အခန်း ၁၅၅၄

အခန်း ၁၅၅၄ တုတ်တစ်ချက် ရိုက်ပြီး စွန်ပလွံသီးချိုချို တစ်လုံး ကျွေးခြင်း

"ဝန်ကြီးမုန့်... ဧည့်သည် နှစ်ယောက် ရှိတယ်... ခင်ဗျား တွေ့ဖို့ စိတ်ဝင်စားလောက်မယ် ထင်တယ်... အိန္ဒိယ Tata Group ရဲ့ ဥက္ကဋ္ဌ ရာတန် တာတာနဲ့ Tata ကားကုမ္ပဏီရဲ့ ဥက္ကဋ္ဌ ဒီရန် တာတာတို့ပဲ..."

တစ်နာရီ အကြာတွင် ဝန်ကြီးမုန့်သည် Modu Motorsအပါအဝင် အခြားသော ကားကုမ္ပဏီ သူဌေးများကို သဘောတရားရေးရာ ပညာပေးမှု လုပ်ဆောင်အပြီးတွင် တိုက်တိုက်ဆိုင်ဆိုင်ပင် ဖုန်းယွီ၏ဖုန်းကို လက်ခံရရှိခဲ့သည်။

ဝန်ကြီးမုန့်က ချက်ချင်းပင် အားလပ်ကြောင်း ပြောလိုက်သည်။ ကြည့်ရသည်မှာ ဖုန်းယွီက ကောလာဟလများထဲက အတိုင်းပင် နိုင်ငံတော်အတွက် တွေးတောပေးနေဆဲ ဖြစ်ပုံရပေသည်။

"ဝန်ကြီးမုန့်... Tata Group က ကျွန်တော်တို့ Taihua Holdings အုပ်စု၊ Wind-Rain Holdings အုပ်စု တို့နဲ့ အလွန် ရင်းနှီးတဲ့ ပူးပေါင်းဆောင်ရွက်သူတွေပါ... သူတို့က ကျွန်တော်တို့ နိုင်ငံက ကားကုမ္ပဏီတွေနဲ့ ပူးပေါင်းဆောင်ရွက်မှု တချို့ လုပ်ချင်နေကြတယ်... လူစီးကား နယ်ပယ်မှာတော့ သေချာပေါက် ပင်းချန် စက်မှုထုတ်လုပ်ရေး အုပ်စုနဲ့ ပူးပေါင်းမှာပါ... ဒါပေမဲ့ စီးပွားဖြစ်သုံး ကား နယ်ပယ်မှာတော့ ဝန်ကြီးမုန့်ရဲ့ အကြံပြု ထောက်ခံပေးမှု လိုအပ်နေသေးတယ်..."

ဝန်ကြီးမုန့်မှာ အလွန်ဝမ်းသာသွားခဲ့သည်။ ဤသည်မှာ သူ့ထံသို့ အောင်မြင်မှု ဂုဏ်ပုဒ်ကို လာရောက် ပို့ဆောင်ပေးနေခြင်းပင် ဖြစ်သည်။ တရုတ်မှ စီးပွားဖြစ်သုံး ကားကုမ္ပဏီ အနည်းငယ်ကို ဖုန်းယွီက ဘယ်လိုလုပ် ဆက်သွယ်၍ မရနိုင်ဘဲ နေမည်နည်း။

Tata ကားကုမ္ပဏီသည် စီးပွားဖြစ်သုံး ကားနယ်ပယ်၊ အထူးသဖြင့် အလတ်စားနှင့် အကြီးစား ကားနယ်ပယ်တွင် ကမ္ဘာ့ထိပ်ဆုံး သုံးခုစာရင်းဝင် ဖြစ်ပြီး Toyota ထက်ပင် အင်အား ကြီးမားသေးသည်။

ဤမျှ အင်အားကြီးမားသော မိတ်ဖက်နှင့် ပူးပေါင်းဆောင်ရွက်ရခြင်းက အကျိုးကျေးဇူး အလွန် များပြားလှပေသည်။

ဝန်ကြီးမုန့်က ဖုန်းယွီကို ကြည့်လိုက်သည်။ တကယ်တမ်းတွင် ကုန်တင်ကားကြီးများ ကဏ္ဍ၌ Songjiang ကားကုမ္ပဏီ၏ အိမ်နီးချင်း FAW မှာ အလွန်ကောင်းမွန်ပြီး Modu ကားကုမ္ပဏီ ၊ Dongfeng ကားကုမ္ပဏီတို့နှင့်အတူ တရုတ်၏ စီးပွားဖြစ်သုံး ကားများတွင် ထိပ်တန်း ကုမ္ပဏီများ ဖြစ်ကြသည်။

