အခန်း ၂၆၈

အခန်း (၂၆၈) အခု ထွက်သွားလို့ရပါပြီ

ဝူဖုန်းသည် အရှက်အကြောက် ကင်းမဲ့သူတစ်ယောက်ပင် ဖြစ်၏။

သူသည် ကျင်းချန်ကို မိမိရှေ့တွင် လုံးဝ ခေါင်းငုံ့အညံ့ခံစေလိုပြီး၊ ထိုအခွင့်အရေးကို အသုံးချကာ မိမိ၏ ဩဇာနှင့် အာဏာကို လူအများရှေ့တွင် ပြသချင်နေခဲ့သည်။

"ဟီးဟီး..."

ကျင်းချန်က ရယ်မောလိုက်ပြီး သူ့ကို ဂရုမစိုက်ခဲ့ချေ။

"မင်း..."

"မင်း စောင့်ကြည့်နေလိုက်... မင်းသဘောကျသည်ဖြစ်စေ မကျသည်ဖြစ်စေ ဒီနေ့ မင်းထွက်သွားရမယ်"

ဝူဖုန်းက ကြမ်းတမ်းစွာ စိုက်ကြည့်လျက် ဤရက်စက်သော စကားများကို ပြောဆိုလိုက်သည်။

ကျင်းချန်က အဆက်အသွယ်မရှိတဲ့ အောက်ခြေဝန်ထမ်းတစ်ယောက်သာ ဖြစ်ပေမဲ့ ငါ့မှာတော့ သူဌေးဖြစ်တဲ့ ယောက်ဖတစ်ယောက် ရှိတယ်... ဒါက ငါ့ကို ကျင်းချန်ထက် အများကြီး ပိုပြီး ဩဇာညောင်းစေတာပဲ...

ဝူဖုန်းက တိတ်တဆိတ် တွေးလိုက်သည်။

ကုမ္ပဏီကို ဝယ်ယူလိုက်ပြီ ဖြစ်ပေမဲ့ သူဌေးဖြစ်တဲ့ ငါ့ယောက်ဖက သူ့ရဲ့ အရင်းနှီးဆုံး ဆွေမျိုးဖြစ်တဲ့ ငါ့အတွက် စကားပြောပေးမယ်ဆိုတာ သေချာပါတယ်... ငါက ဒီမှာ မန်နေဂျာဆက်ဖြစ်နေဦးမှာပဲ... ပြီးတော့ ဒုတိယဥက္ကဋ္ဌ ဒါမှမဟုတ် အထွေထွေမန်နေဂျာအဖြစ်တောင် ရာထူးတိုးနိုင်သေးတယ်...

ဤအရာအားလုံးကို တွေးတောရင်း ဝူဖုန်းသည် အနာဂတ်က တောက်ပနေသည်ဟု ခံစားလိုက်ရပေ၏။

"ဒီနေ့ ဝန်ထမ်းအားလုံး အစည်းအဝေး လုပ်ရတဲ့ အဓိက အကြောင်းရင်းက အားလုံးကို ကိစ္စတစ်ခု ပြောပြချင်လို့ပါ"

"ကျွန်တော် ပြောပြချင်တာက ခင်ဗျားတို့ အားလုံး သိပြီးသား ကိစ္စတစ်ခု ဖြစ်နိုင်ပါတယ်"

"ဒါကတော့ ချင်းယန်ကို ဥက္ကဋ္ဌစုယွမ်က ဝယ်ယူလိုက်ပြီဆိုတဲ့ ကြီးကျယ်ခမ်းနားတဲ့ အောင်ပွဲပဲ ဖြစ်ပါတယ်"

ကျန်းတာဗျောင်က အော်ပြောလိုက်ရာ သူ၏ အသံသည် ခန်းမတစ်ခုလုံး၌ ရှင်းလင်းစွာ ပဲ့တင်ထပ်သွားတော့၏။

