အခန်း (၁၀၅၅-၁၀၅၆)

အခန်း ၁၀၅၅ ပိုင်မျိုးရိုးရှိသော မိတ်ဆွေဟောင်းတစ်ယောက်

တိုက်ပွဲသံသည် စကြဝဠာတစ်ခုလုံးကို တုန်ဟိန်းသွားစေခဲ့သည်။ ဟင်းလင်းပြင်ထဲ၌ ကျယ်လောင်သော ပေါက်ကွဲသံများ ပဲ့တင်ထပ်နေပြီး အပြင်ဘက်သို့ ပျံ့နှံ့သွားတော့သည်။ အမျိုးမျိုးသော နတ်ဘုရားစွမ်းရည်များမှ ထွက်ပေါ်လာသည့် အရောင်စုံ အလင်းတန်းများသည် မီးရှူးမီးပန်းများကဲ့သို့ ပွင့်လန်းလာပြီး ခဏတာမျှသာ ခံစားလိုက်ရသည့် အလွန်လှပသော အခိုက်အတန့်တစ်ခုကို ဆောင်ကြဉ်းပေးခဲ့သည်။

​တောက်ပသော သွေးနီရောင်များနှင့် သွေးညှီနံ့များက ထိုနေရာတစ်ခုလုံးအား လွှမ်းမိုးထားပြီး အတွင်းရှိ ကျင့်ကြံသူ အားလုံးကို လှုံ့ဆော်နေခဲ့သည်။

​အင်မော်တယ်များ မဟာမိတ်နှင့် နံနက်ခင်း တာအိုဂိုဏ်းတို့အကြား ဖြစ်ပွားနေသည့် ဖရိုဖရဲ စစ်ပွဲနှင့် နှိုင်းယှဉ်ပါက ဤနေရာရှိ တိုက်ပွဲမှာ ကျင့်ကြံသူ တစ်သိန်းကျော်ခန့်သာ ပါဝင်သည့် အတိုင်းအတာအနည်းငယ်မျှသာ ရှိသော စစ်ပွဲတစ်ပွဲ ဖြစ်သည်။

​အင်မော်တယ်များ မဟာမိတ်မှ ကျင့်ကြံသူ ရှစ်သောင်းခန့် ရှိပြီး သူတို့သည် ပြောင်းရွှေ့ခြင်း နေရာကို စောင့်ကြပ်နေသည့် ကျင့်ကြံသူ ငါးသောင်းအား ရုတ်တရက် ဝင်ရောက် တိုက်ခိုက်ခဲ့ကြခြင်း ဖြစ်သည်။

​လွန်ခဲ့သည့် နှစ်ရက်က အင်မော်တယ်များ မဟာမိတ်မှ ကျင့်ကြံသူ ရှစ်သောင်းသည် နံနက်ခင်း တာအိုဂိုဏ်းထဲသို့သာ လူများကို ပို့ဆောင်နိုင်စွမ်းရှိသည့် ပြောင်းရွှေ့ခြင်း အစီအရင်အား အသုံးပြုကာ လူမသိသူမသိ နည်းလမ်းတစ်ခုဖြင့် ရုတ်တရက် ရောက်ရှိလာခဲ့ကြသည်။ သို့သော် အင်မော်တယ်များ မဟာမိတ်မှ လူအမြောက်အမြား ရောက်ရှိလာခြင်းက ထိုနေရာတွင် တပ်စွဲထားသည့် နံနက်ခင်း တာအိုဂိုဏ်းမှ တပည့်ငါးသောင်းကို အငိုက်မိသွားစေခဲ့ပြီး တိုက်ပွဲ စတင်ခဲ့ရတော့သည်။

​နှစ်ရက်အတွင်းမှာပင် အင်မော်တယ်များ မဟာမိတ်မှ လူရှစ်သောင်းအနက် နီးပါး နှစ်သောင်းခန့် သေဆုံးခဲ့ရသည်။ သူတို့၏ ရုပ်အလောင်းများအနက် အကောင်းပကတိ ကျန်ရှိသူ အလွန်နည်းပါးသည်။ အများစုမှာ အပိုင်းပိုင်း ပြတ်တောက်သွားခဲ့ပြီး ထိုနယ်မြေ တစ်ခုလုံးတွင် မျောပါနေခဲ့ကြသည်။ သွေးများသည် အရပ်မျက်နှာအနှံ့ စီးဆင်းနေသဖြင့် နဂါးငွေ့တန်းထဲရှိ သွေးညှီနံ့မှာ မခံမရပ်နိုင်လောက်အောင် ဖြစ်နေခဲ့ရသည်။

​အင်မော်တယ်များ မဟာမိတ်မှ ကျင့်ကြံသူ နှစ်သောင်းကို သတ်ဖြတ်နိုင်ခဲ့သည့် အဖိုးအခမှာ အစီအရင်အား စောင့်ကြပ်ရန် တပ်စွဲထားသည့် နံနက်ခင်း တာအိုဂိုဏ်းမှ တပည့်နှစ်သောင်း ဖြစ်သည်။ နံနက်ခင်း တာအိုဂိုဏ်းမှ ဤကျင့်ကြံသူများ၏ ကျင့်ကြံခြင်း အဆင့်အတန်းသည် အင်မော်တယ်များ မဟာမိတ်မှ လူများထက် သာလွန်သော်လည်း ရန်သူများ၏ ရုတ်တရက် ရောက်ရှိလာမှုကြောင့် တိုက်ပွဲအစတွင်ပင် ပြင်းထန်စွာ ဒဏ်ရာရရှိခဲ့ကြသဖြင့် တူညီသော ဆုံးရှုံးမှုပမာဏကို ရင်ဆိုင်ခဲ့ရခြင်း ဖြစ်သည်။

​တိုက်ပွဲက ဆက်လက်ဖြစ်ပွားနေပြီး သတ်ဖြတ်မှုများကလည်း ဆက်ရှိနေခဲ့သည်။ နှစ်ဖက်စလုံးမှ ကျင့်ကြံသူများသည် ရူးသွပ်သည့် အခြေအနေသို့ ရောက်သည်အထိ တိုက်ခိုက်ခဲ့ကြသည်။ ထိုအချိန်တွင် အင်မော်တယ်များ မဟာမိတ် စစ်တပ်ကြား၌ ဧရာမမျက်လုံးကြီး တစ်လုံး မျောပါနေခဲ့သည်။ ထိုမျက်လုံးကြီးက တိုက်ပွဲကို စောင့်ကြည့်နေစဉ် ၎င်းထံမှ အေးစက်စက် အငွေ့အသက်များ ထွက်ပေါ်နေခဲ့သည်။

​၎င်းအောက်တွင် ပြင်းထန်သော အငွေ့အသက်များ ရှိသည့် အဘိုးအိုများ ဝန်းရံထားသော လူလတ်ပိုင်းအမျိုးသား သုံးယောက် ရှိနေသည်။ သူတို့ထဲက တစ်ယောက်မှာ ခန့်ညားသော မျက်နှာ ရှိသည်။ သူသည် လူလတ်ပိုင်းအရွယ် ရောက်နေပြီ ဖြစ်သော်လည်း တည်ငြိမ်ရင့်ကျက်မှု ရှိနေဆဲပင်။ သူ၌ စူးရှသော မျက်ခုံးများနှင့် တောက်ပသော မျက်ဝန်းများ ရှိနေပြီး သူ့ကို မြင်ရသူတိုင်းက သူသည် ဆယ်ကျော်သက်အရွယ်တုန်းက အလွန်ပင် ချောမောခန့်ညားသော လူတစ်ယောက် ဖြစ်မည်ဟု အလွယ်တကူ ခန့်မှန်းနိုင်ကြသည်။

​သူက လက်နှစ်ဖက်ကို နောက်ပစ်ကာ ထိုမျက်လုံးကြီးအောက်တွင် တိတ်ဆိတ်စွာ ရပ်နေခဲ့သည်။ သူ့ကျောပြင်တွင် ဧရာမလေး တစ်လက် ရှိနေပြီး လှပကာ မြင့်မြတ်သော ဝတ်ရုံရှည်ကြီးကို ဝတ်ဆင်ထားသည်။ သူ့တွင် ခန့်ညားထည်ဝါသော မျက်နှာ ရှိနေပြီး သူ့နောက်ကွယ်ရှိ ကျန်လူနှစ်ယောက်၏ အငွေ့အသက်ကမူ သူ့ကို လုံးဝ မယှဉ်နိုင်ချေ။ သူတို့က သူ့ကို ခြံရံလာကြသူများသာ ဖြစ်သည်။

​"စီနီယာ အစ်ကိုပိုင်... အခုဆို သုံးရက်နီးပါး ရှိသွားပြီ။ နံနက်ခင်း တာအိုဂိုဏ်းရဲ့ သတင်းပို့တဲ့ အရှိန်နဲ့ဆိုရင် သူတို့ရဲ့ ဆက်သွယ်ရေး လမ်းကြောင်းကို ဖြတ်တောက်ပြီး အချိန်ဆွဲထားတဲ့ နည်းလမ်း ကျွန်တော်တို့မှာ ရှိနေရင်တောင် မတော်တဆ ကျွန်တော်တို့ ကျရှုံးသွားရင်..." လှပသော ဝတ်ရုံကို ဝတ်ဆင်ထားသည့် အမျိုးသား၏ ဘယ်ဘက်တွင် ရပ်နေသူက တိုးညှိသော အသံဖြင့် ပြောလိုက်သည်။

