အခန်း ၂၂၅၀

အခန်း (၂၂၅၀) အနက်ရောင် နဂါး နှင့် ခရမ်းရောင် နဂါး

"အားးးးးး"

သူ၏ ရှေ့မှောက်တွင် ရှိနေသော ဝမ်ချောင်ကို ကြည့်ရင်း အန်းလုရှန်းမှာ နောက်ဆုံးတွင် မထိန်းနိုင်တော့ဘဲ ကျယ်လောင်စွာ အော်လိုက်ပြီး ရှေ့သို့ တစ်လှမ်း တိုးကာ ရုတ်တရက် အရင်တိုက်ခိုက်လိုက်တော့သည်။

ကြီးမားလှသော ဖျက်ဆီးခြင်း စွမ်းအားများ ပါဝင်နေသည့် လိပ်တက်နေသော အနက်ရောင် အငွေ့များမှာ ဧရာမ ရေလှိုင်းကြီးများအလား အန်းလုရှန်း၏ကိုယ်တွင်းမှနေ၍ ပေါက်ကွဲထွက်ပေါ်လာခဲ့ပြီး ဝမ်ချောင်ရှိရာ အရပ်ဆီသို့ ဟိန်းဟောက် ပြေးဝင်သွားတော့သည်။

ထိုအနက်ရောင်အငွေ့များမှာ စုစည်းသွားခဲ့ပြီး ဒြပ်သားတစ်ခုအလား ဖြစ်သွားကာ ဟင်းလင်းပြင်ကြီး အတွင်း၌ အသက်ဝင်နေသော ဧရာမ အနက်ရောင် နဂါးကြီး တစ်ကောင်အဖြစ်သို့ ပုံပေါ်လာတော့သည်။ အန်းလုရှန်း၏ ဤတိုက်ခိုက်မှုမှာ ရှိသမျှ ခွန်အား အားလုံးကို အကုန်အစင် ထုတ်သုံးထားခြင်း ဖြစ်ရာ သိမ်မွေ့နက်နဲသောအဆင့်၏ အထွတ်အထိပ် အနေအထားကို ကျော်လွန်သွားခဲ့ပြီဖြစ်ပြီး၊ ဂူကောင်းကင်အဆင့်၏ အစပိုင်း အနေအထားနှင့် အလွန်အမင်း နီးစပ်နေခဲ့ပြီ ပင်ဖြစ်သည်။

ဤသည်မှာ အန်းလုရှန်းက အနက်ရောင် နဂါး၏စွမ်းအားများနှင့် ပေါင်းစပ်ပြီး တိုက်ခိုက်လိုက်ခြင်း ပင်ဖြစ်သည်။

စစ်ပွဲကြီးတွင် ရှုံးနိမ့်သွားခဲ့ပြီး နိုင်ငံအသီးသီးမှ ပူးပေါင်းတပ်များမှာ တောင်ပြိုသလို ပြိုကွဲ ပျက်စီးသွားခဲ့ပြီ ဖြစ်သည်မှာ လုံးဝပြောင်းလဲ၍ မရနိုင်သော အမှန်တရားများပင်ဖြစ်သည်။ သို့သော် အန်းလုရှန်း၏အနက်ရောင်နဂါး ကံကြမ္မာ ကြယ်ပွင့်မှာ ဆက်လက် တည်ရှိနေဆဲ ပင်ဖြစ်သည်။ ဤမျှသာမက စစ်ပွဲကြီး ရှုံးနိမ့်သွားခဲ့သည့် အကြောင်းအရင်းကြောင့်ပင်လျှင် အနက်ရောင်နဂါး၏ စွမ်းအားများမှာ ပြောင်းပြန်အနေဖြင့် တစ်စထက်တစ်စ ပိုမိုအစွမ်းထက်လာခဲ့ခြင်း ပင်ဖြစ်သည်။

လှောင်ချိုင့်အတွင်းမှ သားရဲ၏ ရုန်းကန်မှု။

သမိုင်းတစ်လျှောက် မင်းဆက် အဆက်ဆက်တွင် အလယ်ပိုင်း ကုန်းမြေဒေသကြီး၏ အရှင်သခင်နေရာကို လုယူရန် ကြိုးပမ်းခဲ့သည့် လမ်းကြောင်း တစ်လျှောက်လုံးတွင်၊ ပုန်ကန်မှုများ ရှုံးနိမ့်သွားသည့် အချိန်တိုင်း၌ ပြန်လည်တုံ့ပြန် တိုက်ခိုက်သည့် စွမ်းအားများမှာ ပို၍ကြီးမားလာလေ့ ရှိပေသည်။

"ဝေါင်းးးး"

အသံမဲ့ပြီး ဝိညာဉ် နယ်ပယ် အတွင်း၌သာလျှင် တည်ရှိနေသော ဟိန်းဟောက်သံကြီးများ အဆက်မပြတ် ဟင်းလင်းပြင်ကြီး အတွင်းမှ ထွက်ပေါ်လာတော့သည်။ ထိုဧရာမ အနက်ရောင်နဂါးကြီးမှာ ဝမ်ချောင်ကို တင်းကျပ်စွာ စိုက်ကြည့်နေခဲ့ပြီး မျက်ဝန်းထဲ၌ ပြင်းထန်လှသော အမုန်းတရားများ ပေါက်ကွဲထွက်ပေါ်နေတော့သည်။ ဤအရာမှာ အန်းလုရှန်း၏ ဆန္ဒ သက်သက်သာ မဟုတ်တော့ဘဲ ယိုကျိုး၏ အနက်ရောင် နဂါး၏ ဒေါသများ လည်း ပါဝင်နေပေသည်။

