီးပါးခန့် ရရှိခဲ့၏။

ထိုအချိန်တွင် မာဝန်က ထပ်ပြောလာသည်။

"ခြံရှင်... မှန်လုံအိမ်နဲ့ အာလူး စိုက်တာကို ကျွန်တော် လေ့လာဖူးတယ်... ရင်းနှီးမြှုပ်နှံမှု တော်တော်များတယ်... မြေဘောင် တစ်တန်းကို အပင် တစ်တန်းပဲ စိုက်တဲ့ စနစ်ကို သုံးပြီး အပင်စိတ်စိုက်ရတာ... သီးသန့် မြေဆွေး ပိုတက်စီယမ် မြင့်မားတဲ့ ဓာတ်မြေဩဇာနဲ့ ပြာတွေကို သုံးရတယ်... ကုန်ကျစရိတ် မနည်းဘူး... တစ်ဧက အထွက်နှုန်း ပိဿာ တစ်သောင်းကျော်မှ အမြတ်ကျန်တာ"

"ဒါပေမဲ့ တချို့နေရာတွေမှာ ဈေးကောင်းရတယ်... မှန်လုံအိမ် အာလူး တစ်ပိဿာကို ၁ ယွမ် နဲ့ ၃၀ ပြား ဒါမှမဟုတ် ၁ ယွမ် နဲ့ ၄၀ ပြား အထိ ရနိုင်ရင် သူတို့ ပိုက်ဆံ အများကြီး မြတ်တယ်"

ထိုစကားကို ကြားသည်နှင့် ရွှီယန် ချက်ချင်း စိတ်ဝင်စားသွားသည်။

"ဘယ်လောက်... ၁ ယွမ် နဲ့ ၃၀ ပြား ကနေ ၁ ယွမ် နဲ့ ၄၀ ပြား အထိ... ဒီလောက်တောင် ဈေးကောင်းတာလား... ကျွန်တော်တို့ဆီမှာ စံသတ်မှတ်ဈေးက ၇၀ ပြားပဲ ရှိတာ... ရှင်းကျန်း ဘက်မှာဆိုရင် ၄၀ ပြား ၅၀ ပြား လောက်အထိတောင် ကျဆင်းနေတာလေ... အပြင်မှာ ၁ ယွမ် နဲ့ ၃၀ ပြား ဈေးအထိ ရနေတာလား"

ရွှီယန်က အံ့အားသင့်စွာ ရေရွတ်လိုက်သည်။

ဤသည်မှာလည်း ပထဝီဝင် အနေအထား၏ အားသာချက်ပင် ဖြစ်၏။

အချို့နေရာများတွင် အာလူး မထွက်ရှိသဖြင့် မှန်လုံအိမ် ဆောက်လုပ် စိုက်ပျိုးကာ ထိုနေရာမှာပင် ရောင်းချပါက ဈေးကောင်း ရရှိမည်သာ ဖြစ်သည်။

အရှေ့မြောက်ပိုင်းနှင့် အတွင်းမွန်ဂိုလီးယား ကဲ့သို့သော အလှမ်းဝေးသည့် နေရာများတွင် အာလူး သယ်ယူပို့ဆောင်စရိတ်က အလွန် များပြားသဖြင့် ကုန်ကျစရိတ်ထဲတွင် ထည့်သွင်း တွက်ချက်ရသောကြောင့် လယ်သမားများ ရရှိသည့် အာလူးဈေးမှာ နည်းပါးရခြင်း ဖြစ်၏။

"ဒါပေမဲ့ အခုဈေးနဲ့တင် ကျွန်တော် တော်တော်လေး ကျေနပ်နေပါပြီ... နောက်နှစ်ကျရင်တော့ အာလူး နည်းနည်း ပိုစိုက်လို့ ရတယ်... ကျွန်တော်တို့ရဲ့ အာလူးတွေက အရည်အသွေး ကောင်းတယ်လေ... ဒီညတော့ အာလူးနဲ့ ပဲတောင့်ရှည် ချက်စားကြတာပေါ့"

