အခန်း ၂၇၂
Vol. 28 Ch. 272
ပြိုင်ဘက်ကင်း အင်ပါယာ။ အပိုင်း ၂၇၂
ဘာသာပြန် - Ko Yoohtoo
True Immortal Team
လင်းချန်၏ စွမ်းဆောင်ရည်မှာ အံ့ဩဖွယ်ကောင်းလောက်အောင် ထူးခြားဆန်းပြားလွန်းသော်လည်း လက်ရှစ်ဖက်ပင်လယ်မျိုးနွယ်စု၏ မျိုးနွယ်စုပေါင်းစုံ သိုင်းပြိုင်ပွဲကြီးမှာမူ စနစ်တကျ ဆက်လက်ကျင်းပနေဆဲပင်။
လင်းချန် ကြည့်ရှုသူများနေရာသို့ ပြန်လည်ရောက်ရှိလာသည့်အခါ လူအများက ဝိုင်းအုံလာကြပြီး သူ၏ စွမ်းဆောင်ရည်ကို အံ့ဩမဆုံး ချီးကျူးနေကြ၏။
အစောပိုင်းက သူပြသခဲ့သည့် အစွမ်းအစမှာ အမှန်တကယ်ပင် မှင်သက်ဖွယ်ကောင်းလှသည်။
ကျန်းဇီတဲသည် သူ၏ သိချင်စိတ်ကို မထိန်းချုပ်နိုင်တော့ဘဲ လင်းချန်အနီးသို့ ကပ်ကာ မေးမြန်းလိုက်၏။
“ညီအစ်ကိုလင်း... မင်း ဘယ်လို လုပ်လိုက်တာလဲ။ နယ်ပယ် လေးဆင့်တောင် တစ်ပြိုင်နက်တည်း ကျော်ဖြတ်နိုင်တာက တကယ့်ကို ကြောက်စရာကောင်းလွန်းတယ်”
လင်းချန်က ရှင်းပြလိုက်၏။
“ရိုးရှင်းပါတယ်။ ငါ့ခန္ဓာကိုယ် တည်ဆောက်ပုံ သန်မာတာကို မင်းတို့ သိသားပဲ။ အဆင့်မတက်ခင်ကတည်းက ခန္ဓာကိုယ်ထဲမှာ စိတ်ဝိညာဉ်စွမ်းအင်တွေ အများကြီး စုဆောင်းထားပြီးသား။ ဖောက်ထွက်ဖို့ အခွင့်အရေး တစ်ခုပဲ စောင့်နေခဲ့တာ။ အဲဒီမှာ သတ်ဖြတ်သူ ရှ က ငါ့ရဲ့ အောင်မြင်မှုစင်မြင့်ထက်ကို တက်လှမ်းနိုင်ဖို့ ကူညီပေးတဲ့ ခြေနင်းကျောက်တစ်ခု ဖြစ်သွားတာပေါ့”
လင်းချန်၏ ရှင်းပြချက်ကို ကြားပြီးနောက် ကျန်းဇီတဲမှာ ခေါင်းအကြိမ်ကြိမ် ရမ်းနေမိသည်။
ကောင်းကင်နယ်ပယ် အဆင့် ၆ မှ ကောင်းကင်နယ်ပယ်၏ အမြင့်ဆုံးအဆင့်သို့ တိုက်ရိုက် ရောက်ရှိသွားရန် လိုအပ်သည့် စိတ်ဝိညာဉ်စွမ်းအင် ပမာဏမှာ အတိုင်းအဆမရှိ များပြားလှ၏။
ထိုမျှလောက် များပြားလှသည့် စိတ်ဝိညာဉ်စွမ်းအင်များကို ခန္ဓာကိုယ်အတွင်း ထိန်းသိမ်းထားပြီး စဉ်ဆက်မပြတ် စုဆောင်းထားနိုင်ရန်မှာ မဖြစ်နိုင်သလောက်ပင်။
