အခန်း ၇၅

အခန်း ၇၅

နာရီဝက်ခန့် ကြာပြီးနောက်တွင်မူ ဟုတ်ဟုတ်၏ ခန္ဓာကိုယ်ပေါ်ရှိ ပြောင်းလဲမှုများမှာ ဖြည်းဖြည်းချင်း ရပ်တန့်သွားခဲ့သည်။ ယင်းက ဟုတ်ဟုတ်၏ သွေးထွက်ခြင်း စွမ်းရည်သည် သွေးနတ်ဆိုးစွမ်းရည်အဖြစ်သို့ အောင်မြင်စွာ ဆင့်ကဲပြောင်းလဲသွားခဲ့ပြီဟု ဆိုလိုပေသည်။

သွေးနတ်ဆိုးစွမ်းရည်သည် ယခင် သွေးထွက်ခြင်း စွမ်းရည်၏ စွမ်းရည်များကို ဆက်လက်ထိန်းသိမ်းထားရုံသာမက ပြိုင်ဘက်ကို ဒဏ်ရာရရှိစေပြီးနောက် အဆက်မပြတ် သွေးထွက်သံယိုဖြစ်ပွားစေနိုင်သည်။

ထို့အပြင် ၎င်းသည် သွေးအပေါ်တွင် လုံးဝဥဿုံ ထိန်းချုပ်နိုင်စွမ်းရှိသဖြင့် ပြိုင်ဘက်၏ သွေးလည်ပတ်မှုစနစ်ကို ပြင်းထန်စွာ နှောင့်ယှက်ဖျက်ဆီးနိုင်ပြီး ၎င်းတို့၏ တိုက်ခိုက်ရေးစွမ်းရည်ကို များစွာ ကျဆင်းသွားစေနိုင်သည်။

သာ၍ဆိုရသော် ၎င်းသည် မိမိ၏သွေးကို လှုံ့ဆော်ကာ သွေးနတ်ဆိုးအသွင်သို့ ကူးပြောင်းနိုင်ပြီး ၎င်း၏ အခြေခံစွမ်းရည်အားလုံးကို သုံးဆအထိ မြင့်တက်လာစေနိုင်သည့်အပြင် သွေးကို အဆက်မပြတ် စုတ်ယူစားသုံးခြင်းဖြင့်လည်း ဤသွေးနတ်ဆိုး အခြေအနေကို ရေရှည်ထိန်းသိမ်းထားနိုင်ပေသည်။

ဤစွမ်းရည်သည် ယခင် သွေးထွက်ခြင်း စွမ်းရည်ထက် အဆပေါင်းများစွာ ပိုမိုအစွမ်းထက်လှသည်။ ဤစွမ်းရည်ကြောင့် ဟုတ်ဟုတ်သည် အဆင့် ၂ လက်ရွေးစင်အဆင့် အလယ်အလတ်အဆင့်တွင်သာ ရှိနေသေးသော်လည်း ၎င်း၏ အစစ်အမှန် တိုက်ခိုက်ရေးစွမ်းရည်မှာ လက်ရွေးစင်အဆင့်အတွင်း၌ ပြိုင်ဘက်ကင်း ဖြစ်နေပြီ ဖြစ်သည်။

ဤစွမ်းရည်မှ ပေးစွမ်းသော အင်အားမြှင့်တင်မှုက ကြီးမားလွန်းလှသည်။ ရှားပါးဂုဏ်သတ္တိရှိသော အဆင့် ၂ နှောင်းပိုင်းအဆင့် သားရဲတစ်ကောင်ပင်လျှင် ဟုတ်ဟုတ်ကို အနိုင်ယူနိုင်ရန် မလွယ်ကူတော့ချေ။

အရာအားလုံးကို အတည်ပြုပြီးဖြစ်သော်လည်း ကျန်းဟန်သည် ၎င်းကို ကိုယ်တိုင် ထပ်မံစစ်ဆေးကြည့်ချင်သေးသည်။ သို့သော်လည်း သူ၏ ဖုန်းကို ကောက်ကိုင်လိုက်ရုံရှိသေး သူ၏ မျက်စိရှေ့မှောက်တွင် ပိုးစုန်းကြူးလေးများအလား တောက်ပနေသော စာတန်းများ ရုတ်တရက် ပေါ်ထွက်လာခဲ့သည်။

