အခန်း ၂၄၇

အပိုင်း ၂၄၇

ဘာသာပြန် - Ko Yoohtoo

True Immortal Team

သူတော်စင်မြို့တော်အတွင်းသို့ ဝင်ရောက်လိုပါက ထိုသန္တာကျွန်းများ၌ စစ်ဆေးမှုကို ဦးစွာ ခံယူရမည်ဖြစ်ပြီး ရန်သူမဟုတ်ကြောင်း အတည်ပြုပြီးမှသာ စိတ်ချလက်ချ ဝင်ရောက်ခွင့် ရရှိမည်ဖြစ်သည်။

လင်းချန်သည် တစ်စုံတစ်ခုကို ရှင်းလင်းစွာ မြင်တွေ့လိုက်ရ၏။ ထိုအရာမှာ သန္တာကျွန်းများအားလုံးကို ဆက်သွယ်ထားသည့် မမြင်နိုင်လောက်သော အစီအရင်တစ်ခုပင် ဖြစ်သည်။ မြို့တော်ကို ကာကွယ်ထားသည့် ကာကွယ်ရေးအစီအရင် ဖြစ်သည်မှာ သိသာလှ၏။

အဝေးမှ ကြည့်စဉ်က သိပ်မကြီးလှဟု ထင်ရသော်လည်း အနားသို့ ရောက်လာသည့်အခါမှ မြို့တစ်မြို့မျှပင် ကျယ်ဝန်းကြောင်း သိလိုက်ရသည်။

ထို့အပြင် ကျွန်းပေါ်၌ ကင်းလှည့်စစ်သည်များစွာ ရှိနေ၏။ ကျွန်းပေါ်ရှိ ဧရိယာ ဆယ်ပုံတစ်ပုံခန့်ကိုသာ ဧည့်သည်များအတွက် ခွင့်ပြုထားပြီး ကျန်ရှိသည့် ဧရိယာအများစုကိုမူ အပြာရင့်ရောင် သတ္တုများဖြင့် သွန်းလုပ်ထားသော မြို့ရိုးကြီးများဖြင့် ကာရံထားကာ စစ်သည်များက တင်းကျပ်စွာ စောင့်ကြပ်နေကြသည်။

ထိုအစောင့်အကြပ်များ အားလုံးမှာ အနည်းဆုံး သေခြင်းရှင်ခြင်း နယ်ပယ် အဆင့်ရှိသူများ ဖြစ်ကြပြီး အရေအတွက်အားဖြင့် သောင်းနှင့်ချီ၍ ရှိနေသည်ကို မြင်လိုက်ရသည့်အခါ လင်းချန် အံ့ဩသွားမိ၏။

အကြမ်းဖျင်း တွက်ချက်ကြည့်လျှင် ဤကဲ့သို့သော အစွန်အဖျား သန္တာကျွန်းပေါင်း ရာနှင့်ချီ၍ ရှိနေနိုင်သည်။

ဆိုလိုသည်မှာ... သေခြင်းရှင်ခြင်း နယ်ပယ် စစ်သည်တော်များပင် သိန်းနှင့်ချီ၍ ရှိနေခြင်း ဖြစ်၏။

အတွင်းဘက်ကျွန်းများနှင့် သူတော်စင်မြို့တော်အတွင်း၌မူ မည်မျှအထိ ရှိနေမည်နည်း။ လက်ရှစ်ဖက်ပင်လယ်မျိုးနွယ်စု တစ်ခုလုံး၏ နယ်မြေအနှံ့၌ စစ်သည်အင်အား မည်မျှအထိ ရှိနေမည်နည်း။

ဤအချက်ကို ကြည့်ခြင်းဖြင့် လက်ရှစ်ဖက်ပင်လယ်မျိုးနွယ်စု တစ်ခုလုံး၏ ခွန်အားမှာ မည်မျှအထိ ကြီးမားကြောင်း ခန့်မှန်းနိုင်သည်။

ထိုအရာမှာ ဟွာရှာအင်ပါယာအတွက်မူ မဟာသမုဒ္ဒရာအတွင်းရှိ ရေတစ်ပေါက်မျှသာ ဖြစ်သော်လည်း လင်းချန် လက်ရှိအချိန်၌ ထုတ်သုံးနိုင်သည့် ခွန်အားနှင့် နှိုင်းယှဉ်လျှင်မူ အပြတ်အသတ် သာလွန်နေ၏။