ရေအောက်တွင် ပုန်းအောင်းနေသောနဂါး ကောင်းကင်ယံသို့ပျံတက်ခြင်း၊ ကောင်းကင်ယံတွင် ပျံသန်းနေသော နဂါး။

ရေအောက်တွင် ပုန်းအောင်းနေသော နဂါးတိုင်းမှာ အစစ်အမှန် နဂါး တစ်ကောင်အဖြစ်သို့ ပြောင်းလဲသွားရန်အတွက် အမြဲတမ်း မျှော်လင့်တောင့်တနေကြသည်။ သို့သော် ၎င်း၏အစစ်အမှန် နဂါး ဖြစ်လာမည့် လမ်းကြောင်းကြီးမှာ ဝမ်ချောင်ကြောင့် လုံးဝရက်စက်စွာ ဖြတ်တောက် ဖျက်ဆီးခံလိုက်ရခြင်း ပင်ဖြစ်သည်။

"ဝုန်း…"

အန်းလုရှန်း၏ ဤတိုက်ခိုက်မှုမှာ ပြင်းထန်လွန်းလှသည်၊ အနက်ရောင် နဂါး ဖြတ်သန်းသွားသော နေရာတိုင်းတွင် လေပြင်းများ တိုက်ခတ်ပြီး မိုးကြိုးများ ပစ်ချလာတော့ရာ၊ ထိုအလွန်အမင်း ကြီးမားလှသော စွမ်းအားကြီးမှာ ကောင်းကင်နှင့် မြေကြီးကို ဖုံးလွှမ်းလျက် မည်သူ့ကိုမဆို အလွန်အမင်း ထိတ်လန့် ခြောက်ခြားသွားစေနိုင်စွမ်း ရှိပေသည်။

"ဟွန့်… အနက်ရောင် နဂါး ရဲ့ ကံကြမ္မာ စွမ်းအင်လား။ မင်းကို ချန်ထားလည်း ပြဿနာ သက်သက်ပဲ ဆိုမှတော့ အားလုံးကို အမြစ်ပြတ် သတ်ပစ်လိုက်မယ်"

ဝမ်ချောင်မှာ ဟင်းလင်းပြင်ကြီး အတွင်း၌ မတ်မတ်ရပ်လျက် သူ၏ ရှေ့သို့ ဧရာမ တောင်တန်းကြီး တစ်ခုအလား ပြေးဝင်လာနေသော အနက်ရောင် နဂါး ကြီးကို ကြည့်ကာ အေးစက်စက် ဖြင့် ဆိုလိုက်တော့သည်။

သူ၏အစစ်အမှန် ကမ္ဘာကြီးမှာ အနက်ရောင် နဂါး၏ တည်ရှိမှုကို အစောကြီး ကတည်းက အပြည့်အဝ ဖမ်းယူ သိရှိထားခဲ့ပြီး ပင်ဖြစ်သည်။

"ဘုန်း"

မျက်တောင်တစ်ခတ်မျှ အချိန်လေး အတွင်းမှာပင် အနည်းငယ်မျှ တွန့်ဆုတ်နေခြင်း လုံးဝမရှိဘဲ၊ ဝမ်ချောင်၏ကိုယ်တွင်းမှနေ၍ မည်သည့် သိုင်းပညာရှင်ကိုမဆို အလွန်အမင်း အံ့ဩထိတ်လန့်သွားစေနိုင်သည့် အလွန်အမင်း ကြီးမားလှသော ကြောက်မက်ဖွယ် စိတ်စွမ်းအင်ကြီးမှာ ရုတ်တရက် လွင့်ပျံထွက်ပေါ်လာခဲ့ပြီး၊ ကောင်းကင်ယံတွင် ရှိနေသော အနက်ရောင်နဂါးကြီးနှင့် အန်းလုရှန်းထံသို့ အပြင်းအထန် ပေါက်ကွဲ ပြေးဝင်သွားတော့သည်။

"ကြယ်တာရာ စကြဝဠာကြီး"

ဝမ်ချောင်မှာ စိတ်စွမ်းအင် နယ်ပယ်၏ အဆုံးစွန်သော ထိပ်တန်း သိုင်းပညာရပ် ကြီးကို မျက်တောင်တစ်ခတ် အတွင်းမှာပင် ရုတ်တရက် ထုတ်ဖော် အသုံးပြုလိုက်တော့သည်။ ထို အလွန်အမင်း ကြီးမားကျယ်ပြန့်လှသော စိတ်စွမ်းအင်ကြီးမှာ မျက်တောင်တစ်ခတ် အတွင်းမှာပင် သန်းနှင့်ချီသော ဧရာမ ကြယ်များ အဖြစ်သို့ ပြောင်းလဲသွားခဲ့ပြီး အန်းလုရှန်းနှင့် အနက်ရောင် နဂါး၏ ကံကြမ္မာ စွမ်းအင်ကြီးအပေါ်သို့ အပြင်းအထန် ဝင်တိုက်လိုက်တော့သည်။

ဤမျှသာမက ဝမ်ချောင်တိုက်ခိုက်လိုက်သည့် အချိန်မှာပင် အနက်ရောင် နဂါး၏ ကံကြမ္မာ စွမ်းအင်၏ ဆွဲဆောင်မှုကို ခံလိုက်ရသည့်အလား၊ ဒါမှမဟုတ် ဝမ်ချောင်၏ကိုယ်ပိုင် ဆန္ဒ၏ လုပ်ဆောင်မှု ကြောင့်လား မသိနိုင်ဘဲ၊ ဝမ်ချောင်၏ကိုယ်တွင်းမှနေ၍ ပြင်းထန်လှသော နဂါး ဟိန်းဟောက်သံကြီးနှင့်အတူ ဧရာမ ခရမ်းရောင် နဂါးကြီးတစ်ကောင်မှာ ရုတ်တရက် ဟင်းလင်းပြင်ကြီးကို ဖောက်ထွင်းလျက် ပေါက်ကွဲထွက်ပေါ်လာခဲ့ပြီး အနက်ရောင် နဂါးကြီး ရှိရာ အရပ်ဆီသို့ အပြင်းအထန် ပြေးဝင်သွားတော့သည်။

