အခန်း ၁၅၅၁

အခန်း ၁၅၅၁ အလွန် ကျေနပ်စရာ ကောင်းသော အော်ဒါများ

ဤရလဒ်များ ထွက်ပေါ်လာချိန်တွင် ဝမ်းသာနေသူများ ရှိသလို ဝမ်းနည်းနေသူများလည်း ရှိပေသည်။ ဝမ်းသာနေသူများမှာ သေချာပေါက် ဆုရရှိသော ကားကုမ္ပဏီ ကိုယ်စားလှယ်များဖြစ်ပြီး ဝမ်းနည်းနေသူများမှာမူ ဆုမရရှိခဲ့သူများ ဖြစ်သည်။ အထူးသဖြင့် သူတို့၏ မဲအရေအတွက်မှာ ပထမနေရာမှ မဲအရေအတွက်နှင့် သိပ်ပြီး မကွာဟချိန်မျိုးတွင် ပို၍ပင် ခံရခက်လှပေသည်။

ဤမျှ အချိန်အတော်ကြာအောင် ကြိုးစားခဲ့ကြပြီး မဲဆွယ်ရန် နည်းလမ်းပေါင်းစုံကို စဉ်းစားခဲ့ကြသည်။ Taihua Holdings အုပ်စု၏ နည်းလမ်းများကိုပင် အတုယူ၍ သူတို့၏ အထက်တန်း စီမံခန့်ခွဲသူများ ကိုယ်တိုင် ကိုယ့်ကုမ္ပဏီထုတ် ကားများအတွက် မဲဆွယ်ပေးခဲ့ကြသည်။ အချို့ဆိုလျှင် ဤဆုကို ရရှိရန်အတွက် တိတ်တဆိတ် ငွေပေး၍ပင် မဲဝယ်ခဲ့ကြသေးသည်။

သို့သော် နောက်ဆုံး ရလဒ်မှာမူ သူတို့ မျှော်လင့်ထားသလို ဖြစ်မလာခဲ့ပေ။

လူအချို့က အားရပါးရ အော်ဟစ် အောင်ပွဲခံနေကြသော်လည်း လူအချို့ကမူ တိတ်တဆိတ် စိတ်ပျက်အားငယ် နေကြသည်။ သို့သော် ရလဒ်မှာ ပြောင်းလဲ၍ မရနိုင်တော့ပေ။

နောက်ဆုံး ဆုကြီး ၁၂ ခုတွင် Songjiang ကားကုမ္ပဏီ က ဆုနှစ်ခု ရရှိခဲ့ပြီး အများဆုံး ဖြစ်သည်။ အခြားသော ထိပ်တန်း ကားကုမ္ပဏီများမှာလည်း တစ်ခုစီသာ ရရှိခဲ့ကြသည်။ Toyota ကဲ့သို့သော ကံဆိုးသူများလည်း ရှိသေးပြီး သူတို့သည် ဆုတစ်ခုမျှပင် မရရှိခဲ့ပေ။ သူတို့၏ ကားလေးစီးမှာ မျှော်လင့်ချက် ရှိခဲ့သော်လည်း နောက်ဆုံး မဲအရေအတွက်များမှာ ဒုတိယ နေရာတွင်သာ အားလုံး ရပ်တည်ခဲ့ရသည်။

Toyota ၏ ကိုယ်စားလှယ်များမှာ တိတ်တဆိတ် နောင်တရနေကြသည်။ အစောကတည်းက တခြား ကားကုမ္ပဏီများကဲ့သို့ ကားတစ်မျိုးတည်းကိုသာ အဓိကထား ကြော်ငြာခဲ့မည်ဆိုပါက သူတို့ သေချာပေါက် ဆုရရှိနိုင်မည် ဖြစ်သည်။ ဒုတိယနေရာ လေးခုဆိုသည်မှာ မည်မျှ ကြီးမားသော သရော်လှောင်ပြောင်မှု တစ်ခုနည်း။

သူတို့နှင့် အတူတူပင် ကံဆိုးသူမှာ General Motors ဖြစ်သည်။ သူတို့၏ ကားအများအပြားမှာလည်း ရှေ့ပိုင်းနေရာများတွင် ရပ်တည်နိုင်ခဲ့သော်လည်း တစ်ခုမျှ ဆုမရရှိခဲ့ပေ။