ထိုသန္တာကျွန်းပေါ်၌ ရပ်နေရင်း လင်းချန်က စိတ်လှုပ်ရှားစွာ ရေရွတ်လိုက်မိသည်။ "ပြင်ပလောကကို ထွက်ကြည့်မှပဲ ကောင်းကင် ဘယ်လောက်မြင့်ပြီး မြေပြင် ဘယ်လောက်ကျယ်တယ်ဆိုတာ သိနိုင်တာပဲ။"

တစ်ချိန်တည်းမှာပင် စိုးရိမ်စိတ်လည်း ပေါ်ပေါက်လာ၏။ ကမ်းရိုးတန်းပြည်နယ်၌မူ သူသည် ဟွာရှာအင်ပါယာ၏ အတုမရှိသည့် စွမ်းအားကို ရရှိထားသည်။ ကမ်းရိုးတန်းပြည်နယ်သားများ၏ အမြင်၌မူ ဟွာရှာအင်ပါယာ၏ ခွန်အားမှာ မယုံနိုင်လောက်အောင် ကြောက်မက်ဖွယ်ကောင်းပြီး စိတ်ကူးကြည့်၍ပင် မရနိုင်ချေ။

သို့သော် ဤနေရာသို့ ရောက်လာပြီးနောက်၌မူ ပြင်ပလောကရှိ အင်အားစုများသည်လည်း အလွန်ပင် အစွမ်းထက်ကြောင်း လင်းချန် သဘောပေါက်လိုက်သည်။

အကယ်၍ သူ၏ ကိုယ်ပိုင်ခွန်အားမှာ လျင်မြန်စွာ မတိုးတက်ပါက နောင်တစ်ချိန်၌ ပိုမိုအစွမ်းထက်သည့် ရန်သူများနှင့် ရင်ဆိုင်ရသည့်အခါ အစွမ်းထက်လှသော ဟွာရှာအင်ပါယာ ရှိနေပါသော်လည်း စွမ်းအားကို အပြည့်အဝ မထုတ်သုံးနိုင်ခြင်းက အလွန် စိတ်ပျက်စရာ ကောင်းပေလိမ့်မည်။

'အနာဂတ်မှာ ငါ့မိဘတွေကို ရှာတွေ့လို့ သူတို့ ဘေးဒုက္ခရောက်နေချိန် မကူညီနိုင်တဲ့ အခြေအနေမျိုး မဖြစ်စေရဘူး... ငါ ပိုပြီး သန်မာလာရမယ်။'

ထိုခဏ၌ သန္တာကျွန်းကို စောင့်ကြပ်နေသည့် စစ်သည်တစ်ဦးသည် ကျန်းနျန်ရှင်းတို့အဖွဲ့ ချဉ်းကပ်လာသည်ကို မြင်သောအခါ ရှေ့သို့ တိုးလာသည်။ "ဘယ်က လာတာလဲခင်ဗျာ။ သူတော်စင်မြို့တော်ကို ဘာကိစ္စနဲ့ လာတာလဲ။"

ကျန်းနျန်ရှင်းက ပြုံးပြလိုက်၏။ "အရှေ့ဘက်ဌာနခွဲ ခေါင်းဆောင် ကျန်းနျန်ရှင်းပါ။ မျိုးနွယ်စု အစည်းအဝေး တက်ဖို့ လာတာပါ။"

ထို့နောက် ကျန်းနျန်ရှင်းသည် အပြာနုရောင် သတ္တုတံဆိပ်တစ်ခုကို ထုတ်ယူ၍ ထိုစစ်သည်ထံသို့ ကမ်းပေးလိုက်သည်။ စစ်သည်သည် တံဆိပ်ကို ယူကြည့်ပြီး စိတ်ဝိညာဉ်စွမ်းရည်တစ်ခုကို အသုံးပြုလိုက်ရာ တံဆိပ်ပေါ်၌ အပြာရင့်ရောင် အလင်းတန်းတစ်ခု ဖြတ်သန်းသွား၏။

ထို့နောက်၌ သူသည် ကျန်းနျန်ရှင်းအား ရိုသေစွာဖြင့် တံဆိပ်ကို ပြန်လည်ပေးအပ်လိုက်သည်။ "အဆင်ပြေပါတယ် ခင်ဗျာ။ ကျွန်တော် အခုပဲ လိုက်ပို့ပေးပါ့မယ်။"