သို့သော် လင်းချန်ကဲ့သို့ ကြောက်မက်ဖွယ်ကောင်းသည့် ခန္ဓာကိုယ် တည်ဆောက်ပုံမျိုး ရှိပါကမူ ဖြစ်နိုင်ခြေ ရှိသေးသည်။
လီယွမ်ဖုန်းက စိတ်လှုပ်ရှားစွာ ပြောလိုက်၏။
“ညီအစ်ကိုလင်းရဲ့ လက်ရှိအင်အားနဲ့ဆိုရင် ငါတို့မျိုးနွယ်စုကတော့ အောင်ပွဲတွေ တစ်ဆင့်ပြီးတစ်ဆင့် ရမှာ သေချာသွားပြီ။ အဲဒီအချိန်ကျရင် မင်းနဲ့ငါ သေချာပေါက် ယှဉ်ပြိုင်ရလိမ့်မယ်”
သူ၏ မျက်ဝန်းများထဲ၌ တိုက်ခိုက်လိုစိတ်များ ပြည့်နှက်နေသည်ကို မြင်သည့်အခါ လင်းချန်မှာ ခါးသက်သက် အပြုံးတစ်ခုဖြင့်သာ တိတ်ဆိတ်စွာ ခေါင်းညိတ်ပြလိုက်သည်။
ကျန်းချီက ရုတ်တရက်ဆိုသလို လက်ညှိုးထိုးပြလိုက်သည်။
“ဒါပေမဲ့ ဧကရာဇ်လင်း... ခင်ဗျားတော့ အမှားကြီး မှားသွားပြီ ထင်တယ်။ ခင်ဗျားက သူတို့ရဲ့ ပစ်မှတ် ဖြစ်သွားပြီ”
ကျန်းချီ ညွှန်ပြရာဘက်သို့ ကြည့်လိုက်သည့်အခါ သွေးနီရောင် ဝတ်ရုံများ ဝတ်ဆင်ထားသော လူတစ်စုသည် လူပုလေးမျိုးနွယ်စုတစ်ခု၏ ကြည့်ရှုသူစင်မြင့်ထက်သို့ ဦးတည်သွားနေသည်ကို မြင်လိုက်ရ၏။
ထို သွေးနီရောင်ဝတ်ရုံ ဝတ်ဆင်ထားသူများမှာ သွေးဆာသောခန်းမမှ လူများဖြစ်သည်မှာ သိသာလှသည်။
ထိုသူများသာမက သွေးဆာသောခန်းမ၏ မဟာမိတ်ဖြစ်သည့် မျိုးနွယ်စုများကလည်း လင်းချန်ကို မကျေမနပ်ဖြစ်သော အကြည့်များဖြင့် ကြည့်နေကြသည်။
အမှန်စင်စစ် ဤကဲ့သို့သော မျိုးနွယ်စု အစည်းအဝေး၌ သွေးဆာသောခန်းမကဲ့သို့ အင်အားကြီးသည့် မဟာမိတ်ရှိခြင်းက သူတို့၏ အဆင့်အတန်းကို မြှင့်တင်ပေးနိုင်မည် ဖြစ်၏။
သို့သော် သူတို့၏ မျှော်လင့်ချက်များကို လင်းချန်က ဖျက်ဆီးလိုက်ပြီဖြစ်ရာ လင်းချန်အပေါ် ကောင်းသည့် အမူအရာ ပြသနေကြမည် မဟုတ်ချေ။
တစ်ချိန်တည်း၌ ဝူချွန်ရှန်း၏ မျက်နှာမှာလည်း ပို၍ တင်းမာခက်ထန်လာ၏။
ဝေဝူရွှမ်၏တပည့်ဖြစ်သူသည် ဤမျှလောက် ထူးချွန်သည့် ပါရမီမျိုး ရှိနေလိမ့်မည်ဟု သူ အမှန်တကယ်ပင် ထင်မှတ်မထားချေ။