ရွှီယန်က ပြောလိုက်သည်။

"ခြံရှင်... ပဲတောင့်ရှည်နဲ့ မချက်ပါနဲ့တော့... တခြား တစ်ခုခု ပြောင်းချက်လို့ မရဘူးလား... ဟိုတလောက နေ့တိုင်း စားနေရတော့ စိတ်ဒဏ်ရာတောင် ရနေပြီ"

ဝမ်ဝူက ဘေးမှနေ၍ အကြံပြုလာသည်။

"ရတာပေါ့... အာလူးနဲ့ ဝက်နံရိုး နှပ်စားကြမယ်... ဝက်နံရိုးနှပ်ကို ထမင်းနဲ့ နယ်စားရင် အရမ်း ကောင်းတာ... ဒီရက်ပိုင်း အားလုံး ပင်ပန်းနေကြပြီဆိုတော့ ခဏနေ ဟင်းတွေ အများကြီး သွားဝယ်ပြီး နေ့လယ်စာ အကောင်းစား စားကြတာပေါ့"

ရွှီယန်က သဘောတူလိုက်သည်။

အာလူးများ ကားပေါ်တင်ပြီး ထွက်ခွာသွားကြသည်။

ယခင်က ကျိန့်ယိုချိုက် ပေးထားသော စရန်ငွေမှာ ယွမ် လေးသောင်းဖြစ်ပြီး ချိန်တွယ်ပြီးပါက လက်ကျန်ငွေ ရှင်းပေးမည်ဟု ပြောထားခဲ့၏။

သိပ်မကြာခင်မှာပင် ကျိန့်ယိုချိုက်က စာရင်းကိုင်ကို ခိုင်း၍ ရွှီယန်၏ ဘဏ်ကတ်ထဲသို့ ငွေ ယွမ် တစ်သောင်းသုံးထောင် လွှဲပေးလိုက်သည်။

အာလူးများ အကုန် ရောင်းချပြီးသွားခဲ့ပြီ ဖြစ်သည်။

အလွန် အဆင်ပြေချောမွေ့လှ၏။

အစပိုင်းက ရွှီယန်က ကျိန့်ယိုချိုက်ကို လိမ်လည်သူ ဖြစ်မည်ကိုပင် အနည်းငယ် စိုးရိမ်နေခဲ့သေးသည်။

လိမ်လည်မှုများမှာ အလွန် အဖြစ်များလှပေသည်။ ကိုယ်စားလှယ်များ ပွဲစားများ ဆိုသူများက ငွေကြေးနှင့် အာလူးများကို လိမ်လည်သွားတတ်ကြ၏။

သူက အင်တာနက်တွင် ထိုအပန်းဖြေစခန်း အကြောင်းကို ရှာဖွေကြည့်ပြီး ကျိန့်ယိုချိုက်က အာလူးကို ဘာကြောင့် ဤမျှ စိတ်ဝင်စားနေရသနည်း ဆိုသည်ကို လေ့လာပြီးမှသာ ယုံကြည်နိုင်ကြောင်း အတည်ပြုခဲ့ခြင်း ဖြစ်သည်။

တကယ်တော့ အပန်းဖြေစခန်းတွင် အလွန် နာမည်ကြီးသော ဟင်းလျာတစ်ပွဲ ရှိပြီး အာလူးကြွပ်ကြော် ဟု ခေါ်ဆိုကြသည်။

ပြုလုပ်နည်းမှာ အာလူးများကို အတုံးလေးများ တုံးကာ ပြုတ်ပြီး ဂျုံမှုန့်ကပ်၍ ဆီပူပူတွင် ကြော်ရသည်။ ထို့နောက် ကြော်ထားသော အာလူးတုံးများကို ဇီယာ... ငရုတ်သီးမှုန့်... နှမ်းလှော်... ငရုတ်ကောင်းမှုန့်... ကြက်သားမှုန့်... အချိုမှုန့် တို့ဖြင့် ရောနယ်ကာ အရသာသွင်းရ၏။