အကယ်၍ သူသာဆိုလျှင် Modu ကားကုမ္ပဏီကို ရွေးချယ်မည် ဖြစ်သော်လည်း ခေတ္တမျှ စဉ်းစားပြီးနောက် FAW ကလည်း မဆိုးဘူးဟု ထင်မှတ်လိုက်သည်။ အဘယ်ကြောင့်ဆိုသော် ဤသို့ဖြင့် FAW မှာ သေချာပေါက် အသွင်ပြောင်းရမည်ဖြစ်ပြီး စီးပွားဖြစ်သုံးကားများပေါ်တွင် ပိုမိုအာရုံစိုက်လာမည်ဖြစ်ရာ ဤသည်က Songjiang ကားကုမ္ပဏီနှင့် ယှဉ်ပြိုင်မှုကို ရှောင်ရှားနိုင်မည် ဖြစ်သည်။ ဤသည်မှာလည်း ဖုန်းယွီ အလိုချင်ဆုံး အရာ ဖြစ်သင့်သည် မဟုတ်ပါလော။

"ကျွန်တော် တရုတ်စက်မှုလုပ်ငန်း ဝန်ကြီးဌာနကို ကိုယ်စားပြုပြီး မန်နေဂျာဖုန်းက ကျွန်တော်တို့ကို အခုလို လမ်းကြောင်း ရှာပေးတဲ့အတွက် ကျေးဇူးတင်ပါတယ်... ကျွန်တော် ကြည့်ရတာတော့ FAWက အရမ်းသင့်တော်မယ် ထင်တယ်... သူတို့လည်း အသွင်ပြောင်းလို့ ရတာပေါ့... နောက်ပိုင်းကျရင် စီးပွားဖြစ်သုံး ကားတွေကို သီးသန့် ထုတ်လုပ်တော့မှာပေါ့..."

ဖုန်းယွီက ခေါင်းခါပြလိုက်သည်။ "ဝန်ကြီးမုန့်... ကျွန်တော် ကိုယ်ပိုင် အမြင်အရတော့ FAW က သိပ်မသင့်တော်ဘူး ထင်တယ်... ဘာဖြစ်လို့လဲ ဆိုတော့ FAWက Hongqi ကားရဲ့ ပြန်လည် နာလန်ထူရေး တာဝန်ကို ထမ်းဆောင်ထားရသေးတယ်လေ... ကျွန်တော်တို့နိုင်ငံရဲ့ အစောဆုံးနဲ့ နာမည်အကြီးဆုံး ဆလွန်းကား အမှတ်တံဆိပ်ကို လက်လွတ် ဆုံးရှုံးလိုက်ဖို့တော့ မသင့်တော်သေးပါဘူး..."

ဖုန်းယွီ၏ ဤစကားက ဝန်ကြီးမုန့်ကို အလွန်အံ့အားသင့်သွားစေခဲ့သည်။ တစ်ချိန်တည်းမှာပင် သူ အနည်းငယ် ရှက်ရွံ့သွားခဲ့ပြီး သူ့ကိုယ်သူ သေးသိမ်သော သူတစ်ဦးလို တွေးတောမိသွားခဲ့သည်ဟု ခံစားလိုက်ရသည်။ ဖုန်းယွီက FAW ကို မည်သို့မျှ လုပ်ရန် ရည်ရွယ်ထားခဲ့ခြင်း မရှိပေ။ FAW ကို မျက်လုံးထဲပင် ထည့်ထားခဲ့ပုံ မရပေ။

မည်သို့ပင်ဆိုစေ လူစီးကား နယ်ပယ်တွင် Songjiang ကားကုမ္ပဏီက တရုတ်ဈေးကွက်၏ လေးဆယ် ရာခိုင်နှုန်းကျော်ကို သိမ်းပိုက်ထားသည် မဟုတ်ပါလော။