ခရမ်းရောင် နဂါး ကြီးမှာ ဧရာမ ပါးစပ်ကြီးကို ဟလိုက်ပြီး၊ ဘုန်းခနဲ မြည်သံနှင့်အတူ အနက်ရောင် နဂါးကြီး၏ လည်ပင်းကို ရုတ်တရက် အပြင်းအထန်ကိုက်ချလိုက်တော့သည်။

"အူးးး"

ဤမြင်ကွင်းကြီးမှာ အလွန်အမင်း ရုတ်တရက် ဆန်လွန်းလှသည်။ အနက်ရောင် နဂါးကြီးမှာ ရုတ်တရက် အပြင်းအထန် ထိခိုက်ဒဏ်ရာရရှိသွားခဲ့ရာ ချက်ချင်းပင် အလွန်အမင်း နာကျင်နေသော အော်ဟစ်သံကြီးတစ်ခု ထွက်ပေါ်လာခဲ့ပြီး၊ ဧရာမ ခန္ဓာကိုယ်ကြီးမှာ ပြင်းထန်စွာ လူးလှိမ့် တုန်ခါနေခဲ့ကာ တစ်ကိုယ်လုံးရှိ အနက်ရောင် အငွေ့များပင်လျှင် အများအပြား ပြန့်ကျဲသွားတော့သည်။

အနက်ရောင် နဂါးကြီးမှာ အလွန်အမင်း ရက်စက် ကြမ်းတမ်းလှသည်။ ဤမျှလောက် အထိ အပြင်းအထန် ထိခိုက်ဒဏ်ရာရရှိနေသည် ဆိုလျှင်တောင်မှ ထက်ရှလှသော နဂါး လက်သည်း လေးဖက်စလုံးမှာ ခရမ်းရောင် နဂါးကြီးဆီသို့ အပြင်းအထန် ကုတ်ခြစ်ရန် ကြိုးပမ်းနေဆဲပင်ဖြစ်သည်။ တစ်ချိန်တည်းမှာပင် နဂါးအမြီးကြီးဖြင့်လည်း အပြင်းအထန် ရိုက်ချလိုက်တော့သည်။

သို့သော် သူ့ကို ဆီးကြိုနေသည်မှာ ခရမ်းရောင် နဂါးကြီး၏ ပို၍ရက်စက် ကြမ်းတမ်းလှသော တိုက်ခိုက်မှုကြီးပင်ဖြစ်သည်။ ခရမ်းရောင် နဂါးကြီး၏ နဂါး လက်သည်း လေးဖက်စလုံးမှာ အနက်ရောင် နဂါးကြီး၏ ခန္ဓာကိုယ်ကို တင်းကျပ်စွာ ချိတ်ဆွဲထားလိုက်ပြီး၊ အနက်ရောင် နဂါးကြီးထက် ပိုမို၍ ကြီးမားလှသော နဂါးအမြီးကြီးဖြင့် ပိုမိုပြင်းထန်သော ခွန်အားများနှင့်အတူ အပြင်းအထန် ရိုက်ချလိုက်တော့သည်။

"ဘုန်း"

ထိုအခိုက်အတန့် မျက်တောင်တစ်ခတ် အတွင်းမှာပင် ကောင်းကင်နှင့် မြေကြီး ပြင်းထန်စွာ တုန်ခါသွားခဲ့ပြီး အဆုံးအစမရှိသော တိမ်တိုက်များ၏ အနက်ရှိုင်းဆုံး နေရာတွင် ရှိနေသော ကြယ်တာရာ ကမ္ဘာကြီးတစ်ခုလုံး ပင်လျှင် ထပ်တူ ပြောင်းလဲသွားခဲ့ရာ၊ မရေမတွက်နိုင်သော ကြယ်များမှာ ပြင်းထန်စွာ တုန်ခါသွားခဲ့ပြီး အလင်းရောင်များမှာလည်း တလက်လက် တောက်ပနေတော့သည်။

ဝမ်ချောင်နှင့် အန်းလုရှန်းတို့မှာ ကောင်းသည် ဖြစ်စေ၊ ဆိုးသည် ဖြစ်စေ၊ သူတို့ နှစ်ဦးစလုံးမှာ ကြီးမားလှသော ကံကြမ္မာ စွမ်းအင်များကို ပိုင်ဆိုင်ကာ မွေးဖွားလာခဲ့ကြသူများ ပင်ဖြစ်သည်။ သူတို့ နှစ်ဦး အကြားရှိ တိုက်ပွဲကြီးမှာ ကြယ်တာရာ ကမ္ဘာကြီးတစ်ခုလုံးနှင့်အလယ်ပိုင်း ကုန်းမြေဒေသကြီး၏ အနေအထားကို သေချာပေါက် သက်ရောက်မှု ရှိလာမည် ပင်ဖြစ်သည်။

"ဘုန်း"