ပြိုင်ပွဲများမှာ ဆက်လက် ကျင်းပနေဆဲဖြစ်ပြီး ဝူချွန်ရှန်းသည် လင်းချန်နှင့် မျက်နှာချင်းဆိုင် တွေ့ဆုံကာ ခွင့်လွှတ်မှု ရရှိရန် နည်းလမ်း ရှာဖွေနေ၏။
သို့သော် လင်းချန်က တွေ့ဆုံခွင့် လုံးဝမပေးဘဲ အကြိမ်ကြိမ် ငြင်းပယ်သည်။
အရှေ့ပိုင်းဌာနခွဲ၏ ကြည့်ရှုသူစင်မြင့်၌မူ အခြေအနေများမှာ ပုံမှန်အတိုင်း ပြန်ဖြစ်သွားပြီး ပွဲစဉ်များ တစ်ခုပြီးတစ်ခု ကျင်းပနေ၏။
လီယွမ်ဖုန်းနှင့် ကျန်းဇီတဲတို့မှာ အကြိတ်အနယ် ငြင်းခုံနေကြပြီး ကျန်းချီနှင့် ကျန်းဝမ်ရွှမ်းတို့မှာလည်း ပိုမို ချစ်ခင်လာကြသည့် စုံတွဲများအလား ပြိုင်ပွဲများအကြောင်းကို စိတ်အားထက်သန်စွာ ဆွေးနွေးနေကြသည်။
ထူးခြားသော စုံတွဲတစ်တွဲဖြစ်သည့် လင်းချန်နှင့် ယီစင်းတို့ကမူ ပုံမှန်အတိုင်းပင် ပြိုင်ပွဲများကို ကြည့်ရှုရင်း တစ်ဦးနှင့်တစ်ဦး အပြန်အလှန် ဆွေးနွေးနေကြ၏။
တစ်လခွဲခန့် ကြာပြီးနောက် ဒုတိယအဆင့် ပြိုင်ပွဲများ ပြီးဆုံးသွားရာ ပြိုင်ပွဲဝင် ၄၄၇ ဦး ကျန်ရှိသည်။
ထိုအထဲမှ တစ်ဦးမှာ မဲပေါက်၍ နောက်တစ်ဆင့်သို့ တိုက်ရိုက်တက်ပြီး ကျန်ရှိသည့် ၄၄၆ ဦး ယှဉ်ပြိုင်ကြရာ ၂၂၃ ဦး အောင်နိုင်ကြသည်။
တတိယအဆင့်၌မူ တစ်ဦးက မဲပေါက်ပြီး ၁၁၁ ဦး အောင်ပွဲရသည်။ မဲပေါက်သူ နှစ်ဦး ထပ်မံ ယှဉ်ပြိုင်ရပြီး တစ်ဦးသာ အနိုင်ရသဖြင့် စုစုပေါင်း ၁၁၂ ဦး ကျန်ရှိ၏။
ထို့နောက် စတုတ္ထအဆင့်၌ ၅၆ ဦး၊ ပဉ္စမအဆင့်၌ ၂၈ ဦး၊ ဆဋ္ဌမအဆင့်၌ ၁၄ ဦးနှင့် သတ္တမအဆင့်၌ ၇ ဦး အသီးသီး အောင်ပွဲရကြသည်။
နောက်ဆုံးအဆင့် ပြိုင်ပွဲမှာ ဤ ၇ ဦးကြား၌ ယှဉ်ပြိုင်ရမည်ဖြစ်ပြီး ပြိုင်ပွဲဝင် တစ်ဦးစီသည် ပွဲစဉ် ၆ ပွဲစီ ယှဉ်ပြိုင်ရမည် ဖြစ်သည်။ အဆင့်သတ်မှတ်ချက်ကို အနိုင်ရရှိသည့် ပွဲစဉ်အရေအတွက်ပေါ် မူတည်၍ ဆုံးဖြတ်မည် ဖြစ်၏။