[သင်၏ သားရဲသည် သွေးနတ်ဆိုး၏ အသွင်ပြောင်းလဲခြင်းကို မိမိဘာသာ ပြီးမြောက်အောင်မြင်ခဲ့သဖြင့် အံ့ဖွယ်ဆင့်ကဲပြောင်းလဲခြင်း လမ်းကြောင်း ပြောင်းလဲသွားခဲ့သည်။

ဆင့်ကဲပြောင်းလဲခြင်း လမ်းကြောင်း ၁ - ညဉ့်ကိုယ်ပွား

အနက်ရောင် သေခြင်းတရားနယ်မြေတွင် သုံးရက်ဆက်တိုက် ကျင့်ကြံရမည်။ မိမိထက် အဆင့်မြင့်သော အနက်ရောင်သွေးလင်းနို့တစ်ကောင်ကို နေ့စဉ် အမဲလိုက်ကာ ၎င်း၏သွေးကို ခုနစ်ရက်ဆက်တိုက် သောက်သုံးရမည်။ ယင်းက ၎င်း၏ အမှောင်ဂုဏ်သတ္တိကို မြှင့်တင်ပေးပြီး ဆင့်ကဲပြောင်းလဲခြင်း တစ်ကြိမ် ပြီးမြောက်စေကာ ညဉ့်ကိုယ်ပွားစွမ်းရည်ကို ရရှိစေလိမ့်မည်။ ၎င်းသည် ညဘက်တွင် အရှိန်နှုန်းကို သုံးဆ မြှင့်တင်ပေးမည့်အပြင် အမှောင်အမျိုးအစားစွမ်းရည်များကို အသုံးပြုသည့်အခါ စိတ်ဝိညာဉ်စွမ်းအား ကုန်ဆုံးမှုကို ၁၀ ရာခိုင်နှုန်း လျှော့ချပေးမည် ဖြစ်သည်။

ဆင့်ကဲပြောင်းလဲခြင်း လမ်းကြောင်း ၂ - အနက်ရောင်မီးလျှံ သွေးငှက်၏ အသွင်ပြောင်းလဲခြင်း

အဆင့် ၃ ခေါင်းဆောင်အဆင့်သို့ ရောက်ရှိရမည်။ ပထမအကြိမ် ဆင့်ကဲပြောင်းလဲခြင်း ပြီးမြောက်ပြီးနောက် မြေအောက်အမှောင်မီးလျှံ ပတ်ဝန်းကျင်တစ်ခုကို ရှာဖွေကာ ထိုနေရာတွင် တစ်ဆယ့်ငါးရက်ကြာ ကျင့်ကြံရမည်။ ကျင့်ကြံစဉ်ကာလအတွင်း နေ့စဉ် အမှောင်မီးလျှံ ဒစ်ဂလက်ဆယ်ကောင်၏ နှလုံးနှင့် သွေးကို စားသုံးရမည်။ ယင်းကို ပြီးမြောက်ပြီးနောက် နေ့စဉ် မြေကမ္ဘာမီးလျှံ ပုံဆောင်ခဲငါးတုံးကို ငါးရက်ဆက်တိုက် စားသုံးရမည်ဖြစ်ပြီး တစ်ချိန်တည်းမှာပင် အထူးလေ့ကျင့်ခန်း အစုအဝေး သုံးရာကို ပြီးမြောက်အောင် လေ့ကျင့်ရမည်။

နောက်ဆုံးတွင် ၎င်းသည် ဆင့်ကဲပြောင်းလဲခြင်း တစ်ကြိမ်ကို ထပ်မံရရှိမည်ဖြစ်ပြီး ၎င်းအား မီးဂုဏ်သတ္တိစွမ်းအားကို ပေးစွမ်းနိုင်ကာ တိုက်ခိုက်မှုများက ရန်သူ၏သွေးကို လောင်ကျွမ်းစေသည့် သွေးလောင်ကျွမ်းခြင်း စွမ်းရည်ကို ပိုင်ဆိုင်စေမည် ဖြစ်သည်။

ဆင့်ကဲလဲပြောင်းခြင်း လမ်းကြောင်း ၃ - အနက်ရောင်မီးလျှံ သွေးငှက်၏ အသွင်ပြောင်းလဲခြင်း အပိုင်း ၂