နောက်ဆုံးတွင် အနက်ရောင် နဂါးကြီးမှာ တိုက်ပွဲ အတွင်း၌ ရှုံးနိမ့်သွားခဲ့ရပြီး ဝမ်ချောင်၏ ခရမ်းရောင် နဂါးကြီး၏ ကံကြမ္မာ စွမ်းအင်ဖြင့် အပြင်းအထန် ရိုက်ချခံလိုက်ရကာ၊ မြေပြင်ပေါ်သို့ ပြုတ်ကျသွားခဲ့ပြီး ချက်ချင်းပင် အပြင်းအထန် ထိခိုက် ဒဏ်ရာရရှိသွားတော့သည်။ ထိုအရာနှင့်အတူ အန်းလုရှန်းမှာလည်း ယခင်က တစ်ခါမျှ မခံစားဖူးခဲ့သော အပြင်းအထန် ထိခိုက်ဒဏ်ရာများကို ရရှိသွားခဲ့ပြီး မထိန်းနိုင်တော့ဘဲ အလွန်အမင်း နာကျင်နေသော အော်သံကြီးတစ်ခု ထွက်ပေါ်လာတော့သည်။

"အားး ဝမ်ချောင် ငါ မင်းကို လုံးဝ အလွတ်မပေးဘူး"

ဤအော်သံကြီးနှင့်အတူ အန်းလုရှန်း၏ကိုယ်တွင်းမှ လိပ်တက်နေသော ဂန်ချီ စွမ်းအင်များမှာ သမုဒ္ဒရာအလား ပေါက်ကွဲထွက်ပေါ်လာခဲ့ပြီး ဝမ်ချောင်ရှိရာ အရပ်ဆီသို့ အပြင်းအထန် ဝင်တိုက်လိုက်တော့သည်။

သို့သော် ဂန်ချီစွမ်းအင်များ ပေါက်ကွဲထွက်ပေါ်သွားပြီး လိပ်တက်နေသော လေလှိုင်းများမှာ အရပ်လေးမျက်နှာစလုံးကို ဖုံးလွှမ်းသွားခဲ့သည် ဆိုသော်ငြားလည်း၊ ဝမ်ချောင်ရပ်နေခဲ့သော နေရာတွင် လူရိပ် လုံးဝရှိမနေတော့ပါချေ။

ဤမြင်ကွင်းကို မြင်တွေ့လိုက်ရသည့်အခါ အန်းလုရှန်းတစ်ယောက် အသက်ရှူသံများပင် ရပ်တန့်သွားလုမတတ် ဖြစ်သွားတော့သည်။

ထိုအချိန်မှာပင် ဝမ်ချောင်၏အသံမှာ နားထဲသို့ ရုတ်တရက် ဝင်ရောက်လာတော့သည်။ အသံပင်မဆုံးသေးမီ အန်းလုရှန်း၏ နောက်ကျောဘက်တွင် အလွန်အမင်း ကြီးမားလှသော ဖျက်ဆီးခြင်း စွမ်းအားများ ပါဝင်နေသည့် ရွှေဝါရောင် လှံတို တစ်လက်မှာ၊ ပြင်းထန်သည့် အရှိန်အဟုန်နှင့်အတူ ရွှေဝါရောင် နဂါးကြီးတစ်ကောင်အလား အန်းလုရှန်း၏ ရင်ဘတ်ကို ရုတ်တရက် အပြင်းအထန် တိုးဝင်လိုက်တော့သည်။

ဤတိုက်ခိုက်မှု၏ စွမ်းအားကြီးမှာ အလွန်အမင်း ကြီးမားလွန်းလှပြီး အန်းလုရှန်းတိုက်ခိုက်လိုက်ပြီးနောက် ဂန်ချီ စွမ်းအင်များ အားနည်းနေသော အခိုက်အတန့်လေးကို အတိအကျ ရွေးချယ်ပြီး တိုက်ခိုက်လိုက်ခြင်း ပင်ဖြစ်သည်။

သတ္တု အချင်းချင်း ရိုက်ခတ်သော အသံကြီး ထွက်ပေါ်လာခဲ့ပြီးနောက်၊ အန်းလုရှန်း၏ ရင်ဘတ်ပေါ်ရှိ လုံးဝ ဖျက်ဆီး၍ မရနိုင်သော လောကကြီး၏ စစ်သံချပ်ကာအင်္ကျီမှာ ရွှေဝါရောင် လှံတို၏ အပြင်းအထန် ထိုးဖောက်မှုကို ခံလိုက်ရပြီး ချိုင့်ခွက်သွားတော့သည်။ လှံတိုပေါ်ရှိ ကြောက်မက်ဖွယ် ကောင်းလှသော စွမ်းအားများမှာ အဝင်ခံလိုက်ရသည့် မျက်တောင်တစ်ခတ် အတွင်းမှာပင် အပြင်းအထန် ပေါက်ကွဲထွက်ပေါ်လာတော့သည်။

"အားး"

အလွန်အမင်း နာကျင်နေသော အော်ဟစ်သံကြီးတစ်ခု ထွက်ပေါ်လာခဲ့ပြီးနောက် ကြီးမားလှသော ခွန်အား ကြီးက အန်းလုရှန်းတစ်ယောက်လုံးကို ကြိုးပြတ်သွားသော စွန် တစ်ကောင်အလား အဝေးသို့ လွင့်စင်သွားစေခဲ့ပြီး၊ သွေးများမှာ လေထဲတွင် အရပ်လေးမျက်နှာ သို့ လွင့်စင် ပြန့်ကျဲသွားတော့သည်။ ဝမ်ချောင်၏ ဤတိုက်ခိုက်မှုမှာ သူ့ကိုယ်ပေါ်ရှိ လောကကြီး၏ စစ်သံချပ်ကာအင်္ကျီကို ဖျက်ဆီးပစ်လိုက်ရုံ သာမက ထို အလွန်အမင်း စူးရှ ထက်မြက်လှသော ဂန်ချီ စွမ်းအင်များမှာလည်း သူ၏ကိုယ်တွင်းသို့ ထိုးဖောက်ဝင်ရောက်သွားခဲ့ပြီးကိုယ်တွင်း ကိုယ်တွင်းအင်္ဂါများကို မှုန့်မှုန့်ညက်ညက် ကြေမွသွားစေတော့သည်။