​"ဟုတ်ပါတယ် စီနီယာ အစ်ကိုပိုင်။ ဒီကလူတွေကို သုံးရက်ကြာ စမ်းသပ်တာကပဲ ကျွန်တော်တို့ တာဝန်ကို ပြီးမြောက်ဖို့ လုံလောက်နေပါပြီ။ တခြားနေရာတွေက တာအိုရောင်းရင်းတွေလည်း အခုအချိန်ဆို ပြန်ကုန်ကြပြီ။ ကျွန်တော်တို့လည်း... ဆုတ်ခွာသင့်ပြီလား" ညာဘက်ကလူက ချက်ချင်း လိုက်မေးသည်။

​"မဟာမိတ်က နံနက်ခင်း တာအိုဂိုဏ်းရဲ့ တုံ့ပြန်မှုကို စမ်းသပ်ဖို့ ငါတို့ကို ဒီကို စေလွှတ်ခဲ့တာ။ ပြီးတော့ ရက်နည်းနည်း အချိန်ပေးခဲ့တယ်။ မြင့်မြတ်တဲ့ အမျိုးသမီး နားလည်သဘောပေါက်ထားတဲ့ ပြောင်းရွှေ့ခြင်းကို ကြားဖြတ်ဟန့်တားခြင်း ပညာက သီအိုရီအရ ပြောင်းရွှေ့ခြင်း အစီအရင်တွေကို ခုနစ်ရက်ကြာ ကြားဖြတ် တားဆီးထားနိုင်တယ်။ ဒါက အစစ်အမှန် နံနက်ခင်း တာအိုလောကအတွင်းက တိုက်ပွဲတွေမှာ နံနက်ခင်း တာအိုဂိုဏ်းကို ခုနစ်ရက်ကြာ အချိန်ကြန့်ကြာအောင် လုပ်နိုင်တယ်" လှပသော ဝတ်ရုံဝတ် အမျိုးသားက တည်ငြိမ်စွာ ပြောလိုက်သည်။ သူ့အသံက တိုးညှိသော်လည်း စည်းရုံးသိမ်းသွင်းနိုင်စွမ်း ရှိနေသည်။

​"ဒါက..." သူ့ဘယ်ဘက်ကလူက ခဏမျှ တုံ့ဆိုင်းသွားသည်။ သူ တစ်ခုခုပြောချင်ပုံရသည့် အချိန်တွင် လှပသော ဝတ်ရုံဝတ် အမျိုးသား၏ မျက်လုံးများထဲ၌ အလင်းတစ်ချက် လင်းလက်သွားခဲ့သည်။

​"မဟာမိတ်က ငါတို့ကို ဆုတ်ခွာဖို့ အမိန့်မပေးသေးဘူး။ ငါတို့အပေါ်မှာ မြင့်မြတ်တဲ့ ကျောင်းတော်ရဲ့ မျက်လုံးတော် ရှိနေတယ်။ ဘယ်သူက ကိုယ့်သဘောနဲ့ကိုယ် ထွက်သွားရဲမှာလဲ။ ဘာမှ ထပ်မပြောနဲ့တော့။ စစ်ရထားတွေကို ထုတ်စမ်း"

​သူ့စကားလုံးများ ပျံ့နှံ့သွားသည့်အခါ သူ့ဘေးက လူများသည် နှလုံးသားထဲ၌ သက်ပြင်းချလိုက်ကြတော့သည်။ သူတို့က သူ့အထက်ရှိ အေးစက်စက် အငွေ့အသက်များ ထွက်ပေါ်နေသော ဧရာမမျက်လုံးကြီးကို အလိုအလျောက် လှမ်းကြည့်လိုက်ကြပြီးနောက် ချက်ချင်း ခေါင်းငုံ့ကာ နာခံကြောင်း ပြောဆိုကြသည်။ သူတို့က နောက်သို့ ခြေလှမ်းအနည်းငယ် ဆုတ်လိုက်ပြီး မဟာမိတ်ပိုင် ကျင့်ကြံသူများထံ အမိန့်များ ပေးပို့လိုက်ကြတော့သည်။

​ထိုနေရာတွင် ပေါက်ကွဲသံများ ချက်ချင်း ပဲ့တင်ထပ်သွားခဲ့သည်။ စစ်သင်္ဘော၏ ဘေးတစ်ဖက်ရှိ ဟင်းလင်းပြင်က ပုံပျက်သွားပြီး ဝဲဂယ က်တစ်ခုအဖြစ် ပြောင်းလဲသွားကာ ပေပေါင်းသောင်းချီ မြင့်မားပြီး ရှည်လျားသော ကြောက်မက်ဖွယ် ဦးချိုကြီးများ ပါရှိသည့် ဧရာမ နီရဲသော အရာဝတ္ထု ကိုးခု ထွက်ပေါ်လာခဲ့သည်။ ၎င်းတို့က စစ်ရထားများ ဖြစ်ကြသဖြင့် နံနက်ခင်း တာအိုဂိုဏ်းမှ လူများ၏ မျက်နှာအမူအရာများ ချက်ချင်း ပြောင်းလဲသွားခဲ့ရတော့သည်!

​ထိုအရာများသည် ကြီးမားသော ဓားမြှောင်ပေါင်း သိန်းချီဖြင့် ဖွဲ့စည်းထားသည့် စစ်ရထားများ ဖြစ်သည်။ နီရဲသော အရောင်များကြောင့် ၎င်းတို့က သွေးချင်းချင်း နီနေသလိုပင်။ ခက်ထန်ကြမ်းကြုတ်သော အငွေ့အသက်များ ၎င်းတို့ထံမှ ပျံ့နှံ့လာပြီး စစ်မြေပြင်ထဲသို့ လျင်မြန်စွာ ပြေးဝင်သွားကြတော့သည်။

​တိုက်ပွဲက ပိုမိုပြင်းထန်လာခဲ့သည်။ ထိုအခိုက်အတန့်တွင် စစ်မြေပြင်နှင့် အလွန်တရာ ဝေးကွာသော နေရာ၌ အင်မော်တယ်များ မဟာမိတ်ပိုင် နယ်မြေတစ်ခု ရှိနေသည်။ ထိုနေရာတွင် ဂြိုဟ်ပေါင်း တစ်ရာနီးပါး စုစည်းကာ ဖြစ်တည်ထားသည့် ဧရာမဂြိုဟ်ကြီး တစ်လုံး ရှိပြီး ထိုအထက် လေထုထဲ၌ မျောပါနေသော ဧရာမ နန်းတော်ကြီး တစ်ဆောင် ရှိနေသည်။

​ထိုနန်းတော်ကြီးသည် အရောင်အသွေးစုံလင်စွာ တောက်ပနေခဲ့သည်။ နယ်မြေတစ်ခုလုံးက တိတ်ဆိတ်ငြိမ်သက်နေပြီး အသံ တစ်ချက်မျှ မကြားရချေ။ ဝတ်ရုံဖြူ ဝတ်ဆင်ထားသည့် အမျိုးသမီးတစ်ယောက်သာ တင်ပျဉ်ခွေထိုင်နေသည်ကို တွေ့ရသည်။

​သူမက ဝတ်ရုံဖြူကို ဝတ်ဆင်ထားပြီး လှပလွန်းသော်လည်း သူမထံမှ မည်သည့် စိတ်ခံစားမှု အရိပ်အယောင်မျှ မတွေ့ရချေ။ သူမသည် ရေခဲကဲ့သို့ အေးစက်နေပြီး သူမ ရှေ့တွင် အလင်းလုံး ကိုးလုံး မျောပါနေသည်။ ၎င်းတို့ တစ်လုံးချင်းစီ အတွင်း၌ မတူညီသော ပုံရိပ်များ စဉ်ဆက်မပြတ် ဖြတ်ပြေးနေကြသည်။

​အကယ်၍ တစ်ဦးတစ်ယောက်က သေချာကြည့်ရှုမည်ဆိုပါက ထိုအလင်းလုံးများထဲတွင် စစ်မြေပြင် ကိုးခု ပါဝင်နေသည်ကို ရှင်းလင်းစွာ မြင်တွေ့နိုင်ပေမည်။ တတိယမြောက် အလင်းလုံးထဲတွင်မူ ပိုင်ဟု အမည်ရသော အမျိုးသား ရှိနေသည့် နယ်မြေ ဖြစ်သည်။

​ဝတ်ရုံဖြူဝတ် အမျိုးသမီးက အလင်းလုံးများကို တည်ငြိမ်စွာ စိုက်ကြည့်နေသည်။ တစ်ခါတစ်ရံတွင် သူမက ၎င်းတို့ထဲက တစ်ခုကို အကြည့်လွှဲမရ စိုက်ကြည့်တတ်သည်။ သူမ မျက်လုံးထဲတွင် မှော်သင်္ကေတများ ဖြတ်ပြေးနေပြီး သူမက တစ်ခုခုကို တွက်ချက်နေသလိုပင်။