ထိုစစ်သည်သည် လင်းချန်ကို ကြည့်လိုက်ရာ သူ၏ အကြည့်မှာ စူးစမ်းလိုစိတ်များဖြင့် ပြည့်နှက်နေ၏။

ဤမျိုးနွယ်စု အစည်းအဝေးသို့ လူသားများ လာရောက်မည်ကို သူတို့ သိထားကြသည်။

ပုံမှန်အားဖြင့် လူသားများသည် ရေအောက်၌ ရှိနေချိန် စိတ်ဝိညာဉ်ကျောက်တုံးများကို သုံး၍ ရေကို ကာကွယ်ခြင်း၊ အသက်အောင့်ခြင်း သို့မဟုတ် ဆေးလုံးများကို သုံးခြင်းတို့ ပြုလုပ်လေ့ရှိကြ၏။

သို့သော် ဤလူသားမှာမူ သူ၏ နှာခေါင်းနှင့် ပါးစပ်၌ ထူးဆန်းသည့် သတ္တုကိရိယာတစ်ခုကို တပ်ဆင်ထားပြီး ရံဖန်ရံခါ ရေပူဖောင်းလေးများ ထွက်ပေါ်နေသည်မှာ အလွန်ပင် ထူးဆန်းလှသည်။

မြို့ရိုးအတွင်းသို့ ရောက်သည့်အခါ သန္တာကျွန်းနှင့် သူတော်စင်မြို့တော်ကို ဆက်သွယ်ထားသော လမ်းကြောင်းတစ်ခု ရှိနေသည်ကို လင်းချန် တွေ့လိုက်ရ၏။ ထိုလမ်းကြောင်းအတွင်းရှိ အစီအရင်များသည် ရေစီးကြောင်းကို တွန်းပို့ပေးပြီး လင်းချန်တို့ကို သူတော်စင်မြို့တော်ဆီသို့ လျင်မြန်စွာ သယ်ဆောင်သွားသည်။

လင်းချန်သည် ဤအတွေ့အကြုံကို အလွန်ပင် စိတ်ဝင်စားမိ၏။ သူ၏ ယခင်ဘဝက ရေလှိုင်းစီးလမ်းကြောင်းများထက်ပင် ပိုမို ရင်ခုန်စရာ ကောင်းလှသည်။

'အင်း... ငါ့ ယခင်ဘဝကလို အပန်းဖြေ ဥယျာဉ်တွေနဲ့ ရေကစားတဲ့နေရာတွေ တည်ဆောက်ပြီး အင်ပါယာက ပြည်သူတွေကို ပျော်ရွှင်စေမယ်ဆိုရင် သူတို့ရဲ့ နှလုံးသားနယ်ပယ်အတွက်လည်း အများကြီး အထောက်အကူ ဖြစ်နိုင်တာပဲ။' လင်းချန် တွေးတောနေမိ၏။

သိပ်မကြာမီမှာပင် လင်းချန်တို့သည် သူတော်စင်မြို့တော်အတွင်းသို့ ဆိုက်ရောက်လာကြသည်။ မြို့တော်အတွင်းရှိ ဗိသုကာလက်ရာများမှာ ဌာနခွဲမြို့တော်များနှင့် ဆင်တူသော်လည်း ပိုမို၍ ခမ်းနားတင့်တယ်လှ၏။

တစ်စုံတစ်ယောက်က ရယ်မောလိုက်သည်။ "ဟေး... ဒါ ကျန်းနျန်ရှင်း မဟုတ်လား။ အရှေ့ဘက်ဌာနခွဲ ခေါင်းဆောင်ကြီး တော်တော်စောစော ရောက်လာတာပဲကိုး။"

လင်းချန်နှင့် ကျန်းနျန်ရှင်းတို့ သိပ်မဝေးသေးခင်မှာပင် အခြားသော လက်ရှစ်ဖက်ပင်လယ်မျိုးနွယ်စု အဖွဲ့တစ်ခုနှင့် ဆုံတွေ့လိုက်ရ၏။ ထိုအဖွဲ့ကို မြင်လိုက်ရသည်နှင့် ကျန်းနျန်ရှင်း၏ မျက်နှာမှာ မင်အိုးနှင့် အပက်ခံလိုက်ရသကဲ့သို့ ချက်ချင်းပင် မည်းမှောင်သွားသည်။

ကျန်းချီ မျက်မှောင်ကြုတ်သွား၏။ "ဟင်..."