ကမ္ဘာ့နံပါတ်တစ်နှင့် နံပါတ်နှစ် ကားကုမ္ပဏီကြီး နှစ်ခုစလုံး ဆုမရရှိခဲ့ခြင်းမှာ သမိုင်းတွင် အစဉ်အလာ မရှိခဲ့ပေ။

အခြားသော ထိပ်တန်း ကားကုမ္ပဏီများမှာ တိတ်တဆိတ် ဝမ်းသာနေကြသည်။ 'မင်းတို့ရဲ့ ရောင်းအားက မြင့်မားနေတော့ရော ဘာဖြစ်လဲ... အင်တာနက် အသုံးပြုသူတွေက ငါတို့ရဲ့ ကားတွေကိုပဲ ပိုပြီးသဘောကျကြတာပဲ... အခု မင်းတို့ ရောင်းအား မြင့်မားနေပေမဲ့ အနာဂတ်မှာတော့ အဲဒီလို ဖြစ်ချင်မှ ဖြစ်တော့မှာ...'

တစ်လကြာ ကျင်းပခဲ့သော ဤပြပွဲအတွင်း သူတို့ အားလုံး အော်ဒါများစွာ ရရှိခဲ့ကြသည်။ တရုတ်ဘက်မှ သာမက ကမ္ဘာတစ်ဝန်းလုံးမှ အော်ဒါများလည်း ပါဝင်ပေသည်။

အခြားသူများ အော်ဒါ မည်မျှ ရရှိခဲ့သည်ကို သူတို့ မသိသော်လည်း ကိုယ့်ကုမ္ပဏီ၏ အော်ဒါများမှာမူ မနည်းပါးလှပေ။ ဤအချက် တစ်ချက်တည်းဖြင့်ပင် နောက်နှစ်တွင် ဤ ပုလဲရတနာ ဆုကြီးသာ ဆက်လက် ကျင်းပဦးမည်ဆိုပါက သူတို့ လာရောက် ပါဝင်ကြဦးမည် ဖြစ်သည်။

လျူချွမ်းကျစ်သည် ထိပ်တန်း ကားကုမ္ပဏီ ဆယ်ခုမှ ကိုယ်စားလှယ်များကို ဖိတ်ကြားပြီး ဆုရရှိသော ကားများကို ဆုချီးမြှင့်စေခဲ့သည်။ အားလုံးမှာ ရွှေစင်အစစ်ဖြင့် ပြုလုပ်ထားသော ဆုဖလားများ ဖြစ်သည်။ ဖုန်းယွီ၏ အဆိုအရ ဆိုရလျှင် ဤသည်ကသာ ရွှေပါဝင်မှု (တန်ဖိုးရှိမှု) အပြည့်အဝ ရှိကြောင်း ပြသခြင်းဖြစ်ပြီး ထိုဖန်သားများ၊ မှန်သားများဖြင့် ပြုလုပ်ထားသော ဆုဖလားများမှာ အလွန် အဆင့်အတန်း နိမ့်ကျလှပေသည်။

ထိုနေ့ညတွင် ဖုန်းယွီတို့သည် ထပ်မံ စုဝေးကြပြီး ဤ ပုလဲရတနာ ဆုကြီး ကျင်းပခြင်းမှ အကျိုးအမြတ် မည်မျှ ရရှိခဲ့သည်ကို တွက်ချက်ခဲ့ကြသည်။

"Songjiang ကားကုမ္ပဏီရဲ့ ပြည်ပရောင်းအားက အစီးရေ ငါးသောင်းလောက် တိုးလာတယ်... ဒါက တစ်လတည်း အတွင်းမှာပဲနော်... သေချာပေါက် နောက်ပိုင်းကျရင်တော့ ကျဆင်းသွားမှာပါ... ဒါပေမဲ့ ကျွန်တော်တို့က ဆုရထားတယ် ဆိုတဲ့အချက်ကို အားကိုးပြီး ကြော်ငြာမယ်ဆိုရင်တော့ ပြည်ပ ရောင်းအားက သေချာပေါက် ပြီးခဲ့တဲ့နှစ်ကထက် နှစ်ဆ တိုးလာနိုင်တယ်..."