သို့သော် နောက်ဆုံးဗိုလ်လုပွဲကိုမူ လျှို့ဝှက်စွာ ကျင်းပပြီး ကျန်းဇီတဲနှင့် လီယွမ်ဖုန်းတို့ နှစ်ဦးသာ ဒိုင်အဖြစ် ဆောင်ရွက်ကြသည်။
အခြား မည်သူတစ်ဦးတစ်ယောက်ကိုမျှ ကြည့်ရှုခွင့် မပြုချေ။ အဘယ်ကြောင့်ဆိုသော် ဤ ၇ ဦးမှာ လက်ရှိအချိန်၌ လက်ရှစ်ဖက်ပင်လယ်မျိုးနွယ်စု၌ အသန်မာဆုံးသူများ ဖြစ်နေကြပြီး သူတို့သည် ရှေးဟောင်းလူသားမျိုးနွယ်စု အမွေအနှစ်နယ်မြေသို့ သွားရောက်ရာ၌ မျိုးနွယ်စုကို ကိုယ်စားပြုရမည့်သူများ ဖြစ်သောကြောင့်ပင်။
၁။ ကျန်းဇီတဲ - လက်ရှစ်ဖက်ပင်လယ်မျိုးနွယ်စု (သေခြင်းရှင်ခြင်း နယ်ပယ်၊ စိတ်ဝိညာဉ်နယ်ပယ်)
၂။ ကျန်းချီ - လက်ရှစ်ဖက်ပင်လယ်မျိုးနွယ်စု အရှေ့ပိုင်းဌာနခွဲ (သေခြင်းရှင်ခြင်း နယ်ပယ်၊ စွမ်းအားနယ်ပယ်)
၃။ ကျန်းဝမ်ရွှမ်း - လက်ရှစ်ဖက်ပင်လယ်မျိုးနွယ်စု အနောက်ပိုင်းဌာနခွဲ (သေခြင်းရှင်ခြင်း နယ်ပယ်၊ စွမ်းအားနယ်ပယ်)
၄။ ကျန်းဇီချီ - လက်ရှစ်ဖက်ပင်လယ်မျိုးနွယ်စု တောင်ပိုင်းဌာနခွဲ (သေခြင်းရှင်ခြင်း နယ်ပယ်၊ စွမ်းအားနယ်ပယ်)
၅။ ကျန်းကျန်း - လက်ရှစ်ဖက်ပင်လယ်မျိုးနွယ်စု မြောက်ပိုင်းဌာနခွဲ (သေခြင်းရှင်ခြင်း နယ်ပယ်၊ စွမ်းအားနယ်ပယ်)
၆။ လီယွမ်ဖုန်း - နှောင်ကြိုးမဲ့ဂိုဏ်း (သေခြင်းရှင်ခြင်း နယ်ပယ်၊ စိတ်ဝိညာဉ်နယ်ပယ်)
၇။ လင်းချန် - ဟွာရှာအင်ပါယာ (ကောင်းကင်နယ်ပယ်၊ အမြင့်ဆုံးအဆင့်)
ပြိုင်ပွဲ၏ တိကျသည့် ရလဒ်များကိုမူ အခြားသူများ မသိရှိနိုင်စေရန် လျှို့ဝှက်ထား၏။
ထူးခြားသည့် အပြောင်းအလဲမရှိဘဲ ဤ ၇ ဦးနှင့် ယီစင်းတို့အပါအဝင် စုစုပေါင်း ၈ ဦးသည် ရှေးဟောင်းလူသားမျိုးနွယ်စု အမွေအနှစ်နယ်မြေသို့ သွားရောက်ရန် ရွေးချယ်ခံရသည်။
ထို့ကြောင့် သူတို့၏ အစစ်အမှန် စွမ်းအားများကို ဖုံးကွယ်ထားခြင်းမှာ ပညာရှိသည့် နည်းဗျူဟာတစ်ခုပင် ဖြစ်၏။
