အခန်း ၁၅၄၄

အခန်း ၁၅၄၄ သမိုင်းတွင် အစဉ်အလာမရှိခဲ့သော ရွေးချယ်မှုပုံစံ

ဖုန်းယွီနှင့် ကျုံးချင်းရှန်တို့သည် အတူတကွ ထိုင်ကာ ဤမော်တော်ယာဉ် လုပ်ငန်းဆိုင်ရာ ဆုကြီး၏ရွေးချယ်မှုပုံစံကို ဆွေးနွေးနေကြသည်။

"မန်နေဂျာဖုန်း... တခြားမော်တော်ယာဉ် လုပ်ငန်းဆိုင်ရာ ဆုကြီးတွေ အားလုံးက မော်တော်ယာဉ်နဲ့ ပတ်သက်တဲ့ သတင်းထောက်တွေ... ဒါမှမဟုတ် မော်တော်ယာဉ်နဲ့ ပတ်သက်တဲ့ ဒီဇိုင်နာတွေက ရွေးချယ်ကြတာပါ... သေချာပေါက် ကားကုမ္ပဏီကြီးတွေက ကိုယ်စားလှယ်တွေ ရွေးချယ်တာလည်း ရှိပါတယ်... ကျွန်တော်တို့ကရော... ဘယ်လို ရွေးချယ်မှုပုံစံကို အသုံးပြုမလဲ... ဒါမှမဟုတ် ကျွန်တော်တို့ ပေါင်းစပ်လိုက်မလား..."

သတင်းထောက်များ၏ ရွေးချယ်မှုဆိုသည်မှာ အမေရိကန်ဘက်တွင် အများဆုံး အသုံးပြုသောပုံစံဖြစ်ပြီး သတင်းထောက်များက မီဒီယာများကို ကိုယ်စားပြုသည်။ ဒီဇိုင်နာများနှင့် ကားကုမ္ပဏီ ကိုယ်စားလှယ်များမှာမူ ထိုကားကုမ္ပဏီများကို ကိုယ်စားပြုကြသည်။

သို့သော် ဤပုံစံများကို ဖုန်းယွီက ရွေးချယ်ရန် ရည်ရွယ်မထားပေ။ သူသည် လုပ်ငန်းနယ်ပယ်အတွင်း မည်သည့်အခါကမျှ အသုံးမပြုခဲ့ဖူးသော ရွေးချယ်မှုပုံစံ တစ်ခုကို အသုံးပြုလိုခြင်း ဖြစ်သည်။

"ကျွန်တော်တို့က အဲဒီ ရွေးချယ်မှုပုံစံတွေကိုပဲ ဆက်သုံးနေမယ်ဆိုရင် တခြား ဆုတွေနဲ့ ဘာကွာခြားတော့မလဲ... တီထွင်ဆန်းသစ်ထားတဲ့ ဆုတစ်ခု ဖြစ်နေမှတော့ တီထွင်ဆန်းသစ်ထားတဲ့ ဆုရွေးချယ်မှုပုံစံကို အသုံးပြုသင့်တာပေါ့..."

ဖုန်းယွီဤသို့ ပြောသည်ကို ကြားလိုက်ရသောအခါ အခြားသူများမှာ မကောင်းသော ကြိုတင်ခံစားမှုများ ဖြစ်ပေါ်လာခဲ့ကြသည်။ မန်နေဂျာဖုန်းတွင် မည်သို့သော ထူးဆန်းသည့် စိတ်ကူးများ ထပ်ရှိနေပြန်ပြီနည်း။

"ဒါကြောင့် ဒီမော်တော်ယာဉ် လုပ်ငန်းဆိုင်ရာ ဆုကြီးရဲ့ ရွေးချယ်မှုပုံစံကို အင်တာနက် အသုံးပြုသူတွေရဲ့ မဲပေးရွေးချယ်မှုအဖြစ် သတ်မှတ်ဖို့ ကျွန်တော် ဆုံးဖြတ်လိုက်တယ်..."

ဘာ... အင်တာနက် အသုံးပြုသူတွေရဲ့ မဲပေးရွေးချယ်မှု ဟုတ်လား...