နောက်ဆုံးတွင် ငရုတ်သီးစိမ်းနှင့် နံနံပင်များ ထည့်လိုက်ရသည်။

အရသာရှိလှသော အာလူးကြွပ်ကြော် တစ်ပွဲ ရရှိသွားပြီ ဖြစ်၏။

အပန်းဖြေစခန်းက ထိုဟင်းလျာဖြင့် နာမည်ကြီးနေခြင်းဖြစ်ပြီး လူကြိုက် အလွန်များလှပေသည်။

ရွှီယန်က ဤအချက်အလက်များကို သိရှိပြီးနောက် ကျိန့်ယိုချိုက်ကို ယုံကြည်နိုင်ပြီဖြစ်ကြောင်း အတည်ပြုကာ အရောင်းအဝယ် ပြုလုပ်ခဲ့ခြင်း ဖြစ်သည်။

ရွှီယန်အတွက်တော့ ဤလမ်းကြောင်း ရရှိသွားသဖြင့် နောက်နှစ် အာလူး ထပ်စိုက်ပါက အများကြီး ပို၍ အဆင်ပြေသွားမည် ဖြစ်၏။

သူ၏ အာလူး အရည်အသွေးအပေါ် သူ ယုံကြည်မှု အပြည့် ရှိသဖြင့် နောက်နှစ် ပူးပေါင်းလုပ်ဆောင်ရန်လည်း သေချာပေါက် ပြဿနာ မရှိနိုင်ချေ။

ရွှီယန်က လယ်ယာခြံဝင်းအတွက် အာလူး အိတ်အနည်းငယ် ချန်ထားခဲ့သည်။ ဤအရာက အချိန်အကြာကြီး သိမ်းထားနိုင်ပြီး အရသာလည်း ကောင်းမွန်သဖြင့် ပို၍ ချန်ထားရမည် မဟုတ်ပါလား။

ပမာဏက လယ်ယာခြံဝင်း ဆောင်းခိုရန်အတွက် လုံလောက်လှပေသည်။

ရွှီယန် စိုက်ပျိုးထားသော အာလူးများက သိပ်မကြာခင်မှာပင် အပန်းဖြေစခန်းသို့ ရောက်ရှိသွားခဲ့၏။

အာလူးများကို ကားပေါ်မှ ချကာ အအေးခန်းထဲတွင် သိမ်းဆည်းထားလိုက်သည်။

ထောက်ပံ့ရေး တာဝန်ခံက ဂုန်နီအိတ် တစ်အိတ်ကို ဖောက်ကာ အထဲမှ အာလူး အနည်းငယ်ကို ထုတ်ယူလိုက်သည်။

"အနီရောင်နဲ့ ခရမ်းရောင်တွေတောင် ပါသေးတာလား"

တာဝန်ခံက ဂုန်နီအိတ်ထဲရှိ အရောင်စုံ အာလူးများကို ကြည့်ကာ အနည်းငယ် အံ့အားသင့်သွား၏။

"ဒါက စားလို့ ကောင်းပါ့မလား"

သူက ဤကဲ့သို့ အာလူးမျိုးကို တကယ် မမြင်ဖူးခဲ့ချေ။

သို့သော် သူက အတွေ့အကြုံ ရင့်ကျက်သူဖြစ်ရာ ဤအာလူးများ၏ အပြင်ပန်း အသွင်အပြင်ကို သေချာစွာ ကြည့်ရှုလိုက်သည်။

အာလူး၏ ပုံစံက အတော်လေး ကောင်းမွန်ပြီး လုံးဝန်းကာ အပေါ်ရှိ အပေါက်များကလည်း နည်းပါးသဖြင့် တကယ့် အကောင်းစား အဆင့်တွင် ရှိကြောင်း သိသာနေ၏။

အပြင်ပန်း ကြည့်ရုံဖြင့် အာလူးကောင်းများ ဖြစ်ကြောင်း သိသာသော်လည်း အရသာ မည်သို့ ရှိမည်ကိုတော့ မသိရသေးပေ။