ထိုခဏ၌ ကျန်းချီသည်လည်း တစ်စုံတစ်ခုကို အံ့သြစွာ တွေ့လိုက်ရသည်။ ဟွာရှာအင်ပါယာ၏ ဧကရာဇ် လင်းချန်သည်လည်း မျက်မှောင်ကြုတ်လျက် ရှေ့မှောက်ရှိ အဖွဲ့ကို စိုက်ကြည့်နေခြင်းပင်။

လင်းချန်၏ မျက်ဝန်းများအတွင်းမှ ဒေါသအဟုန်များမှာ ပေါက်ကွဲထွက်လုမတတ် ဖြစ်နေ၏။

'ထူးဆန်းလိုက်တာ... အရှင်မင်းကြီး လင်းချန်က မြောက်ဘက်ဌာနခွဲ အဖွဲ့ကို ဘာလို့ ဒီလောက်တောင် မုန်းတီးနေရတာလဲ။' ကျန်းချီမှာ လုံးဝ ဇဝေဇဝါ ဖြစ်သွားရသည်။

လင်းချန်၏ အကြည့်တို့သည် ကျန်းချီ ထင်မှတ်ထားသကဲ့သို့ မြောက်ဘက်ဌာနခွဲမှ ပင်လယ်မျိုးနွယ်ဝင်များထံသို့ မဟုတ်ပေ။ သူ စိုက်ကြည့်နေသည်မှာ ထိုအဖွဲ့အတွင်း ပါဝင်လာသည့် လူသားများထံသို့သာ ဖြစ်၏။

အရှေ့ဘက်ဌာနခွဲအဖွဲ့၌ လူသားဟူ၍ လင်းချန် တစ်ဦးတည်းသာ ပါဝင်သော်လည်း မြောက်ဘက်ဌာနခွဲအဖွဲ့၌မူ လူပေါင်း သုံးဆယ်ကျော် ပါဝင်နေသည်ကို တွေ့ရသည်။

ထိုလူသား သုံးဆယ်အနက်မှ တစ်ဦးမှာမူ အလွန်တရာ အရှိန်အဝါ ကြီးမားလှ၏။

သူသည် သေခြင်းရှင်ခြင်း နယ်ပယ်ကို အောင်မြင်စွာ ကျော်ဖြတ်ပြီး နိုးထခြင်း နယ်ပယ်သို့ ရောက်ရှိထားသူ ဖြစ်ကြောင်း ထင်ရှားလှသည်။

ထိုပုဂ္ဂိုလ်မှာ မုတ်ဆိတ်ရှည်များဖြင့် လူလတ်ပိုင်းအရွယ်ဖြစ်ပြီး ဘေးပတ်ဝန်းကျင်ကို မထီမဲ့မြင် ပြုနေသည့် မျက်ဝန်းများဖြင့် မာနထောင်လွှားနေသူ ဖြစ်၏။

သူသည် အရှေ့ဘက်ဌာနခွဲမှ လက်ရှစ်ဖက်ပင်လယ်မျိုးနွယ်စုကိုပင် တစ်ချက်မျှ လှည့်မကြည့်ဘဲ လျစ်လျူရှုထားသည်။

ထိုသူ၏ နောက်၌မူ ဆင်တူသည့် အပြာရောင် လှိုင်းအမှတ်အသားများ ပါရှိသော ဝတ်ရုံဖြူကို ဆင်မြန်းထားသည့် လူငယ်မောင်မယ် သုံးဆယ်ခန့် လိုက်ပါလာကြ၏။

လင်းချန်သည် ကမ်းရိုးတန်းပြည်နယ်၏ ပြင်ပရှိ အခြားသော ပြည်နယ်များကို ရင်းနှီးကျွမ်းဝင်ခြင်း မရှိစေကာမူ ယွမ်ဟိုင်ပြည်နယ်၌ ပြည်နယ်တစ်ခုလုံးကို စိုးမိုးထားသည့် ထိပ်တန်း အင်အားစုကြီး တစ်ခု ရှိကြောင်း သိထားသည်။ ထိုဂိုဏ်းကို ယွမ်ဟိုင်ဂိုဏ်းဟု ခေါ်ဝေါ်ကြ၏။