ကြည့်ရှုသူများစွာ ရှိနေသည့်အပြင် လူသားမျိုးနွယ်စုများမှ မဟာမိတ်များစွာလည်း ပါဝင်နေရာ သူတို့၏ တိုက်ခိုက်မှု အသေးစိတ်အချက်အလက်များ မပေါက်ကြားဟု မည်သူမျှ အာမမခံနိုင်ပေ။
အကယ်၍ ပေါက်ကြားသွားပါက အခြားသော အင်အားစုများက ကြိုတင် သိရှိသွားပေလိမ့်မည်။
မိမိအကြောင်းနှင့် ရန်သူ့အကြောင်းကို သိရှိထားခြင်းက တိုက်ပွဲတိုင်း၌ အောင်မြင်မှု ရရှိစေနိုင်၏။
ထို့ကြောင့် မိမိတို့၏ အစစ်အမှန် စွမ်းရည်များနှင့် ဝှက်ဖဲများကို ဖုံးကွယ်ထားခြင်းသည်လည်း အောင်မြင်မှုအတွက် နည်းဗျူဟာတစ်ခုပင် ဖြစ်သည်။
နောက်ဆုံးဗိုလ်လုပွဲအပြီး၌ လက်ရှစ်ဖက်ပင်လယ်မျိုးနွယ်စုက ရလဒ်များကို ထုတ်ပြန်ကြေညာသည်။
လီယွမ်ဖုန်းနှင့် ကျန်းဇီတဲတို့မှာ ၄ ပွဲနိုင် ၁ ပွဲရှုံးဖြင့် ပူးတွဲ ပထမရရှိကြ၏။ ထို့နောက် ကျန်းချီက တတိယ၊ ကျန်းဝမ်ရွှမ်းက စတုတ္ထ၊ ကျန်းဇီချီက ပဉ္စမ၊ ကျန်းကျန်းက ဆဋ္ဌမနှင့် လင်းချန်က သတ္တမ အသီးသီး ရရှိကြသည်။
ဤအဆင့်သတ်မှတ်ချက်ကို မြင်သည့်အခါ လူအများမှာ ဝေခွဲမရ ဖြစ်ကုန်ကြ၏။
လင်းချန်သည် လူအများအပြားကို အလွယ်တကူ အနိုင်ယူနိုင်သည့် စွမ်းရည်ရှိသည်မှာ ထင်ရှားပါလျက်နှင့် အဘယ်ကြောင့် သတ္တမအဆင့်သာ ရရှိသနည်း။
အချို့ကမူ အခြားသူများ၏ စွမ်းအားမှာလည်း အလွန်တရာ ကြီးမားလွန်းသဖြင့် လင်းချန်မှာ သတ္တမအဆင့်သို့ ရောက်သွားရခြင်း ဖြစ်နိုင်သည်ဟု ယူဆကြ၏။
ဤအတွေးမှာ လူအများကြား၌ တဖြည်းဖြည်း ပျံ့နှံ့သွားသော်လည်း တစ်စုံတစ်ခု လွဲချော်နေသကဲ့သို့ ခံစားနေကြရဆဲ ဖြစ်သည်။
ဗိုလ်လုပွဲ၏ အသေးစိတ် အချက်အလက်များကို သိရှိလိုသဖြင့် မြောက်ပိုင်းဌာနခွဲ၏ ခေါင်းဆောင် ကျန်းခယ်ရန်က ကျန်းကျန်းအား မေးမြန်းသော်လည်း ပြိုင်ပွဲဝင် ၇ ဦးလုံးသည် ဗိုလ်လုပွဲ၏ အချက်အလက်များကို မပေါက်ကြားစေရန် သူတို့၏ အတွင်းစိတ်မိစ္ဆာအား တိုင်တည်၍ သစ္စာဆိုထားကြကြောင်း သိလိုက်ရ၏။