ထို့ကြောင့် ထောက်ပံ့ရေး တာဝန်ခံက သရေစာ တာဝန်ခံ စားဖိုမှူးကို အာလူး နှစ်အိတ်ခန့် ယူ၍ အရင် စမ်းသပ်ကြည့်ခိုင်းလိုက်သည်။

သိပ်မကြာခင်မှာပင် ဆီအိုး ပူလာခဲ့၏။

လှိုင်းတွန့်ဓားဖြင့် အာလူးများကို လှိုင်းတွန့်ပုံစံ အတုံးလေးများ တုံးလိုက်သည်။

ထို့နောက် ရေနွေးဖျောကာ ပြုတ်ပြီး ဆီပူပူတွင် ကြော်ကာ အရသာ သွင်းလိုက်၏။

အရသာရှိလှသော အာလူးကြွပ်ကြော်များ အောင်မြင်စွာ ရရှိသွားပြီ ဖြစ်သည်။

အာလူးတုံးလေးများက ရွှေဝါရောင်သန်းကာ ကြွပ်ရွနေပြီး အပြင်ဘက်တွင် ဆီဝေ့နေကာ ငရုတ်သီးမှုန့်... ငရုတ်ကောင်းမှုန့်... နှမ်း တို့ ကပ်ငြိနေပြီး နံနံပင်နှင့် ငရုတ်သီးစိမ်းများကလည်း အလှဆင်ထားသေး၏။

ကြည့်လိုက်ရုံဖြင့် လူကို သွားရည်ကျစေပေသည်။

"ဒီအာလူးတွေ မဆိုးဘူးပဲ... တကယ်ကို အသားပြည့်တယ်... ကြည့်လိုက်တာနဲ့ ပစ္စည်းကောင်းမှန်း သိသာနေတာပဲ"

အာလူးကြွပ်ကြော် တာဝန်ခံ စားဖိုမှူးက ချီးကျူးလိုက်သည်။

သူ ထိုသို့ပြောသည်ကို ကြားသောအခါ ထောက်ပံ့ရေး တာဝန်ခံလည်း ဝမ်းသာသွား၏။

သူက အာလူးတစ်တုံးကို ကောက်ယူကာ အရသာ မြည်းစမ်းကြည့်လိုက်သည်။

အာလူးကို ပါးစပ်ထဲ ထည့်လိုက်သည်နှင့် ငရုတ်သီး... ငရုတ်ကောင်းမှုန့်... နံနံပင်... နှမ်း စသည့် ဟင်းခတ်အမွှေးအကြိုင်များ၏ အရသာက သွားရည်များနှင့် ရောနှောသွားကာ သူ၏ အရသာခံဖုများကို နှိုးဆွလိုက်၏။

ထို့နောက် ဖွဖွလေး ဝါးကြည့်လိုက်ရာ အာလူး၏ ကြွပ်ရွနေသော အခွံကြောင့် ထွက်ပေါ်လာသည့် ကြွပ် ကြွပ် ဟူသော အသံကို ခံစားလိုက်ရသည်။

အခွံကို ကိုက်ခွဲပြီးနောက် အထဲရှိ အာလူးသားကို ကိုက်မိသွား၏။

အတွင်းသားက နူးညံ့အိစက်နေပြီး ဟင်းခတ်အမွှေးအကြိုင်များ၏ အရသာက အလွယ်တကူ စိမ့်ဝင်နေပေသည်။

အရသာက တကယ်ကို ကောင်းမွန်လွန်းလှ၏။

"အင်... ဒီအာလူးက အရသာ တကယ် ကောင်းတာပဲ"

"အပြင်ဘက်က ကြွပ်ရွနေတာတော့ ထားလိုက်ပါတော့... အတွင်းသားက အရင်ကထက် ပိုပြီး နူးညံ့အိစက်နေသလို အရသာလည်း ပိုဝင်တယ်"

"အရင်ကထက် ပိုစားကောင်းနေသလိုပဲ"

