အခန်း ၆၂

အခန်း (၆၂) ဒီလူက ဘယ်သူလဲ

"နောက်ငါးနှစ်နေရင်ရော... နင် ဒီလောက်အထိ ရောက်လာနိုင်ပါ့မလား..."

ချန်မုသည် ချန်ယောင်ကို သတိရသွားပြီးနောက် ခေါင်းကို ခပ်ဖွဖွ ခါယမ်းလိုက်မိသည်။

အရမ်းခက်ခဲလှသည်။ ဤကဲ့သို့သော အဆင့်ရှိသည့် ပါရမီရှင်များမှာ အရင်းအမြစ်များ ပုံအောပေးရုံဖြင့် ပျိုးထောင်၍ ရနိုင်သည် မဟုတ်ပေ။ မဟုတ်ပါက ရွှမ်ကော်စံအိမ်တော်သည် အဆင့် ၄ အစောင့်အရှောက် တစ်ဦးသာ ရှိသည့် အခြေအနေအထိ ကျဆင်းသွားမည် မဟုတ်ချေ။

ချန်မုသည် နေရာအနည်းငယ် ဖယ်ပေးလိုက်သည်။ လင်းယွဲ့တို့၏ တိုက်ပွဲကို ဝင်ရောက်စွက်ဖက်ရန် စိတ်ဝင်စားမှု မရှိသကဲ့သို့၊ ပါဝင်ပတ်သက်ရန်လည်း စိတ်ကူးမရှိချေ။ သူသည် ချောက်ကမ်းပါး အစွန်းတစ်နေရာသို့ တိတ်ဆိတ်စွာ သွားရပ်လိုက်ပြီး အောက်ဘက်မှ ရေစီးကြောင်းများကိုသာ ကြည့်နေတော့သည်။

ကျင့်လင်ယွမ်ပုလဲများ ဖြစ်ပေါ်လာသည့် လုပ်ငန်းစဉ်က သူ့အတွက် ပို၍ စိတ်ဝင်စားစရာ ကောင်းနေသည်။

သို့သော်လည်း ချန်မုသည် မြစ်ရေထဲမှ အခြေအနေများကို စူးစမ်းနေစဉ်မှာပင်...

ဝေးကွာသော နေရာမှနေ၍ လူတိုင်းကို အထင်သေးသည့်ပုံစံမျိုးဖြင့် ပြင်းထန်လှသော သိုင်းစိတ်ဆန္ဒတစ်ခု ရောက်ရှိလာပြန်သည်။

"ထူယွဲ့ပဲ..."

"သူ နောက်ဆုံးတော့ ရောက်လာပြီ..."

လူအများအပြားမှာ ချက်ချင်းပင် ထိုဘက်သို့ လှမ်းကြည့်လိုက်ကြသည်။

မကြာသေးမီ အချိန်ကာလအတွင်းက ဂိုဏ်းကြီးများမှ ပါရမီရှင်များထဲတွင် မည်သူသည် နာမည်အကြီးဆုံး ဖြစ်သနည်းဟု မေးလျှင်၊ လင်းယိဂိုဏ်း၏ တပည့်ရင်းဖြစ်သူ၊ ဂိုဏ်း၏ ကိုယ်စားလှယ် ထူယွဲ့ ဖြစ်သည်မှာ သံသယဖြစ်ဖွယ် မရှိချေ။

ပထမဦးစွာ ဖူထျန်းဂိုဏ်းမှ လင်ရှီကို အနိုင်ယူခဲ့သည်။ ထို့နောက် ကွေ့ယွမ်ဓားအိမ်တော်မှ လင်းမော့၏ ဓားသုံးချက်ကို ခုခံနိုင်ခဲ့ပြီး သရေကျခဲ့သည်။

