အခန်း ၂၇၁
Vol. 28 Ch. 271
ပြိုင်ဘက်ကင်း အင်ပါယာ။ အပိုင်း ၂၇၁
ဘာသာပြန် - Ko Yoohtoo
True Immortal Team
အရှေ့ပိုင်းဌာနခွဲ၏ ကြည့်ရှုစင်မြင့်ပေါ်၌ ကျန်းဇီတဲသည် အံ့ဩလွန်းသဖြင့် ပါးစပ်ပင် မပိတ်နိုင်ဘဲ စင်မြင့်ပေါ်ရှိ လင်းချန်အား မှင်သက်စွာ စိုက်ကြည့်နေသည်။
လီယွမ်ဖုန်းသည်လည်း အံ့ဩနေသော်ငြား သူ၏ မျက်ဝန်းများထဲ၌ တိုက်ခိုက်လိုစိတ်များ ပြည့်နှက်နေပြီး ယခုချက်ချင်းပင် လင်းချန်နှင့် ယှဉ်ပြိုင်ချင်နေပုံရ၏။
ပြိုင်ပွဲစင်မြင့်အတွင်း၌ လင်းချန်၏ ပတ်ဝန်းကျင်၌ ရူးသွပ်စွာ လည်ပတ်နေသည့် ရေစီးကြောင်းများမှာ ရုတ်တရက် တင်းကျပ်စွာ စုစည်းလာသည်။
လင်းချန်က ဖြည်းညင်းစွာ မျက်လုံးမှိတ်လိုက်သောအခါ ပတ်ဝန်းကျင်ရှိ ရေထုမှာ တစ်နေရာတည်း၌ အေးခဲသွားသကဲ့သို့ ဖြစ်သွား၏။
မျက်စိတစ်မှိတ်အတွင်းမှာပင် မှိတ်ထားသည့် လင်းချန်၏ မျက်လုံးများ ပွင့်လာပြီး သူ၏ ခန္ဓာကိုယ်တစ်ခုလုံးမှ အရှိန်အဝါမှာ ဧကရာဇ်တစ်ပါး၏ ဘုန်းအာဏာအဖြစ်သို့ ရုတ်တရက် ပြောင်းလဲကာ ကောင်းကင်သို့ ထိုးတက်သွားသည်။
သူ၏ ရွှေနီရောင် မိုးကြိုးစိတ်ဝိညာဉ်စွမ်းအားများသည် ဒေါသတကြီး ဟိန်းဟောက်နေသည့် မိုးကြိုးနဂါး ကိုးကောင်အဖြစ် ပြောင်းလဲသွားပြီး ပြိုင်ပွဲကွင်းတစ်ခုလုံးကို လွှမ်းမိုးသွား၏။
မိုးကြိုးနဂါးများ လှုပ်ရှားလိုက်သည်နှင့် ကွင်းအတွင်းရှိ ပင်လယ်ရေများမှာ ချက်ချင်းပင် အစိတ်စိတ်အမွှာမွှာ ကွဲအက်သွားပြီး ကွင်းအတွင်းရှိ လေထုဖိအားမှာလည်း အရှိန်အဟုန်ဖြင့် မြင့်တက်လာသည်။
ထိုအချိန်မှာပင် တောက်ပသည့် အဝါရောင် ဧကရာဇ်စိတ်ဝိညာဉ်စွမ်းအားများ ပေါက်ကွဲထွက်လာပြီး ကောင်းကင်ဧကရာဇ်ဝတ်ရုံမှာ သူ့အား လွှမ်းခြုံသွား၏။
လင်းချန်သည် ကမ္ဘာတုန်မတတ် ပြောင်းလဲသွားပြီ ဖြစ်၏။
ကောင်းကင်နယ်ပယ်၏ အမြင့်ဆုံးအဆင့်သို့ ရောက်ရှိသွားခြင်းပင် ဖြစ်သည်။
ယခုအခါ ရေစက်မျှပင် မရှိတော့ဘဲ ဟာလာဟင်းလင်း ဖြစ်နေသော ပြိုင်ပွဲကွင်းအတွင်း၌ တောက်ပနေသည့် ဧကရာဇ်ဝတ်ရုံကို ဝတ်ဆင်ထားသော လင်းချန်သည် လေထဲ၌ လွင့်မျောနေပြီး သူ၏ အကြည့်များကို ပြိုင်ဘက်ထံသို့ အေးစက်စွာ စူးစိုက်ထားသည်။