အကယ်၍ ဤသို့ တွက်မည်ဆိုပါက Dongfeng ကားကုမ္ပဏီက ပို၍ သင့်တော်ပေသည်။ သူတို့၏ အပေါ့စား ကုန်တင်ကားများနှင့် အကြီးစား ကုန်တင်ကားများမှာ ပြည်တွင်းတွင် အတော်လေး နာမည်ကြီးပြီး ဖြစ်သည်။ သို့သော် သူ့တွင် သံသယ အချို့ ရှိနေသေးသည်။ ဤသို့ Tata ၏ အမှတ်တံဆိပ်ကို တင်သွင်းလိုက်မည်ဆိုပါက ပြည်တွင်း ကိုယ်ပိုင် အမှတ်တံဆိပ်များကို ဧရာမ ထိခိုက်မှုကြီး ဖြစ်ပေါ်စေမည် မဟုတ်ပါလော။

"မန်နေဂျာဖုန်းက အဲဒီလို ပြောမှတော့ ကျွန်တော့် အထင် Dongfeng ကားကုမ္ပဏီက အရမ်း သင့်တော်ပါတယ်... ဒါပေမဲ့ ဘယ်လို ပူးပေါင်းကြမလဲ... Tata ကားကုမ္ပဏီရဲ့ အမှတ်တံဆိပ်ကို တင်သွင်းလာပြီးတဲ့နောက်မှာ ကျွန်တော်တို့လည်း ဟိုအရင်နှစ်တွေ တုန်းကလိုများ ဖြစ်သွားမလား... သူတို့ရဲ့ ရောင်းအားက ပိုကောင်းလာလို့ ကိုယ်ပိုင် အမှတ်တံဆိပ်တွေ ပျောက်ကွယ်သွားတာမျိုးပေါ့..."

"လုံးဝမဖြစ်စေရပါဘူး... ဒီတစ်ကြိမ် ပူးပေါင်းဆောင်ရွက်မှုက တခြား ကားကုမ္ပဏီတွေ နိုင်ငံခြား ကားကုမ္ပဏီတွေနဲ့ ဖက်စပ် လုပ်တာနဲ့ မတူပါဘူး... ကျွန်တော်တို့က နည်းပညာပိုင်းဆိုင်ရာ ပူးပေါင်းဆောင်ရွက်တာပါ... သူတို့ အမှတ်တံဆိပ် ကားတွေကို ထုတ်လုပ်ပေးရမယ် ဆိုပေမဲ့ တခြား ဖက်စပ် ကားကုမ္ပဏီတွေလို အားတိုက်ခွန်တိုက် ကြော်ငြာပေးဖို့ မလိုအပ်ပါဘူး... ပြီးတော့ ဒါက အပြန်အလှန်ပါပဲ... Tata ဘက်ကလည်း ကျွန်တော်တို့ရဲ့ ကား အမှတ်တံဆိပ်တွေကို သူတို့ရဲ့ အိန္ဒိယ ဈေးကွက်ထဲ ဝင်ရောက်နိုင်အောင် ကူညီပေးရမှာပါ... ပြီးတော့ ဖက်စပ် သက်တမ်းက ဆယ်နှစ်တည်းပါပဲ..."

ဆယ်နှစ် အချိန်ဆိုသည်မှာ တရုတ်၏ စီးပွားဖြစ်သုံး ကားနည်းပညာကို အလွန် ကြီးမားသော အဆင့်တစ်ခုသို့ မြှင့်တင်ပေးရန် လုံလောက်လှပေသည်။ ထို့အပြင် ကြော်ငြာမှုကိုသာ သင့်လျော်အောင် လုပ်ဆောင်မည်ဆိုပါက တစ်ဖက်လူ၏ အမှတ်တံဆိပ်က ပြည်တွင်းဖြစ် အမှတ်တံဆိပ်များကို ဖိနှိပ်သွားမည်ကိုလည်း စိုးရိမ်စရာ မလိုပေ။ အကယ်၍ ထိုသို့သော အရိပ်အယောင်များ ပေါ်ထွက်လာပါက ဆယ်နှစ် အကြာတွင် ပူးပေါင်းဆောင်ရွက်မှုကို လုံးဝ ရပ်ဆိုင်းပစ်နိုင်သည် သို့မဟုတ် ပူးပေါင်းဆောင်ရွက်မည့် အစီအစဉ်ကို ပြန်လည် ဆွေးနွေးနိုင်ပေသည်။

တရုတ်က နိုင်ငံခြား ရင်းနှီးမြှုပ်နှံမှုများကို သီးသန့် ကားစက်ရုံ တည်ဆောက်ခွင့် မပြုသကဲ့သို့ အိန္ဒိယကလည်း အတူတူပင် ဖြစ်သည်။ ထို့ကြောင့် Tata က တရုတ်တွင် ဖက်စပ် စက်ရုံ တည်ဆောက်မည် ဖြစ်သလို Songjiang ကားကုမ္ပဏီ နှင့် Dongfeng ကားကုမ္ပဏီတို့သည်လည်း အိန္ဒိယတွင် Tata နှင့် ဖက်စပ် စက်ရုံများ တည်ဆောက်နိုင်ပေသည်။