လူတိုင်းက သိနှင့်ပြီးဖြစ်သော်လည်း သူဌေးကိုယ်တိုင် ပြောသည်ကို ကြားရချိန်တွင် အံ့အားသင့်နေဆဲပင်။ ချက်ချင်းပင် ခန်းမတစ်ခုလုံးတွင် စကားသံများနှင့် ဆွေးနွေးသံများ ဆူညံသွားချေပြီ။ လူတိုင်း၏ စိတ်နှလုံးထဲတွင် မတူညီသော အတွေးများ ရှိနေကြပြီး အချို့လူများသည် စကားဖြင့် မဖော်ပြနိုင်သော ခံစားချက်တစ်ခုကို ခံစားနေရပေသည်။

"အားလုံးပဲ ကျေးဇူးပြုပြီး တိတ်တိတ်နေပေးပါ... ဒီကိစ္စကို ဆက်မဆွေးနွေးကြပါနဲ့တော့"

"ဥက္ကဋ္ဌစုယွမ်ကို စကားအနည်းငယ် ပြောကြားပေးဖို့ ဖိတ်ခေါ်ပါတယ်"

ကျန်းတာဗျောင်က ပြောလိုက်၏။

ပရိသတ်ဆီမှ လက်ခုပ်သံများ ချက်ချင်း ထွက်ပေါ်လာပေသည်။

"တကယ်တော့ အထူးတလည် ပြောစရာမရှိဘူးဆိုတာ ကျွန်တော် သိပါတယ်"

"ချင်းယန်ကို ကျွန်တော့်ဆီ ရောင်းချပေးတဲ့အတွက် သူဌေးကျန်းကို ကျေးဇူးတင်ပါတယ်"

စုယွမ်က အများကြီး မပြောခဲ့ဘဲ ယဉ်ကျေးသော စကားအချို့ကိုသာ ဖလှယ်ခဲ့ပြီး ထိုမျှဖြင့် ပြီးဆုံးသွား၏။

"ဒီနေ့က ဝန်ထမ်းအားလုံးအတွက် အထွေထွေ အစည်းအဝေးပါ"

"တကယ်လို့ ကုမ္ပဏီဝယ်ယူမှုနဲ့ ပတ်သက်ပြီး မေးစရာရှိရင် ကျွန်တော့်ကို အချိန်မရွေး မေးနိုင်ပါတယ်"

စုယွမ်က လူတိုင်းကို ကြည့်ကာ ပြောလိုက်သည်။

ထိုချိန်တွင် လူအုပ်ကြီးသည် ပြန်လည် ဆူညံစွာ ဆွေးနွေးလာကြပြန်၏။ လူတစ်ဦးက ရဲတင်းစွာ မတ်တတ်ရပ်လိုက်ပြီး လက်ထောင်ကာ ကျယ်လောင်စွာ ပြောလိုက်သည်။

"ကျွန်တော့်မှာ မေးခွန်းတစ်ခု ရှိပါတယ်"

စုယွမ်က ပြုံး၍ ခေါင်းညိတ်ပြလိုက်၏။

"ကောင်းပါပြီ... ကျေးဇူးပြုပြီး ပြောပါ"

"ဥက္ကဋ္ဌစူး... ကျွန်တော် မေးချင်တာက... ခင်ဗျား ချင်းယန်ကို ဝယ်ယူပြီးတဲ့နောက် ကျွန်တော်တို့ ဝန်ထမ်းတွေ ဘာဖြစ်သွားမလဲ"

"ဒါက ကျွန်တော့် ပြဿနာတင် မကပါဘူး... လူတိုင်းရဲ့ ပြဿနာပါ"

ထိုလူက မေးလိုက်ပြီး အခြားဝန်ထမ်းများကလည်း သဘောတူညီစွာ ခေါင်းညိတ်ပြကြပေသည်။

"အင်း..."