အဘယ်ကြောင့်ဆိုသော် သူ၏ ဆရာဖြစ်သူ ဝေဝူရွှမ်သည် ကမ်းရိုးတန်းပြည်နယ်မှ ထွက်ခွာပြီး ဂိုဏ်းတစ်ခုသို့ ဝင်ရောက်စဉ်က ဤယွမ်ဟိုင်ဂိုဏ်းသို့ ဝင်ရောက်ခဲ့ခြင်း ဖြစ်သောကြောင့်ပင်။

ထို့အပြင် သူ၏ ရှေ့မှောက်ရှိ လူလတ်ပိုင်းအရွယ် အမျိုးသားမှာ ဝေဝူရွှမ်အား အဆိပ်ခတ်၍ လုပ်ကြံကာ သေလုမြောပါး ဖြစ်အောင် ပြုလုပ်ခဲ့သည့် ယွမ်ဟိုင်ဂိုဏ်း၏ ဒုတိယဂိုဏ်းချုပ်ဝူ ခေါ် ဝူချွန်ရှန်းပင် ဖြစ်သည်။

လင်းချန်၏ ဆရာ ဝေဝူရွှမ်သည် ဝူချွန်ရှန်းနှင့် ပတ်သက်၍ အမြဲ သတိပေးလေ့ရှိပြီး သူ၏ ပုံတူပန်းချီကိုလည်း အကြိမ်ကြိမ် ပြသထားဖူး၏။

ဝေဝူရွှမ်က လင်းချန်၏ ပါရမီဖြင့်ဆိုလျှင် ကမ်းရိုးတန်းပြည်နယ်မှ ထွက်ခွာ၍ ကျယ်ပြောလှသည့် ပြင်ပလောကသို့ ခြေဆန့်မည့် အချိန်မှာ မကြာတော့ဟု ဆိုဖူးသည်။

အကယ်၍ ရန်သူ မည်သူမည်ဝါ ဖြစ်ကြောင်းနှင့် သူတို့၏ ရုပ်သွင်ကို သေချာစွာ မသိထားပါက... ရန်သူနှင့် ထိပ်တိုက်တွေ့သည့်အခါ သေဆုံးသွားမှန်းပင် သိလိမ့်မည် မဟုတ်ဘဲ ခွေးသေဝက်သေ သေခြင်းမျိုးနှင့် ကြုံတွေ့ရနိုင်သည်ဟု မှာကြားဖူး၏။

လင်းချန်သည် ဝူချွန်ရှန်းကို သတိပြုမိလိုက်သကဲ့သို့ သူ၏ ဘေးနားရှိ ယွမ်ဟိုင်ဂိုဏ်းမှ တပည့်မလေး တစ်ဦးကိုလည်း မြင်တွေ့လိုက်ရသည်။

ထိုအမျိုးသမီးမှာ ရှည်လျားသည့် ဆံပင်နက်များကို ကျောပြင်ထက်၌ ဖြန့်ချထားပြီး သေသပ်လှပသော ရုပ်ရည် ရှိသူဖြစ်၏။

သူမ၏ ဘေးရှိ တပည့်များက သူမကို ခိုးကြည့်နေကြသည်ကို သိနေသကဲ့သို့ ဂုဏ်ယူဝင့်ကြွားသည့် အမူအရာဖြင့် မသိမသာ ပြုံးနေသည်။ သူမသည် လင်းချန်၏ အကြည့်ကို သတိပြုမိလိုက်သောအခါ မထီမဲ့မြင် ပြုသောဟန်ဖြင့် မျက်နှာကို တစ်ဖက်သို့ လွှဲလိုက်၏။

'ငါ့ ရှင်းရှင်းနဲ့ ယှဉ်ရင်တော့ သူ့အမူအရာက အများကြီး နိမ့်ကျလွန်းပါတယ်။' လင်းချန်သည် စိတ်ထဲမထားဘဲ ခေါင်းကို အသာအယာ ခါယမ်းလိုက်ကာ သူ၏ ရည်ရွယ်ချက်ကို ရိပ်မိမသွားစေရန် အကြည့်တို့ကို ပြန်လည် ရုပ်သိမ်းလိုက်သည်။

တစ်ချိန်တည်းမှာပင် သူ၏ အာရုံသည် ကျန်းနျန်ရှင်းနှင့် မြောက်ဘက်ဌာနခွဲ အဖွဲ့ဝင်တို့၏ စကားပြောဆိုသံများထံသို့ ရောက်ရှိသွား၏။

နှစ်ဖက်စလုံးမှာ အပြန်အလှန် လှောင်ပြောင် သရော်စကားများဖြင့် စကားနိုင်လုပြီးနောက် လမ်းခွဲသွားကြသည်။

