အခန်း ၉၇

အခန်း (၉၇) သစ္စာဖောက်ခြင်း

အခြားတစ်ဖက်တွင်။

ဟိုင်ထျန် ဉာဏ်ရည်တုနည်းပညာ ကုမ္ပဏီ နှင့် မလှမ်းမကမ်းရှိ လမ်းကြားတစ်ခု။

မန်နေဂျာ ဝေ့တာယဲ့ သည် သံသယဖြစ်ဖွယ် ဟိုဟိုဒီဒီ လမ်းလျှောက်နေစဉ် သက်လတ်ပိုင်း အမျိုးသားတစ်ဦး ချဉ်းကပ်လာသည်ကို မြင်တွေ့လိုက်ရ၏။

သူက တစ်ဖက်လူကို ထောင့်တစ်နေရာသို့ အလျင်အမြန် ဆွဲခေါ်သွားလိုက်သည်။

ထို့နောက် သူက ပတ်ပတ်လည်ကို အကဲခတ်ကြည့်လိုက်ပြီး သံသယဖြစ်ဖွယ် လူများ သူ့နောက်သို့ လိုက်မလာကြောင်း တွေ့ရှိရသဖြင့် သက်ပြင်းချလိုက်နိုင်ပေ၏။

"မန်နေဂျာဝေ့... ပစ္စည်းတွေ ယူလာခဲ့လား"

"ညွန်ကြားရေးမှူးစွန်း... ပစ္စည်းတွေကိုတော့ သဘာဝကျကျ ယူလာခဲ့တာပေါ့... ဒါပေမဲ့..."

မန်နေဂျာ ဝေ့တာယဲ့ သည် သူ၏ အိတ်ကပ်ကို အလိုအလျောက် ပိုမိုတင်းကျပ်စွာ ဆုပ်ကိုင်လိုက်ပြီး တိုးတိတ်စွာ ပြောဆိုလိုက်သည်။

"ငါ့မှာ အခု ထွက်ပေါက် မရှိတော့ဘူး... ငါ ရှန်ကျွင်း ကို သေချာပေါက် စော်ကားပြီးသွားပြီ"

"ခင်ဗျား အရင်က ပြောခဲ့တဲ့ အခြေအနေတွေကို စစ်ဝေ့ နည်းပညာကုမ္ပဏီ က သဘောတူမယ်ဆိုတာ သေချာရဲ့လား"

"စိတ်မပူပါနဲ့"

ညွန်ကြားရေးမှူးစွန်း က မျက်လုံးလှန်ကာ သူ၏ ရင်ဘတ်ကို ပုတ်လျက် ပြောဆိုလိုက်၏။

"ခင်ဗျားရဲ့ အရည်အချင်းတွေနဲ့ဆိုရင် စစ်ဝေ့ နည်းပညာကုမ္ပဏီ မှာလည်း သုတေသန ညွှန်ကြားရေးမှူး အလွယ်တကူ ဖြစ်နိုင်တာပဲ"

"ဒါ့အပြင် အဲဒီက ပေးမယ့်လစာကလည်း ဟိုင်ထျန် ဉာဏ်ရည်တုနည်းပညာ ကုမ္ပဏီ က လစာထက် နည်းမှာ မဟုတ်ဘူး"

"မန်နေဂျာဝေ့... ကျွန်တော့်ကို အချက်အလက်တွေ အရင်ပေးပါ... ခင်ဗျားဆီကို ယွမ် ၁ သန်း အခုချက်ချင်း လွှဲပေးပါ့မယ်"

"ဒီ ၁ သန်းကို ခင်ဗျားအတွက် ကျွန်တော့်ရဲ့ ကိုယ်ပိုင် လျော်ကြေးငွေအဖြစ် သတ်မှတ်လိုက်ပါ"

"ငွေကို အရင်လွှဲပေး"