အကယ်၍ ဤပြိုင်ဘက်အား ရင်ဆိုင်ရသည်မှာ အစပိုင်း၌ အနည်းငယ် အခက်အခဲရှိသည်ဆိုဦးတော့ ယခု လင်းချန်၏ မျက်လုံးထဲ၌မူ ထိုပြိုင်ဘက်မှာ ထည့်ပြောနေရန်ပင် မထိုက်တန်တော့ချေ။
မျိုးနွယ်စု ညီလာခံ၌ ပါဝင်နေသည့် လက်ရှစ်ဖက်ပင်လယ်မျိုးနွယ်ဝင် အားလုံးမှာ အံ့ဖွယ်ဖြစ်ရပ်တစ်ခုကို ကိုယ်တိုင် မြင်တွေ့လိုက်ရခြင်း ဖြစ်သည်။ လက်ဖက်ရည်တစ်ဝက်ခန့်သောက်ချိန်အတွင်းမှာတင် အဆင့်ခြောက်မှ အမြင့်ဆုံးအဆင့်အထိ အဆင့်လေးဆင့် ဆက်တိုက် တက်လှမ်းသွားခြင်း ဖြစ်၏။
လူနှစ်ယောက်မှလွဲ၍ ကျန်ရှိသူ အားလုံးမှာ မှင်သက်နေကြရသည်။
ထိုလူနှစ်ဦးမှာမူ မျက်နှာများ ပြာနှမ်းနေကြ၏။ တစ်ဦးမှာ သူ၏ပြိုင်ဘက် ရှ ဖြစ်ပြီး ကျန်တစ်ဦးမှာ ဝူချွန်ရှန်း ပင် ဖြစ်သည်။
လင်းချန်၏ ခန္ဓာကိုယ်ပတ်လည်၌ တောက်လောင်နေသည့် ဧကရာဇ်ဝတ်ရုံမှာ ရုတ်တရက် ပျောက်ကွယ်သွားပြီး သူ့အား ပတ်ရံထားသော မိုးကြိုးနဂါးကိုးကောင်မှာလည်း ပေါက်ကွဲထွက်ကာ ကွယ်ပျောက်သွား၏။
လင်းချန်၏ အပြုအမူကို မြင်သော် သူ၏ပြိုင်ဘက်မှာ မျက်မှောင်ကြုတ်လျက် နားမလည်နိုင် ဖြစ်သွားရသည်။
လင်းချန်က ရန်ငြိုးမထားသည့်ပုံစံ၊ လေသံညင်းညင်းဖြင့် ပြောလိုက်၏။ "မင်း ကျုပ်ကို ကျေးဇူးပြုခဲ့လို့ ဒုက္ခမပေးတော့ဘူး။ အရှုံးပေးလိုက်တော့။"
လင်းချန်၏ စကားကြောင့် သူ၏ပြိုင်ဘက်မှာ သွားများကို တင်းတင်းကြိတ်လိုက်မိပြီး အကြီးအကျယ် အရှက်ရမှုကို ခံစားလိုက်ရသည်။
သူသည် ဒေါသတကြီး ဟိန်းဟောက်လိုက်ပြီး လင်းချန်ထံသို့ တစ်ဖန် ပြန်လည် ပြေးဝင်လာသည်။
သတ်ဖြတ်သူ ရှ သည် မိမိလက်ဖြင့် ဖျက်ဆီးပစ်ရမည့် လင်းချန်က မည်သို့မျှ ထိခိုက်ဒဏ်ရာရခြင်း မရှိသည့်အပြင် ဤကဲ့သို့သော အံ့ဖွယ်ဖြစ်ရပ်မျိုးကို ဖန်တီးနိုင်သည်ကို အဘယ်သို့မျှ နားမလည်နိုင် ဖြစ်နေရ၏။
ဤပြိုင်ပွဲသည် သူ၏ စွမ်းရည်ပြသကွင်းဖြစ်ကာ လက်ရှိအချိန်သည် လင်းချန်အား နှိပ်စက်ကစားရမည့် အချိန်ဖြစ်သင့်သည်။
ရလဒ်မှာ ပါရမီရှင် လင်းချန်၏ ကျဆုံးမှုနှင့်အတူ နောက်ဆုံးအချိန်၌ သူ၏ လွယ်ကူသည့် အောင်ပွဲသာ ဖြစ်ရမည် မဟုတ်လော။ သူသည်သာ အားလုံး၏ အာရုံစိုက်ခြင်းကို ခံရမည့် ဗဟိုချက်မ ဖြစ်ရပေမည်။
'သတ်မယ်... သတ်မယ်... သတ်မယ်...'