"အဲဒီအထဲမှာ Elf ကားလေးက တိုးတက်မှု အများဆုံးဖြစ်ပြီး သုံးဆယ့်ခုနစ် ရာခိုင်နှုန်း ပါဝင်တယ်... နောက်တစ်ဆင့်က Oriental Deerဖြစ်ပြီး နှစ်ဆယ့်တစ် ရာခိုင်နှုန်း ပါဝင်တယ်... အဲဒီနောက်တော့ ဒီ B1 ပဲ... ဘယ်လောက် ရာခိုင်နှုန်း ပါဝင်တယ် ဆိုတာ... ပြည်တွင်း ဈေးကွက်မှာတောင် ကျွန်တော်တို့ရဲ့ ကားအမျိုးအစား အားလုံးရဲ့ ရောင်းအားက သိသိသာသာကို တိုးတက်လာခဲ့ပါတယ်..."

"ဒီနှစ် ကျွန်တော်တို့ရဲ့ ခန့်မှန်း ထုတ်လုပ်ရောင်းချမှု ပမာဏကို အစီးရေ နှစ်သန်းကနေ နှစ်သန်း နှစ်သိန်းအထိ ပြောင်းလဲ သတ်မှတ်ထားပါတယ်... စက်ရုံ အသီးသီးရဲ့ ထုတ်လုပ်မှု တာဝန်တွေကလည်း ပိုပြီး ကြီးမားလာပြန်ပြီ... တော်သေးတာပေါ့... ကျွန်တော်တို့ရဲ့ စက်ရုံတွေကလည်း တစ်ပြိုင်နက်တည်း တိုးချဲ့နေတာ ဆိုတော့လေ..."

အစီရင်ခံစာ တင်ပြချိန်တွင် လီမင်တေ၏ မျက်နှာတစ်ခုလုံး နီမြန်းနေသည်။ ပြီးခဲ့သည့်နှစ်ကမှ အစီးရေ တစ်သန်းခွဲသာ ရှိခဲ့ပြီး ယခုနှစ် ခန့်မှန်း ထုတ်လုပ်ရောင်းချမှု ပမာဏကို အစီးရေ နှစ်သန်းဟု သတ်မှတ်ချိန်က လူအများအပြားမှာ လုံးဝမဖြစ်နိုင်ဟု ထင်မှတ်ခဲ့ကြသည်။ သို့သော် ယခုအခြေအနေအရ ကြည့်မည်ဆိုပါက ရောင်းအား အစီးရေ နှစ်သန်းမှာ သေချာပေါက် ပြီးမြောက်နိုင်မည်ဖြစ်ပြီး သူတို့သည် အစီးရေ နှစ်သန်း နှစ်သိန်း ဆိုသည့် ကိန်းဂဏန်းကိုပါ စိန်ခေါ်ရတော့မည် ဖြစ်သည်။

ဖုန်းယွီက ခေါင်းညိတ်လိုက်သည်။ "အရမ်းကောင်းတယ်... ငါတို့ ဒီဆုကြီးကို ကျင်းပဖို့ ရန်ပုံငွေတွေ အများကြီး အသုံးပြုခဲ့ရတာ အလကား မဖြစ်ဘူးပေါ့... ဒါပေမဲ့ ဒီနှစ် ငါတို့ရဲ့ ကြော်ငြာ ကုန်ကျစရိတ်တွေကလည်း အများကြီး မြင့်တက်လာမှာဆိုတော့ အမြတ်အစွန်း တိုးတက်မှုကတော့ နည်းနည်း နည်းသွားလိမ့်မယ်..."

"မှန်ပါတယ်... ဒီလှုပ်ရှားမှုရဲ့ ကုန်ကျစရိတ်တွေကို ထည့်မတွက်ရင်တောင်မှ ပြည်ပ ကြော်ငြာ ကုန်ကျစရိတ် သီးသန့်တင် အမေရိကန်ဒေါ်လာ သန်းတစ်ရာလောက် ထပ်တိုးရမှာပါ... ဒါက ကျွန်တော်တို့ ဖြတ်သန်းလာခဲ့တဲ့ နှစ်တွေ တစ်လျှောက်လုံးမှာ အများဆုံးပါပဲ... ပြည်တွင်းဘက်မှာဆိုရင်လည်း ကားကုမ္ပဏီကြီးတွေနဲ့ နိုင်ငံခြား အမှတ်တံဆိပ် တွေကလည်း ကြော်ငြာ အရှိန်အဟုန်ကို မြှင့်တင်လာကြမှာဆိုတော့ ကျွန်တော်တို့ရဲ့ ကြော်ငြာတွေကလည်း လျော့ရဲလို့ မရဘူး..."