မန်နေဂျာ ဝေ့တာယဲ့ သည် စိုးရိမ်နေပုံရပြီး သွားကြိတ်ကာ ပြောဆိုလိုက်၏။

"ညွန်ကြားရေးမှူးစွန်း... USB က ကျွန်တော့်လက်ထဲမှာ ရှိတယ်... ဒီကာလအတွင်းက ဟိုင်ထျန် ဉာဏ်ရည်တုနည်းပညာ ကုမ္ပဏီ ရဲ့ သုတေသန အချက်အလက်တွေ အကုန်လုံး အဲဒီထဲမှာ ရှိတယ်"

"ငါတို့ စစ်ဝေ့ နည်းပညာကုမ္ပဏီ ကို ခဏနေရင် အတူတူ သွားကြမယ်... ငါက ဒီပစ္စည်းတွေကို သူတို့ဆီ ကိုယ်တိုင်ကိုယ်ကျ ပေးချင်တယ်"

ချီးပဲ...

ညွန်ကြားရေးမှူးစွန်း သည် တီးတိုးကျိန်ဆဲလိုက်မိသည်ကို မတားဆီးနိုင်ခဲ့ချေ။

ဒီ မြေခွေးအိုကြီး…

သူက ကျိန်ဆဲချင်စိတ်ကို မြိုသိပ်ထားပြီး အတင်းပြုံးကာ ပြောဆိုလိုက်၏။

"မန်နေဂျာဝေ့... ကျွန်တော့်ကို မယုံဘူးလား"

"ခင်ဗျားကို မယုံလို့ မဟုတ်ပါဘူး... ဒါက ကျွန်တော့်ရဲ့ အနာဂတ်အလုပ်နဲ့ အသက်မွေးဝမ်းကျောင်းမှုနဲ့ သက်ဆိုင်နေလို့ပါ"

မန်နေဂျာ ဝေ့တာယဲ့ မှာလည်း အလွန် သတိထားနေခဲ့ပေသည်။

သူသည် ဟိုင်ထျန် ဉာဏ်ရည်တုနည်းပညာ ကုမ္ပဏီ ကို စော်ကားရန် စွန့်စားခဲ့၏။

သူ၏ အနာဂတ်ကို လောင်းကြေးထပ်ခဲ့သည်။

လက်ရှိ သူပိုင်ဆိုင်ထားသော USB သည် သူ၏ တစ်ခုတည်းသော အပေးအယူလုပ်စရာ အရာဖြစ်ပြီး ၎င်းမှာ စစ်ဝေ့ နည်းပညာကုမ္ပဏီ နှင့် ညှိနှိုင်းနိုင်မည့် တစ်ခုတည်းသော နည်းလမ်း ဖြစ်ပေ၏။

"ကောင်းပြီလေ... အတူတူ သွားကြတာပေါ့"

တစ်ဖက်လူက ၎င်းကို အလိုအလျောက် ပေးမည်မဟုတ်ကြောင်း ညွန်ကြားရေးမှူးစွန်း သိလိုက်သည်။

မတတ်နိုင်ဘူးလေ အလျှော့ပေးဖို့ကလွဲပြီး ရွေးချယ်စရာ မရှိတော့ဘူး...

မည်သို့ပင်ဆိုစေကာမူ။

သူသည်လည်း စစ်ဝေ့ နည်းပညာကုမ္ပဏီ တွင် အလုပ်တစ်ခုရရန်အတွက် တစ်ဖက်လူ ပိုင်ဆိုင်ထားသော USB အပေါ် မှီခိုနေရပေသည်။

"ညွန်ကြားရေးမှူးစွန်း... အဲဒီ ၁ သန်းက..."

"ကောင်းပြီ... ကျွန်တော် အခုချက်ချင်း လွှဲပေးပါ့မယ်"

ညွန်ကြားမှူးစွန်း သည် ငွေကို ဝန်လေးစွာဖြင့် လွှဲပေးလိုက်၏။

မတတ်နိုင်ဘူးလေ…

ထို ၁ သန်းကို သူလည်း အလဟဿ မဖြစ်စေချင်ခဲ့ချေ။

ဤ ၁ သန်းသာ မရှိခဲ့ပါက မန်နေဂျာဝေ့တာယဲ့သည် သူနှင့် ဘယ်သောအခါမှ ပူးပေါင်းဆောင်ရွက်လိမ့်မည် မဟုတ်ပေ။

အတိုချုပ်ပြောရလျှင်...