သူ၏ ရင်ထဲ၌ ဤအတွေးတစ်ခုသာ ရှိတော့၏။ သူသည် လင်းချန်ထံသို့ ပြေးဝင်သွားစဉ် သူ၏ ခန္ဓာကိုယ်အား သွေးရောင်စိတ်ဝိညာဉ်စွမ်းအားများဖြင့် ရစ်ပတ်ထားပြီး အဆက်မပြတ် ဆူပွက်နေသော ထိုစွမ်းအားများသည် ဟာလာဟင်းလင်းပြင်ထဲမှ စီးဆင်းလာသည့် သွေးမြစ်တစ်စင်းကဲ့သို့ပင် ဖြစ်နေသည်။
အောင်မြင်စွာ အသွင်ပြောင်းလဲထားသည့် သွေးရောင်ဓားကို ကျစ်ကျစ်ပါအောင် ဆုပ်ကိုင်ထားလျက် လက်ရှိအချိန်၌ သူ၏ မျက်လုံးထဲ၌ လင်းချန်တစ်ဦးတည်းသာ ရှိတော့၏။
ဆူပွက်နေသည့် သွေးမြစ်သည် သူ၏ ခန္ဓာကိုယ်ဆီသို့ စုစည်းသွားပြီး ဧရာမ သွေးဓားကြီးတစ်လက်အဖြစ် ပြောင်းလဲကာ လင်းချန်ထံသို့ ထိုးစိုက်လိုက်သည်။
သွေးနတ်ဘုရားခုတ်ချက်။
သူ၏ စိတ်ဝိညာဉ်စွမ်းအား အများစုကို ဤတိုက်ကွက်အတွက် အသုံးချထားသဖြင့် အလွန်ပင် ပြင်းထန်လှ၏။
သို့သော် ယင်းမှာ သာမန် သိုင်းဝိညာဥ်ပညာရှင်များအတွက်သာ ဖြစ်သည်။ လင်းချန်ကမူ အဘယ်မှာ သာမန်ဖြစ်မည်နည်း။ လက်ဖက်ရည်တစ်ဝက်ခန့် သောက်ချိန်အတွင်းမှာတင် အဆင့်လေးဆင့်ကို ကျော်ဖြတ်လာသည့် ထိုဘီလူးသတ္တဝါကြီးမှာ မည်သို့မျှ ပုံမှန်လူ ဖြစ်နိုင်မည်မဟုတ်ပေ။
မိမိထံသို့ ဦးတည်လာသည့် ဧရာမ သွေးဓားကြီးကို ကြည့်ကာ လင်းချန်၏ မျက်ဝန်းများ ကျဉ်းမြောင်းသွားပြီး အမူအရာမှာလည်း လေးနက်သွား၏။
မည်သို့ပင်ဆိုစေကာမူ သေခြင်းရှင်ခြင်းနယ်ပယ်၊ စွမ်းအားနယ်ပယ်၏ ပါရမီရှင်တစ်ဦး ဒေါသတကြီး ထုတ်ဖော်လိုက်သည့် တိုက်ကွက်မှာ အလွန်ပင် အန္တရာယ်ရှိပြီး သေစေနိုင်လောက်သည်။
ထို့အပြင် စွမ်းအားနယ်ပယ်သို့ ရောက်ရှိပြီး ကပ်ဘေးများကို ကျော်ဖြတ်ထားသူ ဖြစ်သဖြင့် စိတ်ဝိညာဉ်စွမ်းအားမှာ အခြေခံအားဖြင့် များစွာ ပြောင်းလဲပြီးသား ဖြစ်နေသည်။ ဤသွေးဓားကြီးမှာ တကယ့်ကို အစွမ်းထက်လှ၏။
လင်းချန်သည် သူ၏လက်ထဲရှိ မိုးကြိုးလျှပ်စီးဓားကို မြှောက်ကာ ရှေ့ရှိ ဧရာမ သွေးဓားကြီးကို ချိန်ရွယ်လိုက်သည်။ "အခွင့်အရေးရလျက်နဲ့ တန်ဖိုးမထားတော့လည်း ကျုပ်ကို အပြစ်မတင်နဲ့တော့။"
သူ၏ မျက်ဝန်းအစုံ၌ ရွှေနီရောင် မိုးကြိုးများမှာ တဖျတ်ဖျတ် လက်နေသည်။