"ဒါပေမဲ့ ဒီနှစ် အမြတ်အစွန်း တိုးတက်မှုက သိပ်မများဘူး ဆိုပေမဲ့လည်း တိုးတက်လာတာပါပဲ... နောက်နှစ်ဆိုရင် သေချာပေါက် နောက်တစ်ဆင့် ထပ်တက်လာဦးမှာပါ။ ကျွန်တော်တို့က ကမ္ဘာ့ထိပ်တန်း ကားကုမ္ပဏီတွေနဲ့လည်း ပိုပိုပြီးနီးကပ်လာပါပြီ... နောက်နှစ်ကျရင် အဲဒီ အဖွဲ့အစည်းတွေက ကားကုမ္ပဏီတွေကို အဆင့်သတ်မှတ်တဲ့အခါ ကျွန်တော်တို့ကို ထိပ်ဆယ်စာရင်းထဲ မထည့်ဘဲ မနေနိုင်တော့ဘူးလို့ ကျွန်တော် ထင်ပါတယ်..."

ဖုန်းယွီက ပြုံးရွှင်စွာဖြင့် ခေါင်းညိတ်လိုက်ပြီး ကျန်းဝမ်မုန်ဘက်သို့ လှည့်ကြည့်လိုက်သည်။ "လောင်ကျန်း... Wind-Rain မိုဘိုင်းဖုန်းကရော..."

ဤအကြိမ် မော်တော်ယာဉ် လုပ်ငန်း ပုလဲရတနာ ဆုကြီးသည် Songjiang ကားကုမ္ပဏီ အပေါ် အကြီးအကျယ် တွန်းအားပေးနိုင်ခဲ့ရုံ သာမကဘဲ ထုတ်ကုန် အများအပြားကိုလည်း အလွန် ကြီးမားသော တွန်းအားပေးမှုများ ပြုလုပ်နိုင်ခဲ့သည်။

ထို အင်တာနက် ကုမ္ပဏီများကို အသာထားဦး။ Baidu၊ Google၊ Facebook၊ Huaxia Network အစရှိသည်တို့၏ အကောင့်ဖွင့် အသုံးပြုသူ အရေအတွက်များမှာ အကြီးအကျယ် တိုးတက်လာခဲ့သည်။ အဘယ်ကြောင့်ဆိုသော် အင်တာနက် အသုံးပြုသူများ အနေဖြင့် အကောင့်ဖွင့်မှသာ မဲပေး၍ ရမည် မဟုတ်ပါလော။

အင်တာနက် ကုမ္ပဏီများ အတွက်မူ အသုံးပြုသူ အရေအတွက်မှာ အလွန် အရေးပါသော အခန်းကဏ္ဍတွင် ရှိနေသည်။ အသုံးပြုသူ အရေအတွက် များပြားပါက ငွေရှာနိုင်မည့် ပရောဂျက်များလည်း များပြားလာမည် ဖြစ်ပြီး ကြော်ငြာ လုပ်မည် ဆိုလျှင်ပင် မနည်းလှသော ဝင်ငွေများကို ရရှိနိုင်ပေသည်။

အကယ်၍ အခြားသော အသုံးချ ဆော့ဖ်ဝဲလ် ထုတ်ကုန်များပါ ထပ်မံဖန်တီးမည်ဆိုပါက အမြတ်အစွန်းမှာ ပိုမိုမြင့်မားလာပေလိမ့်မည်။