သေချာပေါက် နှစ်ဖက်စလုံးက အလျှော့ပေးမှုများ ပြုလုပ်ရမည် ဖြစ်သည်။ Tata ကားကုမ္ပဏီက Songjiang ကားကုမ္ပဏီ နှင့် တည်ဆောက်မည့် ဖက်စပ် စက်ရုံတွင် ရှယ်ယာ ၃၅ ရာခိုင်နှုန်း ရယူမည်ဖြစ်ရာ သုံးပုံတစ်ပုံကို ကျော်လွန်နေပြီး Songjiang ကားကုမ္ပဏီ ကို အကြွင်းမဲ့ လက်ဝါးကြီးအုပ်၍ တစ်ဦးတည်း ဆုံးဖြတ်ခွင့် မရအောင် လုပ်ဆောင်ထားခြင်း ဖြစ်သည်။ အပြန်အလှန် အနေဖြင့်လည်း အတူတူပင် ဖြစ်သည်။

ဝန်ကြီးမုန့်၏ မျက်လုံးများ ပြူးကျယ်သွားခဲ့သည်။ "ခင်ဗျား ဆိုလိုတာက ကျွန်တော်တို့က ရင်းနှီးမြှုပ်နှံပြီး အိန္ဒိယမှာ ဖက်စပ် စက်ရုံ တည်ဆောက်လို့ ရတယ်ပေါ့... ကျွန်တော်တို့ရဲ့ စီးပွားဖြစ်သုံး ကားတွေကို အိန္ဒိယမှာ တိုက်ရိုက် ထုတ်လုပ်လို့ ရပြီပေါ့..."

တရုတ်၏ စီးပွားဖြစ်သုံးကားများမှာ အမြဲတမ်း အားနည်းနေခဲ့ပြီး နိုင်ငံတကာတွင် လုံးဝအဆင့်မဝင်ခဲ့ပေ။ ထုတ်လုပ်နိုင်စွမ်း ကောင်းသည်ဟု ထင်ရသော်လည်း တကယ်တမ်းတွင် ထုတ်လုပ်ရောင်းချရသည်မှာ ဖက်စပ် ကားများသာ အများစု ဖြစ်ကြသည်။ ဗီယက်နမ်ကဲ့သို့သော နိုင်ငံများသို့ တင်ပို့ရောင်းချရန်ပင် ခက်ခဲနေသေးရာ ပိုဝေးသော နေရာများသို့ တင်ပို့ရန်ဆိုသည်မှာ ပို၍ပင်မဖြစ်နိုင်ပေ။ ဤကဲ့သို့ ရုတ်တရက် အိန္ဒိယ ဈေးကွက်ထဲသို့ ဝင်ရောက်သွားနိုင်လိမ့်မည်ဟု သူ ထင်မှတ်မထားခဲ့ပေ။ ထိုနိုင်ငံမှာ ဂျပန်နိုင်ငံ၊ တောင်ကိုရီးယား တို့နှင့်ပင် လက်ရုံးချင်း ယှဉ်နိုင်သော အာရှ၏ မော်တော်ယာဉ် စက်မှုလုပ်ငန်း အင်အားကြီး နိုင်ငံ တစ်နိုင်ငံ ဖြစ်သည် မဟုတ်ပါလော။

"ပူးပေါင်းဆောင်ရွက်တယ် ဆိုတာ သဘာဝကျကျပဲ အပြန်အလှန် ဖြစ်ရမှာပေါ့... ဒီကိစ္စနဲ့ ပတ်သက်ပြီး ရာတန်နဲ့ ကျွန်တော် ဆွေးနွေး သဘောတူပြီးပါပြီ... ကျွန်တော့် ကိုယ်ပိုင် အမြင်အရတော့ ဒီစည်းကမ်းချက်တွေက အရမ်းကောင်းမွန်နေပါပြီ... အကယ်၍ အထက်က မကျေနပ်ဘူး ဆိုရင်တော့ ကျွန်တော်လည်း အားနာပါတယ်လို့ပဲ ပြောရတော့မှာပါ..."