အမှောင်မီးလျှံ သွေးတောင်တန်းကို ရှာဖွေရမည်။ ထိုတောင်ပေါ်တွင် အသက်ရှူလေ့ကျင့်ခန်း တစ်လကြာ ပြုလုပ်ရမည်ဖြစ်ပြီး အမှောင်မီးလျှံ သွေးတောင်တန်း၏ စွမ်းအားကို စုတ်ယူကာ အဆင့် ၄ အရှင်သခင်အဆင့်တည်ရှိမှုအဖြစ်သို့ တိုးတက်ရမည်။ တစ်လပြည့်ပြီးနောက် ၎င်းသည် အနက်ရောင်မီးလျှံ သွေးငှက်အဖြစ်သို့ ဆင့်ကဲပြောင်းလဲသွားနိုင်မည် ဖြစ်သည်။

ထိုအချိန်တွင် သွေးနတ်ဆိုး၊ ည၏ကိုယ်ပွားနှင့် သွေးလောင်ကျွမ်းခြင်းစွမ်းရည် သုံးခုစလုံးသည် တစ်ခုတည်းသော သွေးနတ်ဆိုးမီးလျှံ စွမ်းရည်အဖြစ်သို့ ပေါင်းစပ်သွားမည် ဖြစ်သည်။ ထိုနတ်ဆိုးမီးလျှံစွမ်းရည်သည် မူလစွမ်းရည်သုံးခုစလုံး၏ စွမ်းရည်များကို အမွေဆက်ခံရုံသာမက နက်နဲဆန်းကြယ်ခြင်းအဆင့် ဂုဏ်သတ္တိကိုပါ ပိုင်ဆိုင်စေမည်ဖြစ်ရာ အနက်ရောင်မီးလျှံ သွေးငှက်ကို ကြောက်မက်ဖွယ်ရာ တည်ရှိမှုတစ်ခု ဖြစ်လာစေလိမ့်မည်။ ၎င်း၏ အမွှေးအတောင်တိုင်း၊ သွေးတစ်စက်တိုင်းနှင့် စိတ်ဝိညာဉ်စွမ်းအား တိုင်းသည် အဆုံးမရှိသော မိစ္ဆာမီးလျှံ သွေးမီးတောက်များအဖြစ် ပြောင်းလဲသွားနိုင်ပြီး သက်ရှိခန္ဓာအားလုံးကို ပြာကျအောင် လောင်ကျွမ်းစေနိုင်မည် ဖြစ်သည်။ ]

ကျန်းဟန် သူ၏ ရှေ့တွင် ပေါ်လာသော စာတန်းအသစ်များကို ကြည့်ပြီး လုံးဝဥဿုံ အံ့အားသင့်မှင်တက်သွားခဲ့ရသည်။

သွေးနတ်ဆိုးစွမ်းရည်ကို မိမိဘာသာ အောင်မြင်စွာ ပြောင်းလဲနိုင်ခဲ့ခြင်းက ဤအချင်းချင်း ဆက်စပ်နေသော ဆင့်ကဲပြောင်းလဲခြင်း လမ်းကြောင်းအသစ် သုံးခုကို တိုက်ရိုက် ပြောင်းလဲပေးခဲ့ခြင်း ဖြစ်သည်။

ကျန်းဟန်သည် မူလက ဤကဲ့သို့ တစ်ခုနှင့်တစ်ခု အပြန်အလှန် ချိတ်ဆက်နေသော ဆင့်ကဲပြောင်းလဲခြင်း လမ်းကြောင်းမျိုးကို သဘောမကျခဲ့ပေ။ အဘယ်ကြောင့်ဆိုသော် ယင်းက သူ၏ စိတ်ကြိုက်ရွေးချယ်ပိုင်ခွင့် စွမ်းအားကို ဆုံးရှုံးစေသောကြောင့် ဖြစ်သည်။

သူသည် မတူညီသော လမ်းကြောင်း သုံးခုဆီသို့ ဦးတည်နေသည့် ဆင့်ကဲပြောင်းလဲခြင်းမျိုးကိုသာ ပိုမိုနှစ်သက်ပြီး ထိုမှသာ သူ၏ ဆန္ဒအလျောက် ရွေးချယ်နိုင်မည် ဖြစ်သည်။