ဤကဲ့သို့သော ဆုရွေးချယ်မှုပုံစံမှာလည်း လူကို သိပ်ပြီး အံ့သြစေသည်တော့ မဟုတ်ပေ။ လှုပ်ရှားမှု အများအပြားတွင် အင်တာနက် အသုံးပြုသူများ၏ မဲပေးရွေးချယ်သည့် ပုံစံကို အသုံးပြုလေ့ ရှိကြသည်။

သို့သော် ဤပုံစံတွင် အလွန်ကြီးမားသော အားနည်းချက်တစ်ခု ရှိနေသည်။ ၎င်းမှာ မဲအရေအတွက် စာရင်းကောက်ယူရာတွင် တရားမျှတမှု ရှိစေရန် အာမခံနိုင်ရန် ခက်ခဲခြင်းပင် ဖြစ်သည်။ မည်သည့် ကားကုမ္ပဏီကများ မဲအရေအတွက်ကို မသမာသော နည်းလမ်းဖြင့် တိုးမြှင့်မည်၊ မမြှင့်မည်ကို မည်သူက သိနိုင်မည်နည်း။

"မန်နေဂျာဖုန်း... ဒီပုံစံက တီထွင်ဆန်းသစ်လွန်း မနေဘူးလား..."

ကျုံးချင်းရှန်က အနည်းငယ် တုံ့ဆိုင်းစွာဖြင့် မေးလိုက်သည်။

"အရမ်းကြီး တီထွင်ဆန်းသစ်နေတာ မဟုတ်ပါဘူး... ခင်ဗျား လောင်လျူကို မေးကြည့်လိုက်ပါ။ အရင်တုန်းက သူ တရုတ်ရဲ့ IT နယ်ပယ် ထိပ်ဆယ်စာရင်းဝင် သြဇာလွှမ်းမိုးသူ ဆုကို ရတုန်းကလည်း အင်တာနက် မဲပေးရွေးချယ်မှု ပါဝင်တာပဲလေ... သူ ဆုရသွားတော့ သူနဲ့ မထိုက်တန်ဘူးလို့ ဘယ်သူကများ ပြောလို့လဲ..."

လျူချွမ်းကျစ်က ခေတ္တမျှ တုံ့ဆိုင်းနေပြီးနောက် ပြောလိုက်သည်။

"ဒါပေမဲ့ ဒီလိုလုပ်လိုက်မယ်ဆိုရင် အဲဒီသတင်းထောက်တွေနဲ့ ဒီဇိုင်နာတွေကို အပြစ်ပြုသလို ဖြစ်လွယ်မနေဘူးလား..."

ဖုန်းယွီက ဆိုဖာပေါ်တွင် မှီထိုင်လိုက်သည်။

"သတင်းထောက်... ဒီဇိုင်နာ ဟုတ်လား... ပထမဆုံးအနေနဲ့ ကျွန်တော်တို့ရဲ့ ကားတွေကို ကိုယ်တိုင် ဒီဇိုင်းဆွဲထားတာပါ... အပြင်ပန်း အသွင်အပြင်ကနေ အတွင်းပိုင်း အလှဆင်တာနဲ့ အမျိုးမျိုးသော အစိတ်အပိုင်းတွေ အထိ အားလုံးကို ကိုယ်တိုင်သုတေသနပြု ထုတ်လုပ်ထားတာလေ... တစ်ခါတလေ ပူးပေါင်းဆောင်ရွက်မှု ရှိရင်တောင် ပြည်တွင်းက ကားကုမ္ပဏီတွေနဲ့ပဲ လုပ်တာပါ... ဒါပေမဲ့ ပြည်တွင်းက ဒီဇိုင်နာတွေထဲမှာ ဘယ်သူကများ ထိပ်တန်း မော်တော်ယာဉ် လုပ်ငန်းဆိုင်ရာ ဆုကြီးတွေမှာ အကဲဖြတ် ရွေးချယ်ခွင့် ရဖူးလို့လဲ..."