​အချိန်များ တရွေ့ရွေ့ ကုန်လွန်သွားခဲ့သည်။ အမျိုးသမီးက အလင်းလုံးများထဲက တိုက်ပွဲများကို တစ်ခါတစ်ရံ အာရုံစိုက်နေစဉ်မှာပင် ပိုင်အမည်ရှိ အမျိုးသား ရှိနေသည့် နဂါးငွေ့တန်းအတွက် တတိယမြောက်နေ့သည် ကုန်လွန်သွားခဲ့ပြီ ဖြစ်သည်။ ထိုနေရာရှိ အတိုင်းအတာ အနည်းငယ်မျှသာ ရှိသော တိုက်ပွဲသည် အလွန်ပင် ပျက်စီးဆိုးရွားသော အခြေအနေသို့ ရောက်ရှိသွားခဲ့သည်။ အင်မော်တယ်များ မဟာမိတ်မှ လူအမြောက်အမြား သေဆုံးခဲ့ရသလို နံနက်ခင်း တာအိုဂိုဏ်းမှ လူများကလည်း ကြီးမားသော အဖိုးအခကို ပေးခဲ့ရသည်။

​မူလက ရှိခဲ့သော ငါးသောင်းအနက် ယခုအခါ တစ်သောင်းခန့်သာ ကျန်ရှိတော့သည်။ သူတို့၏ နှလုံးသားထဲတွင် မောပန်းနွမ်းနယ်မှုများ ပြည့်နှက်နေပြီး ခန္ဓာကိုယ်များကိုလည်း မျှော်လင့်ချက်မဲ့မှုများက လွှမ်းမိုးထားသည်။ သူတို့၏ ရဲဘော်ရဲဘက်များ တစ်ယောက်ပြီးတစ်ယောက် သေဆုံးသွားခဲ့ကြပြီး သူတို့ပတ်ပတ်လည်ရှိ ထူထပ်သော သွေးညှီနံ့များနှင့် အရပ်မျက်နှာအနှံ့မှ မဟာမိတ်က ကျင့်ကြံသူများ၏ ရူးသွပ်စွာ သတ်ဖြတ်မှုများက သူတို့အား မောပန်းနွမ်းနယ်မှုနှင့် မျှော်လင့်ချက်မဲ့မှုများကြောင့် စိတ်ဓာတ်ပြိုလဲလုနီးပါး ဖြစ်စေခဲ့သည်။

​'ဘာလို့ ဂိုဏ်းက ငါတို့ကို ကူညီဖို့ ဘယ်သူမှ မလွှတ်ပေးရတာလဲ'

​'ပုံမှန်ဆိုရင် ငါတို့ အင်မော်တယ်များ မဟာမိတ်နဲ့ တိုက်ခိုက်တဲ့အခါ စစ်ကူတွေက အချိန်တိုအတွင်းမှာပဲ ရောက်လာတတ်ကြတာ၊ ဒါပေမဲ့ အခု သုံးရက်တောင် ရှိသွားပြီ။ ဘာလို့ ဘယ်သူမှ ရောက်မလာသေးတာလဲ'

​'ဒီနေရာက ပြောင်းရွှေ့ခြင်းနေရာပဲ။ ဒါကြောင့် နံနက်ခင်း တာအိုဂိုဏ်းအတွက် အလွန်အရေးကြီးတဲ့ နေရာတစ်ခု ဖြစ်တယ်။ ဘာလို့... သူတို့ အခုထိ ရောက်မလာသေးတာလဲ'

​ဤမေးခွန်းများကို နံနက်ခင်း တာအိုဂိုဏ်းမှ ကျန်ရှိနေသော ကျင့်ကြံသူ တစ်သောင်းကျော်က ဆက်လက်တိုက်ခိုက်ရင်း သူတို့၏ နှလုံးသားထဲ၌ ကျယ်လောင်စွာ အော်ဟစ်နေမိကြသည်။

​'ဘာတွေ ဖြစ်သွားတာလဲ'

​သူတို့နောက်ကွယ်တွင် ပြောင်းရွှေ့ခြင်း အစီအရင်ကို ဖွဲ့စည်းထားသည့် ဧရာမပလ္လင် ကိုးခု ရှိနေသည်။ ထိုအခိုက်အတန့်တွင် ပလ္လင်များထဲက တစ်ခုပေါ်၌ အဘိုးအိုတစ်ယောက် ရပ်နေခဲ့သည်။ သူ့ဘေးတွင် လူလတ်ပိုင်း အမျိုးသား သုံးယောက် ရှိနေပြီး သူတို့၏ စိတ်ပျက်အားငယ်နေသော အမူအရာများထဲ၌ မျှော်လင့်ချက်မဲ့မှုများ ရှိနေသည်။

​အဘိုးအိုက မျက်လုံးများကို မှိတ်ထားသည်။ သူ့အသိစိတ်နှင့် စိတ်ဝိညာဉ် တစ်ခုလုံးက သူ့ခြေထောက်အောက်က ပလ္လင်ထဲသို့ ပေါင်းစပ်သွားခဲ့သည်။ သို့သော် ခဏအကြာတွင် သူ မျက်လုံးဖွင့်လိုက်သည့်အခါ သူ့မျက်နှာက ဖြူရော်နေခဲ့သည်။ သူ ခေါင်းမော့လိုက်သည့်အခါ သူ့အထက်ရှိ နဂါးငွေ့တန်းကို စိုက်ကြည့်မိသည်။ ယင်းက ဒုတိယမြောက် စစ်မြေပြင် ဖြစ်သည်။ ထိုနေရာတွင် ကျင့်ကြံသူ ဒါဇင်ပေါင်းများစွာက ကောင်းကင်ယံအထိ တိုက်ခိုက်နေကြသည်။

​ထိုကျင့်ကြံသူ ဒါဇင်ပေါင်းများစွာအနက် ကိုးယောက်မှာ နံနက်ခင်း တာအိုဂိုဏ်းမှ ဖြစ်ပြီး သူတို့က အစီအရင်ကို ကာကွယ်ရန် စစ်နန်းဆောင်မှ စေလွှတ်ခြင်း ခံထားရသူများ ဖြစ်သည်။ သူတို့ကို ရင်ဆိုင်တိုက်ခိုက်နေသူများမှာ အင်မော်တယ်များ မဟာမိတ်မှ ကျင့်ကြံသူ တစ်ဆယ့်ခုနစ်ယောက် ဖြစ်သည်။ သူတို့က အထက်နဂါးငွေ့တန်းထဲ၌ အချင်းချင်း ပြင်းထန်သော တိုက်ပွဲကို ဆင်နွှဲနေကြပြီး တစ်ယောက်ကိုတစ်ယောက် ထိန်းချုပ်ထားကြသည်။ သူတို့အားလုံးသည် လကပ်ဘေး အဆင့်တွင် ရှိကြပြီး ထိုနေရာ၌ အသန်မာဆုံး ကျင့်ကြံသူများ ဖြစ်ကြသည်။

​'ငါ ဂိုဏ်းကို သတိပေးဖို့ သတင်းပို့ပြီးပြီ။ ဒါပေမဲ့ သုံးရက်တောင် ရှိသွားပြီ ဘာပြန်ကြားချက်မှ မရှိဘူး။ တကယ်ပဲ ဘာတွေ ဖြစ်ပျက်နေတာလဲ။ ဒါက ဘယ်လိုလုပ် ဖြစ်နိုင်မှာလဲ'

​'သူတို့ စစ်ကူမလွှတ်တာက ထားပါဦး။ ဒါပေမဲ့ ငါ ပြောင်းရွှေ့ခြင်း အစီအရင်ကို နှိုးဆွပြီးတဲ့နောက် ငါတို့ ရင်ဆိုင်နေရတဲ့ အန္တရာယ်တွေအကြောင်း ဂိုဏ်းကို ပြန်ပို့တဲ့ သတင်းအတွက် ဘာလို့ ပြန်ကြားချက် မရှိရတာလဲ။ တကယ်လို့ ဂိုဏ်းအတွင်းက လူက ဒီအစီအရင်ကို မနှိုးဆွပေးရင် အပြင်ကလူ ဘယ်သူမှ ပြန်လာလို့ရမှာ မဟုတ်ဘူး'

​'ဒါပေမဲ့... ဒါပေမဲ့ ဒီသောက်ကျိုးနည်း အင်မော်တယ်များ မဟာမိတ်က ကျင့်ကြံသူတွေက ဒီအစီအရင်ကို သုံးပြီး ဒီကို ရောက်လာကြတယ်။ သူတို့... သူတို့ ဒါကို ဘယ်လိုလုပ်လိုက်တာလဲ' အဘိုးအို၏ မျက်လုံးများက သွေးဆာနေသလို နီမြန်းနေခဲ့သည်။ သူသည် တပည့်များနှင့်အတူ ဤနေရာကို ကာကွယ်ရန် တပ်စွဲထားသည့် ဂိုဏ်းအကြီးအကဲ ဖြစ်ပြီး ဂိုဏ်းအကြီးအကဲ နန်းဆောင်၏ မဟာဂိုဏ်းအကြီးအကဲများထဲက တစ်ယောက်လည်း ဖြစ်သည်။ သို့သော် ထိုအခိုက်အတန့်တွင် သူ့တွင် မည်သို့သော အဆင့်အတန်းမျိုး ရှိနေပါစေ ယင်းက လုံးဝ အသုံးမဝင်တော့ချေ။