ထောက်ပံ့ရေး တာဝန်ခံ၏ မျက်နှာပေါ်တွင် စိတ်လှုပ်ရှားမှုများ အပြည့် ရှိနေသည်။

စားဖိုမှူးကလည်း တစ်လုပ် မြည်းစမ်းကြည့်လိုက်၏။

သူတို့ ပြုလုပ်သော အာလူးကြွပ်ကြော်၏ အရသာနှင့် ပြုလုပ်နည်းမှာ တူညီသော သင်တန်းများ ပေးထားခြင်းဖြစ်ရာ အရသာကို သူတို့က အရင်းနှီးဆုံးပင် ဖြစ်သည်။

သို့သော် ဤတစ်ကြိမ်တွင်တော့ ယခင်နှင့် မတူညီကြောင်းကို ခံစားသိရှိလိုက်ရ၏။

ဤအာလူး၏ အရသာက ပိုမို ကောင်းမွန်ပြီး စားရသည်မှာ ပို၍ ခံတွင်းတွေ့လှပေသည်။

"တကယ်ပဲ... ဒီတစ်ခေါက် ဝယ်လာတဲ့ အာလူးတွေက တကယ် ကောင်းတယ်"

"ကွာခြားချက်က တော်တော်လေး သိသာတယ်နော်"

"ဒီအာလူးတွေက အရည်အသွေး အရမ်း မြင့်တယ်"

စားဖိုမှူးကလည်း ရင်ထဲမှနေ၍ ချီးကျူးလိုက်သည်။

တိုက်တိုက်ဆိုင်ဆိုင် ကျိန့်ယိုချိုက်က ဤဘက်သို့ အခြေအနေ လာကြည့်ရာ ထောက်ပံ့ရေး တာဝန်ခံနှင့် စားဖိုမှူးတို့ ပြောဆိုနေသည်ကို ကြားသိရသဖြင့် ဤအာလူးများ၏ အရည်အသွေး အလွန် မြင့်မားကြောင်းကို သူလည်း သိရှိသွားခဲ့၏။

"ငါ သုတေသန ဌာနက သူငယ်ချင်းကို ဒီအာလူးတွေရဲ့ ခွဲခြမ်းစိတ်ဖြာမှု အစီရင်ခံစာကို ကြည့်ခိုင်းလိုက်တာ... ဒီအာလူးတွေက ဈေးကွက်ထဲက အာလူးတွေထက် အများကြီး ပိုကောင်းတယ်တဲ့"

"ဒါကြောင့် မနေ့က ငါ အမြန် လေယာဉ်စီးပြီး သွားဝယ်ခဲ့တာလေ"

"တခြားလူတွေ ဦးသွားမှာ စိုးလို့ပေါ့"

"အခုက နည်းပညာခေတ်လေ... ပစ္စည်း အကောင်းအဆိုးကို ခွဲခြမ်းစိတ်ဖြာလို့ ရနေပြီ... ဒီအာလူးက ဒေတာ အချက်အလက်တွေကို ကြည့်လိုက်တာနဲ့တင် အရမ်းကောင်းမှန်း သိသာနေတာပဲ"

"နောက်ပိုင်း အာလူး ထောက်ပံ့ရေး ပြဿနာ ဖြေရှင်းပြီးသွားပြီဆိုတော့... အာလူးကြွပ်ကြော်တွေကို မင်းတို့ သေချာလေး လုပ်ကြနော်"

ကျိန့်ယိုချိုက်က သူတို့ကို မှာကြားလိုက်သည်။

"စိတ်ချပါ မန်နေဂျာ... သေချာပေါက် ပြဿနာ မရှိစေရပါဘူး"

"ဒီအာလူးတွေက ပြီးခဲ့တဲ့ တစ်ခေါက်က ဝယ်ထားတာတွေထက် အများကြီး ပိုကောင်းတယ်"

စားဖိုမှူးက အမြန် ပြန်ဖြေလိုက်၏။

ပြဿနာ တစ်ခု ဖြေရှင်းပြီးသွားသော်လည်း ကျိန့်ယိုချိုက်က သိပ်ပြီး ထူးခြားသည်ဟု မခံစားရပေ။ မည်သို့ပင်ဖြစ်စေ သူ နေ့စဉ် ဖြေရှင်းရမည့် ပြဿနာများက များပြားလွန်းလှသည် မဟုတ်ပါလား။