မင်းမှာ လုံလောက်တဲ့ ရန်ပုံငွေ ရှိဖို့ လိုအပ်သေးတယ်လေ...

သူတို့နှစ်ဦးသည် လမ်းကြားမှ အလျင်အမြန် ထွက်ခွာသွားကြလေ၏။

နာရီဝက်ခန့် အကြာတွင်

စစ်ဝေ့ နည်းပညာကုမ္ပဏီမှ မန်နေဂျာခုံး သည် သူတို့ကို ကိုယ်တိုင်ကိုယ်ကျ ထွက်ကြိုခဲ့သည်။

မန်နေဂျာဝေ့တာယဲ့ ကို သူ မြင်လိုက်ရချိန်တွင် သူ၏မျက်နှာပေါ်၌ သိသာထင်ရှားသော အံ့အားသင့်မှု အရိပ်အယောင်တစ်ခု ရှိနေပေ၏။

ချီးပဲ...

ငါက USB တစ်ခုပဲ လိုချင်ခဲ့တာ... ဒါပေမဲ့ မင်းက သူတို့ရဲ့ သုတေသန မန်နေဂျာကိုတောင် ခေါ်လာနိုင်ခဲ့တယ်ပေါ့...

တကယ် မိုက်တာပဲ...

ဒီကလေးက သင်ပေးလို့ ရတယ်…

"မန်နေဂျာဝေ့... ညွှန်ကြားရေးမှူးစွန်း... ကြိုဆိုပါတယ်... ကြိုဆိုပါတယ်... ကျေးဇူးပြုပြီး အထဲဝင်ပါ"

သူက သူတို့နှစ်ဦးကို ရုံးခန်းထဲသို့ အလျင်အမြန် ခေါ်ဆောင်သွားခဲ့၏။

ထို့နောက် လိုက်ကာများကို နောက်တစ်ကြိမ် ပြန်ချလိုက်သည်။

ရုံးခန်းမှာ အသံလုံသောကြောင့် အောက်ပါ ဆွေးနွေးမှုများသည် အတော်လေး သီးသန့်ဖြစ်ပေလိမ့်မည်။

ပြင်ပလူများကို ကြားခွင့်မပေးခြင်းက အကောင်းဆုံး ဖြစ်ပေ၏။

ဤအချိန်၌ တစ်ဖက်လူက သူ၏ စိတ်ကို ပြောင်းလဲသွားမည်ကို ကြောက်ရွံ့နေသော ညွန်ကြားရေးမှူးစွန်း က တိုက်ရိုက် ပြောဆိုလိုက်သည်။

"မန်နေဂျာခုံး... ဒီအချက်အလက်တွေကို ရဖို့ ကျွန်တော်တို့ အများကြီး ဒုက္ခခံခဲ့ရတာပါ"

"ပြီးတော့ ကျွန်တော်ကလည်း ၁ သန်း သုံးထားတယ်... အဲဒါကို ခင်ဗျားက ကျွန်တော့်ကို ပြန်ပေးရမယ်"

"သဘောတူထားတဲ့အတိုင်း ကျွန်တော့်ကို ယွမ် သုံးသန်း ပေးရမယ်နော်"

ချီးပဲ...

ဘေးတွင် ရပ်နေသော မန်နေဂျာဝေ့တာယဲ့ သည် တီးတိုးကျိန်ဆဲလိုက်မိသည်ကို မတားဆီးနိုင်ခဲ့ချေ။

ဒီကောင်က ငါ့ကို ၁ သန်းပေးတာ စကားတစ်ခွန်းတောင် မပြောတာ အံ့သြစရာ မဟုတ်ပါဘူး... ငွေက စစ်ဝေ့ နည်းပညာကုမ္ပဏီ ဆီက ရလာတာကိုး...

ဒါဆို ဒီတွက်ချက်မှုအရဆိုရင်...