"ဝုန်း"

ကောင်းကင်ယံတွင် တိမ်မည်းများ လုံးဝအပြည့်အဝ ဖုံးလွှမ်းသွားခဲ့ပြီး ကြီးမား တုတ်ခိုင်လှသော မိုးကြိုးလျှပ်စီးကြီး တစ်ခုမှာ ကောင်းကင်ယံ မှနေ၍ ရုတ်တရက် အပြင်းအထန် ပစ်ချလာတော့သည်။ ယခု တစ်ကြိမ် တွင် လောကကြီး၏ ဆန္ဒမှာ ဝမ်ချောင်ရှိရာ အရပ်ဆီသို့ ပစ်ချခြင်း မဟုတ်တော့ဘဲ အန်းလုရှန်း၏ကိုယ်တွင်းသို့ တိုက်ရိုက် ပစ်ချလိုက်ခြင်း ပင်ဖြစ်သည်။

ထိုအလွန်အမင်း ကြီးမားလှသော စွမ်းအားကြီးမှာ အန်းလုရှန်း၏ကိုယ်တွင်းသို့ တိုက်ရိုက် စီးဝင်သွားခဲ့ပြီး အလွန်အမင်း ကြီးမားကျယ်ပြန့်လှသော မိုးကြိုးစွမ်းအားများမှာ သူ၏ခန္ဓာကိုယ် အတွင်းရှိ ဆဲလ်များ အားလုံးကို ပြုစု ပျိုးထောင်ပေးကာ သူ၏ ခွန်အားကို အများအပြား မြှင့်တင်ပေးလိုက်တော့သည်။ ဤမျှသာမက ဝမ်ချောင်၏ကိုယ်တွင်းသို့ ထိုးဖောက် ဝင်ရောက်လာသော စူးရှထက်မြက်လှသည့် ဂန်ချီ စွမ်းအင်များကို ပင်လျှင် ဤမိုးကြိုး စွမ်းအားများဖြင့် အပြင်သို့ ပေါက်ကွဲ ထွက်သွားစေတော့သည်။

အန်းလုရှန်း၏သေဆုံးရတော့မည့် အန္တရာယ်ကို နောက်တစ်ကြိမ် ထပ်မံခံစားသိရှိလိုက်ရသည့်အခါ၊ နောက်ဆုံးတွင် လောကကြီး၏ဆန္ဒမှာ မထိန်းနိုင်တော့ဘဲကိုယ်တိုင်ကိုယ်ကျ ဝင်ရောက် စွက်ဖက်လာတော့သည်။

"ဟင်"

ဤမြင်ကွင်းကို မြင်တွေ့လိုက်ရသည့်အခါ ဝမ်ချောင်၏မျက်လုံးသူငယ်အိမ်များပင်လျှင် အနည်းငယ် ကြုတ်သွားတော့သည်။

လောကကြီးဆန္ဒ၏ အတင်းအဓမ္မ စီးဝင်မှုအောက်တွင် အန်းလုရှန်း၏စွမ်းအားမှာ အများအပြား မြင့်တက်လာနေကြောင်းကို သူ ရှင်းလင်းစွာ ခံစားသိရှိနိုင်ပေသည်။ အပြင်ပန်းအားဖြင့် ကြည့်မည်ဆိုပါက ထိုအကာအကွယ်အတားအဆီးကို ဖြတ်ကျော်ပြီး ဂူကောင်းကင်အဆင့်၏ အနေအထား သို့ ရောက်ရှိလုနီးပါး ပင်ဖြစ်နေတော့သည်။

လောကကြီး၏ ဆန္ဒမှာ မိမိကို အပြည့်အဝ မထိခိုက်နိုင်သည့် အခြေအနေမျိုးတွင် ဤကဲ့သို့သော နည်းလမ်းဖြင့် အန်းလုရှန်းကို ကူညီပေးရန်အတွက် တွေးတောမိသွားခဲ့သည် ပေါ့။

"ဝုန်း"

ဝမ်ချောင်ခေတ္တမျှ စဉ်းစား တွေးတောနေသည့် အချိန်လေး အတွင်းမှာပင် မျက်တောင်တစ်ခတ်မျှ အချိန်လေး၌ ဒုတိယမြောက် ကြီးမား တုတ်ခိုင်လှသော မိုးကြိုးလျှပ်စီးကြီးမှာ အန်းလုရှန်း၏ကိုယ်ပေါ်သို့ လျင်မြန်စွာ ပစ်ချလာခဲ့သည်။ ထို့နောက်တွင် တတိယမြောက်၊ စတုတ္ထမြောက်... အဆက်မပြတ် ပစ်ချလာတော့သည်။

ဤကဲ့သို့သော အလွန်အမင်း ရက်စက် ကြမ်းတမ်းလှသည့် မိုးကြိုး စွမ်းအားများ၏ အဆက်မပြတ် စီးဝင်မှု အောက်တွင်၊ အန်းလုရှန်းမှာ ဆံပင်ရှည်ကြီးများ လေထဲတွင် တလွင့်လွင့် လွင့်ပျံနေခဲ့ပြီး ပါးစပ် အတွင်းမှနေ၍ သားရဲ တစ်ကောင်အလား အော်သံကြီးများ အဆက်မပြတ် ထွက်ပေါ်နေတော့သည်။ ထို့ပြင် သူ၏ခန္ဓာကိုယ်ပေါ်တွင် မရေမတွက်နိုင်သော သေးငယ်လှသည့် မိုးကြိုးလျှပ်စီးလေးများ ပေါက်ကွဲထွက်ပေါ်လာခဲ့ပြီး ဤမိုးကြိုးလျှပ်စီးလေးများမှာ ငွေရောင်မြွေများအလား လောကကြီး၏ စစ်သံချပ်ကာအင်္ကျီ၏ မျက်နှာပြင် ပေါ်တွင် လျင်မြန်စွာ ကူးလူးသွားလာနေခဲ့ကာ၊ အန်းလုရှန်း၏ခန္ဓာကိုယ် အပြင်ဘက်တွင် အလွန်အမင်း တောက်ပ လင်းလက်လှသော မိုးကြိုးအလင်းစက်ဝန်းများ တစ်ခုပြီးတစ်ခုကိုပင်လျှင် ဖန်တီးလိုက်တော့သည်။