"ဒါက အရမ်းကောင်းတဲ့ မေးခွန်းပဲ"

"ကျွန်တော်တို့ ချင်းယန်ရဲ့ လက်ရှိဝန်ထမ်းတွေအကြောင်းကို ဆွေးနွေးလေ့လာခဲ့ပြီးပါပြီ... နှစ်တွေတစ်လျှောက် ချင်းယန်မှာ အရမ်းတော်တဲ့ ဝန်ထမ်းတချို့ ရှိခဲ့တယ်ဆိုတာ အမှန်ပါပဲ"

"ဒါပေမဲ့ ကျွန်တော်တို့က အများစုကိုပဲ ဆက်ထားနိုင်မှာပါ... အနည်းစုကတော့ ထွက်သွားရဦးမှာပါ"

"စကားစပ်လို့ ပြောရရင် ကျွန်တော် ချင်းယန်ကို ဝယ်ယူခဲ့တဲ့ အကြောင်းရင်းကလည်း ကျွန်တော်တို့ရဲ့ ဝန်ထမ်းတစ်ယောက်အတွက်ပါပဲ"

စုယွမ်က လူအုပ်ကြီးကို အကဲခတ်ကြည့်ရှုရင်း ပြောလိုက်၏။ ထို့နောက် သူက ကျင်းချန်ကို ကြည့်လိုက်သည်။

ကျင်းချန်က သိသိသာသာ တုန်ရီသွားပြီး သူလည်း စိတ်လှုပ်ရှားမှု တစ်ဟုန်ထိုး တက်လာသည်ကို ခံစားလိုက်ရပေ၏။

မြင်းကောင်းတစ်ကောင်ကို ရှာတွေ့ဖို့ လွယ်ကူပေမဲ့ မျက်စိရှင်တဲ့သူက ရှားပါးတယ် ဆိုတဲ့စကားက ငယ်ငယ်ကတည်းက မှန်ကန်ကြောင်း သက်သေပြခဲ့ပြီး လက်တွေ့မှာ ဤသို့ ဖော်ထုတ်ပြသလိုက်ခြင်းက သူ့ကို စိတ်လှုပ်ရှားမှုများ ပြည့်နှက်သွားစေခဲ့၏။

သူ၏ဘေးတွင် ရပ်နေသော ဝူဖုန်းက စုယွမ် လှမ်းကြည့်နေသည်ကို မြင်လိုက်ရပြီး သူ့ကို ကြည့်နေသည်ဟု ထင်မှတ်သွားပေသည်။ ဝူဖုန်းသည် ရုတ်တရက် သိသိသာသာ စိတ်လှုပ်ရှားလာတော့၏။

ဒီနှစ်တွေအတွင်း ယောက်ဖရဲ့ ကုမ္ပဏီငယ်လေးမှာ မန်နေဂျာအဖြစ် အလုပ်လုပ်ရတာက ငါ့ရဲ့ အရည်အချင်းတွေကို ပြသဖို့ နေရာမရှိသလို ဖြစ်နေခဲ့တာ...

ဥက္ကဋ္ဌစူးက သူဌေးကြီးတစ်ယောက်ပဲ... တကယ်လို့ ငါသာ သူ့မျက်စိကျခံရရင် ငါ့ရဲ့ အနာဂတ်က မယုံနိုင်လောက်အောင် တောက်ပလာမှာပဲ...

မဖြစ်ဘူး... ငါ ဒီလို အလကား ထိုင်နေလို့ မရဘူး... အစပြုရမယ်... ဥက္ကဋ္ဌစုအပေါ် အရမ်းကောင်းတဲ့ အထင်အမြင်ရအောင် လုပ်ရမယ်...