ငါက အကြီးအကျယ် ရှုံးနေတာ မဟုတ်ဘူးလား…

"ဘာမှမဖြစ်ပါဘူး... စာရွက်စာတမ်းတွေကို စစ်ဆေးပြီးတာနဲ့ ခင်ဗျားကို ပေးပါ့မယ်... တစ်ပြားမှ မလျှော့ပါဘူး"

မန်နေဂျာခုံး က လက်ကာပြလိုက်၏။

"အချက်အလက်တွေကော... အဲဒီရဲ့ မှန်ကန်မှုကို သုတေသနဌာနကို စစ်ဆေးခိုင်းလိုက်မယ်"

ညွှန်ကြားရေးမှူးစွန်းက မန်နေဂျာဝေ့တာယဲ့ ကို ကြည့်လိုက်သည်။

မန်နေဂျာဝေ့ က USB ကို ထုတ်ယူလိုက်သော်လည်း ၎င်းကို တိုက်ရိုက် မပေးခဲ့ချေ။

ထို့အစား သူ မျက်မှောင်ကြုတ်ကာ မေးလိုက်၏။

"မန်နေဂျာခုံး... တကယ်လို့ ကျွန်တော် ဒီကိုလာရင် ကျွန်တော့်ရဲ့ ရာထူးနဲ့ လစာက အရင်အတိုင်းပဲ ဆက်ရှိနေမှာလား... ပြီးတော့ ညွန်ကြားရေးမှူးစွန်း က သုံးသန်း ရတယ်ဆိုတော့ ကျွန်တော်ကရော သုံးသန်း ရမလား"

မန်နေဂျာခုံး အံ့အားသင့်သွားသည်။

တစ်ဖက်လူ၏ မျက်နှာအမူအရာက မန်နေဂျာဝေ့တာယဲ့ကို တစ်ခုခု နားလည်သွားစေခဲ့၏။

သူက ညွန်ကြားရေးမှူးစွန်း ကို ရုတ်တရက် ကြည့်ကာ ပြောဆိုလိုက်သည်။

"ညွန်ကြားရေးမှူးစွန်း... ခင်ဗျားက ကျုပ်ကို လိမ်နေတာလား"

"မဟုတ်ပါဘူး... မဟုတ်ပါဘူး"

ညွန်ကြားရေးမှူးစွန်း ၏ မျက်နှာ အနည်းငယ် တင်းမာသွားပြီး အတင်းရယ်မောကာ ပြောဆိုလိုက်၏။

"မန်နေဂျာဝေ့ ရဲ့ အရည်အချင်းတွေနဲ့ဆိုရင် သူသာ စစ်ဝေ့ နည်းပညာကုမ္ပဏီ ကို ရောက်လာရင် သေချာပေါက် ရာထူးကောင်းကောင်း ရနိုင်မှာပါ... ဟုတ်တယ် မဟုတ်လား မန်နေဂျာခုံး"

"ခင်ဗျား..."

မန်နေဂျာဝေ့က ချက်ချင်းပင် ဒေါသထွက်သွားလေသည်။

ချီးပဲ...

ဒီကောင်က တကယ်ကို ငါ့ကို လိမ်နေခဲ့တာပဲ...

သူက USB ကို အိတ်ကပ်ထဲ ထိုးထည့်လိုက်ပြီး ဒေါသထွက်လုနီးပါး ဖြစ်သွား၏။

"ညွန်ကြားရေးမှူးစွန်း ခင်ဗျားက...ကျွန်တော့်ရဲ့ ထွက်ပေါက်ကို ဖြတ်တောက်လိုက်တာပဲ... ခင်ဗျားလည်း လွတ်မှာ မဟုတ်ဘူး"

"ကျုပ်ပစ္စည်းတွေ ဆုံးရှုံးသွားရင်တောင် ခင်ဗျားကို ပေးမှာမဟုတ်ဘူး... ပြီးတော့ အဲဒီ ယွမ် သုံးသန်းကိုလည်း ခင်ဗျား ရအောင် လုံးဝ ခွင့်ပြုမှာ မဟုတ်ဘူး"