ထိုမိုးကြိုး အလင်းစက်ဝန်း များ တစ်ခုချင်းစီ တိုင်း တွင် ကြီးမားလှသော တောင်တန်းကြီး တစ်ခုကိုပင်လျှင် လွယ်ကူစွာ မှုန့်မှုန့်ညက်ညက် ကြေမွသွားစေနိုင်သည့် စွမ်းအားများ ပါဝင်နေပေသည်။ လောကကြီး၏ဆန္ဒမှာ ဤကဲ့သို့သော နည်းလမ်းဖြင့် အန်းလုရှန်းကို ကာကွယ်ပေးရန် ကြိုးပမ်းနေခြင်း ပင်ဖြစ်သည်။

"ဟမ့်…အခုထိ အရှုံးမပေးသေးဘူးလား"

ဝမ်ချောင်မှာ ခေါင်းမော့ကာ ကောင်းကင်ယံရှိ မိုးကြိုးတိမ်တိုက် ဝဲဂယက် ကြီးကို တစ်ချက် လှမ်းကြည့်လိုက်တော့သည်။ ယခုအချိန်တွင် ဤအရာမှာ သူနှင့် အန်းလုရှန်း၊ ထို့ပြင် လောကကြီး၏ ဆန္ဒတို့ အကြားရှိ စစ်ပွဲကြီးတစ်ခုအဖြစ်သို့ ပြောင်းလဲသွားခဲ့ပြီ ပင်ဖြစ်သည်။

သို့သော် ထိုသို့ဖြစ်နေသည်ဆိုလျှင်တောင်မှ ဝမ်ချောင်၏ရင်ထဲ၌ အနည်းငယ်မျှ ကြောက်ရွံ့နေခြင်း လုံးဝ မရှိပါချေ။

"ဝမ်ချောင်"

ထိုအချိန်မှာပင် အန်းလုရှန်းမှာ ရုတ်တရက် ပြောဆိုလိုက်တော့သည်။ အမုန်းတရားများနှင့် အလွန်အမင်း ရက်စက်ကြမ်းတမ်းလှသော အရိပ်အယောင်များ ပြည့်နှက်နေသည့် အသံကြီးမှာ ကောင်းကင်နှင့် မြေကြီးတစ်ခုလုံးတွင် ပဲ့တင်ထပ်သွားတော့သည်။ ကောင်းကင်ယံ အမြင့်ပိုင်းတွင် အန်းလုရှန်းမှာ ရုတ်တရက် ခေါင်းမော့လာခဲ့ပြီး ဓားများအလား အလွန်အမင်း စူးရှထက်မြက်လှသော မျက်လုံးအစုံဖြင့် ဝမ်ချောင်ကို စိုက်ကြည့်လိုက်ပြီး မျက်ဝန်းထဲ၌ အဆုံးအစမရှိသော မိုးကြိုးအလင်းတန်းများ ပေါက်ကွဲထွက်ပေါ်နေတော့သည်။

အဆုံးအစမရှိသော မိုးကြိုးလျှပ်စီးများ၏ အဆက်မပြတ် စီးဝင်မှုအောက်တွင် အန်းလုရှန်း၏ စွမ်းအားမှာ ဂူကောင်းကင်အဆင့်၏အစပိုင်း အနေအထားကိုပင်လျှင် ကျော်လွန်သွားခဲ့ပြီဖြစ်ပြီး၊ ဂူကောင်းကင်အဆင့်၏ အဆင့်မြင့်အနေအထားနှင့် အလွန်အမင်း နီးစပ်နေခဲ့ပြီ ပင်ဖြစ်သည်။ ဤသည်မှာ လောကကြီး၏စွမ်းအားက သူ့ကို တိုက်ရိုက် ကူညီပံ့ပိုးပေးထားခြင်း ပင်ဖြစ်သည်။

"မင်းက ငါ့ကို တစ်ကြိမ် ပြီ တစ်ကြိမ် အဆက်မပြတ် ဆန့်ကျင်တိုက်ခိုက်ခဲ့တယ်။ ငါ ပိုင်ဆိုင်ခဲ့သမျှ အရာအားလုံးက မင်းကြောင့် လုံးဝပြိုကွဲပျက်စီးသွားခဲ့ရတယ်၊ တစ္ဆေဆိုးကြီး တစ်ကောင်အဖြစ် ပြောင်းလဲသွားရမယ်ဆိုရင်တောင်မှ မင်းကို သေချာပေါက် ငါနဲ့ အတူတူ သေရအောင် ဆွဲခေါ်သွားမယ်"

အန်းလုရှန်း၏ ခန္ဓာကိုယ်ကြီးတစ်ခုလုံးမှနေ၍ သတ်ဖြတ်လိုစိတ်များမှာ ကောင်းကင်ယံ သို့တိုင်အောင် ပေါက်ကွဲထွက်ပေါ်နေတော့သည်။ သူ၏ရင်ထဲရှိ သတ်ဖြတ်လိုစိတ်များ တစ်စထက်တစ်စ ပိုမိုပြင်းထန်လာသည်နှင့်အမျှ သူ၏ခန္ဓာကိုယ်အပြင်ဘက်ရှိ မိုးကြိုး အလင်းစက်ဝန်းများမှာလည်း တစ်စထက်တစ်စ ပိုတောက်ပလင်းလက်လာခဲ့ပြီး တစ်စထက်တစ်စ ပို၍လှုပ်ရှား သက်ဝင်လာတော့သည်။

