အခန်း ၁၀၃၆

အခန်း (၁၀၃၆) - အန္တရာယ်

ယီယွင်၏ အသိစိတ်သည် နတ်ဘုရားသစ်ပင်နှင့် လုံးဝ ပေါင်းစပ်သွားသောအခါ နတ်ဘုရားသစ်ပင် ပိုင်ဆိုင်ထားသည့် ကြီးမားလှသော အသက်စွမ်းအားကို အပြည့်အဝ နားလည်လာသည်။

နတ်ဘုရားသစ်ပင်၏ အင်အားမှာ အဆုံးမရှိသော သမုဒ္ဒရာကြီးနှင့် တူပြီး ယီယွင်မှာ ထိုသမုဒ္ဒရာထဲတွင် မျောပါနေသည့် သေးငယ်လှသော လှေငယ်တစ်စင်းသာ ဖြစ်သည်။ သူသည် အလွန်ပင် သေးငယ်လွန်းလှသည်။

သူ၏ ခန္ဓာကိုယ်အတွင်းရှိ ခရမ်းရောင်သလင်းကျောက် မှာ နတ်ဘုရားသစ်ပင်နှင့် ပေါင်းစပ်သွားပြီဖြစ်သော်လည်း နတ်ဘုရားသစ်ပင်၏ အနှစ်သာရမှာ နှစ်ပေါင်း သန်းနှင့်ချီ၍ နှစ်နှစ်ခြိုက်ခြိုက် အိပ်ပျော်နေခဲ့သည်။ ခရမ်းရောင်သလင်းကျောက် ကို ထိန်းချုပ်နိုင်သူ ဖြစ်သော်ငြား ယီယွင်မှာ နတ်ဘုရားသစ်ပင်ကို နိုးထစေရန် မစွမ်းသာပေ။

"ငါ အားနည်းလွန်းလို့လား"

ယီယွင်သည် ဧရာမ အမြစ်ကွန်ရက်များ ဝန်းရံထားသော ကမ္ဘာ့အုတ်မြစ်ကျောက် ကို အာရုံခံလိုက်သည်။

သူသာ နတ်ဘုရားသစ်ပင်ကို နိုးထစေနိုင်ပါက နတ်ဘုရားသစ်ပင်၏ အသက်စွမ်းအားများက ထိုအမြစ်များမှတစ်ဆင့် ကမ္ဘာ့အုတ်မြစ်ကျောက် ထံ စီးဆင်းသွားမည်ဖြစ်သည်။

သို့သော် ယခုအခါ ကမ္ဘာ့အုတ်မြစ်ကျောက် မှာ အက်ကွဲကာ ပြိုလဲနေပြီး ယီယွင်မှာ နတ်ဘုရားသစ်ပင်ကို နိုးထအောင် မပြုလုပ်နိုင်သေးပေ။ အပြင်ဘက်တွင် မင်္ဂလာမိုးစက် နတ်ဘုရား တို့ အသေအကြေ တိုက်ပွဲဆင်နွှဲနေချိန်တွင် ယီယွင်၏ ပခုံးပေါ်တွင် တာဝန်များ ပိနေသည်။

ယီယွင် အသက်ကို ပြင်းပြင်းရှူထုတ်လိုက်သည်။ သူ၏ စိတ်စွမ်းအားများမှာ အလွန်ထူထဲသော နံရံတစ်ခုကို တိုက်ခိုက်နေသကဲ့သို့ပင်။ သူ၏ စွမ်းအားများသည် အလဟဿ ဖြစ်နေပြီး နတ်ဘုရားသစ်ပင်မှာ မနိုးထသေးပေ။

"မလုံလောက်သေးဘူး....."