သို့သော်လည်း ဤဆင့်ကဲပြောင်းလဲခြင်း လမ်းကြောင်းကို ဖတ်ပြီးနောက်တွင်မူ ကျန်းဟန်သည် သူ စောစောက ပြောခဲ့သော စကားများကို အဓိပ္ပာယ်မရှိသော စကားများအဖြစ် ချက်ချင်းပင် သတ်မှတ်လိုက်တော့သည်။

လွတ်လပ်ခွင့် ရှိရှိ မရှိရှိ ဤလမ်းကြောင်းက သူ အနှစ်သက်ဆုံးသော ဆင့်ကဲပြောင်းလဲခြင်း လမ်းကြောင်းပင် ဖြစ်သည်။

ဤနောက်ဆုံးအဆင့်ဖြစ်သော အနက်ရောင်မီးလျှံ သွေးငှက်က တကယ့်ကို အစွမ်းထက်လွန်းလှသည်။ စာသားဖော်ပြချက်ကို မြင်ရုံမျှဖြင့် ကျန်းဟန်၏ စိတ်ကူးထဲတွင် ပုံရိပ်တစ်ခုက ပေါ်လွင်ထင်ရှားလာခဲ့ပြီ ဖြစ်လေသည်။

တကယ်လို့သာ ဤကဲ့သို့သော အနက်ရောင်မီးလျှံ သွေးငှက်မျိုး အမှန်တကယ် တည်ရှိလာခဲ့မည်ကို စဉ်းစားသာကြည့်ပါတော့။ ၎င်းအနေနဲ့ ကောင်းကင်ယံအမြင့်ဆီသို့ ပျံသန်းသွားပြီး အမွှေးအတောင်များကို ခါချလိုက်ရုံမျှဖြင့် အောက်ခြေရှိ ကျယ်ပြောလှတဲ့ မြေကမ္ဘာကြီးတစ်ခုလုံးဟာ ထိုအမွှေးအတောင်များမှ ပြောင်းလဲသွားသည့် အဆုံးမရှိသော မိစ္ဆာမီးလျှံ သွေးမီးတောက်များအောက်၌ ပြာကျလောင်ကျွမ်းသွားရပေလိမ့်မည်။ သွေးသားနှင့် အသက်ခန္ဓာရှိသည့် ဘယ်အရာမှ သေသည်အထိ လောင်ကျွမ်းခံရမယ့် ကံကြမ္မာကနေ ရုန်းထွက်လွတ်မြောက်နိုင်မည် မဟုတ်ချေ။

ထိုအရာက တကယ့်ကို အလွန်အမင်း ကြောက်မက်ဖွယ်ကောင်းသည့် ကွင်းလုံးကျွတ် တိုက်ခိုက်ရေး လူသတ်ကွက်ကြီးတစ်ခု ဖြစ်လာမည်ဖြစ်သည်။

ချက်ချင်းဆိုသလို တစ်ချက်တိုက်ခိုက်ရုံဖြင့် မြို့တစ်မြို့လုံးကို တိုက်ရိုက် အစအနဖျောက် ဖျက်ဆီးပစ်နိုင်သည်။ ထိုအရာသည် တွေးကြည့်ရုံနှင့် လူကို တုန်လှုပ်ခြောက်ခြားသွားစေလောက်အောင် အလွန်အမင်း ကြောက်စရာကောင်းလှသည်။

ထိုမျှလောက် အစွမ်းထက်သည့် အနက်ရောင်မီးလျှံ သွေးငှက်မျိုး ရှိနေမှတော့ ကျန်းဟန်အနေနှင့် တခြား အဓိပ္ပာယ်မရှိသည့် ဆင့်ကဲပြောင်းလဲခြင်း လမ်းကြောင်းများကို ဘာကြောင့် ထည့်သွင်းစဉ်းစားနေရဦးမည်နည်း။ ဤသည်မှာ အကောင်းဆုံး လမ်းကြောင်းပင် ဖြစ်သည်။ ဘာပဲဖြစ်ဖြစ် ဘယ်လိုအခြေအနေမျိုးမှာမဆို သူသည် အနက်ရောင်မီးလျှံ သွေးငှက် ဖြစ်လာအောင် မွေးမြူပျိုးထောင်မည်ဟု စိတ်ပိုင်းဖြတ်မှုကို ချက်ချင်းပင် ချလိုက်တော့သည်။