ဂျိန်းးး ဂျိန်းးး
ရွှေနီရောင် မိုးကြိုးစိတ်ဝိညာဉ်စွမ်းအားများသည် နဂါးကိုးကောင်အဖြစ် ပြောင်းလဲကာ နောက်ဆုံး၌မူ ရှေ့ရှိ သွေးဓားကြီးထံသို့ ဦးတည်လိုက်ကြ၏။
နဂါးကိုးကောင် ပြေးထွက်သွားသည်နှင့် လင်းချန်သည်လည်း ချက်ချင်းပင် လိုက်ပါသွားသည်။ မိုးကြိုးသံနှင့်အတူ ဟိန်းဟောက်လိုက်သည့် နဂါးသံစဉ်မှာ ပြိုင်ပွဲကွင်းအတွင်း၌ ကြာရှည်စွာ ပဲ့တင်ထပ်နေပြီး နဂါးကိုးကောင်သည် သွေးဓားကြီးနှင့် ထိပ်တိုက် တွေ့ဆုံသည်။
ရွှေနီရောင် မိုးကြိုးနဂါး ကိုးကောင်သည် သွေးဓားကြီး၏ ထိပ်ဖျားနှင့် တိုက်ရိုက် မထိတွေ့ချေ။ မိုးကြိုးနဂါး တစ်ကောင်ကသာ သွေးဓား၏ ထိပ်ဖျားကို ရိုက်ခတ်ပြီး သွေးဓား၏ ပြင်းထန်သည့် အရှိန်အဟုန်ကို တားဆီးလိုက်သည်။
တစ်ချိန်တည်းမှာပင် ကျန်ရှိသည့် မိုးကြိုးနဂါး ရှစ်ကောင်မှာမူ ဧရာမ သွေးဓားကြီး၏ ပတ်ဝန်းကျင်သို့ ဝိုင်းရံကာ ဓား၏ ကိုယ်ထည်ဆီသို့ တိုက်ရိုက် ထိုးဖောက်ဝင်ရောက်သွားသည်။
မျက်စိတစ်မှိတ်အတွင်းမှာတင် တစ်သားတည်းဟု ထင်ရသည့် ဧရာမ သွေးဓားကြီးမှာ ထူထပ်လှသော အက်ကြောင်းများ ပေါ်ပေါက်လာပြီး ဝုန်းးးခနဲ ပေါက်ကွဲပျက်စီးသွားကာ အတွင်းမှ တိုက်ခိုက်သူ၏ ပုံရိပ်မှာ ပေါ်ထွက်လာသည်။
ရှ၏ မျက်နှာ၌ အံ့ဩမှင်သက်မှုများ ကျန်ရှိနေဆဲဖြစ်ပြီး နဂါးကိုးကောင်နှင့်အတူ မိမိထံသို့ တိုးဝင်လာသည့် လင်းချန်ကိုသာ ကြည့်နေမိသည်။ "သွေးနတ်ဘုရားခုတ်ချက်က ဒီလောက်လွယ်လွယ် အဖျက်ခံလိုက်ရတာလား။"
လင်းချန်၏ အရှိန်အဝါကြောင့် ရေစက်မျှပင် မကျန်တော့သည့် ကျယ်ပြောလှသော ပြိုင်ပွဲကွင်းအတွင်း၌ ပျက်စီးသွားသည့် သွေးဓားကြီးမှာ တောက်ပသော အနီရောင် အလင်းစက်များအဖြစ်သို့ ပြောင်းလဲကာ အရပ်ရပ်သို့ ပျံ့လွင့်သွား၏။
သွေးဓားနှင့် ထိတွေ့မိသည့် မိုးကြိုးအလင်းတန်းများမှာလည်း အနီရောင် အလင်းစက်များနှင့်အတူ ပေါက်ကွဲထွက်နေကြရာ တကယ့်ကို ခမ်းနားလှပသော မြင်ကွင်းတစ်ခုပင် ဖြစ်သည်။