ဝူဖုန်းက စိတ်ထဲမှ တွေးလိုက်သည်။

"ဥက္ကဋ္ဌစူး... ကျွန်တော်လည်း ပြောစရာ ရှိပါတယ်"

ဝူဖုန်းက လျင်မြန်စွာပင် စိတ်လှုပ်ရှားစွာ မတ်တတ်ရပ်လိုက်၏။

"အိုး... ခင်ဗျားလည်း ပြောစရာ ရှိတယ်ပေါ့"

စုယွမ်က သူ့အပေါ် အလွန်နက်ရှိုင်းသော အထင်အမြင်ကျန်ရစ်စေခဲ့သည့် ဝူဖုန်းအား ကြည့်လိုက်သည်။

"ဟုတ်ပါတယ်"

"ခုနကတင် ဥက္ကဋ္ဌစုက တချို့လူတွေ ဆက်နေလို့မရဘူးလို့ ပြောခဲ့တယ် မဟုတ်လား"

"ကျွန်တော့်ရဲ့ အရင်ရာထူးက မန်နေဂျာပါ... ကျွန်တော့်မှာ ခိုင်မာတဲ့ စီမံခန့်ခွဲမှုစွမ်းရည် ရှိပြီး ဝန်ထမ်းတွေကိုလည်း ကောင်းကောင်း နားလည်ပါတယ်"

"ဌာနအသီးသီးရဲ့ အကြီးအကဲတွေက ဘယ်သူတွေ ထွက်သွားချင်လဲ ဘယ်သူတွေက မထွက်ချင်ဘူးလဲ ဆိုတာကို စာရင်းပြုစုဖို့ အကြံပြုချင်ပါတယ်"

"ဒါက အရမ်းရှင်းလင်းပြီး နားလည်ရလွယ်ကူစေပါတယ်"

ဝူဖုန်းက အကြံပြုလိုက်၏။

"အင်း... ဒါက အများကြီး အဓိပ္ပာယ်ရှိတာပဲ"

စုယွမ်က ခေါင်းညိတ်၍ ပြောလိုက်သည်။

စုယွမ် ဤသို့ပြောသည်ကို ကြားလိုက်ရချိန်တွင် အခြေအနေများ ပိုမိုဆိုးရွားလာတော့မည်ဟု အချို့လူများက တိတ်တဆိတ် တွေးလိုက်ကြပေ၏။ အကယ်၍ မန်နေဂျာကိုသာ စာရင်းပြုစုခွင့်ပေးလိုက်ပါက မန်နေဂျာနှင့် အဆင်မပြေသူတိုင်း အလုပ်ထုတ်ခံရမည် မဟုတ်ပါလော။

ဤသို့ဆိုလျှင် ဖြစ်မည်မဟုတ်ချေ။

အချို့က မတ်တတ်ရပ်၍ ငြင်းခုံချင်ကြသော်လည်း ဝူဖုန်း၏ ကြမ်းတမ်းသော စိုက်ကြည့်မှုကြောင့် အားလုံး တန့်သွားရတော့သည်။

"ဥက္ကဋ္ဌစူး... ကျွန်တော့် အကြံပြုချက်က ကောင်းတယ်လို့ မထင်ဘူးလား"

ဝူဖုန်းက ကျေနပ်ဂုဏ်ယူစွာဖြင့် ပြောလိုက်၏။

"ဟုတ်တယ်... မဆိုးပါဘူး"

"ဒါဆို ခင်ဗျားရဲ့ ဌာနမှာ ဘယ်သူတွေက ထွက်သွားပြီး ဘယ်သူတွေက ဆက်နေမယ်ဆိုတာ ပြောပြပါ"

"အခုချက်ချင်း စာရင်းပေးပါ"

စုယွမ်က တိုက်ရိုက်ပင် ပြောဆိုလိုက်သည်။

"ဟုတ်ကဲ့... ဥက္ကဋ္ဌစု... အချက်အလက်အားလုံးကို ထည့်သွင်းစဉ်းစားပြီး..."

သူ၏ လက်ပါးစေများက သူ့ကို အပြင်းအထန် မျက်စိမှိတ်ပြနေသည်ကို ဝူဖုန်း သတိထားမိလိုက်သော်လည်း ကျင်းချန်ကမူ အသက်မပါသော မျက်နှာသေဖြင့်သာ ကြည့်နေဆဲပင်။

ကျင်းချန်... ကျင်းချန်... ဒီနေ့ ငါ့ကို စော်ကားဖို့ ဘယ်သူက မင်းကို သင်ပေးလိုက်တာလဲ...