လွန်ခဲ့သော ရက်အနည်းငယ်ကလည်း ချီယွန်းဂိုဏ်းမှ ဖုန်းလန်နှင့် အပြင်းအထန် တိုက်ခိုက်ခဲ့ပြီးနောက် သရေကျခဲ့သော်လည်း၊ သတင်းများအရ ထူယွဲ့က အနည်းငယ် ပို၍ သာလွန်သည်ဟု ဆိုကြသည်။ အကယ်၍ ဆက်လက်တိုက်ခိုက်မည်ဆိုပါက ထူယွဲ့ ဒဏ်ရာအပြင်းအထန် ရရှိပြီး ဖုန်းလန် သေဆုံးသွားမည် ဖြစ်ကြောင်း ခန့်မှန်းကြသည်။

ထူယွဲ့ ရောက်ရှိလာခြင်းက အနားတစ်ဝိုက်ရှိ သိုင်းသမားများကိုသာမက၊ တိုက်ခိုက်နေကြသော ဂိုဏ်းကြီးများမှ ပါရမီရှင်များကိုပါ ခဏတာ ရပ်တန့်သွားစေပြီး လူတိုင်း၏ အကြည့်မှာ သူ့ထံသို့ ရောက်ရှိသွားတော့သည်။

"သူ့ရဲ့ သိုင်းစိတ်ဆန္ဒတွေ ပိုပြီး အားကောင်းလာပြန်ပြီ..." လင်းမော့က မျက်ခုံးကို အနည်းငယ် တွန့်ချိုးလိုက်သည်။

သူ၏ ဓားသုံးချက်ကို ထူယွဲ့ ခုခံခဲ့စဉ်က ထူယွဲ့၏ သိုင်းစိတ်ဆန္ဒမှာ ယခုလောက် ကြောက်စရာ မကောင်းသေးပေ။ သို့သော် ယခုအခါတွင်မူ သူ၏ ဓားစိတ်ဆန္ဒကိုပင် လှုပ်ခတ်သွားစေပြီး သူ့ကို အလိုအလျောက် ခုခံချင်စိတ်များပင် ဖြစ်ပေါ်လာစေသည်။

ထင်ရှားသည်မှာ လွန်ခဲ့သော ရက်အနည်းငယ်က ဖုန်းလန်နှင့် တိုက်ပွဲတွင် ဖုန်းလန်ကို အသုံးချကာ သူ၏ သိုင်းစိတ်ဆန္ဒကို ပိုမို ထက်မြက်လာအောင် သွေးခဲ့ခြင်းပင် ဖြစ်သည်။ ယခုအခါတွင်မူ မည်သူ့ကိုမျှ ဂရုမစိုက်ဘဲ တစ်လောကလုံးတွင် ပြိုင်ဘက်ကင်းသကဲ့သို့ ဖြစ်နေပြီ ဖြစ်သည်။

"..."

ဖုန်းလန်၏ မျက်နှာမှာလည်း မှောင်မိုက်သွားခဲ့သည်။

ထိုနေ့က တိုက်ပွဲကိုသာ ဆက်လက်တိုက်ခိုက်ခဲ့မည်ဆိုပါက သူသေဆုံးပြီး ထူယွဲ့ ဒဏ်ရာအပြင်းအထန် ရရှိမည်မှာ သေချာလှသည်။ ထို့ကြောင့် သူသည် ထူယွဲ့အတွက် ခြေနင်းခုံ တစ်ခု ဖြစ်သွားခဲ့ပြီး ထူယွဲ့က သူ့ကို အသုံးချကာ သိုင်းစိတ်ဆန္ဒကို သွေးသွားခဲ့ခြင်း ဖြစ်သည်။

ရင်ထဲတွင် မကျေမနပ် ဖြစ်နေသော်လည်း၊ ယခုအချိန်တွင် ထူယွဲ့နှင့် ထပ်မံ ယှဉ်ပြိုင်တိုက်ခိုက်မည်ဆိုပါက သူ၏ အရှုံးက ပိုမို ကြီးမားသွားမည်ကို ဖုန်းလန် ကောင်းစွာ သိရှိထားသည်။

သိုင်းစိတ်ဆန္ဒ ဆိုသည်မှာ ရေဆန်ကို လှော်ခတ်နေရသကဲ့သို့ပင် ဖြစ်သည်။ ရှေ့သို့ မတက်နိုင်ပါက နောက်သို့ ပြန်ဆုတ်သွားမည်သာ ဖြစ်သည်။