"အဲဒီဥရောပနဲ့အမေရိကန်က ဆုရွေးချယ်ရေး အဖွဲ့အစည်းတွေက ကျွန်တော်တို့ကို လုံးဝအထင်မကြီးကြတာဆိုတော့ ကျွန်တော်တို့ကရော သူတို့ကို ဘာဖြစ်လို့ အထင်ကြီးနေစရာ လိုမှာလဲ... သတင်းထောက်တွေနဲ့ ပတ်သက်ပြီး ပြောရရင် ကျွန်တော်တို့က ငွေကို လုံလုံလောက်လောက် ပေးနိုင်သရွေ့ ဘယ်မဂ္ဂဇင်း၊ ဘယ်သတင်းစာကများ ကျွန်တော်တို့ရဲ့ ကြော်ငြာကို မထည့်ပေးဘဲ နေမှာလဲ... အဲဒီသတင်းစာတွေ၊ မဂ္ဂဇင်းတွေက တကယ်ပဲ အပြည့်အဝ တရားမျှတမှု ရှိရဲ့လား..."

ဖုန်းယွီက ဤကိစ္စနှင့် ပတ်သက်၍ အလွန်ပင် အထင်အမြင် သေးလှပေသည်။ လူတိုင်းတွင် ကိုယ်ပိုင်ယိမ်းယိုင်မှုများ ရှိကြသည်။ သို့သော် ဤသတင်းထောက်များက မည်သည့်အရာကို အားကိုး၍ လူအားလုံးကို ကိုယ်စားပြုနိုင်ရမည်နည်း။

အမေရိကန် ပရော်ဖက်ရှင်နယ် ဘတ်စကက်ဘော(NBA)ကဲ့သို့ပင် ဖြစ်သည်။ သတင်းထောက်များက ကစားသမား အမျိုးမျိုး၏ ဆုများကို အကဲဖြတ် ရွေးချယ်နိုင်သော်လည်း All-Star ပွဲစဉ်များတွင်မူ အင်တာနက် အသုံးပြုသူများ၏ မဲအရေအတွက်ကို ကြည့်ရသည် မဟုတ်ပါလော။

ကစားသမားများ ဆုရရှိပါက လစာ မြင့်တက်လာနိုင်သော်လည်း ကစားသမားများ All-Star စာရင်းဝင်ပါကလည်း အတူတူပင် လစာမြင့်တက်နိုင်ပေသည်။ ထို့အပြင် All-Star ၏ လူသိရှင်ကြား ဖြစ်မှုက ပိုမိုမြင့်မားရာ ကစားသမားများ ရရှိနိုင်သော အကျိုးအမြတ်က ပိုမိုများပြားပေသည်။

ထိုသတင်းထောက်များက ဖုန်းယွီအသင်း၏ ကစားသမားများကို အမြဲတမ်း ပစ်မှတ်ထား တိုက်ခိုက်နေကြပြီး ပုံမှန်ရာသီပွဲစဉ်များ၏ အမျိုးမျိုးသော ဆုကြီးများမှာ သူတို့၏ ကစားသမားများအတွက် လှည့်မလာခဲ့ပေ။ သို့သော် Playoff ပွဲစဉ်များနှင့် ဗိုလ်လုပွဲ ချန်ပီယံများမှာ ဖုန်းယွီအသင်းနှင့် Nets အသင်းတို့သာ ဖြစ်သည် မဟုတ်ပါလော။

သတင်းထောက်များက အထင်ကြီးတိုင်း တကယ်ကောင်းမွန်နေမည်ဟု မဆိုနိုင်ပေ။

"ဒါဆို ကျွန်တော်တို့က အဲဒီကားကုမ္ပဏီ ကိုယ်စားလှယ်တွေကိုလည်း အခွင့်အရေး မပေးတော့ဘူးလား..."

လီမင်တေက မေးလိုက်သည်။

"ကားကုမ္ပဏီ ကိုယ်စားလှယ် ဟုတ်လား... အခွင့်အရေး ပေးထားတာပဲလေ... ကျွန်တော်တို့ရဲ့ ဒီအင်တာနက် မဲပေးရွေးချယ်မှုက အကောင့်တစ်ခု၊ IP လိပ်စာတစ်ခုကို မဲတစ်မဲပဲ ပေးလို့ရတာဆိုတော့ အဲဒီကားကုမ္ပဏီတွေအနေနဲ့ ကိုယ့်ကုမ္ပဏီရဲ့ ကားကို မဲပေးဖို့ ကိုယ့်အလုပ်သမားတွေကို လှုံ့ဆော်လို့ ရတာပဲလေ... ဒီအချက်ကို ကျွန်တော်တို့ လုံးဝမကန့်ကွက်ပါဘူး... အဲဒီ မော်တော်ယာဉ် သတင်းထောက်တွေ၊ ဒီဇိုင်နာတွေ ဘာတွေလည်း မဲပေးတဲ့ အထဲမှာ ပါဝင်လို့ ရတာပဲလေ..."