​စောစောကပင် သူ ဂိုဏ်းနှင့် ထပ်မံ ဆက်သွယ်ရန် ကြိုးစားခဲ့သော်လည်း မည်သည့် တုံ့ပြန်မှုမျှ မရှိခဲ့ပေ။ မျှော်လင့်ချက်မဲ့မှုက သူ့ခန္ဓာကိုယ်နှင့် စိတ်ဝိညာဉ်ကို လွှမ်းမိုးသွားခဲ့သည်။

​အကယ်၍ သူ ထွက်ပြေးမည်ဆိုလျှင် ကံကောင်းထောက်မစွာဖြင့် လွတ်မြောက်နိုင်မည်လော ဟူသည့် အချက်ကို အသာထား... သူ လွတ်မြောက်သွားခဲ့လျှင်ပင် နံနက်ခင်း တာအိုဂိုဏ်းက စစ်ပြေးများကို အရေးယူသည့် နည်းလမ်းအတိုင်း သူ သေချာပေါက် ပြစ်ဒဏ်ခတ်ခံရပေမည်။ သူက ဘက်ပြောင်းပြီး အင်မော်တယ်များ မဟာမိတ်ထဲသို့ ဝင်မှသာ... သို့ပေသော်ငြား သူ့ဆွေမျိုးသားချင်းများကော။ သူတို့က နံနက်ခင်း တာအိုဂိုဏ်း၏ စီရင်ပိုင်ခွင့်အောက်က နဂါးငွေ့တန်းထဲတွင် နေထိုင်ကြသည်။ အကယ်၍ သူ ထွက်ပြေးသွားပါက သူ့ဆွေမျိုးသားချင်းများက အစုလိုက် အပြုံလိုက် မျိုးတုံးသတ်ဖြတ်ခြင်းကို ရင်ဆိုင်ရမည် ဖြစ်သည်။

​"မဟာဂိုဏ်းအကြီးအကဲ... ကျွန်တော်တို့ ဘာလုပ်ကြမလဲ" အဘိုးအိုဘေးက လူလတ်ပိုင်းအမျိုးသား သုံးယောက်က သူ့ကို လှမ်းကြည့်လိုက်ကြသည်။

​"ငါ ထင်တယ်... ဂိုဏ်းက စစ်ကူတွေ လာတော့မှာ မဟုတ်ဘူး" အဘိုးအိုက နာကျင်စွာ ပြောလိုက်သည်။

​အမျိုးသား သုံးယောက် တိတ်ဆိတ်သွားကြသည်။ သူတို့ နားထဲက တိုက်ပွဲသံများနှင့် သူတို့ မသေဆုံးမီ တပည့်များ၏ သနားစရာကောင်းအောင် အော်ဟစ်သံများက သူတို့၏ နှလုံးသားကို ဓားနှင့် ထိုးလိုက်သလို ခံစားရစေသည်။

​"မဟာဂိုဏ်းအကြီးအကဲ... ဖြစ်နိုင်တာက ကျွန်တော်တို့မှာ စစ်ကူတွေ ရှိလာနိုင်သေးတယ်..." ရုတ်တရက် လူလတ်ပိုင်းအမျိုးသား သုံးယောက်ထဲက တစ်ယောက်က ခေါင်းမော့လိုက်သည်။

​"ကျွန်တော် မှတ်မိသလောက်ဆိုရင် လွန်ခဲ့တဲ့ ဆယ်ရက်က နတ်ဘုရား အနှစ်သာရ ကြယ်ပင်လယ် အရပ်မျက်နှာဆီကနေ အမိန့်တစ်ခု ရခဲ့တယ်။ အဲဒီအမိန့်က မင်းသား တာအိုခုန်းနဲ့ သူ့ရဲ့ အဖွဲ့က နံနက်ခင်း တာအိုဂိုဏ်းကို ပြန်ဖို့အတွက် ဒီနေရာက ပြောင်းရွှေ့ခြင်း အစီအရင်ကို သုံးဖို့ လာနေကြတယ်။ ဒါကြောင့် အစီအရင်ကို နှိုးဆွဖို့ ကြိုတင်ပြင်ဆင်မှုတွေ လုပ်ထားပါတဲ့။ အချိန်အရ တွက်ကြည့်ရင် သူတို့ အခုအချိန်ဆို ရောက်ခါနီးနေပြီ"

​"တာအိုခုန်း... သူ့ရဲ့ ကျင့်ကြံခြင်း အဆင့်ကို ထားလိုက်ဦး။ သူ တကယ် ရောက်လာခဲ့ရင်တောင် သူနဲ့အတူ လက်အောက်ခံ ဘယ်နှယောက်များ ခေါ်လာနိုင်မှာလဲ။ အဲဒါက မလုံလောက်ပါဘူး။ သွေးရောင်အလင်းတန်းက ကောင်းကင်ယံအထိ ရောက်အောင် ကြီးမားပြင်းထန်နေပြီ။ နံနက်ခင်း တာအိုဂိုဏ်းက တိုက်ရိုက် မျိုးဆက်တွေ အားလုံးရဲ့ စိတ်နေစိတ်ထားအရဆိုရင် သူက တခြားပြောင်းရွှေ့ခြင်းနေရာဆီကို ဦးတည်ဖို့ လှည့်ထွက်သွားလောက်ပြီ။ သူ ဒီကို လာမှာ မဟုတ်ဘူး"

​"ဒါပေမဲ့ ဘာပဲဖြစ်ဖြစ် သူက မင်းသားတစ်ပါးပဲလေ။ မဟာမင်းသား ဆယ်ပါးထဲက တစ်ပါး..."

​"အဲဒါက ဘာဖြစ်လဲ။ ငါ သူ့ကို လွန်ခဲ့တဲ့ နှစ်ပေါင်းများစွာက တွေ့ခဲ့ဖူးတယ်။ သူက ကြင်နာတတ်ပုံပေါ်ပေမဲ့ အမှန်တကယ်တော့ အလွန် အေးစက်တဲ့ သူပဲ" ထို့နောက် ထိုအုပ်စု တိတ်ဆိတ်သွားကြတော့သည်။

​"ငါတို့ သေတဲ့အထိ တိုက်ရရင်တောင်..." အဘိုးအိုက စိတ်ပျက်အားငယ်စွာ ရယ်မောလိုက်သည်။ သူက ခေါင်းကို နောက်သို့ ပစ်ကာ ဟိန်းဟောက်လိုက်ရာ သူ့အော်ဟစ်သံက စစ်မြေပြင် တစ်ခုလုံးတွင် ပဲ့တင်ထပ်သွားပြီး ထိုနေရာရှိ နံနက်ခင်း တာအိုဂိုဏ်းမှ တပည့်အားလုံး၏ နားထဲသို့ ရောက်ရှိသွားခဲ့သည်။

​"ငါတို့ရဲ့ မိသားစုတွေအတွက်... ငါတို့ သေတဲ့အထိ တိုက်ခိုက်ရရင်တောင် တိုက်ကြစမ်း။ ငါတို့ သေဆုံးသွားပြီးရင် ဂိုဏ်းက ငါတို့ရဲ့ မိသားစုတွေကို မတရား ဆက်ဆံမှာ မဟုတ်ဘူး။ တိုက်ကြစမ်း၊ ငါ့ရဲ့ တာအိုရောင်းရင်းတို့၊ ငါတို့ရဲ့ အသက်တွေနဲ့ ငါတို့မိသားစုတွေရဲ့ ဘေးကင်းလုံခြုံမှုအတွက် တိုက်ကြစမ်း။ ဒါက သေရုံပဲမလား။ မင်းတို့ ဘာကို ကြောက်နေကြတာလဲ"

​သူ့စကားလုံးများက ဟင်းလင်းပြင်ထဲ၌ ပဲ့တင်ထပ်သွားပြီး နံနက်ခင်း တာအိုဂိုဏ်းမှ တပည့်အားလုံးကို သူတို့၏ မျှော်လင့်ချက်မဲ့မှုများကြားမှ သူတို့ဘဝတွင် အကျယ်လောင်ဆုံးသော ဟိန်းဟောက်သံများကို ထုတ်လွှတ်စေခဲ့သည်။ သူတို့၏ မျက်လုံးများ နီမြန်းလာပြီး ရူးသွပ်ခြင်းထဲသို့ ကျဆင်းသွားကြတော့သည်။

​"ဒါက သေရုံပဲမလား" လူတစ်သောင်းကျော်က တစ်ပြိုင်တည်း ဟိန်းဟောက်လိုက်ကြရာ မိုးကြိုးထက်ပင် ကျယ်လောင်သော သူတို့၏ အသံများသည် စကြဝဠာ တစ်ခုလုံးကို တုန်ဟိန်းသွားစေခဲ့တော့သည်။