သို့သော် ကျန်းခယ်ရန် သတိထားမိလိုက်သည်မှာ ဤမေးခွန်းကို မေးလိုက်ချိန်၌ ကျန်းကျန်း၏ မျက်ဝန်းများထဲ၌ တစ်စုံတစ်ခုကို ပြန်လည်အမှတ်ရနေသယောင် ရှိနေပြီး ထိုမျက်ဝန်းများထဲ၌ ကြောက်ရွံ့ခြင်း၊ တုန်လှုပ်ခြင်းနှင့် ရိုသေလေးစားခြင်း အရိပ်အယောင်များ တွဲဖက်၍ ပေါ်ထွက်နေခြင်းပင် ဖြစ်သည်။
ထို့နောက် ကျန်းထျန်ရှင်းက ရှေးဟောင်းလူသားမျိုးနွယ်စု အမွေအနှစ်နယ်မြေသို့ သွားရောက်မည့် ကိုယ်စားလှယ်များကို အတည်ပြုလိုက်ပြီဖြစ်ကြောင်း ကြေညာလိုက်သည်။
ထိုသူများမှာ ဗိုလ်လုပွဲမှ ပြိုင်ပွဲဝင် ၇ ဦးနှင့် ယီစင်းတို့ပင် ဖြစ်သည်။ လက်ရှစ်ဖက်ပင်လယ်မျိုးနွယ်စု၏ ပြိုင်ပွဲများမှာ ဆက်လက်ကျင်းပနေပြီး ဆေးဖော်စပ်ခြင်း၊ လက်နက်သွန်းလုပ်ခြင်းနှင့် အစီအရင်ပြိုင်ပွဲများ စတင်တော့မည် ဖြစ်၏။
ကိုယ်စားလှယ် အမည်စာရင်းများကို ကြေညာပြီးနောက် ကျန်းထျန်ရှင်းသည် သူ၏ မျိုးနွယ်စု နေအိမ်သို့ ပြန်လာရာ မကြာမီမှာပင် ကျိုးယီအန်က နောက်ကနေ ထပ်ကြပ်မကွာ လိုက်ပါလာ၏။
ကျိုးယီအန် ဝင်လာသည်ကို မြင်သည့်အခါ ကျန်းထျန်ရှင်းက ပြုံးလိုက်သည်။
“သတင်းပို့ပြီးပြီလား။”
ကျိုးယီအန်က ခေါင်းညိတ်ပြရင်း စိတ်လှုပ်ရှားစွာ ပြောလိုက်၏။
“လင်းချန်ရဲ့ တိုက်ခိုက်ရေးပါရမီက စိတ်ကူးထားတာထက်ကို အဆမတန် ကြောက်စရာကောင်းလွန်းတယ်။ ဒါကြောင့် ခေါင်းဆောင်ကြီးဆီ ချက်ချင်း အသိပေးလိုက်ရတာ။”
ကျိုးယီအန်၏ စကားကို ကြားသည့်အခါ ကျန်းထျန်ရှင်းကလည်း အလေးအနက်ပင် ခေါင်းညိတ်လိုက်၏။
“ဒီလူကတော့လေ... တကယ်လို့သာ သူ့အစွမ်းကို ဖုံးကွယ်ဖို့ မလိုရင် သူ့ကို သတ္တမအဆင့်မှာ တမင်တကာ ထားမှာ မဟုတ်ဘူး။”
စင်စစ်အားဖြင့် နောက်ဆုံးဗိုလ်လုပွဲ ကျင်းပစဉ်အခါက လင်းချန်သည်သာလျှင် အစစ်အမှန် နံပါတ်တစ် ဖြစ်သည်။ အဘယ်ကြောင့်ဆိုသော် ဗိုလ်လုပွဲ၏ ပထမဆုံး ပွဲစဉ်မှာ လင်းချန်နှင့် လီယွမ်ဖုန်းတို့၏ ယှဉ်ပြိုင်မှုပင် ဖြစ်သောကြောင့်ပင်။