ဤအခိုက်အတန့်၌ သူ၏ရှေ့မှောက်တွင် ရှိနေသော ဝမ်ချောင်ကို ကြည့်ရင်း အန်းလုရှန်း၏ကိုယ်ပေါ်မှနေ၍ အလွန်အမင်း ပြင်းထန်လှသော တိုက်ခိုက်လိုစိတ်များ နောက်တစ်ကြိမ် ထပ်မံပေါက်ကွဲထွက်ပေါ်လာတော့သည်။

"ဟုတ်လား။ မင်းက မဟာထန်ကို သစ္စာဖောက်ခဲ့တယ်၊ အလယ်ပိုင်း ကုန်းမြေဒေသကို သစ္စာဖောက်ခဲ့တယ်၊ မင်း တစ္ဆေဆိုးကြီးတစ်ကောင်အဖြစ် ပြောင်းလဲသွားဖို့အတွက် ငါက အခွင့်အရေး ပေးမယ်လို့ ထင်နေတာလား"

"ရုပ်ရော ဝိညာဉ်ပါ လုံးဝအမြစ်ပြတ် ပျောက်ကွယ်သွားတာက မင်းရဲ့နောက်ဆုံး နိဂုံးပဲ၊ ဒီကိစ္စမှာ ဘယ်သူမှ မင်းကို ကူညီနိုင်မှာ မဟုတ်ဘူး"

ဝမ်ချောင်က အေးစက်စက်ဖြင့် ဆိုလိုက်တော့သည်။

"ဝုန်း…"

နောက်ထပ် မိုးကြိုးလျှပ်စီးကြီးတစ်ခုမှာ ကောင်းကင်ယံမှနေ၍ ရုတ်တရက် ပစ်ချလာခဲ့ပြီး အန်းလုရှန်းရှိရာ အရပ်ဆီသို့ ချိန်ရွယ်လာတော့သည်။ သို့သော် ထိုအချိန်မှာပင် အန်းလုရှန်းတိုက်ခိုက်ရန်အချိန်ပင် မရလိုက်မီ ဝမ်ချောင်က ရှေ့သို့ တစ်လှမ်း တိုးကာ အရင်တိုက်ခိုက်လိုက်တော့သည်။

ကျယ်လောင်လှသော နဂါးဟိန်းဟောက်သံကြီးတစ်ခုကို ကြားလိုက်ရပြီး၊ ဝမ်ချောင်၏ကိုယ်ပေါ်မှနေ၍ ဓားချီစွမ်းအင်တစ်ခုမှာ ကောင်းကင်ယံ သို့တိုင်အောင် ပေါက်ကွဲထွက်ပေါ်သွားတော့သည်။ ထိုဓားစွမ်းအင်ကြီးအတွင်း၌မူ ရှေးဟောင်းပုံစံရှိသော ရွှေဝါရောင် ဓားရှည်ကြီး တစ်လက်မှာ အလွန်အမင်း သိသာ ထင်ရှားနေတော့သည်။

ရွှမ်ယွမ် နတ်ဘုရားဓား။

ဝမ်ချောင်မှာ အနည်းငယ်မျှ တွန့်ဆုတ်နေခြင်း လုံးဝမရှိဘဲ ရွှမ်ယွမ် နတ်ဘုရားဓားကို ရုတ်တရက် ပစ်လွှတ်လိုက်တော့သည်။

နောက်တစ်ခဏတွင် လူတိုင်း လုံးဝတွေးတော မှန်းဆမထားမိစေမည့် ကိစ္စကြီးတစ်ခု ဖြစ်ပျက်လာတော့သည်။ ထိုကြီးမားလှသော မိုးကြိုးလျှပ်စီးကြီးမှာ မူလက အန်းလုရှန်းရှိရာ အရပ်ဆီသို့ ချိန်ရွယ်ထားပြီး သူ၏စွမ်းအားများကို မြှင့်တင်ပေးရန်အတွက် ဖြစ်သည်။ သို့သော် လမ်းတစ်ဝက်တွင် တစ်စုံတစ်ခု၏ ဆွဲဆောင်မှုကို ခံလိုက်ရသည့်အလား ထိုဧရာမ မိုးကြိုးလျှပ်စီးကြီးမှာ ရုတ်တရက် ကွေ့ကောက်သွားခဲ့ပြီး လမ်းကြောင်း ပြောင်းသွားကာ ရွှမ်ယွမ် နတ်ဘုရားဓား အပေါ်သို့ ရုတ်တရက် အပြင်းအထန် ဝင်တိုက်လိုက်တော့သည်။

ကြီးမားလှသော တောင်တန်းကြီး တစ်ခုကိုပင်လျှင် ဖျက်ဆီးပစ်နိုင်လောက်အောင် ကြောက်မက်ဖွယ် ကောင်းလှသည့် ထိုမိုးကြိုးလျှပ်စီးကြီးမှာ ရွှမ်ယွမ် နတ်ဘုရားဓား နှင့် ထိတွေ့လိုက်သည်နှင့် တစ်ပြိုင်နက်တည်းတွင် မြစ်ပေါင်းစုံ သမုဒ္ဒရာအတွင်းသို့ စီးဝင်သွားသည့်အလား စွမ်းအားများအားလုံးမှာ ရွှမ်ယွမ် နတ်ဘုရားဓား၏ လုံးဝအပြည့်အဝ စုပ်ယူခြင်းကို ခံလိုက်ရတော့သည်။