အခန်း ၁၀၅၆ ဒါ အဆင်ပြေရဲ့လား

ဟိန်းဟောက်သံများက နဂါးငွေ့တန်းထဲ၌ ပဲ့တင်ထပ်သွားပြီး စကြဝဠာ တစ်ခုလုံးကို တုန်ဟိန်းသွားစေခဲ့သည်။

​အင်မော်တယ်များ မဟာမိတ်တွင် ကျင့်ကြံသူ သောင်းချီ ကျန်ရှိနေသေးသည်။ သူတို့ နောက်ကွယ်တွင် မြင့်မြတ်သော ကျောင်းတော်၏ ဧရာမ မျက်လုံးတော်ကြီး ရှိနေပြီး အောက်တွင်မူ ပိုင်ဟု အမည်ရသော အမျိုးသား ရှိနေသည်။ သူက စောစောက အော်ဟစ်နေခဲ့သည့် နံနက်ခင်း တာအိုဂိုဏ်းမှ မဟာဂိုဏ်းအကြီးအကဲကို စိုက်ကြည့်နေခဲ့သည်။

​'နံနက်ခင်း တာအိုဂိုဏ်းဆိုတာ ကျဆုံးဖို့ ကံဖန်လာတဲ့ ဂိုဏ်းတစ်ဂိုဏ်းပဲ။ ဒါပေမဲ့ တကယ်တမ်းကျတော့ အဲဒီထဲမှာ အစွမ်းထက်တဲ့ စစ်သည်တော် အတော်များများ ရှိနေသေးတာပဲ' ပိုင်ဟု အမည်ရသော အမျိုးသားက နှလုံးသားထဲ၌ သက်ပြင်းချလိုက်သည်။ သူတို့က နံနက်ခင်း တာအိုဂိုဏ်းနှင့် နှစ်ပေါင်းရာချီ တိုက်ခိုက်ခဲ့ကြသော်လည်း အကျပ်ရိုက်သွားသည့် အချိန်တိုင်း ဤကဲ့သို့သော လူတစ်ယောက်က ထွက်ပေါ်လာတတ်စမြဲ ဖြစ်သည်။

​သူ အော်ဟစ်လိုက်သည့် စကားလုံးများ နောက်ကွယ်က အကြောင်းအရင်းနှင့် ရှေ့ထွက်လာသည့် အကြောင်းအရင်းမှာ သူ့မိသားစုဝင်များက နံနက်ခင်း တာအိုဂိုဏ်း၏ ထိန်းချုပ်မှုအောက်ရှိ နယ်မြေထဲတွင် ရှိနေပြီး သူတို့ ဆက်လက် ရှင်သန်နိုင်ရန်အတွက် အတင်းအကျပ် လုပ်ဆောင်ရခြင်း ဖြစ်လျှင်ပင် ၎င်းက လေးစားထိုက်သည့် အရာတစ်ခု ဖြစ်နေဆဲပင်။

​အင်မော်တယ်များ မဟာမိတ်သည် ကြီးမားသော အင်အား ရှိသည်ဟု ထင်ရသော်လည်း အမှန်တကယ်တွင် ဤကဲ့သို့သော သူမျိုး သူတို့ကြားတွင် တစ်ခါမျှ မပေါ်ပေါက်ခဲ့ဖူးချေ။

​'နှမြောစရာပဲ...' ပိုင်ဟု အမည်ရသော အမျိုးသားက ခေါင်းခါလိုက်သည်။

​"စစ်ရထားတွေကို ကိုယ့်ကိုယ်ကိုယ် ဖျက်ဆီးခိုင်းလိုက်။ ဒီလူတွေက ရူးနေကြမှတော့ သူတို့ကို အဲဒီရူးသွပ်မှုထဲကနေ နိုးထလာအောင် လုပ်လိုက်" ပိုင်ဟု အမည်ရသော အမျိုးသားက ထိုစကားများကို ပြောလိုက်သည့်အခါ သူ့နောက်ကွယ်ရှိ လူတစ်ယောက်က စစ်သည်များထံ ချက်ချင်း အမိန့်ပေးလိုက်သည်။

​ခဏအကြာတွင် စစ်မြေပြင်ထဲသို့ သတ်ဖြတ်မှုများ ယူဆောင်လာသည့် ဧရာမ စစ်ရထား ကိုးစင်းသည် ကျယ်လောင်သော အသံကြီးနှင့်အတူ ပြိုကျသွားခဲ့သည်။ ၎င်းတို့ တစ်ခုစီတိုင်းကို ဓားပေါင်း သိန်းချီဖြင့် ဖွဲ့စည်းထားခြင်း ဖြစ်သည်။ စစ်ရထား ကိုးစင်းသည် ဓားပေါင်း သန်းချီနှင့် ညီမျှပြီး ၎င်းတို့အားလုံးက ကျယ်လောင်သော မြည်ဟည်းသံများနှင့်အတူ အရပ်မျက်နှာအနှံ့ ပစ်လွှတ်ရန် လေပြင်းတစ်ရပ်ကို ဖန်တီးလိုက်ကြသည်။

​သန်းချီသော ဓားများ ပစ်လွှတ်လိုက်ခြင်းက ကျင့်ကြံသူများ အတွက်မူ ကပ်ဘေး တစ်ခုပင်။ နံနက်ခင်း တာအိုဂိုဏ်းမှ တပည့် တစ်သောင်းခန့်သာ ကျန်ရှိတော့ပြီး စစ်ရထားများ ပြိုကျသွားသည့် အခိုက်အတန့်တွင် စူးရှသော အော်ဟစ်သံများက ထိုနယ်မြေထဲရှိ အသံအားလုံးကို လွှမ်းမိုးသွားခဲ့သည်။ ယင်းက လူအများအပြား ပြုလုပ်ခဲ့သည့် နောက်ဆုံးအသံ ဖြစ်သည်။

​လူ ခုနစ်ထောင်ခန့် အသားစအသားနများ အဖြစ်သို့ ပြောင်းလဲသွားခဲ့သည်။ သူတို့၏ အော်ဟစ်သံများနှင့်အတူ စကြဝဠာထဲမှ ထာဝရ ပျောက်ကွယ်သွားခဲ့ကြသည်။ သူတို့၏ ခန္ဓာကိုယ်များနှင့် စိတ်ဝိညာဉ်များ ဖျက်ဆီးခံလိုက်ရသည်။

​"ဒါက သေရုံပဲမလား" ထိုဝါကျကို အလွယ်တကူ ပြောဆိုနိုင်သော်လည်း ကတိစကားများနှင့် တူညီသည့် အချို့သော စကားလုံးများ ရှိနေသည်။ ၎င်းတို့ကို မပြောဆိုမီတွင် လူတစ်ယောက်သည် သူတို့၏ ပိုင်ရှင်ဖြစ်ပြီး ပြောဆိုပြီးသည်နှင့် ပြောဆိုသူသည် ထိုစကားလုံးများ၏ အစေခံ ဖြစ်သွားရသည်။

​လူ ခုနစ်ထောင် သေဆုံးသွားခဲ့သည်။ ကျန်ရှိနေသည့် နံနက်ခင်း တာအိုဂိုဏ်းမှ တပည့် ငါးထောင်ခန့်မှာ စောစောက ထိုစကားလုံးများကို အော်ဟစ်ခဲ့လျှင်ပင် သူတို့ ခေါင်းပေါ်သို့ ရေအေး လောင်းချခံလိုက်ရသလို ခံစားလိုက်ရသည်။ သူတို့ တုန်ရီသွားရင်း ဆက်လက် ဆုတ်ခွာသွားကြပြီး စိတ်ဓာတ်ပြိုလဲတော့မည့် အရိပ်အယောင်များကို မြင်တွေ့နေရသည်။

​"စစ်ရထားတွေ... ငါတို့က ဒီနေရာကို ကာကွယ်ဖို့ တပ်စွဲထားတဲ့ လူတွေပဲ ဖြစ်တယ်။ ငါတို့က စစ်နန်းဆောင်က မဟုတ်လို့ ငါတို့မှာ စစ်လက်နက်တွေ မရှိဘူး။ သူတို့က ဒေသအသီးသီးက လာတဲ့ ကျင့်ကြံသူတွေသာ ဖြစ်ပေမဲ့ ဓားစစ်ရထား ကိုးစင်းကို ပိုင်ဆိုင်ထားကြပြီ..." ဂိုဏ်းအကြီးအကဲ နန်းဆောင်မှ မဟာဂိုဏ်းအကြီးအကဲက စိတ်ပျက်လက်ပျက် ရယ်မောလိုက်ရင်း ဖရိုဖရဲ ဖြစ်နေသော နံနက်ခင်း တာအိုဂိုဏ်းမှ တပည့်များကို ကြည့်လိုက်သည်။ ထို့နောက် သူက ရှေ့သို့ ပြေးဝင်သွားသည့် အလင်းတန်းရှည် တစ်တန်းအဖြစ် ပြောင်းလဲသွားရန် ခုန်တက်လိုက်သည်။