ဝေမြစ်ရေလှိုင်းမှ ပေါ်ထွက်လာသည့် ကျင့်လင်ယွမ်ပုလဲများသည် အဆင့် ၅ သိုင်းသမားများအတွက် အသုံးဝင်သော်လည်း၊ ဤနေရာသို့ လာရောက်ကြသည့် အဆင့် ၅ သိုင်းသမား အရေအတွက်မှာ အဘယ်ကြောင့် များပြားလှခြင်း မရှိသနည်း။

အဘယ်ကြောင့်ဆိုသော် များပြားလှသော အဆင့် ၅ သိုင်းသမားများသည် ဤအဆင့်တွင် ကြာမြင့်စွာ ရပ်တန့်နေခဲ့ကြသဖြင့်၊ သူတို့၏ သိုင်းစိတ်ဆန္ဒများမှာ တုံးသွားခဲ့ပြီ ဖြစ်သည်။ ထက်မြက်မှုများ မရှိတော့သလို၊ အဆင့် ၄ သို့ တက်လှမ်းနိုင်မည့် အခွင့်အရေးများလည်း ဆုံးရှုံးသွားခဲ့ပြီ ဖြစ်သောကြောင့်ပင်။

အဆင့် ၄ သို့ တက်လှမ်းနိုင်မည့် အခွင့်အရေး မရှိတော့သည့်နောက်တွင် အသက်အန္တရာယ်ကို ပမာမထားဘဲ ကျင့်လင်ယွမ်ပုလဲကို လာရောက်လုယူခြင်းမှာ အဓိပ္ပာယ် မရှိတော့ပေ။

ဤနေရာသို့ လာရောက်ကြသည့် အဆင့် ၅ နှင့် အဆင့် ၆ သိုင်းသမား အများစုမှာ လူငယ်များသာ ဖြစ်ကြပြီး၊ သူတို့သည် ယုံကြည်ချက်၊ စိတ်ဓာတ်ခိုင်မာမှုနှင့် သွေးဆူလွယ်မှုတို့ဖြင့် သိုင်းလမ်းစဉ်တွင် ဆက်လက်လျှောက်လှမ်းလိုကြသူများ ဖြစ်ကြသည်။

မလှမ်းမကမ်းတွင်... လင်ရှီက သက်ပြင်းတစ်ချက် ချလိုက်သည်။

အကယ်၍ သူသာ ထိုတိုက်ပွဲတွင် ထူယွဲ့ကို မရှုံးနိမ့်ခဲ့ဘဲ အနိုင်ရရှိခဲ့မည်ဆိုပါက၊ ထူယွဲ့၏ သိုင်းစိတ်ဆန္ဒမှာ အနှောင့်အယှက် ဖြစ်သွားမည်ဖြစ်ပြီး ယခုကဲ့သို့ ဆက်တိုက် အနိုင်ရနေမည် မဟုတ်ချေ။ ဖြစ်နိုင်သည်မှာ ဆက်တိုက် ရှုံးနိမ့်သွားနိုင်ခြေပင် ရှိပေသည်။

"သိုင်းလမ်းစဉ် ဆိုတာ အမြဲတမ်း အဆင်ပြေချောမွေ့နေတာ မဟုတ်ပါဘူး။ ဒီနှစ်ပေါင်း ခုနစ်ရာအတွင်းမှာ သိုင်းအထွတ်အထိပ်ကို ရောက်ရှိသွားကြတဲ့ သိုင်းသူတော်စင် ရှစ်ယောက်စလုံးကလည်း အမြဲတမ်း ပြိုင်ဘက်ကင်းနေတာ မဟုတ်ပါဘူး။ ရှုံးနိမ့်မှုတွေနဲ့ ကြုံတွေ့ခဲ့ရပေမယ့် ပြန်လည် ထကြွလာနိုင်ခဲ့ကြသူတွေချည်းပါပဲ..." လင်းယွဲ့သည် မည်သည့်အချိန်က ရောက်လာမှန်းမသိဘဲ အနီးနားမှ တိုးတိုးလေး ပြောလိုက်သည်။