ဝူဖုန်းက စိတ်ထဲမှ တွေးလိုက်ပြီးနောက် စုယွမ်ကို ကြည့်ကာ ပြောလိုက်သည်။

"ဥက္ကဋ္ဌစူး... ကျောက်ယွီ... ချန်ခိုင်... မာတို... ဒီလူတွေက ပုံမှန်ဆို အရမ်းအလုပ်ကြိုးစားတယ်... လုံ့လဝီရိယရှိပြီး အကြံဉာဏ်နဲ့ စွမ်းရည်တွေ ရှိကြပါတယ်"

"သူတို့က ကုမ္ပဏီမှာ အရေးကြီးတဲ့ ရာထူးတွေကို ဆက်ပြီး ရယူဖို့ ကျွန်တော် အပြင်းအထန် အကြံပြုချင်တဲ့ လူတွေပါ"

ဝူဖုန်း စကားပြောအပြီးတွင် သူ၏ လက်ပါးစေများအားလုံး ဝမ်းသာအားရ ပြုံးရွှင်သွားကြပေ၏။

ကျောက်ယွီက သူ၏နောက်မှနေ၍ တီးတိုးပြောလိုက်သည်။

"ကျေးဇူးတင်ပါတယ် မန်နေဂျာ... အစည်းအဝေးပြီးရင် ကျွန်တော် အန်ပေါင်းအကြီးကြီး တစ်ခု ပို့ပေးပါ့မယ်..."

ဝူဖုန်းသည် ဤစကားကြောင့် ကျေနပ်သွားပြီး သူ၏ အပြုံးသည် ပို၍ ကျယ်ပြန့်သွားခဲ့သည်။

"ကောင်းပြီ... ခင်ဗျားရဲ့ ဌာနက ဘယ်အဖွဲ့ဝင်တွေ ထွက်သွားသင့်တယ်လို့ ခင်ဗျား ထင်လဲ"

စုယွမ်က ဆက်၍ မေးလိုက်၏။

"အင်း... အပြုအမူ တကယ်ကို ဆိုးရွားတဲ့ လူတချို့ ရှိပါတယ်"

"ခေါင်းဆောင်မှုကို မနာခံတာက ပြဿနာသေးသေးလေးပါ... အဓိက ပြဿနာက သူတို့ဟာ ပုံမှန်အားဖြင့် လိမ်လည်ပြီး တခြားသူတွေရဲ့ သုတေသန ရလဒ်တွေကို ခိုးယူတတ်ကြတာပါ... ဒါက အရမ်းကို ကြီးလေးပါတယ်... ဒီလိုလူတွေကို ကုမ္ပဏီမှာ ဆက်ထားဖို့ ကျွန်တော် အကြံမပြုပါဘူး"

"ဥပမာပြောရရင် ကျောက်လဲ့ပေါ့..."

ဝူဖုန်းက နာမည်များစွာကို ရွတ်ဆိုလိုက်ရာ ထိုသူအားလုံးသည် ကျင်းချန်နှင့် ရင်းနှီးသူများဖြစ်ပြီး အလုပ်သာလုပ်တတ်၍ လက်ဆောင်ပေးရန် နားမလည်သူများသာ ဖြစ်ပေ၏။

ဒီလူတွေကို ဆက်ထားတာက ငါ့အတွက် ဘာအကျိုးမှ ရှိမှာ မဟုတ်ဘူး...