ဤအနက်ရောင်မီးလျှံ သွေးငှက်သည် ဒဏ္ဍာရီလာ နက်နဲဆန်းကြယ်အဆင့် မိစ္ဆာသားရဲဖြစ်သည့် ယမ်းမှုန့်ကျီးကန်းထက်ပင် အဆပေါင်းများစွာ ပိုမိုကြောက်မက်ဖွယ်ကောင်းလှသည်။ ဤသည်မှာ သေချာပေါက် မကြုံစဖူး ထူးခြားဆန်းသစ်သည့် ဆင့်ကဲပြောင်းလဲခြင်း လမ်းကြောင်းတစ်ခု ဖြစ်ပြီး အံ့ဖွယ်ဆင့်ကဲပြောင်းလဲခြင်း ပါရမီတစ်ခုတည်းကသာ ဤမျှလောက် ကြောက်စရာကောင်းသည့် လမ်းကြောင်းမျိုးကို တွက်ချက်ဖော်ထုတ်ပေးနိုင်ခြင်း ဖြစ်သည်။

ထို့အပြင် ကျန်းဟန် ခန့်မှန်းမိသည်မှာ အံ့ဖွယ်ဆင့်ကဲပြောင်းလဲခြင်း ပါရမီက ပံ့ပိုးပေးသည့် ဆင့်ကဲပြောင်းလဲခြင်း လမ်းကြောင်းမျသည် သားရဲအတွက် အမြဲတမ်း အသင့်တော်ဆုံး ဖြစ်နေပြီး ၎င်းတို့၏ အောင်းနေသည့် အလားအလာ ရှိသမျှအားလုံးကို အပြည့်အဝ ဆွဲထုတ်ပေးနိုင်စွမ်း ရှိသည်။

အံ့ဖွယ်ဆင့်ကဲပြောင်းလဲခြင်းလိုမျိုး လျှို့ဝှက်ဆန်းကြယ်ပြီး အတိုင်းအဆမရှိ နက်နဲလှသည့် ပါရမီမျိုးကသာ ယင်းကို စွမ်းဆောင်နိုင်ခြင်း ဖြစ်သည်။

လူသားများသာဆိုလျှင် အမြင့်ဆုံးအဆင့် မွေးမြူရေးပညာရှင်တစ်ဦးပင်လျှင် ဤကဲ့သို့သော ဆင့်ကဲပြောင်းလဲခြင်း လမ်းကြောင်းမျိုးကို စဉ်းစားဖော်ထုတ်နိုင်လိမ့်မည် မဟုတ်ကြောင်း ကျန်းဟန် ခံစားမိသည်။

“ပြင်ပနည်းလမ်းတွေကို သုံးပြီး အံ့ဖွယ်ဆင့်ကဲပြောင်းလဲခြင်း လမ်းကြောင်းကို ပြီးမြောက်အောင် လုပ်တာက ဆိုးကျိုးတွေ မဖြစ်စေတဲ့အပြင် ဆန့်ကျင်ဘက်အနေနဲ့ အံ့ဖွယ်ဆင့်ကဲပြောင်းလဲခြင်းရဲ့ တိုးတက်မှုနှုန်းကို ပိုပြီးတော့တောင် မြန်ဆန်စေတာပဲ။”

စိတ်ကို ပြန်လည်တည်ငြိမ်အောင် ထိန်းလိုက်ပြီးနောက် ကျန်းဟန် မိမိဘာသာ ရေရွတ်လိုက်သည်။ ယခုအခါ သူ ကိုယ်တိုင် စမ်းသပ်ကြည့်ပြီး ဤအချက်အလက်ကို သိရှိသွားခဲ့ပြီ ဖြစ်ရာ သူ ဘာကိုမျှ ကြောက်ရွံ့နေစရာ မလိုတော့ပေ။

နောင်အနာဂတ်တွင် ပြင်ပအားအင်များကို အသုံးပြုရန် သင့်တော်သော အံ့ဖွယ်ဆင့်ကဲပြောင်းလဲခြင်း လမ်းကြောင်းမျိုး ပေါ်လာခဲ့ပါက သူ ပြင်ပအားအင်ကိုသာ အသုံးပြုမည် ဖြစ်သည်။ ယင်းက ဖြစ်စဉ်ကို အမှန်တကယ်ပင် ပိုမိုမြန်ဆန်စေမည် မဟုတ်ပါလော။