လီမင်တေ "..."

ဒါက အတူတူ ဖြစ်နိုင်ပါ့မလား... အရင်တုန်းက စုစုပေါင်းမှ မဲဆယ်ဂဏန်းလောက်ပဲ ရှိတာကို သူတို့က တစ်ယောက် တစ်မဲဆိုတော့ အလေးချိန် ဘယ်လောက်တောင် ကြီးမားလိုက်သလဲ။

အခုကျတော့ အင်တာနက် အသုံးပြုသူ အားလုံးက မဲပေးရွေးချယ်မှုမှာ ပါဝင်ကြတာဆိုတော့ သူတို့ တစ်ယောက် တစ်မဲက ဘယ်လောက်တောင် သေးငယ်တဲ့ လွှမ်းမိုးနိုင်စွမ်းလေး ဖြစ်သွားပြီလဲ...

"မန်နေဂျာဖုန်း... ဒီလိုလုပ်လိုက်ရင် ကျွန်တော်တို့ ဆုရနိုင်မယ်ဆိုတာ သေချာရဲ့လား..."

ခါမီဒါ မာဆာအိုက စပ်စုချင်စိတ်ဖြင့် မေးလိုက်သည်။

Songjiang ကားကုမ္ပဏီ မှာ ပင်းချန် စက်မှုထုတ်လုပ်ရေး အုပ်စုတစ်ခုလုံး၏ အလုပ်သမားများကိုပါ ထည့်တွက်မည်ဆိုလျှင်ပင် အရေအတွက်က ထိုထိပ်တန်း ကားကုမ္ပဏီကြီးများကို မမီနိုင်ပေ။ မော်တော်ယာဉ် လုပ်ငန်းသည်လည်း အလုပ်သမား အင်အားကို အဓိကထားရသည့် လုပ်ငန်းတစ်ခု ဖြစ်ရာ ထိုထိပ်တန်း ကားကုမ္ပဏီကြီးများ၏ အလုပ်သမား အရေအတွက်မှာ ပင်းချန် စက်မှုထုတ်လုပ်ရေး အုပ်စုထက်ပင် တစ်ဆခန့် ပိုမိုများပြားနေနိုင်ပေသည်။

Taihua Holdings အုပ်စုနှင့် Wind-Rain Holdings အုပ်စု၏ အလုပ်သမားများ အားလုံးကိုပါ လာရောက် မဲပေးကြရန် လှုံ့ဆော်မည် ဟူသော သဘောလော။

ဒါက သိပ်တော့ မဖြစ်နိုင်ပါဘူး။

ဒီလိုလုပ်လိုက်ရင် Songjiang ကားကုမ္ပဏီက ယုံကြည်မှု လုံးဝမရှိသလို ဖြစ်သွားပြီး သူဌေးကိုလည်း မျက်နှာပျက်စေမည် ဆိုသည်ကို အသာထားဦး။ ထိုအလုပ်သမားများက သေချာပေါက် Songjiang ကားကုမ္ပဏီအတွက် မဲပေးကြလိမ့်မည် ဆိုသည်မှာ သေချာသလော။

အထူးသဖြင့် ထိုနိုင်ငံရပ်ခြားမှ အလုပ်သမားများ ဖြစ်သည်။ သူတို့ထဲမှ လူအများအပြားမှာ Songjiang ကားကုမ္ပဏီ ကားများကို ဝယ်ယူဖူးခြင်း မရှိကြရာ ဘာကြောင့် ဤအရာအတွက် မဲပေးကြရမည်နည်း။ ဤမဲပေးမှုကို အတင်းအကျပ် လုပ်ခိုင်းမည် ဟူသော သဘောလော။