ထိုအချိန်မှာပင် လင်းချန်၏ လက်ထဲ၌ ဖန်ပုလင်းတစ်လုံး ရုတ်တရက် ပေါ်လာပြီး အင်အားသုံး၍ ချေမွပစ်လိုက်သည်။ အတွင်းရှိ အရောင်မဲ့ ကြည်လင်သည့် အရည်များကို မိုးကြိုးစိတ်ဝိညာဉ်စွမ်းအားဖြင့် ဖုံးအုပ်ကာ သေးငယ်လှသော အပ်မျှင်ပုံစံအဖြစ် ပြောင်းလဲလိုက်၏။
ထိုသို့လုပ်ဆောင်ပြီးနောက် လင်းချန်သည် ရှ၏ ရှေ့မှောက်သို့ ရောက်ရှိနေပြီ ဖြစ်ပြီး ပြိုင်ဘက်၏ ဒန်တျန်ဆီသို့ ပြင်းထန်စွာ ရိုက်နှက်ရင်း တိုးညင်းသည့် လေသံဖြင့် ပြောလိုက်သည်။ "အသွားရှိရင် အပြန်ရှိရမယ်။ ဒါက မင်းကို ပြန်ပေးဆပ်တာပဲ။"
လင်းချန်က စိတ်ဝိညာဉ်စွမ်းအားဖြင့် အပ်မျှင်ပုံစံ ဖန်တီးထားသည့် အရောင်မဲ့ဆေးရည်မှာ ထိုလက်ဝါးရိုက်ချက်နှင့်အတူ ရှ၏ ဒန်တျန်အတွင်းသို့ ထိုးသွင်းခြင်း ခံလိုက်ရပြီ။
ရှက သူ့ရှေ့ရှိ လင်းချန်ကို ထိတ်လန့်တကြား ကြည့်လိုက်သည်။ "ငါ့ကို ဘာလုပ်လိုက်တာလဲ။"
လင်းချန်သည် တစ်စုံတစ်ခုကို မိမိ၏ ခန္ဓာကိုယ်အတွင်းသို့ ထိုးသွင်းလိုက်ကြောင်း ရှက ရှင်းလင်းစွာ ခံစားလိုက်ရသည်။ ထိုအရာသည် ခန္ဓာကိုယ်အတွင်းသို့ ရောက်ရှိသည်နှင့် အရည်အဖြစ် ပြောင်းလဲကာ တစ်ကိုယ်လုံးသို့ ပျံ့နှံ့သွားပြီ။
လင်းချန်က ပြုံးလိုက်သည်။ "ဒါက အံ့ဩစရာအစွမ်းရှိတယ်။ နောင်နှစ်တစ်ရာအထိ မင်းရဲ့ ဉာဏ်ရည်က ဆယ်ပုံတစ်ပုံ လျော့သွားလိမ့်မယ်။ အလွယ်ပြောရရင် အရင်ကထက် ပိုထုံအသွားမှာပေါ့။ နှစ်တစ်ရာကြာလို့ မင်းပါရမီ ပြန်ကောင်းလာရင်တောင် အရာအားလုံးက နောက်ကျသွားပြီ။"
စကားဆုံးသည်နှင့် လင်းချန်သည် ရှ၏ ဝမ်းဗိုက်ကို ပြင်းထန်စွာ ကန်ထုတ်လိုက်ရာ လေထဲသို့ လွင့်စင်သွားပြီး ပြိုင်ပွဲကွင်း၏ အောက်ခြေ၌ သတိလစ်ကာ လဲကျသွားသည်။
ပြိုင်ပွဲ၏ ရလဒ်မှာ ရှင်းလင်းသွားပြီ ဖြစ်၏။ လေထဲ၌ ရပ်နေသည့် လင်းချန်သည် အောက်ခြေ၌ လဲကျနေသော ရှအား ငုံ့ကြည့်လိုက်သည်။
အကယ်၍ မျိုးနွယ်စု၏ သတ်ဖြတ်ခြင်းကို တားမြစ်ထားသည့် စည်းကမ်းသာ မရှိလျှင် လင်းချန်သည် ဤပြိုင်ဘက်အား သုတ်သင်ပြီးသား ဖြစ်ပေလိမ့်မည်။
ရှသည် စိတ်ဓာတ်ကျဉ်းမြောင်းပြီး မနာလိုဝန်တိုမှု ပြည့်နှက်နေသူ ဖြစ်သည်။