အဖွဲ့နှစ်ဖွဲ့ ဘေးချင်းယှဉ်၍ ဖြတ်သန်းသွားကြစဉ် မြောက်ဘက်ဌာနခွဲမှ ဝူချွန်ရှန်းသည် လင်းချန်ကို မသိမသာ လှမ်းကြည့်လိုက်၏။

တစ်စုံတစ်ခုသော အကြောင်းကြောင့် ထိုလူငယ်လေးထံမှ ရင်းနှီးသည့် အငွေ့အသက် တစ်ခုကို ခံစားလိုက်ရသောကြောင့် ဖြစ်သည်။

သို့သော်လည်း ဝေးကွာလှသည့် အရှေ့ဘက်ဌာနခွဲ၏ မဟာမိတ်ဖြစ်သူကို သူ မည်သို့ သိနိုင်မည်နည်း။ ဝူချွန်ရှန်းသည် ခေါင်းကို ခါယမ်းကာ ထိုအတွေးကို ဖယ်ထုတ်လိုက်၏။

သူ၏ ဘေးရှိ မြောက်ဘက်ဌာနခွဲ ခေါင်းဆောင် ကျန်းခယ်ရန်က လှောင်ပြောင်သံဖြင့် ပြောလိုက်သည်။ "ဟမ့်... ဒုဂိုဏ်းချုပ်ဝူ... ခုနက မြင်လား။ အရှေ့ဘက်ဌာနခွဲ အဖွဲ့ထဲမှာ လူသားဆိုလို့ တစ်ယောက်တည်း ပါတာ။ အဲဒါတောင် ကောင်းကင်နယ်ပယ် အဆင့်ပဲ ရှိသေးတဲ့ လူငယ်လေး။ အရှေ့ဘက်ဌာနခွဲ တည်ရှိတဲ့ ပင်လယ်ပြင်က အရမ်း ဝေးလံခေါင်သီပြီး အိမ်နီးချင်း ပြည်နယ်တွေမှာလည်း အစွမ်းထက်တဲ့ အင်အားစုတွေ မရှိဘူးလို့ ကြားဖူးတယ်။ အဖွဲ့အင်အား ပြည့်အောင် လူတစ်ယောက် ကောက်ထည့်လာတာ နေမှာပါ။ ခေါင်းဆောင်ကြီးက လူသားမဟာမိတ် မပါရင် အရည်အချင်း မပြည့်မီဘူး ပြောထားတာ မဟုတ်လား။"

ဝူချွန်ရှန်းက လက်နှစ်ဖက်ကို နောက်ပစ်လျက် ကျန်းခယ်ရန်အား ခေါင်းညိတ်ပြလိုက်၏။

ဝူချွန်ရှန်း၏ စိတ်ဝိညာဉ်စွမ်းအားကြောင့် ပင်လယ်ရေမှာ သူတို့နှင့် ကင်းဝေးနေသော်လည်း သူ၏ စကားသံမှာမူ ကျန်းခယ်ရန်၏ နားထဲသို့ ရှင်းလင်းစွာ ရောက်ရှိသွားသည်။

ကျန်းခယ်ရန်က အားရပါးရ ရယ်မောလိုက်၏။ "ဟားဟား... ဒီတစ်ခေါက် မျိုးနွယ်စု အစည်းအဝေး ပြီးရင်တော့ အရှေ့ဘက်ဌာနခွဲက အဓိက ဌာနခွဲကြီး လေးခုစာရင်းကနေ ပယ်ဖျက်ခံရတော့မယ် ထင်တယ်။"

တစ်ဖက်၌မူ လင်းချန်သည် ကျန်းနျန်ရှင်းတို့နှင့်အတူ ဧည့်ဂေဟာကြီး တစ်ခု၏ ရှေ့သို့ ရောက်ရှိလာကြသည်။ ထိုဂေဟာကြီးကိုလည်း သလင်းကျောက်များနှင့် အစီအရင်တို့ကို တစ်သားတည်းဖြစ်အောင် ပေါင်းစပ် ဆောက်လုပ်ထားခြင်း ဖြစ်၏။

ပြိုင်ဘက်ကင်း အင်ပါယာ။ အပိုင်း ၂၄၇ ပြီး။

ဘာသာပြန် - Ko Yoohtoo

True Immortal Team

ပြိုင်ဘက်ကင်း အင်ပါယာ။