ထို့နောက် သူက ရွှီယန်ထံ WeChat မှတစ်ဆင့် ဆက်သွယ်ကာ ပူးပေါင်းလုပ်ဆောင်ရသည်မှာ အဆင်ပြေကြောင်းနှင့် နောက်နှစ်တွင်လည်း ဆက်လက် ပူးပေါင်းလုပ်ဆောင်လိုပြီး ဝယ်ယူမည့် ပမာဏကိုလည်း တိုးမြှင့်လိုကြောင်း ပြောဆိုလိုက်သည်။

ရွှီယန်ကတော့ နောက်နှစ်ကျမှ ဆက်ပြောမည်ဖြစ်ပြီး ပူးပေါင်းလုပ်ဆောင်ရန် ပြဿနာ မရှိကြောင်း ပြန်ပြောလိုက်၏။

သူက ချက်ချင်း တိုက်ရိုက် သဘောမတူခဲ့ပေ။ မည်သို့ပင်ဖြစ်စေ အချိန်ကာလအလိုက် အာလူးဈေးနှုန်းများက မတူညီနိုင်သလို သူ၏ အာလူးများက အမြဲတမ်း ဈေးကောင်း ရနိုင်မည်သာ ဖြစ်သည်။

လယ်ယာခြံဝင်း အတွင်း၌။

အာလူးနှင့် ဝက်နံရိုး နှပ်ချက် ပြီးစီးသွားပြီ ဖြစ်သည်။

သံဒယ်အိုးကြီးထဲတွင် အာလူးတုံးများက ပွက်ပွက်ဆူနေသော ဟင်းရည်ထဲ၌ ကျက်နေပြီး ဝက်နံရိုးများကလည်း အညိုရင့်ရောင် ပြောင်းလဲနေကာ မွှေးရနံ့များက ဆက်တိုက် ထွက်ပေါ်နေ၏။

ထမင်းစားသည့်အခါ ဟင်းရည်ကို ထမင်းပေါ် ဆမ်း၍ နယ်ကာ တစ်လုပ် စားလိုက်ရသည်။

ထိုခံစားချက်က ဘယ်လောက်တောင် ကောင်းလိုက်သလဲ မပြောနှင့်တော့။

ဝန်ထမ်းများ အားလုံး စုဝေးကာ ထမင်းစားရန် စောင့်ဆိုင်းနေကြသည်။

ခွေးနှစ်ကောင်ကလည်း အနံ့ကို ရရှိသဖြင့် မီးဖိုချောင် တံခါးဝတွင် ထိုင်ကာ အစာကျွေးမည့် အချိန်ကို စောင့်ဆိုင်းနေကြ၏။

ကိစ္စတစ်ခု ပြီးစီးသွားသဖြင့် အားလုံး ပျော်ရွှင်နေကြပေသည်။

နောက်ပိုင်းတွင် အချိန်အတန်ကြာ အနားယူနိုင်တော့မည် ဖြစ်သည်။

နောက်ထပ် တစ်ပတ် နှစ်ပတ်ခန့် ကြာပါက မှန်လုံအိမ် တစ်ဝက်ခန့် စိုက်ပျိုးထားသော စတော်ဘယ်ရီနှင့် နဂါးမောက်သီးများလည်း ရင့်မှည့်လာတော့မည် ဖြစ်၏။

စိုက်ပျိုးထားသည်က မများပြားသော်လည်း စမ်းသပ်ကြည့်ရုံသာ ဖြစ်သည်။

ဈေးကွက် အခြေအနေ မည်သို့ ရှိသည်ကို စောင့်ကြည့်ရဦးမည် မဟုတ်ပါလား။

ထို့နောက်မှသာ နောက်တစ်ဆင့်အတွက် ဆက်လက် စီစဉ်ရမည် ဖြစ်လေသည်။