ပါရမီရှင်တစ်ဦးကို မြင်လိုက်ရသည်နှင့် ထိုသူ၏ အနာဂတ်ကို ဖျက်ဆီးပစ်ရန် အမြဲတမ်း ကြံစည်နေသူ ဖြစ်၏။
သူ့အား နှစ်ပေါင်းတစ်ရာတိုင်အောင် ထုံအသွားစေခြင်းမှာ သူတစ်ချိန်က အထင်သေးခဲ့သည့် သူများ၏ ကျော်တက်ခြင်းကို ခံရစေမည်ဖြစ်ရာ ဤနှိပ်စက်မှုမှာ သူ့အား အကြိမ်တစ်ထောင် သတ်ပစ်လိုက်ခြင်းထက်ပင် ပိုမို နာကျင်စေမည် ဖြစ်သည်။
ပြိုင်ပွဲကွင်းအတွင်း၌ လင်းချန်သည် တင်ဆက်သူမှ ရလဒ်ကြေညာမည်ကို တိတ်ဆိတ်စွာ စောင့်ဆိုင်းနေလိုက်သည်။ ပတ်ဝန်းကျင်ရှိ ကြည့်ရှုစင်မြင့် အသီးသီးမှာမူ တုန်လှုပ်မှုများကြောင့် လုံးဝ တိတ်ဆိတ်ငြိမ်သက်နေသည်။
ဤပြိုင်ပွဲအတွင်း သူသည် အဆင့်လေးဆင့်ကို ကျော်ဖြတ်ကာ ကောင်းကင်နယ်ပယ်၏ အမြင့်ဆုံးအဆင့်သို့ ရောက်ရှိသွားပြီး ထိုနယ်ပယ်ဖြင့်ပင် သေခြင်းရှင်ခြင်းနယ်ပယ် စွမ်းအားနယ်ပယ်မှ အစွမ်းထက်သည့် ရန်သူကို အနိုင်ယူခြင်း ဖြစ်သည်။
ထိုအချိန်၌ လူတိုင်း၏ စိတ်ထဲ၌ အတွေးတစ်ခုသာ ရှိတော့၏။ ယင်းမှာ လင်းချန်သည် ပုံမှန်ယုတ္တိဗေဒများ အားလုံးကို ကျော်လွန်နေသူ ဖြစ်သည်ဟူ၍ပင်။
မျိုးနွယ်စု ကြည့်ရှုစင်မြင့်ပေါ်၌ ကျန်းထျန်ရှင်းသည် ပြိုင်ပွဲကွင်းအတွင်းမှ ထွက်ခွာရန် ပြင်နေသည့် လင်းချန်ကို ကြည့်ကာ ခေါင်းကို တရစပ် ခါယမ်းလိုက်၏။ "ဒီ လင်းချန်ကတော့ တကယ့်ကို မမျှော်လင့်ထားစရာပဲ။"
ကျိုးယီအန်သည်လည်း သက်ပြင်းအရှည်ကြီး ချလိုက်နိုင်ပြီး အသွင်မပြောင်းမီက မြင်တွေ့ခဲ့ရသည့် မိုးကြိုးလျှပ်စီးဓား၏ ပုံရိပ်ကို ပြန်လည် မြင်ယောင်ကာ ဇဝေဇဝါ ဖြစ်သွားသည်။ "ဟုတ်တယ်။ ဒါပေမဲ့ ဘာလို့ အမည်းရောင် ဖြစ်နေတာလဲ။"
အရှေ့ပိုင်းဌာနခွဲ၏ ကြည့်ရှုစင်မြင့်ပေါ်၌ ကျန်းချီမှာ စိတ်ပိုင်းဆိုင်ရာ ပြင်ဆင်ထားပြီးသား ဖြစ်သော်ငြား ခါးသီးစွာ ပြုံးလိုက်သည်။ "ဧကရာဇ်လင်း ဆိုတဲ့ ဂုဏ်ပုဒ်နဲ့ တကယ့်ကို ထိုက်တန်တာပဲ။"
ကျန်းချီ၏ ဘေး၌ ကျန်းဝမ်ရွှမ်းက ယီစင်းအား ဆွဲကာ ထပ်ခါတလဲလဲ အော်ဟစ်နေသည်။ "လင်းညီမလေး၊ မင်းရဲ့ စေ့စပ်ထားတဲ့သူက တကယ့်ကို အံ့ဩစရာပဲ။ မင်း ဘာလို့ သူနိုင်မယ်လို့ ယုံကြည်နေတာလဲဆိုတာ အခုမှ နားလည်တော့တယ်။"