"အင်း..." လင်ရှီက ခေါင်းညိတ်လိုက်သည်။

လင်းယွဲ့သည် လင်ရှီကို တစ်ချက်ကြည့်ပြီးနောက် အကြည့်ကို ရုပ်သိမ်းလိုက်သည်။ သူမနှင့် လင်ရှီတို့ နှစ်ဦးစလုံးမှာ ဖူထျန်းဂိုဏ်းမှ တပည့်ရင်းများ ဖြစ်ကြသော်လည်း၊ ရင်းနှီးသော မောင်နှမများကဲ့သို့ မဟုတ်ကြချေ။ ယခုကဲ့သို့ သတိပေးစကား ပြောလိုက်ခြင်းမှာလည်း ဂိုဏ်းတူဖြစ်နေသောကြောင့်သာ ဖြစ်သည်။

ထူယွဲ့၏ အရှိန်အဝါမှာ ကြီးမားလာပြီဖြစ်ရာ ၎င်းကို တားဆီးရန် ခက်ခဲသွားပြီဖြစ်ကြောင်း လင်ရှီ နားလည်ထားသည်။ ထို့ကြောင့် ထိုအရာများအပေါ်တွင် စွဲလမ်းမနေတော့ဘဲ မိမိ၏ မူလစိတ်ထားကိုသာ ခိုင်မာအောင် ထိန်းသိမ်းထားနိုင်ပါက၊ နောက်ပိုင်းတွင် ပြန်လည်ကျော်တက်နိုင်မည့် အခွင့်အရေးများ ရှိနေသေးကြောင်း သူ သဘောပေါက်သွားသည်။

လူအများ၏ အကြည့်များအောက်တွင် ထူယွဲ့သည် ဝေမြစ်ကမ်းပါးသို့ ခြေလှမ်းမှန်မှန်ဖြင့် လျှောက်လာသည်။

သူ၏ အနီးတစ်ဝိုက်မှာ တိတ်ဆိတ်နေသည်။ မည်သူကမျှ လာရောက်စိန်ခေါ်ခြင်း မရှိချေ။

ထူယွဲ့သည် အရှိန်အဝါ ကြီးမားနေပြီ ဖြစ်ကြောင်း လူတိုင်း သိကြသည်။ ယခုအချိန်တွင် သူ့ကို သွားရောက် စိန်ခေါ်ခြင်းမှာ အချည်းနှီး ခြေနင်းခုံ ဖြစ်သွားစေရန်သာ ရှိပေသည်။ အချင်းချင်း ယှဉ်ပြိုင်တိုက်ခိုက်၍ သိုင်းစိတ်ဆန္ဒများကို သွေးပြီး နောက်ထပ်တစ်ဆင့်သို့ ရောက်ရှိသွားချိန်မှသာ ထူယွဲ့နှင့် ယှဉ်ပြိုင်ရန် အကောင်းဆုံးအချိန် ဖြစ်ပေမည်။

ထူယွဲ့ ကိုယ်တိုင်လည်း ဤအချက်ကို သိထားသဖြင့် သူလည်း အလောတကြီး မရှိချေ။ သူသည် မြစ်ကမ်းပါးတွင် ရပ်ကာ မျက်လုံးများကို မှိတ်ထားပြီး အခြားသူများ၏ တိုက်ပွဲများကို ဂရုမစိုက်ဘဲ တည်ငြိမ်စွာ လက်ကို နောက်ပစ်၍ ရပ်နေတော့သည်။