ညွန်ကြားရေးမှူးစွန်း ၏ မျက်နှာအမူအရာမှာလည်း ပြောင်းလဲသွားပေသည်။

သူတော့ တွေ့သမျှလူတိုင်းကို စော်ကားမိသလိုနေလေပြီ။

USB ပေါ်ရှိ အချက်အလက်များ မရှိပါက သူသည် ယွမ် သုံးသန်း ရရှိမည်မဟုတ်ရုံသာမက စစ်ဝေ့ နည်းပညာကုမ္ပဏီ ကလည်း သူ့ကို ကုမ္ပဏီသို့ ဝင်ရောက်ခွင့်ပြုမည် မဟုတ်ချေ။

တစ်စုံတစ်ရာ ပြောရန် ပြင်လိုက်ချိန်မှာပင်။

မန်နေဂျာခုံး က ပြုံးလျက် ပြောဆိုလိုက်၏။

"မန်နေဂျာဝေ့... စိတ်မဆိုးပါနဲ့... ယွမ် သုံးသန်းကို ကျွန်တော် သဘောတူနိုင်ပါတယ်... ခင်ဗျားရဲ့ စစ်ဝေ့ နည်းပညာကုမ္ပဏီ ကို ဝင်ချင်တဲ့ ဆန္ဒနဲ့ ပတ်သက်ပြီးတော့က..."

ထိုသို့ပြောပြီးနောက်...

သူ ခဏတာ ရပ်တန့်လိုက်ပြီး ဆက်ပြောလိုက်သည်။

"ကျွန်တော်တို့ဆီမှာ ညွှန်ကြားရေးမှူး ရာထူး ရှိနေပြီးသားဆိုတော့ တစ်ဖက်လူကို ဒီတိုင်း အလုပ်ထုတ်လိုက်လို့ မရဘူးလေ... မဟုတ်ဘူးလား"

"ဒါပေမဲ့ ခင်ဗျားသာ ဆန္ဒရှိရင် ဒုတိယ ညွှန်ကြားရေးမှူး ရာထူးကို ခင်ဗျားအတွက် ဖယ်ထားပေးနိုင်ပါတယ်"

"လစာကွာခြားချက်က သိပ်မကြီးပါဘူး... ဘယ်လိုထင်လဲ"

"ခင်ဗျား အဲဒီ ဆုံးဖြတ်ချက်ကို ချနိုင်တာ သေချာလို့လား"

ထိုသို့ပြောပြီးနောက် မန်နေဂျာဝေ့ ၏ စိတ်အခြေအနေမှာ အနည်းငယ် တိုးတက်လာခဲ့ပေ၏။

သို့သော် သူ ညွန်ကြားရေးမှူးစွန်း ကို ကြည့်လိုက်ချိန်တွင် သူ၏ မျက်နှာအမူအရာမှာ အနည်းငယ် ကြည့်ရဆိုးနေဆဲ ဖြစ်လေသည်။

ဒီခွေးကောင်...

မင်း ငါ့ကို သတ်လုနီးပါး ဖြစ်သွားအောင် လုပ်ခဲ့တာပဲ...

သူက လုံးလုံးလျားလျား ခွေးကောင်ပဲ…

"ကျွန်တော် ဆုံးဖြတ်ချက် ချနိုင်ပါတယ်"

အရာအားလုံးကို ထိန်းချုပ်ထားနိုင်သည့်အလား မန်နေဂျာခုံး က သူ၏လက်ကို နောက်တစ်ကြိမ် ဆန့်ထုတ်ကာ ပြုံးလျက် ပြောဆိုလိုက်၏။

"အခု ပစ္စည်းကို ပေးလို့ရပြီလား... အဲဒါကို သုတေသနဌာနကို အခုချက်ချင်း စစ်ဆေးခိုင်းလိုက်မယ်"

"သေချာတာပေါ့... တချို့လူတွေနဲ့ မတူဘဲ မန်နေဂျာခုံး က ကတိတည်တဲ့သူလို့ ကျွန်တော် ယုံကြည်ပါတယ်"

ထို့နောက် မန်နေဂျာဝေ့ သည် USB ကို လွှဲပြောင်းပေးလိုက်လေသည်။

"နှစ်ယောက်လုံး ထိုင်ကြပါဦး"