"အထူးသဖြင့် ကျင်းချန်ပဲ... သူက ကျွန်တော်တို့ ကုမ္ပဏီမှာ အဆိုးရွားဆုံး... အကောက်ကျစ်ဆုံး... ယုတ်မာဆုံး... အပျင်းဆုံးနဲ့ ခေါင်းဆောင်မှုကို အဆန့်ကျင်ဆုံးလူပဲ"

"ဒီလူကို အခုချက်ချင်း ခန်းမထဲကနေ ထုတ်ပစ်ဖို့ အကြံပြုပါတယ်"

ဝူဖုန်းက ကြမ်းတမ်းစွာ ပြောလိုက်သည်။

ဝူဖုန်းအား ကြည့်လိုက်ချိန်တွင် ကျင်းချန်၏ သူငယ်ချင်းများသည် ဒေါသထွက်သွားကြပြီး ချက်ချင်း ပြေးသွားကာ ထိုးကြိတ်ချင်စိတ်များ ဖြစ်ပေါ်သွားကြပေ၏။

"ဥက္ကဋ္ဌစူး... ဒါက ကျွန်တော့်ရဲ့ အကြံပြုချက်ပါ"

ဝူဖုန်းက ဂုဏ်ယူဝင့်ကြွားစွာ ပြောလိုက်သည်။

"အင်း... အရမ်းကောင်းတယ်"

"ခုနက ခင်ဗျားပြောခဲ့တဲ့ ဆက်နေဖို့ သင့်တော်တယ်ဆိုတဲ့ လူတွေကို တစ်ချက်လောက် ကြည့်ပါရစေ"

စုယွမ်က ညင်သာစွာ ပြောဆိုလိုက်၏။

"ဥက္ကဋ္ဌစူးက မင်းတို့လို ဝန်ထမ်းကောင်းတွေကို မတ်တတ်ရပ်ခိုင်းနေတယ်... မြန်မြန် မတ်တတ်ရပ်ကြစမ်း"

ဝူဖုန်းက တိုက်တွန်းလိုက်သည်။

ထိုသို့ပြောပြီးနောက် လက်ပါးစေများသည် ရယ်မောကာ မတ်တတ်ရပ်လိုက်ကြပေ၏။

ထိုမြင်ကွင်းကို မြင်လိုက်ရသည့်အခါ လူတိုင်းက သက်ပြင်းချလိုက်ကြ၏။

သူတို့အမြင်တွင် စုယွမ်သည် အသက်ငယ်လွန်းသေးပြီး စီးပွားရေးလောက၏ ကောက်ကျစ်မှုများကို နားမလည်သေးပေ။

ဝူဖုန်းက စကားနှစ်ခွန်းသုံးခွန်းဖြင့်ပင် သူ့ကို လှည့်စားနိုင်ခဲ့ရုံသာမက၊ သူသည် ဝူဖုန်း၏ လက်ပါးစေများကိုပင် ဆုချီးမြှင့်ရန် စဉ်းစားနေသေးသည်။

ဤအရာက အမှန်တကယ် စိတ်ပျက်စရာကောင်းလှ၏။

“ဟူး...

ဒီဥက္ကဋ္ဌစူးလည်း အပြောပဲရှိပြီး အလုပ်မပါဘူး ထင်တယ်...”

လူတစ်ဦးက စိတ်ပျက်လက်ပျက် ရေရွတ်လိုက်ရာ ပတ်ဝန်းကျင်ရှိ လူများကလည်း သဘောတူသည့် အနေနှင့် ခေါင်းညိတ်လိုက်ကြသည်။

“ ဥက္ကဋ္ဌစု...

ဒီလူတွေပဲ...”

ဝူဖုန်းက အပြုံးဖျော့ဖျော့ဖြင့် ဆက်ပြောလိုက်၏။

စုယွမ်က ခေါင်းအသာညိတ်လိုက်ပြီး အေးအေးဆေးဆေး ပြောလိုက်သည်။

“ကောင်းပြီ...

အခု မတ်တတ်ရပ်နေတဲ့သူတွေ...

မင်းတို့အားလုံး ချင်းယန်ကနေ အခုချက်ချင်း ထွက်သွားလို့ရပြီ...”