"ကျေနပ်ပါတယ်... ကျွန်တော် အရမ်းကိုကျေနပ်ပါတယ်..." ဝန်ကြီးမုန့်က အလျင်စလို ပြောလိုက်သည်။ ဖုန်းယွီ၏ အကူအညီသာ မပါပါက အိန္ဒိယတွင် ဖက်စပ် စက်ရုံ တည်ဆောက်ရန် မဆိုထားနှင့်၊ တင်ပို့ရောင်းချရန်ပင် မဖြစ်နိုင်ဘဲ လုံးဝ ယှဉ်ပြိုင်နိုင်စွမ်း ရှိမည် မဟုတ်ပေ။

Tata ကားကုမ္ပဏီ၏ ဆောင်ပုဒ်က ဘာဖြစ်သနည်း။ 'ဖွံ့ဖြိုးပြီး နိုင်ငံများ၏ အရည်အသွေး၊ ဖွံ့ဖြိုးဆဲ နိုင်ငံများ၏ ဈေးနှုန်း' ဟူ၍ ဖြစ်သည်။ ဤသည်မှာ ဆောင်ပုဒ် သက်သက်သာ မဟုတ်ဘဲ သူတို့ တကယ် လုပ်ဆောင်နိုင်ခဲ့သည့် အရာလည်း ဖြစ်သည်။

ဝန်ကြီးမုန့်၏ စိတ်လှုပ်ရှားနေသော မျက်နှာပေါ်တွင် နီမြန်းသော အရောင်များပင် ထွက်ပေါ်နေသည်။ ဤသည်မှာ မည်မျှ ကြီးမားသော နိုင်ငံရေး စွမ်းဆောင်ရည် တစ်ရပ် ဖြစ်သနည်း။ အဓိပ္ပာယ် အရ ဆိုရလျှင် ယခင်က Songjiang ကားကုမ္ပဏီက ရုရှားတွင် ဖက်စပ် စက်ရုံ တည်ဆောက်ခဲ့သည်ထက်ပင် ပိုမို အရေးပါလှပေသည်။

ထို့အပြင် ဖုန်းယွီက သူ့ကို အရင်ပြောပြခဲ့ခြင်း ဖြစ်ရာ ဤသည်ကို သူ၏ ဦးဆောင်မှုအောက်တွင် ပြီးမြောက်ခဲ့သော ပြည်ပမှ တင်သွင်းခြင်းနှင့် နိုင်ငံတကာသို့ ထိုးဖောက်ခြင်း ဆိုသည့် ခိုင်မာသော နိုင်ငံရေး စွမ်းဆောင်ရည် အဖြစ် ပြောင်းလဲပစ်နိုင်ပြီး မည်သူကမျှ ဘာမျှ ပြောစရာ ရှိမည် မဟုတ်ပေ။

"ဝန်ကြီးမုန့်... ကျွန်တော် အရင် ရှင်းရှင်းလင်းလင်း ပြောထားမယ်... ကျွန်တော် နည်းနည်း စုံစမ်းကြည့်ပြီးပါပြီ... ကျွန်တော်တို့ တရုတ်ရဲ့ စီးပွားဖြစ်သုံး ကားပိုင်းမှာ Tata ကားကုမ္ပဏီထက် ခေတ်မီတဲ့ နည်းပညာတွေက အရမ်း နည်းလွန်းပါတယ်... အကယ်၍ အခွင့်အရေး တချို့ကို ဆက်ပြီး ထိန်းသိမ်းထားချင်သေးတယ်ဆိုရင်တော့ ကျွန်တော်တို့ ငွေပိုထုတ်ရပါလိမ့်မယ်..."

"ကိစ္စမရှိပါဘူး... ဒီငွေကို Dongfeng ကားကုမ္ပဏီက မထုတ်နိုင်ရင် ကျွန်တော်တို့ ဝန်ကြီးဌာနက နည်းလမ်း ရှာပေးပါ့မယ်... ဝန်ကြီးဌာနမှာ ရန်ပုံငွေ မလုံလောက်ရင် ကျွန်တော် အထက်ကို သွားပြီး လျှောက်ထားပေးပါ့မယ်..." ဝန်ကြီးမုန့်က ဤအချိန်တွင် အလွန်ပြတ်သားပြီး တာဝန်ယူနိုင်စွမ်း ရှိသူ တစ်ဦးအဖြစ် ပေါ်လွင်နေပေသည်။