မဲပေးသည့် စာမျက်နှာတွင် အခြားသော ထုတ်ကုန်များ၏ ကြော်ငြာများကို ထည့်သွင်း၍ မရသော်လည်း ၎င်း၏ ရှေ့စာမျက်နှာများတွင်တော့ ရနိုင်သည် မဟုတ်ပါလော။ ဥပမာအားဖြင့် Baidu ဝက်ဘ်ဆိုက်တွင် မဲပေးမည့် လင့်ခ်၏ ကြော်ငြာ တစ်ခု ရှိနေပြီး ထိုကြော်ငြာ၏ ဘေးတွင် Wind-Rain မိုဘိုင်းဖုန်း၏ ကြော်ငြာ လင့်ခ် တစ်ခု ရှိနေသည်။ သင် နှိပ်သည်ဖြစ်စေ၊ မနှိပ်သည်ဖြစ်စေ Wind-Rain မိုဘိုင်းဖုန်းကို သတိထားမိမည်သာ ဖြစ်သည်။

ထို့ကြောင့် စောစောက လီမင်တေ အစီရင်ခံစာ တင်ပြချိန်တွင် ဤလှုပ်ရှားမှု၏ ကုန်ကျစရိတ်ကို ထုတ်မပြောခဲ့ခြင်း ဖြစ်သည်။ အဘယ်ကြောင့်ဆိုသော် အားလုံးက ခွဲဝေကျခံရမည် ဖြစ်သောကြောင့်ပင်။ ဥပမာအားဖြင့် လှုပ်ရှားမှု တစ်ခုလုံးအတွက် ယွမ်သန်းငါးရာ ကုန်ကျခဲ့သည် ဆိုပါစို့။ အမှတ်တံဆိပ် အသီးသီးအပေါ် ခွဲဝေလိုက်မည်ဆိုပါက တစ်ခုလျှင် ယွမ် သန်းဆယ်ဂဏန်းခန့်သာ ကျသင့်မည် ဖြစ်သည်။

ယွမ် သန်းဆယ်ဂဏန်းခန့်ဖြင့် တစ်ကမ္ဘာလုံး၏ ဤမျှ မြင့်မားသော အာရုံစိုက်မှုကို ရရှိခဲ့ခြင်းမှာ အလွန် တွက်ခြေကိုက်လှပေသည်။

"လှုပ်ရှားမှု ကာလအတွင်း Wind-Rain မိုဘိုင်းဖုန်းရဲ့ ရောင်းအားက ပြီးခဲ့တဲ့လကထက် ဆယ့်ခုနစ် ရာခိုင်နှုန်း တိုးလာခဲ့ပါတယ်... ဒါက ကျွန်တော်တို့ရဲ့ တိုးတက်မှု အမြန်ဆုံးလပါပဲ... တခြား ကြော်ငြာ လမ်းကြောင်းတွေနဲ့ပါ ပေါင်းစပ်လိုက်မယ် ဆိုရင် ဒီနှစ် Wind-Rain မိုဘိုင်းဖုန်းရဲ့ ရောင်းအားက ဆယ့်ငါး ရာခိုင်နှုန်း တိုးတက်ဖို့ ရည်မှန်းချက်ကို သေချာပေါက် ပြီးမြောက်နိုင်မှာပါ..."

Wind-Rain မိုဘိုင်းဖုန်း၏ ကမ္ဘာ့ထုတ်လုပ်ရောင်းချမှု ပမာဏ နံပါတ်တစ် ဆိုသည့် အနေအထားကို အခြေခံ၍ တွက်ချက်မည်ဆိုပါက ဆယ့်ငါး ရာခိုင်နှုန်း တိုးတက်ခြင်း ဆိုသည်မှာ အလွန်ကြောက်မက်ဖွယ် ကောင်းသော ကိန်းဂဏန်း တစ်ခုပင် ဖြစ်သည်။ အဆင့်နှစ် နေရာရှိ Nokia ၏ ရည်မှန်းချက်မှာပင် ဆယ်ရာခိုင်နှုန်းခန့်သာ ရှိပေသည်။

"ကျွန်တော်တို့ Lenovo ရဲ့ လက်ပ်တော့ပ် ကွန်ပျူတာတွေကလည်း ပြီးခဲ့တဲ့လကထက် ရောင်းအား ဆယ့်နှစ် ရာခိုင်နှုန်း တိုးလာပါတယ်... Desktop တွေဆိုရင် ခုနစ် ရာခိုင်နှုန်း တိုးလာပြီး အထူးသဖြင့် All-in-one ကွန်ပျူတာတွေရဲ့ ရောင်းအား တိုးတက်မှုက အများဆုံးပါပဲ..."