ယီစင်းကမူ အသာအယာ ပြုံးလျက် ခေါင်းညိတ်ပြလိုက်၏။ "ချန်အာက တကယ်ပဲ အံ့ဩစရာကောင်းတဲ့သူပါ။"
ကျန်းဇီတဲက ပြိုင်ပွဲကွင်းအတွင်းမှ ကူးခတ်ထွက်ခွာလာသည့် လင်းချန်ကို ကြည့်လိုက်သည်။ "လင်းညီအစ်ကိုဟာ အခု ကောင်းကင်နယ်ပယ်ရဲ့ အမြင့်ဆုံးအဆင့်မှာပဲ ရှိနေသေးပေမဲ့ သူ့ရဲ့ တိုက်ခိုက်ရေးစွမ်းအားက ငါတို့နှစ်ယောက်ထက် မလျော့ဘူး ထင်တယ်။"
လီယွမ်ဖုန်းသည်လည်း လေးနက်စွာ ခေါင်းညိတ်ပြလိုက်ပြီး သူ၏ မျက်ဝန်းများထဲ၌ လင်းချန်နှင့် တိုက်ခိုက်လိုသည့် စိတ်ဆန္ဒများ ပြည့်နှက်နေသည်။ "ဒီမျိုးနွယ်စု စုဝေးပွဲမှာ လင်းညီအစ်ကိုနဲ့ တိုက်ခိုက်ရမယ့်နေ့ကို မျှော်လင့်နေမိတယ်။"
သူတို့၏ နောက်ကွယ်၌ ကျန်းဇီတဲနှင့် လီယွမ်ဖုန်းတို့၏ စကားကို ကြားသော် ယီစင်းက အသာအယာ ရယ်မောကာ ခေါင်းခါပြလိုက်၏။
အစမှ အဆုံးတိုင် လင်းချန်သည် အစွမ်းကုန်ကို လုံးဝ ထုတ်မသုံးသေးချေ။ စိတ်ဝိညာဉ်စွမ်းအား သုံးမျိုးထဲ၌ သူသည် မိုးကြိုးစိတ်ဝိညာဉ်စွမ်းအား တစ်ခုတည်းကိုသာ အသုံးပြုပြီး ဧကရာဇ်စိတ်ဝိညာဉ်စွမ်းအားမှာမူ အဆင့်တက်ချိန်၌ မရည်ရွယ်ဘဲ ပေါ်ထွက်လာခြင်း ဖြစ်သည်။
ထို့အပြင်... စိတ်ဝိညာဉ်အလင်းတန်းမှာလည်း ကိုးလွှာအထိသာ ပြသထားပြီး နိဗ္ဗာန်ကိုးသွယ်၏ စွမ်းအားကိုသာ ထုတ်ဖော်ခဲ့ခြင်း ဖြစ်၏။
အကယ်၍ လင်းချန်သာ စိတ်ဝိညာဉ်အလင်းတန်း တစ်ဆယ့်နှစ်လွှာစလုံးကို ထုတ်ဖော်ကာ စိတ်ဝိညာဉ်စွမ်းအား သုံးမျိုးစလုံးကို အသက်သွင်းပြီး မိုးကြိုးလျှပ်စီးဓားနှင့် တိမ်တိုက်ဓား နှစ်မျိုးစလုံးကို တစ်ပြိုင်နက် အသွင်ပြောင်းလဲ အသုံးပြုမည်ဆိုလျှင် ကျန်းဇီတဲနှင့် လီယွမ်ဖုန်းတို့ နှစ်ယောက်ပေါင်းလျှင်ပင် လင်းချန်အား ယှဉ်နိုင်လိမ့်မည် မဟုတ်ကြောင်း ယီစင်းက ယုံကြည်ထားသည်။
ယီစင်းသည် ဂုဏ်ယူဝင့်ကြွားစွာဖြင့် ပတ်ဝန်းကျင်ကို ကြည့်လိုက်သည်။ "ရှင်တို့တွေ ငါ့ရဲ့ ချန်အာ တကယ် ဘယ်လောက်အထိ သန်မာတယ်ဆိုတာ လုံးဝ မသိကြသေးဘူးပဲ။"
ပြိုင်ဘက်ကင်း အင်ပါယာ။ အပိုင်း ၂၇၁ ပြီး။
ဘာသာပြန် - Ko Yoohtoo
True Immortal Team