မန်နေဂျာခုံး သည် ချက်ချင်းပင် သက်ပြင်းချလိုက်နိုင်၏။

အများကြီးကြိုးစားအားထုတ်ပြီးတဲ့

နောက်မှာ ငါ လိုချင်တဲ့ အချက်အလက်တွေကို နောက်ဆုံးတော့ ရသွားပြီ...အချက်အလက်များ၏ မှန်ကန်မှုကို နေရာမှာတင် စစ်ဆေးရန် နည်းပညာရှင်များကို သူ အလျင်အမြန် ရှာဖွေလိုက်သည်။

သုတေသန ညွှန်ကြားရေးမှူးနှင့် နည်းပညာရှင် လေးငါးဦးခန့်ကို ရုံးခန်းအတွင်းသို့ ခေါ်ယူခဲ့ပြီး ၎င်းတို့၏ရှေ့တွင် ကွန်ပျူတာများနှင့် ဆက်စပ်ပစ္စည်းများကို ချထားပေးလိုက်၏။

ဤလူများသည် စစ်ဝေ့ နည်းပညာကုမ္ပဏီ (4D Space) ရှိ အားအကောင်းဆုံး သုတေသနအဖွဲ့ ဖြစ်ပေသည်။

ဆယ်မိနစ်။

မိနစ်နှစ်ဆယ်။

မိနစ်သုံးဆယ်။

...

မိနစ်လေးဆယ် အတိ ကြာသွားခဲ့သည်။

သုတေသန ညွှန်ကြားရေးမှူးက စိတ်လှုပ်ရှားစွာဖြင့် ပြောဆိုလိုက်၏။

"မန်နေဂျာခုံး... ဒီအချက်အလက်တွေက အစစ်အမှန်တွေပါ... သူတို့က ရုပ်ပုံ လုပ်ဆောင်မှုစနစ် နဲ့ အသံ လုပ်ဆောင်မှုစနစ် တွေကို သုတေသန လုပ်နေကြတာ"

"အဲဒါက ဈေးကွက်ထဲက လက်ရှိစနစ်တွေထက် တစ်ဆင့် ပိုမြင့်ပါတယ်... တကယ်လို့ အဲဒါကို ချစ်ပ်စ် အဖြစ် ထုတ်လုပ်နိုင်မယ်ဆိုရင် ဈေးကွက်က တော်တော်လေး ကြီးမားလိမ့်မယ်"

"အရမ်းကောင်းတယ်"

မန်နေဂျာခုံး လည်း အလွန် စိတ်လှုပ်ရှားနေခဲ့ပေ၏။

ဟိုင်ထျန် ဉာဏ်ရည်တုနည်းပညာ ကုမ္ပဏီ သည် ဤအရာများကို သုတေသနပြုရန် ယွမ်သန်းဆယ်ဂဏန်းချီ သုံးစွဲခဲ့သော်လည်း ရလဒ်များကို ရယူရန် သူက ယွမ်သန်းအနည်းငယ်သာ သုံးစွဲခဲ့ရသည်။

ဒါက တော်တော်လေး တွက်ခြေကိုက်သေးတာပဲ…

"ငါတို့ အခု ဈေးကွက်ထဲကို တိုက်ရိုက် တင်ပို့လို့ ရပြီလား"

"ဒါက..."

သုတေသန ညွှန်ကြားရေးမှူးက အနည်းငယ် အခက်တွေ့စွာဖြင့် ပြောဆိုလိုက်၏။

"သိပ်တော့မတည်ငြိမ်သေးဘူး... ဒါပေမဲ့ ဈေးကွက်ကို တိုက်ရိုက် ဖြန့်ချိချင်တယ်ဆိုရင်တော့ ရိုးရှင်းတဲ့ ထုတ်ကုန်အသစ်တစ်ခုကိုပဲ ဖြန့်ချိလို့ ရနိုင်တယ်"

"ဒါပေမဲ့ အစားထိုး ထုတ်ကုန်တွေအတွက်တောင် ဈေးကွက်က တော်တော်လေး ကြီးမားနေဆဲပါပဲ"

"ဥပမာ စမတ်အိမ်သုံး ပစ္စည်းတွေ၊ 3D ရုပ်လုံးကြွ (3D Projection) အစရှိတာတွေပေါ့"