ဖုန်းယွီက ခေါင်းလှည့်ကာ မစ္စတာ Tataနှစ်ဦးကို အင်္ဂလိပ်လို ပြောလိုက်သည်။ "ကျွန်တော်တို့ နိုင်ငံရဲ့ စက်မှုလုပ်ငန်း ဝန်ကြီးဌာန ခေါင်းဆောင်က သဘောတူလိုက်ပါပြီ... အစောပိုင်း အနေနဲ့ Dongfeng ကားကုမ္ပဏီနဲ့ Tata ကားကုမ္ပဏီတို့ စီးပွားဖြစ်သုံး ကားနယ်ပယ်မှာ ပူးပေါင်းဆောင်ရွက်ဖို့ အတည်ပြုလိုက်ပါပြီ... အရင်က ကျွန်တော်တို့ ဆွေးနွေး သဘောတူထားတဲ့ စည်းကမ်းချက်တွေကတော့ ပြောင်းလဲမှာ မဟုတ်ပါဘူး..."

ရာတန် တာတာက ဝိုင်ခွက်ကို မြှောက်လိုက်ရာ အားလုံးကလည်း အတူတကွ ခွက်ချင်း တိုက်လိုက်ကြသည်။ ဤကိစ္စ၏ အခြေခံ မူဘောင်ကို သတ်မှတ်ပြီးသွားပြီ ဖြစ်ပြီး အသေးစိတ် အချက်အလက် များကိုမူ သဘာဝကျကျပင် Tata ကားကုမ္ပဏီနှင့် Dongfeng ကားကုမ္ပဏီတို့သာ ဆွေးနွေးကြမည်ဖြစ်ကာ ဖုန်းယွီက ဝင်ရောက် စွက်ဖက်မည် မဟုတ်ပေ။

Tata Group သည် ဖုန်းယွီ၏ အာရှတွင် အရေးအကြီးဆုံးသော မိတ်ဖက် ဖြစ်လာခဲ့ပြီး ဒုတိယမရှိပေ။ ထို့အပြင် နယ်ပယ် အသီးသီးတွင်လည်း နက်ရှိုင်းသော ပူးပေါင်းဆောင်ရွက်မှုများ ပြုလုပ်ထားပြီး ဖြစ်သည်။

အမြဲတမ်း ထိုဖွံ့ဖြိုးပြီး နိုင်ငံများကသာ ပူးပေါင်း၍ ဖွံ့ဖြိုးဆဲ နိုင်ငံများတွင် အမြတ်ထုတ်လေ့ ရှိကြသည်။ ယခုအခါ ဖုန်းယွီက ပြောင်းပြန် လုပ်ဆောင်မည်ဖြစ်ပြီး ဖွံ့ဖြိုးဆဲ နိုင်ငံဖြစ်သော အိန္ဒိယ၏ Tata Group နှင့် ပူးပေါင်းကာ ဥရောပနှင့် အမေရိကရှိ ထိုဖွံ့ဖြိုးပြီး နိုင်ငံများသို့ သွားရောက် ငွေရှာမည် ဖြစ်သည်။

ထိုဖွံ့ဖြိုးပြီး နိုင်ငံများမှ အရင်းရှင်ကြီးများကိုလည်း ဖွံ့ဖြိုးဆဲ နိုင်ငံများဆိုသည်မှာ လွယ်လွယ်နှင့် ရင်ဆိုင်၍မရနိုင်ကြောင်း၊ အကယ်၍ တစ်ချက်လေး သတိလက်လွတ် ဖြစ်သွားပါက ပြန်လည်အကိုက်ခံရမည် ဖြစ်ကြောင်းကိုပါ သိရှိနားလည်သွားစေမည် ဖြစ်သည်။

ဖုန်းယွီသည် နေ့လယ်ပိုင်းက ဝန်ကြီးမုန့်ကို မျက်နှာပျက်စေခဲ့သော်လည်း ညပိုင်းတွင်မူ ဝန်ကြီးမုန့်အား နိုင်ငံရေး စွမ်းဆောင်ရည် တစ်ရပ်ကို ပေးအပ်ခဲ့သည်။ ဤသည်မှာ ဝန်ကြီးမုန့်၏ သူ့အပေါ် မကျေနပ်မှုများကို ဖယ်ရှားပေးလိုက်နိုင်ရုံ သာမကဘဲ ယခုအခါ ဝန်ကြီးမုန့်၏ စိတ်ထဲတွင် ဖုန်းယွီအပေါ် ကျေးဇူးတင်မှုများဖြင့်သာ ပြည့်နှက်နေစေခဲ့သည်။

******