​ထိုအလင်းတန်းရှည်သည် မီးတောက်ဆီသို့ ပျံသန်းသွားသည့် ပိုးဖလံတစ်ကောင်နှင့် တူသည်။ သေချာပေါက် သေရမည်ကို သိနေသော်လည်း ဆက်လုပ်နေဆဲပင်။

​သူသည် စိတ်လှုပ်ရှားဖွယ် စကားလုံးများကို မပြောဆိုသလို မရေရွတ်ခဲ့ပေ။ သေလိုသည့် ဆန္ဒအကြောင်းကိုလည်း ထပ်မံ မအော်ဟစ်ခဲ့ပေ။ ထိုအရာအားလုံးက လိုအပ်တော့မည် မဟုတ်ချေ။ အကယ်၍ ထွက်ပြေးနေသူ ရှိလျှင် သူတို့ကို ထွက်ပြေးခွင့် ပေးလိုက်မည်။ သို့သော် သူကမူ ထွက်ပြေး၍ မရနိုင်ချေ။ သူသည် နံနက်ခင်း တာအိုဂိုဏ်းအတွက် ပြေးဝင်သွားခြင်း မဟုတ်သလို သူ့ကိုယ်သူအတွက် လုပ်ဆောင်နေခြင်းလည်း မဟုတ်ပေ။ ယင်းအစား သူ့မိသားစုဝင်များ၊ သူ့ကလေးများနှင့် သူ့ဆွေမျိုးများ အားလုံးအတွက် လုပ်ဆောင်နေခြင်း ဖြစ်သည်။

​'ငါ့ရဲ့ သေဆုံးမှုနဲ့ ငါ့မိသားစုအပေါ် နံနက်ခင်း တာအိုဂိုဏ်းရဲ့ သည်းခံခွင့်လွှတ်မှုကို ဝယ်ယူနိုင်လိမ့်မယ်။ ဒါက... တန်ပါတယ်' အဘိုးအို၏ မျက်လုံးများက သွေးဆာနေသလို နီမြန်းသွားခဲ့သည်။ ရူးသွပ်မှု၊ ပြတ်သားသော ဆုံးဖြတ်ချက်တို့နှင့်အတူ အင်မော်တယ်များ မဟာမိတ် ပိုင်ဆိုင်သည့် စခန်းဆီသို့ သူ ပြေးဝင်သွားခဲ့သည်။

​"မင်းတို့ နှစ်ယောက် တိုက်ခိုက်လိုက်။ သူက ဒီကို သေချင်လို့ လာတာဆိုတော့ လဖျက်ဆီးခြင်း မိုးကြိုးနဲ့ သူ့အသက်ကို အဆုံးသတ်လိုက်ကြ။ မင်းတို့ရဲ့ ကျင့်ကြံခြင်း အဆင့်က သူ့လောက် မမြင့်ဘူးဆိုရင်တောင် သူ ရှောင်မှာ မဟုတ်ဘူး" မီးတောက်ဆီ ပျံသန်းလာသည့် ပိုးဖလံကဲ့သို့ အဝေးမှ သူတို့ထံ ပြေးဝင်လာသော အဘိုးအိုကို စိုက်ကြည့်ရင်း ပိုင်ဟု အမည်ရသော အမျိုးသားက ပြောလိုက်သည်။

​"ငါတို့ ဒီတိုက်ပွဲကို စောစော အဆုံးသတ်လို့ရပြီ" ပိုင်ဟု အမည်ရသော အမျိုးသားက ခေါင်းမော့ကာ သူ့အထက်ရှိ ဧရာမ မျက်လုံးကြီးကို စိုက်ကြည့်လိုက်ပြီး သူ့မျက်လုံးများထဲတွင် ရွံရှာမှု အရိပ်အယောင် တစ်ခု ပေါ်လာခဲ့သည်။

​သို့သော် သူ အပေါ်သို့ မော့ကြည့်လိုက်သည့် အခိုက်အတန့်တွင် စစ်မြေပြင်၌ ဆူညံသံ တစ်သံက ရုတ်တရက် ထွက်ပေါ်လာခဲ့သည်။ ထိုအသံသည် နံနက်ခင်း တာအိုဂိုဏ်းရှိ သူများနှင့် အင်မော်တယ်များ မဟာမိတ်မှ သူများထံမှ ထွက်ပေါ်လာခြင်း ဖြစ်သည်။

​ထိုဆူညံသံများနှင့်အတူ စိတ်လှုပ်ရှားဖွယ် အော်ဟစ် အားပေးသံများက ထိုနယ်မြေ တစ်လျှောက် ပျံ့နှံ့သွားခဲ့သည်။

​"ငါတို့ရဲ့ စစ်ကူတွေ ရောက်လာပြီဟေ့"

​"ဒါက ဂိုဏ်းက စစ်သင်္ဘောတွေပဲ။ ဂိုဏ်းက လူတွေ ငါတို့ကို ကယ်ဖို့ ရောက်လာကြပြီ"

​ထိုအသံများ နယ်မြေထဲ၌ ပဲ့တင်ထပ်သွားသည့်အခါ သေခြင်းကို ရှာဖွေနေသည့် မဟာဂိုဏ်းအကြီးအကဲပင် ရပ်တန့်သွားပြီး ခေါင်းလှည့်ကြည့်လိုက်သည်။

​သူက နဂါးငွေ့တန်းကို ဖြတ်သန်း၍ ရှေ့သို့ ပြေးဝင်လာသော စစ်သင်္ဘော ရာပေါင်းများစွာနှင့်အတူ ထိုအတွင်းရှိ ကျင့်ကြံသူ တစ်သောင်းနီးပါးကို မြင်လိုက်ရသည်။ သူ့မျက်လုံးများထဲတွင် စိတ်လှုပ်ရှားမှုများ တောက်ပသွားသော်လည်း သူတို့ နောက်ကွယ်ကို ကြည့်လိုက်သည့်အခါ မည်သည့်အရာမှ မရှိသည်အား တွေ့လိုက်ရသည်။

​'ဒီလောက်လူပဲ ရှိတာလား...'

​သူ နာကျင်ခံစားနေရချိန်တွင် သူ့ပတ်ဝန်းကျင်ရှိ ဆူညံသံများက တဖြည်းဖြည်း ငြိမ်သက်သွားခဲ့သည်။ ထောင်ပေါင်းများစွာသော နံနက်ခင်း တာအိုဂိုဏ်း ကျင့်ကြံသူများထံတွင် မျှော်လင့်ချက်မဲ့မှုများ ထပ်မံ မြင့်တက်လာခဲ့သည်။ စောစောကပင် ရူးသွပ်မှုကို ဖြတ်သန်းပြီးနောက် သန်းပေါင်းများစွာသော ဓားများဖြင့် ငြိမ်းသတ်ခံလိုက်ရပြီး စိတ်ဓာတ်ပြိုလဲမည့် အရိပ်အယောင်များ မပေါ်လာမီ စစ်သင်္ဘော ရာပေါင်းများစွာ ပေါ်လာသည့်အခါ စိတ်လှုပ်ရှားမှုများ ထပ်မံ လောင်ကျွမ်းလာခဲ့သည်။ သို့သော် သင်္ဘော ရာပေါင်းများစွာသာ ရှိသည်ကို မြင်လိုက်ရသည့်အခါ ထိုစိတ်လှုပ်ရှားမှုက ရက်စက်စွာ ထပ်မံ ငြိမ်းသတ်ခံလိုက်ရသည်။ ဤကဲ့သို့သော အတက်အကျများသည် သူတို့၏ တိုက်ခိုက်လိုစိတ် ရှိသမျှ အားလုံးကို ဆွဲယူသွားခဲ့သည်။ ထွက်ပြေးရန်နှင့် လူစုခွဲရန် အတွေးက ထိုကျင့်ကြံသူ အားလုံးနီးပါးတွင် ချက်ချင်း ဖြစ်တည်လာခဲ့သည်။

​သူတို့ လူစုခွဲသွားချိန်တွင် အင်မော်တယ်များ မဟာမိတ်မှ သောင်းချီသော ကျင့်ကြံသူများ၏ မျက်လုံးထဲ၌ သတ်ဖြတ်လိုသော အငွေ့အသက်များ ပေါ်လာခဲ့ပြီး ထိုအခိုက်အတန့်တွင် သူတို့၏ အကြည့်များက စစ်သင်္ဘော ရာပေါင်းများစွာထံ စူးစိုက်သွားခဲ့သည်။

​ပိုင်ဟု အမည်ရသော အမျိုးသားက သူ့အထက်ရှိ ဧရာမ မျက်လုံးကြီးထံမှ အကြည့်ကို လွှဲလိုက်ပြီး အဝေးရှိ စစ်သင်္ဘော ရာပေါင်းများစွာဆီသို့ လှမ်းကြည့်လိုက်သည်။

​"သူတို့က နံနက်ခင်း တာအိုဂိုဏ်းက စစ်ကူတွေ မဟုတ်ဘူး။ မဟုတ်ရင် ဒီလူတွေကိုပဲ လွှတ်လိုက်မှာ မဟုတ်ဘူး။ သူတို့က ဒီအတိုင်း ဖြတ်သွားတာ ဖြစ်ရမယ်။ ဒါပေမဲ့ ဒီကို ရောက်နေပြီဆိုတော့ သူတို့ကို နေခိုင်းလိုက်ပါ" ပိုင်ဟု အမည်ရသော အမျိုးသားက တည်ငြိမ်စွာ ပြောလိုက်သည်။