သူ စောင့်နေရန်သာ လိုသည်။

အခြားသူများက သိုင်းစိတ်ဆန္ဒများကို သွေးကာ အရှိန်အဝါ အပြည့်အဝဖြင့် သူ့ကို လာရောက်စိန်ခေါ်မည့်အချိန်ကို စောင့်နေခြင်း ဖြစ်သည်။ ထိုအခါမှသာ သူက အစွမ်းကုန် တိုက်ခိုက်ပြီး သူတို့ကို အနိုင်ယူကာ သူ၏ အရှိန်အဝါကို အထွတ်အထိပ်သို့ ရောက်ရှိစေပြီး အဆင့် ၅ တွင် ပြိုင်ဘက်ကင်းသူအဖြစ် သက်သေပြမည် ဖြစ်သည်။

ဤသို့ ပြုလုပ်နိုင်ပါက အနာဂတ်တွင် အဆင့် ၄ သို့မဟုတ် အဆင့် ၃ သို့ တက်လှမ်းရန်အတွက် များစွာ အထောက်အကူ ဖြစ်စေမည် ဖြစ်သည်။

ထူယွဲ့ ရောက်ရှိလာခြင်းကြောင့် ဝေမြစ်ကမ်းပါးနှစ်ဖက်ရှိ တိုက်ပွဲများမှာ ခဏတာ ရပ်တန့်သွားခဲ့သော်လည်း၊ နောက်ပိုင်းတွင် ပို၍ပင် ပြင်းထန်လာတော့သည်။

နောက်ပိုင်းမှ ရောက်ရှိလာကြသည့် မြို့တော်မှ လူငယ်ပါရမီရှင်များသည်လည်း တိုက်ပွဲများတွင် ပါဝင်လာကြသည်။ သို့သော် သူတို့ထဲမှ အများစုမှာ ဂိုဏ်းကြီးရှစ်ဂိုဏ်းမှ ပါရမီရှင်များကို ယှဉ်ပြိုင်နိုင်စွမ်း မရှိကြဘဲ၊ လက်ချိုးရေတွက်၍ရသော နှစ်ဦး၊ သုံးဦးခန့်သာ ဂိုဏ်းကြီးရှစ်ဂိုဏ်းမှ ပါရမီရှင်များနှင့် ယှဉ်ပြိုင်နိုင်စွမ်း ရှိကြသည်။

ထူယွဲ့မှလွဲ၍ လင်းယွဲ့၊ ဖုန်းလန်၊ လီဖျင် စသည်တို့အားလုံးမှာ တိုက်ပွဲများတွင် ပါဝင်နေကြရသည်။ တစ်ဦးနှင့်တစ်ဦး သိုင်းပညာ လက်ရည်စမ်းကြသကဲ့သို့၊ အချို့မှာလည်း အစိန်ခေါ်ခံရသဖြင့် တိုက်ခိုက်နေကြရသည်။ မတူညီသော သိုင်းစိတ်ဆန္ဒများ၏ ပြင်းထန်သော ထိပ်တိုက်တွေ့ဆုံမှုများကြောင့် အဆင့် ၆ သိုင်းသမားများစွာမှာ ပိုမိုဝေးကွာသော နေရာများသို့ ဆုတ်ခွာသွားကြရသည်။

ပါရမီရှင် အများအပြား၏ သိုင်းစိတ်ဆန္ဒများ ပြင်းထန်စွာ ပေါက်ကွဲထွက်လာမှုကြောင့်၊ အဆင့် ၆ သိုင်းသမားများပင်လျှင် ခံနိုင်ရည်မရှိတော့ချေ။ အနီးကပ် နေရာများတွင်မူ အဆင့် ၅ သိုင်းသမား အချို့သာ ကျန်ရှိတော့သည်။

ထို့အပြင် ထူးခြားနေသူ တစ်ဦးလည်း ရှိနေသေးသည်။ ၎င်းမှာ ဝေမြစ်၏ ချောက်ကမ်းပါးတွင် မူလနေရာမှ တစ်ဖွာမျှ မရွေ့လျားဘဲ ရပ်နေသည့် ချန်မုပင် ဖြစ်သည်။

သူ၏ ကိုယ်ပေါ်တွင် မည်သည့် သိုင်းစိတ်ဆန္ဒမျှ မရှိသော်လည်း၊ အနီးအနားမှ ပြင်းထန်လှသော သိုင်းစိတ်ဆန္ဒများ၏ ပေါက်ကွဲမှုမှာ သူ့ကို မည်သို့မျှ အနှောင့်အယှက် မပေးနိုင်သကဲ့သို့၊ သူသည် ထိုနေရာတွင် တိတ်ဆိတ်စွာ ရပ်လျက် အောက်ဘက်မှ ဝေမြစ်ရေများကိုသာ စူးစိုက်ကြည့်နေတော့သည်။

"သူလား..."