လီယွမ်ဖုန်းမှာ တောင်ပိုင်းဒေသတစ်ခုလုံး၌ ပါရမီရှင်အဖြစ် ကျော်ကြားသူဖြစ်ပြီး နိဗ္ဗာန်ဆယ်ဆင့်ကို ချိုးဖျက်ထားနိုင်သူလည်း ဖြစ်၏။
ထို့အပြင် သူသည် ပြိုင်ဘက်၏ စိတ်ဝိညာဉ်စွမ်းအင် ခုခံကာကွယ်မှု ၄၀ ရာခိုင်နှုန်းကို လျစ်လျူရှုနိုင်စွမ်းရှိသည့် အလယ်အလတ်အဆင့် သိုင်းဝိညာဉ် ထိုးဖောက်ခြင်း စွမ်းရည်ကိုလည်း ပိုင်ဆိုင်ထား၏။
ဤကဲ့သို့ ကြောက်မက်ဖွယ်ကောင်းသည့် ပြိုင်ဘက်နှင့် ရင်ဆိုင်ရချိန်၌ လီယွမ်ဖုန်းကိုယ်တိုင်ကလည်း လင်းချန်အား သူ၏ အစွမ်းအစ အပြည့်အဝကို အသုံးပြုရန် ခွင့်ပြု၏။ ထို့ကြောင့်ပင် လင်းချန်သည်လည်း သူ၏ ဆန္ဒအတိုင်း စိတ်ဝိညာဉ်စွမ်းအင် အရှိန်အဝါအားလုံးကို ပေါက်ကွဲထွက်စေလိုက်သည်။
တစ်ခဏချင်းမှာပင် ဆယ့်နှစ်လွှာသော စိတ်ဝိညာဉ်အလင်းတန်းများ ထွက်ပေါ်လာပြီး လူအများ၏ မျက်လုံးများကို စူးရှတောက်ပစွာဖြင့် ကျိန်းစပ်သွားစေကာ လူတိုင်းကို မှင်သက်မိသွားစေ၏။
ကြည့်ရှုနေသည့် ကျိုးယီအန်ဆိုလျှင် လင်းချန်၏ နိဗ္ဗာန်စက်ဝန်းဆယ့်နှစ်သွယ်ကြောင့် အလွန်အမင်း တုန်လှုပ်သွားရကာ ပင်လယ်ရေများပင် သီးကုန်သည်။
ပြင်းထန်လှသည့် တိုက်ပွဲအပြီး၌ လင်းချန်သည် အနည်းငယ် ထိန်းသိမ်းထားသော်လည်း ဆိုလိုသည်မှာ မိုးကြိုးစိတ်ဝိညာဉ်စွမ်းအင်ကိုသာ အပြည့်အဝ အသုံးပြုပြီး စိတ်ဝိညာဉ်ပစ္စည်း တိမ်တိုက်ဓား၊ နှင်းတောင်ရေခဲစွမ်းရည်နှင့် ဧကရာဇ်အာဏာ စိတ်ဝိညာဉ်စွမ်းအင်တို့ကို အသုံးမပြုသော်ငြား သူ၏ များပြားလှသော တိုက်ပွဲအတွေ့အကြုံများကြောင့် လီယွမ်ဖုန်းကို အနိုင်ယူနိုင်၏။
ထို့အတူပင် လင်းချန်က သူ၏ အစွမ်းအစများကို အပြည့်အဝ ထုတ်ဖော်လိုက်သည့်အခါ ကျန်းဇီတဲသည်လည်း တိုက်ပွဲ၌ ရှုံးနိမ့်သွားရသည်။ ကျန်ရှိသည့် သူများကိုမူ ဆိုဖွယ်ရာ မရှိတော့ချေ။