ရွှမ်ယွမ် နတ်ဘုရားဓားမှာ ထိုစွမ်းအားများကို ရရှိလိုက်သည်နှင့် တစ်ပြိုင်နက်တည်းတွင် အလင်းရောင်များ အလွန်အမင်း တောက်ပလာခဲ့ပြီး ဓားကိုယ်ထည်ကြီးတစ်ခုလုံးမှာ အပြာရောင် နေမင်းကြီးတစ်စင်းအဖြစ်သို့ ချက်ချင်း ပြောင်းလဲသွားတော့သည်။

"ငါ့ရဲ့ ဓားတစ်ချက်ကို ခံကြည့်လိုက်စမ်း"

ဝမ်ချောင်၏အသံမှာ ပတ်ဝန်းကျင်တစ်ခုလုံးတွင် လွင့်ပျံနေခဲ့ပြီး ကောင်းကင်နှင့်မြေကြီး တစ်ခုလုံးတွင် ပဲ့တင်ထပ်နေတော့သည်။ အသံထွက်ပေါ်လာသည့်အချိန်နှင့် တစ်ပြိုင်နက်တည်းတွင် ကောင်းကင်ယံ၌ မည်းမှောင်နေသော ရွှေဝါရောင် ဟင်းလင်းပြင်နှင့်အချိန် အလင်းစက်ဝန်းကြီးတစ်ခု လျှပ်တစ်ပြက် ထွက်ပေါ်လာခဲ့ပြီးနောက် မိုးကြိုးများ အလွန်အမင်း တောက်ပလင်းလက်နေသော ရွှမ်ယွမ် နတ်ဘုရားဓားမှာ ချက်ချင်း ပျောက်ကွယ်သွားတော့သည်။

ရွှမ်ယွမ် နတ်ဘုရားဓား နောက်တစ်ကြိမ် ထပ်မံပေါ်ထွက်လာသည့် အချိန်တွင်မူ ဝမ်ချောင်နှင့် အတူတူ အန်းလုရှန်း၏ ရှေ့မှောက်တွင် ပေါ်ထွက်လာခဲ့ပြီးဖြစ်ကာ အန်းလုရှန်းရှိရာ အရပ်ဆီသို့ အပြင်းအထန် ခုတ်ပိုင်းချလိုက်တော့သည်။

ဝမ်ချောင်၏ စွမ်းအားများ၊ ရွှမ်ယွမ် နတ်ဘုရားဓား၏ စွမ်းအားများနှင့် လောကဆန္ဒ၏ မိုးကြိုးစွမ်းအားများအားလုံး ပေါင်းစပ်သွားသည့်အခါတွင်၊ ဤတိုက်ခိုက်မှုကြီး၏ စွမ်းအားကြီးမှာ တွေးတော မှန်းဆ၍ပင် မရနိုင်လောက်အောင် အလွန်အမင်း ကြီးမားလွန်းလှပေသည်။

ဝမ်ချောင်အနေဖြင့် လောကကြီးဆန္ဒ၏စွမ်းအားများကို အတင်းအဓမ္မ လုယူပြီး အန်းလုရှန်းကိုကိုင်တွယ် ဖြေရှင်းရန်အတွက် အသုံးပြုလိမ့်မည်ဟု လောကကြီး၏ဆန္ဒပင်လျှင် လုံးဝ တွေးတော မှန်းဆထားခဲ့မည် မဟုတ်ပါချေ။

ကြီးမားလှသော မိုးကြိုးလျှပ်စီးကြီးများ တစ်ခုပြီးတစ်ခု မိုးကြိုးတိမ်တိုက် ဝဲဂယက်ကြီး အတွင်းမှနေ၍ ပေါက်ကွဲထွက်ပေါ်လာတော့သည်။ ဝမ်ချောင်၏ အလွန်အမင်း ရဲတင်းလွန်းလှသော လုပ်ရပ်ကို မြင်တွေ့လိုက်ရသည့်အခါ လောကကြီး၏ဆန္ဒပင်လျှင် ဤအခိုက်အတန့်၌ ဒေါသတကြီး ဟိန်းဟောက်နေတော့သည်။ သို့သော် မည်မျှပင် ဒေါသထွက်နေပါစေ ဝမ်ချောင်ကို လုံးဝ တားဆီးနိုင်စွမ်း မရှိတော့ပါချေ။

"ဂျွတ်"

ဝမ်ချောင်၏ ထိုဓားချက်ကြီးမှာ ပြင်းထန်လှသောအရှိန်အဟုန်နှင့်အတူ လုံးဝဖျက်ဆီး၍ မရနိုင်သော ကြီးမားလှသည့် စွမ်းအားများ ဖြင့် အန်းလုရှန်း၏ ခေါင်းပေါ်သို့ အပြင်းအထန် ခုတ်ပိုင်းချလိုက်တော့သည်။

"လာစမ်းပါ။ အတူတူ သေကြတာပေါ့"

အန်းလုရှန်း၏ အလွန်အမင်း ရက်စက် ကြမ်းတမ်းလှသော အော်ဟစ်သံကြီးမှာ လေဟာနယ်တစ်ခုလုံးတွင် ပဲ့တင်ထပ်သွားတော့သည်။ ဝမ်ချောင်၏ ဤဓားချက် ကြီးကို ရင်ဆိုင်ရာတွင် အန်းလုရှန်းမှာ အနည်းငယ်မျှ ကြောက်ရွံ့နေခြင်း လုံးဝမရှိဘဲ၊ ရှိသမျှ ခွန်အားအားလုံးကို အကုန်ထုတ်၍ ဝမ်ချောင်ရှိရာ အရပ်ဆီသို့ အပြင်းအထန် တိုက်ခိုက်လိုက်တော့သည်။

******