​စုမင်သည် သင်္ဘောဦးပိုင်း၌ ရပ်နေပြီး သူ့ရှေ့ရှိ စစ်မြေပြင်ကို စိုက်ကြည့်နေခဲ့သည်။ အင်မော်တယ်များ မဟာမိတ်မှ သောင်းချီသော ကျင့်ကြံသူများအား မြင်တွေ့ရသလို လူစုကွဲနေသော ထောင်ပေါင်းများစွာသော နံနက်ခင်း တာအိုဂိုဏ်းမှ ကျင့်ကြံသူများကိုလည်း မြင်တွေ့ရသည်။ ထို့ပြင် နဂါးငွေ့တန်းထဲတွင် ပြည့်နှက်နေသော အပိုင်းပိုင်း ပြတ်တောက်နေသည့် အသားစအသားန အမြောက်အမြားနှင့်အတူ ထိုနယ်မြေရှိ ထူထပ်သော သွေးညှီနံ့များကိုပါ သူ မြင်တွေ့ခံစားလိုက်ရသည်။

​"ငါ့မှာ အလံ ရှိလား" စုမင်က ရုတ်တရက် မေးလိုက်သည်။

​ရွှီဟွေမှာ ခဏမျှ အံ့အားသင့်သွားခဲ့သည်။ အမှောင် အစောင့်အရှောက် ကိုးယောက်အနက် အသက်အကြီးဆုံး အဘိုးအို၏ မျက်လုံးများက ချက်ချင်း လင်းလက်သွားခဲ့သည်။ သူက ညာလက်ကို မြှောက်ကာ သူ့ခန္ဓာကိုယ်အား ပုတ်လိုက်သည်။ သူ့လက်ထဲတွင် အဝတ်စရှည်ကြီး တစ်စ ပေါ်လာပြီး ဟင်းလင်းပြင်ထဲ၌ မျောပါသွားသည့်အခါ ယင်းက ပေပေါင်း ထောင်ချီ ရှည်လျားကြောင်း ထင်ရှားသွားခဲ့သည်။

​"မင်းသား... ကျွန်တော်တို့မှာ အလံ မရှိပါဘူး။ ဒါပေမဲ့ မင်းသား လိုအပ်တယ်ဆိုရင် အခုချက်ချင်း ရိုးရိုးရှင်းရှင်း တစ်ခု လုပ်ပေးလို့ရပါတယ်"

​"အနီရောင် လိုချင်တယ်" စုမင်က ခပ်တိုးတိုး ပြောလိုက်သည်။

​ထိုအဘိုးအိုသည် လေထဲတွင် မျောပါနေသော သွေးများဖြင့် အနီရောင် ဆိုးရန် လက်ထဲရှိ အဝတ်စရှည်ကို သူ့ပတ်ပတ်လည်တွင် ချက်ချင်း လွှဲရမ်းလိုက်သည်။ ချက်ချင်းဆိုသလို သွေးနီရောင် အလံတစ်ခု ပုံပေါ်လာခဲ့သည်။

​"အလံကို ချိတ်ပြီး ငါ့နာမည်ကို အော်လိုက်။ ဒီလူတွေ အားလုံး မင်းတို့ ဘယ်သူ့ လက်အောက်ခံလဲဆိုတာ သိပါစေ။ ပြီးတော့ ငါ့ဘေးမှာ ဆက်နေခွင့် ရှိမရှိ ဆိုတာကိုလည်း ငါ့ကို ပြကြစမ်း"

​စုမင် စကားပြောလိုက်သည့်အခါ သူ့စကားလုံးများက စစ်သင်္ဘောများပေါ်ရှိ ကျင့်ကြံသူ အားလုံး၏ နားထဲသို့ ရောက်ရှိသွားပြီး သူတို့၏ မျက်လုံးများထဲတွင် တောက်ပသော အလင်းတန်း တစ်တန်းကို လင်းလက်သွားစေခဲ့သည်။

​ထိုအဘိုးအိုက စုမင်၏ စစ်သင်္ဘောပေါ်တွင် သွေးနီရောင် စစ်အလံကို ချိတ်ဆွဲလိုက်သည်။ တစ်ချက် လွှဲရမ်းလိုက်သည်နှင့် ပေပေါင်း ထောင်ချီ ရှည်လျားသော အလံက လေမရှိဘဲ ဟင်းလင်းပြင်ထဲ၌ တလွင့်လွင့် လှုပ်ခတ်သွားခဲ့ပြီး ထိုအခိုက်အတန့်တွင် စစ်သင်္ဘော ရာပေါင်းများစွာထံမှ ကျယ်လောင်သော အသံတစ်သံ ထွက်ပေါ်လာခဲ့သည်။ ထို့နောက် သူတို့ထံမှ အလင်းတိုင် အရေအတွက် တူညီစွာ ပစ်လွှတ်လိုက်သည်။ သူတို့ စစ်မြေပြင်ထဲသို့ ပြေးဝင်သွားသည့် အခိုက်အတန့်တွင် စစ်သင်္ဘောများပေါ်ရှိ ကျင့်ကြံသူ အားလုံးက တစ်ပြိုင်နက်တည်း ရှေ့သို့ တစ်လှမ်း တိုးလိုက်ကြပြီး စစ်မြေပြင်ထဲသို့ အတူတကွ ပြေးဝင်သွားသော အလင်းတန်းရှည် တစ်သောင်းနီးပါးအဖြစ် ပြောင်းလဲသွားခဲ့သည်။

​"တာအိုခုန်း"

​ထိုလူများက ပြေးထွက်သွားသည့် အခိုက်အတန့်တွင် တစ်ပြိုင်တည်း ဟိန်းဟောက်လိုက်ကြသည်။ သူတို့က နာမည်တစ်ခုကို အော်ဟစ်လိုက်ပြီး သူတို့၏ အသံများက နဂါးငွေ့တန်းအား တုန်ဟိန်းသွားစေခဲ့သည်။ ထိုစကားလုံးများက မိုးကြိုးကဲ့သို့ အရပ်မျက်နှာအနှံ့ ပဲ့တင်ထပ်သွားသည့်အခါ လူစုကွဲသွားပြီ ဖြစ်သည့် ထောင်ပေါင်းများစွာသော နံနက်ခင်း တာအိုဂိုဏ်းမှ တပည့်များ၏ နှလုံးသားထဲသို့ ကျရောက်သွားခဲ့သည်။ အင်မော်တယ်များ မဟာမိတ်မှ ကျင့်ကြံသူများ၏ နားထဲသို့လည်း ရောက်ရှိသွားခဲ့သည်။

​ထိုအသံများက စိတ်လှုပ်ရှားစွာဖြင့် ထကြွလာခဲ့သည်။ ပြေးထွက်လာသော လူတစ်သောင်းနီးပါးက ဖန်တီးလိုက်သည့် အဟုန်နှင့် ပေါင်းစပ်သွားသည့်အခါ သူတို့ကို ဖော်ပြနိုင်သည့် စကားစု တစ်ခုတည်းသာ ရှိတော့သည်။

​ကျားရိုင်းများနှင့် ဝံပုလွေများကဲ့သို့ ကြမ်းကြုတ်ခက်ထန်ခြင်း။

​ကျယ်လောင်သော ပေါက်ကွဲသံများက နဂါးငွေ့တန်းကို တုန်လှုပ်သွားစေသည်။ စစ်သင်္ဘောများမှ အလင်းတိုင် ရာပေါင်းများစွာသည် ဖျက်ဆီးလိုသော အငွေ့အသက်များကို သယ်ဆောင်လာပြီး စစ်မြေပြင်ရှိ မုန်တိုင်းထဲသို့ ထိုးဖောက်ဝင်ရောက်သွားခဲ့သည်။ ယင်းက ဟင်းလင်းပြင်ထဲ၌ ပဲ့တင်ထပ်သွားသည့်အခါ စုမင်၏ စီရင်ပိုင်ခွင့်အောက်ရှိ ကျင့်ကြံသူ တစ်သောင်းနီးပါး ချဉ်းကပ်လာပြီး ရူးသွပ်သော တိုက်ပွဲကို စတင်လိုက်ကြသည်။

​သုံးရက်ကြာ တိုက်ခိုက်ခဲ့ရသဖြင့် မောပန်းနွမ်းနယ်နေသော သောင်းချီသော သူများနှင့် ကျင့်ကြံသူ တစ်သောင်းနီးပါး ဝင်တိုက်မိသည့် အခိုက်အတန့်တွင် အဆုံးမဲ့ တိုက်ပွဲတစ်ပွဲ စတင်ခဲ့ပြီ ဖြစ်သည်။