ထို့ကြောင့် ဗိုလ်လုပွဲ၏ အစစ်အမှန် အခြေအနေမှာ လင်းချန်သည် ရှုံးပွဲမရှိသည့် အနေအထားဖြင့် ချန်ပီယံပလ္လင်ထက်၌ စံမြန်းနေခြင်းပင် ဖြစ်သည်။
ကောင်းကင်နယ်ပယ်၏ အမြင့်ဆုံးအဆင့်၌ ရှိနေပါလျက်နှင့် ဤမျှလောက်သော အစွမ်းအစမျိုးကို ပေါက်ကွဲထုတ်နိုင်သည့် လင်းချန်မှာ လက်ရှစ်ဖက်ပင်လယ်မျိုးနွယ်စုနှင့် နှောင်ကြိုးမဲ့ဂိုဏ်းတို့အတွက် သေချာပေါက် အထူးဝှက်ဖဲတစ်ခု ဖြစ်လာပေလိမ့်မည်။
စည်းကမ်းချက်များအရ ရှေးဟောင်းလူသားမျိုးနွယ်စု အမွေအနှစ်နယ်မြေသို့ သွားရောက်ရာ၌ လက်ရှစ်ဖက်ပင်လယ်မျိုးနွယ်စုနှင့် သူတို့၏ မဟာမိတ်ဖြစ်သည့် နှောင်ကြိုးမဲ့ဂိုဏ်း၏ အမည်နာမဖြင့်သာ သွားကြရမည် ဖြစ်သည်။
ထို ရှေးဟောင်းလူသားမျိုးနွယ်စု အမွေအနှစ်နယ်မြေအတွင်း၌ မည်သို့သော အခြေအနေမျိုး ရှိနေမည်ကိုမူ သူတို့လည်း အသေအချာ မသိကြချေ။
သို့သော် သူတို့ သိထားသည်မှာ ထိုနေရာအတွင်းသို့ ရောက်ရှိသွားသည့် ထိုရှစ်ဦး၏ ရရှိမည့် အကျိုးအမြတ်များသည် စုပေါင်းအင်အားအပေါ်၌သာ မူတည်နေမည်ဟူ၍ ဖြစ်သည်။
အမွေအနှစ်နယ်မြေအတွင်းသို့ ဝင်ရောက်သွားသည်နှင့် ပြင်ပကမ္ဘာနှင့် အဆက်အသွယ် ပြတ်တောက်သွားမည်ဖြစ်ပြီး အတွင်းပိုင်း အခြေအနေကိုလည်း စုံစမ်းထောက်လှမ်းနိုင်မည် မဟုတ်ပေ။
ထိုသို့သော အခြေအနေမျိုး၌ တစ်ဦးကိုတစ်ဦး နောက်ကျောမှ ဓားဖြင့်ထိုးခြင်းများ ရှိလာနိုင်ခြေ ရှိသည်။ လင်းချန်အား အထူးဝှက်ဖဲအဖြစ် ထားရှိခြင်းမှာ သူတို့အပေါ် မကောင်းကြံစည်လိုသူများကို ခန့်မှန်းချက် လွဲချော်သွားစေရန် ဖြစ်၏။
ထိုသူများက စတင် လှုပ်ရှားလာသည့်အခါမှသာ လင်းချန်က သူ၏ ကြောက်မက်ဖွယ်ကောင်းသော စွမ်းအားများကို ထုတ်ဖော်၍ ရန်သူများကို ပြန်လည် တိုက်ခိုက်ချေမှုန်းရန်ပင် ဖြစ်သည်။
ပြိုင်ဘက်ကင်း အင်ပါယာ။ အပိုင်း ၂၇၂ ပြီး။
ဘာသာပြန် - Ko Yoohtoo
True Immortal Team