“ဟုတ်ဟုတ်”

ကျန်းဟန် မိမိဘာသာ စကားပြောနေစဉ်မှာပင် ဟုတ်ဟုတ်သည်လည်း ၎င်း၏ နှစ်ခြိုက်စွာ အိပ်ပျော်နေရာမှ နိုးထလာခဲ့သည်။

၎င်းသည် အလေ့အထအရ အရင်ဆုံး ပတ်ဝန်းကျင်ကို ဝေ့ဝဲကြည့်ရှုလိုက်ပြီး ထို့နောက်တွင်မူ ၎င်းကိုယ်တိုင်၏ အသွင်ပြောင်းလဲမှုကို စစ်ဆေးရန် မတ်တတ်ရပ်လိုက်သည်။

“ဂူး”

မိမိခန္ဓာကိုယ်အတွင်းရှိ အဆမတန် ကြီးမားလှသော အသွင်ပြောင်းလဲမှုကို ခံစားမိသွားသောအခါ ဟုတ်ဟုတ်သည် ဝမ်းမြောက်ဝမ်းသာဖြင့် ခေါင်းမော့လိုက်ပြီး ၎င်း၏ ကိုယ်တိုင် ကြီးထွားမှုကို ကြွေးကြော်အောင်ပွဲခံနေသည့်အလား ရှိနေတော့သည်။

“ဘယ်လိုလဲ... မင်းရဲ့ သခင်က တော်တော်လေး အစွမ်းထက်တယ် မဟုတ်လား။”

ကျန်းဟန် ခေါင်းမော့ထားသော ဟုတ်ဟုတ်ကို ကြည့်ကာ ခပ်ဖွဖွ ရယ်မောလိုက်သည်။

“ဟုတ်”

ဟုတ်ဟုတ်က ချက်ချင်းပင် မျက်လုံးအဝိုင်းသားဖြင့် စွေစောင်းကြည့်လိုက်ပြီး ကျန်းဟန်ကို လုံးဝ အထင်မကြီးဟန် ပြသလိုက်သည်။

“မင်း အထင်ကြီးသည်ဖြစ်စေ မကြီးသည်ဖြစ်စေ အမှန်တရားကတော့ မင်းမျက်စိရှေ့မှာပဲ။”

ကျန်းဟန် ဟုတ်ဟုတ်ကို ကြည့်ပြီး ပုခုံးတွန့်ပြလိုက်၏။ ထို့နောက် စကားတစ်ခွန်း ထပ်မံဖြည့်စွက်လိုက်သည်။

“တကယ်လို့ မင်းက ခုထိ အညံ့မခံချင်သေးဘူးဆိုရင် ငါတို့ လောင်းကြေးထပ်ကြမလား။ တကယ်လို့ ငါနိုင်ရင် မင်း နောက်နောင် ငါ့ရဲ့ အမိန့်ပေးမှုတွေကို အကြွင်းမဲ့ နာခံရမယ်။ တကယ်လို့ ငါရှုံးရင်တော့ ငါက မင်းရဲ့ အမိန့်တွေကို နာခံမယ်။ ဘယ်လိုလဲ...။”

ထိုစကားကို ကြားလိုက်ရသောအခါ ဟုတ်ဟုတ်က ခေါင်းလှည့်ကြည့်လိုက်ပြီး နောက်ဆုံးတွင်တော့ ကျန်းဟန်ကို သေချာကြည့်လာခဲ့သည်။

“ဟုတ်....”