ဒါသာ သတင်းထွက်သွားရင် သူဌေးက ပိုပြီး မျက်နှာပျက်ရတော့မှာ မဟုတ်ဘူးလား။

ဖုန်းယွီက ပြုံးရွှင်စွာဖြင့် ပြန်မေးလိုက်သည်။

"ခင်ဗျားတို့ အားလုံးက အဲဒီလို တွေးနေကြတာ မဟုတ်လား... ကျွန်တော်တို့ရဲ့ အလုပ်သမား အရေအတွက်က အဲဒီထိပ်တန်း ကားကုမ္ပဏီတွေကို မမီလို့ ကျွန်တော်တို့ရဲ့ အနိုင်ရနိုင်ချေက တကယ်တော့ မကြီးမားဘူးလို့ ထင်နေကြတာ မဟုတ်လား..."

"အချက် နှစ်ချက်က ကျွန်တော်တို့ရဲ့ အနိုင်ရနိုင်ချေကို အာမခံပေးနိုင်တယ်... ပထမအချက်က ကျွန်တော်တို့ တရုတ်မှာ လူဦးရေ များတယ်... အင်တာနက် အသုံးပြုသူ အရေအတွက်က ဘယ်နိုင်ငံထက်မှ မနည်းပါဘူး... နိုင်ငံတော်တော်များများရဲ့ လူဦးရေထက်တောင် ပိုများနေသေးတယ်... ပြီးတော့ လွယ်လွယ်နဲ့လည်း လူစုကွဲသွားမှာ မဟုတ်ဘူး..."

"ဒုတိယအချက်က ဒီမဲပေးတဲ့ ဝက်ဘ်ဆိုက်ကို ထိန်းသိမ်းဖို့အတွက် ကမ္ဘာ့ထိပ်တန်း ဝက်ဘ်ဆိုက်ကမှ ရမှာ မဟုတ်လား... နာမည်ကျော်ကြားမှုလည်း လုံလုံလောက်လောက် မြင့်မားမှ ရမှာ မဟုတ်လား... ခင်ဗျားတို့ မထင်ဘူးလား... ရှာဖွေရေး ကုမ္ပဏီတွေက လုပ်ပေးတာ ပိုကောင်းမယ်လို့ မထင်ဘူးလား..."

အကယ်၍ ကမ္ဘာ့အကြီးဆုံးဟု ဆိုမည်ဆိုပါက Yahoo က ယခုအချိန်တွင် အားသာချက် ရှိနေဆဲ ဖြစ်ပေမည်။ သို့သော် အကယ်၍ ရှာဖွေရေး ဟုသာ ကန့်သတ်ကြည့်မည်ဆိုပါက ကမ္ဘာ့ ရှာဖွေရေး ဆိုက်လေးခုတွင် ဖုန်းယွီက နှစ်ခုကို ထိန်းချုပ်ထားပြီး တစ်ခုကို လွှမ်းမိုးနိုင်စွမ်း ရှိနေသေးရာ မည်သို့လုပ်၍ ရှုံးနိမ့်နိုင်မည်နည်း။

မဲပေးမှု အပိုင်းတွင် လက်တစ်လုံးခြား လုပ်၍ရသော နေရာများက အလွန်များပြားလွန်းလှပေသည်။

ဥပမာအားဖြင့် မဲအချို့ကို သတ်မှတ်ချက်အရ ထည့်သွင်း မရေတွက်သင့်သော်လည်း ထိုအထဲတွင် ထည့်သွင်း ရေတွက်သင့်သည့် အရာများကို အနည်းငယ် လျှော့၍ ရေတွက်လိုက်မည် ဆိုပါကလည်း မည်သူကများ သိရှိနိုင်မည်နည်း။ သို့မဟုတ် ထည့်သွင်း မရေတွက်သင့်သည့် အရာများကို ထည့်သွင်း ရေတွက်ပေးလိုက်ပါက မဲအရေအတွက်က အများကြီး ပိုမို များပြားလာမည် ဖြစ်သည်။

အခြားသော နည်းလမ်းပေါင်း များစွာလည်း ရှိနေသေးပြီး ဤအရာများကို ဖုန်းယွီပြောပြနေရန် မလိုအပ်ဘဲ Baidu နှင့် Google တို့မှ နည်းပညာရှင်များက ဖြေရှင်းပေးနိုင်ပေသည်။