ယီယွင်သည် သူ၏ စိတ်စွမ်းအား တိုက်ခတ်မှုတိုင်းမှ ဖြစ်ပေါ်လာသော နာကျင်မှုများကို ကြိတ်မှိတ်ခံစားနေသည်။ သူ၏ နဖူးပေါ်တွင် ချွေးစက်များဖြင့် ပြည့်နှက်နေသည်။ ဘေးတွင်ရှိနေသော ယွဲ့ရင်းရှာနှင့် ချူဟဲ တို့သည် ယီယွင်၏ အခြေအနေကို စိုးရိမ်စွာ ကြည့်နေကြသည်။

ယီယွင်မှာ အလင်းရောင်များဖြင့် လွှမ်းခြုံထားသော်လည်း နတ်ဘုရားသစ်ပင်ထံမှ တုံ့ပြန်မှု မရှိပေ။ ဤအတိုင်းသာ ဆက်သွားပါက ယီယွင်၏ စွမ်းအားများ ကုန်ခန်းသွားလိမ့်မည်။

"အစ်မ၊ ဘာလုပ်ကြမလဲ..." ချူဟဲ က စိုးရိမ်တကြီး မေးသည်။

ယွဲ့ရင်းရှာမှာ ဆုတောင်းနေသည်။ "လွန်ခဲ့တဲ့ နှစ်သန်းပေါင်း ၁၀၀ တုန်းက မြင့်မြတ်သောကျင့်ကြံသူက နိုးထစေနိုင်ခဲ့ပေမဲ့ အခုတော့ မြစိမ်းသစ်သား မဟာကမ္ဘာ ပျက်စီးဖို့ နီးကပ်လာနေပြီ။

ဒါကို နိုးထစေဖို့က အရင်ကထက် ပိုခက်ခဲနေမှာ အသေအချာပဲ..." ဟု ယွဲ့ရင်းရှာ ရေရွတ်သည်။

သူမ၏ စိတ်ထဲတွင် ယီယွင် အောင်မြင်နိုင်ပါ့မလားဟု မေးခွန်းထုတ်စပြုလာသည်။

အပြင်ဘက် ကမ္ဘာတွင်.....

"ဟိန်း....."

ဧရာမလူသားသည် သူ၏ ရဲတင်းကြီးဖြင့် အားကုန်ခုတ်ချလိုက်ရာ နတ်ဘုရား အလင်းတန်းများနှင့် တိုက်မိပြီး ပြင်းထန်သော စွမ်းအားလှိုင်းများ ပေါက်ကွဲသွားသည်။ ဖေးမိစ္ဆာဂိုဏ်း မှ ပုဂ္ဂိုလ်များမှာ မြေပြင်ပေါ်သို့ အပြင်းအထန် ပစ်ချခံလိုက်ရသည်။

"ဧရာမလူသားက မရဏမြစ် ရဲ့ ရေကို စုပ်ယူနေတာ။ နတ်ဘုရားသစ်ပင်ရဲ့ ချုပ်နှောင်မှုကလည်း အားနည်းသွားပြီ။ ငါတို့ အခြေအနေ ဆိုးနေပြီ....." ဟု ရှီးရွှမ်ကျီ က ပြောသည်။

"မိုးစက်နတ်ဘုရား၊ မင်းရဲ့ တပည့် လျှို့ဝှက်ဇုန်ထဲ ရောက်နေတာ မဟုတ်ဘူးလား ဘာလို့ ဘာမှ မဖြစ်လာတာလဲ" ရှီးရွှမ်ကျီ က မေးသည်။

"ဟွန့်..... ဥပဒေသဖော်ဆောင်ခြင်း အဆင့်တောင် မရောက်သေးတဲ့ တပည့်တစ်ယောက်ကို ငါတို့ အသက်တွေ ပုံအပ်လိုက်တာက အစကတည်းက မှားနေတာ" နတ်ဆိုးမျက်လုံးသခင် က ဒေါသတကြီး ပြောသည်။

"ညည်းတွားနေလို့ မရဘူး။ အခု ငါတို့ လုပ်နိုင်တာက ဧရာမလူသားကို ဆက်ထိန်းထားပြီး ယီယွင်အတွက် အချိန်ဆွဲပေးဖို့ပဲ" မင်္ဂလာမိုးစက် နတ်ဘုရား က အေးစက်စွာ ပြောသည်။