“ဟားဟား... မင်း သဘောတူရင် ရပြီ။ အခုကစပြီး မင်း ငါ့ညွှန်ကြားချက်အတိုင်းသာ လုပ်မယ်ဆိုရင် ဆယ်ရက်အတွင်းမှာ ည၏ကိုယ်ပွားဆိုတဲ့ အသွင်သစ် စွမ်းရည်တစ်ခုကို မင်း ရရှိအောင် ငါ လုပ်ပေးနိုင်တယ်။ တကယ်လို့ ငါ မလုပ်ပေးနိုင်ရင် အဲဒီအချိန်ကစပြီး ငါ မင်းစကားကိုပဲ နားထောင်တော့မယ်။”

ကျန်းဟန် ကျယ်လောင်စွာ ရယ်မောလိုက်ပြီး သူ ကြိုတင်ပြင်ဆင်သတ်မှတ်ထားခဲ့ပြီးသား အစီအစဉ်ကို ချပြလိုက်တော့သည်။

ဟုတ်ဟုတ်လိုမျိုး တောရိုင်းသားရဲတစ်ကောင်ဟာ တောရိုင်းစိတ်ဓာတ် အလွန်ပြင်းထန်လှပြီး ယဉ်ပါးအောင် လုပ်ရန် အလွန်ခက်ခဲလှသည်။ ထို့ကြောင့် သူ နည်းလမ်းအချို့ကို အသုံးပြုရမည် ဖြစ်သည်။ ယခင်က သုံးခဲ့သော နည်းလမ်းများကလည်း အတိုင်းအတာတစ်ခုအထိ ရလဒ်ကောင်းများ ထွက်ပေါ်ခဲ့ပြီး ဖြစ်သည်။

ယခုအချိန်တွင် လောင်းကြေးထပ်ခြင်းကို အသုံးပြုပြီး ၎င်း၏ မာနထောင်လွှားနေသော ခေါင်းကို လုံးဝဥဿုံ ညွတ်ကျသွားအောင် လုပ်ရမည့် အချိန်ပင် ဖြစ်သည်။

“ဟုတ်ဟုတ်”

ဟုတ်ဟုတ်က ချက်ချင်းပင် ခေါင်းညိတ်လိုက်ပြီး ကျန်းဟန်၏ ကမ်းလှမ်းချက်ကို သဘောတူလိုက်သည်။ ထို့နောက် မည်သည့်အချိန်တွင် စတင်ရမည်လဲဟု မေးမြန်းလိုက်သည်။

၎င်းသည် မိမိကိုယ်ပိုင် အခြေအနေကို အလွန် ကောင်းမွန်စွာ နားလည်ထားပေသည်။ ၎င်း၏ သွေးဂုဏ်သတ္တိက အမှောင်ဂုဏ်သတ္တိထက် ပိုမိုများပြားလှရာ အမှောင်အမျိုးအစား စွမ်းရည်တစ်ခုကို ရရှိရန် ဆန္ဒရှိခြင်းက ကောင်းကင်ဘုံသို့ တက်လှမ်းရသလိုပင် ခက်ခဲလှပေသည်။ ၎င်းအနေဖြင့် ၎င်း၏ မှတ်ဉာဏ်ထဲတွင်ဖြစ်စေ၊ ခိုးယူဖတ်ရှုခဲ့ဖူးသော စာအုပ်များထဲတွင်ဖြစ်စေ ဤကဲ့သို့သောအရာမျိုးကို တစ်ခါမျှ မကြားဖူးခဲ့ချေ။ ထို့ကြောင့် ကျန်းဟန် သေချာပေါက် ရှုံးနိမ့်လိမ့်မည်ဟု ၎င်း ထင်မှတ်နေခဲ့သည်။

သူ့ရဲ့ လူမိုက်သခင်က စွမ်းရည်တွေကို ရဖို့ အရမ်းလွယ်တယ်လို့ တကယ်ပဲ ထင်နေတာလား။ ဒါဆိုရင်တော့ သူ့အနေနဲ့ သခင်နေရာကို ဝင်ယူရမည့်အချိန် ရောက်ပြီပဲ။

“ဟားဟား... ကောင်းပြီ။ ဒါဆို ကတိတည်ကြေးပဲ။ သင့်တော်တဲ့ အခွင့်အရေးတစ်ခု ရှာတွေ့တာနဲ့ ငါတို့ ချက်ချင်း စကြမယ်။”

ကျန်းဟန် ရယ်မောလိုက်သည်။ နောက်ဆုံးတွင်တော့ သူ ဟုတ်ဟုတ်ကို လုံးဝဥဿုံ ယဉ်ပါးအောင် တိုက်ခိုက်သိမ်းပိုက်နိုင်တော့မည်ဖြစ်ကြောင်း တွေးတောလိုက်မိတော့သည်။