ဤမဲပေးမှုက အင်တာနက် အသုံးပြုသူ အားလုံးကို လာရောက် ပါဝင်ရန် ဆွဲဆောင်နိုင်မည် မဟုတ်ပေ။ ကမ္ဘာတစ်ဝန်းတွင် အမေရိကန် ပရော်ဖက်ရှင်နယ် ဘတ်စကက်ဘော (NBA)ကို စိတ်ဝင်စားသူများ အလွန် များပြားသော်လည်း နှစ်စဉ်နှစ်တိုင်း All-Star မဲပေးရွေးချယ်ရာတွင် လူတိုင်း ပါဝင် မဲပေးကြသည် မဟုတ်သည်နှင့် အတူတူပင် ဖြစ်သည်။

ထို့အပြင် နောက်ထပ် အချက်တစ်ချက် ရှိသေးသည်။ မဲပေးခံရမည့် အရည်အချင်းရှိသော ရွေးချယ်စရာများက အလွန်များပြားသောကြောင့် မဲများစွာမှာလည်း ခွဲဝေသွားမည် ဖြစ်သည်။

ဥပမာအားဖြင့် Sedanတစ်စီးကို ရွေးချယ်ရာတွင် ထိုထိပ်တန်း ကားကုမ္ပဏီများတွင် Sedanကားများ အများအပြား ရှိကြသော်လည်း Songjiang ကားကုမ္ပဏီ ကမူ တစ်မျိုးတည်းကိုသာ တင်ပြမည်ဖြစ်ရာ ဤသို့ဖြင့် မဲအရေအတွက် စုစည်းမှုကို အာမခံနိုင်မည် ဖြစ်သည်။

နောက်ထပ် ဥပမာပေးရလျှင် တရုတ်မှ အင်တာနက် အသုံးပြုသူ အများစုကြီးမှာ Songjiang ကားကုမ္ပဏီ ကိုသာ မဲပေးကြမည် ဖြစ်သည်။ အဘယ်ကြောင့်ဆိုသော် တရုတ်ဘက်တွင် Songjiang ကားကုမ္ပဏီ ၏ နာမည်ကျော်ကြားမှုမှာ ပြိုင်ဘက်ကင်း ဖြစ်သောကြောင့်ပင် ဖြစ်သည်။

အစိုးရ အသုံးပြုသောကားများ ဖြစ်နေခြင်း တစ်ခုတည်းကပင် လူမည်မျှကို Songjiang ကားကုမ္ပဏီ၏ အရည်အသွေးက သေချာပေါက် ကောင်းမွန်သည်ဟု ထင်မြင်စေခဲ့သနည်း။ တရုတ်တွင် Songjiang ကားကုမ္ပဏီ နှင့် ယှဉ်ပြိုင်နိုင်သည့် ကုမ္ပဏီ လုံးဝ မရှိပေ။

သို့သော် အခြားသော မော်တော်ယာဉ်လုပ်ငန်း ဖွံ့ဖြိုးတိုးတက်သည့် နိုင်ငံများတွင်မူ သူတို့၏ ကားကုမ္ပဏီများက အတော်လေး များပြားပြီး အင်အားချင်းလည်း အတော်လေး နီးစပ်ကြပေသည်။ ထို့ကြောင့် သူတို့၏ မဲအရေအတွက်များမှာ ခွဲဝေသွားမည်ဖြစ်ပြီး တရုတ်ဘက်တွင်မူ အခြေခံအားဖြင့် ထိုသို့ ဖြစ်မည် မဟုတ်ပေ။

အကယ်၍ ဤသို့လုပ်ပြီးမှပင် Songjiang ကားကုမ္ပဏီ က ဆုမရသေးပါက Songjiang ကားကုမ္ပဏီ တွင် ကောင်းမွန်သော အခွင့်အရေး မရှိခြင်း မဟုတ်ဘဲ တကယ်ပင် အသုံးမကျခြင်းဖြစ်ကြောင်း သက်သေပြလိုက်ခြင်းသာ ဖြစ်ပေတော့မည်။

...

******