လူတိုင်းက ထုတ်ကုန် အသီးသီး၏ ရောင်းအား တိုးတက်မှုများကို အစီရင်ခံနေကြပြီး လူတိုင်း၏ မျက်နှာပေါ်တွင်လည်း အပြုံးများ ပြည့်နှက်နေသည်။ ဤဘက်တွင် အစီရင်ခံစာ တင်ပြပြီးချိန်တွင် ခါမီဒါ မာဆာအိုတို့ကလည်း အင်တာနက် ဗီဒီယို ကွန်ဖရင့်မှ တစ်ဆင့် အစီရင်ခံစာ စတင် တင်ပြကြသည်။

မူလက ဤမော်တော်ယာဉ် လုပ်ငန်းဆိုင်ရာ ဆုကြီးကို ကျင်းပချိန်တွင် လူတိုင်းက အနည်းငယ် ဖြုန်းတီးရာ ကျသည်ဟု ခံစားခဲ့ကြရသည်။ ဤမျှ များပြားသော ငွေကြေးများကို အသုံးပြုခဲ့ရပြီး နောက်ဆုံးတွင် ထင်ပေါ်ကျော်ကြားသွားမည်မှာ ထိုနိုင်ငံခြား ကားကုမ္ပဏီများသာ ဖြစ်သွားနိုင်သည်ဟု ထင်မှတ်ခဲ့ကြသည်။

သို့သော် မည်သူမျှ မထင်မှတ်ထားခဲ့သည်မှာ Songjiang ကားကုမ္ပဏီ ဆုရရှိသွားပြီး နာမည်ကျော်ကြားမှုများ အကြီးအကျယ် တိုးတက်သွားရုံ သာမက သူတို့၏ အခြားသော အမှတ်တံဆိပ်များနှင့် ထုတ်ကုန်များမှာလည်း ဤကိစ္စကြောင့် အကျိုးအမြတ်များ ရရှိခဲ့ပြီး ငွေအများအပြား ရှာဖွေနိုင်ခဲ့ခြင်းပင် ဖြစ်သည်။

Taihua Holdings အုပ်စု တစ်ခုတည်းသာ မကဘဲ Wind-Rain Holdings အုပ်စု လက်အောက်ခံ ကုမ္ပဏီများ အားလုံးလည်း အလွန် ကြီးမားသော အကျိုးကျေးဇူးများကို ရရှိခဲ့ကြသည်။ ဤအခြေအနေအရ ကြည့်မည်ဆိုပါက ဤ ပုလဲရတနာ ဆုကြီးမှာ အလွန် အောင်မြင်လွန်းလှပြီး နောက်နှစ်တွင်လည်း သေချာပေါက် ဆက်လက်ကျင်းပရမည် ဖြစ်သည်။ ယွမ်သန်းငါးရာကို မဆိုထားနှင့်၊ ယွမ် သန်းရှစ်ရာ ကုန်ကျမည် ဆိုလျှင်ပင် အလွန်တန်လှပေသည်။

ဖုန်းယွီတို့ အလွန်ဝမ်းသာပျော်ရွှင်နေကြပြီး ဤတစ်ကြိမ်တွင် အမြတ်မည်မျှ ရရှိခဲ့သည်ကို တွက်ချက်နေကြချိန်တွင် လူအချို့မှာမူ မပျော်မရွှင် ဖြစ်နေကြသည်။ အထူးသဖြင့် ထို တရုတ်ကားကုမ္ပဏီများ၏ သူဌေးများ ဖြစ်သည်။ ဤတစ်ကြိမ်တွင် အကျိုးအမြတ်များ အားလုံးကို Songjiang ကားကုမ္ပဏီနှင့် ထိုနိုင်ငံခြား ကားကုမ္ပဏီများကသာ ရယူသွားကြပြီး သူတို့ကတော့ ဘာအကျိုးအမြတ်မှ မရရှိခဲ့ဘူးဟု သူတို့ ခံစားနေကြရသည်။

အင်း... အကျိုးအမြတ် မရရှိခဲ့ဘူး ဆိုတာက နစ်နာသွားတယ် ဆိုတဲ့ သဘောပါပဲ...

...

******