​နံနက်ခင်း တာအိုဂိုဏ်းမှ ကျင့်ကြံသူများ လူစုကွဲသွားသော်လည်း ထိုမြင်ကွင်းကို မြင်လိုက်ရသည့်အခါ သူတို့ တုံ့ဆိုင်းသွားခဲ့ကြသည်။ ဆက်တိုက်ခိုက်ရမည်လော ဆက်ပြေးရမည်လော သူတို့ မသိကြသော်လည်း သူတို့ နားထဲတွင် ပဲ့တင်ထပ်နေသော သွေးနီရောင် အလံနှင့် တာအိုခုန်း ဟူသည့် နာမည်က သူတို့ နှလုံးသားထဲရှိ ငြိမ်းသတ်သွားသော တိုက်ခိုက်လိုစိတ်ကို တဖြည်းဖြည်း ပြန်လည် လောင်ကျွမ်းလာစေခဲ့သည်။

​ဂိုဏ်းအကြီးအကဲ နန်းဆောင်မှ မဟာဂိုဏ်းအကြီးအကဲသည် ဝင်ရောက်လာသော ကျင့်ကြံသူများနှင့် လွင့်ပျံနေသော သွေးနီရောင် စစ်အလံကို မြင်တွေ့လိုက်ရသည်။ ထိုကျင့်ကြံသူ တစ်သောင်းနီးပါး ဟိန်းဟောက်လိုက်သော နာမည်ကိုလည်း သူ ကြားလိုက်ရသဖြင့် မည်သည့် တုံ့ဆိုင်းမှုမျှ မရှိဘဲ စုမင် ရပ်နေသည့် စစ်သင်္ဘောဆီသို့ ပြေးဝင်လာသော အလင်းတန်းရှည် တစ်တန်းအဖြစ် ပြောင်းလဲသွားခဲ့သည်။

​ထိုအချိန်တွင် အမှောင် အစောင့်အရှောက် အဘိုးအို ကိုးယောက်က အတူတကွ ပျံသန်းသွားကြသော်လည်း သူတို့က စစ်သင်္ဘောထဲသို့ ပြေးဝင်မသွားကြပေ။ ယင်းအစား အစွမ်းထက် စစ်သည်တော် ဒါဇင်ပေါင်းများစွာ ပြင်းထန်စွာ တိုက်ခိုက်နေကြသည့် သူတို့ အထက်ရှိ နဂါးငွေ့တန်းထဲသို့ ပျံသန်းသွားကြသည်။

​ထိပ်ပြောင်ကြိုးကြာ၏ မျက်လုံးများက တောက်ပသွားခဲ့သည်။ လှုပ်ရှားမှု တစ်ချက်ဖြင့် သူက အရိပ်အယောင်မရှိ ပျောက်ကွယ်သွားခဲ့သည်။ စုမင် တစ်ယောက်တည်းသာ မည်သည့် အငွေ့အသက်မျှ မရှိဘဲ အပိုင်းပိုင်း ပြတ်တောက်နေသော အသားစအသားနများနှင့် ပြတ်တောက်နေသော ခြေလက်များကြားမှ ဖြတ်သန်းရင်း စစ်မြေပြင်ဆီသို့ လျင်မြန်စွာ ချဉ်းကပ်လာသော လက်တစ်ဖက်၏ တစ်ဝက်ကို မြင်တွေ့နိုင်ခဲ့သည်။

​မီးတောက်မိစ္ဆာ ဘိုးဘေးက နှုတ်ခမ်းကို ပြင်းထန်စွာ သပ်ရင်း တဟားဟား ရယ်မောလိုက်သည်။ သူ့မျက်လုံးထဲတွင် သွေးဆာမှုများ ပေါ်လာခဲ့သည်။ သူက စုမင်ထံသို့ ကြည့်လိုက်ပြီး စုမင် ခေါင်းညိတ်ပြသည်ကို မြင်သောအခါ သူက ရှည်လျားစွာ ရယ်မောလိုက်ပြီး သူ့စွမ်းအား အပြည့်အဝအား မထုတ်ဖော်ရန် ဆုံးဖြတ်လိုက်သည်။ ယင်းအစား လကပ်ဘေး အဆင့်သာ ရှိသော စွမ်းအားကို ပြသလိုက်သည်။ အခြားသူများကို ထွက်ပြေးသွားစေမည့် တန်ခိုးရှင် တစ်ဦး၏ ကြီးမားသော ဖိအားကို ထုတ်ဖော်ပြသလိုခြင်း မရှိသည်မှာ ထင်ရှားပြီး သူက လှုပ်ရှားမှု တစ်ချက်ဖြင့် ထွက်ခွာသွားခဲ့သည်။ ယင်းအစား သိုးရေခြုံထားသော ဝံပုလွေ တစ်ကောင် ဖြစ်ရသည့် ပျော်ရွှင်မှုကို သူ ခံစားချင်နေခဲ့သည်။

​"ဒါ အဆင်ပြေရဲ့လား" ရွှီဟွေက စုမင်ကို တစ်ချက်ကြည့်ရင်း တိုးညှင်းစွာ ရယ်မောလိုက်သည်။

​"သူတို့ကို နည်းနည်း ဒေါသဖြေခိုင်းရမှာပေါ့" စုမင်က သူမကို ပြန်ကြည့်ရင်း ခပ်ဖျော့ဖျော့ ပြုံးလိုက်သည်။

​ရွှီဟွေနှင့် စုမင်တို့သည် တစ်ယောက်မျက်လုံးကို တစ်ယောက် စိုက်ကြည့်နေကြပြီး သူမ၏ မျက်လုံးများထဲတွင် ပုံမှန်အားဖြင့် မပေါ်လာတတ်သည့် ကြင်နာမှုတစ်ခု ပေါ်လာခဲ့သည်။ သူမက ပါးစပ်ကို အုပ်ကာ ရယ်မောလိုက်သော်လည်း နဂါးငွေ့တန်းထဲ၌ မျောပါနေသော ဧရာမ မျက်လုံးကြီးကို မြင်လိုက်ရသည့်အခါ သူမ၏ ပျော်ရွှင်မှုများ ချက်ချင်း ပျောက်ကွယ်သွားပြီး သူမ မျက်တောင်များ ကျုံ့ဝင်သွားခဲ့သည်။

​"အဲဒါ ဘာကြီးလဲ" စုမင်၏ အကြည့်ကလည်း ဧရာမ မျက်လုံးကြီးပေါ်သို့ ကျရောက်သွားခဲ့သည်။ ထိုအခိုက်အတန့်တွင် ၎င်းက သူ့ကို စိုက်ကြည့်နေသည်ဟု ဝေဝါးသော ခံစားချက်တစ်ခု ရရှိလိုက်သည်။

​ထိုအရာက စုမင်၏ တတိယမြောက် မျက်လုံးနှင့် ကွာခြားသည်။ သူ့တတိယမြောက် မျက်လုံးက ကိုယ်ပိုင် ဉာဏ်ရည်ကို ပိုင်ဆိုင်ထားသော်လည်း ဧရာမ မျက်လုံးကြီးက တခြားသူများအား သက်မဲ့အရာတစ်ခုဟု ခံစားရစေသည်။ ယင်းက တစ်စုံတစ်ယောက်က အဝေးမှ ထိန်းချုပ်ထားသော မှော်ပစ္စည်း တစ်ခု ဖြစ်သည်မှာ ထင်ရှားသည်။

​"ဒါက အင်မော်တယ်များ မဟာမိတ်က မြင့်မြတ်တဲ့ ကျောင်းတော်ရဲ့ မျက်လုံးတော်ပါ။ ကျွန်တော်က အိုရန်ခုန်းပါ။ မင်းသားကို ဂါရဝပြုပါတယ်"

​စုမင်ကို အကြောင်းပြန်လိုက်သူမှာ အဝေးမှ သူ့ထံသို့ ပြေးဝင်လာသော ဂိုဏ်းအကြီးအကဲ နန်းဆောင်မှ မဟာဂိုဏ်းအကြီးအကဲ ဖြစ်သည်။ သူ ချဉ်းကပ်လာသောအခါ သင်္ဘောဦးပိုင်းရှိ ခွေးခေါင်းနှင့် သားရဲနှင့် တာအိုဖေးဖုန်း တို့ကို မြင်လိုက်ရသည်။ သူ့နှလုံးသား တုန်လှုပ်သွားသော်လည်း သူက အကြည့်ကို လွှဲလိုက်ပြီး စစ်သင်္ဘော အပြင်ဘက်မှ စုမင်အား နက်ရှိုင်းစွာ အရိုအသေပေးရန် လက်နှစ်ဖက်ကို ဆုပ်ကာ အရိုအသေပေးလိုက်သည်။

​စုမင် ခေါင်းညိတ်ပြလိုက်သည်။ သူ့အကြည့်က ဧရာမ မျက်လုံးကြီးပေါ်သို့ ကျရောက်သွားပြီးနောက် အောက်ဘက်သို့ အကြည့်လွှဲလိုက်ရာ ပိုင်ဟု အမည်ရသော အမျိုးသားကို မြင်လိုက်ရသည်။ ဆုမင် သူ့ကို မှတ်မိသွားသည့် အခိုက်အတန့်တွင် သူ့မျက်လုံးများထဲ၌ အံ့ဩသွားသော အလင်းတန်းတစ်ချက် တောက်ပသွားခဲ့သည်။

​'ပိုင်လင်း...'