လင်းမော့သည် ချန်မုကို သတိထားမိသွားပြီးနောက် စဉ်းစားခန်း ဝင်သွားသည်။

ချန်မုကို သူ အနည်းငယ်တော့ မှတ်မိနေသည်။ ငယ်စဉ်က သူ့ကို ကယ်တင်ခဲ့ပြီး ကာကွယ်ရေး သိုင်းပညာအချို့ သင်ပေးခဲ့သည့် ရှောင်ချင်းရှန်းကို သွားရောက် ဂါရဝပြုစဉ်က တစ်ကြိမ် တွေ့ဆုံခဲ့ဖူးသည်။ ထိုစဉ်က ချန်မုတွင် ထူးခြားမှု တစ်စုံတစ်ရာ မရှိခဲ့သလို၊ သိုင်းသမားတစ်ယောက် ဟုတ်ပုံမရဘဲ ခြေလှမ်းများမှာ ယိုင်နဲ့နေခဲ့သည်။ သို့သော် ယခုအခါတွင်မူ သူ၏ အဆင့်ကို မခန့်မှန်းနိုင်သော်လည်း၊ သိုင်းပညာ တတ်ကျွမ်းသူ တစ်ဦးဖြစ်ကြောင်း သိသာထင်ရှားနေပြီး အဆင့်မှာလည်း မနိမ့်ကျလှပေ။

"တစ်လတောင် မပြည့်သေးဘူး... ဒီလောက်တောင် ပြောင်းလဲသွားတာလား... အင်း... စိတ်ဝိညာဉ်ဆရာ ဖြစ်မယ်..."

အနီးအနားမှ ပါရမီရှင်များ၏ သိုင်းစိတ်ဆန္ဒများ ထိပ်တိုက်တွေ့ဆုံမှုကို ခံနိုင်ရည်ရှိခြင်းမှာ သိပ်ပြီး အံ့သြစရာ မဟုတ်ပေ။ အဘယ်ကြောင့်ဆိုသော် သိုင်းစိတ်ဆန္ဒဆိုသည်မှာ စိတ်အာရုံလွဲမှားမှုများကို ဖန်တီးခြင်းသာ ဖြစ်သည်။ သို့သော် တစ်လမပြည့်မီ အချိန်အတွင်း ဤမျှ ကြီးမားသော ပြောင်းလဲမှုမျိုး ဖြစ်ပေါ်လာခြင်းမှာမူ သာမန်လူတစ်ယောက်အတွက် မဖြစ်နိုင်ပေ။

ဒါက သာမန် တာအိုဆရာမျိုး မဟုတ်ဘဲ စိတ်ဝိညာဉ်စွမ်းအားကို သီးသန့်အသုံးပြုတဲ့ စိတ်ဝိညာဉ်ဆရာ တစ်ယောက်ပဲ ဖြစ်ရမယ်။

လင်းမော့သည် ခေါင်းကို ခပ်ဖွဖွ ခါယမ်းလိုက်မိသည်။ ထိုအချိန်ကသာ ချန်မုသည် စိတ်ဝိညာဉ်ဆရာတစ်ယောက် ဖြစ်ကြောင်း သိခဲ့ပါက သူနှင့် ပို၍ ရင်းနှီးအောင် ပေါင်းသင်းခဲ့မိမည် ဖြစ်သည်။ အဘယ်ကြောင့်ဆိုသော် သာမန် တာအိုဆရာများနှင့်မတူဘဲ စစ်မှန်သော စိတ်ဝိညာဉ်ဆရာများ၏ အရေအတွက်မှာ အလွန်နည်းပါးလှသဖြင့် မည်မျှပင် အဆင့်နိမ့်နေပါစေ၊ မည်သူကမျှ အပိုလူဟု သတ်မှတ်မည် မဟုတ်ဘဲ အချိန်မရွေး အကူအညီ လိုအပ်လာနိုင်သောကြောင့်ပင်။

လင်းမော့ တွေးတောနေစဉ်မှာပင်...