"ငါတို့ ကြာကြာ မခံနိုင်တော့ဘူး။ မင်းတပည့်သာ နတ်ဘုရားသစ်ပင်ကို မနိုးထစေနိုင်ရင် ငါတို့ ဒီနေရာကနေ ဆုတ်ခွာရလိမ့်မယ်" နတ်ဆိုးမျက်လုံးသခင် က ပြောသည်။

မင်္ဂလာမိုးစက် နတ်ဘုရား က "နတ်ဆိုးမျက်လုံး၊ မင်း ဘာပြောလိုက်တာလဲ ငါ့တပည့်သာ အဲဒီမှာ ရှိနေတာ။ ငါတို့ ဆုတ်ခွာသွားရင် ငါ့တပည့် ဘာဖြစ်သွားမလဲဆိုတာ မင်းသိလား....." ဟု အော်ပြောသည်။

ဧရာမလူသားမှာ အလွန်ကြောက်မက်ဖွယ်ကောင်းသည်။ သူသာ နတ်ဘုရားသစ်ပင်ကို ခုတ်ဖြတ်လိုက်ပါက ဂူထဲရှိ ယီယွင်မှာ ပြင်းထန်သော တုန်ခါမှုကြောင့်ပင် သေဆုံးနိုင်ဖွယ်ရှိသည်။

ဘုန်း..... ဘုန်း..... ဘုန်း.....

အပြင်ဘက်မှ တိုက်ပွဲကြောင့် တောင်များ ပြိုလဲနေသော်လည်း ဂူအတွင်းရှိ ကမ္ဘာငယ်မှာမူ တည်ငြိမ်နေဆဲဖြစ်သည်။ ယီယွင်သည် နတ်ဘုရားသစ်ပင်၏ အသိစိတ်နှင့် တိုက်ခိုက်ရင်း ကြိုးပမ်းနေသည်။

သူ၏ စိတ်စွမ်းအားများ တိုက်ခတ်မှုတိုင်းမှာ သူ့ကိုယ်သူ နတ်ဘုရားသစ်ပင်၏ အသိစိတ်ထဲသို့ နှစ်မြုပ်သွားစေမည့်အလား ခံစားရသည်။ သို့သော် ခရမ်းရောင်သလင်းကျောက် ၏ အကာအကွယ်ကြောင့် ယီယွင်၏ စိတ်စွမ်းအားမှာ မပြိုကွဲသေးပေ။

ယီယွင်၏ စွမ်းအားများမှာ တဖြည်းဖြည်း နည်းပါးလာသည်။ အောင်မြင်နိုင်ခြေမှာလည်း နည်းပါးလာသော်လည်း ယီယွင်သည် သူ၏ စိတ်ဓာတ်မှာ ပိုမိုခိုင်မာလာသည်ဟု ခံစားရသည်။

သူ၏ ယွမ်ချီများမှာ ပိုမိုစုစည်းလာသည်။ နတ်ဘုရားသစ်ပင်၏ ကြီးမားသော စွမ်းအားများသည် ယီယွင်ကို မီးဖြင့် ပုံသွင်းနေသည့် သတ္တုတစ်စကဲ့သို့ တိုက်ခတ်နေသည်။ သူသည် သာမန် သတ္တုမှ ထက်မြက်သော ဓားတစ်ချောင်းအဖြစ် ပြောင်းလဲလာသည်။

"ဘုန်း....."

ယီယွင်၏ စိတ်စွမ်းအားများ တဖန် ပေါက်ကွဲသွားသည်။ သူ၏ မျက်နှာမှာ ဖြူဖျော့သွားသည်။

"နောက်တစ်ခါ....." ယီယွင်သည် သူ၏ ဖျက်စီးခြင်းဥပဒေသ ကို ထုတ်လွှတ်လိုက်ပြီး ပျက်စီးခြင်း၏ အငွေ့အသက်များကို သူ၏ ခန္ဓာကိုယ်မှတစ်ဆင့် ပြန့်နှံ့စေလိုက်သည်။