ရွှစ်...

မှေးမှိန်နေသော သွေးရောင်အလင်းတန်းတစ်ခုမှာ ချန်မုဆီသို့ လျင်မြန်စွာ ဦးတည်လာသည်။ ၎င်းမှာ တစ်စုံတစ်ဦးက ချန်မုကို တိုက်ခိုက်လိုက်ခြင်း မဟုတ်ဘဲ၊ မလှမ်းမကမ်းမှ သွေးသတ်ဂိုဏ်း၏ လီဖျင် ထုတ်လွှတ်လိုက်သည့် သိုင်းစိတ်ဆန္ဒကို လင်ရှီက ဖယ်ရှားလိုက်စဉ်၊ ထိုအရှိန်က ချန်မုဆီသို့ လွင့်စင်လာခြင်း ဖြစ်သည်။

လင်းမော့သည် မျက်ခုံးကို အနည်းငယ် တွန့်ချိုးလိုက်ပြီး ဓားတစ်ချက်ကို ခပ်ဖွဖွ ဝှေ့ယမ်းလိုက်သည်။

ရွှစ်...

ဓားချီစွမ်းအင်များ ထွက်ပေါ်လာပြီး ချန်မုဆီသို့ လွင့်စင်လာသည့် မှေးမှိန်နေသော သွေးရောင်အလင်းတန်းကို ချက်ချင်းပင် ဖြတ်တောက် ဖျက်ဆီးပစ်လိုက်သည်။

ထိုအချိန်မှသာ ချန်မုသည် သတိထားမိသွားသကဲ့သို့ ဖြစ်သွားပြီး၊ ဝေမြစ်ရေများကို ကြည့်နေသည့် အကြည့်ကို ရုပ်သိမ်းလိုက်ကာ သုံးပေအကွာတွင် ဓားချီစွမ်းအင်ဖြင့် ဖျက်ဆီးခံလိုက်ရသည့် သွေးရောင်အလင်းတန်း၏ အမှတ်အသားကို တစ်ချက် ကြည့်လိုက်သည်။ ထို့နောက် မလှမ်းမကမ်းရှိ လင်းမော့ကို ကြည့်လိုက်သည်။

လင်းမော့က ချန်မုကို ခေါင်းညိတ်ပြလိုက်သည်။ ချန်မုသည် ဝိညာဉ်အမြင် ဖြင့် ဝေမြစ်အတွင်းပိုင်းကို စူးစမ်းနေခြင်း ဖြစ်မည်ဟု သူ ခန့်မှန်းလိုက်ပြီးနောက် ဆိုသည်။

"ဒီနေရာက သိပ်ပြီး အန္တရာယ်ကင်းလှတာ မဟုတ်ဘူး။ နည်းနည်းလောက် နောက်ဆုတ်နေတာ ကောင်းမယ်..."

ဤမြင်ကွင်းကို အနီးအနားမှ လူများစွာက သတိထားမိသွားကြပြီး၊ အားလုံး၏ အကြည့်များမှာ ချန်မုဆီသို့ စူးစမ်းစွာ ရောက်ရှိလာတော့သည်။

စောစောက လင်းယွဲ့သည် ဤလူငယ်လေးနှင့် အတူရပ်နေပြီး ရင်းနှီးပုံရသည်။ ယခုတစ်ဖန် ကွေ့ယွမ်ဓားအိမ်တော်မှ လင်းမော့ကလည်း သူနှင့် ရင်းနှီးပုံရပြီး ကူညီကာကွယ်ပေးလိုက်သေးသည်။

ဒီလူက... ဘယ်သူများလဲ...